Aktorja hollivudiane, Cameron Diaz, ka gjetur “paqen” pas largimit nga aktrimi.

Diaz njihet për rolet në filmat “There’s Something About Mary”, “Charlie’s Angels” dhe “Shrek”. Por paraqitja e fundit e aktores amerikane në një film në karrierën 20-vjeçare ishte më 2014 në “Annie”.

“Kam gjetur paqen në shpirtin tim, sepse më në fund po kujdesem për vetveten”, i ka thënë Diaz yllit tjetër Gwyneth Paltrowit, në një emision së bashku. “Është e çuditshme ta them, e di se shumë njerëz s’do ta kuptojnë, e di se ti po, por është aq punë e pandalshme në nivel të tillë dhe je gjithmonë në publik”, ka shtuar 47-vjeçarja.

Diaz konfirmoi pensionimin nga aktrimi më 2018, por më vonë kishte deklaruar se nuk përjashton mundësinë e rikthimit ndonjë ditë.

Ylli shpërtheu më 1994 në komedinë “The Mask”.

Zhang Yuhan, një  burrë 53 vjeçar nga Kina  ishte shpallur fajtor për vrasjen e dy fëmijëve në vitin 1993, por ai asnjëherë nuk e kishte pranuar krimin duke apeluar disa herë radhazi vendimin e Gjykatës.

Pas një beteje  shumë të gjatë për ta dëshmuar pafajësinë  e tij, ai ka arritur që përfundimisht të mërkurën të shpallet i pafajshëm nga Gjykata kineze, raporton CNN, transmeton Klan Kosova.

Pas lirimit të tij Zhang Yuhan tha se vendimi i pa drejt i Gjykatës i ka marr atij vitet me të bukura të jetës por që shpreson se tani do të  mund të kompensojë vitet e humbura dhe të kujdeset për nënën e tij.

Ky vendim po cilësohet si gabimi me i madh në historinë e gjyqësorit kinez.

Israa Seblani ishte duke pozuar për fotosesionin e martesës së saj jo shumë larg portit të Bejrutit në Liban, në momentin kur ndodhi një shpërthim masiv të martën e që la të vdekur së paku 137 persona e më shumë se 5000 të lënduar.

Kamera që po xhironte momentet e gëzimit të Seblanit për një çast u shkund fuqishëm dhe nga pamja e nuses gjithçka u kthye në pluhur.

“Isha e shokuar, nuk e dija çka po ndodhte. ‘A do të vdes? Si do të vdes?’ Isha shumë e lumtur sikur gratë tjera. ‘Po martohem. A do të jenë të lumtur prindërit e mi të më shohin me fustan të bardhë? Do të dukem sikur princeshë dhe gjithçka tjetër’. Ndihem shumë keq për atë që u ka ndodhur të tjerëve në Liban”, është shprehur ajo.

Mosvendosja e emrit të Elizabeta Hasanit në pllakën përkujtimore në Mitrovicë, në vendin ku ajo humbi jetën më 13 mars 1999 gjatë një shpërthimi granate në tregun e qytetit, për babanë e saj, Rrahimin, është e dhimbshme.

“Më dhemb zemra, beso. Duhet të dihet kush është duke pushuar aty. Duhet t’ia vendosin emrin dhe mbiemrin, të dihet kush është duke pushuar, se kështu pa emër, si e panjohur. Kur e ka emrin aty, edhe mua zemra më pushon, më vjen më lehtë. A kështu po më duket keq, shumë keq”, thotë Hasani në një bisedë për Radion Evropa e Lirë.

Më 13 mars të këtij viti, Komuna e Mitrovicës ka zbuluar pllakën përkujtimore për viktimat që pësuan pas shpërthimit në treg në vitin 1999. Aty vdiqën 7 persona dhe u plagosën 128 të tjerë. Në pllakën përkujtimore u shkruan vetëm 6 emra, por jo edhe emri i shtatë, që ishte vajza 5-vjeçare e një familjeje rome. Nga komuna kanë deklaruar se ky lëshim ka ndodhur për shkak të mungesës së informatave.

Babai i saj, Rrahimi, në atë kohë ishte në Itali. Tash është pensionist dhe jeton në Podgoricë. Pos Elizabetës, gjatë këtij shpërthimi është lënduar rëndë edhe vajza tjetër.

“Bashkëshortja, e cila ndërkohë ka ndërruar jetë, më ka treguar se ajo ka dashur të blejë djathë dhe i ka lënë fëmijë aty në një qoshe. Njëra vajzë ishte e plagosur në të dy këmbët prej asaj bombe, ndërsa Elizabeta ka vdekur në vend”, tregon Hasani.

