Rok grupi Coldplay ka publikuar videoklipin më të ri të këngës “Trouble In Town”, inspiruar nga “Ferma e Kafshëve” të George Orwellit.
Kjo është kënga e pestë e publikuar nga albumi i tetë i grupit “Everyday Life”, shkruan NME, transmeton Koha.
E inspiruar nga satira politike e Orwellit, klipi me regji të Aoife McCardle “Trouble In Town” vjen me skena mjaft shqetësuese. /KultPlus.com
Nga: John Lennon
Shqipëroi: Bujar Meholli
Imagjino sikur të mos ketë parajsë
e thjeshtë ta provosh…
As ferr poshtë nesh,
vetëm qielli përmbi.
Imagjino gjithë njerëzit
ta jetojnë të sotmen…
Imagjino të mos ketë shtete
s’është e vështirë ta bësh,
asgjë për të cilën të vrasësh ose të vdesësh,
dhe as religjione gjithashtu..
Imagjino gjithë njerëzimin
në paqe të jetonte…
Ti…
Ti mund të thuash jam një ëndërrimtar
por nuk jam i vetmi.
Shpresoj që një ditë të bashkohesh me ne,
dhe bota të jetë një…
Imagjino të mos ketë zotërime,
pyes veten nëse mundesh.
Pa nevojë për lakmi apo uri,
sall vëllazëria jonë njerëzore…
Imagjino gjithë njerëzit
ta ndajnë botën, dhe bota të jetë një… /KultPlus.com
Rektori i Universitetit të Prishtinës “Hasan Prishtina”, prof. dr. Marjan Dema, ka pritur sot në Rektoratin e UP-së familjarë dhe bashkëpunëtorë të profesorit të ndjerë, prof. dr. Basri Çapriqi. Në këtë takim, ai ndau mirënjohje për profesor Çapriqin, me motivacion “për kontribut të vazhdueshëm shkencor dhe për universitetin – Post mortem”.
Rektori Dema e vlerësoi lart kontributin e profesor Çapriqit, duke kujtuar bashkëpunimin e afërt që e kishte me profesorin në kohën kur Çapriqi ishte kryesues i Këshillit Drejtues të UP-së.
“Profesor Çapriqi, me punën dhe me veprën e tij, la gjurmë të përjetshme në shoqërinë tonë. Emri i tij po kujtohet me respekt për kontributin e tij të çmuar që e ka dhënë si profesor për dekada të tëra në Fakultetin e Filologjisë, si kryetar i Këshillit Drejtues të UP-së për dy mandate, por edhe si studiues dhe si një poet i shkëlqyer,” theksoi Dema.
E nderuar me këtë mirënjohje u shpreh bashkëshortja e profesor Çapriqit, prof. asoc. dr. Sazana Çapriqi.
“Në emër të familjes, ju falënderoj të gjithë juve që jeni kujtuar për këtë mirënjohje, e cila na bën si familje të ndihemi krenarë. Kjo mirënjohje, përveç që na nderon neve, e nderon edhe institucionin, i cili dëshmon që nuk i harron ata që kanë kontribuar për të,” theksoi, mes tjerash, profesoresha Çapriqi.
Bashkëpunimin me profesor Çapriqin e kujtoi edhe shefi i Departamentit të Gazetarisë në UP, prof. asoc. dr. Milazim Krasniqi. Ai e cilësoi profesorin e ndjerë si person të paimponueshëm në rrethin ku ka vepruar, por tha që vlerat e tij janë imponuar vetvetiu.
“Ai është karakterizuar me prezantim intelektual dhe njerëzor, që do të cilësohen si vlera të tij të përhershme,” tha Krasniqi.
Prof. dr. Basri Çapriqi, pas një sëmundjeje të rëndë, ka ndërruar jetë në moshën 58-vjeçare, në janar të vitit 2018. Çapriqi ishte profesor në Fakultetin e Filologjisë të UP-së për dekada me radhë, ku ligjëroi lëndët: Stilistikë, Semiologji dhe Poezi bashkëkohore. Ai ishte kryetar i Këshillit Drejtues të UP-së për dy mandate.
Numri i vdekjeve në Itali, nga sëmundja pandemike Coronavirus, ka arritur në 1000 dhe numri i rasteve të njohura me virus është rritur në gjithësej 15,113.
Kështu kanë bërë të ditur mediat e huaja nga zonat italiane, njofton Klan Kosova. /KultPlus.com
Virusi i njohur me emrin “Korona” tashmë ka përfshirë pjesën më të madhe të botës, shkruan KultPlus.
Italia mbetet një nga vendet më të prekura në Evropë. Më poshtë i sjellim disa fotografi nga fotografi Marco Di Lauro ku shihet qytet i zbrazët i Venecias si shkak i virusit të frikshëm. /Getty Images /KultPlus.com
Nga: Migjeni
Misër! Misër!
Lajmi se do të shpërndahet misri doli nga zemra e dheut, rrodhi nëpër dejt e thella deri te gjymtyrët e mpita të dheut që quhet shtet. Dhe bani të dridhen nga gëzimi frymorët që s’kanë me çka ta mbajnë frymën.
Si thneglat që mblidhen rreth një korës misri, q’ashtu në një qendër nënprefekture janë mbledhur malësorët rreth depos së misrit
… Nëpër luginat e maleve përshkohet malësori vetëm me një këmishë e brekë legjendare mbi shtat, për me arritë në qendrën e nënprefekturës, për me marrë misër. Kraharori i tij asht një copë graniti që u shkëput nga mali dhe u vendos mbi dy kambë të drejta e të forta si landa e pyllit. Dhe lëvizet copa e malit pa bëzajtë. Përpara depos së misrit bjerr cilsin’ karakteristike të vetën, dhe bahet frikacak, pse, – mendon ai – nj’ashtu e don ligji, nëpunësi; përndryshe s’ka misër. “Si urdhnon zotni” përsëritet sa e sa herë në mënyrë qesharake, me të marrun zani, me gjeste majmuni – vetëm e vetëm mos me zgjue mninë e engjujvet që ndaj në misër.
