Mbrëmë në Bibliotekën Kombëtare të Kosovës është shpalosur ekspozita e Akil Dashevcit.
Përmes ekspozitës së tij të parë “Ngjyrat e dashura të Akilit”, ai ka sjell vepra të shkëlqyeshme artistike.
Ministri i Kulturës, Hajrulla Çeku tutje ka njoftuar se Qeveria e Kosovës po punon vazhdimisht për të mundësuar sa më shumë aktivitet dhe integrim shoqëror për personat me aftësi të kufizuara. / KultPlus.com
Ministri i Kulturës, Hajrulla Çeku, ka pritur në takim anëtarët e Këshillit të ri Drejtues të Baletit, në përbërje nga Fisnik Smani, Lejla Pula, Jeta Musolli, Sihana Vitaku dhe Pajtim Zogaj.
Bashkë kanë diskutuar për sfidat që ka aktualisht ky institucion dhe prioritetet e planet për dinamizimin e punës.
Duke iu uruar suksese anëtarëve të rinj në përgjegjësinë që kanë marrë, ministri Çeku ka theksuar se përkrahja e MKRS-së për të zhvilluar baletin nuk do të mungojë asnjëherë, ndërsa anëtarët e Këshillit falënderuan ministrin për pritjen dhe besimin për t’i dhënë një drejtim të ri Baletit, duke theksuar se në këtë institucion kanë parë entuziazëm të madh të punës. /KultPlus.com
Kosova ka arritur një tjetër sukses të madh në E-Sports, këtë herë skuadra e “Bad News Eagles” ka siguruar tri fitore radhazi, për t’u kualifikuar më tej në “Legends Stage”, në turneun më të madh në botë në lojën Counter-Strike, shkruan KultPlus.
Në ndeshjen e fundit, BNE u përballën kundër GamerLegion, duke fituar me lehtësi dhe kësisoj duke siguruar kualifikimin tutje.
Për këtë fitore ka reaguar edhe Ministri i Kulturës, Hajrulla Çeku, duke përgëzuar djemtë për këtë sukses të madh.
“Djemtë e Kosovës duke shkëlqyer në Brazilin që ende nuk na njeh. Pas tri fitoreve, Bad News Eagles në fazën “Legends”. Përgëzime Flatron, Sener, Rigon, Dionis e Genc. Faleminderit që e mbani flamurin e Kosovës në piedestal. 🦅🇽🇰 #IEM Rio Major 2022″, thuhet në postimin e tij.
Siç kishin njoftuar edhe BNE, Çeku kishte luajtur një rol kyç në sigurimin e vizave për ta. /KultPlus.com
Era Berisha
Një nga ngjarjet më të mëdha ndërkombëtare të artit bashkëkohor, “Manifesta 14 Prishtina”, mbrëmë ka mbyllur perden e fundit. E organizuar çdo dy vjet në një qytet tjetër evropian, edicioni i 14-të i Manifestës gjeti hapjen në Prishtinë në muajin korrik, me ç’rast gjithsej 25 hapësira u bënë trendi më i fundit dhe më i ndjekuri në Kosovë. Brenda kësaj periudhe janë shënuar 800 mijë vizita në lokacionet e Manifestës, duke e bërë Prishtinën qendrën më të madhe kulturore në Evropë e jo vetëm, shkruan KultPlus.
Duke i tejkaluar prezantimet e Prishtinës në kuadër të makiatos apo periudhës së pasluftës, Prishtinën tashmë të gjithë e kanë njohur nga një këndvështrim tjetër. Qyteti u shndërrua në muzën e disa nga mediave më prestigjioze në botë por edhe atyre vendore. Përgjatë 100 ditëve, mbi 100 pjesëmarrës kanë ekspozuar artin e tyre dhe emocioni që është shpërfaqur nga puna e tyre, ka dalë përtej imagjinatës së njeriut. Kësisoj, është shfaqur puna artistike dhe kolektive e artit bashkëkohor, një punë kjo që padyshim e ka prekur nivelin botëror e që ka marrë vëmendjen e botës së artit ndërkombëtar.
Vizitorë ndërkombëtarë dhe vendorë kanë pushtuar Prishtinën në masë të madhe. Vëmendja e tyre iu dedikua Manifestës, më konkretisht artistëve pjesëmarrës, nga të cilët ata vendorë qenë rreth 60 përqind (një përqindje më e lartë e artistëve vendas se në shumë bienale të tjera). Puna e tyre e pakrahasueshme iu është prezantuar botës së promovimit, andaj këta artistë kosovarë kanë dëshmuar që shpirti i tyre është i fundosur thellë në “oqeanin” e artit, dhe nuk ka rrugëdalje nga kjo.
Në anën tjetër, Kosova ka dhënë më të mundurën e saj, për të organizuar e mbajtur një ngjarje të përmasave të tilla. Duke pasur parasysh që ardhja në Kosovë e një bienale të tillë që radhitet në mesin e pesë bienaleve më të fuqishme të artit pamor në botë, atëherë mund të themi që Kosova ka arritur t’i thyej limitet e veta.
Kujtojmë se me përfundimin e Manifestës, Ministria e Kulturës është duke ndërmarr hapat që të sigurohet një trashëgimi e prekshme dhe konkrete e Manifestës, gjë që do të finalizohet ditëve në vijim. Gjithashtu MKRS është angazhuar për të mbajtur të ekspozuara veprat e intervenimit artistik të Petrit Halilaj dhe Flaka Halitit deri në fund të vitit 2023. Ndërkaq, ministri i Kulturës, Hajrulla Çeku pati bërë të ditur se ky është viti kur është iniciuar themelimi i Muzeut të Artit Bashkëkohor në Kosovë dhe mendohet që projekti do të zgjasë deri më 2026.
Qe arkitekti italian Carlo Ratti ai që krijoi një vizion urban për Prishtinën, duke sugjeruar mënyra se si vendet e braktisura në të gjithë qytetin mund të ringjallen për përdorim publik. Bienalja ka përdorur këto vende si hapësira ekspozite: “Grand Hotel Prishtina”, “Sheshi Zahir Pajaziti”, “Kino Armata”, “Biblioteka Kombëtare e Kosovës”, “Fakulteti Filozofik – UP”, ”Galeria Kombëtare e Kosovës”, “Galeria e Fakultetit të Arteve – UP”, “Rruga 2 korriku” , “Çelësa punues”, “Gërmia departament store”, “Kino Rinia”, “Qendra për Praktikë Narrative”, “Sheshi Adem Jashari”, “Biblioteka Kombëtare e Kosovës”, “Hamami i Madh”, “Foundation 17 Gallery Space”, “Muzeu Etnologjik”, “Fabrika e Tullave”, “Green Corridor”, “Rilindja”, “Pallati i Rinisë dhe Sportit”, “Prishtina Observatory”, “The Flat”, “Partisan Martyr’s Cemetery Monument”, “Hertica School House”.
Konsiderohet që Bienalja këtë vit është përpjekur për të lënë një trashëgimi për artistët në Kosovë, duke përfshirë hapësirën e quajtur “Qendra për Praktikë Narrative”. Qendra përfshin një dhomë të errët fotografike dhe një punëtori të mbushur me mjete elektrike për t’i përdorur artistët. Autoritetet e qytetit të Prishtinës i kanë dhënë Manifestës ndërtesën për katër vjet dhe fondacioni që drejton bienalen po mbledh fonde për ta bërë atë një institucion të përhershëm.
Mbyllja zyrtare e “Manifesta 14 Prishtina” në Fabrikën e Tullave përkoi me disa fjalime si dhe me një performancë speciale nga grupi Saz’iso.
Drejtoresha e Manifesës, Hedwig Fijen ka falënderuar secilin person që ka qenë pjesë e 100 ditëve, duke përmendur se mbështetja e tyre është simbol i brezit të ri të fuqishëm të Kosovës.
“Pikërisht kur arritëm këtu në Prishtinë i premtova Kryetarit dhe Ministrit se do të ishte edicioni më i mirë ndonjëherë. E mbajtëm premtimin. Mendoj me gjithë zemër që e bëmë. Vetëkuptohet që ne jemi jashtëzakonisht mirënjohës për të gjithë 109 partnerët dhe financuesit tanë. Por para së gjithash, le t’u japim një duartrokitje të ngrohtë sepse shumë prej tyre janë këtu. I jemi thellësisht mirënjohës të gjithë artistëve, ndërkombëtarë dhe kosovarë, për veprat inteligjente dhe brilante dhe për angazhimin e tyre. Tani, unë do të filloj me listën time të pabesueshme të gjatë të emrave të njerëzve që meritojnë njohjen, të cilët dhanë gjithë çka mundën për të ndërtuar këtë edicion të jashtëzakonshëm. Nuk ka audiencë, asnjë njoftim për shtyp, asnjë publikim, asnjë komunikim, pa këta njerëz”, ka thënë Fijen.
Sipas saj, stafi i tyre mbështetës, mbështetja e tyre e përkushtuar është simbol i brezit të ri të fuqishëm të Kosovës. Dhe, nuk do të kishte vepra arti, artistë, ekspozita, vende, asgjë, pa ekipin e tyre të prodhimit. E po ashtu, nuk do të kishte turne ndërmjetësuesish, asnjë program shkolle, asnjë hulumtim para-bienal, nuk do të kishte qytetarë, as nën-kulturë, pa ekipin e tyre të arsimit.
