Petro Nino Luarasi lindi në 22 prill të vitit 1865 në Luaras të Kolonjës dhe vdiq më 17 gusht të vitit 1911, ishte i biri i Nini Petro Kostallarit, veprimtar i Rilindjes Kombëtare, publicist e pedagog, Mësues i Popullit. Lindi në Luaras të Kolonjës në një familje muratori.
Sot janë bërë plot 111 vjet nga vdekja e këtij dijetari i cili punoi si mësues në fshatrat e Kolonjës, ku u mësonte fëmijëve fshehurazi gjuhën shqipe dhe përgatiti një grup shokësh si mësues.
Më 1882 hapi Shkollën e Parë Shqipe në fshatin Bezhan të Kolonjës, kurse më 1887 hapi shkollën shqipe në Ersekë dhe pak më vonë (1892-1893) shkollat shqipe në krahinën e Kolonjës e të Vakëfeve, punoi si drejtor dhe mësues i Mësonjëtores së parë shqipe të Korçës dhe më vonë i shkollës së Negovanit (1909-1911).
Në vitin 1892 bashkë me Gjerasim Qiriazin themeluan shoqatën protestante “Vëllazëria e Shqipërisë”. Në emigracion, në Amerikë (1904-1908) mori pjesë gjallërisht në lëvizjen kombëtare, ishte nismëtar i shoqërive patriotike “Mall i mëmëdheut” dhe “Pellazgu”, i krijimit të komiteteve të fshehta për lirinë e Shqipërisë.
Ishte delegat në Kongresin e Manastirit (1908). Për veprimtarinë patriotike, arsimore e shoqërore u përndoq nga xhonturqit dhe Patrikana e Stambollit. Vdiq i helmuar prej tyre në Ersekë, më 17 gusht 1911. /KultPlus.com
Festivali i rrushit “Hardh Fest” është drejt përgatitjeve të fundit për të sjellë edicionin e sivjetmë i cili mbahet në qytetin e vreshtave, Rahovec.
Festivali i cili do të mbahet më 2, 3 dhe 4 shtator në natën e parë do të nis me një performancë të këngëtarit të njohur Alban Skenderaj.
Këtë e kanë bërë të ditur organizatorët e festivalit përmes një njoftimi për media.
“1-2, 1-2, test, test a kemi rrymë? Rikthehemi aty ku e lam’ vitin e kaluar – ALBAN SKENDERAJ në HARDH FEST! Me 2 shtator (E Premte) në skenën e Konakut do të performojë një nga këngëtarët më të kërkuar nga publiku i festivalit, i shumëpritur nga të gjithë Alban Skendera”, thuhet në njoftimin. / KultPlus.com
Plazhi i Bunecit, i shtrirë mes Borshit e Lukovës, një margaritar i bregdetit të jugut këtë vit ka qenë edhe më i preferuar nga turistët.
Kështu u shpreh kryeministri Edi Rama teksa publikoi në rrjetet sociale pamje të këtij plazhi me bregun me guralecë të bardhë.
Plazhi i Bunecit është një plazhet që kryesisht preferohet nga familjarë, por edhe për të apasionuarit pas peshkimit.
Klima e detit dhe aroma e malit, janë një mjedis i shëndetshëm po të shtosh këtu edhe ushqimin e pasur me prodhime perime e fruta të kopshteve të banorëve të zonës, vajin e ullirit, prodhimet e detit që zbresin nga varkat e peshkatarëve.
Natyra e paprekur, uji i kristaltë i Jonit, plazhet e arta, flora dhe fauna e pasur detare janë vetëm disa nga sekretet që zbulon kur viziton Bunecin. / atsh / KultPlus.com
Presidenti i SHBA-ve Joe Biden ka nënshkruar një projekt-ligj prej 700 miliardë dollarësh, që synon të luftojë ndryshimet klimatike dhe kostot e kujdesit shëndetësor duke rritur taksat kryesisht për të pasurit.
Projektligji përfshin masat për të ulur çmimin e barnave me recetë.
Sipas një zyrtari të administratës së Biden, projektligji mund të japë një shtysë përpara zgjedhjeve afatmesme.
Votuesit që do të votojnë në nëntor do të vendosin nëse demokratët e Biden do të mbajnë kontrollin e Kongresit edhe për dy vjet të tjera.
Presidenti e përshëndeti projektligjin ndërsa e nënshkroi të martën si “pjesa e fundit” e agjendës së tij të brendshme, shkruan BBC.
Projektligji, i quajtur “Akti i Reduktimit të Inflacionit”, është një arritje e madhe legjislative për demokratët ku përfshihet paketa më e madhe klimatike në historinë e
SHBA-së dhe bëhet menjëherë një nga elementët kyç të presidencës së tij dyvjeçare.
Ajo kaloi në votim si në Dhomën e Përfaqësuesve ashtu edhe në Senatin javën e kaluar me mbështetjen e çdo demokrati por të asnjë republikani. Në këtë paketë përfshihen masa të dizajnuara për të mbështetur alternativat e energjisë me emetim të ulët dhe për të ulur emetimet e gazrave serrë, si dhe për të ulur çmimet e barnave me recetë dhe për të rritur taksat ndaj korporatave dhe të pasurve.