Viktimat po harrohen në mungesë të dokumentacionit

Dy dekada pas luftës së fundit në Kosovë, vërehen pasojat e dëmshme të mungesës së dokumentacionit të duhur për viktimat e luftës së viteve 1998-1999.

Elizabeta Hasani e lindur më 4 maj 1994, është vetëm një nga viktimat që është harruar.

Me mosdokumentimin e ngjarjeve të luftës, sipas analisti ligjor në Fondin për të Drejtën Humanitare, Amer Alija, ekziston rreziku të harrohen edhe raste të tjera.

“Normalisht që një harresë e tillë ka të bëjë me dokumentimin e mangët dhe në këtë mënyrë krijohet një narrativë jo e saktë dhe gjeneratat e reja nuk do të kenë informatat sakta së çfarë ka ndodhur në atë rast nëse bazohen vetëm në përshkrimin e pllakës”, thotë Alija.

Sipas tij, shteti asnjëherë nuk është marrë me këtë masakër që kishte ndodhur në Mitrovicë.

“Familja sigurisht kërkon edhe drejtësi. Duhet të hapet edhe një procedurë gjyqësore nëse Prokuroria arrin të zbulojë personat që e kanë vendosur atë eksploziv në treg. Sipas informacioneve tona, dy dekada nga përfundimi i luftës, nuk ka pasur një procedurë gjyqësore lidhur me këtë ngjarje”, thotë Alija.

Komuna e Mitrovicës zotohet se do të shkruhet edhe emri i Elizabetës

Nënkryetari i Komunës së Mitrovicës, Faruk Mujka, thotë për Radion Evropa e Lirë se emri i Elizabeta Hasanit do të shkruhet në pllakën përkujtimore.

Kjo do të ndodhë, sipas tij, pasi të kontaktojnë familjen e saj dhe të shikojnë nëse ka edhe ndonjë viktimë që të mos përsëritet gabimi dhe të harrohet dikush tjetër.

“Gabim ka qenë, por i paqëllimshëm. Në mungesë të informatave, në mungesë të shënimeve zyrtare ka ndodhur shtypja e gjashtë emrave që kanë figuruar në Këshillin për të Drejtat e Njeriut në Mitrovicë dhe në Zyrën Rajonale për viktimat e luftës. Bazuar në të dhënat e tyre, ne kemi shtypur këta gjashtë emra”, thotë Mujka.

Deputetët e Kuvendit të Kosovës, Albert Kinolli dhe Veton Berisha, që vijnë nga radhët e komunitetit rom dhe egjiptian, kanë thënë se është e papranueshme mospërfshirja e emrave të komunitetit rom dhe egjiptian në pllakat përkujtimore.

Gjatë luftës në Kosovë humbën jetën rreth 13,500 persona, ndërsa 1,600 ende konsiderohen të pagjetur./REL/ KultPlus.com

Facebook dhe Twitter kanë penalizuar presidentin e SHBA-së Donald Trump dhe kampanjën e tij për postime në të cilat presidenti deklaron se fëmijët janë “pothuajse imun” ndaj koronavirusit.

Facebook ka hequr postimin, që ishte pjesë e videos nga një intervistë që Trump kishte bërë për Fox News, duke thënë se përmban “dezinformata të dëmshme rreth Covid-19”.

Twitter bëri të njëjtën gjë duke thënë se kishte pezulluar një llogari të kampanjës së Trumpit deri sa nuk te hiqej pjesa e njëjtë e videos, shkruan BBC.

Këshillat e shëndetësisë publike të SHBA-së e bëjnë të qartë se fëmijët nuk kanë imunitet ndaj Covid-19.

Një zëdhënës për Facebook tha të mërkurën mbrëma: “Kjo video përmban të dhëna të rrejshme se një grup i njerëzve është imun ndaj Covid-19, gjë që shkelë rregullat tona për ndalimin e dezinfomatave të dëmshme lidhur me Covid-19”.

Kjo është hera e parë që ky gjigand i platformës sociale ka ndërmarrë veprim kundër postimeve nga presidenti për shkak dezinformatave lidhur me koronavirusin.

Edhe Twitter të mërkurën mbrëma ka thënë se ka ngrirë llogarinë TeamTrump sepse kishte postuar të njëjtën pjesë të intervistës, transmeton KOHA.

Një zëdhënës i Twtterit tha se postimi i TeamTrump “shkelë rregullat e Tëitterit mbi dezinformatat rreth Covid-19”.

