Poezi nga Sibel Halimi
Rrobat e verës
i kthehen sirtarëve
valixheve pluhur – dheut të thërrmuar
që mund t`ia lëmë një emër
Nuk rritemi më
vjeshta kujton
jetën palë-palë të fjetur qetësisht
n`fytyrën e natyrës që bie në gjumë
Mikja ime më thotë
‘po plakemi
e po i sorollatemi vetes
rreth e qark’
N`vjeshtë
për çudi ndjej një mall për veten
sikur ta takoja për herë të parë / KultPlus.com
Pasditja e sotme në “Tirana International Film Festival” nisi me një film të kategorisë PerspecTIFF, “Brothers” nga regjisori kazak, Darkhan Tulegenov.
Më pas në Kinema Millennium u shfaqën 12 filma të shkurtër, të animuar, fituesi i të cilëve, do të kualifikohet për konkurim në Oscars dhe European Film Awards.
Pas filmave të animuar të cilët u shfaqën paraditen e ditës së tretë të festivalit, në Liceun Artistik “Jordan Misja”, rreth orës 17, nisi programi i filmave të kategorisë “PARADE”, mbi çështje të komunitetit LGBTQ. Nga ky seksion i festivalit u projektuan 4 filma fiksion dhe një dokumentar, të gjithë të metrazhit të shkurtër.
Filmi që tërhoqi më shumë vëmendjen, në ditën e tretë të TIFF, ishte “Winter Fireflies”, i aktorit dhe regjisorit Artur Gorishti. Filmi i metrazhit të gjatë, prej 149 minutash, dhe prodhim i këtij viti, sjell aktorë si Birçe Hasko, Luli Bitri, vetë regjisorin Gorishti, si dhe Arben e Florist Bajgora. Pjesa më e madhe e kastit, ishin të pranishëm në sallën e Kinema Millennium, ku falënderuan bashkëpunëtorët dhe bashkëbiseduan me spektatorët.
Filmi rrëfen historinë e një plaku i cili sjell ngjarje nga e kaluara për të pastruar ndërgjegjen e tij, duke i kërkuar falje vetes dhe njerëzve që ka lënduar. Për “Winter Fireflies” (Xixellonjat e dimrit) kjo ishte premiera botërore.
Përveç regjisë e aktrimit, Artur Gorishti vjen edhe si skenarist i filmit, ndërsa muzika është shkruar nga Fatrin Krajka./atsh/ KultPlus.com
Poezi nga Naime Beqiraj
Vjeshtë
Në palestër hartash, objekte të verdhme moti
Zhurmat si trokitje, hijezuar ultë, krejt pa taka
Një kopsht me vete dhe rrugë kah mediton Zoti
Prap vjeshtë, prush i kuq, edhe kur s’i del flaka
I dua pemët që thur ti, edhe në mos i hëngsha
Kur me shije planeti syrin ma thirrin mes rreshtash
E praruar me drita, mollë e ftua në mos u bëfsha
Në dorë më ke, n’krahëror, sa e ëmbël vjeshta
Duke i pyetur xhamat të pasqyruar me shije
Drita është e ëmbël edhe kur nuk qet sy dielli
Si ta kthej vjeshtën, kur bora s’ndjell fryrje
Atëherë, kur urtas, nuk të errët syri as qielli
Vjen vjeshta e prajshme si urtake e Zotit
I pushon pak nga pak ngjyrat në simfoni
Si palë ëndrrash, barkas kur kthehet moti
E si copa perlash, kur pikat ju bijnë përbri
E priste bashkë me hënën që i fshihej përballë
Atë krijesë të vogël që i rrinte sipër duke qeshë
Në ditët e njoma as duhan nuk kishte varë
Mister lajmëronte qielli, mandej binte vjeshtë
Ajo qëlloi e bukur e madhe – për tu zvogëluar
Veç rrezja përbirohej në skaj buze duke qeshë
Askush nuk nxirrte as fuqi për ta zëvendësuar
Ajo veç një ishte, veç një, mandej bëhej vjeshtë
Nisi t’i studionte prap ngjyrat e Van Gogut
Plepat e praruar, dritat, gjethet duke qeshë
Impresionizmin, diellin edhe erën e sfondit
Pika të gravuara, si malli që lind në vjeshtë
Te shkallët e oborrit, gjethet luanin mbi kokë
Pemët elegante, qerpikun prapë ia kishin dehë
Bukuria jote nuk mësohet më në asnjë shkollë
Bukuria nuk qetësohet kur thërriste – vjeshtë
Kur një erë e jugut pikë pikë i zhduk kurorat
Bijnë në tokë të vet, përzihen lehtë me hijeshi
E shkruajnë lehtë ylberin, sa do janë të vogla
E mbas gjurmëve të vjeshtës – pikon dashuri / KultPlus.com
”Udha e shkronjave”, filmi artistik shqiptar që ka lënë gjurmë të mëdha në kinematografinë shqiptare, është prodhim i vitit 1978 nga stafi i radio televizioni shqiptar, R.T.V.SH, shkruan KultPlus.
Filmi është prodhuar sipas skenarit të tregimit të Dhimitër Shuteriqit, ”Buka dhe thika”.
Filmi trajton një temë të mjaft delikate. Mësues Dhaskal Todri, një patriot, i cili kishte ardhur nga jashtë shtetit, kishte lënë gjithë pasurinë e tij për të sjellë në Shqiperi nje ngarkesë me shkronja tunxhi dhe krijimin e shtypshkronjës së parë. Me kthimin e tij në atdhe, armiqtë e tij nuk ishin të kënaqur. Karvanxhiu i thjeshtë që e shoqëronte ngarkesën nuk arrin ta kuptojë dot patriotin, se përse kishte kaq shumë vlerë e gjithë kjo. Mësues Todri nuk pati mundësinë të arrijë në vendlindje pasi armiqtë e gjuhës shqipe e vrasin mësuesin patriot.
Në film intepretojnë aktorët: Sandër Prosi, Bujar Lako, Ndrekë Luca, Agim Qirjaqi, Vangjo Grabocka, Muhamet Sherri, Luftar Pajo etj.
Në vijim, KultPlus ju sjell këngën e famshme që është pjesë e këtij filmi, ”Kënga e Trimave”. / KultPlus.com
Më 26 shtator të vitit 1998, në fshatin Abri e Epërme, forcat serbe kishin kryer një nga masakrat më mizore gjatë luftës në Kosovë.
Në këtë ditë ishin masakruar 23 anëtarë të familjes Deliu, në mesin e tyre gra, fëmijë e pleq, nga mosha gjashtë muajsh deri në 94 vjeç.
Nga 25 shtatori, familja Deliu ishte strehuar në mal, për t’i shpëtuar sulmeve serbe, transmeton KultPlus. Një ditë më vonë, më 26 shtator, rreth orës 10:00 paradite, aty kishte depërtuar këmbësoria serbe. Me këtë rast ishin dëgjuar të shtëna armësh e britma njerëzish.
Pas sulmit u zbulua, se të gjitha viktimat, fëmijë, pleq, gra e të rinj, ishin qëlluar në kokë nga afërsia. Trupat e të ekzekutuarve tregonin dëshmi të qarta të një kasaphane. / KultPlus.com
Të gjurmosh origjinën e saktë të çdo flamuri nga e gjithë bota mund të jetë e vështirë pasi shumë prej tyre nuk kanë histori konkrete. Disa nga flamujt më të vjetër kanë histori që bazohen në legjenda, të cilat mund të mos jenë të sakta historikisht. Për më tepër, flamujt shpesh pësojnë disa ndryshime dhe është e rrallë që flamuri i një vendi të duket i njëjtë me atë që ishte kur u përdor për herë të parë.
Përkundër këtyre sfidave, është përpiluar një listë nga oldest.org që përfaqëson më së miri atë që besohet gjerësisht se janë flamujt më të vjetër në botë.