Dhe kur e marrin misrin, nisen njeni mbas tjetrit gjatë udhës së malit të ngushtë dhe të jetës.. Ushtojnë luginat e malevet nga fjalët e malësorvet t’unshëm, që varg, njeni mbas tjetrit, ecin të ngarkuem me ka një gjysmë thesi misër. Vargu i tyne asht i gjatë pa fund, si asht e gjatë e pa fund vuejtja e tyne. Mbi kurriz të vet barin ka një gjysmë thesi misër, barin jetën e vet, barin perëndin’. Perëndi e vërtetë-misër i dëshiruem.
Ndodh që njërit i derdhen kokrrat e misrit nëpër birë të vogël të thesit, shoku nga mbrapa, pa i pa, i shkel; i treti shok as një as dy, – por ia hedh mallkimin e pamëshirëshëm: “Mos shkel, he të shitoftë zana!”
Se shekulli i njëzetë asht shekulli i apoteozës së misrit ndër folet e shqipeve. /KultPlus.com
Si adoleshentë, shumë prej nesh kanë shpenzuar shumë kohë duke u përpjekur për të deshifruar popullaritetin. Por popullariteti vazhdon të na ndikojë edhe në moshën e rritur. Pra, çfarë çon në popullaritet, dhe a ka rëndësi të qenit popullor?
Popullariteti i përcaktuar
Shumica e studiuesve studiojnë popullaritetin duke u treguar pjesëmarrësve një listë të njerëzve që njohin dhe duke u kërkuar atyre që të rrethojnë emrat e individëve që u pëlqejn më së shumti dhe më së paku. Përmes kësaj qasjeje, studiuesit Coie, Dodge dhe Coppotelli (1982) gjetën pesë grupe shoqërore të dallueshme:
Ndër fëmijët e vegjël, aftësia e pëlqimit është masa kryesore e popullaritetit. Aftësia e pëlqimit parashikohet nga miqësia e kombinuar me aftësinë për të lexuar të tjerët. Për shembull, fëmijët që përpiqen shumë për të bërë miqë shpesh ata përfundojnë të refuzuar nëse ata shfaqen shumë të fortë ose vazhdimisht sugjerojnë aktivitete që nuk përputhen me interesat e grupit. Fëmijët tepër agresivë ose impulsiv gjithashtu shpesh refuzohen. Fëmijët e shqetësuar ose mosbesues janë të prirur për tu lënë pas dore, ndërsa fëmijët çrregullues, (si kllounët e klasës) kanë reputacion të diskutueshëm.
Ndërsa rritemi në adoleshencë, popullariteti bëhet një përzierje e dy dimensioneve: mundësia dhe statusi. Në Sh.B.A., statusi i lartë shkon paralelisht me tërheqjen, qasje në burime mbresëlënëse (makina, rroba, etj.), Dhe agresion shoqëror ose mbizotërim. Në shkollë, fëmijët më të njohur zakonisht bëjnë atë që të rriturit e shohin si të rëndësishme, ndërsa adoleshentët më të njohur janë zakonisht ata që bëjnë të kundërtën e asaj që vlerësojnë të rriturit.
Thënë kështu, statusi i lartë është shumë i varur nga kultura. Pra, kulturat kolektiviste, si Kina, i japin një vlerë shumë më të madhe bashkëpunimit sesa agresionit.
Rreziqet e refuzimit dhe neglizhencës
Ndoshta më e rëndësishme se sa popullariteti për tu marrë në konsideratë është ndikimi i të qenit jopopullor. Të qenit i izoluar nuk të bën vetëm të ndjehesh keq; në të vërtetë është e rrezikshme edhe për shëndetin tonë. Studiuesi Cole et al. (2015) zbuloi se ndjenja e të refuzuarit ndikon në shprehjen e gjenit tonë, duke shkaktuar aktivizimin e qelizave të bardha të gjakut për t’u përgatitur për shërimin e plagëve dhe duke ulur imunitetin tonë ndaj viruseve. Pse?
Rezistenca ndaj viruseve (si ftohja) ka më shumë rëndësi kur jemi të rrethuar nga njerëz, ndërsa aftësia për të parandaluar infeksionin ishte më e dobishme për të parët tanë kur ata ishin të vetëm dhe të rrezikuar nga grabitqarët. Ky është një adaptim i dobishëm, por në kohët moderne, izolimi mund të çojë në inflamacion kronik, i cili mund të rezultojë në Alzheimer dhe kancer.
Rreziqet e popullaritetit
Fëmijët dhe të rriturit që shihen si më popullorët marrin më shumë vëmendje dhe kanë më shumë ndikim. Por, pavarësisht përfitimeve të statusit shoqëror, të qenurit shumë popullorë i ka rreziqet e veta, duke përfshirë një varësi ndaj lëvdimit dhe vëmendjes, vetmisë kronike, ankthit dhe abuzimit të substancave. Në një studim të titulluar “Çfarë do që ka ndodhur me fëmijët ‘cool’?” psikologët zbuluan se fëmijët më popullorë në shkollë të mesme zakonisht ” kanë ngecur aty” në adoleshencë, ku shpërblimet shoqërore ishin më të forta, duke mos u përshtatur me kërkesat dhe vlerat e jetës së të rriturve./filozofia.al / KultPlus,com
Severa Belotti, 82 vjeç dhe Luigi Carrara, 86 vjeç, të martuar prej 60 vitesh, kanë ndërruar jetë mëngjesin e së martës prej koronavirusit. Dy bashkëshortët kanë ndërruar jetë njëri pas tjetrit. Djali i tyre, Luca Carrara, thotë se dy prindërit e tij vdiqën vetëm.
Sipas tij, ata kanë qendruar për disa ditë në shtëpi të izoluar me temperaturë 39 gradë, dhe askush nuk iu ka shkuar për ndihmë mjekësore.
Duke folur për “Corriere della Sera”, ai tha se babai i tij, Luigi, i cili punoi si murator, para se të dilte në pension, ishte dërguar në spitalin e Bergamos të shtunën dhe nëna e tij, Severa, një shtëpiake, u dërgua në spital vetëm të dielën. Por, të martën në mëngjes, njëri vdiq në orë 09:155, ndërsa dy orë më vonë, vdiq edhe tjetri.
