Arbëreshi që e kishte në shpirt Kosovën

Posted on by Kult Plus

Nga Sali Bashota 

(Duke e kujtuar Zef Giuseppe Chiaramonte (1946-2024)

Unë pata nderin të mësoja shumëçka për Arbëreshët e Italisë, sidomos për ruajtjen e gjuhës dhe të kulturës arbëreshe, pikërisht duke njohur dhe komunikuar me Zef Kjaramonten. Më thoshte vazhdimisht: “shkruaje Kjaramonte, mbiemrin tim”.

Arbëreshi i Sicilisë, miku i madh i shqiptarëve, adhuruesi i veshjes kombëtare, ishte njëri ndër pjesëmarrësit më të rregullt të Seminarit Ndërkombëtar për Gjuhën, Letërsinë dhe Kulturën Shqiptare. Kishte shumë miq në Prishtinë dhe e donte Kosovën deri në pafundësi.

Nga shënimet biografike në librin e tij me poezi me titullin “Vulë uji” (2015), të cilin ma kishte dhuruar me fjalët: “Mikut të vjetër, me gëzim”, i botuar paralelisht në shqip dhe italisht, ndër të tjera, thuhet se Zefi ishte studiues i Evropës Lindore, drejtor i Bibliotekës së Palermos, korrespondent i Radio Vatikanit – programi në gjuhën shqipe, sekretar i Komitetit Italian Pro Kosova, përgjegjës për kulturën arbëreshe dhe shqiptare i Qendrës Ndërkombëtare për Studimet për Mitin, përkthyes zyrtar, autor i disa veprave etj. Pra, kontributi i tij ishte përqendruar në shumë fusha, duke e dalluar sidomos përkushtimin e tij në mësimin e arbërishtes për gjeneratat e reja.

Në një nga komunikimet e mia me Zefin, më 13 nëntor 2023, më shkruante se ishte duke i rishikuar poezitë e reja që ende nuk i kishte botuar dhe se do t’i dërgonte sa më parë. U pajtua që libri i tij me poezi të botohet nga PEN Qendra e Kosovës me parathënien time. Ishte shumë i lumtur për idenë e botimit. Më shkroi: “Të botohen krejt në Kosovë jam dakord, se me Kosovën më lidhen shume kujtime dhe shumë miqësi”. Gjithashtu, më tha: “Te lutem të ma dërgosh edhe një herë kopjen kompjuterike të numrit të fundit të revistës PEN Kosova, aty ku janë poezitë e mia, ngase nuk i gjej më në kompjuter”.

Ndërsa në komunikimit tim të fundit me Zefin, më 8 shkurt 2024, më shkroi: “Prit do ditë, ngase poezitë i kam te kompjuteri jashtë qytetit. Si shkoj atje për fundjavë do t’i nis menjëherë.

Ndërkohë, zgjidh ato që mendon nga ato të botuara. Mirudëgjoshim”.

Por, pas tri ditëve, pra më 11 shkurt 2024, erdhi befas fundjava bashkë me vdekjen. Erdhi më shpejt së dorëshkrimi i poetit. Zef Kjaramonte iku në amshim. Ai ishte njeri me virtyte të larta. I buzëqeshur. I përzemërt. I afërt me të gjithë. Në kujtimet e miqve të tij të shumtë, pa dyshim, do të mbetet Arbëreshi më i dashur që ushqehej gjithmonë me respektin dhe krenarinë e shqiptarëve, duke qenë vetë protagonist i jetës dhe i historisë sonë, edhe në kohët e vështira, por edhe më vonë.

Jeta dhe veprimtaria e tij i kanë shenjat e veçanta që ndërlidhen, në radhë të parë, me gjuhën dhe letërsinë shqiptare. Zefi ishte njëri nga idealistët më të përkushtuar që dëshironte ta kurorëzonte dijen, kulturën, besimin, misionin e tij në relacion me arbëreshët dhe shqiptarët. Me shpirt. Me zemër. Me dashuri.

Qoftë gjithmonë i ndritur dhe i paharruar kujtimi për të.

Poezi nga Zef Chiaramonte

SI KOSOVA U’

pranvera të varfëra
vitet tanë pa të kora
tue pritun vapën
dogja fletë* e dru
milikurë** t’i bëj ballë dimrit

(1989)

* formë arb. për gjethe
** formë arb. për lakuriq

SHTËPIA E ËNDRRAVE

shpinë e ëndrrave
dje e pashë
dhe stipin* besnik
që në shishe të bardha
pangara
dendur ruan lëngun
e pemëve të kuqe
dhe djellore të bëra**
në stina të ngrohta
e të lumta
kur në zemër
ti më pëlcisje

* dollapi, fjalë arb. e huazuar nga areali italian.
** të pjekura

VULË UJI

e detit
kur ti lahesh
vale të isha
dhe shkumë
një ishull
ne të dy
ta bëjmë
ishullin që
duket
zhduket
e prapë riduket
lojë e pangopur
e ujit dhe e zjarrit

DONIKA

si u leve e u leve ti*
vajza ime e pare
nata m’u bu ditë
t’errëtit dritë
tregimet arbëreshe
arbërisht
me ty morën hov
anekdotat e Çettës
gjetën veshë

* formë arb. për si lindeshe ti, përdorur te vjershat e Zef Skiro-it senior.

KODRA E DIELLIT

të këputura degë
gjak i shprishur
këtu erdhëm tok
një ditë gushti
abetari largesë për të sfiduar
dhe drejtshkrimi
vajza të dalldisura
në dritare na prisnin
secila kalorësin e saj
me sy duke pirë
fshehurazi
ajo  nga kati i parë
një cigare ma kërkoi
flutur paketa
ime e kuqe Pallmali
gjirit në lulëzim
i bëri gol
pesë shekuj vetmi
u zhdukën si me magji

TI

larg prej teje
këtu n’Prishtinë
kur ti n’ëndërr më fanite
më bën të lumtur si atë ditë
kur në dhomzën tone të pastër
m’u dhurove vajzë e re
si përtekë je mes e hollë
sytë e tu flasën pa fjalë
ende folmë më ka ënda
ëndrra e ëmbël të vazhdojë
dhe me germat tona sot
Luc Gliqinin* të gjallëroj
tërë lëkurën të përshkoj
më ngjitet nëpër gishta
erë myshku po më vjen
buzët etura qëmoti
potisen** pa kufi
gjuha veshin të palos
ti dridhe si një dhri***
dy kapronj porsi n’livadh
bredhën lehtë në gjirin tend
janë si molla sisët tote
kur më dorën t’i limoj
lart prej qafe shpina jote
deri poshtë te rehjet-shalë
duket fushë bore pashkelur
rrafsh mëndafshi levantin
buzët gjuha dhëmbët sytë
ta lëvrojnë pa pushim
mes dy shtyllave të buta
atje lart ku ato bashkohen
skaj trikëndshit magjik
lulja jote e fshehur vlon
sevdalli si unë ta mbledh
loton vesë e dëshirim
era e saj më ngazëllon
ti e bukur kur më prek
hapekrahë n’grykë më merr
gjaku çmendet më përvëlon
si lum trupin më përshkon
te deti yt i thellë
rrjedhën shuan dhe pushon