Legjislacioni do të mbledhë rreth 700 miliardë dollarë nëpërmjet rritjes së taksave të korporatave dhe kursimeve të barnave me recetë, dhe do të shpenzojë rreth 400 miliardë dollarë për energjinë e pastër dhe dispozitat e kujdesit shëndetësor.
Biden u kthye shkurtimisht nga pushimet për të nënshkruar projektligjin, i cili u miratua sipas linjave partiake pa asnjë mbështetje nga republikanët e opozitës./abcnews.al/ KultPlus.com
Në edicionin e tretë të festivalit “Nona” që u mbajt në Përmet, krahas koncertit me zërat më të njohur të muzikës shqiptare dhe sazeve të famshme të Përmetit, u organizua edhe një panair ku u ekspozuan punime artizanale dhe gatime tradicionale nga duart e gjysheve.
Kryeministri Edi Rama publikoi sot në rrjetet sociale pamje nga festivali, ku qytetarë të shumtë kanë mbushur sheshin e qytetit.
“Festivali “Nona”, një festë dedikuar gjysheve shqiptare, ka mbyllur edicionin e 3-të tij duke sjellë kaq shumë energji për tre ditë në qytetin jugor. Krahas koncertit me zërat më të njohur të muzikës shqiptare dhe sazet e famshme të Përmetit, u organizua edhe një panair ku u ekspozuan punime artizanale dhe gatime tradicionale nga duart e gjysheve”, u shpreh kryeministri Rama.
Ky është viti i tretë radhazi që organizohet kjo festë e veçantë, dedikuar gjysheve./atsh/ KultPlus.com
Charles Bukowski ka shkruar romane, tregime dhe poezi për një total prej mbi 60 veprash. Përmbajtja e veprave të tij i përket më tepër jetës personale, varësisë me alkoolin dhe marrëdhënieve me personat e tjerë, të shprehura këto në mënyrë tepër realiste dhe pa shumë eufemizma.
Krijimi i mëposhtëm i tij është ndër më të bukurit që mund të jenë shkruar. Bëhet fjalë për përshkrimin e një femre nga një mashkull që e dashuronte atë. Është përshkrimi thuajse i çdo femre të pavendosur, por edhe tepër të fortë në të njëjtën kohë. Është përshkrimi i çdo femre që ekziston, në gjithë dimensionet e saj, ndaj jemi të sigurtë se të gjitha femrat duhet ta lexojnë një krijim të tillë.
“E ke dashur, apo jo?”, – psherëtiu ajo
“Si mund të të përgjigjem? Ajo ishte e çmendur”, – tha ai duke kaluar dorën në flokë, – “Edhe pse ishte e çmendur, çdo ditë ishte një femër ndryshe. Një herë plot guxim, një herë e stepur. Një herë e nxituar dhe herë tjetër e ndrojtur. E pasigurtë dhe e vendosur. E ëmbël dhe arrogante. Ajo ishte mijëra femra të bashkuara në një të vetme, por parfumi i saj ishte përherë i njëjti. Ai nuk mund të ngatërrohej. Parfumi i saj ishte siguria ime e vetme. Më buzëqeshte duke ditur si të luante me mua përmes buzëqeshjes së saj. Kur ajo qeshte, unë nuk kuptoja më asgjë. Nuk dija më si të flisja, apo të mendoja. Asgjë, zero. Në atë moment ishte vetëm ajo. Ishte e çmendur, e gjitha e çmendur. Disa herë qante. Thuhet se në ato çaste femrat duan vetëm një përqafim, ndërsa ajo jo. Ajo nevrikosej, nëse e përqafoje. Nuk e di ku ndodhet tashmë, por vë bast se është në kërkim të ëndrrave.
Ajo ishte e çmendur, totalisht e çmendur, por e kam dashur çmendurisht”. / KultPlus.com
Këngëtari dhe aktori Darius Campbell Danesh, i cili u bë i famshëm në shfaqjet e talenteve të ITV Popstars dhe Pop Idol dy dekada më parë, ka vdekur në moshën 41-vjeçare, shkruan BBC News, transmeton KultPlus.
Skocezi doli i treti në Pop Idol pas Will Young dhe Gareth Gates në 2002.
Ai arriti numrin një në Mbretërinë e Bashkuar po atë vit me Colourblind, ndërsa albumi i tij Dive In arriti në top 10.
Pas përparimit të tij në tabelë, ai vazhdoi të bëhej një yll i West End, duke u shfaqur në muzikore si Chicago dhe fitues të çmimit Olivier Guys and Dolls.
Shkaku i vdekjes nuk dihet, por familja e tij tha se ai u gjet në banesën e tij në SHBA.
“Me pikëllim të madh njoftojmë ndarjen nga jeta të Darius Campbell Danesh”, thanë ata në një deklaratë. “Darius u gjet pa reaguar në shtrat në dhomën e tij të apartamentit në Rochester, Minesota, më 11 gusht dhe u shpall i vdekur pasdite nga zyra e ekzaminuesve mjekësorë lokalë./ KultPlus.com
Charles Dickens ishte një mjeshtër i historisë drithëruese.
Më shumë se 150 vjet pas vdekjes së autorit të famshëm, tregimet e tij për fantazmat dhe goblinat vazhdojnë të frikësojnë dhe kënaqin lexuesit në mbarë botën. Por magjepsja e Dikensit me shpirtrat dhe fantazmat i kapërceu faqet e trillimeve të tij. Mes çmendurisë shpirtërore që pushtoi shoqërinë viktoriane, ai kërkoi shtëpi të përhumbura dhe merrte pjesë në seanca, edhe pse tallej me idenë se ekzistonin fantazmat, transmeton KultPlus.
