‘Prishtina International Theater Festival’ gati për edicionin e pestë

Festivali Ndërkombëtar i Teatrove “Prishtina International Theater Festival” këtë vit do të mbajë edicionin e pestë, shkruan KultPlus.

Ky edicion do të organizohet për të kujtuar figurën e regjisores Burbuqe Berisha, e cila vdiq këtë vit.

Edicioni i katërti PITF do të zgjasë nga 29 nëntori deri më 4 dhjetor, ku edhe pritet që të respektohen masat ndaj COVID-19.

Në programin garues do të jepen katër shfaqje, të trupave teatrore nga Bullgaria, Serbia, Turqia Maqedonia e Veriut, Shqipëri dhe Kosova. /KultPlus.com

May be an image of text that says 'PITF 2021 PRISHTINA ONAL THEATER FESTIVAL NOVEMBER 29, 19:00 Official Opening emorian BURBUQE BERISHA BULGARIA SISYPHUS Puppets lab Directed by: Veselka Kuncheva NOVEMBER 29 19:30 SERBIA WHEN YOU GLAZE LONG INTO ABYSS Regionalno pozoriste Novi Pazar Directed by: Zlatko Pakovic NOVEMBER 30 TURKEY WOKE UP WITH NO VOICE Bu Yapım Directed by: amer Levent 19:00 RTME DECEMBER 19:00 HELVER'S NIGHT Teatri Tempulli Directed by: Afërdita Nuhiji DECEMBER 2 19:00 ALBANIA BLACK BOX Teatri Migjeni Directed by: Fatos Berisha KOSOVO (Guest Perfor mance) DECEMBER 19:00 BRINAT ArtImg Directed by: Butrint Pasha Art DECEMBER 4, 20:30 Award Ceremony DECEMBER 19:00'
Programi i plotë i PITF

U mbajt Mbledhja Komemorative për të ndjerën Burbuqe Berisha

Sot në Teatrin Kombëtar të Kosovës, është mbajtur mbledhja komemorative në nderim të jetës dhe veprës së regjisores së ndjerë, Burbuqe Berisha.

Atë e përkujtuan kolegët me të cilët bashkëpunoi, regjisorët, aktorët dhe personalitete nga jeta publike e politike e vendit tonë.

Zëvendësministrja e Kulturës, Rinisë dhe Sportit, Daulina Osmani, në emër të ministrisë mori pjesë në komemoracion dhe para të pranishmëve ndër të tjera tha “Burbuqja ka qenë një prej luftëtarëve të mëdha për të drejtat e përbashkëta dhe vlerave të shoqërisë tonë. Kontribuuese e denjë në zhvillimin e institucioneve tona të kulturës, një prej shtytësve të rëndësishëm në zhvillimin e edukimit dhe pedagogjisë së profilit teatror”, ndërsa shtoi “Komuniteti artistik kosovar, ka humbur një njeri të shkëlqyer dhe të papërsëritshëm. Ajo do të kujtohet dhe të përmendet përherë”.

Për nder të saj folën edhe bashkëpunëtorët dhe kolegët, regjisoret Zana Hoxha, Arbëresha Grabovci-Nixha, dhe Bardha Kelmendi, të cilat treguan për përvojat, profesionalizmin, energjinë dhe dashurinë e Burbuqe Berishës për krijimtarinë, regjinë dhe filmin. Ilir Tafa nga AAB, kujtoi afërsinë dhe pozitivetin që e karakterizonte regjisoren e ndjerë. Ndërsa, motra e të ndjerës Trëndelina Berisha, falënderoi të gjithë ata që u kujdesën dhe bashkëpunuan me regjisoren.

Burbuqe Berisha, vdiq më 27 tetor 2021, në moshën 51 vjeçare. Ajo kishte një karrierë të bujshme dhe la pas vetes trashëgimi të madhe të krijimtarisë artistike me filma të zhanreve të ndryshëm, dokumentarë të shkurtër e artistik dhe shumë shfaqje teatrale, që u realizuan nën regjinë e saj. / KultPlus.com

Kurti bën homazhe për regjisoren Berisha: Erdhëm sot këtu në Teatër të cilin e deshi aq shumë

Në hollin e Teatrit Kombëtar homazhe për regjisoren e ndjerë, Burbuqe Berisha, kanë bërë së fundmi edhe kryeministri i Kosovës, Albin Kurti si dhe ministri i Kulturës, Rinisë dhe Sportit, Hajrulla Çeku.

Kurti në fjalimin para medieve ka lartësuar figurën e ish-drejtoreshës së TKK-së duke thënë se puna dhe veprat e saj kanë lënë gjurmë të shkëlqyera në kulturën tonë.