“Ata vdiqën, për shkak të virusit. Të dashurit tanë kanë mbetur vetëm dhe ne nuk mund t’iu japim as një përqafim. Nuk mund t’iu themi dot lamtumirë. Nuk mund t’iu themi dot as ndonjë gënjeshtër, se do të bëhen më mirë”, tha Luca i prekur. /KultPlus.com
Ministria e Arsimit, Shkencës, Teknologjisë dhe Inovacionit ka njoftuar se në disa komuna me shumicë serbe nuk po respektohet vendimi i Qeverisë së Kosovës për ndërprerjen e procesit edukativ–arsimor për shkak të masave parandaluese rreth koronavirusit (COVID – 19).
MASHTI iu bën thirrje drejtorive për arsim në këto komuna që të marrin masa të menjëhershme që ndërprerja e procesit të mësimit të zbatohet konform vendimit të Qeverisë.
“MAShTI u bën thirrje të gjitha drejtorive për arsim në këto komuna që të marrin masa të menjëhershme që ndërprerja e procesit të mësimit të zbatohet konform vendimit të Qeverisë. MAShTI thekson se vendimi i djeshëm i Qeverisë së Kosovës është masë adekuate parandaluese për mbrojtjen e shëndetit publik, dhe në këtë drejtim, çdo tentativë për politizim të çështjes apo mos-zbatim të këtij vendimi, i cili ka karakter obligativ, është i papranueshëm dhe në kundërshtim edhe me dispozitat e Kodit Penal të Kosovës, përkatësisht nenit 250 “- njofton Ministria e Arsimit Shkencës, Teknologjisë dhe Inovacionit. / Klan Kosova / KultPlus.com
Në kuadër të aktiviteteve studentore dhe prezantimit të punimeve shkencore dhe artistike të studentëve Kolegji Universum organizoi Panairin e Inovacionit.
Gjatë panairit studentët nga Dept. Shkenca Kompjuterike dhe Dizajn i Integruar prezantuan projektet/punimet e tyre në të cilat janë angazhuar gjatë gjithë semestrit duke krijuar prototipe te ndryshme permes paisjeve harduerike sipas metodës “Learning by Doing” dhe informatave “State of the Art in Technology“.
Përmes projekteve të tyre studentët e Kolegjit Universum krijojnë paisje të cilat ndikojnë pozitivisht në mirëqenjen e komunitetit duke krijuar lehtësira në jetën reale të njerëzve. Projekte te tilla si dora robotike, smart home, smart stick for blind people, alarm systems dhe shumë paisje të tjera.
Për secilin projekt studentët kanë bashkangjit edhe manualin e përdorimit dhe ndërtimit, përmes të cilit çdo produkt apo projekt i krijuar nga ta mund të përsëritet.
A dëshironi edhe ju të angazhoheni në projekte reale që nga viti i parë, TRANSFERO STUDIMET në Kolegjin Universum. Apliko këtu http://tiny.cc/i0nxkz
Kolegji Universum është kolegji më inovativ në Kosovë, i renditur në Top 1000 shkollat më të mira të biznesit në botë nga Agjencia Eduniversal.
Për më shumë informata rreth projekteve dhe aktiviteteve që angazhohen studentët që nga viti i parë në Kolegjin Universum ndiqni në facebook & instagram, kontaktoni në [email protected] apo telefononi në +383 44 144 062
(Shkrim i sponsorizuar nga Kolegji Universum)
Nga Lutfi Dervishi
Mos u tremb. Nuk kam ardhur të të vras. Nuk dua të të lëndoj. Nuk dua as të frikësoj. Kam një mision tjetër.
Misioni im është:
1. Të të mësoj si lahen duart!
2. Të të mësoj si të mbash distancë të shëndetshme me njerëzit!
3. Të të mësoj se nuk duhet pështyrë në tokë!
4. Të të mësoj që nuk flitet duke klithur!
5. Të të mësoj se ka edhe një jetë tjetër përtej jetës së kafenesë!
6. Të të mësoj që mund të qëndrosh më shumë në shtëpi që të mos fërkosh kokën
kur të të pyesin: sa vetë jeni në shtëpi?
7. Të të mësohesh që lajmet e rreme janë të dëmshme!
8. Të të mësoj që mund të jetosh pa përdorur makinën!
9. Të të mësoj që këmbët mund t’i përdorësh për të ecur!
10. Të të mësoj që të çmendurit i ke në ekrane dhe jo në spitale!
P.S. Sapo të përmbush këtë mision unë do të largohem ashtu si erdha. Pa u ndjerë. / KultPlus.com
Poezi nga Odhise Grillo
Fjala është e vogël shumë:
disa shkronja, disa rrokje…
ajo rrjedh si mjaltë e qumësht
midis miqve, midis shokëve.
Fjala është e vogël shumë:
dhe e ashpër, dhe e brishtë…
i ngre valët përceshkume,
kur vërsulet mbi armiqtë.
Fjala është e vogël shumë:
t’ëmbëlson a vret si plumbi…
fjala është si një urë
që lidh brigjet e nje lumi. / KultPlus.com
Punëtorët e rrjetit social, Twitter, janë urdhëruar të punojnë nga shtëpitë e tyre, pas shqetësimeve për Coronavirus.
Pasi e kanë rekomanduar fuqishëm në fillim të këtij muaji, kompania Twitter kanë thënë sot se puna prej shtëpisë është obligative për të gjithë punëtorët në mbarë botën, për shkak të shqetësimeve për COVID-19.
Në lajmërimin e tyre, kompania kanë thënë se këto janë kohë të paprecedentë, përcjell Gazeta Express.
Organizata Botërore e Shëndetit ka deklaruar zyrtarisht që virusi me emrin ‘Coronavirus’ është pandemi, gjatë ditës së djeshme.
Kompania ka thënë se do t’i ndihmojë të gjithë punëtorër, duke përfshirë edhe ata që punojnë me orar dhe ata të kontraktuarit, që të mbulojnë shpenzimet për të bërë ambient për punë në shtëpitë të tyre.
Twitter gjithashtu ka thënë se do të mbulojë shpenzimet shtesë të ditës që prindërit mund të kenë për fëmijët e tyre, pasi çerdhet janë mbyllur.