Marrëdhënia shumëplanëshe e autorit me të mbinatyrshmen është fokusi i një ekspozite të ardhshme në Muzeun Charles Dickens në Londër. Duke hapur këtë vjeshtë, “To Be Read at Dusk: Dickens, Ghosts and the Supernatural” eksploron ndikimin e qëndrueshëm të Dickens në zhanrin e historisë së fantazmave. Ai botoi më shumë se 20 përralla drithëruese gjatë jetës së tij – dhe interesin e tij të fortë për paranormalen.
Ndër artikujt e ekspozuar janë skica origjinale të fantazmave të Dikensit nga karikaturisti John Leech, një botim i The Chimes që iu dhurua Hans Christian Andersen dhe bileta për leximet e Dickens të tregimeve të tij të fantazmave.
Autori shpesh interpretonte tregimet e tij për familjen, miqtë dhe publikun – tregimet e tij të fantazmave të Krishtlindjeve ishin një pjesë veçanërisht e rëndësishme e repertorit të tij – dhe ai më tepër i pëlqente të shkaktonte reagime të fuqishme nga audienca e tij.
Që në moshë të re, Dickens ishte i zhytur në histori të frikshme. Dadoja e tij, një “Miss Mercy”, e tmerroi atë me përralla makthi para gjumit, e patrazuar nga lutjet e tij se ai ishte “mezi i fortë dhe mjaftueshëm i rritur për ta dëgjuar përsëri historinë”, kujtoi autori më vonë. “Ajo kurrë nuk më kurseu asnjë fjalë prej saj. … Emri i saj ishte Mëshirë, megjithëse nuk kishte mëshirë për mua.”
Si një fëmijë më i madh, ai lexoi një revistë javore horror të quajtur Regjistri i tmerrshëm, i vetëdijshëm për emocionet e forta dhe kontradiktore që mund të provokonin historitë e frikshme.
Interesi i Dikensit për të mbinatyrshmen vazhdoi deri në moshën madhore. “To Be Read at Dusk” përmban një letër, të ekspozuar për herë të parë, që Dickens i shkroi autorit William Howitt, duke pyetur nëse ai dinte për “ndonjë shtëpi të përhumbur brenda kufijve të Mbretërisë së Bashkuar ku askush nuk mund të jetojë, hajë. , pijë, qëndrojë në këmbë, gënjejë, të fli,” sipas Harriet Sherwood të Guardian.
Emily Dunbar, kuratorja e ekspozitës, i thotë Guardian se Dickens, Hollingshead dhe autori Wilkie Collins shkuan në kërkim të një shtëpie të supozuar të përhumbur në Hertfordshire në Anglinë jugore. Shtëpia, rezulton, nuk ka ekzistuar.
Sipas faqes së internetit të muzeut, Dickens ishte një “skeptik i magjepsur”, më shumë i interesuar për rrënjët psikologjike të dukurive paranormale sesa për të gjetur prova të ekzistencës së tyre. Por shumë nga bashkëkohësit e tij besonin në ekzistencën e një mbretërie të mbinatyrshme. Spiritualizmi, një lëvizje fetare dhe kulturore e rrënjosur në besimin se shpirtrat e të vdekurve mund të komunikojnë me të gjallët, përfshiu Amerikën dhe Evropën në shekullin e 19-të, duke numëruar shumë figura të shquara midis adhuruesve të saj.
Ekspozita “To Be Read at Dusk: Dickens, Ghosts and Supernatural” do të shfaqet në Muzeun Charles Dickens në Londër nga 5 tetori 2022 deri më 5 mars 2023./KultPlus.com
Çështje semantiko-gjuhësore në fjalësin e Zija Çelës (romanet “Ora e zooparkut” dhe “Gjysma e Xhokondës”)
Qëllimi i hulumtimit: Objekt bëhet leksiku i Zija Çelës në dy romanet. Synimi është zbulimi i mekanizmave gjuhësore te neologjizmat, fjalët dialektore e krahinore, arkaizmat, fjalët e huaja dhe njësitë frazeologjike. Qëllimi ynë është të paraqesim një fjalës të prozës së Z.Çelës. Kështu që u vijmë në ndihmë arsimtarëve, studentëve, nxënësve të shkollave të mesme dhe për ata që
dëshirojnë të kuptojnë veprat letrare dhe të zgjerojnë kulturën e tyre gjuhësore. Metodat e përdorura: Së pari, Skanimi i dy romaneve, konvertimi i tyre në ëord, programi i Konkordancave leksikore në kompjuter (SCP) dhe konvertimi i materialit në këtë program. Na shërbyen për të krijuar listën e fjalëve të dy romaneve, konkordancat e tyre dhe hartimin e dosjeve kompjuterike me fjalët e veçanta (neologjizmat, arkaizma, fjalët e huaja apo të huazuara. Së dyti, Hulumtimi, lexim i imtësishëm me shënime e nënvizime kryesisht për të identifikuar njësitë frazeologjike pasi programi i Konkordancave nuk i njeh këto njësi. Së treti, Me anë të induksionit dhe deduksionit arrijmë në analiza përshkruese dhe vlerësuese të tipareve semantiko-gjuhësore të leksemave në romane. Jemi bazuar në literaturë të gjerë mbi studime të gjuhës së autorëve të ndryshëm e sidomos mbi studimet e Shefkie Islamajt për gjuhën e Jakov Xoxës. Rezultatet: 1. Fjalëformimi i neologjizmave si mbrëmësore, luluste, hapërronte, kokëngulthi, etj. dhe kuptimi që fitojnë brenda kontekstit. 2. Te fjalët dialektore e krahinore si: nënkresa,rrenë, e kremte, e ronitur, uzdaja, gjakhupës, etj. veçoritë semantike e strukturore të tyre. 3. Arkaizmat e fjalët e huaja si: matrapazllëk, birboja, sevdalli, avashllëk, influencë, ambjentim, etj. dhe specializimi kuptimor i ndajshtesave për të sjellë semantikë të tjetërsuar nga kuptimet e tyre të hershme. 4. Vështrim leksikometrik mbi njësitë frazeologjike me fjalët me dendurinë më të madhe si: me hapësirën, zooparkun, mitet,; u kap gafil, merr mendtë zoti, ha larg ujkut, etj.