“Faleminderit të gjithëve për gjithçka që dhatë. Faleminderit, audiencave, sepse në fund të fundit, ne i bëjmë të gjitha për ju dhe jo për ne. Më shumë se 800 mijë panë se çfarë ndodhi në qytet. Një duartrokitje e madhe shkon për veten tuaj”, përfundon Fijen.
Ndërkaq, ministri i Ministrisë së Kulturës, Rinisë dhe Sportit, Hajrulla Çeku ka ri-konfirmuar se Kosova ka kapacitetin për të organizuar një ngjarje kaq të madhe të artit ndërkombëtar.
“Faleminderit që jeni sonte këtu. Po e mbyllim një udhëtim të jashtëzakonshëm në të cilin shumë njerëz kanë kontribuar, e unë posaçërisht dua t’i shpreh falënderimet tona si Ministri për Hedwig the ekipin, për punën e tyre të mrekullueshme dhe në të njëjtën kohë dua ta ri-konfirmoj këtë që tashmë është shumë e qartë. Kosova nuk e ka vetëm vullnetin por e ka edhe kapacitetin për të organizuar një ngjarje kaq të madhe të artit ndërkombëtar. Jemi shumë të sigurt që do të vazhdojmë edhe më tutje. Ne ia kemi dalë së bashku me institucionet, artistët, organizatorët, dhe të gjithë ju që keni kontribuar në një formë apo tjetër”, ka thënë Çeku.
Gjithashtu, kryetari i Komunës së Prishtinës, Përparim Rama ka përmendur se trashëgimia e Manifestës, do të jetojë tutje, nëpërmjet ndërtesave, instalacioneve, Fabrikës së Tullave, bibliotekës “Hivzi Sulejmani” dhe “Green Corridor”.
“Është një ndjenjë fantastike për të qenë sonte këtu me të gjithë ju, për të përmbyllur një event aq fenomenal për kryeqytetin tonë, për vendin tonë. Kanë qenë me të vërtetë 100 ditë të mrekullueshme. Ishte me të vërtetë një ëndërr e realizuar, të shihja të gjithë qytetin si muze. Me Manifestën e kemi bërë këtë, por Prishtina përplot 100 ditë është transferuar në një qytet-muze të artit kontemporan. Kam premtuar më herët që trashëgimia do të vazhdojë. Trashëgimia e Manifestës do të jetojë tutje, dhe do të jetojë nëpërmjet ndërtesave, instalacioneve, “Tulltores”, bibliotekës “Hivzi Suljemani”. Po ashtu, do të jetojë nëpërmjet “Green Corridor” dhe ne patjetër që nuk do ta humbasin vrullin dhe do të vazhdojmë të krijojmë gjëra të bukura për qytetin tonë”, ka thënë Rama.
Sipas tij, ata janë të vetëdijshëm që ka shumë punë para tyre por kjo vetëm tregon që nëse njerëzit bashkohen, nuk do të ka çfarë t’i ndal ata për të transformuar kryeqytetin, e për ta bërë një kryeqytet me karakterin më unik në botë.
“E kemi edhe një numër të madh të gjërave që kanë ndodhur këtyre ditëve. Kemi mësuar se çka i duhet qytetit, çka dëshiron qyteti dhe çfarë dëshirojnë qytetarët e Prishtinës. Kjo nuk është lamtumirë. Kjo në fakt është fillimi i “Manifesta 14 foundation” që do të vazhdojë trashëgiminë në qytet. Andaj, të dashurohemi me Prishtinën. Le ta zbulojmë dhe t’i tregojmë botës historitë tona të suksesit”, përfundon ai.
Mbrëmja në Fabrikën e Tullave vazhdoi me një performancë speciale nga bendi “Saz’iso”, që solli tingujt e jugut të Shqipërisë mu në mesin e Prishtinës. Instrumentet diversive në skenë kanë shënuar fundin e një ngjarje kulturore, teksa kanë jehuar nëpër çdo shpirt të pranishëm.
Të rrethuar nga prezenca e dritës së hënës, zjarri gjigand që shërbente për ngrohtësi, reflektorë të ndryshëm që dhanë hijeshi, muzika shqiptare krejtësisht e rrallë, ushqimi i llojllojshëm e pija, të pranishmit kanë qenë dëshmitarë të një rrugëtimi që zor se harrohet dot. Me “Manifesta 14” është rishkruar e ardhmja e kryeqytetit.
Artistët pjesëmarrës në “Manifesta 14 Prishtina”: Abazi/Greville/Pinchuk, Larry Achiampong, Astronomy Club of Kosova, Bora Baboçi, Celine Baumann, Elona Beqiraj, Valentina Bonizzi, Anna Bromley, Luz Broto, Lee Bul, Lua Coderch, Daniel Gustav Cramer dhe Haris Epaminonda, Ilir Dalipi, Yael Davids me Andre van Bergen, Cevdet Erek, ETEA, Jakup Ferri, Foundation 17, Lek M.Gjeloshi, Nuria Guell, Driton Hajredini, Artan Hajrullahu, Laureta Hajrullahu, Petrit Halilaj, Flaka Haliti, Lawrence Abu Hamdan, Haveit Collective, Roni Horn, Fahrija Hoti dhe gratë e Krushës së Madhe, Majlinda Hoxha, ICA-Sofia, Astrit Ismaili, Fitore Isufi Shukriu – Koja, Hristina Ivanoska, Emily Jacir, Jelena Juresa, Genc Kadriu, Alevtina Kakhidze, Sejla Kameric, Antoneta Kastrati me Casey Cooper Johnson, Doruntina Kastrati, Kino Armata, Genti Korini, Argjirë Krasniqi, Edona Kryeziu, Katalin Ladik, Luljeta Lleshanaku, Nimon Lokaj, Jumana Manna, Brilant Milazimi, Hana Miletic, Ivan Moudov, Alekta Xhafa Mripa, Alban Muja, Sami Mustafa, Silvi Naçi, Natasha Nedelkova, New Grand (Blerta Hashani, Arbnor Karaliti, Lumturie Krasniqi, Mimoza Sahiti, Valdrin Thaqi, Ermir Zhinipotoku), Tuan Andrew Nguyen, Thao Nguyen Phan, Vigan Nimani, Christian Nyampeta, Off Season, Adrian Paci, Susan Philipsz dhe Radio International Collective, Marubi National Museum of Photography, Marta Popivoda, PykëPresje, Sahej Rahal, Lala Rascic, Carlo Ratti Associati, raumlaborberlin, re.act.feminism, Alicja Rogalska, RomaMoMa me Farija Mehmetin, Ugo Rondinone, Nusret Salihamixhiqi, Secondary Archive, Sekhmet Institute, Selma Selman, Driton Selmani, Dineo Seshee Bopape, Abi Shehu, Chiharu Shiota, Igor Simic, Uyra Sodoma, Speculative Tourism, Beth Stephens dhe Annie Sprinkle, Mette Sterre, StoryLab, Kolektivi the names comes last, tamtam, Miryana Todorova, Vangjush Vellahu, Alije Vokshi, Werker Collective, Sislej Xhafa, Yll Xhaferi, Miki Yui, Driant Zeneli, Hana Zeqa, Lulzim Zeqiri, Dardan Zhegrova. / KultPlus.com
Ministri për Kulturë, Rini dhe Sort, Hajrulla Çeku, ka thënë se është tejet i gëzuar që pas një pune të gjatë dhe sfiduese, sot ka nënshkruar licencën e parë për një federatë të sportit, sipas udhëzimit të ri administrativ për licencimin e federatave.
Sipas tij, ky është një nga angazhimet qendrore të Ministrisë së Sportit në përmbushje të njërit nga zotimet kryesore, fuqizimit të standardeve të qeverisjes së mirë në organizatat sportive të Kosovës, njofton Klan Kosova.
“Pas rekomandimit pozitiv të Komisionit për licencim në kuadër të Ministrisë së Sportit, kryetarit të Federatës së Pingpongut të Kosovës, Jeton Beqiri sot zyrtarisht ia dorëzova vendimin dhe licencën për ushtrimin e veprimtarisë, me afat vlefshmërie deri në fund të vitit 2024. Përgëzime për FPPK-në, dhe shumë suksese në masivizimin dhe ngritjen e cilësisë në sportin e pingpongut në Kosovë”.
“Nga Komisioni për licencim u njoftova që një numër i federatave tashmë kanë dorëzuar aplikacionet për licencim, ndërsa së shpejti pritet që të dorëzohen edhe disa aplikacione të tjera. Jemi të përkushtuar për të çuar përpara synimin tonë strategjik për më shumë integritet në sistemin tonë sportiv. Dita e sotme është datë e shënuar për sportin kosovar”./KultPlus.com
Ministri i Kulturës, Hajrulla Çeku, ka pritur sot në takim boksieren Donjeta Sadiku dhe trajneren Marjola Sallauka e të cilat i shpërbleu për sukseset e arritura në Kampionatin eEuropian ku bokierja kosovare fitoi medaljen e bronztë, përcjell KultPlus.
Çeku përmes një postimi në Facebook tha se takimet me sportistet janë shumë frymëzuese dhe të japin motiv shtesë.
KultPlus ua sjell postimin e plotë të ministrit Çeku:
Donjeta Sadiku, pas medaljes botërore, tash me të bronztën europiane dhe me plot vendosmëri edhe drejt medaljes olimpike
Gjithmonë janë shumë frymëzuese dhe të japin motiv shtesë takimet me sportistet tona që me angazhimin e tyre po na bëjnë krenarë të gjithëve.
