Flaka Goranci sjell rolin e Carmen në Zvicër

Pas sukseseve të fundit si producente, kompozitore dhe këngëtare, me CD-projektin e saj për gratë kompozitore nga e gjithë bota të titulluar ‘’La Femme’’, Flaka Goranci së fundi ka udhëtuar për në Langenthal të Zvicrës, për të realizuar një ndër rolet më të mrekullueshme, atë të Carmen, në shfaqjen operistike me po të njëjtin titull të kompozitorit francez Bizet, shkruan KultPlus.

Është hera e dytë që ajo ftohet në Zvicër me po të njëjtin rol. Qysh herën e parë performanca e saj është vlerësuar mjaft lartë nga kritika zvicerane, duke njohur vështirësitë që ka ky rol, si vokale poashtu edhe në paraqitjen skenike.

“Carmen do ta ketë premierën më 22 qershor dhe gjithsejtë do të kemi 10 shfaqje. Gëzohem shumë që do të punoj me një ndër dirigjentët dhe regjisorët më me zë që ka ky vend. Meqenëse kësaj radhe ky produksion vjen me një koncept krejt të ri, kjo e bën akoma më interesant dhe me impenjativ këtë rol”, ka thënë Flaka Goranci për KultPlus.

Ajo më pas ka thënë se është kënaqësi e madhe që të këndoj në një vend si Zvicra. “Zvicra është një vend që e do punën dhe vlerëson talentin, dhe duke shikuar edhe anën tjetër të këtij shteti, që ka bërë kaq shumë për bashkatdhetarët tanë, ku ka pas një rol shumë të madh për krijimin e kushteve për integrimin e tyre, kjo paraqitje më jep edhe më shumë emocion”, ka thënë Goranci.

Kjo shfaqje operistike është duke u përgatitë me regjhisor Andrea Zogg dhe nën dirigjimin e Bruno Lauschner. Kurse shfaqja do të prezantohet në Gartenoper Langenthal./ KultPlus.com

Flaka Goranci publikon projektin e ri “O Vendi im”, bën bashkë artistë kombëtar e ndërkombëtar (VIDEO)

Mezzosopranoja shqiptare Flaka Goranci sapo ka sjellur një projekt shumë të veçantë në mbrëmjen e sotme, e cila për adhuruesit e saj shfaqi videoprojektin “O Vendi im”, shkruan KultPlus.

Nje projekt dedikuar vendit tim. “O Vendi im” Nje kenge ikone, te cilen e kam kenduar dhe luajtur ne piano qysh si femije. Sot, nga Vjena i kendoj Vendit tim, atdheut dhe memedheut tim.

Nje falenderim shume te madh per Komunen e Gjakoves per mbeshtetjen qe i dha ketij projekti @komunaegjakoves @ardiangjini

Teksti & Muzika: Rashid Krasniqi
Orkestrimi: Kushtrim Gashi
Flaka Goranci – Mezzo-soprano
Adela Frasineanu – Violine
Edison Pashko – Cello @edisonp.29
Mennan Berveniku – Piano @mennanche
Regjia: Artan Korenica @artankorenica
Produkcioni: Onima @onima.co
Mode Designers:
Flutura Dedinja @fluturadedinja
Blerina Kllokoqi Rugova BKR @blerinakllokoqirugova
4Gstyle @4gstyle
Make-up & Hairstyle: Nora Kusari Kastrati @norakusari_
“, ka shkruar Goranci në rrjetet sociale.

Goranci më herët pati njoftuar për KultPlus për emocionet që i ka sjell ky projekt, i cili edhe ka ngërthyer shumë profesionistë për realizimin e këtij videoprojekti, që ka për dedikim 28 Nëntorin.

“Me tekst dhe muzikë të Rashid Krasniqit, e kënduar nga figura emblematike e Kosoves si Muharrem Qena, kënga “Mallëngjimi” apo siç e njohim të gjithë si “O vendi im” vjen e orkestruar nga kompozitori dhe dirigjenti jonë me qëndrim në Gjermani, Kushtrim Gashi, e interpretuar nga instrumentistë nga Filharmonia e Vjenes si Adela Frasineanu në violinë, Edison Pashko në Cello dhe pianisti i mrekullueshëm me qëndrim dhe veprim në Vjenë, Mennan Berveniku. Videoklipi me pamjet nga qyteti i Gjakovës i cili për qellim ka pikërisht afirmimin e vendit tonë nëpërmjet pamjeve të realizuara, vjen me regji nga Artan Korenica dhe i punuar nga produksioni Onima”, ka thënë Goranci për KultPlus.

Kënga “Mallëngjimi” është pjesë e “Albanian Floëers” CD e cila u realizua nga “Gramola” kompani në Vjenë, duke korrur suksese të mëdha internacionale. Ky projekt është përkrahur nga Komuna e Gjakovës./ KultPlus.com

Flaka Goranci bën bashkë artistë kombëtar e ndërkombëtar në video projektin “O Vendi im”

Mexosopranoja shqiptare Flaka Goranci do të sjell një projekt shumë të veçantë në mbrëmjen e sotme, e cila për adhuruesit e saj do të sjell videoprojektin “O Vendi im”, shkruan KultPlus.

Goranci ka njoftuar për KultPlus për emocionet që i ka sjell ky projekt, i cili edhe ka ngërthyer shumë profesionistë për realizimin e këtij videoprojekti, që ka për dedikim 28 Nëntorin.

“Me tekst dhe muzikë të Rashid Krasniqit, e kënduar nga figura emblematike e Kosoves si Muharrem Qena, kënga “Mallëngjimi” apo siç e njohim të gjithë si “O vendi im” vjen e orkestruar nga kompozitori dhe dirigjenti jonë me qëndrim në Gjermani, Kushtrim Gashi, e interpretuar nga instrumentistë nga Filharmonia e Vjenes si Adela Frasineanu në violinë, Edison Pashko në Cello dhe pianisti i mrekullueshëm me qëndrim dhe veprim në Vjenë, Mennan Berveniku. Videoklipi me pamjet nga qyteti i Gjakovës i cili për qellim ka pikërisht afirmimin e vendit tonë nëpërmjet pamjeve të realizuara, vjen me regji nga Artan Korenica dhe i punuar nga produksioni Onima”, ka thënë Goranci për KultPlus.

Kënga “Mallëngjimi” është pjesë e “Albanian Floëers” CD e cila u realizua nga “Gramola” kompani në Vjenë, duke korrur suksese të mëdha internacionale. Ky projekt është përkrahur nga Komuna e Gjakovës. Ky videoprojekt do të lansohet në ora 17:00, në YouTube./ KultPlus.com

Flaka Goranci magjeps publikun çek me një nga rolet më eminente për soprano

Fotografitë: Martin Popelar

Pak para përhapjes së Koronavirusit, shkak i të cilit u ndalën edhe të gjitha aktivitete kulturore e artistike, Flaka Goranci ka pasur një paraqitje të mahnitshme në Çeki.

Në Teatrin e Operës në qytetin Ostrava të Çekisë, Goranci ka realizuar debutimin e dyfishte duke interpretuar një nga rolet më eminente për soprano, atë të Amelias në Operën ”Un Ballo in Maschera”, shkruan KultPlus. 

Roli i Amelias, konsiderohet si një nga rolet më të vështira për soprano që kompozitori italian Giuseppe Verdi ka shkruar.

Teatri i Operës në Ostrava qëndron në rangun e tre teatrove më të suksesshëm në Ceki.

Deri më tani, Flaka ka realizuar role të ndryshme në Austri, vendin ku edhe jeton, pastaj në Gjermani, Belgjike, Israel, Shqipëri dhe së fundi edhe në Ceki.

Për vet Flakën kjo eksperiencë e fundit ka qenë një sfidë e madhe për dy arsye kryesore.

“Është hera e parë që realizoj një rol kaq impenjues për soprano, meqenëse deri më tani kam kënduar vetëm repertor për Mezzo-soprano. Përpos kësaj, ka qenë poashtu edhe projekti im i parë pas lindjes, duke ditur që pas lindjes për çdo grua është e vështirë të kthehet në formën e mëhershme e sidomos për këngëtaret meqë tashmë shumë gjëra kanë ndryshuar”, ka thënë Goranci për KultPlus, duke treguar tutje se kjo ka qenë një nga sfidat më të mëdha në karrierën e saj të deritanishme.

