Ledian Shala, është shpallur fitues i çmimit të parë në Konkursin Ndërkombëtar të Muzikës 2021, të organizuar në Londër, shkruan KultPlus.
Lajmi u bë i ditur nga mentori i tij, Agron Shujaku, i cili përmes një statusi në rrjetin social Facebook, njoftoi ndjekësit e tij duke theksuar poashtu se ndjehet tejet i lumtur me suksesin e studentit të tij.
‘Jam i lumtur të ju njoftoj se studenti im Ledian Shala fitoi çmimin e parë të Konkursit Ndërkombëtar të Muzikës 2021 – “London” Grand Prize Virtuoso – me ftesë për debutim në Elgar Room, Royal Albert Hall në sezonin e ardhshëm 2021-2022’, shkruan Shujaku. / KultPlus.com
Fjala e urtë “mençuria vjen me moshën” është mjaft e saktë. Gjërat që mësoni gjatë përvojës tuaj të jetës ju mësojnë se si të gjeni lumturinë e vërtetë dhe ju tregojnë se çfarë ka me të vërtetë rëndësi.
Në mesin e atyre që kanë jetuar jetë të gjatë dhe të frytshme, mund të zbuloni shumë të vërteta dhe mençuri me të vërtetë depërtuese.
Këtu janë 18 copëzat e mençurive të thella nga njëqindvjeçarët. Gjithçka që duhet të dini për të jetuar një jetë të lumtur, mund ta gjeni këtu.
Në një postim në Reddit, një djalë i ri shkroi se donte që njerëzit t’i bënin pyetje në lidhje me jetën e gjyshes së tij 101-vjeçare. Këtu janë disa nga përgjigjet e saj:
– Cila është një këshillë që dëshironi t’ia jepni dikujt në të njëzetat?
“Mos u dorëzoni kurrë. Jeni të rinj dhe do të ketë kohë të vështira përpara. Mos u dorëzoni. Mos e bëni kurrë.’
– Cili është mësimi më i madh që keni mësuar?
‘Bëhu i sinqertë. Rrallë kam gënjyer. Dhe kur jeni të sinqertë me njerëzit, ajo kthehet tek ju dhe ata janë të sinqertë me ju. Kërkon shumë punë për të ushqyer vazhdimisht një gënjeshtër, nuk ju duhet stres shtesë.’
– Ndonjë këshillë për t’i kaluar të 100-at?
‘Dëgjo gjithmonë personin tjetër. Do të mësosh diçka. Mundohuni të uleni dhe të dëgjoni, sepse do të mësoni shumë më tepër duke dëgjuar të tjerët sesa duke u treguar atyre se çfarë dini.’
– Cila është një përvojë që do t’i rekomandonit absolutisht të gjithëve që duhet ta bëjnë një herë në jetën e tyre?
‘Shihni sa më shumë që të mundeni nga bota!
– Ndonjë sekret të mençur që mund të ndani, për shëndetin, që mendoni se mund të na ndihmojë të keni një jetë kaq të gjatë (dietë, stërvitje, gjenetikë, etj.)?
‘Bëni një sy gjumë çdo ditë’.
– Autori Bel Kaufman ishte 100 vjeç kur foli në Kolegjin Iona. Cilët janë përbërësit për një jetë të lumtur? Humori dhe pasioni.
‘Humori është një forcë jete, një mënyrë për të mbijetuar ndaj vështirësive të të jetuarit.
‘Unë mendoj se njerëzit duhet të jenë kuriozë. Ata duhet të interesohen për jetën jashtë dhimbjeve të tyre të mëdha dhe të vogla. Ata duhet të jenë të entuziazmuar kur shohin gjëra të reja, takohen njerëz të rinj, shikojnë një shfaqje të re – thjesht të apasionuar pas jetës. ‘
‘Nuk më intereson se për çfarë jeni të apasionuar: mbase për të koleksionuar pulla. Por nëse e bëni atë me pasion, ju jeni gjallë.
104 vjeçari Dr Shigeaki Hinohara është autori i Living Long, Living Good, ai ndau me lexuesit këshilla të shkëlqyera për jetën:
‘Mos nxitoni për të mbledhur gjëra materiale. Mos harroni: Ju nuk e dini cili është çasti juaj dhe nuk mund t’i merrni me vete në botën tjetër.’
‘Dhimbja është misterioze, dhe argëtimi është mënyra më e mirë për ta harruar atë ’.
‘Frymëzimi im është poema e Robert Browning “Abt Vogler”. Ma lexonte babi im. Ajo na inkurajon të bëjmë art të madh, jo shkrime të vogla. Ajo thotë që të përpiqemi të bëjmë një rreth aq shumë të madh sa nuk ka asnjë mënyrë që ta përfundojmë sa të jemi gjallë. Gjithçka që shohim është një hark; pjesa tjetër është përtej vizionit tonë, por është aty në distancë.’
Elsa Bailey festoi 100 vjetorin e lindjes duke bërë ski në Kolorado. Ajo i tha ABC News disa gjëra që ajo ka mësuar dhe të cilat i kanë dhënë nxitje për të vazhduar.
‘Nëse jeni pozitiv, mund t’ia dilni, mirë. Kur mendoni negativisht, ju jeni duke helmuar trupin tuaj. Vetem buzeqeshni. Thonë se e qeshura është shëruesi më i mirë që ekziston. ‘
‘Behu aktiv. Unë i bëj gjërat në mënyrën time, si për shembull shkoj për ski kur jam 100 vjeçe. Askush tjetër nuk e bën këtë edhe nëse ata kanë energji. Dhe përpiqem të ha mjaft mirë, si dhe të bëj stërvitje dhe ajër të pastër dhe diell. ‘
Kjo njëqindvjeare ndau ato që ka mësuar në 100 vitet e kaluara të jetës së saj.