Disa kompani të tjera shumë të mëdha, si Amazon, Box e Lyft, e knaë implementuar punën nga shtëoia ndërsa shumë evente të mëdha janë anuluar ose po mbahen pjesërisht online./ KultPlus.com
Qendra e Studentëve ka njoftuar se me qëllim të parandalimit të infeksionit Corona Virus COVID-19, në bazë të vendimit të Qeverisë së Republikës së Kosovës me Nr.01/07, ka marrë vendim për mbylljen e konvikteve dhe mensës së studentëve.
Përmes një postimi në faqen zyrtare, Qendra e Studentëve ka njoftuar se mensa do të jetë e mbyllur nga dt.12.03.2020 nga ora 14:00 ndërsa konviktet nga dt. 13.03.2020 deri në ora 14:00, deri më datën 27.03.2020.
“Qendra e Studentëve në Prishtinë merr vendim për mbylljen e konvikteve dhe mensës së studentëve. Mensa do të jetë e mbyllur nga dt.12.03.2020 nga ora 14:00 ndërsa konviktet nga dt. 13.03.2020 deri në ora 14:00, deri më datën 27.03.2020”, thuhet në njoftim./Express / KultPlus.com
Ministria e Kulturës, Rinisë dhe Sportit, përmes këtij njoftimi dëshiron të njoftojë qytetarët e Republikës së Kosovës se pas vendimit të Qeverisë për masat parandaluese në funksion të mbrojtjes nga COVID-19, i njohur si Corona Virus, ka marrë vendim me këto masa si më poshtë:
Të gjitha aktivitetet kulturore, shfaqjet teatrale, koncertet, ekspozitat e artit dhe aktivitetet tjera që ndodhin dhe realizohen nga institucionet qendrore të kulturës dhe të trashëgimisë, të cilat janë në varësi të ministrisë, ku ka prezencë të publikut, pezullohen deri në njoftimin tjetër të radhës që do ta bëjë MKRS-ja.
Të gjitha aktivitetet, ndeshjet e tubimet sportive mund të zhvillohen pa praninë e publikut.
Këto masa të cilat janë ndërmarrë nga MKRS-ja janë në kuadër të pikës 5 të vendimit të Qeverisë së Kosovës. Konkretisht kjo masë nënvizon se Aktivitetet publike dhe jopublike mund të zhvillohen të mbyllura/pa praninë e publikut si: ngjarje/tubime sportive, tubime, koncerte, konferenca, tryeza të rrumbullakëta deri në një vendim tjetër. / KultPlus.com
OBSH e ka shpallur botën në gjendje pandemie, tashmë janë marrur masa në të gjitha vendet e botës në tentim parandalimi të këtij virusi i cili filloi në Kinë, shkruan KultPlus.
Më poshtë KultPlus ju sjell disa foto që tregojnë se si qytetarët në vende të ndryshme të botës mbrohen nga Coronavirusi. / KultPlus.com
Ministrja e Kulturës, Rinisë dhe Sportit, Vlora Dumoshi priti sot në takim Ambasadorin e Republikës së Italisë të akredituar në Republikën e Kosovës, Nicola Orlando, me të cilin bisedoi për bashkëpunimin mes dy vendeve në fushat e kulturës dhe trashëgimisë kulturore.
Ambasadori Orlando e uroi Ministren Dumoshi për marrjen e detyrës dhe theksoi se dy vendet kanë një bashkëpunim të mirë në këto fusha dhe se është e rëndësishme që të vazhdojë ky bashkëpunim me MKRS-në sidomos në fushën e trashëgimisë kulturore e kulturës në përgjithësi.
Ministrja Dumoshi, theksoi që edhe për Ministrinë e Kulturës, Rinisë dhe Sportit, Italia mbetet bashkëpunëtor dhe partner i shumë projekteve.
Me këtë rast Ministrja Dumoshi theksoi që ka shumë fusha e pika në të cilat MKRS-ja dhe Ambasada Italiane kanë bashkëpunuar në të kaluarën, përmes institucioneve vartëse të Ministrisë.
Vlen të ceket bashkëpunimi i mirë i Bibliotekës Kombëtare të Kosovës me Ambasadën me aktivitete te ndryshme dhe ai i Galerisë së Arteve të Kosovës me Institutin Italian për Kulturë.
Ndërkaq, në fushën e trashëgimisë kulturore Ambasada e Italisë e ka ndihmuar MKRS-në me disa komponentë, përmes punës së përbashkët me Institutin Qendror te Romes për Restaurim në saje të së cilit shumë monumente janë restauruar në vendin tonë, përmendi ministrja.
Të dy palët u zotuan që bashkëpunimi të formalizohet me Marrëveshje Bashkëpunimi për bashkëpunim kulturor mes Kosovës e Italisë. / KultPlus.com
Nuk do duhej të ishe befasi për ju fakti se leximi është i mirë për shëndetin tuaj, por a e dini pse? Siç duket, ekzistojnë një grumbull i dobive nëse lexoni para se të shkoni në shtrat për të fjetur. Nëse tashmë jeni duke e bërë këtë, jeni me fat. Nëse jo, atëherë ju rekomandojmë të filloni ta bëni këtë.
1. Do të flini më mirë
Leximi ju ndihmon për ta sjellur gjumin duke ua vendosur mendjen diku tjetër dhe në këtë mënyrë duke ua larguar fakusin nga problemet e jetës së përditshme. Është njësoj sikurse leximi i përrallave për fëmijët që shtrihen për të fjetur, shumicën e të cilëve gjumi i pushton në pjesën e fundit të tregimit! Por kjo nuk do të ishte shumë e pëlqyeshme nëse jeni në pjesën më të mirë të librit, sepse do i’u duhej të luftoni kundër gjumit për shkak të dëshirës për ta përfunduar atë kapitull.
2. Ju ndihmon ta reduktoni stresin
Një grup i studiuesve në Universitetin e Surrey ka gjetur se leximi para gjumit mund ta reduktoj stresin deri në 68%. Kjo është një peshë mjaftë e rëndë që do të largohet nga supet tuaja përmes zhytjes nëpër faqet e një libri!
3. Ju do të bëheni më paqësor
Mbajtja e televizionit ndezur përgjatë kohës sa jeni duke tentuar të flini, mund të ju mbajë zgjuar për një kohë edhe më të gjatë. Leximi është një mënyrë e mrekullueshme për ta rehatuar veten qetësisht për një natë me gjumë të mirë. Është shumë më i mirë për shëndetin tuaj të përgjithshëm.