“Sfidë e cila më bëri të realizoj një nga rolet më kërkuese të repertorit Verdian në një nga teatrot më të mira që ka Çekia”, ka përfunduar Flaka Goranci. / KultPlus.com

Ermonela Jaho, Flaka Goranci dhe Ausilio Mehmeti shkëlqyen në ditët shqiptare në Bavari

Ditët shqiptare në Bavari organizuar nga konsullata e Përgjithshme shqiptare në Mynih, çelën siparin me një aktivitet ku performoi sopranoja me famë ndërkombëtare , Ermonela Jaho, mezzo-Sopranoja Flaka Goranci dhe Pianisti Ausilio Mehmeti.

‘Ditët shqiptare në Bavari’ është kthyer në një aktivitet të përvitshëm që mbahet në Mynih. Konsulli shqiptar Arten Hanku, tha se përgjatë 1 muaji Përfaqësitë Diplomatike, Shoqatat dhe mbarë komuniteti shqiptar që jeton në këtë vend të Gjermanisë, organizojnë aktivitete të ndryshme kulturore-sportive, duke promovuar para publikut bavarez, trupit diplomatik, medias dhe mbarë komuniteteve të tjera vlerat e kulturës, artit, sportit dhe traditës shqiptare.

Sopranoja Ermonela Jaho vlerësoi zhvillimin e këtij aktiviteti si një mundësi e mirë për të treguar vlerat e artit dhe kulturës shqiptare.

Në aktivitet ishin të pranishëm përfaqësues të qeverisë së Prishtinës, Ambasadori i Kosovës në Gjermani, përfaqësues të Trupit Diplomatik, medias, shoqatave shqiptare dhe komunitetit bavarez.

Top Channel

Flaka Goranci, pjesë e ‘Ballos Vjeneze’

Pas suksesit të edicionit të parë, që solli eksperiencën mahnitëse të Valsit Vjenez, muzikës së mrekullueshme dhe performancat e shkëlqyera artistike, tashmë vjen edicioni i dytë i Ballos Vjeneze në Tiranë, shkruan KultPlus.

Ballo Vjeneze do të zhvillohet ditën e premte, më 12 prill, në Pallatin e Kongreseve, duke mbledhur bashkë miq Shqiptarë dhe Austriake, personalitete, njerëz të biznesit, artistë dhe çdo qytetar që ka pikë të dobët muzikën klasike dhe valsin vjenez. Nën kujdesin e Bashkisë së Vjenës dhe Bashkisë së Tiranës, ky edicion i Ballos Vjeneze në Tiranë do të konsolidojë këtë traditë të mrekullueshme, prezente në metropolet më të rëndësishme të botës.

Ndër të tjerë artistë të ftuar në këtë edicion, është edhe mezzo-sopranoja e njohur kosovare Flaka Goranci. Flaka ka performuar në shumë skena prestigjioze si: Theater an der Wien, Konzerthaus Vjenë, Gläserner Saal Musikverein, Stefaniensaal Graz, sallë MuTh, sallën e koncerteve Vatroslav Lisinski e shumë skena të tjera, ndërsa kësaj radhe ajo kthehet në Tiranë për një tjetër performancë.

“Jam shume e lumtur te kthehem ne atdheun tim te dyte, ne Tiranën e bukur e te interpretoj perkrah artisteve te medhenje ne Ballon Vjeneze te organizuar nga Iceberg Communication, Ambasada e Austrise, Bashkia e Tiranes etj…”, ka shkruar Goranci në Facebook.

Artistë të tjerë pjesëmarrës në këtë event janë: Uwe Theimer, Andreas Jankowitsch, Orkestra RTSH​, Enada Hoxha & Gerd Vaso, Debutantët e Shkollës së Baletit, Familja Qerimi, Laert Vasili.

Balloja Vjeneze daton si traditë që në shekullin e XIV-të dhe arriti majën e shkëlqimit gjatë Kongresit të Vjenës, kongresi në të cilën morën pjesë gjithë shtetet dhe fuqitë Evropiane në përpjekje për të arritur një marrëveshje për një rend të ri në kontinentin e vjetër. 

Sot më shumë se 400 ballo organizohen çdo vit në Vjenë me një numër vizitorësh më të madh se 500.000 vetash. Balloja Vjeneze është shndërruar në një eksport të suksesshëm kulturor dhe organizohet më shumë se 30 herë në vit në metropolet më të rëndësishme botërore: Athinë, Berlin, Bruksel, Londër, Madrid, Moskë, Nju Jork, Paris, Pekin, Pragë, Romë, Tokjo, Zyrih etj.

Përveç simbolikës kulturore, eventi është një manifestim i miqësisë Shqiptaro-Austriake dhe përbën një hap tjetër për të intensifikuar bashkëpunimin mes kombeve tona. / KultPlus.com

Flaka Goranci dhe Zamir Kabo së bashku në Linz

Sopranoja Flaka Goranci dhe pianistit Zamir Kabo do të koncertojnë së bashku të mërkurën në Linz të Austrisë . Dy artistët shqiptarë të shoqëruar nga çelisti austriak Bertin Christelbauer do të sjellin një program të larmishëm me vepra nga Verdi, Rosini, Moxarti dhe Shopeni, shkruan KultPlus.

Koncerti do të mbahet më 20 shkurt duke filluar nga ora 19:30 në Linz në sallën Elisabethinen.

Flaka Goranci e nisi karrierën e saj muzikore në piano, për të kaluar më pas në këndim. Studimet e saj bachelor i përfundoi në Akademinë e Muzikës në Tiranë. Në moshën 22 vjeçare ajo debutoi me rolin e Rosina në ‘Il Barbiere di Siviglia’ në Operën Shtetërore në Tiranë. Në Izrael, në Shqipëri e Austri ajo është paraqitur në role të ndryshme, përfshirë ‘Le nozze di Figaro’ të Mozartit, rolin e Dorabella në ‘Cosi fan tutte’, Ida në ‘Gemma di Vergy’, Dido në ‘Dido and Aeneas’ dhe Die Mutter në ‘Der Jasager’. Ajo është fituese e Bursës Hilde Zadek Scholarship Foundation ndërsa ka performuar në skena të mëdha botërore.

I panjohur për botën e muzikës klasike nuk është as pianisti Zamir Kabo i cili ka performuar disa herë edhe në Shqipëri. Ai ka lindur më 1988- n në Tiranë në një familje muzikantësh. Mësimet e para në piano i mori në shkollën artistike “Servete Maçi”, për të vijuar Liceun Artistik “Jordan Misja”. Studimet e larta i fillon në vitin 2006 në Fakultetin e Muzikës në Shkup, nën drejtimin e profesorit Boris Romanov, ku edhe përfundon në 2010- n me vlerësimin 10 Suma cum Laude. Në 2011-n vazhdon studimet master po me të njëjtin profesor dhe përfundon përsëri me notën 10 Suma cum Laude për të vazhduar me paraqitje nëpër salla të njohura koncertale.

Ndërsa çelisti austriak është pjesëtar i orkestrës Bruckner Orchestra te Linzit dhe ka edhe dy albume të regjistruara, të fundit në vitin 2015./ KultPlus.com

Flaka Goranci magjeps Italinë, së shpejti prezantohet në festivalin e njohur të Austrisë e në Gjermani

Ylli operistik nga Kosova, Flaka Goranci po vazhdon të dëshmojë veten në skenat më të njohura evropiane. Aktivitetet e saj nuk kanë munguar as këtë fundvit e as në fillim të vitit që po vjen.

Ajo së fundmi është paraqitur në koncertin për Krishtlindje në Lucca të Italisë, atje Goranci ka interpretuar nën dirigjimin e dirigjentit austriak me famë  botërore Gustav Kuhn. Goranci me një interpretim e paraqitje të kompletuar artistike, ka magjepsur publikun italian me një nga veprat impenjative të repertorit operistik.  Goranci, e cila është fort e lidhur me rrënjët, atje ka interpretuar në gjuhë të ndryshme ndërsa nuk ka munguar edhe këndimi në gjuhën shqipe, ku ka interpretuar këngën e njohur për krishtlindje “Silent night”, “Natë e qetë”, shkruan KultPlus.