“Erdhëm sot këtu në Teatër të cilin e deshi aq shumë dhe që kontribuoi gjithë jetën që t’ia japim lamtumirën e fundit regjisores Burbuqe Berisha. Qysh në kohën e okupimit të serbisë e deri në ditët e fundit Burbuqe Berisha nuk është ndalur asnjëherë dhe angazhimi i saj e puna e saj për teatrin dhe filmin tek ne lë gjurmë të shkëlqyera në kulturën tonë”.

Foto: Ridvan Slivova/Telegrafi

“Veprimtaria dhe krijimtaria artistike e Burbuqe Berishës bën kujtimin tonë për të pashlyeshëm por ngelet edhe si trashëgimi për brezat e artdashësve të cilët do të vijnë pas saj. Kam pasur fatin shpesh ta takoj të rrimë bashkë e të diskutojmë bashkë për artin e kulturën për filmat tek ne e në botë dhe ajo nuk ka qenë vetëm një artiste e talentuar, por edhe e angazhuar që i ka ndihmuar të tjerët e në debatet për të cilët ka marrë pjesë ka kontribuuar edhe në artistët e tjerë para dhe pas saj. E kujtojmë me nderime e me mall Burbuqe Berishën të cilën vdekja na e rrëmbeu para kohe por asnjëherë nuk do të mund të na marrë mbresat e fuqishme që i la tek ne me jetën dhe veprën e saj”, ka thënë ai. /telegrafi/ KultPlus.com

Nisin homazhet për regjisoren e ndjerë Burbuqe Berisha

Brenda Teatrit Kombëtar të Kosovës kanë nisur homazhet në nderim të regjisores tashmë të ndjerë, Burbuqe Berishës.

Siç shihet, deri më tani një numër i qytetarëve kanë bërë homazhe, gjersa të njëjtën pritet ta bëjnë edhe liderët politikë.

Para fotografisë së ish-drejtoreshës së TKK-së në hyrje të Teatrit Kombëtar janë vënë disa buqeta me lule nga familjarët e të pranishmit e tjerë.

Filmbërësja shqiptare ka ndërruar jetë mesditën e djeshme (e mërkurë) në ambientet e Ministrisë së Kulturës.

Ajo ishte regjisore e një numri të konsiderueshëm të filmave të shkurtër, të gjatë, dokumentarë, serive televizive, shfaqjeve teatrore dhe fituese e disa shpërblimeve në festivale të filmit dhe teatrit me karakter vendor e ndërkombëtar.

Varrimi i të ndjerës ndërkohë do bëhet sot në orën 15:00 në varrezat e qytetit të Prishtinës. 

Fotografitë: Ridvan Slivova/Telegrafi. / KultPlus.com

Regjisorja Berisha u gjet e vdekur në zyrën e saj, policia jep detaje

Mesditën e së mërkurës, regjisorja Burbuqe Berisha ka vdekur derisa ishte në vendin e saj të punës, në Ministri të Kulturës, transmeton KultPlus.

Policia e Kosovës në raportin 24 orësh ka bërë të ditur se Berisha u gjet e vdekur në zyrën e saj, ndërkaq vdekjen e ka konstatuar mjeku kujdestar.

Po ashtu, është bërë e ditur se trupi i pajetë i viktimës është dërguar në Institutin e Mjekësisë Ligjore për obduksion.

“Prishtinë 27.10.2021-13:20. Viktima femër kosovare është gjetur pa shenja jete në zyrën e saj në Ministrinë e Kulturës. Vdekjen e ka konstatuar mjeku kujdestar. Me vendim të prokurorit, trupi i pa jetë është dërguar në IML për obduksion”, ka njoftuar policia.

Ndryshe varrimi i regjisores Burbuqe Berisha do të bëhet sot në orën 15:00, në varrezat e qytetit në Prishtinë. / KultPlus.com

Kryeministri Kurti shpreh ngushëllime për vdekjen e regjisores Burbuqe Berishës

Kryeministri i Republikës së Kosovës, Albin Kurti, u shprehë ngushëllime familjes Berisha, komunitetit artistik dhe miqve të regjisores dhe ish-drejtoreshës së Teatrit Kombëtar, Burbuqe Berisha, e cila u nda sot nga jeta, në moshën 51 vjeçare.

“Me keqardhje e pikëllim e mora lajmin për ikjen në amshim të regjisores së shquar Burbuqe Berisha. Zonja Berisha ishte ndër regjisoret e para kosovare, e cila me punën e saj të pakursyer e pasuroi dhe e ngriti nivelin e artit dramatik dhe filmik të Kosovës.

Vdekja e saj e hershme është humbje e madhe për familjen, për teatrin dhe kinematografinë tonë.