Viti i parë i përdorur: 1785
Viti i Miratuar Zyrtarisht: 1981
Emri Zyrtar: Rojigualda
Ngjyrat kryesore: Tribanda e kuqe dhe e verdhë me stemën spanjolle
Flamuri aktual i Spanjës gjurmon historinë e tij në shenjën detare të vendit të 1785 i njohur si Pabellón de la Marina de Guerra. Dizajni i flamurit u zgjodh personalisht nga Mbreti Charles III i Spanjës nga 12 flamuj të ndryshëm të projektuar nga Antonio Valdés y Bazán. Gjatë dekadave të ardhshme, flamuri u përdor kryesisht mbi fortesat bregdetare, kazermat detare dhe pasuritë e tjera detare.
Flamuri nuk u përdor nga një njësi spanjolle e tokës deri në 1820 dhe nuk u përdor jashtë qëllimeve ushtarake deri në 1843 kur Mbretëresha Isabella II e Spanjës bëri zyrtar flamurin. Që atëherë, skema e ngjyrave të kuqe dhe të verdhë të flamurit ka mbetur në takt (me përjashtim të periudhës së Republikës së Dytë nga 1931 – 1939) me ndryshimin e vetëm stemës.
Viti i parë i përdorur: 1696
Viti i Miratuar Zyrtarisht: 1993
Emri zyrtar: Триколор (Trikolor)
Ngjyrat kryesore: tribandë e bardhë, blu dhe e kuqe
Versioni modern i flamurit rus u miratua për herë të parë në 1696 nga Tsardom i Rusisë, por nuk ka qenë në përdorim të vazhdueshëm për shkak të historisë së trazuar të Rusisë. Flamuri trengjyrësh është përdorur dhe shpërdoruar disa herë gjatë gjithë historisë së Rusisë dhe më në fund u restaurua në 1993. Flamuri i Rusisë duket shumë i ngjashëm me flamurin Hollandez dhe sipas dy historive të ndryshme të origjinës kjo ishte e qëllimshme. Të dy historitë lidhin flamurin trengjyrësh të Rusisë direkt me atë të përdorur në Hollandë. Sipas të dy tregimeve, një car rus (ose Aleksi I ose Pjetri i Madh) u frymëzua për të valvitur flamurin e tij detar pasi dëshmoi flamujt detarë të përdorur nga Hollandezët.
Viti i parë i përdorur: shek. XVI, ndoshta më i vjetër
Viti i Miratuar Zyrtarisht: 1870
Emri Zyrtar: Nisshōki i Hinomaru
Ngjyrat kryesore: E bardhë me diell të kuq
Ashtu si shumë prej flamujve më të vjetër, origjina e flamurit japonez është e mbështjellë me mite dhe legjenda. Japonezët e konsiderojnë 660 pes si datën e themelimit të vendit dhe ata besojnë se Perandori i parë i Japonisë ishte një pasardhës i perëndeshës së diellit Amaterasu. Për shkak të kësaj historie (legjendare), simboli i diellit ka qenë gjithmonë i rëndësishëm në Japoni, veçanërisht në flamurin e vendit. Përdorimi i parë i regjistruar i një flamuri me motiv dielli në Japoni daton në 701, nëse kjo histori është e vërtetë, kjo do ta bënte flamurin e Japonisë më të vjetrin. Sidoqoftë, kjo histori shpesh diskutohet dhe jashtë Japonisë por flamuri i vendit rrallë konsiderohet më i vjetri në botë. Flamuri më i vjetër ekzistues japonez daton vetëm para shekullit të 16-të dhe përsëri, vjen me histori legjendare që e vendos atë nga shekulli i 11-të.
Viti i parë i përdorur: c.1572
Viti i Miratuar Zyrtarisht: 1937
Emri zyrtar: Flamuri i Mbretërisë së Hollandës
Ngjyrat kryesore: tribandë e kuqe, e bardhë dhe blu
Flamuri modern Hollandez (Hollandë) është një ndryshim i Flamurit të Princit i përdorur nga William Prince of Orange në Revoltën Hollandeze kundër Mbretit Philip II të Spanjës gjatë fundit të shekullit të 16-të. Ky flamur me tre ngjyra ishte fillimisht portokalli, i bardhë dhe blu. Përfundimisht, shiriti i sipërm portokalli u ndryshua në të kuq diku pas 1630. Sipas CIA World Factbook, ndryshimi i ngjyrës mund të ketë qenë për shkak të kalimit të ngjyrës portokalli në të kuqe me kalimin e kohës. Për më tepër, Cact Factbook e konsideron flamurin Hollandez si trengjyrëshin më të vjetër në përdorim të vazhdueshëm. Ky pretendim ndihmohet nga fakti se shumica e flamujve më të hershëm përdornin vetëm dy ngjyra.
Viti i parë i përdorur: c.1562, ndoshta më herët
Viti i Miratuar Zyrtarisht: 1906
Emri zyrtar: Asnjë
Ngjyrat kryesore: Blu me kryq të verdhë nordik
Historia e flamurit suedez mund të jetë e vështirë të gjurmohet pasi ekzistojnë disa histori të ndryshme rreth origjinës së tij. Disa teori sugjerojnë që bluja dhe e verdha e flamurit janë përdorur nga gjykata mbretërore Suedeze që prej të paktën 1275. Një histori tjetër thotë se ngjyrat e flamurit u frymëzuan nga stema e tanishme suedeze nga 1442. Disa nga flamujt më të vjetër të ruajtur Suedisht tregojnë se ngjyrat e flamurit të hershëm mund të kenë qenë në të vërtetë blu dhe e bardhë. Në fakt, përshkrimi i parë ligjor i flamurit me një kryq të verdhë në një sfond blu daton vetëm në 1562.
Viti i parë i përdorur: c.1470, ndoshta më herët
Viti i Miratuar Zyrtarisht: 1889
Emri zyrtar: Asnjë
Ngjyrat kryesore: E kuqe me kryq të bardhë
Flamuri i Zvicrës është një nga vetëm dy flamuj katrorë të shtetit sovran në botë, tjetri i përket Qytetit të Vatikanit. Edhe pse zyrtarisht flamuri është katror, anijet zvicerane dhe organet joqeveritare shpesh valvisin një version drejtkëndëshe të flamurit zviceran. Historia e flamurit zviceran mund të gjurmohet në tre legjenda të ndryshme: Legjioni Theban, Reichssturmfahne (Flamuri i Luftës Perandorake) gjatë shekullit të 12-të dhe Arma Christi në shekullin e 13-të. Ndërsa të gjitha këto grupe mund të kenë përdorur një flamur të kuq me kryq të bardhë, flamuri katror u përdor për herë të parë diku në vitet 1470. Simboli i Kryqit të Kuq (një kryq i kuq në një sfond të bardhë) është një e anasjelltë e drejtpërdrejtë i flamurit zviceran. Ky simbol u bë simboli origjinal i mbrojtjes i shpallur nga konventa e parë e Gjenevës dhe i bën nderim themeluesit të Kryqit të Kuq, Zvicerian Henry Dunant.
Viti i parë i përdorur: c.1443, ndoshta më herët
Viti i Miratuar Zyrtarisht: 1912
Emri Zyrtar: Flamuri Kombëtar
Ngjyrat kryesore: E kuqe me një shqiponjë të zezë dykrenare
Imazhet e një shqiponje të zezë dykrenare në një sfond të kuq u përdorën nga familjet fisnike të Shqipërisë që nga Mesjeta. Këto familje huazuan shqiponjën dykrenare nga flamuri i Perandorisë Bizantine. Dizajni i flamurit modern të Shqipërisë gjurmohet drejtpërdrejt në stemën e Shtëpisë së Kastriotit. Gjergj Kastriot Skënderbeu përdori një flamur të kuq me një shqiponjë të zezë dykrenare kur drejtoi një revoltë kundër Perandorisë Osmane që rezultoi në pavarësinë e Shqipërisë. Që atëherë, simboli i shqiponjës dykrenare është ripërdorur nga nacionalistët shqiptarë sa herë që vendi ka luftuar për pavarësinë e tij. Flamuri u miratua zyrtarisht në 1912.