Ndërkohë që Flaka është e angazhuar ne Festivalin e njohur në Tirol te Austrisë me dy role operistike, atë të “Teresa”-s në operën “La Sonnambula” dhe atë të “Ernestina”-s në “L’occasione fa il ladro”,  ajo po përgatitët edhe për dy koncertet e radhës në Gjermani bashkë me orkestrën simfonike të Hamburg – ut ku do të interpretojë pjese të shkëputura nga opera “Carmen” dhe arie nga repertori operistik.

Flaka Goranci me një program të veprave të njohura operistike e vepra të njohura shqipe, i pat dhuruar publikut të Prishtinës një koncert të paharruar në përvjetorin e 5-të të gazetës online për art dhe kulturë, KultPlus. KultPlus e ka kthyer Gorancin pas disa vitesh me koncert në Kosovë, ndërsa në po këtë mbrëmje, Goranci ka rrëfyer edhe për rrugëtimin e saj artistik në kuadër të ciklit të rrëfimeve “Ta zbardhi ftyrën”./ KultPlus.com

Shkëlzen Doli e Flaka Goranci me koncert mbresëlënës në Vjenë

Një mbrëmje mbresëlënëse artistike është mbajtur të premten në kishën katolike shqiptare para komunitetit shqiptarë dhe austriak në Vjenë të Austrisë.

Nën tingujt e violinistit të mirënjohur Shkëlzen Dolit dhe mezosopranos Flaka Gorancit, në Vjenë të Austrisë filloi kremtimi i 25 vjetorit të themelimit të Misionit Katolik Shqiptarë në Austri.

Dy artistët tanë të udhëhequr nga dirigjenti Michael Maciaszczyk dhe orkestra e Dhomës (Das Österreichische Kammerorcheste) për rreth dy orë para publiku shqiptar dhe austriak, dhuruan një koncert të paharrueshëm të muzikës klasike duke interpretuar vepra të njohura të kompozitorëve me famë botërore e deri të veprat e pavdekshme shqiptare si: Baresha e kompozime tjera shqiptare.

Të pranishëm ishin: Zëvendësministri i Punëve të Jashtme në qeverinë e Kosovës, Anton Berishaj, Ambasadori i Shqipërisë, Roland Bimo, ai i Kosovës, Sami Ukelli, ipeshkvi i Kosovës, imzot Dodë Gjergji, krerë të kishës katolike në Austri, si dhe miq dhe përfaqësues të organizatave të ndryshme austriake dhe shqiptare.

Ky jubile do të zgjasë tre ditë dhe është organizuar nga famullitari i kishës katolike shqiptare në Austri, Don Nikson Shabani në bashkëpunim me Këshillin Koordinues të Shoqatave Shqiptare në Austri.

“Misioni është themeluar në vitin 1993. Komuniteti shqiptarë katolikë numëron mbi 1300 familje me mbi 6 mijë besimtarë”, theksoi Don Niksoni para të pranishmeve, njofton “albinfo.ch”.

Meshtari, don Nikson Shabani tregoi se ai është gjithmonë pranë komunitetit katolik në qendrat më të rëndësishme në Austri e deri në Pragë e Bratislavë me aktivitete fetare dhe kulturore.

“Kemi gjithmonë besimtarë të mirë dhe të devotshëm. Pjesa më e madhe e të rinjve të komunitetit tonë punojnë dhe veprojnë në të gjitha sferat e shoqërisë. Janë mirë të integruar dhe japin kontributin e tyre për të mirën e shoqërisë dhe vendit ku jetojnë duke filluar nga doktor shkence, deri të biznesmen të suksesshëm. Janë familjarë të mirë, punëtorë të mëdhenj dhe atdhetar dhe fetar të cilët bartin me krenari identitetin e tyre shqiptarë duke mos e mohuar asnjëherë për atë se çfarë janë”.

Kremtimi i 25 vjetorit do të vazhdojë edhe më aktivitete të tjera fetare dhe kulturore. Gjatë ditës së shtunë parashihet të mbahet një simpozium, ndërkohë në mbrëmje do të jetë mesha e shenjtë. Po ashtu edhe ditën e diel në mesditë do të mbahet mesha e udhëhequr nga ipeshkvi, imzot Dodë Gjergji për të vazhduar më pas në përmbyllje në një koncert familjar me këngëtarin, Malësorin.

Aktivitetet e kremtimit të themelimit të Misionit Katolik Shqiptarë në Austri janë pjesë e “Javëve të Kulturës Shqiptare” në Austri të cilat kanë filluar nga 13 nëntor dhe do të zgjasin deri me 8 dhjetor./ KultPlus.com

Festa e 5 vjetorit të KultPlus-it përmes fotogalerisë

KultPlus mbrëmë shënoi 5-vjetorin e themelimit me edicionin e dytë të ciklit të rrëfimeve “Ta zbardhi ftyrën” me mezzo-sopranon e njohur shqiptare Flaka Gorancin, yllin operistik që ka mahnitur audiencat evropiane e botërore, duke jetësuar rolet që rrallë kujt i besohen. Pas ciklit të rrëfimeve, Flaka u prezantua me një solo-koncert, duke i dhënë një ngjyrim të veçantë shënimit të 5-vjetorit të gazetës së parë online për art e kulturë- KultPlus, e cila gjithnjë duke u rritur e duke i qëndruar besnik misionit të saj, tashmë ka arritur gjysmë dekade të suksesshme e stoike në mesin e mediave në vend. Përmes kësaj galerie, në po ju sjellim më afër kësaj ngjarje, duke ju fokusuar momentet më pikante. / KultPlus.com

Flaka Goranci: ‘Na e zbardhe ftyrën’ është thënia që më ka shoqëruar gjithmonë

Alberina Haxhijaj dhe Arbër Selmani

KultPlus mbrëmë shënoi 5-vjetorin e themelimit me edicionin e dytë të ciklit të rrëfimeve “Ta zbardhi ftyrën” me mezzo-sopranon e njohur shqiptare Flaka Goranci.

Arbër Selmani kryeredaktor i gazetës KultPlus tregoi se kjo mbrëmje ka bërë se bashku të gjithë ata që e duan kulturën nën ombrellën e gazetës së parë shqiptare e cila prej fillimit nisi vetëm me shkrime për artin e kulturën – KultPlus.

Paradoksale, në një shoqëri ku lajmi nuk zgjat as tre ditë, dhe zakonisht është më pompoz kur ka në fokus një rrahje mes profesorit e nxënësit, rrahje në klube të natës, zhveshje të këngëtareve apo edhe diskursin pezhorativ që politikanët moralisht në zero të këtij vendi përdorin karshi grupeve të ndryshme të diskriminuara në Kosovë. Dhe KultPlus e nisi duke dashur që në mes të kësaj katrahure klikimesh e shfletime pamfletash e gazetash, të vinte me një poezi. Me një James Joyce, me një Rona Nishliu, me një rol të risjellë nga Bekim Fehmiu, me një varg nga Ali Podrimja, me një tregim nga Adriana Matoshi, me një shuplakë siç di ta thurë vetëm Mehmet Kraja. Ndoshta do të lexohej më pak edhe Inva Mula apo Ermonela Jaho apo Marigona Qerkezi, apo edhe rrëfimet për Armend Rexhepagiqin, Nexhmije Pagarushën, Tefta Tashkon, Vaçe Zelën.

Në mesin e mysafirëve të cilët morën fjalën për të ndarë me publikun rrugëtimin e tyre të përbashkët së bashku me KultPlus-in ishte edhe profesori Sali Bashota. Ai u shpreh se KultPlus është destinacioni i lexuesve për të kuptuar zhvillimet e fundit të kulturës në Kosovë.

“KultPlus çdo ditë po frymon vlerat e kulturës kombëtare dhe kulturës universal duke dhënë informacione në interes për zhvillimin e kulturës në përgjithësi. Uroj që KultPlus të jetë vërtetë kulturë që frymon vlerat e të rinjve dhe me punën që po bënë ky ekip besoj që jo vetëm që janë të parët dhe të vetmit por shpresoj që në të ardhmen do të jenë jo vetëm në gjuhën shqipe po edhe në gjuhën angleze e gjuhë të tjera”, u shpreh ai.