Në këtë ditë të vështirë për familjen, u shpreh ngushëllimet më të sinqerta për humbjen e zonjës Burbuqe. Ngushëllime edhe miqve, studentëve dhe kolegëve të saj artistë.

Kujtimi për Burbuqe Berishën do të mbetet i paharruar sikurse edhe trashëgimia e saj e çmuar artistike”, tha kryeministri Kurti.​/KultPlus.com

QKK shpreh ngushëllime për vdekjen e regjisores Berisha

Qendra Kinematografike e Kosovës ka reaguar pas lajmit për vdekjen e regjisores, Burbuqe Berisha.

Përmes një postimi në rrjetin social Facebook, QKK u ka shprehur ngushëllime familjes, miqve dhe të gjithë bashkëpunëtorëve.

“Jemi të prekur thellë nga lajmi për vdekjen e regjisores Burbuqe Berisha. I shprehim ngushëllimet më të sinqerta familjes, miqëve dhe gjithë bashkëpunëtorëve”, thuhet në reagimin e QKK-së./KultPlus.com

Ndalini të gjitha orët

Poezi nga Wystan Hugh Auden

Përktheu: Orjela Stafasani 

Ndalini të gjitha orët, këputeni çdo telefon
qenin që leh për kockën e lëngshme a ka kush e pushon,
heshtni pianot dhe me daulle që mbytur tingëllojnë
silleni arkivolin, vajtojcat le t’vajtojnë.

Lërini aeroplanët t’sillen vajtueshëm, mbi re tretur,
dhe ta shkruajnë në qiell mesazhin “Ai ka vdekur”.
N’qafën e bardhë t’pëllumbave fjongo zije le t’ketë
policët e trafikut dorashka t’zeza kanavace t’mbajnë krejt.

Atë e kisha Veri, Jug, Lindje, Perëndim,
ditë pune, dhe në ditën e diel lehtësim,
mesditë, mesnatë, fjalë, tingullin tim.
Mendova se dashuria zgjat përgjithmonë: e kisha gabim

Yjet nuk kanë më vlerë; shuajini një nga një,
mbështilleni Hënën, çmontojeni Diellin, s’duhen më,
zbrazeni oqeanin, pyllin çrrënjoseni, rrafsh t’jetë;
se tash asgjë të mirë më këtu s’do të ketë. / KultPlus.com

Presidentja Osmani për vdekjen e Berishës: Ndarja e saj nga jeta do të lërë zbrazëti të madhe në jetën tonë publike

Sot vdiq regjisorja Burbuqe Berisha në moshën 51-vjeçare.

Për vdekjen e regjisores kanë reaguar figura të shumta publike, të cilën shprehën pikëllimin e ngushëllime për vdekjen e saj.

Ishte edhe Presidentja e Republikës së Kosovës, Vjosa Osmani e cila përmes një statusi në faqen e saj zyrtare në rrjetin social Facebook ka theksuar se lajmin për vdekjen e regjisores Berisha e ka pranuar me pikëllim të thellë.

Ndër të tjera, Presidentja Osmani ka potencuar se Burbuqe Berisha përfaqëson një brez krijuesisht të cilët u formuan në kohë rezistencë dhe e zhvilluan krijimtarinë e tyre krahas kësaj rezistence.

Më poshtë gjeni statusin e plotë të Presidentes Osmani:

Me pikëllim të thellë e mora lajmin për ndarjen nga jeta të regjisores Burbuqe Berisha. Vdekja e hershme e Buqes, sikur njihet ndër qarqet artistike, është humbje e madhe për artin, kulturën dhe kinematografinë e Kosovës.

Ajo përfaqëson një brez krijuesish, të cilët u formuan në kohë rezistence dhe e zhvilluan krijimtarinë e tyre krahas saj, duke e shndërruar artin në rezistencë e dëshmi.

Puna e saj prej regjisoreje në Teatrin Kombëtar, në teatrin “Faruk Begolli”, por edhe në teatro të tjera, mbetet vulë e fuqishme në zhvillimin e teatrit, por edhe të jetës kulturore përgjithësisht.

Krahas punës në teatër, Buqja ka dhënë kontribut të theksuar në edukimin e brezave të rinj, duke qenë pedagoge e respektuar.

Ndarja e saj nga jeta do të lërë zbrazëti të madhe në jetën tonë publike.

I përjetshëm qoftë kujtimi për të! / KultPlus.com

Ministri Çeku: Burbuqe Berisha e dha frymën e fundit në Ministrinë e Kulturës

Sot vdiq regjisorja Burbuqe Berisha në moshën 51-vjeçare.