4. Do të koncentroheni më mirë
Përderisa gjurmoni nëpër rrjetet sociale përpara gjumit, ju jeni duke bluar në mëndje shumë gjëra në të njejtën kohë, duke e bërë të vështirë të fokusoheni në diçka më specifike. Duke mos pasur pamje vizuale, gjatë leximit të librit ju jeni të detyruar të fokusoheni vetëm në një ngjarje. Në këtë mënyrë ju e trajnonin trurin tuaj të koncentrohet.
5. Do të bëheni më kreativ
Për shkak se leximi për trurin është sikur stërvitjet fizike për trupin, sa më shumë që lexoni ju do të filloni ti shihni gjërat në një mënyrë tjetër nga ajo e mëparshmja. Kjo gjithashtu ju dërgon në gjetjen e shtigjeve të reja për zgjidhjen e problemeve tuaja./filozofia.al / KultPlus.com
Kalatë apo kështjellat jo vetëm në vendin tonë por në gjithë botën emërtimet e tyre i marrin ose nga vendet dhe qytetet ku janë ngritur si psh: kalaja e Beratit, Krujës, Prizrenit, Kaninës, Lëkursit, Porto Palermos, Elbasanit, Kardhiqit, Libohovës etj.
Po ka edhe kala që marrin emërin e personazheve të njohur që shpesh kthehen në mite si kalaja e “Rozafës”, në Shkodër dhe “Argjiros” në Gjirokastër dhe kala që emërtohen me emrin e prijsit e mbretërve të kohës si: Kalaja e Ali Pashë Tepelenës në Tepelenë e Janinë etj.
Në tërë historinë e tyre kalatë janë ndërtuar si fortifikime të jashtëzakonshme për të mbrojtur qytetet dhe njëkohësisht në pika dominante shumë të vështira për t’u pushtuar. Me këtë mision mbrojtës vjen në historinë e kalave dhe fortifikimeve në vendin tonë gjatë shekujve dhe mijëvjeçarëve edhe kalaja e Gjirokadtrës. Këtë kala madhështore herë e quajnë si një kryqëzor gjigand që ka hedhur spirancën aty majë shkëmbit për të qëndruar përjetësisht dhe herë e quajnë si një shqiponjë që ka hapur krahët dhe është gati për fluturim, por që nuk dihet çfarë e ndalon për t’u ngritur lart në qiell dhe ngeli e ngurtësuar me krahët hapur për të mbrojtur qytetin. Ndërsa në gjysmën e dytë të shekullit të XX kjo kala do të quhej “Kalaja e Festivalit”.
Nuk e di nëse për kalanë e Gjirokastrës para vitit 1968 kur në sheshin e saj hapi siparin Festivali i parë Folklorik Kombëtar të jetë kënduar ndonjë këngë për të, ndërsa në gjysmën e dytë të shekullit XX-të për këtë kala populli ka kënduar shumë këngë, duke e bërë atë ndoshta të vetmen jo vetëm në rajon por shumë më gjërë. Nga ky vit e në vazhdim kalaja e Gjirokastrës për faktin se aty në çdo pesë vjet organizohej Festivali Folklorik Kombëtar ajo mori emërtimin mbarë popullor si “Kalaja e Festivalit”.
Ja çfarë thotë një nga këngët e këtij festivali: “Na buron nga zemra,/Kënga më e mirë,/Në Kalanë e Festivalit,/ Plot me misafirë./ Moj kala ç’mur të ka rënë,/Andej armë e këndej këngë“.
Dhe kënga tjetër: “Ndezi këngën Shqipëria,/Në Kalanë e Festivalit,/ Te ky shesh s’harron kurrë,/ Këngën e Xhevat Avdallit./Na vjen këtu Demir Zykoja,/Gojë mblajti nga Skrapari,/Krah për krah Hafsa Zyberi,/ Madhështor Mentor Xhemali.”
Por në se nuk dimë se çfarë këngësh i janë kushtuar kalasë së Gjirokastrës shekuj më parë mendoj se këngët e para aty janë kënduar që në kohën kur janë grumbulluar gurët e parë dhe janë hapur themelet për të ndërtuar muret e kalasë. Ustallarët kur pushonin në kohën e drekës duke qënë banorë të travave ku kultivohej polifonia me siguri ja merrnin këngës për të shprehur dertet e shpirtit.
Natyrshëm lind pyetja: Pra çfarë ishin këngët e ustallarëve në mijëvjeçarin e parë të pas Krishtit kur ndërtonin kalanë e Gjirokastrës?
Mendoj se këngët e tyre do të ishin me melodi të karakterit epik të rënda monostrofike, të zvargura, të thella, të përshtatura me kohën dhe vendin ku këndoheshin. Këngët e ustallarëve që unë po i quaj “Këngët e Kalasë” përshkruanin histori, ngjarje, beteja, luftra të gjata, heronj e patriotë, ndoshta dhe frikacakë e tradhëtarë çka i bën ato në një farë mënyre të jenë memorja e historisë.
Këngën gjithmonë e ka pasur bashkëudhëtare të jetës shqiptari. Këngë këndonte në dasma e gëzime familjare, këngë u këndonte trimave kur i përcillte në luftë dhe këngë u këndonte luftëtarëve kur binin në fushën e betejës. Të tilla i imagjinoj këngët e ustallarëve kur ndërtonin kalanë e Gjirokastrës.
Nisur nga ato që thotë historia se në fillim është ndërtuar kalaja dhe pastaj qyteti mendoj se këngët e ustallarëve kanë qënë këngët e para të trashëgimisë folklorike të qytetit të Gjirokastrës. Ato melodi dhe ajo strukturë tonalo-modale e këngëve të ustallarëve të kalasë në rrugëtimin e tyre, në vite e shekuj, në evolucionin që pësuan nga përpunimi që i bëri Artisti Popull janë burimi dhe origjina e këngës gjirokastrite.
Nga vitet e origjinës e deri më sot kënga gjirokastrite nuk mendoj se ka patur ndryshime rrënjësore si psh: të jetë kënduar këngë e shoqëruar me saze e sot të jetë polifoni apo e kundërta.