Don Lush Gjergji u shpreh se kultura është një kusht pa të cilin nuk jeton njeriu, familja por as shoqëria.
“5 vite nuk janë shumë por në kushte dhe rrethana që jemi, të mbijetojë diçka vetëm me kulturë besoj që është mjaft. Kultura është frymëmarrja e njeriut dhe kusht pa të cilin nuk jeton njeriu, familja dhe shoqëria. KultPlus e bënë një shërbim të jashtëzakonshëm dhe i mbush zbrazëtirat, humnerat, dhe vet emërtimi KultPlus do thotë Kultura plus ju dhe plus ne, njerëz që mundohemi jetës t’i japim shije dhe kuptim pasi që e bukura, e drejta, e vërteta, e mira dhe mbi të gjitha dashuria janë pjesë përbërës e jetës sonë”, theksoi ai.

Themeluesja e KultPlus-it Ardianë Pajaziti, falënderoi të gjithë të pranishmit të cilin kanë ardhur dhe e nderojnë punën që bënë ky ekip.
“Para pesë viteve idenë për ta themeluar KultPlus-in e kam pasur në një nga kafenetë e Prishtinës, vend ku jepen shumë ide e që Prishtina njihet për këtë. Por kjo ka qenë vetëm një ide të cilën e kam ndarë me bashkëshortin tim. 5 vite pas nga dy persona unë sot po shoh një sallë plot dhe afër 70 mijë persona të cilët na ndjekin nëpër mes rrjeteve social, diçka që nuk është pak e që ka ardhur falë punës së ekipi fantastik, me një fuqi shumë të madhe për të arritur këtu ku jemi”, u shpreh ajo.

Eliza Hoxha cilësoi gazetën online KultPlus si një platformë të diplomacisë publike dhe një vendtakim për të gjithë shqiptarët.
“Përtej krijimit të një platforme shkëmbimesh të eksperiencash, rezultatesh dhe të arriturave mendoj se KultPlus ka arritur me e mbërri një mision të cilin ndoshta as vet nuk e ka menduar fillimisht. Ka arritur të bëhet një platformë e diplomacisë publike duke bërë që njerëzit e Kosovës dhe shqiptarët kudo që janë, të jenë me të fortë me të afërt dhe ka hapur një mundësi për ta njohur më mirë njëri-tjetrin dhe me e dashtë me shumë vendin tonë”, theksoi ajo.

Para publikut fjalën e mori edhe aktori Fatmir Spahiu i cili i dëshiroi gazetës KultPlus edhe shumë vite së bashku me sukseset kulturore të cilat do i shënojnë artistët e Kosovës.
“Ne si artistë që jetojmë prej artit edhe punën tonë e kemi të përditshme në Kosovë, kemi nevojë jo vetëm për KultPlus-in por edhe për portale e gazeta të tjera që na mbështetin. Po sado prej tyre që janë, e nuk janë asnjë e mirë dhe e fuqishme si KultPlus-si, ne që jemi çdo ditë në këtë skenë, të vogël, modeste, të bukur, disi KultPlus-in apo një shkrim të KultPlus-it e kemi si një lloj certifikate, një lloj vule se sa apo a ka qenë mjaftueshëm kulturore ngjarja që e kemi realizuar. Pra nëse nuk je në KultPlus, pas eventit të caktuar atëherë nuk paska qenë fort kulturore paska qenë me tepër komerciale ngjarja”, u shpreh ai.

KultPlusi, në shtatorin e vitit 2013-të, siç bëjnë shumë fillestarë për të mos u kthyer prapa, rrezikoi. Rrezikoi të bëhej e para pikë e referencës për të gjitha ngjarjet dhe zhvillimet kulturore ndër shqiptarë. E meqë shqiptarët kanë pasur, kanë e do të kenë një bazë të fortë për kulturë, jo pak herë me këtë kulturë si cakun kryesor të regjimit që na shtypi për shumë kohë, KultPlus hyri në tregun mediatik si një tentim modest për të krijuar lexuesit e saj, të cilët anash lajmeve të departamenteve tjera, do të ndanin kohën të lexonin retrospektivë e aktualitet kulturor. Duke mos pasur një tjetër shembull paraprak, KultPlus nisi me pak njerëz drejt idesë të sillte kulturë, art, analiza. Jo kulturë në përkthimin e mangët e të cekët, por kulturë e art që i rri larg klisheve, paragjykimeve, izolimeve që i ka krijuar shoqëria shqiptare dhe ajo ballkanase. Emrat që i përmenda më lart janë përqindje e vogël e asaj që KultPlus ka shpalosur në pesë vite jetë. Kemi dalë jashtë Kosovës, jashtë Shqipërisë, kemi udhëtuar në festivale e në biennale të ndryshme, herë me ndihmën e njërit e herë me kritikat destruktive të tjetrit, por kemi provuar të jetojmë mes lexuesit e duke provuar që diku gjatë ditës, dikë ta bëjmë të na lexojë e të ushqehet. Sepse kultura, krejt në fund, është ushqimi më i mirë.

Mbrëmja vazhdoi me ciklin e dytë të rrëfimeve “Ta zbardhi ftyrën” me mezzo-sopranon e njohur shqiptare Flaka Goranci.
Ajo fillimisht tregoi për të pranishmit fillimet e saj. Si fillimisht kishte filluar studimet për piano në Gjakovë, dhe talentin e saj në këtë instrument por edhe ndikimin që ka pasur Lufta e Fundit e Kosovës në të pasi që ajo si refugjatë në Shqipëria filloi të dashurohej pas këndimit. Më pas ajo tregoi për studimet e saj për kanto në Tiranë. Vite të mrekullueshme e që ishin një trampolinë për të vazhduar tutje me bursën në Tel Aviv dhe karrierën e saj nëpër Evropë.

“Si tip jam e tillë që punoj shumë edhe nëse nuk kam asnjë kontratë, asnjë ofertë, asnjë interesim prej dikujt. Unë ulem, lexoj, hulumtoj pra jam tip kërkues dhe pastaj me lind ndonjë ide, por gjërat e mëdha nuk ndodhin kur ti je duke pritur”, theksoi ajo duke treguar edhe për eksperiencat që ka pasur nëpër shtëpitë operistike të ndryshme ku i është dashur që në të shumtën e rasteve të tregoj se ku është Kosova dhe të tregoj më shumë për vendlindjen e saj. Pikërisht një mënyrë e mirë për të prezantuar këtë vend ajo ka menduar se do të jetë edhe publikimi i CD-së Albanian Flowers.

“Shpesh herë kam menduar se njerëzit mund të thonë se jam duke gënjyer. Si mund të ndodh që për një vend që shumë njerëz nuk e njohin unë po flas kaq bukur, kaq me dëshirë, e me magjepsje për të dhe këtu ka lind ideja për CD-në me pjesë shqiptare”, tregoi ajo, punë kjo e cila i ka marrë tri vite përkrah angazhimeve të tjera të përditshme që i ka pasur.

“Është shumë mirë kur puna jote vlerësohet dhe jo vetëm nga komuniteti artistik por nga të gjithë, pasi që ne bëjmë muzikë për të gjithë njerëzit. Ne duhet që të jemi frymëzim për të gjithë njerëzit, apo për secilin individë këtu në sallë pasi që jemi shkolluar mjaftueshëm dhe njihemi mjaftueshëm te komuniteti artistik mirëpo ne duhet që të jemi edhe frymëzim për popullin tonë për gjeneratat e reja që vijnë”, theksoi ajo.

Tutje ajo u shpreh se çdo fillim është i vështirë dhe çdo gjë ka qenë e kushtueshme dhe sipas saj kur një artist nuk është i qetë nga ana materiale ai e ka shumë të vështirë që të arrijë diçka dhe të marrë hapat e parë. Mirëpo sipas saj ajo ka qenë shumë me fat që ka arritur të marrë bursë, diçka që e ka lehtësuar fillimin e karrierës së saj.

“Ka ditë kur pyet vetën se përse po e bëjë këtë mirëpo ka ditë kur ke vullnet dhe dëshirë apo ke marrë lajm pozitiv edhe thua podua ta bëjë këtë. Ka një javë ndoshta komplet në depresion ashtu, pse po ndodh kështu, pse nuk e kalova ketë audicion, pra janë shumë peripeci. Mirëpo në këto momente unë gjithmonë kam thënë mendo pozitiv edhe në një mënyrë bëhu e verbër dhe shiko vetëm qëllimin tënd. Kjo ka qenë edhe motoja që me ka shoqëruar gjatë gjithë rrugës dhe mendoj se kam pasur të drejtë pasi që jeta nuk është çdo herë perfekte. Kemi ditë kur asgjë nuk funksionon dhe ditë ku çdo gjë shkon mirë, çdo gjë është e bukur”, theksoi ajo.