Për vdekjen e regjisores kanë reaguar figura të shumta publike, të cilën shprehën pikëllimin e ngushëllime për vdekjen e saj.

Ishte edhe ministri i Kulturës, Rinisë dhe Sportit, Hajrulla Çeku i cili përmes një statusi në rrjetin social Facebook theksoi se regjisorja Berisha la pas vetes një krijimtari të pasur filmike e teatrore.

Më poshtë gjeni statusin e plotë të ministrit Çeku.

Lajm i trishtë. Burbuqe Berisha iku para kohe. La pas një krijimtari të pasur filmike e teatrore. Ishte personalitet i veçantë i kulturës. Frymën e fundit e dha në Ministrinë e Kulturës. Kishte ardhur për punët përgatitore të koncertit të Operas, po e bënte regjinë e koncertit.

Ngushëllime familjes, komunitetit artistik dhe gjithë shoqërisë. Qoftë i përjetshëm kujtimi për jetën dhe veprën e Buqes. / KultPlus.com

Vdiq regjisorja Burbuqe Berisha

Ka vdekur në moshën 51-vjeçare regjisorja Burbuqe Berisha.

Siç mësohet, ish-drejtoresha e Teatrit Kombëtar, ka vdekur në Ministrinë e Kulturës.

Berisha njihet si regjisore e disa prodhimeve kinematografike vendore si dhe shfaqjeve teatrale.

Krahas një karriere të suksesshme në regji dhe film, Burbuqe Berisha ka ushtruar edhe profesionin e ligjërueses në Kolegjin AAB. / KultPlus.com

Thirrje për audicion për filmin ‘Brenda’ të regjisores Burbuqe Berisha

Regjisorja Burbuqe Berisha ka bërë publike thirrjen për audicion në filmin ”Brenda”, skenari i të cilit është realizuar nga Xheraldina Vula, kurse me Agron Vulën si producent të filmit, përcjell KultPlus.

Audicionet do të organizohen për disa role, që përfshijnë ato kryesore, rolet e dyta dhe të treta.

Më poshtë gjeni listën e plotë e kritereve të kërkuara për audicion. / KultPlus.com

Tri gra të Kosovës nominohen në New York, promovojnë Kosovën

Zana Hoxha, Ilire Vinca e Burbuqe Berisha janë nominuar në “2020 Gilder/Coigney International Theatre Award” që ndahet një herë në tre vjet nga “The League of Professional Theatre Woman” (Liga e Grave Profesioniste të Teatrit), shkruan KultPlus.

Për këtë arritje ka njoftuar regjisorja e njohur Zana Hoxha, e cila bashkë me dy koleget tjera do të jenë të pranishme në këtë ceremoni. Përderisa Hoxha dhe Berisha janë nominuar për herë të parë në këtë ngjarje të madhe të teatrit, Ilire Vinca një nominim të tillë ka pas edhe para disa viteve.

KultPlus ju sjell të plotë statusin e Zana Hoxhës.

Së bashku me Aktoren Ilire Vinca dhe regjisoren Burbuqe Berisha unë jam renditur në mesin e 27 grave të 18 vendeve të botës si të nominuara për çmimin prestigjioz që njeh kontributin e grave në botën e teatrit. Ilirja për herë të dytë ndërsa unë dhe Buqja për të parën, e kemi futur Kosovën në hartën e shteteve, ku gratë ia dalin të jenë profesioniste të zonja, edukuese përmes artit e edhe frymëzuese për gjeneratat e reja.

Të tria jemi pjesë e listës së të nominuarave për “2020 Gilder/Coigney International Theatre Award” që ndahet një herë në tre vjet nga “The League of Professional Theatre Woman” (Liga e Grave Profesioniste të Teatrit)./ KultPlus.com

Burbuqe Berisha nominohet për Çmimin Ndërkombëtar “The LPTW Gilder/Coigney International Theatre Award”

Prodekanja e Fakultetit të Komunikimit Masiv, Burbuqe Berisha, nominohet për Çmimin Ndërkombëtar “The LPTW Gilder/Coigney International Theatre Award”.

Artistja dhe regjisorja e njohur kosovare, Burbuqe Berisha, prodekane në Fakultetin e Komunikimit Masiv në Kolegjin AAB, është nominuar për Çmimin Ndërkombëtar për Teatër “The LPTW Gilder/Coigney International Theatre Award”.

Ky çmim i rëndësishëm ndërkombëtar, është themeluar në vitin 2011 si Liga e Grave Profesioniste të Teatrit (The League of Professional Theatre Women #LPTW), në nderim të dy ikonave ndërkombëtare të teatrit, Rosamond Gilder dhe Martha Coigney, ndërsa ka për qëllim të shpërblejë profesionistet e fushës për arritje të jashtëzakonshme, me qëllimin për të ngritur zërin e tyre përtej kufijve anembanë globit.