Viti i parë i përdorur: rreth 1279
Viti i Miratuar Zyrtarisht: 1918; ri-miratuar në 1990
Emri zyrtar: Asnjë
Ngjyrat kryesore: E kuqe me brez të hollë të bardhë
Flamuri Letonez duket i ngjashëm me shumë prej flamujve më të vjetër në botë, të cilët gjithashtu kanë një skemë ngjyrash të kuqe dhe të bardhë. Ndërsa askush nuk e di me siguri se kur u përdor për herë të parë flamuri kuqezi në Letoni, ka prova historike që tregojnë se flamuri mund të ishte përdorur qysh në shekullin e 13-të. Një flamur i kuq me një shirit të bardhë u përmend për herë të parë në Kronikën Rhymed të Livonia, flamuri u përdor në 1279 gjatë një beteje midis fiseve antike Letoneze nga Cēsis. Flamuri kuq e bardhë u miratua zyrtarisht në 1918 dhe u përdor derisa filloi pushtimi Sovjetik i Letonisë në 1940. Flamuri i Letonisë së pavarur u rikuperua përfundimisht në 1990.
Viti i parë i përdorur: c. fundi i shekullit të 12-të, por e dokumentuar zyrtarisht në 1230
Viti i Miratuar Zyrtarisht: 1918
Emri zyrtar: Asnjë
Ngjyrat kryesore: Tribanda e kuqe dhe e bardhë
Flamuri i Austrisë është shpesh një nga pretendentët kryesorë për flamurin më të vjetër në botë. Tribanda e kuqe dhe e bardhë mund të jetë përdorur që në 1105 dhe bazohet në stemën e dinastisë mesjetare Babenberg. Edhe pse kjo i paraprin flamurit danez me një shekull, përdorimi i parë i dokumentuar zyrtar i triband nuk ndodhi deri në 1230. Sipas legjendës austriake, flamuri i vendit u shpik nga Duka Leopold V i Austrisë si pasojë e luftimeve të tij gjatë Rrethimit të Akrit (1189 – 1191). Ndërsa kjo histori ndoshta nuk është e vërtetë, sundimtarët e Austrisë kanë përdorur ngjyra të kuqe të bardhë të kuqe prej fundit të shekullit të 13-të.
Viti i përdorur për herë të parë: c.1219, ndoshta më herët
Viti i Miratuar Zyrtarisht: 1625
Emri Zyrtar: Dannebrog
Ngjyrat kryesore: E kuqe me kryq të bardhë nordik
Megjithëse disa vende pretendojnë të kenë flamurin më të vjetër, flamuri i Danimarkës konsiderohet gjerësisht se është flamuri më i vjetër ekzistues në botë. Zyrtarisht, flamuri njihet si Dannebrog dhe tregon historinë e tij që prej së paku 1219. Flamuri njihet nga Libri i Rekordeve Botërore Guinness si flamuri kombëtar më i vjetër i përdorur vazhdimisht. Sipas legjendës, flamuri ra nga qielli gjatë një beteje në Lyndanisse, Estoni. Ndërsa legjenda mund të jetë shfaqur rreth vitit 1500, ka prova se një flamur i kuq me një kryq të bardhë ishte duke u përdorur nga danezët që nga rreth 1340 – 1370. Dannebrog është treguar në një Gelre Armorial nga rreth kësaj kohe së bashku me stemën e mbreti i Danimarkës në atë kohë. /SCAN/ KultPlus.com
Aktori Jason Momoa i zbaton rregullat në botën e magjive, në filmin e ri të pagëzuar “Slumberland”, trailerin e të cilit e lansoi Netflix.
Ky film është adaptim nga stripi klasik me emrin “Little Nemo in Slumberland”.
Në film paraqitet një vajzë me emrin Nema, e cila zbulon një hartë sekrete për në botën e ëndrrave, të Slumberland.
Atje, ajo takohet me personazhin Flip. Me të, ajo rrugëton nëpër ëndrra dhe ankthe, me shpresën se do të sheh babain e saj.
Rolin e vajzës Nema e luan Marlow Barkley. Momoa luan përkrah saj, si Flip.
Traileri i “Slumberland” fillon me Momoan në rolin e Flip-it, dhe vajzën Nema të cilët futen në botën e magjive.
Regjinë e këtij filmi e ka bërë Francis Lawrence.
“Slumberland” do të lansohet me 18 nëntor 2022./21Media/ KultPlus.com
Një projekt i mrekullueshëm arkitekturor mund të vihet në jetë në Dubai.
Foto spektakolare të një unaze rreth 3 kilometra, që do të rrethojë të famshmen Burj Khalifa, janë publikuar nga firma arkitekturore ZNera Space.
Kjo unazë do të qëndrojë mbi 5 shtylla gjigante, 500 metra mbi tokë.
Arkitektët kryesorë të ZNera Space, Najmus Chowdry dhe Nils Remess, thonë se aktualisht, financat dhe teknologjia për të bërë të mundur këtë projekt, nuk janë të disponueshme.
“Projekti kërkon që njerëzit të nisin të mendojnë ndryshe për zhvillimin urban”, thonë arkitektët. / KultPlus.com
Jazz është shkrirje e te shprehurit muzikor laik e shpirtëror e zezakeve amerikane me prejardhje afrikane dhe e elementeve muzikore evropiane. U paraqit ne mbarimim të shekullit XIX në Amerikë si rezultat i vuajtjeve nen roberin e te bardhëve. Karakteristike e tij është ritmi me akcent jo te drejte, forma josimetrike, sinkopat e shpeshta dhe intervalet e zbritura e te zvoguluara.
Muzika Jazz është një lloj muzike shumë intelektuale. Ajo ka një rol shumë të madh në edukimin dhe formimin e individit. Muzika Jazz ndikon për një formë tjetër të menduari të njeriut. Ajo krijon ndjenja dhe emocione të veçanta tek individi. Melodia, ritmi, harmonia dhe loja modale e bëjnë muzikën Jazz një lloj i veçantë arti. Muzika Jazz shquhet për një teknikë të veçantë, improvizime dhe fantazi. Ajo ka aftësinë të depërtojë në skutat më të thella të ëndjes dhe nevojës së muzikëdashësit për t’iu dhënë i gjithi një fluturimi të lirë në qiellin e thyer të ëndrrave.
Muzika e Jazzit është një stil muzikor që u shfaq në fillim të shekullit të 20-të, në komunitetet zezakëve në Jug të Shtetet e Bashkuara. Muzika Jazz ka lindur nga një përzierje e traditave të muzikës afrikane dhe europiane. Prejardhja afrikane e muzikës Jazz është e dukshme në përdorimin e “notave blu”, që janë tinguj të vecantë, improvizimin, poliritmin, sinkopat, muzikën modale etj. Nga fillimet e saj e deri në ditët e sotme, muzika Jazz ka marrë edhe elementë nga muzika popullore amerikane për shumë stile të dallueshme si: New Orleans Jazz që daton nga fillim të 1910, Gypsy Jazz nga vitet 1930 dhe 1940, Bebop nga mesi i viteve 1940, Cool jazz, Avant-gard jazz, Afro-Kuban jazz, Modal-jazz, Free-jazz, Latin Jazz, Soul-Jazz, Fuzion Jazz dhe Rock jazz, Smooth jazz, Funk jazz, Jazz punk, Acid jazz, Ethno jazz, Indo jazz dhe mënyra të tjera për të luajtur muzikë.
Instrumentët më të përdorur të muzikës Jazz janë: Saksi, Tromba, Tromboni, Bateria, Contra Basi, Ksilofoni dhe instrumentët elektrikë mbas viteve 70-të.