Flaka Goranci tregoi se deri tani ka ndihmuar disa miq dhe të ri në rrugëtimin e tyre muzikor dhe se është e hapur që ta bëjë këtë kurdo herë që do i ofrohet një mundësi e tillë. Ndaj pyetjes se a vlen për Flakën thënia ‘Na e zbardhe fytyrën’, ajo u shpreh se është një shprehje që e ka shoqëruar shumë duke marrë këtu parasysh që jashtë vendlindjes së saj ajo nuk prezanton vetëm vetën por edhe Kosovën

“Në fillim shprehja ‘Ta zbardhi ftyrën’ më është dukur e çuditshme, pastaj jam kujtuar që ne jemi rritë me këtë shprehje ‘ma ki zbardh ftyrën’, kur prindi e thotë në momente krenarie më fëmijën, ose motra vëllait, ose burri gruas e kështu me radhë. Them se është një shprehje mjaftë e bukur dhe që me ka shoqëruar gjatë gjithë kohës”, u shpreh ajo.

KultPlus sot falënderon çdo njeri i cili apo e cila ka ndihmuar që faqja jonë të bëhet shumëngjyrëshe, e hapur, e ndritshme, e artësuar. Fjalët e mira dhe ato që godasin më shumë i kemi marrë gjithmonë si të mirëqena, për të punuar drejt tyre. Në këtë mision që nuk është i lehtë në një shoqëri si e jona, të gjithë bashkë mund të dalim më të lexuar, me më shumë kulturë e art në mbarëvajtjen e ditëve tona. Stafi i KultPlus falënderon të gjithë, me shpresën për të vazhduar bashkë rrugëtimin drejt dekadës së parë.

Mbrëmja në Amfiteatrin e Bibliotekës Universitare të Kosovës, vazhdoi me një solo- koncert nga Flaka Goranci nën përcjelljen e pianistes Pranvera Hoxha./ KultPlus.com

5 vite të KultPlus u përmblodhën nën magjinë e interpretimit e paraqitjes së Flaka Gorancit

Gili Hoxhaj

Flaka Goranci, ylli operistik që ka mahnitur audiencat evropiane e botërore, duke jetësuar rolet që rrallë kujt i besohen, mbrëmë KultPlus e solli për herë të parë me një solo-koncert në Prishtinë, duke i dhënë një ngjyrim të veçantë shënimit të 5-vjetorit të gazetës së parë online për art e kulturë- KultPlus, e cila gjithnjë duke u rritur e duke i qëndruar besnik misionit të saj, tashmë ka arritur gjysëm dekade të suksesshme e stoike në mesin e mediave në vend.

Para që publiku të njoftohej me Flakën e mahnitshme në interpretim, fillimisht dëgjoi për rrugëtimin e Flaka Gorancit e natyrën e saj kërkuese që nga ëndrrat e hershme, kur lufta e kishte gjetur 12 vjeçare e si refugjate në Shqipëri, atje ku veçse kishte nisur ta hetoj pasionin për këndimin. Nga studimet në Tiranë e në Tel- Aviv të Izreailit, ajo tregoi për depërtimin në skenat më prestigjioze të Evropës e jashtë saj, por duke mos harruar kurrë rrënjët, por duke u kthyer tek to ose duke i marrë me vete.

Ndriçimi u fokusua në daljen e Flaka Gorancit e Pranvera Hoxhës, duke sinjalizuar fillimin e koncertit i cili nisi e përfundoi mes duartrokitjeve. Pas një komunikimi me sy me pianisten Hoxha, Flaka Goranci futet brenda veprës së kompozitorit italian Giacomo Puccini, duke e sjellë atë tek publiku në çdo ngritje e ulje zëri e çdo lëvizje të duarve e syve. Pas ”Gianni Schicchi ” – ”O mio babbino caro”, që ishte kompozuar para një shekulli, Flaka Goranci me zërin e saj të magjishëm e dërgoi publikun nën përjetimin e thellë tek vepra e kompozitorit austriak, R. Stolz ”Der Favorit” – ”Dusollstder Kaisermeiner Seelesein”. Për të vazhduar me „ Over the rainbow „ from ”The Wizard of Oz”, të Harold Arlen / HerbertStothart e deri tek ”Ariettaallaspagnola” e G. Rossini.

Flaka Goranci pavarësisht lëvizjeve të udhëtimit nëpër veprat më të njohura të kohëve e kompozitorëve më të njohur botëror, gjithnjë u ka qëndruar besnik rrënjëve. Kështu ndodhi edhe mbrëmë. Me “Lule Bore” të Simon Gjonit, ajo bindshëm e mbajti pothuajse pa frymë publikun deri në veprën e fundit. Flaka Goranci në cdo hap të koncertit e mbizotëronte me siguri skenën, e dëshmonte që tashmë është mishëruar me të. Derisa zëri i saj përhapej në sallë e dëgjohej dhe jashtë saj, ajo përmes shikimit lëvizte në secilin kënd të skenës e mes duartrokitjeve kalonte nga një vepër tek tjetra, duke e mbajtur publikun të përqendruar deri në fund. “Kur me vjen burri nga stani” erdhi në lëvizje e në interpretim tejet besnik ndaj veprës, duke arritur ta marr me vete publikun, përmes lëvizjeve të lehta të fustanit e mimikës.

Pas duartrokitjeve që ky interpretim ngjalli tek publiku e që e bëri Gorancin e Hoxhën të përkuleshin me shumë se dy herë duke i përgjigjur duartrokitjeve të tyre, Goranci dëshmoi fuqinë e veçantinë vokale e interpretitive dhe në një nga perlat shqiptare “Margjelo” të kompozitorit Prenk Jakova. Si rrallëherë, ajo në çdo lëvizje duke iu përshtatur tingujve, e futi publikun në muzikalitetin e kësaj vepre, duke bërë që publiku të ngrihet në këmbë për ta risjellë përsëri shpejtë në skenë, madje edhe më të fuqishme. Goranci krejt në fund u kthye për t’i sjellë publikut të Prishtinës “Carmenin” më të bukur që e kanë dëgjuar ndonjëherë. Me një buqetë me lule, ajo erdhi në skenë për të jetësuar operën më të njohur botërore të kompozitorit francez Georges Bizet. “Carmen” përmes zërit të Gorancit erdhi si një komunikim i afërt me secilin në sallë, madje me një prani më të madhe artistike Goranci zbret nga skena e me lëvizje të trupit në përcjellje të veprës, ajo nis e shpërndan lule për të pranishmit.

Mes elegancës në lëvizje e dukjes përrallore, Flaka Goranci qëndron në skenë duke i bartur fuqishëm publikut të saj, ndjesitë që i ka dhuruar publikut të skenave më të njohura. Zëri i saj rrëmbyeshëm mbajti vëmendjen e publikut në skenë, duke afruar duart pranë vetës, zëri i saj arrinte të depërtonte dhe jashtë sallës. Me këtë solo-koncert Goranci dëshmoi se është një artiste e jashtëzakonshme, që di ta mbaj publikun në çdo lëvizje, zëri ndërsa i dëshmoi publikut të saj që është përfaqësimi i jashtëzakonshme me të cilën lidhet me emrin e Kosovës.

Për ngrohtësinë dhe pritjen e mbrëmshme, Flaka Goranci thotë që e ka bërë që të ndihet shumëfish më e vlerësuar dhe e çmuar. Ajo thotë se ndihet e privilegjuar të prezantohet me një koncert solistik pranë publikut të saj dhe të jetë e përzgjedhura e ciklit të rrëfimeve “Ta zbardhi ftyrën”. Ajo shprehet e lumtur që feston së bashku me KultPlus-in, 5 vjetorin ndërsa thotë se beson në jetëgjatësinë e KultPlus-it që e ka përcjellë në çdo hap të karrierës.