*krs. Demetrio Camarda, Appendice al Saggio di grammatologia camparata…, Prato, 1866, f.195-197
**formë arb. për vaditen
***formë arb. për hardhi

(Marrë nga libri me poezi “Vulë uji”/”Marca d’acqua”, Nuova Ipsa, Palermo, 2015). / KultPlus.com

Revista spanjolle “Que’! Madrid”: Udhëtim i mrekullueshëm nëpër Shqipëri

Posted on by Kult Plus

Shqipëria është një perlë e vërtetë për t’u zbuluar në Ballkan. E njohur gjerësisht si Vendi i Shqiponjave, ajo ka një vijë bregdetare 362 kilometra të lagur nga detet Adriatik dhe Jon, shkruan Veronica Santana për të përditshmen spanjolle “Que’! Madrid”.

Një nga veçoritë e saj është peizazhi i pacënuar që ofron një natyrë te egër dhe të virgjër.

Vendi ballkanik gjithashtu thekson trashëgiminë kulturore mbresëlënëse të ndikimeve romake, greke, bizantine, osmane dhe sllave, ndër të tjera.

Pas përfundimit të Luftës së Dytë Botërore, Shqipëria ka qenë e izoluar prej disa dekadash.

Që nga rënia e regjimit, ajo gradualisht është hapur me vendet e tjera, duke u bërë sot një destinacion turistik në zhvillim.

Natyra dhe peizazhet e saj janë mjaft tërheqëse, ku mund të zbuloni sisteme malore dhe liqene spektakolare.

Udhëtarët do të kenë mundësinë të vizitojnë qytetet historike si Butrintin, Beratin dhe Gjirokastrën, të shpallura si vende të trashëgimisë botërore nga UNESCO për veçantinë e tyre arkitekturore, artistike dhe kulturore.

Gjithashtu, mund të vizitoni liqenin e Ohrit, një nga më të vjetrit në planet, si dhe kishën e Shën Sofisë që daton në shekullit XI.

Duke vazhduar turin në Ballkan, do të keni mundësinë të vizitoni edhe Manastirin e Shën Naumit, i njohur për arkitekturën e stilit bizantin; qytetin e Korçes, me pazarin e saj osman dhe katedralen e saj ortodokse, dhe Kalanë e Lëkurësit, nga e cila mund të shijoni pamjet më të bukura të gjirit të Sarandës.

Nuk mund të humbisni Rivierën Shqiptare apo Tiranën, kryeqytetin e Shqipërisë, me Kullën e Sahatit, Xhaminë e Et’Hembeut ose sheshin kryesor të saj, të kryesuar nga statuja e heroit kombëtar Skënderbeu.

Zbulimi i Shqipërisë është një përvojë e paharrueshme, ku mund të shijoni Ballkanin dhe vende të mrekullueshme me histori legjendare dhe tradita të jashtëzakonshme. //a.i/KultPlus.com

Gran viaje por los Balcanes, Albania y Macedonia del Norte

Dita e Shën Valentinit: Origjina dhe festimet e ditëve moderne në mbarë botën

Posted on by Kult Plus

Dita e Shën Valentinit është një festë që festohet çdo vit më 14 shkurt. Origjina e saj është disi e paqartë, por përgjithësisht besohet se ka filluar si një festë e krishterë për nder të Shën Valentinit. Sipas legjendës, Shën Valentini ishte një prift romak që i bënte martesat në fshehtësi dhe përfundimisht u martirizua për veprimet e tij.

Sot, Dita e Shën Valentinit festohet në shumë vende të botës, megjithëse zakonet dhe traditat që lidhen me festën ndryshojnë në varësi të kulturës. Në Shtetet e Bashkuara, është një ditë e njohur për çiftet për të shkëmbyer dhurata dhe për të kaluar kohë së bashku, shpesh me një darkë romantike ose një dalje të veçantë. Është gjithashtu e zakonshme që njerëzit t’u japin kartat e Ditës së Shën Valentinit ose dhurata të vogla miqve, anëtarëve të familjes ose kolegëve.

Në disa vende të tjera, si Japonia dhe Koreja e Jugut, Dita e Shën Valentinit është një ditë kur gratë u bëjnë dhurata burrave, dhe jo anasjelltas. Në këto kultura, është tradicionale që gratë t’u japin çokollatë ose ushqime të tjera burrave për të cilët janë të interesuar, ose të shprehin vlerësimin e tyre për kolegët ose miqtë meshkuj.

Në vende të tjera, si Meksika dhe pjesë të Amerikës Latine, Dita e Shën Valentinit festohet si një ditë miqësie dhe dashurie, dhe jo vetëm dashuri romantike. Kjo njihet si “Dia del Amor y la Amistad”, ose Dita e Dashurisë dhe Miqësisë, dhe është një kohë që njerëzit të shprehin vlerësimin e tyre për të gjitha marrëdhëniet e rëndësishme në jetën e tyre.

Ndërsa në Kosovë dhe Shqipëri, kjo ditë festohet pak a shumë si në Shtetet e Bashkuara të Amerikës, ku çiftet shkëmbejnë dhurata mes vete apo realizojnë dalje më të veçanta. Këtë ditë çifti ja dedikojnë njëri tjetrit në mënyrë ekskluzive për të shprehur dashurinë e tyre.

Në përgjithësi, Dita e Shën Valentinit është një festë që ka evoluar me kalimin e kohës dhe ka marrë shumë kuptime dhe tradita të ndryshme në mbarë botën. Pavarësisht zakoneve dhe traditave të ndryshme, ajo mbetet një ditë popullore për të festuar dashurinë dhe marrëdhëniet në shumë kultura. / KultPlus.com

Sa do doja që valë të ftohta të vërshonin mbi mendjen time…

Posted on by Kult Plus

Poezi nga Ezra Pound

Françeska

Ti erdhe prej natës ku ishe kredhur
Dhe në duar mbaje lule,
Tani do dalësh prej një rrungaje njerëzish,
Prej një kaosi fjalësh rreth teje.