Instrumenti i trombës ka një vend shumë të rëndësishëm në muzikën Jazz. Tromba si një instrument shumë i vecantë për muzikën në përgjithësi ka një pozicion prominent në muzikën Jazz. Tromba është edhe simboli i muzikës Jazz. Krahas instrumenteve të tjerë ajo është përdorur nga shumë kompozitorë të muzikës Jazz. Tingulli i saj, notat e larta i japin trombës vlera të mëdha dhe ky instrument shpreh tinguj dhe ngjyra shumë origjinale në këtë lloj zhanrri.
Krahas një seri instrumentistësh të mëdhenj në instrumeta të ndryshëm, një rol të madh kanë luajtur edhe trombistët amerikanë: Louis Armstrong, Dizzy Gillespie, Miles Davis dhe vazhdojnë ta lozin në ditët tona këtë rol Wynton Marsalis dhe Arturo Sandoval.
Muzika xhazSatchmo
Louis Armstrong, me nofkën Satchmo, ka qenë një trombist dhe këngëtar amerikan i muzikës Jazz, nga New Orleans, Louisiana.
Armstrong filloi të marrë famë në fillim të viteve 1920-të. Armstrong ka patur një ndikim themelor në muzikën Jazz. Ai ishte një trombist shumë i mirë dhe shpikës në muzikë.
Ai zhvendosi fokusin e muzikës nga improvizimet kolektive në lojën solo. Me zërin e tij të veçantë si “zhavorr”, Armstrong ishte gjithashtu një këngëtare me influencë, duke demonstruar shkathtësi të madhe si një improvizues. Ai e lidhi lirikën me melodinë e këngës për qëllime shprehëse. Ai ishte gjithashtu shumë i aftë në të kënduarit Scat, një lloj të kënduari (duke vokalizuar, përdorur tingujt dhe rrokjet në vend të këngëve lirike aktuale të kohës).
Armstrong u lind në një familje shumë të varfër në New Orleans, Louisiana dhe vinte nga një familje skllevërish.
Armstrong vdiq nga një atak në zemër në gjumë në vitin 1971, një muaj para ditëlindjes së tij të 70-të .
Një kritik shkruan për Louis Armstrong: “Ai lindi i varfër, vdiq i pasur dhe nuk shqetësoi asnjeri përgjatë rrugës së tij”
“When the Saints go marching in” është një pjesë tipike, spiritual, që ishte edhe simboli i Armstrong. Armstrong lot në trombë në këtë këngë dhe këndon me shumë emocion këtë pjesë tipike, spiritual duke dhënë mesazhe jetësore dhe të shenjta nëpërmmjet artit, muzikës së tij. Dizzy Gillespie, ishte një trombist amerikan i muzikës Jazz , drejtues orkestre muzikore, kompozitor dhe këngëtar.
Scott Yanow shkruante, “Kontributet e Gillespie për muzikën Jazz ishin të mëdha. Gillespie ishte një prej trombistëve më të mëdhenj të të gjitha kohërave të Jazz. Ndoshta Gillespie kujtohet, nga kritikët dhe tifozët, si një prej borizanëve të Jazzit më të mëdhenj të të gjitha kohërave. ” Gillespie ishte një virtuoz borisë dhe improvizues, por duke shtuar edhe shtresa të kompleksitetit harmonik të panjohur më parë në xhaz. Gillespie përdori harmoni të vecantë në lojën e tij, gjuhë të re harmonike.
Bebop është i njohur si stil i parë i Jazzit modern. Bebop u konsiderua si një produkt i Swingut, por jo një revolucion në muzikë. Swing prezantonte një diversitet të muzikantëve të rinj në epokën e Bebop si: Charlie Parker, Thelonious Monk, Bud Powell, Oscar Pettiford dhe Gillespie. Sistemi Charlie Parker ka mbajtur gjithashtu metodat duke shtuar akorde me akordet ekzistuese progresive dhe duke nënkuptuar akorde shtesë brenda linjave të improvizuara. Dizzie Gillespie është i famshëm dhe është një nga themeluesve të Bebop modern (së bashku me Charlie Parker) dhe muzikës Kubane kanë ndikuar tek Jazz. Ai vdiq në vitin 1993 duke lënë prapa një trashëgimi artistike të madhe. Ai e vuri në shërbim të artit edhe fëtyrën e tij, duke fryrë faqet kur luante në trombë.
“A night in Tunizia” e luajtur nga Gillespie në trombë me sordinë, nëpërmjet ritmit, melodisë dhe interpretimit, krijon një pejsazh surrealist dhe shumë emocional.
Miles
Miles Davis ka qenë një muzikant amerikan i Jazz-it, drejtues i bandës muzikore dhe kompozitor. Ai konsiderohet gjerësisht si një prej muzikantëve me më shumë ndikim në shekullin e 20-të. Miles Davis ishte në ballë të zhvillimeve muzikore të mëdha në Jazz me grupet e tij muzikore, duke përfshirë Bebop, Cool Jazz, Modal Jazz dhe Jazz fuzion.
Më 7 tetor 2008, albumi “Kind of Blu” i vitit 1959 mori certifikatën e katërt platinit nga Shoqata e Industrisë Regjistrimi në Amerikë, (RIAA) për dërgimin e të paktën katër milionë kopjeve të disqeve të tij në Shtetet e Bashkuara.
“Summertime” është një pjesë nga albumi ”Porgy dhe Bess” e muzikantit Miles Davis, botuar në vitin 1958 në Columbia Records. Albumi përmban rregullimet e bëra nga Davis në bashkëpunim me Gil Evans nga opera e George Gershwin “Porgy and Bess”. Për shumë kritikë të Jazz , “Porgy and Bess” konsiderohet si vepër historike.
Në vitin 1958, Davis ishte njëri prej muzikantëve të Jazzit më të pakënaqur me Bebop-in, duke parë ndryshimet e tij gjithnjë e më komplekse akordike si pengesa krijimtarisë. Pesë vjet më parë, në vitin 1953, pianisti George Russell botoi konceptin e tij kromatik lidian të organizimit të tonaliteteve, e cili ofronte një alternativë për praktikën e improvizimit bazuar në akorde. Kompozimi modal, me mbështetjen e tij mbi shkallë dhe mode përfaqësonte, sic shkruante Davis: “një për kthimin melodi”.
Një dëgjues kur dëgjoi “Summertime” nga “Porgy and Bees”, të luajtur nga Davis shkruan: “Ju mund të ndjeni flladin e verës duke prekur fytyrën tuaj nga muzika e Trombës së Davis”.
Marsalis
Wynton Marsalis, është trombist, kompozitor, mësues muzike dhe drejtori artistik i Jazzit në qendrën Linkoln në New York City. Marsalis ka promovuar shpesh muzikën klasike dhe Jazz në audienca me të rinj. Marsalis ka marrë nëntë cmime Grammys në të dy zhanret, atë klasik dhe Jazz. Marsalis është djali i muzikantit të Jazzit Ellis Marsalis.
Një dëgjues shkruan për Marsalis: “Faleminderit ju të gjithëve që më kujtuat mua se diskutimi për muzikën ndryshon subjektin prej tingujve në fjalë”. Marsalis arrin ti kthejë tingujt në fjalë.
Marsalis është një muzikant universal. Ai lot shumë mirë muzikën klasike dhe atë Jazz. Marsalis shquhet për teknikën shumë të lartë dhe një tingull të vecantë. Ai krijon nëpërmjet talentit të tij emocione të vecanta tek dëgjuesit. Marsalis e bën trombën të flasë, falë një kombinimi të artit muzikorë, aftësive dhe mendjes së tij, aftësive mendore dhe komunikimit.“Cherokee” e luajtur nga Marsalis, është një pjesë tipike me teknikë të lartë, ku dallohet qartë kthimi i tingujve në fjalë nga muzikanti i madh amerikan.
Sandoval
Arturo Sandoval është një trombist Jazzi, pianist dhe kompozitor. Ai ka lindur në Artemisa, Kubë.