“E kam përcjellë që nga fillimi KultPlus-in dhe ka qenë një gjetje shumë e bukur, diçka për të cilën ka pasur shumë nevojë vendi ynë, më vjen mirë që është krijuar një gazetë kaq serioze që përcjellë lajme nga kultura e mirëfilltë. Kam qenë gjithnjë përkrahëse, dhe KultPlus ka qenë një ndër të parët që ka përcjellë lajmet për karrierën, dhe gjithnjë e kam përcjellë nga afër dhe më vjen mirë që një grua si Ardiana Pajaziti ka arritur ta sjellë në këtë nivel këtë gazetë, dhe me stafin që reflekton një harmoni që rrallë kund e sheh. Unë besoj që nga këto 5 vite, KultPlus do të ketë një jetëgjatësi edhe më të madhe”, u shpreh mezzo-sopranoja Flaka Goranci.

Pas koncertit, mezzo-sopranoja Goranci tha se u ndje shumë e kënaqur me praninë e publikut i cili arriti ta marr pjesën artistike të cilën ajo e përcolli në skenë duke sjellë një gërshetim muzikor, nga muzika operitstike, operetat, këngët dhe këngë shqiptare.

“Unë po kthehem pas dy vitesh në Kosovë, para dy vitesh kam qenë në një meshë në Katedralen “Nënë Tereza” në Prishtinë, kurse sot ka qenë një koncert solistik, jam ndjerë shumë e lumtur dhe e privilegjuar që të jem një nga artistet e përzgjedhura për për ciklin “Ta zbardhi ftyrën”. Ka qenë një koncert shumë i bukur pasi që publiku ishte i afërt. Më e rëndësishmja është kur njerëzit ndahen të kënaqur dhe marrin pjesën artistike që artisti mundohet me përcjellë tek publiku. Gjithmonë e shoh programin varësisht nga ajo se çfarë mund të kërkohet më shumë, çfarë mund të jetë më e pranishme dhe çfarë është më risi për publikun dhe në këtë mënyrë jam munduar ta sjellë këtë program që për publikun të jetë një rritje graduale dhe të ketë diçka më të re”, tregoi Goranci për KultPlus.

Pranë saj në piano e përcolli pianistja Pranvera Hoxha e cila tha që ishte kënaqësi ta përcillte në këtë koncert mezzo-sopranon Flaka Goranci, ndërsa tha se nga emocionet e publikut ishin shtysë në krijimin e gjërave edhe më interesante.

“Së pari falënderoj Ardiana Pajazitin për ftesën e cila si më ka treguar që do të jetë një mbrëmje me Flakën me kënaqësi kam pranuar, dhe pasi biseduam për repertuarin mezi e prisja, pasi që performancat me këngëtarë janë më të veçantë, pasi që kanë laramani stilesh dhe teksti përçon mesazhe dhe të bën të mëshirohesh më tepër. Flakën e njoh qysh moti dhe kemi studiuar bashkë në Shqipëri dhe më pas kur ajo vazhdoi studimet në Izrael e më pas u vendos në Vjenë, e mbaja si përgjegjësi që të dalë mbrëmja e bukur. Komentet që morëm nga publiku na bënë të ndihemi shumë mirë”, tregoi Hoxha.

Pianistja Pranvera Hoxha tha se e ka përcjellë KultPlus-in që nga hapat e parë, dhe sipas saj, është impresionuar me punën e KultPlus, pasi që shumë pak është shkruar në atë kohë për artistët e veçmas, instruminstët e muzikës klasike, pasi që fokusi ka qenë tek artistët e muzikës rep, pop, pra të muzikës më të përhapur.

“Shpesh herë prej KultPlus-it kam mësuar për ndonjë shfaqje të re dhe kam shkuar dhe tanimë që të gjithë përdorim rrjetet sociale, më ka bërë që ta zë lajmin me kohë dhe të arrij në atë ngjarje. Unë personalisht kam eksperiencë shumë të mirë dhe gjithnjë kanë qenë të kujdesshëm për punën time, uroj që të mos ndalen pasi që në Kosovë vitet e para, por edhe më tutje dinë me qenë shumë të vështira. Më emocinoi ajo që e tha Ardiana, pasi që jam nënë edhe unë, dhe një kohë të bukur që do të mund ta kaloja me fëmijët, duhet ta kalosh me dikë tjetër, dhe dikur e sheh që fëmijët janë rritur”, u shpreh mes emocionesh Hoxha.

Në mesin e të pranishmëve që kishin mbushur sallën e Amfiteatrit të Ri të Bibliotekës Universitare, ishte dhe profesoresha Lejla Pula. Ajo tha se tani që po e dëgjon Flaka Gorancin pas një kohe të gjatë, vërejti që ajo kishte edhe një zhvillim shtesë, një siguri të madhe në skenë, një bukuri të të shprehurit të kultivuar në tingull. Ajo tha se me këtë kapacitet, Goranci e ka një perspektivë akoma para vetës.

“Kam pasur gjithnjë një respekt të veçantë për Flaka Gorancin edhe për zërin e këndimin e saj jashtëzakonisht të kultivuar po ashtu dhe një prezencë shumë të madhe e të fuqishme në skenë që e krijon. Me të gjitha këto kualitete që Flaka i ka, jo vetëm me një zë të shkëlqyeshëm dhe një shkollim të mirëfilltë që Flaka e ka si këngëtare e operës, dhe tani po e zhvillon një karrierë të jashtëzakonshme jashtë kufijve të Kosovës”, tha pianistja e profesoresha Lejla Pula.

Lejla Pula tha se ajo është jashtëzakonisht e lidhur me KultPlus-in si pianiste, interprete dhe drejtoreshë artistike e festivalit “Chopin Piano Fest”.

“E kam ditur që gazeta online- KultPlus do të ketë një prespektivë të jashtëzakonshme me Ardianën, pasi që e njoh qysh herët si gazetare dhe i njoh të gjitha kualitetet e saj, pasi që ka qenë gjithnjë në nivel të detyrës, e jashtëzakonshme dhe profesionale dhe e ka mbledhur një ekip të gazetarëve entuziast, me plot vullnet për punë”, u shpreh Pula.

Tenori Luan Durmishi po ashtu ishte në mesin e të pranishmëve që erdhi për të festuar rrugëtimin pesëvjeçar të gazetës onlinë- KultPlus, e për të dëgjuar Flaka Gorancin. Ai tha që nga bashkëpunimet e para me Gorancin i ka bërë përshtypje si vokal shumë i bukur, ndërsa kësaj radhe ishte befasuese pasi që kualiteti i saj si këngëtare ka marrë premisa edhe më të mëdha, kjo ndikuar edhe nga eksperiencat dhe trajtime vokale jashtë vendit.

“Këto vepra i dëgjova në një format interpretativ shumë më ndryshe se më herët, sonte Flaka mu duk shumë më e kompletuar me këtë koncert dhe i uroj shumë suksese dhe të arrij nivel edhe më të lartë, sonteishte jashtëzakonisht bukur”, u shpreh Durmishi.
Tenori Durmishi tha që prej se është në skenë, bashkëpunimin me KultPlus-in e cilëson si më të veçantin në karrierën e tij.
“Prej se jam në skenë shkruajnë mediat dhe shkruaj për mediat por rrugëtimi me KultPlus-in është më i veçanti në karrierën time. Një platformë, një portal jashtëzakonisht i duhur për Kosovën në momentet më të duhura, një portal i cili vërtetë ka treguar tepër shumë kujdes ndaj vlerave dhe kështu ka arritur suksesin e vet. Uroj që të vazhdojë traditën, ndoshta dhe qindra vjeçare”, u shpreh Durmishi.

Ky është koncerti i parë solistik i Gorancit në Kosovë, ndërsa për KultPlusin është gjysëm dekade bashkëjetese me artistët e fushave të ndryshme e me publikun që veçse rritet, ndërsa mbrëmë shënoi edhe ciklin e dytë të rrëfimeve “Ta zbardhi Ftyrën”. / KultPlus.com

KultPlus feston me Flaka Gorancin dhe me ciklin ‘Ta zbardhi ftyrën’

KultPlus – gazeta e parë online shqiptare që i kushtohet në tërësi raportimit mbi artin dhe kulturën, këtë vit do të festojë në mënyrë të veçantë.

Pesë-vjetori i themelimit të KultPlus vjen me një koncert dhe me një diskutim simpatik nën titullin “Ta zbardhi ftyrën”.

Do të jetë Flaka Goranci ajo e cila do ta begatojë këtë natë muzikore e cila do të mbahet me datë 8 tetor, në ora 18:00 në Amfiteatrin e Bibliotekës Universitare në Prishtinë.