‘Udhëtoni ndërsa jeni të rinj dhe të aftë. Mos u shqetësoni për paratë, thjesht bëjeni të funksionojë. Përvoja është shumë më e vlefshme se mund të jenë ndonjëherë paratë . ‘
‘E vetmja gjë që është konstante është ndryshimi, kështu që duhet të mësoni ta përqafoni atë.’
‘Një ditë do të kuptosh që ke harxhuar shumë kohë duke u shqetësuar për asgjë.’
‘Unë nuk po them se duhet të praktikoni një fe ose një tjetër, ose të mos praktikoni një fe ose një tjetër … Unë thjesht po them që duhet të kuptoni se në çfarë besoni dhe ta jetoni plotësisht’.
‘Mos e merrni jetën aq seriozisht.’ / KultPlus.com
Kryeministri Edi Rama inspektoi sot qendrën e rilindur historike në Vlorë ku theksoi se, “kjo qendër po rijetëzohet nga bizneset që hapen njëra pas tjetrës dhe ku së shpejti do të hapë dyert edhe Muzeu Hebraik. Ndërkohë që po punojmë për projektin e transformimit të karabinasë së lashtë të “Sulos” në një qendër inovacioni digjital për të rinjtë, kulture, arti e hapësirash për të gjitha moshat”.
I shoqëruar nga ministrja e Kulturës , Elva Margariti dhe kryetari bashkisë Vlorë, Dritan Leli, kryeministri Rama u shpreh se “kjo vepër do të kthehet në objekt publik, e cila do të ketë disa komponentë dhe një komponent kryesor, qendra për gjithë proceset e IT për të rinjtë. Në mënyrë që të krijojmë rrjetin e inovacionit që e kemi nisur në Tiranë me Tumon, me Korçën që është avancuar edhe me bibliotekën e re, dhe Vlorën ku kemi një aset fantastik që mund të transformohet dhe t’i japin mundësi të rinjve të kenë akses në këtë aktivitet me procese ultra inovative trajnimi, me aktorë që kemi kontakt, dhe të hyjnë në kontakt me shërbimet globale online, si një mundësi e mirë për punësimin e tyre dhe të kenë paga që shkojnë nga 1 mijë euro në vitin e parë deri në 5-6 mijë euro në varësi të kapaciteteve të shërbimeve që kryejnë”
Kryeministri e cilësoi investimet në drejtim të inovacionit si të ardhmen e brezit të ri që ofron mundësi punësimi.
Duke u ndalur në hapësirën e madhe që ofron objekti “Sulo” Rama tha se, “nuk diskutohet hapësira për të moshuarit, për fëmijët, hapësira publike që ofrojnë mundësi të shumta edhe për qytetarët dhe në të njëjtën diskutuar për një çarje të objektit që është shumë i gjatë, për të krijuar një korridor, si galeritë që janë jashtë vendit, duke bërë një ndërlidhje me pazarin dhe sheshin jashtë, për te realizuar kështu një “zemër” të rëndësishme zhvillimi ekonomiko-social”.
“Kemi diskutuar edhe për mbylljen e trafikut në këtë zonë dhe investime për ristrukturimin e sheshit, ndërsa lidhja me shkallaret e varrezave të dëshmoreve dhe monumentin e Pavarësisë, do të sjell një konceptim të ri të pjesës hyrëse bashkë me rivlerësim e zonës arkeologjike dhe minibulevardin e krijuar”, tha Rama. /atsh / KultPlus.com
Një video është bërë ‘hit’ në internet ku pretagoniste kryesore është Angela Merkel.
Gjatë një seance parlamentare, Merkel ka harruar maskën në foltoren e Kuvendit dhe pasi e ka kuptuar është ngritur nga karrigia me nxitim për ta marrë.
Ngjarja ka ndodhur disa ditë më parë kur Merkel foli para Bundestagut, duke bërë autokritikë mbi kohën e reagimit ndaj përhapjes së COVID-19 në Gjermani.
“Ne nuk e bllokuam jetën publike mjaft herët, ndërsa kishte shenja të një vale të dytë dhe paralajmërime nga shkencëtarë të ndryshëm”,- tha Kancelarja në 11 Shkurt.
Pasi mori maskën, kancelarja u rikthye sërish në vendin e saj, por videoja është bërë virale. / KultPlus.com
15 vite më parë u nda nga jeta piktori i njohur shqiptar Kel Kodheli, autori i pikturave të njohura si “Vallja e shpatave” ,”Shote Galica”, “Bajram Curri”, “Dropullitja”, “Skënderbeu”. “Lahutari”, “Portret shkodraneje”.
Në kohë e fundit para se të ndahej nga jeta, Kel Kodheli u muar edhe me pikturë moderne.
Ai lindi më 24 dhjetor 1918 në katundin Kodhel të Lezhës. Kur kishte 6 vjeç, familja e tij vendoset në Tiranë. Pas kryerjes së shkollës fillore në vitin 1933, Keli vazhdoj shkollimin e mesëm teknike por ndoqi kurset e vizatimit nën drejtimin e Odhise Paskalit e të Lasgush Poradecit.
Prindërit e tij babai Gega dhe nëna Eile, kishin dëshira kontradiktore për arsimin e mëtejshëm të djalit të tyre. Babai donte inxhinierinë, ndërsa nëna pikturën. U bë që Kel Kodheli të vazhdoj studimet në Romë në atelienë e Karlo Silvierës. Nga Roma kthehet në vitin 1943 dhe 10 vite punon në Bankën Kombëtare, si modelues.
Me 17 prill të vitit 1945 hapi ekspozitën e parë, titulluar “Nëna e dëshmorit” bazuar në pikturën e tij që e pat pikturuar “Gruaja që i ka vdekur burri”. 20 vjet punoi si edukator në Lice (Gjimnaz) për të dalë në pension si mësues i një shkolle fillore, edhe pse me Akademi të Arteve të Bukura të Romës.