Laureate të këtij çmimi, që jepet çdo të tretin vit, deri tani kanë qenë artiste nga Ruanda, Kolumbia dhe Holanda.Profesoresha Burbuqe Berisha, është nominuar në mesin e 27 grave të tjera nga 18 shtete të botës. Ajo është autore e 12 filmave të shkurtër artistikë, 5 filmave dokumentarë, 8 shfaqjeve teatrore, ndërsa me filmin e metrazhit të gjatë “Një tregim Prishtine”, ka fituar Çmimin për Kinematografi për vitin 2018.Po ashtu, Berisha ka qenë fituese e shumë shpërblimeve ndërkombëtare për film të shkurtër, dokumentar dhe shfaqje teatrore.

Burbuqe Berisha ka qenë kryetare e Këshillit Drejtues të Teatrit Kombëtar të Kosovës; drejtoreshë e këtij institucioni; ka menaxhuar Kinemanë ABC dhe po ashtu ka qenë anëtare e Bordit të Qendrës Kinematografike të Kosovës. Që nga viti 2012 është e angazhuar në Fakultetin e Komunikimit Masiv në Kolegjin AAB në pozitën e mësimdhënëses dhe prodekanes, ndërsa është edhe drejtoreshë artistike e festivalit të vetëm ndërkombëtar të teatrove në Kosovë, “Prishtina International Theater Festival”, që organizohet nga Kolegji AAB./ KultPlus.com

Artistët ndihmojnë Burbuqe Berishën, ofrojnë pikturat në ankand

Shumë artistë kanë dhuruar pikturat e tyre që ti ofrojnë për shitje, fond ky që do të shkojë për të ndihmuar në shërimin e regjisores Burbuqe Berisha, shkruan KultPlus.

Luan Mulliqi, Ismet Jonuzi, Zake Prelvukaj, Eliza Hoxha, Lorik Sylejmani, Valdete Vucitërna, Visar Mulliqi, Arlinda Hajrullahu, Hajrush Fazliu, Muhamet Ahmeti, Musë Prelvukaj, Isa Alimusa, Lirije Bulliqi, Vlora Kosumi, Vlora Hajdini, Arben Shala, Blerta Surroi, Lyra Zajmi, Bardhyl Bejtullahu, Zana Ramadani, Mjellma Goranci, Shqipe Kamberi, Arbana Hajredinaj, Tomor Arifi, Guri Cavdërbasha e Mirsad Lushtaku, janë artistët që kanë ofruar punimet e tyre për këtë ankand, që do të ekspozohen më 21 nëntor, prej orës 18:00 të Menza e Ramiz Sadikut.

Kjo mbrëmje do të udhëhiqet nga aktori i njohur kosovar Fatmir Spahiu, kurse për këtë iniciativë është shprehur falënderuese edhe vetë Burbuqe Berisha, e cila ka theksuar se është e vështirë në raste të tilla të përballohen financat. /KultPlus.com

“Një tregim Prishtine” i Burbuqe Berisha shfaqet në disa festivale

Regjisorja kosovare Burbuqe Berisha së fundi ka realizuar filmin e metrazhit të gjatë “Një tregim Prishtine”, me skenar të Getoarbë Mulliqit dhe regji të saj.

Filmi përkatës duke filluar edhe nga vetë titulli i kushtohet qytetit të saj të dashur, Prishtinës dhe realiteti me aspektet negative apo pozitive në ketë kryeqytet.

Vetë regjisorja Berisha për KultPlus ka deklaruar se po me ketë film do ta prezantoj Kosovën në disa festivale ndërkombëtare brenda muajit Maj.  

Këto festivale janë:

Më datë 03.05.2019 në Clam – Festival Internacional de Cinema Social de Catalunya –Spanjë.

2. Më datë 04.05.2019 në Dea Film festival ne Tiranë,

3. Më datë 25.05.2019 në Berlin në festivalin South East European Film Festival (SEEFF)./KultPlus.com

Shfaqja ‘Bryma e vdekjes’, sonte premierë në TKK

Pamja e eksodit të shqiptarëve drejt Bllacës, do të kthehet pas dy dekadash si manifestim artistik në skenën e madhe të Teatrit Kombëtar të Kosovës.