Flaka Goranci e nisi karrierën e saj muzikore në piano, për të kaluar më pas në këndim. Studimet e saj bachelor i përfundoi në Akademinë e Muzikës në Tiranë.

Në moshën 22 vjeçare ajo debutoi me rolin e Rosina në ‘Il Barbiere di Siviglia’ në Operën Shtetërore në Tiranë. Në Izrael, në Shqipëri e Austri ajo është paraqitur në role të ndryshme, përfshirë ‘Le nozze di Figaro’ të Mozartit, rolin e Dorabella në ‘Cosi fan tutte’, Ida në ‘Gemma di Vergy’, Dido në ‘Dido and Aeneas’ dhe Die Mutter në ‘Der Jasager’. Në mesin e dirigjentëve me të cilët ajo ka punuar numërojmë Nicolaus Harnoncourt, Erwin Ortner, Ulrich Windfuhr, Paëel Poplawski, Enrico Delamboye, Manfred Mayrhofer, Vittorio Parisi, Yishai Steckler, Gion Gieri Tuor, Zhani Ciko dhe shumë dirigjentë tjerë, njëjtë edhe me drejtorët e ndryshëm të operave, duke përmendur këtu Uwe Eric Laufenberg, Stephen Lawless, Carlos Wagner, Niv Hoffman, Andrea Zogg, Ulrich Schulz, Dani Ehrlich, Nikolin Gurakuqi dhe Michal Grover Friedlander.

Ajo është fituese e Bursës Hilde Zadek Scholarship Foundation ndërsa ka performuar në skena të mëdha botërore.

Këtë natë Flaka do të jetë edhe pjesë e “Ta zbardhi ftyrën” – një cikël ku sjellim personalitete të cilat krijojnë dhe kanë sukses jashtë Kosovës, për të na treguar për sfidat, vështirësitë dhe rrugëtimin e tyre. Titulli i debatit nuk asocon me asgjë tjetër, pos idesë se artistët kosovarë e shqiptarë mund dhe arrijnë të kenë suksese edhe në shtetet tjera evropiane ku ndoshta është i vështirë depërtimi. A ekziston ende shprehja “na e zbardhe ftyrën” dhe a veprojnë artistët bazuar në këtë thënie, do ta zbulojmë edhe me Flakën.

Nata muzikore është pa ftesa, prandaj të gjithë lexuesit e KultPlus dhe ata që e duan artin e kulturën janë të mirëseardhur në këtë natë me muzikë, me diskutim por edhe me plot art e kulturë.

Në shoqërim në piano vjen Pranvera Hoxha. Për më shumë detaje rreth koncertit na shkruani në [email protected] ose në Facebook dhe KultPlus.

Flaka Goranci fascinoi publikun e Hamburgut ku u prezantua me dy role kryesore (FOTO/VIDEO)

Gili Hoxhaj

Flaka Goranci mbrëmë ka fascinuar publikun e Hamburgut, atje ku ka interpretuar me orkestrën simfonike të Hamburgut, nën direktivën e dirigjentit Ulrich Windfuhr, shkruan KultPlus.

Përmes zërit të saj ajo ka interpretuar ariet dhe duetet e dy roleve kryesore për Mezzo-soprano, atë të Charlotte nga opera „Werther“ e kompozitorit Jules Massenet dhe atë të Carmen nga opera „Carmen“ e kompozitorit po ashtu francez George Bizet. Përkrah mezo-sopranos kosovare, ka interpretuar edhe tenori Hany Abdelzaher.

Në një mjedis të errët pranë instrumentistëve të veshur me kostume, Flaka Goranci bie fort në sy me fustanin e saj ngjyrë të kuqe, e lëvizjet plot elegancë e në harmoni më lëshimin e zërit në zbërthim të dy kryeveprave franceze. Goranci tregoi për KultPlus se kjo është hera e parë që këndon së bashku me Orkestrën Simfonike të Hamburgut, ndërsa që tani ndihet shumë e lumtur që do të kthehet për të performuar përsëri me të njëjtën orkestër në janar të vitit 2019.

“Të interpretosh me një orkestër të një niveli siç është kjo orkestër është natyrisht një kënaqësi e rrallë sepse je e shoqëruar nga muzikantë me eksperiencë të madhe dhe me një profesionalizëm të rrallë.
Koncerti i mbrëmshëm ishte një ndjesi e bukur, duke interpretuat ariet dhe duetet e mrekullueshme të dy roleve kryesore për Mezzo-soprano siç është roli i Carmen dhe ai i Charlotte, të dyja në gjuhen franceze”, tregoi ajo për KultPlus.

Orkestra simfonike e Hamburg-ut është një orkestër prestigjioze që luan me emrat më në zë të skenës klasike dhe asaj operistike.

Pas kësaj, mezzo-sopranoja kosovare do të vazhdoj drejt Zvicrës për të realizuar rolin e Carmen me premierë në datën 27 korrik e deri më 11 gusht për të përmbyllur shfaqjen e nëntë me radhë dhe të fundit për këtë festival. /KultPlus.com

Flaka Goranci interpreton me orkestrën simfonike të Hamburgut

Vetëm një ditë para fillimit të provave për rolin e Carmen në festivalin e operës në Obersaxen në Zvicer, Flaka Goranci është ftuar nga orkestra simfonike e Hamburgut të interpretoj në natën „A la Francaise“ ariet dhe duetet e dy roleve kryesore për Mezzo-soprano, atë të Charlotte nga opera „Werther“ e kompozitorit Jules Massenet dhe atë të Carmen nga opera „Carmen“ e kompozitorit poashtu francez George Bizet.

Orkestra simfonike e Hamburg-ut është një orkestër prestigjioze që luan me emrat më në zë të skenës klasike dhe asaj operistike, shkruan KultPlus.

Koncerti do të mbahet më datë 9 korrik duke filluar nga ora 19:00, në oborrin e brendshëm të komunes së Hamburgut (Innenhof des Rathaus).

Përkrahë Flakes do të interpretoj edhe tenori Hany Abdelzaher. Kurse orkestra simfonike do të drejtohet nga dirigjenti Ulrich Windfuhr. Më pas mezzo-sopranoja kosovare do të vazhdoj drejt Zvicrës për të realizuar rolin e Carmen me premierë në datën 27 korrik e deri më 11 gusht për të përmbyllur shfaqjen e nëntë me radhë dhe të fundit për këtë festival. /KultPlus.com

Një dasmë shqiptare në Pallatin Schönborn Batthyany të Vjenës (FOTO/VIDEO)

Dasmat shqiptare shumë shpesh janë bërë pjesë edhe e medieve të huaja, të cilat kanë vënë në theks shpenzimet marramendëse të nikoqirëve, numrit të madh të mysafirëve, muzikës së lartë dhe pa shije dhe të shumë elementeve që tashmë e shumë vite janë duke i shoqëruar këto gazmende familjare, që janë shndërruar në një rrëmujë të vërtetë, shkruan KultPlus.

Mirëpo, artistja shqiptare Flaka Goranci ka zgjedhur një mënyrë tjetër për dasmën e saj, e cila ka zgjedhur një ndër pallatet më të vjetra të Vjenës.

KultPlus mëson se kjo dasmë është organizuar në Palais Schönborn Batthyany të Vjenës, pallat që është i stilit barok dhe është ndërtuar në vitin 1699 mu në qendër të Vjenës.

Në këtë dasmë që nga të sapomartuarit është vallëzuar Valsi Vjenez dhe Napoloni, ka pasë edhe elemente që kanë ardhur si një gërshetim i dasmës vjeneze dhe asaj shqiptare.

Në këtë dasmë, ishin të pranishëm artistë shqiptarë dhe austriak, por edhe të nacionalitetve, sikurse që ishte i pranishëm si mysfair nderi, ambasadori i Shqipërisë në Austri, Roland Bimo./KultPlus.com

Flaka Goranci sërish sjellë rolin e Carmen, kësaj radhe në një festival në Zvicër

Fillimisht me rolin e Carmen, mezzosopranoja shqiptare Flaka Goranci u paraqit në Magdeburg të Gjermanisë, dhe mishërimi i saj në këtë rol solli edhe një tjetër paraqitje me Carmen, por tashti në Zvicër, me një realizim të ri të kësaj opere, shkruan KultPlus.