Boksieren Donjeta Sadiku, bashkë me trajneren Marjola Sallauka, kryetarin e Federatës së Boksit, Enver Krasniqi dhe sekretarin e përgjithshëm, Latif Demolli i prita sot në kabinet.
I urova për medaljen e re që i sollën shtetit tonë, të bronztën në Kampionatin Europian, ndërsa i ndamë shpërblimin në vlerë prej tetë mijë euro për Donjetën dhe katër mijë euro për trajneren, Marjola Sallauka, bazuar në rregulloren për shpërblime të sportistëve, të cilët arrijnë rezultate kulminante në gara ndërkombëtare.
Donjetës i uroj suksese të radhës!/KultPlus.com
Ministri i Kulturës, Hajrulla Çeku është shprehur se sportistet kosovare po japin shembull për fëmijët e të rinjtë e vendit me sukseset ndërkombëtare duke u bërë po ashtu promovimi ynë më i mirë si shtet, përcjell KultPlus.
“Momente plot krenari për vendin tonë. Urime të gjitha sportisteve dhe komunitetit të sportit”, ka shkruar ai.
Më poshtë gjeni postimin e tij të plotë:
Katër medalje të reja për shtetin e Kosovës
Sportistet tona po japin shembull për fëmijët e të rinjtë e vendit me sukseset ndërkombëtare duke u bërë po ashtu promovimi ynë më i mirë si shtet.
Fundjava ishte plot suksese në fushën e sportit. Boksierja Donjeta Sadiku mori medaljen e bronztë në Kampionatin Evropian të Budva, një sukses historik, Nora Gjakova fitoi medaljen e argjendtë në Grand Slamin e xhudos që u mbajt në Abu Dhabi, ndërsa në garën e njejtë xhudistja Loriana Kuka mori medaljen e bronztë. Që po zhvillohen gjenerata të reja me potencial në xhudo na dëshmoi Laurina Gashi, e cila mori medaljen e artë në Kupën Evropiane për kadete (U18).
Momente plot krenari për vendin tonë. Urime të gjitha sportisteve dhe komunitetit të sportit. / KultPlus.com
Ministri i Sportit, Hajrulla Çeku ka pritur sot në takim përfaqësuesit e klubit futbollistik “FC Kosova” nga Cyrihu, fitues të Kupës së Diasporës në Zvicër.
Me kryetarin e klubit, Nesret Limani diskutuan për organizimin e klubeve shqiptare në Zvicër dhe për të arriturat e “FC Kosova”, duke potencuar edhe bashkëpunimin që mund të kenë futbollistët e Kosovës dhe futbollistët shqiptar të Zvicrës.
Ministri Çeku ka falenderuar delegacionin e “FC Kosova” për vizitën ndërsa duke i uruar për rezultatin e arritur tha se është në interes të ketë bashkëpunim për zhvillimin e sportit të klubeve shqiptare në diasporë. / KultPlus.com
1247 eksponate të koleksionit të muzeut publik të Kosovës janë marrë nga Muzeu Kombëtar i Kosovës gjatë kohës së luftës (1998-99) nga Akademia e Shkencave të Serbisë. Por ministri Hajrulla Çeku thekson se Serbia po vazhdon të shkelë konventat e UNESCO-s, përcjell KultPlus.
Më poshtë gjeni postimin e tij të plotë:
Ishte pjesë e projektit gjenocidal të Serbisë kundër historisë dhe identitetit të shqiptarëve, krahas shkatërrimit të mbi 1000 vendeve trashëgimore.
Duke mos i kthyer eksponatet në vendin e tyre të origjinës, Serbia po shkel në mënyrë flagrante konventat e UNESCO-s, marrëveshjen origjinale dhe dokumentin e Ahtisaarit.
Ja disa nga thesaret e vjedhura arkeologjike dhe etnografike që i përkasin koleksionit publik të muzeut të Republikës së Kosovës.
(përshkrimet në mbishkrimet e fotove) / KultPlus.com
Ministri i Kulturës, Rinisë dhe Sportit, Hajrulla Çeku ka pritur sot në takim ministren e Kulturës dhe Sportit të Greqisë, Lina Mendoni, ambasadoren e Zyrës Ndërlidhëse Greke në Kosovë, Heleni Vakali, udhëheqësin e Zyrës së Interesave të Kosovës në Athinë, Fitim Gllareva dhe bashkëpunëtorët e tyre.
Në një frymë shumë pozitive diskutuan për fuqizimin e bashkëpunimit në mes të dy shteteve në fushën e kulturës, trashëgimisë kulturore dhe sportit.
Të dyja palët shprehën gatishmëri për të kaluar në veprime dhe aktivitete konkrete. Ministrja Mendoni e ftoi ministrin Çeku në Athinë për të vazhduar diskutimet dhe konkretizuar bashkëpunimin.
Delegacioni nga Greqia do të kenë disa takime dhe vizita në institucione të kulturës dhe në monumente të trashëgimisë kulturore përgjatë vizitës së tyre zyrtare në Kosovë. / KultPlus.com
Flonja Haxhaj
Gjysmë shekulli punë, dedikim dhe sakrificë e Baletit Kombëtar të Kosovës, u manifestuan mbrëmë me një organizim që erdhi përplot emocion, në datën që shënoi një përvjetor jubilar të një institucioni që i dhuroi shumë Kosovës për kaq vite jetë, shkruan KultPlus.
Publiku i shumtë në numër, pasi kishin zënë vend të sallën ‘1 Tetori’ në Prishtinë, ishin gjithë sy e veshë për të parë se dritat po uleshin dhe mbrëmja po fillonte.
Me zërin drithërues të Berat Miftarit dhe imazhet e historikut të BKK-së që po lëviznin në monitorët e dy skajeve të sallës, u shfaq dokumentari, si një dokument i një rrugëtimi nëpër të cilin kaloi Baleti i Kosovës përgjatë këtyre viteve.
E për të shënuar një 50-vjetor meritor të Baletit Kombëtar të Kosovës, BKK bashkoi forcat me Trupën e Teatrit të Operas dhe Baletit të Shqipërisë dhe Orkestrës së Filharmonisë së Kosovës për të jetësuar dhe rivënë në skenë baletin e parë shqiptar ‘Halili dhe Hajria’, shfaqje kjo me të cilën Baleti i Kosovës i hodhi hapat e parë, që do të pasoheshin me vështirësi dhe shumë sakrifica por një punë të madhe.
Në një sallë të improvizuar, vepra tërësisht shqiptare me muzikë nga Tish Daija dhe koreografi nga Panajot Kanaçi, erdhi në Prishtinë me një përcjellje të gjallë të orkestrës që u printe dirigjenti Gridi Kraja dhe balerinët e vënë në skenë nga Alisa Gjoni.
E mbrëmja u kurorëzua me paraqitjen e gjeneratës së parë të Baletit të Kosovës, të cilët u ngjitën në skenë me kokën lart pas duartrokitjeve që i morën nga publiku në shenjë mirënjohje për veprimtarinë e tyre të pashoq.
Ata iu bashkuan trupës së baletit dhe balerinëve të vegjël duke sjellë një performancë magjike nën tingujt e ‘Bareshës’ së Nexhmije Pagarushës duke ia shtuar edhe më shumë veçantinë kësaj mbrëmje madhështore.
Në mbrëmjen që përcolli emocion në publikun artdashës, pati edhe fjalime të krerëve të institucioneve shtetërore dhe nismëtarë të institucionit më të rëndësishëm të këtij arti.
Fjalën i pari e mori ministri i Kulturës, Rinisë dhe Sportit, Hajrullah Çeku, i cili filloi fjalimin e tij duke shprehur mirënjohje për qindra ata gra e burra që ndër dekada dhanë gjithçka për ta sjellë Baletin Kombëtar të Kosovës në gjysmë shekulli përvojë e lavdi.
“Që nga themelimi në brezin e parë, BKK ka korrur suksese të njëpasnjëshme, ka zhvilluar breza të tërë profesionistësh brenda Kosovës, ka ofruar program të pasur për publikun duke bashkëpunuar me koreografë të shumtë nga vendi dhe bota”, deklaroi Çeku duke shtuar se BKK ka pasur një rrugëtim aspak të lehtë por të mbushur me krenari, sfida të panumërta, përkushtim vetëmohues e shumë dashuri për artin e lëvizjes.
Çeku po ashtu foli edhe për problemin kyç që po e shoqëron këtë institucion tash e 50 vite, mungesën e një objekti të përshtatshëm për veprimtarinë artistike.
“Angazhimi institucional për përmirësimin e infrastrukturës kulturës do të jetë i vazhdueshëm përderisa ndërtesa e Teatrit Kombëtar është në proces rinovimi dhe po krijojmë hapësirë alternative pune e koncertimi për Filharmoninë e Kosovës, paralelisht do të zhvillohet procesi ndërkombëtar për projektimin dhe ndërtimin e Teatrit të Operas dhe Baletit, shtëpia jonë e përbashkët e cila do t’i akomodojë artet skenike të Kosovës”, përfundoi Çeku.
Ndërkaq, kjo mbrëmje nuk do të kishte të njëjtin kuptim pa prezencën dhe fjalimin e një prej nismëtarëve dhe pjestarëve të brezit të parë që vunë themelet artistike të institucionit të baletit, Elez Nikçi.