Fjalët kyçe: neologjizma, arkaizma e fjalë dialektore, njësi frazeologjike, fjalë të huaja apo huazime, veçori semantiko – strukturore, ndarje leksikometrike, etj./ KultPlus.com
Dua që të dish Një gjë. Ti e di si është kjo gjë: nëse shoh hënën e kristaltë , degën e kuqe të vjeshtës së ngadaltë në dritaren time, nëse prek pranë zjarrit hirin e pakapshëm ose trupin e rrudhur të drurit, gjithçka më çon tek ty, sikur kjo që ekziston aroma,dritë, metale, të ishin anije të vogla që shkojnë drejt ishujve të tu që më presin .
Sidoqoftë nëse pak nga pak ndalon së më dashuri do të ndaloj se dashuri pak nga pak “Nëse papritmas më harron, mos më kërko se tashmë do të kem harruar
Nëse të duket e gjatë dhe e çmendur era e flamujve Që kalon permes jetës time dhe vendos të më lësh në breg të zemrës në të cilën kam rrënjët, mendo se në atë ditë, në atë kohë, do të ngre lart krahët dhe rrënjët e mia do të dalin për të kërkuar tokë tjetër
Por nëse çdo ditë, çdo orë e ndjen se për mua je destinuar me ëmbëlsi të pamëshirshme. Nëse çdo ditë çel në buzët e tua një lule për të më kërkuar, ah, dashuria ime në mua i gjithë ai zjarr përsëritet, në mua asgjë nuk shuhet as harrohet, dashuria ime ushqehet me dashurinë tënde,e dashuruar, dhe derisa të jetosh do të jete në krahët e tu pa dalë nga krahët e mia./ KultPlus.com
Gjendja e sotme e Eposit të Kreshnikëve në pesë shtete të Ballkanit
Gjendja e sotme e Eposit të Kreshnikëve në pesë shtete të Ballkanit ishte projekt kërkimor në terren, me rreth 30 ditë pune. E realizova në vitet 2012-2016 dhe vazhdova në vitet vijuese.
Në realizim më kanë ndihmuar 5 ekspertë nga Prishtina, Tirana e Shkupi dhe rreth 90 bashkëpunëtorë të terrrenit. Ishin edhe dy ekspertë të jashtëm: profesorët Dejvid Ellmer, Universiteti i Harvardit, dhe Nikolla Skalldaferri, Universiteti i Milanos.
Financimin e ka kryer pjesërisht Ministria (MASHT). Qëllimi i kërkimit ishte mbledhja e dëshmive për dosjen e Eposit të Kreshnikëve për paraqitje në UNESCO. Vendet e kërkimit janë rreth 400 vendbanime në Kosovë, Shqipëri, Maqedoni, Mal i Zi, Serbi. Në ato vende janë evidencuar edhe rreth 150 lahutarë. Metodologjia e zbatuar në terren ishte e shkallës së lartë. Nga rezultatet e kërkimit del se ka pasur tejkalim të trefishtë të planit. Janë mbledhur 15 vëllime, që kanë mbi 100 mijë vargje. Janë incizuar me kamerë rreth 65 mijë vargje, me mbi 5 mijë minuta.
Janë dhënë vlerësime të larta në përurimet e këtij projekti në Prishtinë, Tiranë, Shkup, Tuz e Cyrih. Ka fituar edhe ҫmimin ndërkombëtar për kërkime në etnokulturë, Mendim Special, nga Europa Nostra, Madrid 2016.
Më 20 gusht, në Pejë, do të hapet ekspozita ‘Sanxhaku, histori e dhimbjes kombëtare‘.
“Sanxhaku, histori e dhimbjes kombëtare” është projekti i shoqatës “Kosova për Sanxhakun” përkrahur nga shoqata humanitare “Sali Çekaj” në Gjermani, përmes të cilës organizatorët po synojnë të paraqesin trashëgiminë kulturore të Sanxhakut të Pazarit të Ri përmes fotografive.
Ky projekt do të implementohet në fushën e trashëgimisë kulturore, materiale dhe shpirtërore, i cili do t’i ekspozojë fotografitë të cilat tregojnë autoktoninë shqiptare në Sanxhakun e Pazarit të Ri.