Më 24 dhjetor 2003, Presidenti i asaj kohe Aleksandër Moisiu, në shtëpinë e tij Kel Kodhelit i dorëzon çmimin e “Piktorit të Merituar”. Në Galerinë Kombëtare të Arteve, në fondin e sajë, ruhen 12 kompozime dhe 11 portrete të piktorit Kel Kodheli. / KultPlus.com
Hapet ekspozita “Nothing like home” me Blerta Hashani, Arbnor Karaliti, Brilant Milazimi, Dardan Murseli, Valdrin Thaqi & Ermir Zhinipotoku
E titulluar pas pikturës së Brilant Milazimit, ekspozita në grup “Nothing like home” mbledh gjashtë pozicione nga brezi i ri i artistëve kosovarë që janë të lidhur me kolektivin “Hap” ose duke qenë pjesë e tij ose duke qenë bashkëpunëtorë / miq të ngushtë *
Piktura e Milazimit “Nothing like home” është si shëmbëlltyrë e peizazhit politik dhe shoqëror në Kosovë. Artisti përdor metaforën e krokodilëve që fshihen, sepse ata nuk gjuajnë në mënyrë aktive për ushqim, por përkundrazi me plogështi qëndrojnë në pritje të preve të tyre, duke parashikuar që ajo të bëjë një gabim. Kjo metaforë aludon në organet në pushtet, të cilët nuk krijojnë në mënyrë aktive, por pasivisht presin që dikush tjetër të bëjë një gabim, i cili nga ana tjetër shfrytëzohet për shkatërrimin e këtij të fundit. Fluturat dhe lepuri në skenë ndezin nocione shprese dhe lirie, por njëkohësisht dikush është i vetëdijshëm se ata do të rrëmbehen nga krokodilët çdo sekondë.
Brenda kësaj ekspozite ekzistojnë disa metafora – edhe të paqëllimshme – qofshin çorapet e mbushura pa kokë të ngjashme me njeriun që lëvizin në ritmin e një fshirësi të xhamave nga Dardan Murseli; Dora robotike e Valdrin Thaqit duke numëruar rruaza (Tespih); shkrimi i automatizuar pa kuptim nga Blerta Hashani; Zogjtë e Arbnor Karalitit nga seria e tij e fëmijërisë; Silueta e Ermir Zhinipotokut si macet; ose qentë endacakë, krokodilët ose lulet e Brilant Milazimit.
Brilant Milazimi, Dardan Murseli, Valdrin Thaqi, Ermir Zhinipotoku janë bashkëthemeluesit e kolektivit “Hap”, i themeluar nga katër miqtë gjatë studimeve të tyre në 2018. “Hap” përkthehet në “të shkel”, “në të hapura ”dhe“ pilula ”në të njëjtën kohë dhe ishte menduar si një mjet për të reaguar ndaj ngjarjeve në Kosovë, qoftë përmes ekspozitave apo ngjarjeve.
Ekspozita është e hapur deri me 10 Prill, çdo të shtunë deri të dielën nga 14:00-18:00 dhe me termine. / KultPlus.com
Në kuadër të kurimit të së shkuarës, Autoriteti për Informim mbi Dokumentet e ish-Sigurimit të Shtetit kujton 19 shkurt të vitit 1951, bombën e cila u vendos në Ambasadën Sovjetike, ku u pushkatuan pa gjyq 22 intelektualët, 68 vite më parë.
Në datën 19 shkurt të vitit 1951, në orën 18.00 pranë Ambasadës së Bashkimit Sovjetik në Tiranë, shpërtheu një lëndë eksplozive. Ngjarja që njihet si bomba në Ambasadën Sovjetike, u përdor si pretekst për ekzekutimin e kundërshtarëve të regjimit.
Një javë më pas, mesnatën mes 25 dhe 26 shkurtit, 22 intelektualë të vendit, nxirren nga qelitë e burgut të lidhur në pranga dhe vihen në një kamion që ka marrë udhën për nga Ndroqi. Banorët e zonës kanë parë gjatë atyre ditëve të hapet një gropë e madhe në Mënik, afër Urës së Beshirit. Rreth orës 12:30- 1:00 të natës dëgjohen breshëri armësh dhe britma. Britmat e një gruaje. (Thuhet të ketë qenë Sabiha Kasimati).
Atë natë, banorët nuk e dinin se jetët që fikeshin qenë pushkatime pa gjyq. Njëri prej tyre që u ndërrua me ushtarët orët e para të 26 shkurtit, u porosit të hapte fjalën se qenë ekzekutuar kuaj të lodhur. Të nesërmen, kryetari i këshillit të fshatit kaloi për të parë ç’kishte ndodhur dhe pa të shpërndara këpucë e rroba. Duke qenë se trupat e pajetë nuk ishin mbuluar mirë dhe pranë varrit të pamatë afroheshin qentë, ai njoftoi eprorët se çfarë po ndodhte. U porosit të heshtte. Disa ditë më vonë, një ekskavator e rrafshoi vendin.
Pavarësisht porosive, banorët e zonës ishin të vetëdijshëm se breshëritë e shpeshta në errësirë, britmat dhe lëvizjet e kamionëve netëve pranë urës, nënkuptonin jetë të humbura. Pronarët e truallit e kishin lënë me amanet që ajo tokë aty të mos përdorej kurrë për gjë tjetër, veçse për të mbjellë pemë. Ata e dinin që atje kishte varre të panumërta të pushkatuarish nga diktatura.
Eshtrat e 22 intelektualëve që u ekzekutuan në shkurtin e vitit 1951, u gjetën nga ngulmimi i Hysen Shehut, djalit të njërit prej viktimave.