“Pronari i llogarisë duhet të heqë postimin para se të mund ta përdorë sërish”, ka thënë kjo platformë.

Në këtë intervistë Presidenti Trump në rrjetin televiziv Fox të mërkurën kishte thënë se është koha të hapen shkollat në tërë shtetin.

Ai tha: “Nëse i shikoni fëmijët, ata janë pothuajse, dhe mund të them definitivisht, imun nga kjo sëmundje”.

Në Kamenicë sot është mbajtur takimi i udhëheqësve të komunave të Regjionit të Anamoravës. Me këtë rast kryetari i Komunës së Kamenicës Qëndron Kastrati dhe ai i Gjilanit Lutfi Haziri kanë nënshkruar marrëveshje bashkëpunimi, ku nga shtatori dega e shkollës së muzikës do të jetë edhe në Kamenicë.

Kryetari i Kamenicës, Qëndron Kastrati tha se sot u diskutua për menaxhimin e pandemisë dhe situatën në rajonin e Gjilanit.

“Diskutuam e para për menaxhimin e pandemisë dhe rreth situatës në komunën tonë. Ne do të vazhdojmë të nënshkruajmë me kryetarin e komunës së Gjilanit një marrëveshje ku shkolla e muzikës do të hapet në Kamenicë me ndihmën e komunës së Gjilanit. Kjo është ajo që na duhet gjatë një kohë pandemie ku të gjithë duhet të jemi së bashku dhe ta ndihmojmë njëri- tjetrin”, tha ai.

Kryetari i Komunës së Gjilanit, Lutfi Haziri, ka thënë se Gjilani dhe Kamenica janë duke bashkëpunuar gjatë tërë kohës, pasi që sipas tij problemet janë të njëjta ani pse në territore të ndara.

“Koordinimi jonë për bashkëpunim komunal, në zgjidhjen e problemeve për arsim dhe bashkëpunimi ynë në segmentin e infrastrukturës, rregullimi i kufijve administrativë në mes të komunave, çështja e problemeve lokale dhe ekonomike, së fundi ne e kemi një treg të përbashkët për ekonominë private në komunën tonë. Dhe ka edhe shumë çështje tjera për të cilat e ndihmojmë komunën tonë dhe njëri-tjetrin… Ne i kemi problemet e njëjta në territore të ndara në aktivitete dhe detyra. Por problemet i kemi të njëjta, duke filluar prej buxhetit e deri tek investimet të buxhetit për çështje të caktuara me të cilat duhet të përballemi çdo ditë”, ka thënë Haziri.

Për këtë bashkëpunim kanë qenë falënderues edhe kryetari i Ranillugut, Vladica Artinoviq dhe ai i Novobërdës, Vetislav Ivanoviq. Koha.net / KultPlus.com

Organizatat ETEA dhe The Library Project Kosova sot kanë nënshkruar Memorandume Bashkëpunimi me drejtorët e Drejtorive Komunale të Arsimit të Komunës së Prishtinës, Gjilanit dhe Obiliqit. 

Në Qendrën për Edukim dhe Kulturë “Libart” ku gjendet edhe “Biblioteka Qarkulluese”, drejtori i organizatës ETEA, z. Agon Ahmeti së bashku me stafin e projektit “Biblioteka Qarkulluese me strategjitë e lexim-kuptimit”, priti në një takim miqësor drejtores e arsimit të Komunës së Prishtinës, znj. Shpresa Shala, drejtorin e arsimit të Komunës së Gjilanit, z. Nazim Gagica dhe drejtorin e arsimit të Komunës së Obiliqit, z. Rexhep Zeka.

Në këtë takim u nënshkruan Memorandumet e Bashkëpunimit  për ndarjen dhe koordinimin e përgjegjësive më rastin e shtrirjes së projektit “Biblioteka Qarkulluese më strategjitë e lexim-kuptimit” në shkollat kampione të komunave të lartëcekura, projekt ky i cili është inicuar nga  organizata The Library Project – Kosova me seli në Stokholm dhe implementuar në bashkëpunim me organizatën ETEA dhe me mbështetjen e GIZ Kosovo në emër të Qeverisë Gjermane.