Me këtë aktivitet organizatorët synojnë të ndikojnë në njohjen e opinionit vendor dhe ndërkombëtar me të kaluarën, kulturën dhe traditën e popullit shqiptarë të Sanxhakut të Pazarit të Ri dhe më gjerë.
Fiset shqiptare (Kelmend, Kuç, Hot, Shalë, Shkrel, etj.) iu nënshtruan asimilimit të gjatë shekullor, fillimisht si myslimanë dhe përfundimisht si boshnjakë. Por, të gjitha dëshmitë flasin se kjo trevë edhe në ditët e sotme është e banuar nga shqiptarët, edhe pse pjesa dërmuese e tyre deklarohen boshnjak, jo më larg se në brezin e dytë na dalin puro shqiptarë.
Fotografitë e dokumentojnë thelbin e epokave të ndryshme më mirë se çdo medium tjetër, por janë më shumë se formë e dokumentimit. Ato inkorporojnë vlerat artistike- tregojnë histori të pa thëna apo të pa shkruara me fjalë. Sa i përket Sanxhakut të Pazarit të Ri forma më e mirë për të dëshmuar të kaluarën shqiptare të tij kujtojmë se është fotografia.
“Nëpërmjet fotografisë ne do të dokumentojmë traditën, mënyrën e jetesës, veshjen, kulturës, mjetet e punës, shtëpitë e banimit, ushqimit, si dhe toponimet. Nëpërmjet fotografisë ne do t’i paraqesim edhe traditën e kësaj popullate, bie fjala dasmat, eposin e lahutarëve, folklorin, lojërat tradicionale popullore, doket, zakonet, zejet, mjetet e punës, mënyrën e jetës në fshat, objektet e banimit dhe imazhet të ndryshme të vendbanimeve”, thuhet nga organizatorët.
Ekspozita do të ndikoj në masë të duhur tek studentët aktual dhe te ata që vijnë që të merren me studimin e këtij rajoni. Ekspozita mendohet të jetë një kontribut i madh në ngritjen e vetëdijes kombëtare shqiptare në këto vise të cilat pothuajse janë krejtësisht të asimiluara. / KultPlus.com
Presidentja e Republikës së Kosovës, Vjosa Osmani, ia ka dorëzuar “Urdhrin Hero i Kosovës”, familjes së heroit të kombit, Sali Çekaj, të cilin ia kishte ndarë ish-presidenti i Kosovës, Ibrahim Rugova, në vitin 2005.
Në një ceremoni me familjarë të heroit Sali Çekaj, Presidentja Osmani ka theksuar se kontributi i tij ishte i jashtëzakonshëm dhe shtrihej në shumë kohë e drejtime.
“Një jetë e tërë në shërbim të kombit dhe atdheut. Sali Çekajn e gjejmë në ballë të betejave për organizimin e jetës institucionale dhe rezistencës ndaj pushtimit të Kosovës gjatë fillimit të viteve të 1990-ta. Pas largimit nga Kosova për t’i shpëtuar arrestimit nga regjimi pushtues i Serbisë, Sali Çekaj dha një kontribut të pashoq në organizimin e diasporës shqiptare dhe në sensibilizimin e çështjes së Kosovës në Evropën Perëndimore”, ka theksuar Presidentja Osmani.
Sipas saj, ai ka pasur rol qendror në organizimin e rezistencës së armatosur për liri dhe pavarësi të Kosovës, që në fillet e para të organizimit institucional të formacioneve të armatosur të Republikës së Kosovës dhe në organizimin dhe shtrirjen e Ushtrisë Çlirimtare të Kosovës.
“Sali Çekaj ka organizuar dhe drejtuar me shkathtësi dhe trimëri disa nga betejat më të lavdishme të Ushtrisë Çlirimtare të Kosovës, deri në rënien e tij heroike, në betejën e Koshares”, theksoi Presidentja Osmani.
Ndërkaq familjarë të heroit Sali Çekaj falënderuan Presidenten Osmani për respektin jo vetëm ndaj heroit, por edhe të luftës çlirimtare./ KutlPlus.com
Verës sa nji mëngjes me vesë nuk ia pau kush ballin simjet me sy të përlotun të sjellun kah mali.
Vjetit nuk i mungon asnji ditë në kalendar e i dhimbet e mbramja pikë e dyllit në djegie: e sotmja ka ndijen e dridhjes së fletëve të shqemes para dhambëve të sutës./ KultPlus.com
Aktori Duggie Brown, i cili luajti në “Coronation Street” dhe “Last of the Summer Wine”, ka vdekur në moshën 82-vjeçare.
Brown, i cili ka lindur në Rotherham, së pari gjeti famë në filmin e Ken Loach-it në vitin 1969 “Kes”, bazuar në romanin e Barry Hines.
Menaxheri i tij Lee Morgan tha se Brown vdiq të martën në mëngjes.
Ai ishte i njohur për interpretimin e Ted Spear në “Coronation Street” dhe gjithashtu u shfaq në programet “The Comedians” dhe “The Wheeltappers And Shunters Social Club”.