Sandoval ndërsa jetonte në Kubë, ishte ndikuar nga legjendat e Jazzit, Charlie Parker, Clifford Brown dhe Gillespie. Ai e takoi më në fund Dizzy Gillespie në vitin 1977. Gillespie menjëherë u bë një mësues dhe koleg, duke luajtur me Arturo Sandoval në koncerte në Evropë dhe Kubë dhe më vonë në orkestrën e Kombeve të Bashkuara. Sandoval dezertoi në Shtetet e Bashkuara të Amerikës në Spanjë, në një turne me Gillespie në vitin 1990, dhe u bë një qytetar amerikan në vitin 1999. Jeta Sandoval ishte subjekt i filmit 2000 TV, “For Love or Country”: Ai aktualisht banon në Calabasas, Kaliforni.
“Aniversario” e luajtur nga Sndoval dhe Gillespie është një pjesë me teknikë të lartë komunikimi, ku Gillespie mentori i Sandoval dhe ai vetë lozin në një mënyrë të magjishme pjesën “Aniversario”.
Talenti i madh i Sandoval e ka udhëhequr atë që të lidhet me muzikantë shumë të mëdhenj, por ndër më të rëndësishmit është Dizzy Gillespie. Gillespie ka qenë idhtarë i muzikës afro-kubane dhe ka qenë “babai shpirtëror” për Sandoval. Sandoval shquhet për një talent brilant dhe një lojë të vecantë në instrumentin e trombës, sidomos për notat shumë të larta dhe natyrale. Ky ishte një historik modest për këto muzikantë të mëdhenj amerikanë të trombës të të gjitha kohrave në muzikën Jazz. /Albert Vataj / KultPlus.com
Tashmë është lansuar projekti i ri i Autostrada Biennale titulluar “Hapësirat e Përbashkëta” e cila mbështetet nga Ambasada e Amerikane në Prishtinë në kuadër të projektit Komisioni për Demokraci, dhe bashkëfinancuar nga Komuna e Prizrenit, përcjell KultPlus.
Është nënshkruar marrëveshje e bashkëfinancimit me Shaqir Totaj – Kryetar i Komunës së Prizrenit, Kelsey De Rinaldis – Ushtruese e detyrës së Zyrtares për Marrëdhënie me Publikun nga Ambasada Amerikane në Prishtinë, dhe Leutrim Fishekqiu – Bashkëthemelues i Autostrada Biennale.
Si vazhdimësi e programit të edukimit dhe prodhimit të Autostrada Hangar në ITP Prizren, do të zhvillohet projekti i quajtur “Hapësirat e Përbashkëta”, i cili do të shërbejë si vend takim për të rinjtë dhe komunitetet e ndryshme, ku do të kenë mundësinë të kultivojnë komunikimin ndër-etnik mbi çështjet sociale, kulturore, ekonomike ose mjedisore në nivel lokal.
Përmes edukimit, trajnimit dhe prodhimit të hapur drejt ekspozimit, synimi i tyre është të zhvillojnë modele të reja të prodhimit kulturor që fuqizojnë sektorin krijues si një motor për zhvillim të qëndrueshëm.
Të rinjtë do të bëhen pjesë e dizajnimit dhe krijimit të hapësirave të përbashkëta, në këtë mënyrë ata do të bëhen pjesë e zhvillimit, për të sjellë diskutime dhe ndryshime pozitive. Ky program i edukimit do të jetë një mundësi unike për të rinjtë që t’i shprehin dhe realizojnë idetë e tyre.
Hapësira me dy studiot e saj, punëtorinë e dizajnit industrial dhe laboratorin teknologjik, përmes programit të saj të edukimit do të angazhoj ekspertë në fushat e tyre dhe do të ketë një ndikim afatgjatë tek të rinjtë për profesionet e së ardhmes në lidhje me artin, teknologjinë dhe inovacionin. / KultPlus.com
Studimi jashtë vendit, nga shumë studiues të edukimit, konsiderohet si një nga mënyrat më efektive të zhvillimit profesional dhe personal për studentët.
Eksperienca e studimit jashtë vendit, u mëson studentëve të dalin nga zona e tyre e rahatisë dhetë përjetojnë diversitetin kulturor, racor e gjuhësor. Po ashtu kjo i’u mundëson atyre të mësojnë më shumë për mënyrën e jetesës së njerëzve me nacionalitete të ndryshme. Kjo përvojë jashtë vendit zgjeron horizontet dhe pritshmëritë që mund të kenë studentët për karrierën e zgjedhur.
Tanimë ka shumë marrëveshje ndërkombëtare multilaterale që përfshijnë pothuajse të gjitha vendet në botë të cilat ofrojnë mundësi studimi në universitetet e tyre. Në këto universitete ofrohen një larmi kursesh e programesh e drejtimesh. Disa prej tyre ofrojnë edhe bursa për kërkime shkencore, varësisht nga fusha e interesit të studiuesit.
Duke marrë parasysh përvojen e fituar në një shtet tjetër, studentët të cilët kanë përfunduarstudimet qoftë plotësisht apo përkohësisht jashtë vendit, në shumicën e rasteve trajtohen me përparësi nga ana e punëdhënësve. Kjo vjen si rezultat i mentalitetit dhe perspektivës së zgjeruar që zhvillohet nëpërmjet kontaktit me njerëz dhe kultura të ndryshme. Pavarësisht nga fusha që studiohet, aftësia për të menduar me një perspektivë ndërkombëtare, është një ndër asetet më të rëndësishme dhe më të kërkuara në treg.
Viteve të në fundit në Kosovë trendi i interesit të studentëve që duan të studiojnë jashtë vendit është ngritur në mënyrë eksponenciale. Shumë universitet e kolegje në vend tanimë kanë lidhur marrëveshje me universitete të tjera dhe i’u janë bashkuar programeve ndërkombëtare që ofrojnë bursa për studentët që duan të avancohen më tej në karrierën e tyre. Një ndër kolegjet që aktualisht ka më së shumti mundësi për përfitimin e bursave ndërkombëtare është Kolegji Universum. Ky Kolegj deri më tani ka nënshkruar marrëveshje me 115 universitete në 26 shtete të Evropës 11 prej të cilave janë anëtare të Bashkimit Evropian.
Çdo vit Kolegji Universum ka mundësuar përfitimin e mbi 395 bursave ndërkombëtare. Deri më tani 25 studentë kanë marrë bursë të plotë. Këto bursa mbulojnë tarifën e shkollimit, shpenzimet e jetesës me vlerë prej 850 deri në 900 euro kompensim mujor, si dhe shpenzimet e transportit në vlerë prej 275-360 euro.
(Shkrim i sponsorisuar nga Kolegji Universum).
Mbrëmë janë ndarë çmimet e edicionit të 14-të të PriFilm Fest, i cili ka nisur më 20 shtator ndërsa ka përfunduar më 25 shtator, shkruan KultPlus.
Për të katërmbëdhjetin vit me radhë, ky festival ka sjell premiera të filmave si dhe emra të njohur të kinematografisë botërore në Kosovë. Në mbylljen e këtij festivali jashtë Kino Armatës, e cila ishte mbushur plot dashamirë të filmit u bë e ditur se do të ndahen edhe çmimet.
Më poshtë gjeni listën e plotë të çmimeve në PriFilmFest 2022:
Filmi më i mirë i shkurtër
POLI I VERIUT nga Marija Apcevska (NMK)
Përmendje e veçantë
NË VANCOUVER nga Artemis Anastasiadou (GRE)
Pridox më i mirë
EJA NË KOHË nga (UK, SHBA)
Filmi më i mirë i metrazhit të mesëm
KËMBANAT E LOPËS nga Charles HABIB-DROUOT (BEL, FRA)
Filmi më i mirë nga juria e Medias
KLONDIKE nga Maryna Gorbach Er (UKR, TUR)
Filmi më i mirë global
KLONDIKE nga Maryna Gorbach Er (UKR, TUR)
Konkursi i filmave ballkanik – Përmendje e veçantë
HERONJTË E KLASËS PUNËTORE nga (SER)
Çmimi aktori dhe aktorja më e mirë
Rina Krasniqi për rolet e Luanës dhe Xhekut te Virgjëresha shqiptare
Regjisorja më e mirë
Kaltrina Krasniqi për filmin Vera andrron detin (KOS, ALB)
Filmi më i mirë ballkanik – “Vjosa Berisha”
Virgjëresha shqiptare nga Bujar Alimani, prodhuar nga Anita Elsani (ALB, GER, BEL, KOS).