Unë që të kam parë mes gjërash parësore
U nxeha kur ta përmendën emrin
Në vende të rëndomta.
Sa do doja që valë të ftohta të vërshonin mbi mendjen time
Dhe bota të venitej porsi një gjeth i vdekur,
Ose si lule qumështorja dhe të flakej tej,
Që të mund të t’rigjej
Të vetme.

Përktheu nga anglishtja: Redi Sheqeri / KultPlus.com

Media spanjolle ‘La Vanguardia’: Vizitoni Shqipërinë, vendin e bukur mes Ballkanit dhe Adriatikut

Posted on by Kult Plus

Udhëtoni në Shqipëri, në vendin e bukur mes Ballkanit dhe Adriatikut dhe me çmime fantastike. Ky vend ballkanik nuk është një destinacion popullor turistik, por fsheh bukuri natyrore unike dhe shumë histori, shkruan Neus Palou në një artikull të botuar në të përditshmen spanjolle “La Vanguardia”.

Nëse dëshironi pushime ndryshe, ju rekomandojmë të zbuloni Shqipërinë.

Një mundësi unike për të zbuluar Shqipërinë dhe historinë e saj intriguese, ku gjurmët osmane dhe sovjetike kanë formuar një komb të begatë dhe të lirë.

Pse duhet të udhëtoni në Shqipëri në 2024?

Në Shqipëri mund të eksploroni vende me bukuri natyrore dhe kulturore midis Adriatikut, Alpeve dhe Ballkanit.

Gjeni qytete mesjetare plot histori, teatro, galeri, muzikë, arkitekturë, tradita dhe kënaqësi gastronomike.

Peizazhet dhe parqet natyrore me lumenj, ujëvara dhe liqene me ngjyra të gjalla janë po aq të mahnitshme.

Zhytuni në shijen mesdhetare të bregdetit dalmat, me ishujt idilik dhe plazhet me rërë të bardhë, të lagur nga deti Adriatik.

Përveç kësaj, Shqipëria ka vende të shumta që konsiderohen si Trashëgimi Botërore.

Një destinacion emocionues për ata që kërkojnë peizazhe të bukura dhe kultura të pasura antike.

Zbuloni bukurinë e këtij vendi të lagur nga Adriatiku për 10 ditë me një çmim spektakolar!

Midis Ballkanit dhe Adriatikut

Udhëtoni në Shqipëri për 10 ditë me një kosto prej 899 euro dhe zbuloni historinë e saj, ku gjurmët osmane, fashiste dhe sovjetike i kanë dhënë formë vendit dhe i kanë dhënë jetë kombit aktual.

Një perlë e panjohur që ofron diversitete, natyrë dhe një histori magjepsëse.

Udhëtimi nis me Tiranën, ku do të njiheni me të kaluarën e saj ilire dhe mesjetare, vazhdon me Krujën, shtëpitë osmane të Beratit, Apolonisë apo “Athina e Shqipërisë”, Vlorën dhe Sarandën, ku mund të shijoni plazhet më të mira të detit Jon.

Eksploroni rrënojat e Butrintit, shtëpitë e kalasë së Gjirokastrës dhe, së fundi, qytetet si Korça dhe Elbasani. /atsh/KultPlus.com

Fshati i Dragashit që po zbrazet

Posted on by Kult Plus

Një ortek bore, para 12 vjetësh, pati qenë fatal edhe për 10 anëtarë të një familjeje në Restelicë të Dragashit. Banorët e këtij fshati, akoma gjatë dimrit vazhdojnë të përballen me vështirësi të shumta.

Fshati Restelicë i komunës së Dragashit shtrihet në pjesën më jugore të Kosovës, ka më shumë se dy mijë shtëpi banimi me 11 mijë banorë, rreth 70 % e të cilëve kanë mërguar.

Fshati shtrihet pllajave të Parkut Nacional të Maleve të Sharrit dhe punohet vetëm me damper, një mjet i veçantë që i përshtatet terrenit tepër të thyer malor. Jeta është e vështirë, sidomos në stinën e dimrit që zgjatë gjashtë muaj. Ky fshat ka resurse të mëdha për zhvillimin e turizmit.

“Periudha e dimrit në Restelicë është katastrofale, jetohet vështirë, të rinjtë po largohen me të madhe, sidomos pas liberalizimit të vizave, kanë ngelë vetëm pleqt, shumica jo të aftë për punë. Në Restelicë kemi një ambullantë, ku punojnë një mjek dhe dy teknik, kemi shkollë, me 120 deri 150 nxënës, doktori punon pesë ditë të javës , por momentalisht është në pushim”, tha Hajrudin Hoxha teknik medicinal.

Shkolla e Restelicës ka kushte të mjaftueshme për vijimin e mësimit. “Kushtet për punë në këtë shkollë janë shumë të mira, shkolla është e pajisura si të tjerat në gjithë Kosovën, kemi më shumë se 100 nxënës, është e pajisur me nxemje qëndrore dhe funksionon mirë. deri tash furnizimin me libra e kemi pas nga komuna, tash i kemi nga ministria dhe furnizimi është i mirë”, tha për RTK, Salim Karalija, mësimdhënës.

Nuri Hoxha, banor, thotë se ka punuar si blegtor, por tani ka ngelur vetëm me gruan.

“Jetohet si në mal, gjithçka është bosh, nuk ka njerëz, shumica prej tyre janë jashtë, e familja ime djemtë e vajzat janë në Itali”, tha Nuri Hoxha, banor i Restelicës

Braktisja e fshatrave të komunës së Dragashit është rritur shumë pas liberalizimit të vizave thotë edhe kryetari i kësaj komune Behxhet Xheladini

Restelica në shkurt të vitit 2012 u godit nga një tragjedi natyrore, ku humbën jetën 10 persona të një familjeje.

Që nga ajo kohë dimrat në këtë fshat janë më të butë, por gjithsesi duhen përgatitje të mëdha për të hyrë në stinën e dimrit. Trashësia e borës për këtë vit nuk i ka kaluar 60 cm, për dallim prej shumë viteve më parë kur arrinte mbi një metër./rtk/KultPlus.com

Molière: Pemët që rriten ngadalë japin frutat më të mira

Posted on by Kult Plus

10 thënie nga Jean-Baptiste Poquelin – Molieri

“Pemët që rriten ngadalë japin frutat më të mira”.

“Sa më shumë që e duam dikë, aq më pak e lajkatojmë; dashuria e vërtetë shfaqet duke mos falur asgjë .

“Shkrimi është si prostitucioni. Në fillim e bën për dashurinë, pastaj për disa miq të ngushtë, dhe më pas për para”.

“Sa më e madhe të jetë pengesa, aq më shumë lavdi të sjell kapërcimi i saj”.