Morgan shkroi në Twitter: “Çfarë nderi ishte të punoja me Duggie. Një argëtues i lindur që e donte profesionin e tij. U prefsh në paqe Duggie Brown. Ne ju duam dhe ju përshëndesim”, përcjell Klankosova.tv
Gjatë një karriere që përfshin më shumë se pesë dekada, Brown u shfaq në një sërë dokumentarësh dhe dramash, duke përfshirë “All Creatures Great And Small”, “Heartbeat, Hotel Babylon”, “EastEnders”, “Holby City” dhe “My Brother’s Keeper”./ KultPlus.com
Një gjykatë në Rusi dënoi me gjobë këngëtarin e grupit klasik rus të rokut “DDT” me 50.000 rubla (800 dollarë) pasi ky i fundit kritikoi ashpër Presidentin Vladimir Putin dhe pushtimin e Ukrainës gjatë një koncerti. Yuri Shevchuk nuk dha asnjë deklaratë publike për vendimin e 16 gushtit nga gjykata në Ufa, kryeqyteti i rajonit rus të Bashkortostanit, por avokati i tij Aleksandër Peredruk tha se vendimi do të apelohet.
Prokurorët e akuzuan Shevchukun në maj sipas një ligji të miratuar menjëherë pas pushtimit të 24 shkurtit që dënon deklaratat publike që mendohet se diskreditojnë forcat e armatosura ruse. Gjatë një koncerti të grupit rock “DDT” në Ufa, Shevchuk kritikoi ashpër vendimin e Presidentit Vladimir Putin për të pushtuar Ukrainën.
“Mëmëdheu nuk janë të pasmet e presidentit që njeriu duhet t’i puthë gjatë gjithë kohës”, tha Shevchuk në koncert. “Mëmëdheu është një lypës, një plakë që shet patate në stacionin hekurudhor. Ky është Atdheu.”
Shevchuk u duartrokit gjerësisht nga publiku. Video e deklaratës së tij u bë virale në kanalet e mediave sociale ruse. Ligji që Putin nënshkroi në mars nënkupton burgime të gjata për shpërndarjen e “informacionit qëllimisht të rremë” në lidhje me operacionet ushtarake ruse, me Kremlinin që kërkon të kontrollojë narrativën për luftën në Ukrainë.
Ligji parashikon dënime deri në 10 vjet burg për individët e dënuar për një vepër penale, ndërsa dënimi për shpërndarjen e “informacionit të qëllimshëm të rremë” për ushtrinë ruse që çon në “pasoja të rënda” është 15 vjet burg. Ligji gjithashtu i bën të paligjshme “thirrjet kundër përdorimit të trupave ruse për të mbrojtur interesat e Rusisë” ose “për diskreditimin e një përdorimi të tillë” me një dënim të mundshëm deri në tre vjet burg.
E njëjta dispozitë vlen edhe për thirrjet për sanksione ndaj Rusisë. “DDT” u themelua nga Shevchuk në fillim të viteve 1980 në Ufa dhe ai ka shkruar shumicën e këngëve gjatë këtyre viteve./Rel/ KultPlus.com
Projekti “Kinemaja shëtitëse”, pas një turneu në qytete të ndryshme të vendit, zbarkoi në Sarandë, mbrëmjen e 15 gushtit, për të qëndruar aty për 3 netë rresht.
“Open Cinema 2022” është formati që i jep dritë ekranit të madh të kinemasë, duke zbritur këtë sezon veror me një show kinematografik, në sheshet e qyteteve shqiptare, me filma të fundit nga kinemaja jonë dhe ajo botërore.
Projekti ka bërë bashkë filmin dhe muzikën e mirë, me këngëtarë të njohur nga vendi.
Në ekranin e madh, është projektuar edhe një dokumentar i xhiruar në Sarandën e para viteve `90.
Ky aktivitet që ka për qëllim promovimin e kinemasë dhe të realizuesve të saj dhe realizohet me mbështetjen e Qendrës Kombëtare të Kinematografisë dhe të bashkive të qyteteve në të cilat organizohet./atsh/ KultPlus.com
Portali më i rëndësishëm i turizmit në vendet e Gjirit Persik ka përcaktuar Shqipërinë si thesari që po zbulohet dita-ditës nga turistët, duke përshkruar plazhet e kaltra, ushqimin shumë të mirë dhe qytetet në UNESCO.
Kryetari i grupit parlamentar të Partisë Socialiste, Taulant Balla ndau sot në rrjetet sociale shkrimin e publikuar në portalin “Gulf Tourism News”, i cili i shtohet artikujve të tjerë të publikuara në mediet ndërkombëtare që promovojnë vendin tonë.
“Shqipëria po promovohet çdo ditë në rrjetet sociale duke përhapur fjalën e mirë që përkthehet në më shumë turistë, të ardhura, ekonomi”, u shpreh Balla.
Më herët, Shqipëria turistike është promovuar edhe në artikujt e medieve britanike, franceze dhe ato spanjolle, të cilat kanë vlerësuar përveç natyrës edhe kulinarinë dhe traditat shqiptare./atsh / KultPlus.com
Në rajonin e Skånës në verilindje të saj, shqiptarja nga Struga Arbresha Sabani është pjesë e listës së partisë së gjelbër (MP) per zgjedhjet parlamentare.
Arbresha Sabani është një politikane që punon me çështjet e shkollës, të fëmijëve, të rinjve, barazisë gjinore dhe të drejtave funksionale.
Ajo në prezentimin e saj si kandidate për parlamentin suedez tregon:
“Gjatë rinise sime kam qenë shumë aktive në sporte të ndryshme si ping-pong për handikap, futboll dhe not. Ishte një mënyrë për mua për të qëndruar aktiv por edhe për të marrë pjesë në jetën shoqërore. Gjithashtu jam mësuese e gjimnazit e trajnuar dhe e certifikuar. Një profesion që më është për zemër”
Pra pas regjionit të Halandit tashme edhe regjioni i Skanes ka mundesi reale te dergon Arbresha Sabanin në parlamentin suedez!