“Kam nderin dhe privilegjin që t’ju drejtohem në një fjalë rasti në këtë moment historik kur Baleti Kombëtar i Kosovës po shënon dinjitetshëm 50-vjetorin e lindjes. Kur e shikoj këtë atmosfterë në sallë më shfaqen imazhe të trupës së parë ktu e 50 vite më parë, një grup i vogël entuziastësh të diciplinuar në skenë, artistë në shpirt, vizionarë, unikë ndaj qëllimit final, morën përsipër që të bënin diçka që ishte e nevojshme për ne dhe për vendin tonë para së gjithash.”, u shpreh Nikçi e për të cilin kjo mbrëmje kishte edhe një dozë tjetër emocioni pasi 50 vite më parë ishte ai që u vish në kostumin e Halilit në baletin ‘Halili dhe Hajria’.
“Kalendarikisht brezi im ka realizuar rreth 22 premiera, për ajo që do të veçoja është koreografia e maestros dhe doajenit të baletit, Panajot Kanaçi, ‘Halili dhe Hajria’,me të cilën po e shënojmë simbolikisht standardin e rrugëtimit dhe formësimit tonë si kreatorë të skenës kombëtare”, shtoi Nikçi.
E për të festuar këtë përvjetor jubilar, në skenë u ngjit drejtori i Baletit Kombëtar të Kosovës, Sinan Kajtazi, i cili po ashtu i përket gjeneratës së parë së balerinëve të diplomuar pas luftës.
Kajtazi shprehet se për 50 vite me radhë fati i Baletit Kombëtar të Kosovës ka qenë i lidhur kryekëput me fatin e të gjithë popullit të Kosovës dhe nuk përbën ndonjë përjashtim në aspektin e vështirësive dhe sfidave nëpër të cilat ka kaluar vendi ynë.
“Baleti Kombëtar i Kosovës, historinë e ka të ndarë në dy etapa, atë të gjeneratës së parë të balerinëve të cilët nga viti 1972 vunë në skenë vepra të repertorit kombëtar dhe botëror deri në vitin 1991 kur në mënyrë të dhunshme u larguan nga teatri. Etapa e dytë është e pasluftës kur profesori Ahmet Brahimaj së bashku me kolegët e gjeneratës së vetë arritën të rithemelojnë Baletin Kombëtar të Kosovës duke krijuar brezin e rinj të balerinëve të cilët rivunë në jetë këtë institucion i cili kishte pushuar së funkionuari për një dekadë.”, tha Kajtazi i cili ndër të tjerash shtoi se balerinët sot e kanë më të lehtë sepse dikush tjetër e themeloi atë 50 vite më parë kurse tani u mbetet vetëm kujdesi ndaj tij që të festojë edhe shumë jubile në të ardhmen, përcjell KultPlus.
Më tutje, Kajtazi nderoi jetën dhe veprën e profesorit të ndjerë Ahmet Brahimaj, një prej nismëtarëve dhe pjesë e brezit të parë të baletit të Kosovës, duke e cilësuar si personin më të rëndësishëm, pa kontributin e të cilit nuk do të bëhej mbrëmja e djeshme.
Ky fjalim u përcoll me duartrokitje të shumta, në falënderim për personin që i dha kaq shumë këtij institucioni që pavarësisht vështirësive dhe barrierave, mbrëmë shënoi gjysmë shekulli jetë.
Po ashtu, Kajtazi shfrytëzoi këtë fjalim për të kërkuar një sallë të mirëfilltë për Baletin Kombëtar të Kosovës duke shpresuar që 55-vjetori i këtij institucioni kaq të rëndësishëm ta gjejë atë me një teatër ku të gjithë balerinët të mund ta shprehin të gjithë potencialin e tyre artistik pa barriera, në kushte elementare të punës.
Në këtë mbrëmje dhe këtë manifestim kaq të veçantë e domethënës u nderua personi të cilit i jepen shumë atribute për të arriturat e Baletit Kombëtar të Kosovës, Ahmet Brahimaj, për të cilin u nda mirënjohje ‘Post Mortum’.
E në emrin e familjes, foli bashkëshortja e tij, Zogëza Mulaku – Brahimaj e cila e përgëzon punën e baletit dhe i uron suksese dhe jetë të gjatë deri në pafundësi.
“Me shumë emocione e pranoj këtë mirënjohje për Ahmetin dhe jam tejet e lumtur që balerinët tanë vazhdojnë të punojnë me energji të plotë dhe i tejkalojnë me mjeshtëri të gjitha barrierat. Sukseset dhe perfeksionimi i tyre vazhdojnë të mahnisin dhe të lobojnë për Kosovës përmes kulturës dhe vlerave cilësore jo vetëm në Kosovë por edhe më tej.” , u shpreh Mulaku – Brahimaj duke shtuar se fryma dhe shpirti i Ahmet Brahimaj janë në Baletin Kombëtar të Kosovës dhe për aq sa baleti ekziston aq edhe ai është i pavdekshëm.
Ju kujtojmë që Trupa e parë e Baletit të Kosovës u formua në vitin 1972. Balerinët e kësaj gjenerate u shkolluan në Shkollen e Mesme të Baletit në Shkup, nën udhëheqjen e Tatjana Petkovska. Në shkollë kanë diplomuar 25 balerinë nga Kosova – 19 meshkuj dhe 6 femra. Pas përfundimit të suksesshëm të shkollimit, shumica e balerinëve u kthyen në Prishtinë. Në kuadër të Teatrit Kombëtar të Kosovës u formua Baleti i Kosovës. Pjesëtarët e parë të baletit ishin: Ahmet Brahimaj, Rustem Selca, Elez Nikçi, Shqipe Hoxha, Esma Mulla, Salajdin Kice, Gani Loshi, Jonuz Beqiraj, Hysen Podrimçaku, Rrustem Bajrami, Rustem Metaj, Isa Bajraktari, Gani Shala, Skender Domniku, Shaban Shabanaj dhe Enver Berisha.
Drejtor u emërua Abdurrahman Nokshiqi. Më vonë trupës iu bashkuan edhe 5 baerinci nga Shkupi (Nexhmije Meha Selca, Sabrije Spahiu Shkreli), si dhe dy balerina nga Kosova (Enver Elshani dhe Jashar Berisha). Me punë dhe përkushtim, brezi i parë vuri në skenë shumë produksione te mëdha.
Në vitin 1991, balerinët u larguan me dhunë nga teatri duke ndërprerë të gjitha aktivitetet e tyre.
Pas luftës, me ndihmën e disa kolegëve, Ahmet Brahimaj hapi shkollën e parë të mesme të baletit, në kuadër të shkollës së mesme muzikore “Prenkë Jakova”. Në vitin 2001, pas shumë vitesh mungesë, gjenerata e parë e Baletit të Kosovës u rikthye në skenë e shoqëruar nga valltarët e rinj të shkollës. Emisioni i parë, “Fyelltari” u shfaq me shumë sukses.
Në vitin 2005 mbaron klasën e parë të Ahmet Brahimajt në Liceun e Baletit. Sot këta valltarë përbëjnë bërthamën e Baletit të Kosovës. Në mesin e maturantëve ishin: Bardha Neziri, Behije Murtezi, Luljeta Aderni, Vjollca Llugiqi, Leonora Rexhepi, Jeta Musolli, Sinan Kajtazi, Labinot Rexhepi, Drilon Podrimçaku, dhe Driton Saqipi. Më vonë në trupën e brezit të ri të shkollës bashkohen edhe më shumë balerinë si: Teuta Krasniqi., Marigona Hoxha, Kreshnik Musolli, Sead Vuniqi, Muhamet Bikliqi, Liridon Mziu, Fisnik Smani, Fatmir Smant, Aulonë Nuhiu, Nora Gashi, Abetare Hyseni, Vlora Prizreni, Mimoza Bytyqi, Mërgime Morina, Isa Beg Gjocaj, Donmir Bilalli, Elmedina Berisha, Besarta Shaljani, Flakarta Qorri, Shpëtim Mejtani etj. Baleti ka realizuar shumë shfaqje të suksesshme, moderne dhe klasike./ KultPlus.com
Ministri Çeku dhe zëvendësministrja Daulina Osmani pritën në takim shefin e futbollit në UEFA, Zvonimir Boban, shoqëruar nga kryetari i Federatës së Futbollit të Kosovës, Agim Ademi, përcjell KultPlus.
Bashkë diskutuan për programin e Qeverisë së Kosovës për sportin në përgjithësi e në veçanti për infrastrukturën sportive të futbollit në vend. Po ashtu gjatë këtij takimi u fol për hapat konkretë për avancimin e mëtejmë të futbollit kosovar në arenën ndërkombëtare.
Shefi i futbollit Boban e falënderoi ministrin Çeku për pritjen ndërsa të dy shprehën gatishmërinë për të bashkëpunuar në zhvillimin e sportit të futbollit kosovar./ KultPlus.com
Është shpalosur sot projekti i nënshkruar në mbledhjen e 99 të Qeverisë së Kosovës “Kosova, shtet i xhudos’ me të cilin synohet që të fuqizohet sporti si mjet për ndërtimin dhe ruajtjen e mirëqenies shoqërore dhe ekonomike si dhe kanal kryesor për promovimin e Kosovës në arenën ndërkombëtare.