“Një budalla i shkolluar është më shumë një budalla se sa një budalla injorant.”

“Nuk është vetëm ajo që bëjmë, por edhe ajo që nuk bëjmë, që na mbush me përgjegjësi”.

“Jeta është një tragjedi për ata që ndjejnë dhe një komedi për ata që mendojnë.”

“Vdesim vetëm një herë, dhe ndodh për shumë kohë”.

“Bukuria pa inteligjencë është si një grep pa karrem”.

“Hipokrizia është një ves vanitoz dhe të gjitha veset e tilla kalojnë në virtyte.”

Ura më e shtrenjtë në botë që lidh dy shtete

Posted on by Kult Plus

Ura e Oresund e cila lidh Suedinë me Danimarkën, është një nga më të shtrenjtat në botë me faturën prej 3.5 miliardë dollarë dhe tashmë ka frymëzuar një serial filmi.

Megjithëse urat si ‘Golden Gate’ në San Franciso apo ‘Ponte Vecchio’ në Firence mund të jenë më të famshme, ura me e re e Evropës është shumë impresionuese.

Prej vitit 2000, Suedia e Danimarka janë lidhur zyrtarisht me urën që kalon mbi ngushticën Øresund me linja hekurudhore e automobilistike. Øresund vijon nga bregdeti suedez pranë  Malmo, në ishullin artificial danez të Peberholm, që gjendet në mesin e ngushticës.

Ndërsa prej aty, lidhja vijon me një tunel të ndërtuar drejt Amager në tokën daneze, pranë aeroportit të Copenhagen. Ishulli artificial i Peberholm, u krijua si një pikë lidhjeje mes urës e tunelit, i pajisur me dalje në autostradë, ku lejohet vetëm trafiku i kontrolluar.

Kostoja totale prej 3.5 miliardë euro e infrastrukturës (30 miliardë krona daneze) ku përfshihen ura, tuneli dhe ishulli artificial, pritet të rikuperohet nga dy vendet deri në vitin  2037.

Tashmë ura e Oresund përdoret çdo ditë nga mesatarisht 18,434 automjete dhe studimet thonë se ka zhvilluar qytetin suedez të Malmo prej ardhjes së punonjësve të kualifikuar nga Danimarka kontinentale.

Shoferët duhet të paguajnë për kalimin e urës në sportelet e Suedisë, në varësi të mjeteve të tyre, duke nisur nga 30 euro për motoçikletat deri në 200 euro për rulotat turistike.

Ajo ka frymëzuar serialin dramatik ‘The Bridge’, që shfaqet në rrjetin BBC prej vitit 2012, të nisur nga një trup viktime i gjetur në urën Oresund, i cili nis një hetim të dyfishtë nga policia suedeze e daneze.

Ura prej 15 km është më e gjata në Evropë së bashku me atë të Krimesë që lidh gadishullin me Rusinë, dhe urës Vasco de Gama në Portugali./topchanel/KultPlus.com

‘Eja, eja Lule Borë’ nga Françesk Radi (VIDEO)

Posted on by Kult Plus

Françesk Radi ishte këngëtar shqiptar nga Shqipëria. I përket brezit të artistëve të viteve `70 të shekullit XX. I cilёsuar si kantautori i parё shqiptar, ai solli risi nё muzikёn e lehtё moderne shqiptare. 

Sot në 74 vjetorin e lindjes së tij KultPlus ju sjell këngën ‘Lule Borë’:

Tuj shetit un n’mal e n’koder,
tuj prek lulet t’gjith me dorë,
ne n’nji kopsht ma t’buk’ren n’Shkoder,
ty të gjeta luleborë

Je e vogel por e plotë,
ty t’kerkoj un tash sa mot,
tash sa mot un ty t’kërkoj,
veç me ty jeten ta coj,
Eja, eja luleborë,
se me ty do thur kuror.
Eja, eja luleborë,
se me ty do thur kuror.

Pash’ ma t’buk’ren stinë t’pranverës
Pash’ ma t’buk’rin drandofill!
Mos t’ja falish kuj ti erën
Se për mu vetëm ke çilë!

Nivelet e ujit në digën e liqenit të Ujmanit aktualisht ndër më të lartat

Posted on by Kult Plus

Ministrja e Ekonomisë Artane Rizvanolli, ka deklaruar se nivelet e ujit në digën e liqenit të Ujmanit aktualisht janë ndër më të lartat me 303 milionë metra kub, teksa shtoi se me sasinë e ujit 5 metra nën maksimum, diga qëndron stabile e aty punojnë 21 punëtorë.

Ministrja Rizvanolli, së bashku me zëvendësministrat Getoar Mjeku dhe Nenaq Stanojeviq, sot janë mirëpritur nga kryeshefi i Ndërmarrjes Hidroekonomike “Ibër-Lepenci”, Faruk Mujka , nga ku edhe janë njoftuar më hollësisht për ndërmarrjen në fjalë.

Më poshtë gjendet postimi i plote i Ministres Rizvanolli:

Nivelet e ujit në digën e liqenit të Ujmanit aktualisht janë ndër më të lartat me 303 milionë metra kub. Me sasinë e ujit 5 metra nën maksimum, ajo qëndron stabile e aty punojnë 21 punëtorë.

Së bashku me Zëvendës Ministrat, Geotar Mjeku dhe Nenad Stanojević u mirëpritëm nga Kryeshefi Faruk Mujka, ku diskutuam mbi performancën e ndërmarrjes, sigurinë e digës dhe mundësitë për investime në hidrocentral dhe përgjatë kanalit.

Aty janë vendosur pajisjet për matjen e lëvizjeve seizmike dhe për sigurinë e digës, e po punohet edhe në vendosjen e sensorëve në mënyrë që nivelet e ujit të kontrollohen edhe nga dhoma e kontrollit në Shkabaj. Niveli i rrjedhjeve në trupin e digës dhe stabiliteti i digës aktualisht kontrollohen nga galeria e cila gjendet në 90 metra thellësi.

Ndërmarrja “Ibër Lepenci” e cila menaxhon këtë digë, në vitin 2023 ka siguruar të hyra në vlerë prej 10 milionë euro. Rritje të lartë ka pasur edhe prodhimi i energjisë elektrike nga Hidrocentrali që gjatë vitit 2023 ka shënuar rekord e janë prodhuar 146 mijë megavatëorë energji elektrike, që shënon rritje prej 95% prej vitit paraprak.

Përgjatë vizitës takuam edhe patrollën e policisë tek diga e vogël kompensuese, një patrollë profesionale e multi-etnike që me zell e përkushtim po punojnë për sigurinë e të gjithë qytetarëve./KultPlus.com

Kryeministri Rama: Brenda dy vitesh do të përdorim inteligjencën artificiale

Posted on by Kult Plus

Në takimin e kryeministrit shqiptar Edi Rama dhe ish-kryeministrit briatik, Tony Bleir, biseda fokusin e kishte te revolucioni i teknologjisë në transformimin e shteteve.