Krejt në fund, të gjithë fituesit u ftuan në skenë që të shkrepin një fotografi të cilën do ta kenë pranë vetes e zemrës së tyre për një kohë të gjatë./ KultPlus.com
Presidentja e Republikës së Kosovës, Vjosa Osmani Sadriu ka thënë se më 26-30 shtator 1991 Kosova e shprehu me referendum vullnetin politik të qytetarëve të saj për shtet të pavarur në një organizim të pashoq për rrethanat e atëhershme, duke rikonfirmuar vullnetin e pakthyeshëm të qytetarëve të saj për liri e demokraci, të shprehur paraprakisht në Deklaratën e 2 Korrikut dhe të kodifikuar juridikisht në Kushtetutën e Kaçanikut.
“Referendumi i vuri themelet e para të shtetit të Kosovës. Ai qe një deklarim plebishitar jo vetëm për pavarësinë e vendit, por edhe për përcaktimin e Kosovës për demokraci përfaqësuese. Ai e vulosi dëshirën e qytetarëve të vendit për të jetuar të mosvarmë dhe u hapi udhë proceseve të pandalshme drejt jetësimit të shtetit, nën udhëheqjen e prijësit të saj historik, Presidentit Rugova”, ka thënë Presidentja Osmani.
Në vijim gjeni të plotë postimin e Presidentes Osmani:
Më 26-30 shtator 1991 Kosova e shprehu me referendum vullnetin politik të qytetarëve të saj për shtet të pavarur, në një organizim të pashoq për rrethanat e atëhershme, duke rikonfirmuar vullnetin e pakthyeshëm të qytetarëve të saj për liri e demokraci, të shprehur paraprakisht në Deklaratën e 2 Korrikut dhe të kodifikuar juridikisht në Kushtetutën e Kaçanikut.
Referendumi i vuri themelet e para të shtetit të Kosovës. Ai qe një deklarim plebishitar jo vetëm për pavarësinë e vendit, por edhe për përcaktimin e Kosovës për demokraci përfaqësuese. Ai e vulosi dëshirën e qytetarëve të vendit për të jetuar të mosvarmë dhe u hapi udhë proceseve të pandalshme drejt jetësimit të shtetit, nën udhëheqjen e prijësit të saj historik, Presidentit Rugova.
Në këtë përvjetor, ne i kujtojmë me respekt të gjithë ata që organizuan ose iu përgjigjën thirrjes për referendum. Ata u kujdesën që zanafilla e shtetit të ri të mbajë vulën e deklarimit të lirë të qytetarëve të saj. Vullneti i tyre qe përcaktues për të ardhmen e vendit tonë./ KultPlus.com
Elton John performoi në Shtëpinë e Bardhë për herë të parë që nga viti 1998 dhe u nderua me një çmim nga presidenti amerikan, Joe Biden për kontributin e tij në muzikë.
Ylli veteran mahniti më shumë se 2,000 të ftuar, duke përfshirë mësues, infermierë dhe avokatë të LGBTQ, me performancën e tij, e cila u organizua për të nderuar “krijuesit e historisë së përditshme”.
Në fund të shfaqjes, Biden befasoi Elton me “Medaljen Kombëtare të Shkencave Humane”, transmeton rtv21.tv.
Këngëtari 75-vjeçar është aktualisht në një turne lamtumire pas një karriere më shumë se 50 vjeçare./ KultPlus.com
Në mëngjesin e sotëm ka vdekur basketbollisti kosovar, Albert Dula.
Dula ishte basketbollist i gjeneratës së artë të KB Prishtinës, duke kontribuar edhe në Bordin e klubit prishtinas, por ai ka dhën ndhëm të madhe në basketbollin e Kosovës.
Me këtë rast kryetari i Federatës së Basketbollit të Kosovës, Arben Fetahu, ka dërguar telegram ngushëllimi për familjen Dula, transmeton Klankosova.tv.
Njoftimi i plotë:
E nderuara familja Dula dhe komuniteti i basketbollit,
Mëngjesi sot ishte i trishtuar kur mësuam për vdekjen e doajenit të basketbollit Albert Dula.
Vdekja e tij na ka trishtuar të gjithëve dhe do të jetë mungesë e madhe për komunitetin e basketbollit.
Alberti do të kujtohet si një njeri punëtor dhe shumë i dashur për bashkëpunëtorët.
Dula ishte basketbollist i gjeneratës së artë të KB Prishtinës, duke kontribuar edhe në Bordin e klubit prishtinas, por ai ka dhënë ndihmë të madhe në basketbollin e Kosovës.
Albert Dula do të përkujtohet gjithmonë dhe do të mbetet në zemrat tona.
Në emrin tim personal dhe të Federatës së Basketbollit të Kosovës dua të shpreh ngushëllimet më të sinqerta për familjen Dula dhe gjithë komunitetin e basketbollit. / KultPlus.com
Qendra Kombëtare e Librit dhe Leximit, ka organizuar sot një aktivitet përkujtimor, me rastin e 5-vjetorit të ndarjes nga jeta të përkthyesit Afrim Koçi.
Në takim ishin të pranishëm drejtori i Bibliotekës Kombëtare të Shqipërisë, Pirro Misha, prof. Xhovalin Shkurtaj, përkthyeset Diana Kastrati, Elda Gjana, mbesa e të ndjerit Fabiola Laço e të tjerë.
Ky event vjen në “Muajin e Përkthimit”, gjatë të cilit, QKLL ka kujtuar shumë prej përkthyesve më të spikatur shqiptarë, të cilët kanë sjellë në shqip kryevepra të letërsisë botërore.
Të pranishmit në event, risollën figurën e Afrim Koçit, përmes kujtimeve që ka lënë pas.
I njohur për përkthimin e kryeveprës së nobelistit Thomas Man në gjuhën shqipe “Mali Magjik”, Koçi, mes tjerash, përktheu: «Novela amerikane të shekullit XIX» (1973); «Kthimi» (1976) i Jan Myrdal; «Kufiri i hijes» (1976) i Joseph Conrad; «Drama» (1978) i Henrik Ibsen, «Farefisi» (1980) i Zsigmond Móricz; «Nën rrotë» (1980) i Hermann Hesse; «Drama» (1981) i Maksim Gorki; «Reportazhet e Topgungaçit» (1984) i Robert Escarpit; «Kronikë e kohës së Karlit IX» (1989) i Prosper Mérimée; «Ora e gjermanishtes» (1989) i Siegfried Lenz; «Jashtë derës» (1989) i Wolfgang Borchert, «Iluminacione» (1998) të Ëalter Benjamin; «Abrahami nuk ka faj» (1998) të Ephraim Kishon; «Anestezi lokale» (2000) të Günter Grass; «Legjenda e pianistit: një monolog» (2003) i shkrimtarit italian Alessandro Baricco; «Qëndresë dhe bashkëpunim në Shqipëri:1939-1944” (2006) i Hubert Neuëirth; antologjinë «Tregimtarë të gjuhës gjermane pas viteve ’45» (2007); «Epshi» ( 2007) i nobelistes Elfriede Jelinek; «Macja dhe miu» (2008) i Günter Grass; «Mali magjik» (2009) i Thomas Mann; «Kasandra» (2012) i Christa Ëolf; «Koha e ngrirë» (2014) i autores Anna Kim; «Portret grupi me një zonjë» (2015) i Heinrich Böll; «Haxhi Murati»(2016) i Lev N. Tolstoj; «Në gjurmët e një përralle» (2016) i Jan-Philipp Sendker etj.