Më 1993, ai mundi të mbledhë informacione të dëshmitarëve dhe banorëve të zonës, si familja e ish-kryetarit të këshillit të fshatit, Kadri Hysa. Me identifikimin e vendit, pas 6 muajsh gërmime, në 5-6 gropa, u has në një unazë që shënjoi lidhjen me të pushkatuarit për bombën në Ambasadën Sovjetike. Në qershorin e vitit 1993 u krye zhvarrimi i tyre dhe më pas rivarrimi në varrezat e Dëshmorëve të Kombit. Sot, në nderim të tyre, një rrugë mban emrin “26 shkurti”.
Me propozim nga AIDSSH, Presidenti ka vlerësuar me titullin “Për Merita të Veçanta Civile” Kadri Hysën, Faslli Hysën, Gëzim Mullajin, Aleksandër Dhimën, Hysen Shehun dhe Osman Kacelin, si dëshmitarë dhe kontribues të zbulimit, gjetjes dhe vënies në vend të drejtësisë për 22 intelektualët e pushkatuar pa gjyq 70 vite më parë. / KultPlus.com
Nesër në orën 19:00, në Teatrin Kombëtar do të jepet premiera e shfaqjes ‘Minotauri’, një shfaqje që shpalos 32 vjetorin e grevës së minatorëve të Trepçës, shkruan KultPlus.
Ngjarja zë vend në Prishtinë, në vitet 1989-1990.
‘Minotauri’ është shkruar nga Vjollca Dibra, nën regjinë e Albana Krasniqit ndërsa dramatizimi nga Ilir Muharremi.
Në shfaqje do të luajnë: Kosovare Krasniqi, Vjollca Hoti-Selimi, Arben Bajgora, Avdi Gërvalla, Ilir Muharremi, Rion Selmani. / KultPlus.com
Këngëtarja ka marrë vëmendjen edhe të mediave të huaja me veshjen tradicionale.
Rita Ora festoi Ditën e Pavarësisë së Kosovës të mërkurën derisa kishte zgjedhur veshje tradicionale për të shënuar 13 vjetorin, kështu e nis artikullin e saj Dailymail.
Këngëtarja e cila ka lindur në Prishtinë ku është Kosova, shkoi në Instagram dhe shpërndau një seri fotografish në veshjen e saj të cilat i veshi për videoklipin “Big”.
Veshja e Ritës përbëhej nga një fustan i zi me mëngë të gjata me qëndisje prej ari dhe një pëlhurë buzë të palosur.
Ajo gjithashtu kishte veshur një këmishë të bardhë me geta të përshtatshme së bashku me një kokë ekstravagante kuq e zi. Rita kishte veshur edhe çizme blu të errëta me detaje lesh artificiale dhe doreza të kuqe të ndezura ndërsa pozonte së bashku me disa gra të tjera me veshje tradicionale, vazhdon tutje DailyMail.
Krahas fotografive, ajo shkroi: “Gëzuar Ditën e Pavarësisë Kosova !!!” së bashku me një mesazh në shqip duke shkruar: “Urime 13 vitet e pavarësisë sonë në Kosovë!”.
Kosova është vendi i dytë më i ri në botë dhe më i ri në Evropë, duke shpallur pavarësinë e saj nga Serbia në shkurt 2008.
98 nga 193 shtete anëtare të Kombeve të Bashkuara dhe 22 nga 27 shtete të Bashkimit Evropian e njohin Kosovën, ndërsa qeveria e Serbisë jo.
Rita lindi nga prindër shqiptarë në atë kohë ishte Jugosllavia, me prindërit e saj që largoheshin nga rajoni për shkak të persekutimit të shqiptarëve.
Ylli më parë foli për “Vogue Arabia” se si ishte që familja e saj të mbërrinte në Londër dhe të fillonte një jetë të re vetëm një vit pasi ajo lindi.
Duke kujtuar ngjarjen, ajo tha: “Ata lanë tërë jetën e tyre dhe u desh të fillonin nga e para kur mbërritën në Londër si refugjatë. Por mbrojtja ndaj nesh ishte përparësia e tyre kryesore dhe unë numëroj bekimet e mia çdo ditë që ata bënë atë që duhej”.
Duke shpjeguar pse prindërit e saj zgjodhën qytetin, Rita tha: “Ata zgjodhën Londrën sepse babai e donte muzikën dhe kulturën, por edhe më tej, siç mund ta imagjinoni, adoptimi i një jete të re ishte jashtëzakonisht e vështirë.”
Rita vazhdoi të shpjegojë se si ishte jeta duke u rritur në Londër dhe pretendoi se e pa atë të vështirë për shkak të paragjykimit që rrethoi refugjatët.
Ajo zbuloi: ‘Unë shpesh quhesha refugjat në një mënyrë nënçmuese, megjithatë, kisha shumë miq të huaj dhe të gjithë kemi kaluar një kohë të shkëlqyeshme duke qenë ndryshe”, ka thënë këngëtarja, përfundon Dailymail. /Lajmi.net/ KultPlus.com
Pas paralajmërimeve të shumëta për filmin e shumëpritur ‘Cruella’, në kanalin zyrtar të Walt Disney më në fund është publikuar traileri i këtij filmi, ku në rolin kryesor është aktorja e famshme Emma Stone, përcjell KultPlus.
Aktorja amerikane do ta luajë rolin kryesor nga filmi “101 Dalmatians” të njohur si Cruella de Vill, ndërsa edhe ngjarja e filmit do të fokusohet te rinia e saj.
Kritikët e filmit pohojnë se qëllimi i kompanisë së famshme është që përmes këtij projekti të arrijë suksesin e filmit “Joker” që po ashtu fokusohej te karakteri negativ nga filmat për Batmanin.
Krahas Stone, në këtë realizim do të luajnë edhe Emma Thompson, Joel Fry, Paul ëalter Hauser, Mark Strong e Emily Beecham.