Nuk kemi dokumenta të shkruara të rrugëtimit të këngës gjirokastrite që të vërtetojnë origjinën e këngës së sotme të qytetit të gurtë por për veçoritë e saj, kontrastet me këngët e tjera të rajonit e më gjërë, autenticiteti i saj i paprekur nga lashtësia deri në ditët e sotme e bëjnë këngën gjirokastrite nivelin më të lartë të polifonisë shqiptare.
U ula të shkruar për Kalanë e Gjirokastrës “Kalanë e Festivalit” në këtë vit të 50 vjetorit të Festivalit Folklorik Kombëtar si manifestimi madhështor i trashëgimisë kombëtare. Panteoni ku Artisti i madh Popull shpalosi me tërë pasionin e shpirtit perla nga trashëgima folklorike si pjesë e indentiteti tonë kombëtar.
(Nga Naxhi Kasoruho, “Mjeshtër i Madh”) / KultPlus.com
Qeveria në mbledhjen urgjente të mbajtur mbrëmë, anuloi shumicën e aktiviteteve si pasojë e epidemisë së fundit, Coronavirusit, shkruan KultPlus.
Teatri Kombëtar ka bërë të ditur përmes një postimi në faqen zyrtare në Facebook, se të gjitha shfaqjet e parapara për muajin Mars, do të anulohen.
Postimi i plotë:
”Të dashur miq të teatrit!
Konform masave të Qeverisë për parandalimin e përhapjes së CoronaVirus-it (Covid-19), për të cilat u mor vendim sonte në mbledhjen e Qeverisë, me qëllim shmangien e aktiviteteve me pjesëmarrje të gjerë të publikut, NJOFTOJMË SE ANULOHEN të gjitha shfaqjet e parapara të mbahen në kuadër të programit të shfaqjeve për muajin Mars.
Njëkohësisht apelojmë tek ju, respektimin strikt të udhëzimeve të njoftuara për shmangien e përhapjes së këtij virusi.
Ju njoftojm!” / KultPlus.com
Dr. Martin Luther King Jr, një aktivist i fuqishëm dhe frymëzues i të drejtave civile në fillimit të viteve 1960, luajti një rol të madh në mënyrën se si ne e pranojmë dhe trajtojmë njëri-tjetrin – pavarësisht nga raca apo gjinia.
Dr King është i njohur gjerësisht sot si një aktivist amerikan që vazhdimisht dhe në mënyrë efektive mbronte paqen, dashurinë dhe barazinë midis njerëzve. Ai ishte një njeri me besim dhe moral të lartë, që e veçoi atë nga shumë aktivistë të tjerë të kësaj kohe.
Forca shtytëse në pjesën më të madhe të jetës dhe fjalimeve të tij ishte gjithnjë paqja. Metoda e tij e dashurisë dhe pranimit për të gjitha qeniet njerëzore është ajo që e bëri një nga figurat publike të njohura në të gjithë historinë amerikane.
Duke nxitur krijimin e një jete aktive që gati 61 vjet më parë, Dr. King u bë shpejt fytyra dhe drejtuesi i lëvizjes për të drejtat civile. Ai luajti një rol në organizimin e Marshit në Uashington dhe është krijuesi i fjalimit të famshëm “Unë kam një ëndërr” (I have a dream…), i cili tërhoqi një turmë prej gati 250,000 njerëzish.
Përmes fjalimeve të tij dhe shërbimit të tij të palodhshëm për botën, ishte e qartë se në gjuhën e tij kishte fuqi dhe në zemër kishte pasion.
Ndërsa pranvera e vitit 2020 do të shënojë 52 vjet nga vrasja e doktor Martin Luther King Jr., trashëgimia dhe ndikimi i tij mbi një komb ka mbetur i përjetshëm. Këmbëngulja e tij për të përmirësuar veten për të dashuruar në mënyrë të efektshme njëri-tjetrin është arsyeja pse mesazhi i tij nuk mund të vdesë kurrë; sepse është gdhendur në zemrat e shumë njerëzve.
Dhe për të nderuar trashëgiminë e tij, çdo vit, Dr. King festohet në të gjithë vendin. Bëmat e tij të mira reflektohen dhe përdoren si mjete motivimi dhe fjalë inkurajimi.
Këtu do të lexoni disa thëniet më të mira të MLK që mbështesin mënyrën e tij të fuqishme dhe të nderuar të të jetuarit të jetës.
Ai besonte se të gjithë e meritonin drejtësinë.
Nuk është e mundur të dëshmosh drejtësinë për disa njerëz dhe të mos dëshmosh drejtësinë për të gjithë njerëzit.
Ai besonte të jetonte një jetë të qëllimshme.
Jeto sikurse Jezusi vdiq dje, u ngrit këtë mëngjes dhe do të kthehet nesër.
Ai e dinte që urrejtja është një mashtrim pre e së cilës asnjëri prej nesh nuk duhet të bjerë kurrë.
Mos lejo kurrë që dikush të të ulë aq poshtë sa të detyrohesh ta urresh atë.
Dhe se gjithmonë duhet të flasim për atë në të cilën besojmë.
Vjen një kohë kur heshtja është tradhti.
Ai mësoi se injoranca nuk të bën kurrë të lumtur.
Asgjë në të gjithë botën nuk është më e rrezikshme se injoranca e sinqertë dhe marrëzia e ndërgjegjshme.
Ai besonte te përkujdesja.
Pyetja më e vazhdueshme dhe urgjente e jetës është, çfarë po bëni për të tjerët?
Dashuria është gjithmonë përgjigja.
Errësira nuk mund të dëbojë errësirën; vetëm drita mund ta bëjë atë. Urrejtja nuk mund të dëbojë urrejtjen; vetëm dashuria mund ta bëjë atë.
Dhe që ne duhet të jemi më të mirët në çdo gjë që vendosim të bëjmë.
Nëse një njeri punon për të pastruar rrugët, ai duhet t’i pastrojë rrugët ashtu siç pikturoi Michelangelo, ose kompozoi Beethoven, ose siç Shekspiri shkruajti poezi. Ai duhet t’i pastrojë rrugët aq mirë sa të gjithë ushtritë e parajsës dhe të tokës do të ndalen dhe të thonë, ai jetoi si një pastrues i shkëlqyer që e bëri mirë punën e tij. – Martin Luther King Jr.