Drejtori i ETEA-s, z. Agon Ahmeti u shpreh se projekti deri në këtë fazë po ecën mirë dhe po mirëpritet nga mësimdhënësit dhe shkollat përfituese. Ai shtoi se ky projekt është një mundësi tejet e mirë për të gjitha shkollat që kanë fonde të varfëra të librave apo që nuk kanë fare biblioteka shkollore, pasi “Biblioteka qarkulluese” mundëson furnizimin e vazhdueshëm me libra, dhe atë me libra cilësor. Mbi të gjitha ai vlerësoi se udhëzuesit e mësimdhënësve për strategjitë e lexim-kuptimit që do të shpërndahen së bashku me librat në shkolla, do të mundësojnë zhvillimin e mendimit kritik dhe analitik tek fëmijët, diçka që sipas rezultateve të testit PISA mungon ndër nxënësitkosovarë.

Drejtoresha e Drejtorisë Komunale të Arsimit në Prishtinë, znj. Shpresa Shala shtoi se qysh në fillim ka qenë e fascionuar nga ideja se si duhet fëmijët të udhëzohen nga mësimdhënësit që ta kuptojnë atë që janë duke e lexuar. Ajo potencoi përvojën e mirë të mësimdhënësve të shkollave të Prishtinës që kanë aplikuar strategjitë e lexim-kuptimit paraprakisht, përvojë kjo që e ka nxitur të jep kontributin e vet në zgjerimin e projektit edhe më tej.

E koordinatorja e The Project Library Kosova, znj. Gresa  Haxhimusa theksoi pikat kryesore të memorandumit duke thënë se këto momorandume janë të lidhura specifikisht me aktivitetet e projektit. Ajo kërkoi mbështjetjën e drejtorëve që Orët e Leximit  të  integrohen në dy orë obligative brenda javës. Znj. Haxhimusa, po ashtu tha se do të vlerësonin nëse komunat ndajnë ndonjë shumë simbolike që të blihen libra për çdo vit në mënyrë që Biblioteka Qarkulluese të pasurohet edhe më tej me tituj librash.

Z. Rexhep Zeka, drejtor i Drejtorisë së Arsimit në Komunën e Obiliqit tregoi se ata janë bashkëpunues me çdo organizatë joqeveritare dhe se i kanë dyert e hapura për të gjtihë akterët që kanë synim dhe qëllim ngritjen e nivelit të arsimit. 

Më tej, zyrtarja e projektit, znj. Anita Tahiri njoftoi se projekti do të shtrihet gjithsej në shtatë komuna të Kosovës, dhe brenda javës së ardhshme do të nënshkruhen memdoranumet e bashkëpunimit më drejtorët e Drejtroive të Arsimit në komunat e Prizrenit, Gjakovës, Podujevës dhe Shtimes. 

ORCA thotë se e dënon emërimin në mënyrë jotransparente të anëtarit të ri të Këshillit Shtetëror të Cilësisë Binak Beqaj. Dje u raportua se Likaj, ka emëruar Binak Beqajn anëtar të KSHc-Së.

ORCA shprehet e shqetësuar me, siç thotë ajo, “komoditetin e Beqajt për të deklaruar në medie se është anëtar i AAK-së”.

“E po ashtu me komoditetin e ministrit plagjiator të Arsimit Ramë Likaj për të bërë emërime politike. Për më tepër, në vështrimin tonë të parë të punës shkencore të anëtarit të ri të KShC-së, del se është nën mesataren e profesorëve të Universitetit të Prishtinës”, thueht në reagimin e ORCA-s.

Në anën tjetër, thotë ORCA, “ministri plagjiator, përmes anëtarëve të vet në Këshillin Drejtues të UP-së e ka bllokuar procesin e zgjedhjes së rektorit pasi ka dështuar tentativa e parë për kapje të pozitës së rektorit përmes Zenun Halilit, i cili doli se ka konflikt interesi”.

“Kalendari i procesit për zgjedhjen e rektorit është anashkaluar për t’u orvatur që përmes Agjencisë Kundër Korrupsion apo në ndonjë formë tjetër, të prishet i tërë procesi ashtuqë Halili të zëvendësohet me një kandidat tjetër nga radhët e partisë së ministrit plagjiator. Ministri plagjiator nuk po ndalet dhe ka vazhduar me tentativën e radhës për kapje institucionale duke emëruar në Këshillin Shtetëror të Cilësisë një anëtar tjetër të AAK-së në mënyrën më jotransparente, madje duke mos e shpallur vet emërimin, por duke u zbuluar nga mediet siç ndodh rëndom me klandestinime të tilla”, thotë ORCA.

Kësisoj ORCA i bën thirrje shoqërisë kosovare për mobilizim, në veçanti OJQ-ve dhe aktivistëve, që të ndalet degradimi i mëtejmë i arsimit.