Craig Gillespie është angazhuar për regjinë, ndërsa është interesant fakti që Glenn Close, e cila e ka luajtur rolin e Cruellas në filmin e vitit 1996, “101 Dalmatians”, është producente ekzekutive e filmit të ri.
“Cruella” pritet të nisë shfaqjen nëpër kinema më 28 maj të këtij viti. / KultPlus.com
Me disa foto nga periudha e luftës në Kosovë, Emina Çunmulaj ka kujtuar të gjithë periudhën e vështirë atje, momentet që mban mend nga fëmijëria edhe sot e kësaj dite dhe që e kanë shoqëruar për shumë kohë.
“Këto janë imazhet që unë mbaj mend nga fëmijëria. Më kujtohet që e shikoja këtë në TV çdo ditë.
Më kujtohet gjithashtu kur nëna ushqente dhe vishte refugjatët e Kosovës në shtëpinë tonë, dhe babai im me pjestarët e tjerë të fshatit duke u përpjekur për t’i çuar ata në vend të sigurt. Të festosh të drejtën për të ekzistuar duhet të konsiderohet si diçka normale.
Kjo është arsyeja përse un sot festoj për të gjithë vëllezërit dhe motrat në Kosovë”, ka shkruar Emina në postimit të saj.
Në një intervistë të dhënë për ‘Historia ime’ në ‘Tv Klan’, Emina ka treguar gjatë për veshtirësitë e jetesës në Malin e Zi dhe gjithë problemet e adoleshëncës.
Megjithatë dëshira për të pasur një të ardhme të sigurt dhe për të qenë më mirë e zhvendosën Eminën në Shtetet e Bashkuara të Amerikës aty ku nisi të punojë duke u kthyer më pas në një nga emrat shqiptarë më të suksesshëm atje. / KultPlus.com
Paneli Zgjedhor për Ankesa dhe Parashtresa – PZAP, në seancat e mbajtura me datën 18 shkurt 2021, ka shqyrtuar dhe vendosur 10 ankesa lidhur me thyerjen e heshtjes zgjedhore dhe ditën e zgjedhjeve.
Ankesat janë paraqitur nga individ, subjekte politike, kandidatë për deputet, organizata, anëtarë të Komisioneve Komunale të Zgjedhjeve, etj.
Prej 10 ankesave të shqyrtuara, Paneli ka vendosur që t’i pranoj si të bazuara 2 ankesa, 1 ankesë e ka refuzuar si të pabazuara, 2 ankesa i ka hedhur si të palejuara, 5 ankesa i ka hedhur si të pasafatshme.
Përkitazi me ankesat e lartcekura, PZAP ndaj subjekteve politike ka shqiptuar gjoba në shumën totale prej: 1,200.00 €, për shkak të mosrespektimit të Kodit të Mirësjelljes. Natyra e ankesave të paraqitura kanë qenë: Thyerja e heshtjes zgjedhore gjatë ditës së votimit, respektivisht shpërndarja e SMS-ve tek qytetaret thirrje për të votuar subjektin e caktuar politik.
Subjekteve politike ne seancën e sotme iu janë shqiptuar gjoba si në vijim:
Ndaj subjektit politik PDK janë shqiptuar gjoba në shumë prej: 600.00 €;
Ndaj subjektit politik LDK janë shqiptuar gjoba në shumë prej: 600.00 €;
Në fund ju informojmë se Paneli sot ka shqyrtuar dhe vendosur të gjitha ankesat dhe apelet e paraqitura nga individ, subjekte politike, kandidatë për deputet, organizata, anëtarë të Komisioneve Komunale të Zgjedhjeve, anëtarë të Këshillave të vendvotimeve, qytetarë, vëzhgues, etj.
PZAP për shkak të mosrespektimit të Kodit të Mirësjelljes, nga ana e subjekteve politike, Mbështetësve dhe përkrahësve të tyre, gjatë fushatës së zgjedhjeve dhe thyerjen e heshtjes zgjedhore në ditën e heshtjes zgjedhore si dhe në ditën e zgjedhjeve, ndaj tyre ka shqiptuar gjoba në shumën totale prej: 216,350.00 €.
Subjekteve politike iu janë shqiptuar gjoba si në vijim:
Ndaj subjektit politik PDK janë shqiptuar gjoba në shumë prej: 66,100.00 €;
Ndaj subjektit politik AAK janë shqiptuar gjoba në shumë prej: 52,750.00 €;
Ndaj subjektit politik LVV janë shqiptuar gjoba në shumë prej: 44,700.00 €
Ndaj subjektit politik LDK janë shqiptuar gjoba në shumë prej: 28,600.00 €;
Ndaj subjektit politik NISMA janë shqiptuar gjoba në shumë prej: 22,000.00 €;
Ndaj subjektit politik Lista Srpska janë shqiptuar gjoba në shumë prej: 2,200.00 €. / indeksonline/ KultPlus.com
Këtë të premte do të dalë në shitje koleksioni i ri i veshjeve nga Beyonce, koleksion ky i quajtuar “Icy Park”.
Në klipin prezantues të veshjeve, të cilat tashmë kanë marrë vëmendje të madhe, përveçse shumë veshje të bukura dimërore, aty shihen edhe disa modelë dhe modele që prezantojnë veshjet në mënyrë artistike.
Porse përveç tyre, në këtë klip shihet edhe vet vajza e Beyonce, Blue Ivy e cila shfaqet në radhë me të ëmën dhe modelet tjera duke prezantuar disa nga modelet e veshjeve.
Kjo nuk është hera e parë që Beyonce shfaq vajzën e saj në projekte pasi më herët është parë edhe në videoklipe muzikore, porse në modelim është hera e parë, ku siç duket po i merr edhe hapat e parë të botës së showbiznesit. /KultPlus.com
Salla e Kino Armatës tashmë ishte mbushur me një numër të madh të njerëzve, teksa ora shënoi shtatë, të gjithë kishin zënë vendet e tyre, përfshirë edhe instrumentistët në skenë të cilët do bënin edhe hapjen e koncertit ‘13 vjet shtet’, shkruan KultPlus.