Kjo u bisedua në samitin botëror të qeverisjes, në Dubai, raporton Tvklan.al.

Aty Rama tha se Shqipëria brenda dy vitesh do të implementojë në sistemet e saj në inteligjencën artificiale.

“Ne po punojmë me 2 nga burimet më të mëdha për dijet, Microsoft dhe Orakullin me të cilët po përpiqemi të marrim më të mirën e tyre. Jemi përballur me një sulm masiv nga Irani dhe duke qenë një objektiv i përhershëm i sulmeve kibernetike ne e dimë rëndësinë e të dhënave të sigurta. Nga ana tjetër, Chat GPT ka në krye një zonjë shqiptare. E pyeta se si mund të na ndihmoj për të hyrë më shpejt në BE dhe testet tona po na tregojnë që AI implementohet për 2 vite, duke na çuar para në kohë.”

Kreu i qeverisë shqiptare tha se teknologjia e ka nxjerrë Shqipërinë nga terri i diktaturës, duke bërë kështu që vendi të renditet me rezultate të spikatura për qeverisjen digjitale.

“Kur do ndërtosh shtet modern të duhet të ngresh sisteme që mundësojnë shërbimin drejtpërdrejt me qytetarin. Ndryshuam kryekëput mënyrën se si merremi me shërbimet pa letra, për çdo dokument, certifikatë, licencë. Kemi shmangur radhët dhe ndërveprimi kryhet nga qytetari me pajisjen”.

Rama fjalën e tij e mbylli duke i ftuar të pranishmit që të vizitojnë Shqipërinë për të parë nga afër lehtësitë që nga teknologjia ofron në marrjen e shërbimeve.

“Ju ftoj të gjithëve të vizitoni diellin në plazhet tona, malet e jashtëzakonshme, mikpritjen shqiptare. Ejani në Shqipëri dhe në atë mjedis do keni mendim dhe ide më të mira se si teknologjia mund të përplotësojë bekimin e një vendi që është mallkuar nga historia”.

Mes tjerash, kryeministri shqiptar bëri të ditur se Shqipëria do të ketë një hapsirë të sigurt dedikuar të dhënave të shqiptarëve të krijuar nga Orakulli./Tv.klan.al /KultPlus.com

Komuna e Vushtrrisë organizon turne futsalli në nderim të heroit Afrim Bunjaku

Posted on by Kult Plus

Komuna e Vushtrrisë me rastin e 16 vjetorit të Pavarësisë së Kosovës  do të organizojnë turneun treditor të futsallit, në nderim të rreshterit të policisë, Afrim Bunjaku, i cili ra heroikisht pas sulmeve terroriste në veri të vendit më 24 shtator të vitit të kaluar.

“Për nder të 16 vjetorit të Pavarësisë së Republikës së Kosovës, nën patronazhin e kryetarit të Komunës së Vushtrrisë, z.Ferit Idrizi, organizohen aktivitete të shumta për shënimin e kësaj dite”, thuhet në njoftim./KultPlus.com

Presidentja Osmani priti në takim lamtumirës ambasadorin e Mbretërisë së Bashkuar në Kosovë, Nicholas Abbott

Posted on by Kult Plus

Presidentja e Republikës së Kosovës, Vjosa Osmani, ka pritur sot në takim lamtumirës ambasadorin e Mbretërisë së Bashkuar në Kosovë, Nicholas Abbott, të cilin e ka falënderuar për bashkëpunimin dhe kontributin  e vazhdueshëm në thellimin e marrëdhënieve ndërmjet të dy shteteve.

Në takim, Presidentja Osmani  vlerësoi lart angazhimin personal të ambasadorit Abott, i cili përveç rolit në promovimin e marrëdhënieve reciproke, mbështeti edhe shumë kauza të rëndësishme për shoqërinë kosovare.

“Ambasadori Abbott, për ne ju jeni më shumë se një përfaqësues diplomatik. Ju jeni një mik i vërtetë i Kosovës, një bashkëpunëtor i çmuar dhe një mbështetës i palëkundshëm i aspiratave tona për një shoqëri të lirë, të hapur dhe të drejtë. Përkrahja juaj e vazhdueshme për të drejtat e njeriut, paqen dhe integrimin e Kosovës në familjen euroatlantike, si dhe fuqizimin e përgjithshëm ndërkombëtar të saj tregon përkushtimin tuaj ndaj Kosovës”, është shprehur Presidentja Osmani.

Presidentja Osmani i ka uruar ambasadorit Abbott sukses në angazhimet e mëtejme, duke e konsideruar një mik të Kosovës, i cili do të jetë gjithnjë i mirëseardhur në shtetin tonë.

Në takim, u shpreh gatishmëria e të dy bashkëbiseduesve që Kosova dhe Mbretëria e Bashkuar të vazhdojnë edhe më tej bashkëpunimin në fusha të ndryshme, duke përfshirë çështjet e sigurisë, zhvillimin ekonomik, arsimin, kulturën dhe përforcimin e lidhjeve njerëzore ndërmjet qytetarëve të dy shteteve./ KultPlus.com

Françesk Radi, kantautori i parë shqiptar

Posted on by Kult Plus

Sot janë bërë 74 vite nga lindja e artistit Françesk Radi.

Françesk Radi (Tiranë, 13 shkurt 1950- 3 prill 2017) ishte këngëtar shqiptar nga Shqipëria. I përket brezit të artistëve të viteve `70 të shekullit XX. I cilёsuar si kantautori i parё shqiptar, ai solli risi nё muzikёn e lehtё moderne shqiptare.

Krijimtarija e tij që në fillesat e saj u shkëput nga formatet klasike të trajtimit të këngës së lehtë. Aranzhimi, struktura dhe shtjellimi i saj kanë tipare të qarta pop – rock të modelit anglo – amerikan, por dhe performanca e tij synonte të sillte ndërgjegjësim dhe ndryshime shoqërore.

Françesk Radi ishte njëherësh këngëtar – kantautor, kompozitor e instrumentist i shkëlqyer në kitarë, (dashuria për të cilën i lindi në moshën 5 vjeçare), e kitarë bass, kontrabas, piano, mandolinë e instrumente të ndryshme popullore si çifteli, sharki e tё tjera instrumente tё temperuar.

Si njohёs i mirё i tyre, i bёri pjesё tё krijimtarisё sё tij muzikore, duke bërë edhe muzik rock me çifteli.