Duhet të kemi më shumë besim.
Fuqia jonë shkencore e ka tejkaluar fuqinë tonë shpirtërore. Ne kemi ndërtojmë raketa por nuk kemi ditur të ndërtojmë qënie të denja njerëzore.
Kini besim në procesin e gjërave.
Besimi bën hapin e parë edhe kur nuk i shihni të gjitha shkallët.
Jepini të gjitha.
Nëse nuk mund të fluturoni, atëherë vraponi, nëse nuk mund të vraponi, atëherë ecni, nëse nuk mund të ecni, atëherë zvarrituni, por çfarëdo që bëni duhet të vazhdoni përpara.
Ajo që ka më shumë rëndësi është ajo që ke brenda.
Kam një ëndërr, që katër fëmijët e mi të vegjël një ditë do të jetojnë në një komb në të cilin ata nuk do të gjykohen nga ngjyra e lëkurës së tyre, por nga përmbajtja e karakterit të tyre.
Ai besonte në të bërit gjënë e duhur.
Vjen një kohë kur njeriu duhet të marrë një pozicion që nuk është as i sigurt, as politik, as popullor, por ai duhet ta marrë atë sepse ndërgjegjja e tij i thotë se ka të drejtë.
Dhe se njohuria jonë është fuqi.
Funksioni i edukimit është të mësojë dikë të mendojë intensivisht dhe të mendojë në mënyrë kritike. Inteligjencë plus karakter – ky është qëllimi i edukimit të vërtetë.
Drejtësia duhet të jetë forca më e fortë.
Padrejtësia kudo është një kërcënim për drejtësinë kudo.
Dhe duke folur për njerëzit që duam.
Në fund, ne do të kujtojmë jo fjalët e armiqve tanë, por heshtjen e miqve tanë.
Ai besonte se nuk mund të humbet vizioni se kush jeni.
Sa më të pasur ne jemi bërë materialisht, aq më të varfër bëhemi moralisht dhe shpirtërisht. Ne jemi mësuar të fluturojmë në ajër si zogj dhe të notojmë në det si peshq, por nuk kemi mësuar artin e thjeshtë të të jetuarit së bashku si vëllezër.
Urrejtja është e paefektshme.
Duke e kthyer urrejtjen me urrejtje e shumëfishon urrejtjen, duke thelluar errësirën nata sonte është pa yje. Errësira nuk mund ta dëbojë errësirën; vetëm drita mund ta bëjë atë. Urrejtja nuk mund ta largojë urrejtjen, vetëm dashuria mund ta bëjë atë.
Çdo moment është i rëndësishëm.
Koha është gjithmonë e duhura për të bërë atë që është e drejtë.
Mbroni shpirtin tuaj, bëni atë që është e drejtë.
Asnjëherë, mos kinI frikë të bënI atë që është e drejtë. Sidomos nëse mirëqenia e një personi ose kafshe është në rrezik. Dënimet e shoqërisë janë të vogla në krahasim me ato që i imponojmë shpirtit kur shikojmë në anën tjetër.
Unë ju them sot, miqtë e mi, që përkundër vështirësive dhe zhgënjimeve të momentit, kam ende një ëndërr.
Larg nga imoraliteti.
Asnjëherë mos harroni se gjithçka bëri Hitleri në Gjermani ishte e ligjshme.
Dashuria është më e lehtë se urrejtja.
Kam vendosur të rri me dashurinë. Urrejtja është një barrë shumë e madhe për t’u mbajtur.
Fol për atë në të cilën beson.
Jetët tona fillojnë të mbarojnë ditën kur ne heshtemi për gjërat që kanë rëndësi.
Është një përgjegjësi e madhe që vjen me pushtetin.
Për të qenë të shkëlqyeshëm, duhet të jeni të gatshëm të talleni, të urreheni dhe ë keqkuptoheni. Qëndroni të fortë.
Dhe kurrë mos e lejoni urrejtjen brenda vetes.
T’i thuash jo dhunës nuk do të thotë vetëm të shmangësh dhunën fizike të jashtme, por edhe dhunën e brendshme të shpirtit, jo vetëm që nuk pranove të qëllosh një njeri, por ti refuzove ta urresh atë.
Guximi është më i madh se frika.
Guximi është fuqia e mendjes për të kapërcyer frikën.
Dhe ligjet janë të rëndësishme.
Mund të jetë e vërtetë që ligji nuk mund ta bëjë një njeri të më dojë mua, por unë mund ta ndaloj atë të mos më linçojë, dhe mendoj se edhe kjo është mjaft e rëndësishme.
Dhe ta gjesh brenda vetes që të duash plotësisht.
Karakteri është mënyra se si i trajtoni ata që nuk mund të bëjnë asgjë për ju.
Ai besonte se ruajtja e paqes është një proces.
Ata që e duan paqen duhet të mësojnë të organizohen po aq efektivisht sa ata që e duan luftën.
Ka fuqi në të nënvlerësuarën.
Pothuajse gjithmonë, pakica krijuese dhe e përkushtuar e ka bërë botën më të mirë.
Dashuria është hapi i parë.
Për të gjithë konfliktin njerëzor, njeriu duhet të krijojë një metodë që refuzon hakmarrjen dhe agresionin deri në shpagim. Themeli i një metode të tillë është Dashuria.
Të jetosh një jetë të qëllimshme.
Nuk ka asgjë më tragjike sesa të gjesh një individ të zhytur në gjatësinë e jetës, pa marrë asgjë prej saj.
Ai besonte në luftën për një qëllim.
Kur keni të drejtë nuk mund të jeni shumë radikal; kur gaboni nuk mund të jeni shumë konservatorë.
Mendoni për të tjerët.
Çdo njeri duhet të vendosë nëse do të ecë nën dritën e altruizmit krijues apo në errësirën e egoizmit destruktiv.
Më shumë fuqi për ju, dhe më pak për ta.
Injoranca juaj është fuqia e tyre.
Dhe duke bërë gjënë e duhur.