Një gjë të tillë e bëri publike nëpërmjet rrjetit social Facebook, vetë mezzosopranoja Goranci. Ajo tregoi se me këtë operë në rolin e Carmen, do të paraqitet në Zvicër në Obersaxen Opera Viva Festival.

“Te dashur miqte e mi. Jam shume e lumtur te ndaj kete lajm me ju. Kete vit do te realizoj përsëri rolin e Carmen dhe kesaj rradhe ne Zvicer – Obersaxen Opera Viva Festival”, ka shkruar Goranci./ KultPlus.com

Koncert për ditën e Dubrovnikut, me performancë edhe Flaka Goranci

Më 1 shkurt në qytetin e bukur të Dubrovnikut, mezzosopranoja kosovare Flaka Goranci, do të jetë mysafire në koncertin e organizuar për ditën e madhe të qytetit të Dubrovnikut dhe ditën e shenjtorit Vlaha.

Një gjë të tillë e ka treguar për KultPlus, vetë Goranci, duke thënë se do të interpretojë nën përcjelljen e orkestrës simfonike të Dubrovnikut.

“Pjesëmarrës të koncertit i cili do të mbahet në Katedralen e Shën Mërisë, do të jenë edhe tenori Tomislav Tuksa dhe Kori i Dubrovnikut. Dirigjent i këtij koncerti do të jetë dirigjenti kroat Frano Krasovac ndërsa koncerti do të ketë veprën premierë Oratorion nga kompozitori kroat Tomaso Resti”, pohoi për KultPlus Flaka Goranci.

Flaka Goranci këndon dy zërat solo nga kjo vepër, atë soprano dhe mezzosoprano. Poashtu, ajo do të interpretojë edhe tri pjesë solo bashkë me orkestrën simfonike, si “Ave Maria” – Caccini, “Domine Deus”-Vivaldi dhe “Laudamus te” nga kompozitori austriak Mozart.

Orkestra simfonike e Dubrovnikut ka një aktivitet të gjerë internacional, prandaj edhe për Flaka Gorancin një ftesë e tillë është e një rëndësie të madhe. Koncerti mbahet më 1 shkurt me fillim nga ora 20:00. Foto: Peter Rauchecker/ KultPlus.com

Flaka Goranci magjeps publikun austriak në sallën e famshme “Stefanienesaal” (FOTO)

Për KultPlus, Goranci, tregoi emocionet që kishte mbrëmë gjatë interpretimit para publikut austriak, dhe gjatë këtij koncerti që dirigjohej nga Svetoslav Borisov.

Gili Hoxhaj

Mezzo-soprano shqiptare Flaka Goranci, mbrëmë interpretoi në një koncert në Grazë të Austrisë. Ajo me zërin e saj ka magjepsur të pranishmit gjatë interpretimit të mbrëmshëm në sallën e famshme “Stefanienesaal”, bashkë me orkestrën “Con fuoco”.

Për KultPlus, Goranci, tregoi emocionet që kishte mbrëmë gjatë interpretimit para publikut austriak, dhe gjatë këtij koncerti që dirigjohej nga Svetoslav Borisov.

“Ishte një kënaqësi e madhe të interpretosh nën drejtimin e një dirigjenti në zë si Svetoslav Borisov. Bashkë me orkestrën “Con fuco” kemi interpretuar tri arie nga repertori operistik dhe ai i operetave. Koncerti është pritë mjaft mirë nga publiku”, ka thënë për KultPlus, Goranci.

Flaka Goranci, ka interpretuar në sallën Stefaniensaal, që është një sallë 150 vjeçare dhe është një nga sallat më me renome jo vetëm ne Graz por edhe në gjithë Austrinë, meqë aty interpretojnë emrat më të mëdhenj të muzikës klasike. /KultPlus.com

Flaka Goranci sonte me premierë, shfaqja operistike “Rusalka” do të shfaqet në Gjermani (FOTO)

Foto: Andreas Lander

“Është kënaqësi për mua që pas rolit të Carmen, të ftohem prap po nga ky teatër, tashmë për një shfaqje tjetër opersitike të rëndësishme, sic është opera “Rusalka”, ka thënë Goranci për KultPlus.

Në Teatrin e Operës në Madeburg të Gjermanisë, sonte do të shfaqet premiera e shfaqjes “Rusalka”, nga kompozitori çek Antonin Dvorak, shkruan KultPlus.


Dhe pikërisht në këtë shfaqje, mezzosopranoja Flaka Goranci do të ngjitet në këtë skenë, me rolin e Zanës së Tretë (Third wood sprite), shfaqje kjo që edhe do të shënojë hapjen e sezonit në këtë teatër.

Vetë Flaka Goranci ka shpjeguar për KultPlus se ky projekt vjen si një produksion i mrekullueshëm me regji të regjisorit anglez Stephen Lawless dhe nën dirigjimin e dirigjentit polak Pawel Poplawksi.
“Është kënaqësi për mua që pas rolit të Carmen, të ftohem prap po nga ky teatër, tashmë për një shfaqje tjetër opersitike të rëndësishme, sic është opera “Rusalka”, ka thënë Goranci.

Ndryshe, Flaka Goranci po këtë vit ka debutuar me rolin e Carmen në këtë shtëpi operistike, për të pasuar më pas edhe oferta për shfaqjen “Rusalka”./KultPlus.com

Artistët shqiptarë me koncert në Vjenë

Më 30 shtator në Vjenë do të mbahet koncerti i mbështetur nga shumë artistë që veprojnë në Austri, shkruan KultPlus.

Ky koncert i cili do ta mbahet në Ruckergasse në Vjenë, sjellë artistët shqiptar që janë Agim Llapashtica-Gima, Flaka Goranci, Menan Bërveniku, Flamur Ahmeti, Petrit Carkaxhiu dhe Fatlind Dehiri-Paja nga Jericho dhe Duo Ela- Alfred Bushi, Elizabeta Okonska dhe violinisti Ferdi Fanaj.

Ky koncert është organizuar për të mbështetur përfaqësuesin shqiptar Januz Saliuka, i cili nga radhët e partisë social-demokrate SPÖ kandidon në zgjedhjet nacionale të 15 tetorit për deputet në Parlamentin e Austrisë.

Ky koncert mbahet më 30 shtator me fillim nga ora 19:00./ KultPlus.com

Kritika e Vjenës vlerëson lartë Flaka Gorancin për rolin e Carmen (FOTO)

Fotot:Andreas Lander
Fillimisht me rolin e Carmen, mezzosopranoja shqiptare Flaka Goranci u paraqit në Magdeburg të Gjermanisë, dhe mishërimi i saj në këtë rol solli edhe një tjetër paraqitje me Carmen, por tashti në Vjenë të Austrisë, nëpërmjet kompanisë In den höchsten Tönen, shkruan KultPlus.

Kritika e botuar të mërkurën, në IOCO në Vjenë, me autor Marcus Haimerl, Flaka Gorancin e përshkruan si një figurë ideale për rolin e Carmen, ku sipas tij, jo vetëm me pikëpamje optike, por me një zë të thellë melodioz, me nota të larta dhe të forta, të sigurta dhe me një frazim të bukur muzikor, por edhe me një paraqitje komplet natyrale, ajo arrin të sjellë të gjitha aspektet e lojës, bindshëm në skenë.
Kurse vetë Flaka Goranci ka treguar për KultPlus për ndjesinë që i ka dhënë ky rol, ku sipas saj, Carmen është një ndër rolet më të bukura dhe të veçanta për mezosoprano.

Sipas saj, veçantia e këtij roli është se nëse këndon Carmen, do të thotë të duhet jo vetëm të këndosh në skenë, por edhe të kërcesh flamengo dhe të luash kastanjetat spanjolle. “Carmen është ai rol që derisa je duke kënduar, duhet edhe të kërcesh”, ka thënë Goranci.
Poashtu ajo ka shtuar detajet mbi këtë rol, ku Goranci detajon se roli i Carmen kërkon edhe një lojë aktoriale të kompletuar, ku fillon nga një vajzë çapkëne duke arritur në dramën e një ciganeje andaluziane deri ne aktin final, vrasjen nga ish i dashuri xheloz Don Jose! Flaka Goranci, të njëjtën operë do ta realizoj edhe në muajin tetor, poashtu në Vjenë./KultPlus.com