Krijimtaria e tij e viteve `71 – `72 u kritikua për shfaqje të huaja dekadente – perëndimore moderniste. Françeskut iu hoq e drejta krijimtarise, skenës, e transmetimit radio – televiziv dhe e larguan nga Tirana. Ai u dërgua për ri-edukim në veri të vendit, në Fushë – Arrëz të rrethit të Pukës.

Për afro dy dekada iu hoq e drejta e pjesëmarjes në festivalin e këngës në Radio – Televizionin Publik Shqiptar, e vetmja medie vizive e kohës.

U rikthye në këtë skenë pas vitit 1991, që shënoi edhe rrëzimin e sistemit komunist në Shqipëri. Ai la pas një fond të pasur këngësh të muzikës lehtë, këngësh popullore të kënduara e të orkestruara prej tij dhe të risjella për kohën nën ritme të moderuara, ndër më të spikaturat.

Vlerësohet si kantautori me krijimtarinë më të pasur. Interpretimet e tij janë së pjesë e fondit “ Zëra të artë “ të muzikës shqiptare./ KultPlus.com

Arinjtë polarë përballen me kërcënimin e urisë ndërsa akulli shkrihet nga ngrohja globale

Posted on by Kult Plus

Disa arinj polarë përballen me urinë ndërsa akulli i detit Arktik shkrihet sepse ata nuk janë në gjendje të përshtatin dietën e tyre për të jetuar në tokë, kanë zbuluar shkencëtarët.

Speciet ikonë të Arktikut normalisht ushqehen me foka që i kapin në akull në det të hapur.

Por ndërsa akulli zhduket në një botë që po ngrohet, shumë arinj po kalojnë më shumë kohë në breg, duke ngrënë vezë zogjsh, manaferra dhe bar.

Megjithatë, kafshët humbin peshë me shpejtësi në tokë, duke rritur rrezikun e vdekjes.

Ariu polar është bërë mishëri për kërcënimin në rritje të ndryshimeve klimatike në Arktik, por realiteti i ndikimit në këtë specie është i ndërlikuar.

Ndërsa numri i arinjve u ul deri në vitet 1980, kjo ishte kryesisht për shkak të gjuetisë së paqëndrueshme.

Me mbrojtje më të madhe ligjore, numri i arinjve polarë është rritur. Por rritja e temperaturave globale tani shihet si kërcënimi më i madh i tyre.

Kjo për shkak se detet e ngrira të Arktikut janë çelësi për mbijetesën e tyre.

Kafshët përdorin akullin e detit si një platformë për të gjuajtur foka me unaza, të cilat kanë përqendrime të larta yndyre, kryesisht në fund të pranverës dhe në fillim të verës.

Por gjatë muajve të ngrohtë shumë pjesë të Arktikut tani janë gjithnjë e më shumë pa akull./ BBC/ KultPlus.com

Filharmonia e Kosovës përgatitet për koncertin e 16-vjetorit të Pavarësisë

Posted on by Kult Plus

Filharmonia e Kosovës është duke i bërë përgatitjet për koncertin madhështor në shënim të 16-vjetorit të Pavarësisë së Republikës së Kosovës, shkruan KultPlus.

“Koncerti qendror në këtë përvjetor të veçantë vjen me Korin dhe Orkestrën e Filharmonisë së Kosovës, nën drejtimin e dirigjentit Baki Jashari me pjesëmarrjen e solistëve Krenare Gashi – soprano, Arta Jashari – soprano dhe Anton Çivlaku – lahutë”, thuhet në njoftim.

Sipas një komunikate për media, përveç veprave nga R. Strauss, W. Kilar, K. Aliçkaj, V. Beqiri dhe L.V. Beethoven do të interpretohet edhe premiera e “Exodus” nga Mendi Mengjiqi, dedikuar 25-vjetorit të ekosdit të mbi 1 milion Kosovarëve nga forcat Jugosllave dhe Serbe.

Koncerti do të mbahet më 17 shkurt, në ora 20:00 (Salla AMC)/ KultPlus.com

Shfaqja nga TKK, ‘The Best European Show’ jepet në Maltë

Posted on by Kult Plus

Shfaqja “The Best European Show”  bashkëprodhim i Teatrit Kombëtar të Kosovës është dhënë para publikut në teatrin Manoel, në Maltë.

“Në këtë teatër të ndërtuar në vitin 1732, aktorët Armend Smajli dhe May-Linda Kosumovic nga Teatri Kombëtar i Kosovës shkelqyen në rolet e tyre për dy orë rresht”, thuhet në njoftimin e TKK.

Në teatrin Manoel, në Valletta të Maltës, shfaqja “The Best European Show” u dha për tre net rresht me datat 9, 10 dhe 11 shkurt 2024.

Pas paraqitjes në Valletta, shfaqja do të vazhdojë në Nova-Gorica dhe më pas në Prishtinë./KultPlus.com

Senatorja e Nju-Jorkut propozon rezolutë për 17 Shkurtin

Posted on by Kult Plus

Senatorja e Nju-Jorkut, Jessica Scarcella-Spanton, ka bërë të ditur se ka propozuar një rezolutë në Senatin amerikan të Shtetit për të përkujtuar Ditën e Pavarësisë së Kosovës.

Ajo në platformën X është shprehur se është thellësisht e nderuar me këtë.

“Është një dëshmi e qëndrueshmërisë dhe vendosmërisë së jashtëzakonshme të popullit kosovar, i cili ka tejkaluar sfida të shumta që na çojnë në këtë ngjarje”, ka thënë Scarcella-Spanton. /Klankosova.tv/KultPlus.com

‘Albin Kurti, shpresa e fundit’, mërgimtari të mërkurën zbulon shtatoren e kryeministrit Kurti

Posted on by Kult Plus

Një mërgimtar nga qyteti i Podujevës ka vendosur të realizojë një veprim jo shumë të zakonshëm.

Mërgimtari të mërkurën do ta zbuloj shtatoren për kryeministrin Albin Kurti, në fshatin Peran të Podujevës.

Sipas disa fotografive, në pllakë të shtatores shkruhet “Albin Kurti, shpresa e fundit”, që lë të nënkuptohet se bëhet fjalë për një simpatizant të Kryeministrit Kurti.

Sipas Tv Llapi, zbulimi do të bëhet nesër, më 14 shkurt në ora 12:00.

Lamtumirë vëndet e mija

Posted on by Kult Plus

Poezi nga Gjergj Fishta

Lamtumirë vëndet e mija,
Që po m’zhdukeni dalngadalë
Gjëmon Deti ushton duhija
Lkundet varka valë mbi valë.