Shfaqja “Bryma e vdekjes”, me tekst të Milazim Krasniqit e regji të Burbuqe Berishës, përmes bashkimit të kastës së aktorëve të Teatrit Kombëtar të Kosovës me trupën e Baletit Kombëtarë të Kosovës,  tenton të prekë realitetin e asaj kohe. Duke sjellë në memorien e publikut pamjen e një katastrofe humanitare,  paraqet banorët e dëbuar nga shtëpitë e jeta e tyre e mëparshme teksa përfundojnë në një kamp famëkeq, ku jetesa e tyre përshkruhet si jetesë mes vuajtjes e vdekjes.

Regjisorja Berisha fton publikun për të parë shfaqjen, pasi sipas saj, ajo është një shfaqje e cila ballafaqon me të kaluarën dhe reflektimin me atë çfarë ka ndodhur 20 vjet më parë në Bllacë të Maqedonisë së Veriut.

Ndërsa autori i shfaqjes Milazim Krasniqi, thotë se duke qenë dramaturg edhe para kohës së luftës, situatën e Bllacës e kishte preukopuar në nivel personal dhe  në nivelin e një tragjedie të popullit, e veçmas si një shëmbëllim i përvojave të hidhura të kampeve të përqendrimit në Evropë. Krasniqi për KultPlus tregoi se duke e kujtuar në retrospektivë atë skenë, ajo i ngjante si një skenë teatri e një tragjedie antike greke, e cila nëse do të vazhdonte shumë lehtë do të mund të shndërrohej në një kamp të vdekjes, pasi që mungonin kushtet elementare të jetesës.

Sipas njoftimit të shfaqjes, shpërfytyrimi, tjetërsimi si dhe përulja e qëllimshme e popullatës shqiptare do të paraqiten nëpërmes personazheve të portretizuara me shumë origjinalitet sikur ai i Fitimit, Ademit dhe Havës, Mentorit, Dritës si dhe vajzës së tyre të vogël. Drama është realizuar në atë mënyrë që në fund, tenton të japë një mesazh pothuajse mitik, që të kthen në kohën e krijimit të njerëzve të parë, andaj dhe personazhet kryesore mbajnë emrin Adami dhe Hava, dhe për dramaturgun Krasniqi rikthimi në Kosovën e lirë, ka qenë një përngjasim i fillimit të njerëzimit, të cilët përkundër që kanë lënë mbrapa një realitet plot vuajtje, e  kanë gjetur forcën për  të përqafuar jetën në një realitet të ri. Përveç vuajtjes, shfaqja tenton të prekë edhe një mesazh tjetër, atë të solidaritetit.

Aktorët që do të luajnë në këtë shfaqje janë: Valmir Krasniqi, Albulena Kryeziu –Bokshi, Bujar Ahmeti, Teuta Krasniqi, Thana Deliu, Artiola Hamdija, Blerta Deliu, Afrim Muqa, Naim Berisha, Ismet Azemi, Shpetim Kastrati, Labinot Raci, Xhejlane Godaci dhe Adhurim Demi.

Kompozitor i muzikës do të jetë Florent Bishnjaku, Skenografia është e punuar nga Petrit Bakalli dhe kostumografia nga Albulena Borovci ndërsa koreografinë e shfaqjes e ka punuar Sinan Kajtazi.

“Bryma e vdekjes” vjen premierë sonte në ora 20:00 në skenën e madhe të Teatrit Kombëtar të Kosovës / KultPlus.com

Burbuqe Berisha jep dorëheqje nga pozita në Teatrin Kombëtar të Kosovës

Burbuqe Berisha e ka parashtruar dorëheqjen e saj nga pozita që zë në Teatrin Kombëtar të Kosovës.

Për shkak të presionit nga Agjensioni Antikorrupsion, Burbuqe Berisha i ka shkruar Ministrit Kujtim Gashi duke treguar arsyet pse po largohet nga kjo pozitë, si kryetare e Bordit në Teatrin Kombëtar të Kosovës.

“Nuk po e shoh aspak të arsyeshme ku si një qytetare e ndërgjegjshme e Republikës së Kosovës dhe e ndershme njëkohësisht në veprimtarinë time duke i ikur çdo konflikti interesi, të më kërkohet një gjë e tillë. Unë asnjëherë nuk kam qenë përfituese e të mirave që ofron ky shtet” ka shkruar mes tjerash Burbuqe Berisha.

Ajo thotë se është kushtëzuar ta marrë një vendim të tillë, shkruan KultPlus.

“Çdoherë punën time artistike e kam punuar pothuajse vullnetarisht, por mund edhe ti ketë penguar dikujt fuqia ime artistike dhe profesionale. Gjithsesi dua ta respektoj deri në momentin e fundit ligjin dhe shtetin. Për momentin gjendja ime shëndetësore është e rëndë, prandaj nuk kam mundësi që këtë letër ta dorëzoj personalisht” shkruhet në letrën që i ka shkuar Ministrisë së Kulturës, Rinisë dhe Sporteve nga Burbuqe Berisha.