Të gjithë ju që jetoni në : Hässleholm, Kristianstad, Osby, Tomelilla, Simrishamn, Ängelholm, Båstad, Perstorp, Östra Göinge dhe Örkelljunga. Mos e prisni ditën e votimit por nga 25 gushti, shko në biblotekë, sallë të kultures, kudo ku enti zgjedhor hapë qendra për votim të parakohëshem, merr listen e partise se gjelbert dhe rrubullakso numrin 1 që të pushtojmë me shqiptarë parlamentin suedez. /BotaSot/ KultPlus.com
Kolegji Universum dhe Knappschaft Kliniken nga Gjermania kanë zhvilluar një akademi të përbashkët të arsimit profesional “Shkollim dhe Punësim në Gjermani”. Në kuadër të kësaj akademie, Kolegji Universum dhe Knappschaft Kliniken kanë hapur thirrjen për 12 BURSA TË PLOTA për maturantë për studime në Programin Infermieri në Kolegjin Universum (Kampusi Ferizaj).
Ky program përgatitor u shërben maturantëve të përzgjedhur që të ndjekin studimet në periudhën prej 18 muajsh (tre semestra) në Kolegjin Universum në Ferizaj, për të vazhduar më pas shkollimin e rregullt trevjeçar (ausbilding) në Gjermani. Kandidatët e suksesshëm që mbarojnë shkollimin (ausbildung), e kanë të siguruar punësimin në qendrat mjekësore që ka në menaxhim Knappschaft Kliniken.
Përzgjedhja e përfituesve do të bëhet përmes testit vlerësues dhe intervistes. Maturantët e përzgjedhur do të studiojnë vitin e parë në Kolegjin Universum dhe vazhdojnë vitin e dytë dhe të tretë në Gjermani. Aplikimi bëhet online përmes këtij linku https://bit.ly/3bvXNLG
Pra të gjithë maturantët e përzgjedhur përfitojnë: – Shkollim FALAS në Programin Infermieri në Kolegjin Universum (Kampusi Ferizaj) dhe në Gjermani; – Kurs FALAS të Gjuhës Gjermane në Universum; – Asistencë për aplikim për vizë dhe qëndrim në Gjermani; – Banim, sigurim shëndetësor dhe kushte për jetesë, të siguruara në Gjermani gjatë studimeve; – Punësim i Garantuar në Gjermani;
Koreografi i njohur kosovar, Robert Nuha do ta përfaqësojë Republikën e Kosovës në festivalin Jerusalem Solo Dance Festival që do të mbahet në Shtetin e Izraelit, nën organizimin e koreografes se njohur izraelite me famë botërore, Miriam Engel.
“Me këtë rast do të qëndroj në rezidencën artistike në Izrael, nga data 22 gusht deri më 9 shtator, me ç’rast do ta mbyll atë përvojë me premierën botërore të densit bashkëkohor të njohur si “Mechanical”, ka shkruar Nuha në rrjetin social Facebook.
Nuha ka falënderuar Ambasadoren e Republikës së Kosovës në Izrael dhe të Ngarkuarën me Punë të Republikës së Kosovës në Jerusalem, znj. Ines Demiri, ambasadat e Shtetit të Izraelit në Republikën e Kosovës dhe në Republikën e Shqipërisë Shkëlqesinë e Saj, si dhe Ambasadoren e Shtetit të Izraelit në Republikën e Kosovës, znj. Tamar Ziv për mbështetjen.
Në qershor të këtij viti, koreografja izraelite Miriam Engel dhuroi performancën artistike “Ndal luftën” në edicionin e dhjetë jubilar të festivalit të vetëm feminist në Ballkan “FemArt”, në Prishtinë. / KultPlus.com
Shoqata “Krimet e Luftës në Gjakovë”, ka dorëzuar sot kallëzim penal në Prokurorinë Speciale të Kosovës kundër ish- komandantit të Brigadës 549 të Motorizuar, Bozhidar Deliq.
Kujtojmë se Deliq tashmë është zgjedhur si nënkryetar i Kuvendit të Serbisë, gjë që ka indinjuar shumë qytetarët e Kosovës.
Deliq, tani ushtarak në pension, dyshohet se ka pasur përgjegjësi të drejtpërdrejtë në kryerjen e krimeve të luftës krimeve në Tërrnje të Suharekës, si dhe vrasjeve të qindra qytetarëve të tjera në Prizren, Rahovec dhe Dragash.
Në kohën kur u kryen këto krime më 1998-1999, Deliq ishte komandat i Brigadës së Motorizuar 549 të ushtrisë Jugosllave.
Në Kosovë, Deliq fëmijërinë e hershme e ka kaluar në fshatin e tij të lindjes, Lugbunar të Gjakovës.
Aty ka kryer shkollën fillore, për t’u zhvendosur më pas në Beograd të Serbisë ku përfundoi akademinë ushtarake.
Në biografinë e tij të publikuar pas zgjedhjes në pozitën e nënkryetarit të Kuvendit të Serbisë, mungon një pjesë e konsiderueshme e karrierës ushtarake.