Dikush ka një përgjegjësi morale të mos i bindet ligjeve të padrejta.
Nëse jeni rehatuar, kjo do të thotë se po funksionon.
Një njeri nuk mund të gjykohet kur është aty ku ai qëndron në momente rehatie dhe komoditeti, por ku bën ballë në kohë sfidash dhe polemikash.
Kini pak më shumë besim.
Më përdor, o Zot. Më trego si të kuptoj kush jam unë, kush dua të jem dhe çfarë mund të bëj dhe ta përdor këtë për një qëllim më të madh se unë.
Ne duhet të ecim përpara – së bashku.
Progresi njerëzor nuk është as automatik, as i pashmangshëm … Çdo hap drejt qëllimit të drejtësisë kërkon sakrificë, vuajtje dhe luftë; përpjekje të palodhshme dhe shqetësim pasionant të individëve të përkushtuar.
Me dashuri, gjithçka është e mundur.
Dashuria është forca e vetme e aftë për të shndërruar një armik në një mik.
Shpresa është ajo që na lidh si popull.
Ne duhet të pranojmë zhgënjimin e fundëm, por kurrë nuk duhet të humbasim shpresën e pafundme.
Të gjithë jemi të barabartë.
Mund të kemi ardhur të gjithë me anije të ndryshme, por tani jemi në të njëjtën anije.
Bashkimi është e vetmja mënyrë për të gjetur paqen.
Ne duhet të mësojmë të jetojmë së bashku si vëllezër, ose të zhdukemi së bashku si idiotë.
Është e rëndësishme të mësojmë nga gabimet tona të së kaluarës.
Ne nuk jemi krijues të historisë. Ne jemi bërë nga historia.
Ne jemi më të mirë.
Unë refuzoj të pranoj mendimin se njerëzimi është i lidhur në një mënyrë aq tragjike me mesnatën pa yje të racizmit dhe luftës, sa e nesërmja e paqes dhe vëllazërimit nuk mund të bëhet kurrë realitet. Unë besoj se e vërteta e paarmatosur dhe dashuria e pakushtëzuar do të kenë fjalën e fundit.
Ngrihuni në këmbë dhe lëreni zërin tuaj të dëgjohet.
Rebelim është gjuha e padëgjuar.
Paqja është e vetmja mënyrë.
Paqja nuk është thjesht një qëllim i largët që ne kërkojmë, por një mjet me të cilin arrijmë atë qëllim. / KultPlus.com
Filharmonia e Kosovës ka njoftuar se koncerti i radhës i Orkestrës i paraparë që të mbahej më 29 mars në Sallën e Kuqe të Pallatit të Rinisë është anuluar për shkak të koronavirusit.
Kuarteti italian “Quartetto di Cremona” i përbërë nga instrumentistë që konsiderohen në mesin e më të mirëve të gjeneratës së tyre, sikurse dirigjenti Jacopo Brusa, kanë anuluar ardhjen në Kosovë pasi që Italia është vendosur në karantinë si pasojë e virusit COVID-19. / KultPlus.com
Kryetari i Odës Ekonomike të Kosovës, Berat Rukiqi, ka deklaruar se nuk ka nevojë për panik dhe rritje çmimesh, meqenëse ka sasi të mjaftueshme të miellit.
Përmes një postimi në llogarinë e tij në Facebook, Rukiqi ka thënë se për të parandaluar çdo mundësi të çrregullimeve në treg, Ministria e Ekonomisë duhet të bëjë verifikim urgjent të rezervave shtetërore dhe të përgatisë veprime konkrete për aktivizim të rezervës shtetërore.
Ai u ka bërë thirrje shitësve që t’i mbushin raftet sa më shpejt, meqenëse raftet e zbrazëta krijojnë panik.
“Kërkesë për shitësit me pakicë: Raftet e zbrazët krijojnë panik. Bëni të gjitha përpjekjet që raftet të mbushen në kohë sa më të shpejtë, pasi që në treg ka produkte të mjaftueshme, për të gjitha kategoritë”.
Postimi i Rukiqit:
Me rëndësi
– Nga informacionet, prej të gjithë furnizuesve kryesor: Ka sasi të mjaftueshme te miellit, pra nuk ka as arsye për panikë, as për rritje çmimesh;
– Për të parandaluar çdo mundësi të çrregullimeve ne treg, Ministria e Ekonomisë, duhet te bej verifikim urgjent të rezervave shtetërore dhe te pergadisë veprime konkrete, për aktivizim të rezervës shtetërore;
– Kërkesë për shitësit me pakicë: Raftat e zbrazet krijojnë panikë. Bëni te gjitha përpjekjet qeëraftat të mbushen në kohë sa me të shpejte, pasi qe në treg ka produkte te mjaftueshme, për të gjitha kategoritë. / KultPlus.com
Qeveria e Kosovës në një mbledhje urgjente, të mbajtur të mërkurën mbrëma ka marr një sërë masash me qëllim të parandalimit të përhapjes së koronavirusit.
Ndonëse shumë qytetarë deri më tani janë testuar me dyshimet se janë prekur nga koronavirusi, rezultatet kanë treguar se asnjëri prej tyre nuk është infektuar nga ky virus.
Ditë më parë Qeveria e Kosovës ka miratuar edhe Planin e veprimit për gatishmëri dhe reagim për koronavirusin, ndërsa mbi bazë ndau 10 milionë euro për Ministrinë e Shëndetësisë.
Duke u bazuar në këto vendime të Qeverisë së Kosovës, Baleti Kombëtar i Kosovës, ka marrë vendim që të anulon shfaqjen “Pushimi i Kalorësve” dhe të pezulloj aktivitetet e përditshme.
Ky është njoftimi i Baletit Kombëtar të Kosovës:
Në bazë të vendimit të Qeverisë së Republikës së Kosovës më datë 11.03.2020 mbi Masat e reja lidhur me COVID-19
Baleti Kombëtar i Kosovës me keqardhje iu njofton që shfaqja “Pushimi i Kalorësve” anulohet si dhe aktivitetet e përditshme pezullohen deri sa të bëhet dezinfektimi i Sallës së Baletit dhe komplet objektit të Teatrit Kombëtar të Kosovës.
Faleminderit për mirëkuptim! / KultPlus.com