Berisha ka qenë e angazhuar edhe si regjisore brenda Teatrit “Faruk Begolli” në Kolegjin AAB ndërsa më herët ka mbajtur poste të ndryshme vendimmarrëse në skenën kulturore dhe artistike në Kosovë, krahas punës si regjisore. / KultPlus.com

Filmi nga perspektiva e femrave

Shkruan Burbuqe Berisha

Regjisoret femra në film janë ende të rralla. Në Hollywood – studimi më i fundit i USC Annenberg për media, me temën ‘Diversiteti dhe ndryshimet sociale në lidhje me regjisoret femra në industrinë e filmit’ kohët e fundit dha rezultat si ‘Karrige e regjisorëve është e bardhë dhe vetëm për meshkuj’ duke e cilësuar si diçka jo e arritshme për femra.

Madje aftësitë e femrave e përshkruan si të limituara sa i përket këtij profesioni, duke e theksuar si papjekuri intelektuale kur femrat janë të reja, ndërsa kur kanë një moshë më të pjekur nuk kanë më fuqi fizike t’iu përballojnë sfidave të xhirimit. Regjja konsiderohet si profesion sa intelektual aq edhe fizik me kondicion krijues. Madje ky studim erdh me këtë konkludim: ‘Mundësitë për regjisoret femra janë të rralla’, por kjo nuk ka ndaluar të lansojë bindjen të krijueseve për të nxjerrë filma të shkëlqyer për sa kohë që forma e artit filmik ka ekzistuar.

Në vitin 2012, Instituti i filmit në Sundance dhe Women in Film, ne Los Angeles nisën iniciativën e festivalit për femra për të nxitur barazinë gjinore për gratë prapa kamerës për te fuqizuar pozitën e tyre . Hapi i parë është bërë të kuptojnë numrat e saktë të regjisoreve dhe shkaqet rrënjësore të mos përfshirjes së tyre në filmat amerikanë, në mënyrë që të mund ta trajtonim problemin. Hulumtimi i bërë historik gjatë tre viteve të fundit zbuloi barrierat dhe mundësitë kryesore të grave për punën në filmat, që informojnë punën kolektive dhe individuale të femrave ne film .

Do të thotë që edhe Hollywood-i ka sfidat e veta sa i përket barazisë gjinore në prodhimtarinë e filmit. Regjisoret femra janë te pakta edhe në ngjarjet më të rëndësishme për filmin ne botë .

Që kur Kosova shpalli pavarësinë në vitin 2008, regjisoret e saj kanë kërkuar gjithnjë e më shumë nxitje të dialogut publik për çështjet sociale. Pavarësisht nga pengesat financiare, regjisoret femra të shkathëta kanë përdorur teknika të ndryshme kinematografike për të prodhuar filma frymëzues që lënë audiencën me një kuptim më të thellë të vendit. Këto janë shembuj dhe te gjitha pas vetes kanë fuqi krijues në fushën e filmit. Së pari me filma të metrazhit të shkurtë dhe dokumentar së fundi edhe me filma artistik të metrazhit të gjatë.

Rrugëtimin i femrave në film në Kosovë është evident dhe nuk ka të ndalur. Profesion ky që deri pas vitit 1999 nuk ka pas një emër nga gjinia e bukur. Pas luftës në Kosovë emrat e regjisoreve femra veç janë shtuar duke ndërtuar një kulturë tjetër te trajtimit te filmit më inventiv, me një trajtim më social, një frymë që mund të thuhet e një neorealizmi kosovar, një shikim ndryshe për problemet e shoqërisë në ditët e sotme.

Po fillojmë nga Blerta Zeqiri me filmin “Martesa” një tabu temë e cila është trajtuar në mënyre shumë suptile. Në këtë film që shtjellohet dashuria nëpërmjet një trekëndëshi, e gjithë ngjarja shtjellohet, para dhe gjatë martesës së Bekimit me Anitën, e cila nuk është në dijeni se Bekimi është ende në dashuri me shokun e tij më të mirë Nolin. Një trekëndësh dramaturgjik i cilin nuk është trajtuar ndonjëherë në filmat kosovarë. Një guxim artistik po edhe estetik në mënyrën e trajtimit, një dialog i përsosur i personazheve më shumë me trajtim natyralist dhe dokumentar.
Kohëve të fundit janë punuar filmat e metrazhit të gjatë nga regjisoret femra që ende nuk e kanë pas premierën e tyre. Arzana Kraja me ‘Fusha e Mëllenjave’, ‘ Një tregim Prishtine’ nga Burbuqe Berisha, ‘Aga’ nga Lendita Zeqiraj, poashtu Antoneta Kastrati me filmin “Zana” i cili është në fazën e xhirimit, ‘Mbylle Derën’ me skenar dhe regji nga Parta Kelmendi në paraprodukcion, Blerata Basholli me filmin e saj, Kaltrina Krasniqi dhe Dorunitna Basha me projektin e tyre të ri…
Sa shumë emra femrash regjisore në një vend ku femra pak ka hapësirë. Në një mënyrë mundësia për to është e ngulfatur nga mosbesimi, mundësi kjo e munguar por në film për fat të mirë e përkrahur dhe me rezultat.