Në këtë ceremoni kaq me rëndësi për sportin kosovar ishte i pranishëm edhe kryeministri i Kosovës, Albin Kurti, i cili u shpreh se xhudo dhe rezultatet e xhudistëve kosovarë kanë qenë kryefjala e sportit vendos tash e 15 vite.
“Qysh në të kaluarën në vitet 90-ta pastaj edhe pas shpalljes së Pavarësisë së Kosovës e fuqishëm deri në ditët e sotme, sporti është dëshmuar si një nga mekanizmat kyç në procesin e ndërtimit të imazhit tonë shtetëror dhe promomivimin e Kosovës në arenën ndërkombëtare.”, u shpreh i pari i qeverisë, duke shtuar se sporti në përgjithësi dhe xhudo posaçërisht ka bërë punë të jashtëzakonshme në krijimin e ndjenjës së përkatësisë brenda shoqërisë sonë dhe krijimin e përceptimit pozitiv të opinionit të huaj për Kosovën.
“‘Kosova shtet i xhudos’ është hapi konkret të cilin e kemi ndërmarrë si Qeveri për të siguruar jo vetëm vazhdimësinë e ndikimit të xhudos në promovimin tonë ndërkombëtar por mbi të gjitha zhvillimin maksimal të këtij sporti përbrenda Republikës së Kosovës.”, tha mes tjerash kryeministri Kurti.
Kurti po ashtu tha se për herë të parë në Kosovë, sporti po zë vendin dhe po merr trajtimin e merituar.
Më pas, fjalën e mori kryetari i Federatës së Xhudos në Kosovë, Agron Kuka i cili e cilëson këtë program si programin më me vlerë që ka ndodhur në historinë e sportit të Kosovës, duke ia atribuuar punës së xhudistëve dhe trajnerëve të sportit të xhudos në Kosovë që sivjet shënon edhe 55-vjetorin e themelimit.
“E Përgjatë këtyre 55 vitete kemi gjenerata të tëra që punuan me zell e përkushtim për avancimin dhe zhvillimin e sportit të xhudos duke filluar me gjeneratën e artë të viteve 70-të dhe duke vazhduar deri në ditët e sotme ku patëm fatin e jashtëzakonshëm që në mesin tonë të veprojë dhe punojë kampioni olimpik, Driton Kuka, i shpallur edhe zyrtarisht si trajneri më i mirë në botë dhe Evropë për vitin 2021. Tri medalje të arta olimpike, dhjetëra botërore e evropiane e qindra ndërkombëtare.”, u shpreh Kuka duke shtuar tutje se kjo duhet të ketë qenë arsyeja dhe motivimi për ministrin Çeku që të fillojë një program të tillë që në thelb e ka promovimin e vendit dhe avancimin e xhudos në shumë dimensione.
E pranishme në këtë cermoni ishte edhe ish-kampionja olimpike, Majlinda Kelmendi e cila tha se ky është një program jashtëzakonisht i rëndësishëm, që u mundëson sportistëve të kenë masivitet, kushte më të mira për stërvitje duke marrë parasysh që do të ndërtohet nga një doxh në pothuajse në secilin qytet të Kosovës dhe më e rëndësishmja të ketë vazhdimësi të sukseseve.
“Jam jashtëzakonisht e lumtur që sporti i xhudos më në fund po e merr vendin dhe trajtimin e duhur, siç e tha edhe kryeministri sepse ka tash e 15 vite që çdo qytetar i Kosovës mburret me sukseset e sportit të xhudos. Fatmirësisht, përmes punës së jashtëzakonshme të trajnerit Driton Kukat kemi hapur dyer të cilat edhe sot përmes politikës është e vështirë të hapen. Jemi ulur në tavolina që politika e ka të vështirë të ulet me ata njerëz, me ato shtete, kështu që përmes sportit ka qenë shumë më e lehtë.”, u shpreh mes tjerash Kelmendi.
Kurse për ministrin e Kulturës, Rinisë dhe Sportit, Hajrulla Çeku, programi ‘Kosova shtet i xhudos’ i shërben qëllimeve strategjike të institucioneve shtetërore dhe synon të ndikojë në mirëqenien shoqërore, shëndet publik dhe në promovimin ndërkombëtar të shtetit të Kosovës.
Çeku më tutje njofton se ky program ka gjithsej gjashtë qëllime kryesore.
“Janë gjashtë qëllime kryesore, një është infrastruktura e përmirësuar fizike, dy është fuqizimi i kapaciteteve trajnuese, tre është masivizimi i sportit të xhudos, katër është mbështetja për sportistët dhe trajnerët elitarë, pesë është organizimi i ngjarjeve ndërkombëtare sportive në vendin tonë dhe gjashtë promovimi ndërkombëtar i shtetit të Kosovës”, u shpreh ministri Çeku.
Programi ‘Kosova shtet i xhudos’ është një kornizë strategjike veprimi për pesë vitet e ardhshme në vlerë prej 12 milionë eurosh./ KultPlus.com
Ministri i Kulturës, Hajrulla Çeku, ka pritur në kabinetin e tij Presidentin e FIFA-s, Gianni Infantino, shkruan KultPlus.
Përmes një postimi në “Facebook”, Çeku njofton se aty u diskutua dhe ndanë mendime e vizion të përbashkët për të ardhmen e futbollit të Kosovës.
Postimi i plotë:
‘Nder i veçantë që sot të pres në kabinetin tim Presidentin e FIFA-së, Gianni Infantino.
Me Infantinon dhe ekipin e tij – përfshirë legjendën e futbollit, Youri Djorkaeff, ndamë mendime dhe vizion të përbashkët për të ardhmen e futbollit të Kosovës.
Me qëllim të kultivimit të pasionit dhe talentit të natyrshëm të të rinjve tanë në futboll, zhvilluam diskutim produktiv me fokus të veçantë në infrastrukturën fizike të sportit të futbollit dhe përfshirjen e futbollit në sistemin arsimor të Kosovës.
Përveç diskutimit, u dakorduam që të ndërmarrim hapa të menjëhershëm për konkretizim të bashkëpunimit në integrimin dhe adaptimin e modelit të programit të FIFA-së “Futbolli në Shkolla” në programin tonë shtetëror “Sporti në Shkolla”.
Rruga që duhet të ndjekim për të siguruar zhvillimin e qëndrueshëm të sportit të futbollit është bashkëpunimi dhe ndërveprimi i thellë ndërmjet organizatave sportive vendore dhe ndërkombëtare dhe institucioneve relevante të sportit“, thuhet në postimin e tij. /KultPlus
Sot është duke u mbajtur Seanca e Kuvendit të Kosovës, me ç’rast po diskutohet për një mori gjërash, në mesin e tyre edhe projektligji anti-doping në sport, shkruan KultPlus.
Deputetët e Kuvendit të Kosovës miratuan në parim Projektligjin anti-doping në sport, ku pas miratimit një fjalim e pati edhe Hajrulla Çeku.
Ministri i Kulturës tha se ky ligj do t’iu mundësojë drejtësi dhe shanse të barabarta të gjithë garuesve.
“Projektiligji do ta rregullojë fushën e antidopingut në sportin e Kosovës dhe ka tre objektiva. Njëri është fuqizimi i integritetit të sistemit sportiv në Kosovë, dy është kujdesi ndaj shëndetit të sportistëve dhe sportisteve të vendit tonë dhe tre është sigurimi i drejtësisë dhe shanseve të barabarta në garat sportive”.
“Projektligji për antidopingun parasheh themelimin e Agjensisë Shtetërore antidoping. Ky entitet i ri që do ta ketë statusin e agjencisë ekzekutive do të jetë administrues i domenit antidoping në sport”.
“Një nga detyrat kryesore të saj do të jetë hartimi i kodit shtetëror antidoping në përputhje me kodin përkatës ndërkombëtar.”, ka thënë Çeku.
67 deputetë votuan pro miratimin të këtij projektligji, derisa nuk pat asnjë abstenim dhe askush nuk ishte kundër. /KultPlus.com
Ministri Çeku u prit sot në takim nga kryetari i Komunës së Kaçanikut, Besim Ilazi. Bashkë diskutuan për projektet infrastrukturore në fushën e kulturës, sportit dhe rinisë, po ashtu për trashëgiminë e pasur kulturore në këtë zonë.
Takimi filloi me diskutim për infrastrukturën sportive. Palestra e sportit është një investim i Ministrisë që ka përfunduar dhe tashmë po u ofron të rinjëve, sportistëve dhe klubeve të Kaçanikut hapësirë të dinjitetshme për të zhvilluar aktivitete fizike e sportive.
U fol po ashtu për stadiumin. Një projekt i stagnuar prej problemeve me projektin, biseduam për mundësinë e rishikimit të projektit aktual që kishte mangësi dhe pas përfundimit të këtij procesi të diskutohet modaliteti i vazhdimit të punimeve.
Mirëpritëm lajmin që Komuna po themelon muzeun e qytetit. Si Ministri e Kulturës ofruam mbështetje në kapacitete profesionale, ndihmë në kurim të ekspozitës dhe trajtim të eksponateve.