Aty nuk përmenden fare pozitat e as përgjegjësitë që ka pasur gjatë luftës së Kosovës, përkatësisht në vitet 1998-1999.
Nga vitit 1977, në biografinë e publikuar, kalohet direkt në vitin 2002.
Bozhidar Deliq u pensionua nga ushtria serbe në vitin 2005 dhe më pas iu fut politikës.
Karriera e tij politike karakterizohet kryesisht me të qenit anëtar i Partisë Radikale në Serbi.
Më vonë u bë anëtar i Partisë Progresive të presidentit aktual, Aleksandar Vuçiq, por edhe nga kjo parti u largua.
Në janar të këtij viti themeloi një lëvizje politike të quajtur “Nuk ka kthim, Serbia qëndron prapa”.
Ai ka qenë disa herë deputet i Kuvendit të Serbisë. Kjo është hera e dytë që shërben si nënkryetar i këtij institucioni.
Deliq ishte dëshmitar i mbrojtjes në procesin gjyqësor në Tribunalin e Hagës ndaj ish-presidentit jugosllav, Sllobodan Millosheviq, dhe ish-udhëheqësit ushtarak, Vladimir Lazareviq, që u dënua për krime lufte në Kosovë. / KultPlus.com
Policia e Kosovës ka bërë të ditur sot se është arrestuar një 34 vjeçar, pasi dyshohet se shpërndau fotografi dhe video me përmbajtjeje abuzive seksuale të fëmijëve përmes interneti. Të njëjtit i është sekuestruar telefoni celular, përcjellë KultPlus.
Policia e Kosovës ka apeluar për kujdes dhe raportim të rasteve të tilla.
“Policia e Kosovës, Drejtoria për Hetimin e Krimit të Organizuar, konkretisht Sektori për Hetime të Krimeve Kibernetike, pas veprimeve hetimore dje më datë 15.08.2022 ka identifikuar të dyshuarin i cili ka poseduar disa fotografi dhe video me përmbajtjeje abuzive seksuale të fëmijëve, pastaj këto materiale i ka shpërndarë te personat e tjerë përmes rrjetit social Facebook dhe aplikacionit Wahtsapp. Me këto veprime dyshohet se i njëjti ka kryer veprën penale “Keqpërdorim i fëmijëve në pornografi” përcaktuar sipas kodit penal të Republikës së Kosovës.”
I dyshuari mashkull (1988) është arrestuar nga Policia dhe pas intervistimit me aktvendim të Prokurorit është ndaluar për 48 orë për procedura të mëtejme ligjore,
Kjo dukuri negative e shfaqur në vendin tonë dhe më gjerë, e cila ka të bëj me materialet me përmbajtje të abuzimit seksual të fëmijëve në internet është tepër shqetësuese. Persona të ndryshëm, kryesisht të moshave të reja, i shpërndajnë këto materiale që përmbajnë video dhe fotografi ku abuzohen seksualisht fëmijët e paidentifikuar. Këto fotografi dhe video i shpërndajnë përmes rrjeteve të ndryshme sociale (Facebook, Instagram, Snapchat, TikTok etj.). Kjo dukuri është mjaft shqetësuese për vet faktin se kemi të bëjmë me shtresën më të ndjeshme të shoqërisë. Gjithashtu, një gjë e tillë i ri-viktimizon të gjithë ata fëmijë të abuzuar, edhe pse të paidentifikuar.
Një veprim i tillë është i sanksionuar me Kodin Penal të Republikës së Kosovës ku dënimi është nga një (1) vit burg deri në pesëmbëdhjete (15) vite, varësisht nga forma e kryerjes së veprës penale. Kjo nënkupton që veprimet si:
• kushdo që prodhon video apo fotografi duke abuzuar seksualisht fëmijët ose përdor apo përfshin fëmijën për krijimin ose për prodhimin e shfaqjeve të gjalla, dënohet me burgim prej pesë (5) deri në pesëmbëdhjetë (15) vjet.
• kushdo që shet, shpërndan, promovon, shfaq, transmeton, ofron ose e vë në dispozicion videot apo fotografitë duke u abuzuar seksualisht fëmijët, dënohet me burgim prej tre (3) deri në dhjetë (10) vjet.
• kushdo që siguron për vetveten apo personin tjetër ose posedon video apo fotografi duke abuzuar seksualisht fëmijët, dënohet me gjobë dhe me burgim prej një (1) deri në pesë (5) vjet.
• Gjithashtu, edhe tentativa për të kryer vepër penale nga ky nen është e dënueshme.
“Policia e Kosovës në koordinim me Prokurorin e Shtetit në vazhdimësi janë duke marrë veprimet e nevojshme për trajtimin e kësaj dukurie. Njëkohësisht, Policia e Kosovës bashkëpunon edhe me mekanizmat relevant ndërkombëtar për parandalimin dhe luftimin e kësaj dukurie mjaft shqetësuese.
Shfrytëzojmë rastin që përmes kësaj komunikate t’u bëjmë thirrje në radhë të parë prindërve që të kujdesen për fëmijët e tyre se çfarë materialesh posedojnë në telefonat dhe pajisjet e tjera kompjuterike. Njëkohësisht, ftojmë qytetarët që të raportojnë secilin rast të tillë sepse në këtë mënyrë i mbrojmë fëmijët nga një dukuri e tillë”, thuhet në njoftim. / KultPlus.com