Kah njaj Diell që asht tuj flakrue
Andej fill un tash do t’veta
Lamtumirë atdhe i bekue
Lamtumirë për sa të jetë jeta!

Neser Nadja kur mbi ne,
Rrezja e diellit ka me ra,
Kush e di sa Ujë e Dhe,
Mue prej teje ka me më nda?

Po ni pvetsha retë minore?
Po në i pvetsha zogjt e detit?
Veç për ty moj tokë arbnore,
Ska me më fol kush ma mue t’shkeretit

Kam me shkel në të tjera zalle
Në të tjera brigje e të tjera Dete
Kam me ndije të tjera gjuhë
Në të tjera vënde e të tjera qytete…

Vëndin tëm ma skam me pa…

Ka me prit pra motër zeza
Me i pru nanës në shpi ndonjë re,
Po, kushedi, i vllau atëhera,
Ku asht kah kalbet për nan dhe…

Para Hyut naltohet lutja,
O ju bjeshkët e shqiptarisë,
Ku ndër ju s’dijmë, çka asht tuta!
Veç në ju asht logu i burrënisë!

Lamtumire ju mriza e stane!
Lamtumire ju “shkurre e mreta”!
Lamtumire ju o armt e t’parve
Lamtumire për sa t’jetë jeta. / KultPlus.com

Kamberi: Alarmuese rënia e numrit të nxënësve shqiptarë në Luginë

Posted on by Kult Plus

Deputeti shqiptar në Kuvendin e Serbisë, Shaip Kamberi, shprehet se në 20 vjetët e fundit, numri i nxënësve të shkollave fillore ka rënë 25% në Serbi, por te shqiptarët në Luginën e Preshevës është një rënie marramendëse prej 58%.

“Më shumë se dyfishi i mesatares kombëtare. Alarmuese! Ky është rezultat i pakicës së neglizhuar qëllimisht nga qeveria, me diskriminim aktiv”, shkroi Kamberi në platformën X./KultPlus.com

Bëhen të pavlefshme dokumentet me emrin “Maqedoni”

Posted on by Kult Plus

Dokumentet personale të qytetarëve të Maqedonisë së Veriut me emrin e vjetër, “Republika e Maqedonisë”, nga 13 shkurti kanë dalë jashtë përdorimit për dalje dhe hyrje në këtë shtet.

Zëvendësimi i dokumenteve personale, pasaportave, letërnjoftimeve, patentë shoferëve dhe lejeve të qarkullimit me ato me emrin “Maqedonia e Veriut”, është obligim për banorët e këtij vendi, bazuar në atë që njihet si Marrëveshja e Prespës ndërmjet Shkupit dhe Athinës për ndryshimin e emrit të shtetit, që ishte arritur më 17 qershor 2018.

Marrëveshja kishte hyrë në fuqi në shkurt të vitit 2019 dhe kishte një periudhë prej pesë vjetësh për t’i zbatuar obligimet e saj, përfshirë edhe ndërrimin e dokumenteve personale.

Nëpërmjet një letre qarkore dërguar të gjitha ministrive greke, ministri i Jashtëm i Greqisë, Giorgos Gerapetritis, “rikujtoi se mesnatën e 12 shkurtit 2024, skadon periudha kalimtare pesëvjeçare lidhur me dokumentet për përdorim ndërkombëtar të Maqedonisë së Veriut”.

Kreu i diplomacisë greke, gjithashtu ka bërë me dije se për të hyrë në territorin grek automjetet nga Maqedonia e Veriut duhet të kenë shënimin NMK ose NM.

Pavarësisht skadimit të afatit të dokumenteve të vjetra, shërbimet doganore dhe policore të Maqedonisë së Veriut kanë bërë të ditur se shtetas maqedonas në Kosovë, Shqipëri dhe Serbi edhe më 13 shkurt e kanë kaluar kufirin me dokumentet e vjetra me emrin Republika e Maqedonisë.

Edhe pas skadimit të afatit, më 12 shkurt, shumë shtetas nuk janë pajisur me dokumente personale me emrin e ri, Republika e Maqedonisë së Veriut.

Sipas të dhënave të Ministrisë maqedonase të Punëve të Brendshme, rreth 650 mijë qytetarë nga 1.8 milion sa numëron Maqedonia e Veriut, ende nuk kanë arritur të bëjnë zëvendësimin e dokumenteve personale me emrin e ri të shtetit.

Për kaosin e krijuar para sporteleve, institucionet kanë fajësuar edhe qytetarët, të cilët, sipas tyre, e kanë pritur momentin e fundit për zëvendësimin e dokumenteve edhe pse kishin kohë të mjaftueshme për të aplikuar.

Për shkak të mungesës së formularëve, qytetarët shqiptarë nuk mund të marrin pasaporta dhe letërnjoftime në dy gjuhë – shqip dhe maqedonisht.

Ministri i Punëve të Jashtme, Bujar Osmani, në një konferencë për media të premten tha se qytetarët që ndodhen jashtë vendit pas datës 12 shkurt dhe që kanë dokumente të vjetra udhëtimi, do të mund të kthehen në vend me një fletë udhëtimi, e cila lëshohet në zyrën diplomatike dhe misionet konsullore.

Kuvendi i Maqedonisë së Veriut ka miratuar më 12 shkurt, me procedurë të shpejtë, ndryshimet dhe plotësimet në dy ligje për sigurinë në komunikacion, me të cilat zgjatet vlefshmëria e patentë shoferëve me emrin Republika e Maqedonisë deri në fund të vitit 2024.

Përdorimi i tyre vlen vetëm brenda territorit të Maqedonisë së Veriut, ndërsa ndryshimet u miratuan pasi ligji aktual nuk e parashikonte një gjë të tillë.

Ndryshimi i tyre pasoi reagimet e shumta në opinion pasi në rast të kundërt, nga 13 shkurti të gjithë shtetasit me patentë shoferë të vjetër mund të përballeshin me gjoba të larta.

Për gjendjen e krijuar, ministri i Punëve të Brendshme, Pançe Toshkovski, që është nga radhët e VMRO DPMNE-së, e cila është pjesë e Qeverisë teknike, ka akuzuar ish-ministrin Oliver Spasovski, duke ftuar organet e ndjekjes të veprojnë për shkeljet ligjore dhe për mosveprim në kohë.

Akuzat e tilla janë hedhur poshtë nga Lidhja Social Demokrate e ish-kryeministrit Dimitar Kovaçevski duke akuzuar opozitën për përhapje të panikut.