Ndër përkthimet nga lëmi i albanologjisë dhe historisë kujtojmë :«Studime shqiptare» të Johann Georg von Hahn; «Shqiptarët nga Mesjeta deri në ditët tona» (2008) i Peter Bartl; «Mehmet pushtuesi: botësulmuesi në kapërcyell kohe» (2005) , «Kujtime» (2001), Eqrem Bej Vlora, «Ndihmesë për historinë e sundimit turk në Shqipëri: skicë historike» (2010) si dhe «Nga Berati në Tomor dhe kthim: ditar» (2003), etj. / atsh / KultPlus.com
Me moton “Tash edhe më lehtë“ Agjencia për Informim dhe Privatësi (AIP), ka shënuar Ditën Ndërkombëtare për Lirinë e Informimit, me ç’rast u mbajt edhe një diskutim me kryetarët e komunave, ku u tha se Kosova radhitet më së miri në rajon sa i përket llogaridhënies dhe transparencës komunale.
Komisionerja e Agjencisë për Informim dhe Privatësi, Krenare Sogojeva-Dërmaku u shpreh se qasja në dokumente publike është krucial për një shoqëri të hapur dhe demokratike.
Ajo theksoi se përmes kësaj konference synojnë ngritjen e ndërgjegjësimit për rëndësinë e publikimit me vetiniciativë të dokumenteve publike për komuna të hapura dhe transparente.
“Sivjet me moton ‘tash edhe më lehtë‘ Agjencia për Informim dhe Privatësi fillon javën e informimit me konferencën e sotme bashkë me ju kryetarë të komunave dhe përfaqësues me qëllim të ngritjes së ndërgjegjësimit për rëndësinë e publikimit me vetiniciative të dokumenteve publike, për komuna të hapura, transparente dhe llogaridhënëse ndaj qytetarëve tuaj. Qasja më e lehtë në dokumente publike e përmes saj edhe përfshirja e qytetarëve në qeverisjen lokale është një element krucial për në shoqëri të hapur dhe demokratike. Prandaj, sivjet moton e kemi ‘Tash edhe më lehtë‘ për çka ne edhe presim një publikim proaktiv me vetë iniciativë nga ana juaj në mënyrë që t’i përfshini qytetarët tuaj në vendimmarrje, por edhe t’u bëni atyre jetën më të lehtë“, theksoi ajo.
Zëvendësshefi i misionit të OSBE-së në Kosovë, Kilian Wahl tha se si mision kanë mbështetur institucionet e Kosovës në avancimin e qasje në dokumente publike.
Wahl ka përgëzuar komunat e Kosovës për respektimin e ligjit për qasje në dokumente publike.
“Kjo tregon zotimin tuaj për të siguruar realizimin e të drejtës së qytetarëve për qasjen në dokumente publike. Roli juaj për të siguruar një qeverisje pjesëmarrëse dhe transparente përmes ofrimit të qasjes në dokumente publike është me rëndësi publike…Përgëzoj komunat për respektimin e Ligjit për qasje në dokumente publike, për emërtimin e zyrtarëve përkatës për të lehtësuar implementimin e ligjit për qasje në dokumente publike. Në të njëjtën kohë Agjencia roli i asaj për të ruajtur të drejtën e qytetarëve për qasje në dokumente publike është po aq e rëndësishme për të siguruar transparencën e vetë institucioneve publike”, u shpreh Wahl.
E drejtori ekzekutiv i Asociacionit të Komunave të Kosovës, Sazan Ibrahimi u shpreh se Kosova radhitet më së miri sa i përket transparencës dhe llogaridhënies nga ana e komunave.
Ibrahimi theksoi se ëeb faqet e komunave deri vonë nuk kanë qenë aq funksionale, por tash qëndrojnë shumë më mirë.
“Kosova radhitet lartë sa i përket transparencës, llogaridhënies ndaj qytetarit të Kosovës. Reformat të cilat kanë ndodhur sa i përket legjislacionit që prek kompetencat e komunave 2007-2008 që kryetari i komunës të jetë më afër qytetarit sepse kemi zgjedhje të drejtpërdrejta. Të gjitha komunat e Kosovës ëeb-faqet e tyre i kanë funksionale bashkëpunimi është korrekt me nivelin qendror në këtë rast me Agjencionin për Informim dhe Privatësi dhe sa i përket zbatimit të ligjit mbi qasjen në dokumente zyrtare mundohen që ta bëjnë të pamundurën….1Në asnjë rast deri më tani nuk ka ndodhur që qytetarët e Kosovës apo OJQ që janë të angazhuara për mbrojtjen e interesit të një grupi të caktuar të mos përfshihen në hartim të rregulloreve komunale që prekin interesat e atij grupi…Nëse e marrim dhe krahasojmë se çka ka ndodhur sa i përket transparencës, llogaridhënies përgjatë këtyre viteve mund të themi se jemi më të mirët në rajon”, theksoi Ibrahimi.
Në bazë të një raporti nga Agjencia për Informim dhe Privatësi të prezantuar nga Valon Kryeziu, ushtrues detyre i drejtorit të përgjithshëm të agjencisë, thuhet se ky institucion ka pranuar numrin më të madh të ankesave për komunën e Prishtinës, gjithsej 17 sosh kryesisht nga individë dhe organizata joqeveritare.
E pas Prishtinës me numrin më të madh të ankesave renditet Kaçaniku.
“Ndaj komunës së Kllokotit është paraqitur 1 ankesë, ndaj komunës së Zveçanit 1 ankesë, ndaj komunës së Deçanit, 1 ankesë, ndaj komunës së Rahovecit 3 ankesa, ndaj komunës së Vushtrrisë 3 ankesa, ndaj komunës së Mitrovicës 2 ankesa, ndaj komunës së Zubin Potokut 1 ankesë, ndaj komunës së Leposaviqit 1 ankesë, ndaj komunës së Shtërpcës 1 ankesë, ndaj komunës së Dragashit 1 ankesë ndaj së Ranillukut 1 ankesë, ndaj komunës së Junikut 1 ankesë, ndaj komunës së Novëbërdës 2 ankesa, ndaj komunës së Graçanicë 1 ankesë, ndaj komunës së Podujevës 4 ankesa, ndaj komunës së Klinës janë paraqitur 3 ankesa, ndaj komunës së Kamenicës janë paraqitur 3 ankesa, ndaj komunës së Prizrenit janë paraqitur 3 ankesa, ndaj komunës së Prishtinës janë paraqitur 17 ankesa, ndaj komunës së Parteshi 1 ankesa, ndaj komunë së Kaçanikut 6 ankesa”, theksoi ai. Reklama
Agjencia për Informim dhe Privatësi (AIP) në kuadër të shënimit të Javës për Qasje në Dokumente Zyrtare ka organizuar një sërë aktivitetesh. / Gazeta express/ KultPlus.com
Sot bëhen 1 muaj e një ditë që kur nxënësit dhe mësimdhënësit gjenden në grevë.
Shumica e shkollave tashmë veçse kanë filluar me proces mësimorë edhe pse SBASH po vazhdon të këmbëngulin në kërkesën e tyre.
Gjatë ditës së sotme Këshilli i Prindërve i shkollës “Faik Konica” organizoi protestë, përmes të cilës kërkojnë rifillimin e procesit mësimorë.
Në këtë protestë, përveç prindërve u panë edhe shumë nxënës me pankarta në duar duke bërë thirrje për nisjen e procesit mësimor.
“Nxënësit nuk janë vlerë monetare”, “Po dojna me u kthy në shkollë”, janë vetëm disa nga thirrjet që u bënë sot në protestë.
Deri më tani ende nuk ka ndonjë vendim konkret për nisen e shkollave, përderisa disa shkolla në qytete të ndryshme veçse kanë nisur mësimin. / KultPlus.com
Çështja e liberalizimit të vizave për Kosovën do të jetë në rend të ditës në takimin e grupit punues të Këshillit Evropian, më 13 tetor, konfirmojnë burimet diplomatike të BE-së në Bruksel për REL.