Ministri Çeku i njoftoi për ndërhyrjet emergjente dhe restauruese në fushën e trashëgimisë kulturore që po zhvillohen në gjithë vendin. U zotuan që të punojnë në koordinim për të mbrojtur, restauruar dhe funksionalizuar asetet e trashëgimisë kulturore në Kaçanik./ KultPlus.com
Ministri Hajrulla Çeku tashmë ka nisur takimet e tij me kryetarët e komunave për të dinamizuar projektet dhe investimet kapitale. Ai së fundmi është takuar me kryetarin e Gjilanit, Alban Hyeni me ç’rast ka vlerësuar qytetin si një qytet që ka potencial të bollshëm në fushën e artit, sportit dhe trashëgimisë kulturore, përcjell KultPlus.
“Një projekt konkret që ngërthen edhe trashëgiminë kulturore dhe natyrore të Gjilanit është Kalaja e Pogragjës, një nismë e komunës të cilës Ministria i është bashkuar me shumë vullnet, bashkë me QRTK Gjilan dhe Institutin Arkeologjik të Kosovës. Tashmë po e diskutojmë mundësinë e një investimi të përbashkët mes Ministrisë së Kulturës, Ministrisë së Mjedisit dhe Komunës së Gjilanit, që Kalaja e Pogragjës dhe zona përreth të shndërrohen në destinacion turistik, duke u siguruar gjithmonë që vlerat kulturore, të trashëgimisë dhe ato mjedisore mbrohen me përpikmëri”, ka thënë Çeku.
Më poshtë gjeni postimin e tij të plotë:
Gjilani është një prej komunave me përplot potencial në fushën e artit, sportit e trashëgimisë kulturore.
Në ciklin e takimeve me kryetarë të komunave për të dinamizuar projektet e investimeve kapitale, kisha kënaqësinë e veçantë të takohesha me kryetarin e Gjilanit, Alban Hyseni.
Folëm për projektet ekzistuese të cilat duhet ti përmbyllim dhe u dakorduam për disa projekte të reja.
Stadiumi i qytetit të Gjilanit është një projekt me shumë interes për komunitetin dhe për Ministrinë e Sportit dhe Komunën. Tashmë kemi hyrë në fazën e zgjidhjes së këtij ngërçi afatgjatë. Kemi filluar procedurat për hartimin e projektit për fazën përfundimtare të ndërtimit të stadiumit. Projekt përfundimtar për këtë stadium nuk ka ekzistuar, është punuar me faza dhe nuk ka pasur projekt për kategorinë e përcaktuar. Pas hartimit të projektit final të detajuar do të qartësohen detajet e realizimit të punimeve, përfshi periudhën kohore dhe koston. Hap i domosdoshëm në këtë proces ka qenë edhe shkëputja e kontratës me operatorin, ndërsa angazhimi i dy niveleve të qeverisjes do të jetë maksimal për ta përmbyllur këtë projekt që padrejtësisht i është mohuar sportistëve e qytetarëve të Gjilanit për kohë të gjatë.
Sa i përket palestrës sportive në Zhegër, jemi duke u kujdesur që si projekt të ketë realizim të suksesshëm të punimeve tash që po i afrohemi fazës përfundimtare. Në bashkëpunim me komunën e Gjilanit po mundohemi që brenda afatit optimal ta përmbyllim dhe funksionalizojmë në shërbim të rinisë, sportistëve dhe të gjithë komunitetit.
Në investimet e trashëgimisë kulturore Gjilani ka pasur dhe vazhdon të ketë asete të prioritet. Për shkak të gjendjes jo të mirë të monumenteve për vite me radhë, ndërhyrjet emergjente në këtë rajon janë duke vazhduar, një pjesë e tyre kanë përfunduar, e së shpejti fillon faza e re në shërbim të shpëtimit të aseteve të trashëgimisë kulturore.
Një projekt konkret që ngërthen edhe trashëgiminë kulturore dhe natyrore të Gjilanit është Kalaja e Pogragjës, një nismë e komunës të cilës Ministria i është bashkuar me shumë vullnet, bashkë me QRTK Gjilan dhe Institutin Arkeologjik të Kosovës. Tashmë po e diskutojmë mundësinë e një investimi të përbashkët mes Ministrisë së Kulturës, Ministrisë së Mjedisit dhe Komunës së Gjilanit, që Kalaja e Pogragjës dhe zona përreth të shndërrohen në destinacion turistik, duke u siguruar gjithmonë që vlerat kulturore, të trashëgimisë dhe ato mjedisore mbrohen me përpikmëri.
Xhepat e gjelbër është një nismë tjetër e komunës për të cilën jemi ftuar të bashkëpunojmë për të ndërtuar hapësirat sportive dhe kulturore. U dakorduam që në momentin që komuna ka projektin përfundimtar ta ndajë me ne dhe të shohim mundësinë e përfshirjes në buxhet.
Qendra e Kulturës në Gjilan është një projekt i ri që i nevojitet komunitetit që është shumë aktiv në sferën kulturore. Në parim jemi zotuar t’i shohim mundësitë për bashkëfinancim me qëllim të plotësimit të nevojave për komunitetin në Gjilan.
Në kuadër të projekteve potenciale, nga kryetari Hyseni kërkova të propozohen lokacione të përshtatshme për ndërtimin e palestrës së xhudos dhe shtëpisë së shahut në Gjilan.
Dhe dakordimi ynë i fundit ishte që organizimi i Flakës së Janarit për vitin e ardhshëm të bëhet në bashkëpunim me Ministrinë. Kryetarin e njoftova me dy programet shtetërore që pritet të fillojnë vitin e ardhshëm, ai i artit në shkolla dhe sportit në shkolla. Dy programe me interes nacional që do të shtrihen në të gjitha komunat e Kosovës kryetari i mirëpriti me gatishmëri të plotë për bashkëpunim./ KultPlus.com
Takimet e ditës së sotme me kryetarë të komunave, ministri Hajrulla Çeku i vazhdoi në komunën e Vitisë ku u takua me kryetarin Sokol Haliti.
Në fjalën e njoftoi se qëllimi i këtyre vizitave është zgjidhja e shumë projekteve kapitale në të cilat punët kanë mbetur të papërfunduara si dhe investimet e reja kapitale.
Palestra e sportit në Viti dhe revitalizimi i stadiumit në Pozheran janë dy projekte të rëndësishme dhe të tejzgjatura për të cilat u diskutua. Komuna u zotuan t’i takojnë operatorët ekonomik e të zgjidhen problemet që kanë shkaktuar ngecje të punëve, e procedurat e duhura të vazhdojnë ashtu që të përfundojnë dhe funksionalizohen këto hapësira në shërbim të komunitetit sportiv dhe sportdashësve.
Kryetari Haliti propozoi edhe ndërtimin e një salle teatrale për të cilën është siguruar lokacioni, ndërsa ministri Çeku u zotua të punojë në këtë drejtim e të koordinohen në kohë të duhur me komunën për zhvillimet e mëtejme që të përmbushen nevojat e qytetarëve.
U fol gjithashtu për projektet në fushën e trashëgimisë kulturore. Në shumë monumente të trashëgimisë po intervenohet me qëllim të shpëtimit të monumenteve nga rrënimi dhe në disa tjera po bëhet restaurimi dhe konservimi i tyre.
Ndërhyrjet në Xhaminë e Gërmovës, Mullirin e Ndue Sopit, Mulliri dhe Valavica e Visheve në Binçë kanë përfunduar, ndërsa do të vazhdohet me ndërhyrje në monumentet të tjera të cilat kanë nevojë për intervenim me qëllim të shpëtimit dhe ruajtjes së trashëgimisë tonë kulturore.
Për fund u disktua për programet shtetërore, art në shkolla dhe sport në shkolla që pritet të zhvillohen nga viti i ardhshëm në gjithë vendin, ndërsa morëm gadishmëri që të punohet në zbatim në Komunën e Vitisë./ KultPlus.com
Ministri Çeku ka takuar kryetarin e Ferizajit, Agim Aliu në kuadër të vizitave në komuna të Kosovës për të diskutuar rreth projekteve kapitale në sport, kulturë, rini dhe trashëgimi kulturore, përcjell KultPlus.
Diskutimi filloi me infrastrukturën fizike në fushën e sportit, ku u fol për stadiumin e qytetit, shtëpinë e shahut, palestrën e xhudos dhe projekte të tjera. U dakorduan që të bëhet një studim i plotë i fizibilitetit në këtë komunë, përmes së cilit do të analizohet shtrirja hapësinore, kategoria e kapaciteti që nevojitet për komunën e Ferizajit në shumë aspekte.
Vazhduan tutje me sallën e sporteve në Gremë, ku operatori ekonomik do të vazhdojë punën dhe deri në fund të vitit pritet përfundimi i punëve. Qendra multifunksionale është një tjetër projekt i rëndësisë së lartë ku është marrë zotim që puna në terren të intensifikohet dhe dinamizohet.
Ministri Çeku i njoftoi edhe me punët që po bëhen në fushën e trashëgimisë kulturore. Ndërhyrjet emergjente dhe restauruese. Kisha katolike në Ferizaj është në proces të hartimit të projektit të restaurimit, ndërsa do të fillojnë restaurimi i ish-gjimnazit të vjetër Ismail Qemajli dhe restaurimi i “Xhamisë së Madhe”.
Po ashtu janë propozuar disa projekte potenciale si shtëpia e shahut, palestra e xhudos, e palestra e gjimnastikës. Komuna u zotua se e mbështesin investimin dhe janë të gatshëm ta sigurojnë lokacionin.