Ishte drejtoresha e Departamentit të Kulturës në Komunën e Prishtinës, Blera Basholli ajo që para tingujve të parë të muzikës e hapi koncertin. Duke qenë edhe vetë artiste, ajo potencoi se ky vit nuk ishte i lehtë për askënd mirëpo më të prekurit kishin qenë artistët. Ajo gjithashtu uroi që vitet e ardhshme të jenë më të mira.
“Viti i kaluar s’ka qenë një vit i mirë as për Kosovës e as për të gjithë botën, e sidomos për artistët. Uroj që viti tjetër të jetë më i mirë”, tha ndër të tjera Basholli.
Prishtina Brass filloi koncertin e përvjetorit të pavarësisë së Kosovës, pikërisht nën tingujt e himnit shtetëror. Të pranishmit në sallë tashmë ishin ngritur në këmbë, ndonëse të heshtur, fytyrat e tyre po reflektonin paqe e dashuri. Por nata e mbrëmshme nuk u kufizua vetëm me himnin shtetëror. Salla e Kino Armatës mirëpriti mbrëmë një numër të madh të këngëve shqipe si ‘ Për mëmëdhenë’, ‘Por si fleta’, por edhe shumë të tjera.
Për Avni Krasniqin, instrumentistin në ‘ Kosova Brass’ pjesëmarrja në koncertin e mbajtur për 13-të vjetorin e Pavarësisë së Kosovës ishte një nder i madh.
“Për neve është çdo herë kënaqësi e veçantë, por e përcjellur edhe me emocione dhe ndjenja të përziera, që të interpretojmë për festa kombëtare, e sidomos për përvjetorin e 13-të të Pavarësisë”, tha ai për KultPlus.
Nata e mbrëmshme ndonëse filloi me ansamblin e tunxhit ‘Kosova Brass’, nuk përfundoi aty, Nezafete Shala & Melodia e Vjetër e vazhduan magjinë që sollën instrumentet për pak minuta sa u luajtën në skenë. Të pritur me duartrokitje të mëdha ata i dhanë zë Kino Armatës me ‘Marshin e UÇK-së’, ku për disa minuta i ofruan publikut emocione të shumta të cilat u shoqëruan me duartrokitje e brohorima.
Nezafete Shala & Melodia e Vjetër, natën e mbrëmshme, sollën përballë publikut një repertor të gjerë të këngëve të vjetra shqipe. Pas secilës këngë ishte publiku ai që me entuziazmin e vet e bëri edhe më të magjishëm koncertin e mbajtur nën patronazhin e Komunës së Prishtinës. / KultPlus.com
Ujëvara shumë e njohur dhe e veçantë në mbarë botën, “Niagara Falls” në Kanada, mbrëmë u ndriqua me ngjyrat e Flamurit të Kosovës për nder të 17-të Shkurtit, Ditës së Pavarësisë së Kosovës.
“Kosova është tejet mirënjohëse për mbështetjen dhe bashkëpunimin e vazhdueshëm me autoritetet Kanadeze. Kjo dëshmohet edhe sonte me këtë veprim dhe simbolike mbështetëse”, shprehet ambasadori i Kosovës në Kanada Adriatik Kryeziu.
Bekim Fehmiu paraqet personalitet që zakonisht një populli mund t’i ndodhë vetëm një herë gjatë një shekulli, e pastaj të vazhdoj të jetojë për shumë shekuj. Ai madje pat refuzuar të ndryshonte emrin e tij për dhjetëra miliona dollarë nga një shtëpi e njohur producente italiane filmash, e cila kërkoi që talentin e tij ta paraqes si talent italian. I vetmi nga e gjithë Evropa Lindore, ai luajti në shumë filma amerikanë e evropianë me shumë yje botërore.
Bekim Fehmiu kishte një personalitet unik, por zotësia e tij artistike ishte e tillë që ai të mund të luante dy personazhet e pazgjedhur. Në pyetjen: Çfarë korrelacioni mendoni se keni me personazhet Cagliostro dhe Balsamo, ai u përgjigj: Ne të gjithë mbajmë maska të ndryshme për arsye të ndryshme. Ne mbajmë disa maska, sepse ato përfaqësojnë vërtet atë që duam të jemi. Të tjerët, ne i veshim ato, sepse nuk kemi guximin të përballemi me atë që është me të vërtetë poshtë ose sepse je ajo që dikush tjetër do të kishte nevojë që ne të jemi.
Përveç zotësisë së tij, Bekimi ishte edhe shumë i saktë dhe i disiplinuar, kur merrte ndonjë rol qoftë ai kryesor apo edhe dytësor, ai duhet ta perfeksiononte atë deri në përsosshmëri.
Bekimi ishte i përkushtuar në punë. Ai aty garonte me të gjithë por dhe me veten e tij. Kur duhej të luaj në film tek burri i artistes Michel Morgann, atëherë një muaj mësoi intensivisht gjuhën frënge. Por projekti dështoj. Për filmin ” Aventurierët” duhej të mësoj të luaj golf, sport i rëndë dhe i rrezikshëm.
Ishte aq i qëndrueshëm, por edhe mbahej për gjërat që për të ishin thelbësore. Kur e thirri Dino de Laurentis për filmin “Odiseu”, regjisori Francesco Rossi ishte kundër zgjedhjes së tij.
U shpreh: Nuk vie në konsideratë. Është i ri.
E Dino e ndërpreu dhe ia ktheu: Perënditë përherë janë të ri.
Bekim Fehmiu u përket aktorëve të rrallë vendorë që shijuan famën botërore. / KultPlus.com
Patentë me maskë. Kjo tashmë ka ngjarë në Kaliforni, ku qytetarët, edhe fotografinë për patentë shofer, po e bëjnë me një maskë mbrojtëse në fytyrë, duke e bërë të vështirë identifikimin e drejtuesit të mjetit.