“Përhapja e panikut dhe dhënia e çfarëdo deklarate populiste që nuk është në drejtim të zgjidhjes së problemit me dokumente personale, nuk sjell asgjë të mirë”, thuhet në reagimin e LSDM-së./REL/ KultPlus.com

U promovua në Prishtinë “Enciklopedia imagjinare” e Bajram Kosumit

Posted on by Kult Plus

Pas Tiranës, libri më i ri i profesorit Bajram Kosumi është promovuar edhe në Prishtinë në Bibliotekën Kombëtare.

Për postromanin “Enciklopedia imagjinare” kanë folur tre profesorët dhe studiuesit e letërsisë, Agim Vinca, Mexhan Avdyli dhe Ag Apolloni.

Profesori Vinca ka thëna se ta lexosh “Enciklopedinë imagjinare ” të Kosumit është sikur të hysh në një pyll të madh dhe të dendur ku në çdo hap sheh peizazh mahnitëse por edhe skena dhe pamje të frikshme.

“Enciklopedia imagjinare”,  është një vepër që vlen të lexohet. Madje edhe të rilexohet si për shkak të përmbajtjes së saj ashtu edhe për hir të rrëfimit të shkathët”, ka vlerësuar Vinca.

Duke folur për librin, Merxhan Avdyli ka shpjeguar se cila do të jetë lidhja e lexuesit me “Enciklopedinë imagjinare”.

“Pse libri i Kosumit dhe çka paraqet ai? Shkrimi shembull, leximi i lehtë, kuptimi i kristalizuar dhe interpretimi i pavarur janë katër përcaktuarës themelorë të lidhjes së lexuesit me librin e Kosumit”, ka thënë Avdyli. Sipas tij, Enciklopedia imagjinare është një konglomerat zhanror dhe krejt origjinal. “Duke qenë libri i tillë, nuk ka asnjë dilemë se shtrirja e tij te lexuesit dhe te studiuesi i letërsisë, madje jo vetëm shqiptar në të ardhmen do të marrë kuptimin letrar përkatësisht kuptimin e modelit letrat “Libri i Kosumit””, ka shtuar ai.

Në anën tjetër, profesori Ag Apolloni ka thënë se “Enciklopedia imagjinare” e ka elegancën e librit, elegancën e informacionit dhe elegancën e stilit. Apolloni ka thënë se libri ofron shtigje të reja imagjinare të personaliteteve të njohura, situatave të njohura dhe fateve të njohura, shkruan rtv21.

“Jep informacione për gjithçka që mund të dijë një autor ose një ekip. Në këtë rast kemi një autor që ka bërë punën e një ekipi dhe kjo mënyrë e shkrimit të një romani në formën dokumentare dhe imagjinare është has rrallë, shkruhet rrallë. Enciklopedia jep mundësinë e leximit alternativ. E lexon një pjesë nga fillimi, mesi, fundi dhe prapë i kthehesh fillimit. Kemi faktet e dhëna dhe shpesh interpretimet ose variantet që dalin nga ato fakte”, ka vlerësuar Apolloni.

Autori i librit, Bajram Kosumi, ka shpjeguar se si 25-vjeçar nisi të shkruajë librin gjatë kohës sa ishte në burg i dënuar nga pushteti jugosllav.

“E vetmja kënaqësi, e vetmja dashuri përveç lirisë së Kosovës ka qenë kënaqësia ta shkruaj këtë libër”, ka thënë Kosumi, në fjalën para të pranishmëve.

“Enciklopedia imagjinare/Postroman”. , filloi të shkruhet në qelitë e Burgut të Nishit gjatë viteve 1985-1986 dhe përfundoi në vitin 2022, në Prishtinë. / KultPlus.com

Çdo grua që i kupton problemet e drejtimit të një shtëpie është shumë afër të kuptojë ato të drejtimit të një vendi

Posted on by Kult Plus

Mund të thuhet me siguri se Margaret Thatcher ishte një nga gratë më të forta në historinë e njerëzimit.

Pa drojën e ndonjë fatkeqësie ose problemi, duke kapërcyer çdo pengesë, ajo arriti të mbetet Kryeministrja e Mbretërisë së Bashkuar për 11 vjet, duke qenë gruaja e vetme që ka mbajtur atë pozicion aq gjatë.

Sot, po ju sjellim disa fraza të famshme dhe citate që “Zonja e Hekurt” la si pjesë të trashëgimisë së saj.

Kur një grua tregon karakter ata i thonë asaj se është e rreptë; kur një burrë tregon karakter ata e quajnë “djalë i mirë”.

Humbja? Nuk e kuptoj kuptimin e asaj fjale.

Çdo grua që i kupton problemet e drejtimit të një shtëpie është shumë afër të kuptojë ato të drejtimit të një vendi.

Mund të jetë gjeli që këndon, por është pula ajo që lëshon vezët.

Askush nuk do ta mbante mend Samaritanin e Mirë nëse ai do të kishte vetëm qëllime të mira. Ai gjithashtu kishte para.

Nëse doni të thuhet diçka, pyesni një burrë, nëse doni të bëhet, pyesni një grua.

Shtëpia duhet të jetë qendra, por jo kufiri i jetës së një gruaje.

Unë jam gjithmonë e inkurajuar jashtëzakonisht shumë nëse një sulm është veçanërisht i dëmshëm, sepse mendoj se nëse sulmoheni personalisht do të thotë që atyre nuk u mbetet më asnjë argument i vetëm politik.

Vlen të njohësh mirë armikun, ndër të tjera për shkak të mundësisë që një ditë ai të bëhet mik.

Të bësh gjithçka me zemër të hapur nuk është ideja më e mirë që mund të kesh. Zemra duhet të jetë e mbyllur, kështu që funksionon më mirë.

Nuk ka liri nëse nuk ka liri ekonomike.

90% e gjërave që na shqetësojnë nuk ndodhin kurrë.

Pasuria e një vendi nuk ndërtohet domosdoshmërisht në bazë të burimeve të tij natyrore: është e mundur të bëhet edhe nëse nuk ka asnjë. Burimi më i rëndësishëm janë njerëzit.

Shteti duhet vetëm të vendosë bazat për të lulëzuar talentet e njerëzve.

Gratë dinë të thonë “jo” shumë më mirë se burrat.

Sot, gratë kanë një det mundësish për t’u shprehur, madje disa prej nesh qeverisin vendet, por kur flasim, për nder, çantat janë më të mira për ne sesa bajonetat.

Unë zakonisht formoj mendimin tim për një burrë në 10 sekonda dhe rrallë e ndryshoj atë.

Nëse kritikët e mi do të më shihnin duke ecur përmbi ujërat e deteve ata do të thoshin se kjo ndodh për shkak se unë nuk di të notoj.

Nuk është absolutisht e nevojshme të bini dakord me bashkëbiseduesin për të gjetur një gjuhë të përbashkët me të. / KultPlus.com