Në fund të takimit, të pranishmit u njoftuan për programet shtetërore që pritet të fillojnë vitin e ardhshëm, arti në shkolla dhe sporti në shkolla. Komuna e mirëpriti këtë iniciativë dhe shprehi gatishmërinë të bashkëpunojnë në zbatim të tyre./ KultPlus.com
Ministri i Kulturës, Rinisë dhe Sportit, Hajrulla Çeku, po vazhdon ciklin e vizitave nëpër Komunat e Kosovës, e tani radha ishte e Gjilanit, aty ku një prej çështjeve më të diskutuara është ajo e Stadiumit të Qytetit, shkruan KultPlus.
Çeku, pasi e falënderoi kryetarin Hyseni për pritjen, ka thënë se në Gjilan ka ardhur për t’i dinamizuar projektet e investimeve kapitale, programet tjera të përbashkëta e projektet e reja të sportit, artit e rinisë.
Në kuadër të kësaj, ministri Çeku tha se Gjilani e ka pasur dhe do ta ketë primatin e investimeve në trashëgiminë kulturore, ndërkaq ka konfirmuar se mbështetjen ndaj nismës së Komunës së Gjiilanit për ta shndërruar Kalanë e Pogragjës dhe gjithë ambientin aty në atraksion turistik.
Për palestrën e Zhegrës, ministri Çeku tha se janë duke u kujdesur në veçanti, për të shtuar se tashmë ky projekt po shkon në fazën përfundimtare të realizimit të punimeve, në mënyrë që të jetë në shërbim të sportistëve e rinisë.
Ndërkaq, duke folur për stadiumin e qytetit, ministri Çeku ka thënë se tashmë kemi hyrë në fazën e zgjidhjes së këtij ngërçi afatgjatë, duke shtuar se është interes kombëtar që ta kemi të përfunduar këtë stadium në kohën më optimale me standardet e përmbushura ndërkombëtare.
“Sa i përket stadiumit, tashmë kemi hyrë në fazën e zgjidhjes së këtij ngërçi afatgjatë, fatkeqësisht. Kemi filluar fazën e hartimit të projektit për fazën përfundimtare të ndërtimit të stadiumit të qytetit, i cili përfundimisht na e nxjerr koston, rrugën dhe na tregon kohën që na duhet për ta realizuar përfundimisht këtë investim shumë të rëndësishëm, jo vetëm për Gjilanin, sepse një stadium i këtillë i duhet edhe Kosovës, sidomos për garat ndërkombëtare. Është interes kombëtar që ta kemi të përfunduar këtë stadium në kohën më optimale me standardet e përmbushura ndërkombëtare”, tha ai.
“Ky projekt nuk ka ekzistuar asnjëherë sepse është punuar me faza më herët dhe asnjëherë nuk ka pasur projekt përfundimtar. Në momentin që e kemi projektin profesional me të gjitha standardet, do të kalojmë në kontraktimin e punimeve dhe do të bëjmë më të mirën që brenda kohës më optimale, në bashkëpunim me kryetarin e Komunës, të vazhdojmë ta trajtojmë me shumë prioritet përfundimin e punimeve në stadiumin e Gjilanit”, ka shtuar ministri Çeku.
Ministri i MKRS-së ka thënë po e shqyrtojnë mundësinë e mbështetjen edhe ndaj nismës së Komunës për projektin ‘xhepat e gjelbër të lagjeve’, për të bashkëfinancuar ndërtimin e fasciliteteve sportive dhe kulturore, por edhe për projektin tjetër të Komunës për Qendrën e Kulturës, derisa ka dhënë zotimin për bashkëfinancimin edhe të manifestimit kultutor mbarëkombëtar “Flaka e Janarit 2023”.
Në fund, ministri Çeku tha se nga kryetari Hyseni ka kërkuar lokacion të përshtatshëm për ndërtimin e palestrës së xhudos dhe për ndërtimin e një shtëpie të shahut.
“Tashmë kryetari Hyseni është në komunikim edhe me federatat përkatëse dhe në momentin që i kemi lokacionet, ne do t’i nisim procedura për ndërtimin e këtyre palestrave të reja, një për xhudon e një për shahun”, ka përfunduar ministri Çeku
Hyseni e ka falënderuar ministrin Çeku për vizitën dhe mbështetjen e vazhdueshme ndaj Gjilanit.
“Diskutuam rreth projekteve që janë në zhvillim e sipër e për projektet dhe idetë e reja që ne si Komunë mendojmë t’i realizojmë. Është një qasje e re e Ministrisë së Kulturës, Rinisë dhe Sportit, por në të njëjtën kohë, edhe ne si Komunë po mundohemi që të jemi sa më kreativë që është e mundur që t’i plotësojmë nevojat elementare e bazike për komunitetin sportiv e artistik”, ka deklaruar pas takimit kryetari Hyseni.
“Po ashtu, sot e kam shfrytëzuar rastin që ta njoftoj ministrin Çeku për zhvillimin e punimeve në palestrën e sporteve në Zhegër, për situatën rreth stadiumit të qytetit, duke e ditur faktin që ministri që nga fillimi i mandatit një prej top prioriteteve e ka pasur zgjidhjen e problemit të këtij stadiumi. Detajet që i kemi nxjerrë dhe që janë qartësuar për opinionin kanë treguar për defektet e mëdha në stadiumin e Gjilanit. Tash kemi arritur në një fazë që projektit po i jepet energji e re dhe frymë e re dhe në të njëjtën kohë do të qartësohen edhe problemet e fundit në mënyrë që stadiumi i qytetit të fillojë të punohet sa më shpejt që të jetë e mundur”, ka shtuar kreu i Gjilanit. /KultPlus.com
Takimet me kryetarë të komunave vazhduan sot në Podujevë. Ministri Çeku u prit nga kryetari Shpejtim Bulliqi dhe bashkëpunëtorët e tij.
Të shumta janë projektet për të cilat u diskutua, disa që janë zvarritur ndër vite për shkak të mungesës së mirëfilltë të planifikimit të projekteve, si dhe ato potenciale, që të rinjve, sportistëve dhe artistëve të mos u mungojë infrastruktura për zhvillimin e aktiviteteve të tyre.
Qendra multifunksionale është një projekt që pritet të fillojë së shpejti. Komuna u zotuan të sigurohen që lokacioni mos të ketë probleme pronësore, dhe bazuar në projektin e kompletuar në detaje, MKRS të fillojë investimin.
Për ndërtimin e Palestrës Sportive Komuna do ta sigurojë projektin dhe dokumentet përcjellëse, të bëhet rishikimi i projektit dhe paramasës, analizat e duhura paraprake, dhe të planifikohet në buxhet për realizim për vitet e ardhshme.
U fol gjithashtu për pishinën gjysëm olimpike për të cilën Komuna ka ndarë lokacionin dhe hapi tjetër është hartimi i projektit dhe planifikimi i buxhetit.
Konservimi dhe rivitalizimi i xhamisë së djegur të fshatit Orllan është një projekt i ri që do të fillojë së shpejti, ndërsa u diskutua edhe për ndërhyrje emergjente në ndërtesën e Burgut.
Ministri foli gjithashtu për programet shtetërore për art në shkolla dhe sport në shkolla që pritet të fillojnë vitin e ardhshëm dhe të zbatohen në gjithë shkollat e vendit ndërsa kryetari Bulliqi e mirëpriti këtë iniciativë dhe shprehu gatishmërinë e tij të bashkëpunojë në zbatim të tyre. / KultPlus.com
Në ciklin e takimeve me kryetarë të komunave, gjatë ditës së djeshme ministri Hajrulla Çeku ka takuar kryetarin e Lipjanit, Imri Ahmeti.
Bashkë diskutuan në përgjithësi për fushën e kulturës, rinisë, sportit dhe trashëgimisë kulturore ndërsa në veçanti për projektet infrastrukturore në këto fusha.
U fol për Stadiumin e Qytetit. Nga Komuna u zotuan që të zhvillojnë takime me operatorin ekonomik dhe të intensifikohen punët e mbetura në terren deri në përmbyllje të kontratës.
Vazhduan me Palestrën Sportive ku gjithashtu ka ngecje të punëve. U dakorduan që punët të vazhdojnë me intensitet më të lartë dhe me mbikqyrje të vazhdueshme.
Një tjetër projekt për të cilin u diskutua është Shtëpia e Kulturës. Komuna u zotuan të zhvillojnë projektin e plotë, që do të shqyrtohet nga MKRS për bashkëfinancim në vitet e ardhshme.
Ministri Çeku edhe në këtë takim e vuri në theks rëndësinë që projektet të jenë sa më cilësore dhe t’i plotësojnë të gjitha kriteret në mënyrë që gjatë implementimit të projekteve të mos shfaqen probleme, siç ka ndodhur në shumicën prej tyre deri tani.
U fol po ashtu për Revitalizimin e Qytetit të Vjetër të Janjevë ku ka filluar zbatimi i projektit “Trashëgimia Kulturore si Nxitëse për Ringjallje Ekonomike të Janjevës” dhe punët po vazhdojnë. U dakorduan që të punojnë së bashku që ky projekt të marrë vëmendjen e merituar.