Burbuqe Berisha
Autorja është U.D. Dekane dhe Ligjëruese në Kolegjin AAB

Burbuqe Berisha, kryetare e Këshillit Drejtues në TKK

Ministri i Ministrisë për Kulturë, Rini dhe Sporte, Kujtim Gashi ditë më herët ka emëruar Këshillin Drejtues të Teatrit Kombëtar të Kosovës, shkruan KultPlus.

Pas mbledhjes së parë të këtij këshilli, tashmë është zgjedhur edhe kryetari i këtij këshilli, ku për këtë mandat kjo detyrë i është besuar, Burbuqe Berishës.

Këshilli Drejtues përbëhet nga: Burbuqe Berisha, Shkëlqim Millaku, Fisnik Ademi, Jahja Shehu, Orhan Kërkezi, Ismet Azemi e Valon Kashtanjeva./KultPlus.com

Emërohet Këshilli Drejtues në Teatrin Kombëtar të Kosovës

Ka kohë që Këshilli Drejtues i Teatrit Kombëtar të Kosovës nuk ka qenë funksional, si pasojë e dorëheqjes së disa anëtarëve , shkruan KultPlus.

Së fundi, ministri i Ministrisë së Kulturës, Kujtim Gashi ka emëruar Këshillin e ri Drejtues të këtij institucioni.

KultPlus merr vesh që emrat e rinj që përbëjnë këtë këshill janë: Burbuqe Berisha, Shkëlqim Millaku, Fisnik Ademi, Jahja Shehu, Orhan Kërkezi, Ismet Azemi e Valon Kashtanjeva.
Pritet të mbahet shpejt mbledhja e parë e këtij Këshilli, në mënyrë që të zgjidhet edhe udhëheqësi i këtij organi./KultPlus.com

Pesë filma të Kosovës janë prezantuar para selektorëve të Berlinales

Katër filma të metrazhit të gjatë dhe një dokumentar janë prezantuar para selektorëve të Berlinales, filma këta të mbështetur nga Qendra Kinematografike e Kosovës, shkruan KultPlus.

Filmat artistik të metrazhit të gjatë që po synojnë Berlinalen janë: “Fusha e Mëllenjave” nga Arzana Kraja, “Njeriu i Dosjeve” mga Ismet Sijarina, “Një tregim Prishtine”, nga Burbuqe Berisha dhe “Qiej të trazuar” nga Anton Ndreca. Kurse dokumentari që do të prezantohet poashtu para selektorëve është “Me dasht’, me dasht’, me dasht’ nga Ilir Hasanaj.

Mbetet të shihet se nëse ndonjë nga këta filma mund të shfaqet edhe premierë në këtë festival prestigjioz./KultPlus.com

Pesë filma të Kosovës po synojnë Berlinalen

Katër filma të metrazhit të gjatë dhe një dokumentar do të prezantohen para selektorëve të Berlinales, filma këta të mbështetur nga Qendra Kinematografike e Kosovës, shkruan KultPlus.

Arben Zharku, drejtor i QKK-së ka thënë për KultPlus se filmat do të prezantohen para selektorëve në mes datave 15-17 nëntor në Shkup.

“Jemi shumë të lumtur që kemi kaq numër të madh të filmave të metrazhit të gjatë dhe me kualitet të lartë dhe poashtu me produksion të cilësisë së lartë, të cilët janë të gatshëm të fillojnë rrugëtimin nëpër festivale ndërkombëtare”, ka thënë Zharku për këto projekte filmike.

Zharku ka njoftuar se filmat artistik të metrazhit të gjatë që po synojnë Berlinalen janë: “Fusha e Mëllenjave” nga Arzana Kraja, “Njeriu i Dosjeve” mga Ismet Sijarina, “Një tregim Prishtine”, nga Burbuqe Berisha dhe “Qiej të trazuar” nga Anton Ndreca. Kurse dokumentari që do të prezantohet poashtu para selektorëve është “Me dasht’, me dasht’, me dasht’ nga Ilir Hasanaj. /KultPlus.com