Presidenca çeke e BE-së tashmë u ka dërguar letër vendeve anëtare si paralajmërim për diskutimet për këtë temë.
Radio Evropa e Lirë ka siguruar qasjen në këtë dokument dhe aty shprehet qartë dëshira e Çekisë që të gjitha vendet anëtare të BE-së të arrijnë konsensus të brendshëm për të mbështetur liberalizimin e vizave për Kosovën.
Në këtë letër, Çekia thirret edhe në, siç thuhet, arsyet e politikës së jashtme për liberalizimin e vizave për Kosovën, duke rikujtuar se edhe Komisioni Evropian ka konfirmuar dhe pritet të përsërisë se Kosova i ka përmbushur kushtet./ KultPlus.com
Me këngët e tij por të performuara nga muzikantë të skenës alternative, mbrëmë u kujtua njëri nga artistët më të mëdhenj të kulturës në Kosovë, Muharrem Qena, përcjellë KultPlus.
Në 16 vjetorin e ndarjes nga jeta të artistit, në Qendrën e Kulturës Alternative Defy Them u mblodhën familjarë, adhurues të muzikës së tij, pjesëmarrës të komunitetit artistik dhe shumë artdashës.
Fjalën e morën Liburn Jupolli, këshilltar i ministrit Çeku dhe Rebeka Qena vajza e artistit.
Në këtë ngjarje të pranishmit shijuan perfomancat e muzikën që ai la pas, ndërsa u vlerësua lartë krijimtaria e tij artistike dhe kontributi që ka dhënë në fushën e kulturës.
Muharrem Qena gjithë jetën ja kushtoi artit. Krijimtaria e tij vazhdon të inspirojë gjeneratë pas gjenerate. / KultPlus.com
Rihanna do të jetë në qendër të skenës në shfaqjen e pjesës së dytë të Super Bowl në muajin shkurt, përcjellë KultPlus.
Këngëtarja, e cila nuk pranoi të performonte në shfaqjen e vitit 2019 të Super Bowl për shkak të solidaritetit me Colin Kaepernick, do të kryesojë Super Bowl 2023, njoftoi NFL të dielën së bashku me Roc Nation të Jay-Z dhe Apple Music.
Rihanna postoi një imazh në Instagram të një krahu të shtrirë duke mbajtur një futboll NFL.
“Rihanna është një talent brezash, një grua me fillime modeste që ka tejkaluar pritshmëritë në çdo hap”, tha në një deklaratë Shawn “Jay-Z” Carter, Roc Nation i të cilit është një producent ekzekutiv i shfaqjes. “Një person i lindur në ishullin e vogël të Barbados, i cili u bë një nga artistët më të shquar ndonjëherë.”
Super Bowl do të zhvillohet në State Farm Stadium në Glendale, Arizona, më 12 shkurt. Pas viteve të sponsorizimit të Pepsi-t, shfaqja e ardhshme e pjesës së parë do të sponsorizohet nga Apple Music.
Me shitjet prej më shumë se 250 milionë disqesh në mbarë botën, Rihanna renditet si një nga artistet femra më të shitura ndonjëherë. Albumi i saj i fundit ishte “Anti” i vitit 2016. / KultPlus.com
Një gur i çmuar i rrallë, i cilësuar ndryshe, diamanti i fatit pritet të dalë në ankand në Gjenevë më 8 nëntor, në vlerën fillestare të rreth 35 milionë dollarëve. Me mbi 18 karat, guri i çmuar është diamanti më i madh rozë që është ofruar ndonjëherë për shitje në ankand.
Diamanti “Fortune pink”, një gur i çmuar jashtëzakonisht i rrallë gjigant, do të dalë në ankand në Gjenevë në nëntor, kur pritet të shkojë deri në 35 milionë dollarë.
Me mbi 18 karat, guri i çmuar me ngjyra të gjalla është diamanti më i madh rozë në formë dardhe që është ofruar ndonjëherë për shitje, tha shtëpia e ankandeve Christie’s.
Diamanti, i cili del në çekiç për herë të parë më 8 nëntor, është vlerësuar nga 25 deri në 35 milionë dollarë. Guri rozë, i formuar nga pika loti, i cili është montuar në një unazë të rrethuar nga një diamant i madh i bardhë në të dyja anët, peshon saktësisht 18.18 karat.
“Pesha në fakt i sjell fat pronarit të ri”, tha Angela Berden, specialistja e lartë e stolive të Christie.
“Është një gur i bukur, është jashtëzakonisht e rrallë të gjesh një diamant rozë të këtë madhësi,” tha ajo.
Christie’s theksoi se ky konsiderohej një numër me fat në Azi, ku nënkupton “prosperitet të caktuar”, duke thënë se pret që diamanti “të tërheqë interes nga koleksionistët në të gjithë globin”.
Në vitin 2018, Christie’s shiti Winston Pink Legacy 18,96 karatësh, i cili grumbulloi mbi 50 milionë dollarë, çmimi më i lartë për karat i paguar ndonjëherë për një gur të llojit të tij. / Ora news / KultPlus.com
Ministrja e Kulturës, Elva Margariti, risolli në vëmendje, mëngjesin e sotëm, Qendrën Mesjetare në Berat.
“Rehabilitimi në bashkëpunim me “TİKA Tiran”, nxori në dritë sheshin dhe monumentet përreth, të cilët tashmë presin e përcjellin vizitorë”, shprehet ministrja Margariti në rrjetet sociale.
TİKA është Agjencia Turke për Bashkëpunim dhe Koordinim e cila ka realizuar projekte të rëndësishme në fushat e arsimit, shëndetësisë, sigurisë së jetës dhe ushqimit, infrastrukturës, mbrojtjes së trashëgimisë historike dhe kulturore në Shqipëri.
Qyteti i Beratit, e veçanërisht Qendra Mesjetare me muzeumet e sitet kulturore që përmban, ka qenë në vëmendjen e qeverisë.
Pikërisht Beratit ju aprovua dhe numri më i madh i projekteve për “Rijetëzimin”. Bonusi i Rijetëzimit përmes një ndihme në formë granti i shkon individit, që zotëron prona në qendrat historike të qyteteve, por njëkohësisht edhe të gjithë komunitetit që përfiton nga rijetëzimi i qytetit.
Në Qendrën Mesjetare Berat, gjenden edhe Muzeu Ikonografik Onufri si dhe Muzeu Etnografik, të cilët sezonin që sapo kaluam patën një numër të lartë vizitorësh nga vendi si dhe turistë të huaj. / KultPlus.com
Profesor Edmond Tupja nga Shqipëria, i cili ka ngritur alarmin për zhdukjen e gjuhës shqipe duke qenë se sa vjen e shtohen huazimet nga gjuhët e huaja, solli në vëmendje një fjalë të cilën të gjithë e përdorim shumë thjesht.
Bëhet fjalë për “cheese”, një term që e përdorim para se të bëjmë foto duke qenë se shqiptimi i saj i çon buzët në një pozicion të qeshur. Tupja thotë se kjo fjalë mund të zëvendësohet lehtësisht me gjizë, një fjalë shqip që kryen po të njëjtin funksion.
“Unë vërej, tani thuhet konstatoj, që po përdoren gjithmonë e më tepër fjalë të huaja aty ku shqipja i ka fjalët e saj, se fjalë të huaja do hyjnë. Është bërë modë tani,” – pohoi Tupja. “Kur dalim në foto, hajde cheese, dalin dhëmbët që të qeshim. Gjizë është e bukur, edhe vjen te qeshesh edhe zbardh dhëmbët”.
“Do you parlare shqipish”, ka qenë titulli i një shkrimi të profesorit, i cili ka sjellë në vëmendje përdorimin e shumë gjuhëve pa qenë e nevojshme./Euronews.al / KultPlus.com