Minsitri Çeku e informoi për dy programet shtetërore që pritet të fillojnë vitin e ardhshëm, ai i artit në shkolla dhe sportit në shkolla. Mori zotim që nga komuna e Lipjanit do të ketë angazhim të lartë në zbatimin e këtyre dy programeve. /KultPlus.com
Sot ministri i Kulturës Hajrulla Çeku ka takuar kryetarin e Komunës së Prizrenit Shaqir Tolaj me ç’rast kanë diskutuar rreth rreth infrastrukturës fizike, projekteve kapitale në kulturë, rini, sport e trashëgimi kulturore, për t’i dinamizuar punët në projektet aktuale dhe për të filluar të reja aty ku ka mungesë, përcjell KultPlus.
Më poshtë gjeni postimin e tij të plotë:
Komuna e Prizrenit ka potencial të jashtëzakonshëm kulturor e sportiv dhe meriton vëmendje të veçantë.
Sot takova kryetarin e komunës, Shaqir Totaj dhe bashkëpunëtorët e tij, për të diskutuar rreth infrastrukturës fizike, projekteve kapitale në kulturë, rini, sport e trashëgimi kulturore, për t’i dinamizuar punët në projektet aktuale dhe për të filluar të reja aty ku ka mungesë.
Vëmendje të veçantë u kushtuam projekteve të mbrojtjes së trashëgimisë kulturore, ku Ministria përgjatë këtyre viteve është duke investuar rreth 1.8 milion euro për rehabilitim dhe restaurim të aseteve të trashëgimisë kulturore në komunën e Prizrenit.
Diskutuam për Revitalizimin e rrugës Marin Barleti, një projekt shumë i veçantë. Për herë të parë në Kosovë po rijetësohet komplet një zonë, ku krahas komponentës së restaurimit, përfshihet dizajni urban dhe zhvillimi i zonës. Ministria tashmë ka përfunduar me restaurimin e shtëpisë së familjes Morina dhe do të vazhdojë me restaurimin e shtëpive të radhës në kuadër të projektit. Ky projekt do të zbatohet në kuadër të bashkëpunimit paraprak me zyren e BE-së në Kosovë, Ministrinë dhe Komunën. Ndërsa u dakorduam për nënshkrimin e marrëveshjes trepalëshe për koordinim dhe zbatim të projekteve.
Në kuadër të këtij bashkëpunimi, gjithashtu përfshihet edhe Rijetësimi i Kinemasë Lumbardhi, ku pritet fillimi i ndërhyrjeve restauruese gjatë këtij viti.
Ndërhyrjet restauruese janë duke u zhvilluar edhe në Qendrën Historike të Prizrenit, në disa shtëpi tradicionale sikurse shtëpia e familjes Bardhi, shtëpia e Familjes Lokvica tashmë është projekte në proces, shtëpia e familjes Destan Kabashi ka përfunduar, kurse ndërhyrjet në shtëpinë e familjes Sokoli dhe në kompleksin e familjes Dorambari, pritet të fillojnë. Nga kryetari kërkova një koordinim më efikas në sigurimin e lejeve dhe dokumenteve përkatëse nga komuna, për projektet e restaurimit që zbatohen nga Ministria e Kulturës si institucioni kompetent për restaurimin e aseteve të trashëgimisë, në mënyrë që të tejkalohen vonesat e paraqitura në zbatim të projekteve.
Në kuadër të ndërhyrjeve emergjente me qëllim të sigurimit të masave mbrojtëse për trashëgiminë kulturore në rrezik, punët janë zhvilluar dhe kanë përfunduar në Hanin dhe Nallbanin e familjes Kovaçi, dy shtëpi në rrugën Marin Barleti, Konsullatën Austro- Hungareze dhe Hanin e Familjes Zajmi, Prizren.
Në proces të përmbylljes janë punimet në Kullën e Pjetër Penkpalaj në Zym, dhe Shtëpinë e Sava Toskës në Prizren.
Faza e dytë e ndërhyrjeve emergjente në rajonin e Prizrenit, duke vazhduar në monumentet në gjendje kritike, do të vazhdojë menjëherë pas përmbylljes së projekteve në proces. Do të sigurohemi që të zvogëlohet rreziku i degradimit të trashëgimisë kulturore në gjendje të keqe.
Një tjetër projekt me rëndësi i cili është drejt përfundimit është restaurimi i Kinemasë së Parë.
Për të vazhduar tek projekti i Qendrës Kulturore Hebraike, i cili është në proces të lidhjes së kontratës për restaurim, rindërtim dhe adaptim të ndërtesës, ku Ministria do të financojë në tërësi realizimin e këtij projekti.
Restaurimi i Hamamit të Gazi Mehmed Pashës, gjithashtu është projekt në zbatim, i cili do të vazhdojë edhe gjatë vitit të ardhshëm, deri në restaurim të plotë të këtij aseti me vlera të larta të trashëgimisë kulturore.
Fshati Zym, si një fshat me histori, traditë dhe kulturë, do të trajtohet në kuadër të programit që mbështetet nga Ministria e Kulturës, dhe zbatohet nga UNHABITAT, ku gjatë vitit të ardhshëm do të hartohet Plani i Menaxhimit me qëllim të nxitjes së mbrojtjes së vlerave të trashëgimisë kulturore dhe zhvillimit të turizmit kulturor e rural në këtë zonë.
Sa i përket sportit diskutuam për ndërtimin e stadiumit në Zhur i cili është afër përfundimit, ku nga komuna u njoftuam që operatori ekonomik do t’i vazhdojë punët përfundimtare për fazën aktuale të ndërtimit të vrazhdë.
Një projekt tjetër që ka filluar në vitin 2018 por nuk ka përfunduar asnjëherë është ai i pishinës olimpike. Pas verifikimit të bërë në terren, Federata e Notit kanë ardhur në përfundim që kjo pishinë është jashtë standardeve për pishina olimpike, me ç’rast kërkohet analizë më e thellë e këtij projekti drejt zgjidhjes së shumë sfidave që ka pasur procesi.
Në Stadiumin “Përparim Thaçi” janë në përfundim punimet e fazës së parë ndërsa diskutuam që faza tjetër të financohet nga Ministria e Kulturës, Rinisë dhe Sportit. Në fazën e dytë përfshihen punët përfundimtare për funksionalizimin e plotë të stadiumit konform standardeve.
Folëm edhe për ndërtimin e një Qendre Rinore. Lokacioni është caktuar, projekti është në hartim e sipër, dhe sapo të jetë i gatshëm dhe i plotë me të gjitha fazat e duhura do të mund të fillojnë punimet.
I propozuam disa projekte potenciale si renovimin e pjesës së mbetur të palestrës “Sezai Surroi”. U zotuam që sapo të përfundohet hartimi i plotë i projektit nga komuna, të vazhdojmë me renovimin e pjesës së fundit të kësaj palestre.
Nga komuna kërkuam të shqyrtohen mundësitë për lokacionet potenciale për një shtëpi të shahut, një sallë të xhudos, fusha të mbyllura të tenisit dhe një sallë pingpongu. U dakorduam që komuna të na dërgojë nga dy propozime për lokacionet e mundshme në mënyrë që Ministria t’i përfshijë në buxhet sipas prioriteteve për vitin e ardhshëm.
Një çështje tjetër që bashkëbiseduam ishte edhe ndërtesa e institucionit të arkivit në qytetin e Prizrenit. U dakorduam që të ndahen fondet për vitin e ardhshëm ndërsa nga komuna konfirmuan përzgjedhjen e lokacionit të përshtatshëm për këtë ndërtim që do të financohet nga Ministria e Kulturës.
Po ashtu, kryetarit Totaj ia shpalosa edhe dy programet kombëtare që do të nisin vitin e ardhshëm: Arti në shkolla dhe Sporti në shkolla, duke kërkuar nga ai dhe komuna mbështetje në zbatimin e këtyre programeve. Sigurova mbështetjen e pakursyer të kryetarit dhe komunës së Prizrenit.
E falënderoj kryetarin e Komunës, Shaqir Totaj, për pritjen, gatishmërinë dhe bashkëpunimin e deritashëm./ KultPlus.com
Në kuadër të aktiviteteve të “Ditëve të Nënë Terezës” u hapën dy ekspozita në Prishtinë, kushtuar jetës dhe veprës së Shën Nënë Terezës.
Në qendrën “BogdaniPolis” në Katedralen Shën Nënë Tereza u mbajt ekspozita “E kam në zemër popullin tem shqiptar”, ku u paraqitën fotografi ekskuzive të Nënë Terezës. Për detajet e ekspozitës dhe fotografitë e saj foli Imzot Don Lush Gjergji, duke shpalosur kujtimet që nga vitet e 80-ta ndërsa foli për rëndësinë, jetën dhe veprën e Nënës Terezë, zemërgjerësinë dhe fisnikërinë që pati ajo.
Ndërsa fotografi shumë të veçanta të Nënë Terezës u paraqitën edhe në ekspozitën që u hap në Bibliotekën Kombëtare të Kosovës. Ekspozita kishte fotografi që nga fëmijëria e Nënës Terezë, nga shkollimi e deri tek mësimi qe u jepte të tjerëve, nga veshja tradicionale e Prizrenit e deri tek humanizmi i saj në Kalkutë, fotografi këto që pasqyronin shenjtërinë dhe dashurinë e saj.
Në hapjen e ekspozitave mori pjesë ministri i Kulturës, Hajrulla Çeku, Imzot Don Lush Gjergji, përfaqësues të Ipeshkvisë së Kosovës si dhe personalitete tjera nga jeta politike e kulturore. / KultPlus.com