Kjo ka ndodhur me Lesley Pilgrim, e cila as vetë nuk e ka kuptuar që kur ka pozuar për fotografinë e patentës, ka qenë me maskën e vënë, por kjo ka ndodhur edhe me qindra qytetarë, transmeton KultPlus.
Ajo tha për mediat amerikane se vendi ku realizoi fotografinë, kishte rregulla strikte për mbrojtje nga pandemia COVID-19 dhe nuk lejohej të hiqej maska, as për një foto.
Autoritetet reaguan duke theksuar se pavarësisht gabimeve, këto patenta janë funksionale dhe do të përdoren. / KultPlus.com
Si kalojnë vitet, si gjumi në varre, Fuqia më pritet, gjaku s’më ka zjarre. Shpirti më venitet, se s’pret më behare, Nëpër mall zvarritem, shpresa s’duket fare.
Po më duken ditët, netë me errësirë, Sikur vërtet thikët, zemërën ma grijnë. Çdo gjë është e kriptë, qumështi bëhet hirë, dhembje përmbi brinjë, loti loton sytë.
Koha vërtet ngriu, sytë u mjegulluan Trupi seç më shkriu, m’u prenë këmbë e duar. S’më fryn më veriu, se më ka harruar, Më harrojnë qejflinjtë, me ‘ta kam kënduar.
S’di ç’mu bë guximi, pse më është larguar? Nga meraku shpirti, më rri i trazuar. S’po duket bilbili, ka kohë pa dëgjuar Apo s’vjen më prilli që ish shok me mua?!
Verë e hidhëruar, duhani m’është prerë, Kujtesa mërguar, s’ka më për tu kthen’, Dashuritë u shuan, s’duroj dot më erë, Fjalë e sertësuar, plakë e s’e merr dhenë.
Paska qenë kjo jetë, një erë e shpejtuar, Gjumërehatin humba, gëzim pakësuar. Pa mundime s’ngelem, unë mundim-rënduar Dot tek vetja s’mbeta, lundroj dëshpëruar.
Hapësirë e ngushtë, deti një kazan Errësirë e shumtê, nata veç më plak. Besimi i ngurtë jep e merr me xhan. Filli n’u këputtë, s’më vjen keq aspak. / KultPlus.com
Sërish një rast tjetër i një pacienti të vdekur dhe të grabitur, këtë herë në spitalin “San Camillo” në Romë, shkruan Irene Tozzi për ilcorriere dellacitta.com.
“Viktima në këtë rast është një zonjë”, shton Tozzi.
”Ndërkohë, djali i zonjës, Mirko Marsella, ish-këshilltar në bashkinë e qytetit, shkoi me dhimbje të jashtëzakonshme në pavijonin ‘Marchiafava’, të spitalit ‘San Camillo’, për të marrë sendet e nënës së tij, e cila kishte vdekur për shkak të Covid-19”, shkruan ajo.
Por, ai kuptoi, me shumë keqardhje, se sendeve të së ndjerës i mungonin sende të çmuara.
”Ndonjëherë ju përfundoni në spital për shkak të një sëmundjeje, qëndroni atje për 40 ditë dhe vdisni vetëm pa praninë e të dashurve tuaj. Humbja e një nëne shkakton dhimbje të jashtëzakonshme. Dhe në momentin që mendoni të ngushëlloni veten… e gjeni atë duke përjetuar edhe një dhimbje tjetër. Sepse midis shumë gjërave të kthyera, sendi më i çmuar personal mungon: një palë vathë prej ari të bardhë me një diamant të vogël”, thotë Mirko.
”Për nënën time ato ishin dhurata më e çmuar nga e cila ajo nuk u nda kurrë… Nga spitali kemi vetëm një heshtje absurde dhe e pajustifikuar… Njerëz pa asnjë skrupull ‘pastrojnë’ trupat e të ndjerit nga objektet më të çmuara”, thekson ai.
”Ju që keni bërë këtë gjest të neveritshëm, a mund të jetoni vërtet në paqe? Duke parë veten në pasqyrë?”, përfundon ai.
Edhe përpara disa ditësh, një ngjarje e pazakontë regjistrohet në spitalin napolitan ”Asl Napoli 2 Nord”, sipas gazetës italiane ”La Repubblica”, që e ka publikuar ngjarjen edhe në rrjetet sociale.
Pasi kishte vdekur nga Covid-19, që në muajin nëntor, për tre muaj një familje ka kërkuar kthimin e sendeve personale të të ndjerit.
Djali i tij Salvatore Ferrillo, me një letër të botuar nga “La Repubblica”, rrëfeu edhe një rast tjetër plaçkitjeje.
“Unë nuk heq dorë, zinxhiri i floririt dhe besimi në Zot ishin të vetmet gjëra që babai im duhej të na jepte. Ata janë si relike për ne”, thotë Salvatore.
Ndërkohë, në regimet e lexuesve gjen shembuj të tjerë të grabitjes së viktimave./ KultPlus.com
‘Pamje revolucioni’ erdhi mbrëmë në skenen e vogël të Teatrit Kombëtar, duke shpalosur para publikut se revolta jo gjithmonë është aq e pastër sa duket, se brenda vetes ngërthen edhe krisje e lëkundje që shpiejnë deri në thyerjen totale të revolucionit si ide. Kjo shfaqje, e cila erdhi pikërisht në 13 vjetorin e Pvarësisë së Kosovës, jo rastësisht e pati premierën pikërisht në këtë ditë, pasi historia e popullit tonë numëron shumë revolucione, që u manifestuan herë me luftë e herë me rezistencë, shkruan KultPlus.
‘Pamje revolucioni’ me tekst të Tino Caspanellonit e cila erdhi nën regjinë e Kaltrim Balajt, është epilogu i një revolucioni i cili ndodhë në hapësirë të padefinuar. Të bllokuar atje, tre revolucionarët e fundit provojnë në mënyrë të dëshpëruar për të mbajtur gjallë ëndrrën. Dhe kur realiteti nxiton ta arrijë ëndrrën, atëherë ‘kështjella magjepsëse’, fillon të bie, për të hequr dorë nga revolucionet dhe për të treguar brishtësinë e një utopie.
Tre të rinj, të magjepsur pas një ideali, stoik në revoltën e tyre, aq të sigurt në vendimt e tyre saqë askujt nuk do t’i shkonte mendja për ndonjë thyerje në mes. Mirëpo, si shpesh herë, ndodhi thyerja e kësaj revolte aq të fuqishme. Një revoltë që dështoi dhe nuk shkoi deri fund.
‘Pamje revolucioni’, siç tregon edhe regjisori Balaj, ka hasur në vështirësi gjatë realizimit duke pasur parasysh situatën pandemike. Madje ai tregon se vazhdimisht kanë pasur frikë për ndonjë infektim të mundshëm, por që nuk ka ndodhur.
‘Për mua ky tekst është një nga tekstet më aktuale, jo vetëm për ngjarjet dhe zhvillimet aktuale në Kosovë por edhe si tërësi. Ne historikisht, ndoshta edhe brenda familjes kemi revolta. Pasi revolta fillon nga ne. Çuditërisht revolucionet janë të tilla vetëm kur shpërthejnë duke përmbysur sisteme, ndërsa me kalimin e kohës ato sërish çuditërisht shndërrohen në sisteme’, ka theksuar regjisori për KultPlus.
Revolucioni që zë vend në këtë shfaqje, nuk përfundon. Brenda këtij revolucioni, të revoltuarit hasin në revoltën e njëri tjetrit.
‘Jo pa qëllim shfaqjes i është përshtatë skenografia dhe gjetjet të cilat konsistojnë në idenë që reevolucioni ose rruga drejt tij ka gjithmonë edhe shtrembërime brenda’, ka potencuar tutje Balaj për KultPlus.
“Pamje revolucioni”, flet për revolucione të munguara, revolucione të dështuara e për revolucione që presin të shpërthejnë. Çuditërisht revolucionet janë të tilla vetëm kur shpërthejnë duke përmbysur sisteme, ndërsa me kalimin e kohës ato sërish çuditërisht shndërrohen në sisteme. / KultPlus.com
Ka vdekur në orët e para të mëngjesit të sotëm në moshën 79-vjeçare, poeti vlonjat Lefter Çipa. Lajmin për ndarjen e tij nga jeta pas një sëmundje të rëndë, e ka dhënë djali i tij, gazetari Aleksandër Çipa përmes një postimi në rrjetet sociale.
Çipa njihet si njeriu që investoi më shumë për polifoninë shqiptare, ai është autor i 18 librave të botuar me poezi si : “Bejkë e bardhë”, “Bilbilat e vendit tim”, “Shqipëri moj ballëhapur”, ”Këngët e Ruzanës”, “Dheun tim përsipër mbaj”, “Për Kosovën prapë do të ngrihem”, “Kënga që tret lotin”, “Këngët e Akroqeranit”,”Princi i Dashurisë”, etj. Konsiderohej “princi i sotëm” i polifonisë shqiptarë.
I konsideruar si “princi” i polifonisë shqiptarë , ka qenë autori më kreativ i polifonisë gjatë 40 viteve të fundit. Njëri prej studiuesve dhe hulumtuesve të poezisë orale popullore në trevat jugore të vendit.
Ai është autor i mbi 1250 këngësh të interpretuara nga grupet e famshme polifonike, si ai i Pilurit (udhëheqës artistik i të cilit ka qenë për mbi 40 vjet, grupet polifonike të Himarës, Bënçës, Dhërmiut, Gjirokastrës, Vlorës, Lapardhasë, Ansamblit Shtetëror të Këngëve dhe Valleve si dhe dhjetëra ansambleve të tjera artistike në Shqipëri, Kosovë, Maqedoni etj.
Lefter Çipa është edhe autori i papërsëritshëm i këngëve të vlerës së lartë artistike dhe muzikore si “Bejkë e bardhë”, “Vijnë djemtë nëpër vapë”, “Nga kjo baltë e kësaj toke”, “Naim Shqipëria”, “Shqipëri pse të qan syri”, “Zoga kaçake në male”, “Këngë kurbeti”, “Vito Pëllumbesha”, “Hënëz e qiellit të gjerë”, “Moj unaza gur jeshile”, “N sokak të ngushtë”, “O shokë vdekça nga kënga”, “Lundroj në lundrën e këngës”, “Kënga e manushaqes”, ” Zonjë e bukurisë”, etj.
Përmes një njoftimi të familjes, ceremonia mortore do të bëhet sot në vendlindjen e tij në Pilur në orën 15:00. /atsh / KultPlus.com
Në 13-vjetorin e Pavarësisë, vendin tonë e uruan njerëz nga e gjithë bota, por një urim shumë i veçantë kishte ardhur para 4 vitesh, e që do të mbahet mend për shumë gjatë.
Ambasadori i atëhershëm i SHBA-së në Kosovë, Greg Delawie dhe stafi i tij ishin përgjigjur në disa pyetje lidhur me Kosovën dhe traditat e kosovarëve.
Ata u pyetën nëse dinë se si bëhet flija apo se cila ishte fjala më e preferuar nga shqipja apo gjuhët tjera zyrtare, cili vend iu pëlqen më shumë në Kosovë, maja më e lartë apo pija e preferuar.
Përgjigjet e tyre interesante i gjeni në këtë video të publikuar në vitin 2017./ KultPlus.com
