PriFest prezanton jurinë e kategorisë kryesore garuese

Posted on by KultPlus

Prezantohet juria e filmave artistik të metrazhit të gjatë nga Ballkani, kategori kjo kryesore garuese në PriFest. Juria përbëhet nga filmbërës dhe profesionistë të nivelit të lartë të industrisë së filmit nga shtetet evropiane.

Dhe ata jane:

PAUL WILMSHURST

Paul Wilmshurst është regjisor dhe skenarist britanik, i cili ka punuar në industrinë e filmit dhe televizionit për më shumë se 40 vjet. Projektet e tij; ‘Day of the Jackal’, ‘Belgravia: The Next Chapter’, ‘The Last Kingdom’, ’Doctor Who’, ‘Strike Back’, ‘Jamestown’, ‘Indian Summers’, ‘Da Vinci’s Demons’, ‘Combat Kids’, ‘Runaway’, ‘Mob Law’ dhe ‘Hiroshima’ – i cili ka fituar një Çmim Ndërkombëtar Emmy dhe një BAFTA në vitin 2006. Ai shkroi dhe dhe ishte regjisor i ‘Forgiven’ – i cili u shfaq në Channel 4 në gusht 2007 – dhe fitoi një Çmim të Shoqatës Mbretërore të Televizionit për montazhin më të mirë të dramës, u nominua për një Çmim Broadcast për Dramën më të Mirë TV të Vetme dhe fitoi një Çmim Ndërkombëtar Emmy për Aktoren më të Mirë. ‘Combat Kids’ gjithashtu u nominua për një BAFTA për Dramën më të Mirë për Fëmijë. Përpara se të fokusohej në dramën e nivelit të lartë, ai kaloi shumë vite si regjisor I filmit dokumnetar , duke eksploruar histori të detyrimeve, obsesioneve, identitetit, krimit dhe politikës. Ai ka udhëtuar gjerësisht gjatë jetës së tij dhe është tërhequr nga projekte psikologjikisht komplekse dhe logjistikisht sfiduese.

EMMA CLARKE

Ka qenë Drejtoreshë Ekzekutive për 14 vite, fillimisht në Fine Line Features, ku ka ngritur dhe drejtuar zyrën e tyre në Londër për 4 vite. Më pas ishte një nga themelueset e UK Film Council (tani BFI) nga viti 2000 deri në vitin 2010. Ka mbikëqyrur personalisht zhvillimin dhe prodhimin e mbi 50 filmave artistikë dhe dokumentarë, shumë prej të cilëve kanë fituar çmime të shumta, duke përfshirë Bafta, Çmimin e Jurisë në Cannes, Ariun e Argjendtë në Berlin etj. Ka qenë e përkushtuar në gjetjen dhe zhvillimin e talenteve të rinj, veçanërisht shkrimtare/regjisore femra. Ka punuar me Andrea Arnold, Kevin Macdonald, Shane Meadows, Sally Potter, Sarah Gavron, John Crowley, Saul Dibb dhe Paul Greengrass dhe shumë të tjerë. Ka punuar për New Line Cinema duke drejtuar zyrën e tyre të filmit artistik në Londër. Ka dizajnuar dhe drejtuar një program master për shkrim skenarësh në Universitetin e Manchesterit për 6 vite, i cili ka qenë shumë i suksesshëm dhe ka çuar shumë nga studentë në industri si shkrimtarë dhe ekzekutivë. Nga viti 2021 deri në 2022 ishte Drejtoreshë e Dramës në Filmwave, Londër. Tani drejton kompaninë Stellar Productions ku zhvillohen projekte filmike dhe televizive me cilësi të lartë.

JEAN-BAPTISTE BAILLY-MAITRE

Jean-Baptiste Bailly-Maitre është producent që ka kaluar shumë vite duke punuar në projekte ndërkombëtare. Ai ka ekspertizë të gjerë në subvencionet për filmin në Francë dhe Evropë dhe është anëtar i komisionit të CNC-së për Aide au Cinéma du Monde. Ai ka qenë përgjegjës për financimin dhe menaxhimin e Alpha Violet për më shumë se 10 vjet dhe zhvillon prodhimin e projekteve të reja.

VIRGINIE LACOMBE

Virginie Lacombe ka prodhuar filmin The Other Son (2012) të drejtuar nga Lorraine Lévy, dokumentarin Faith Connections (2013) nga Pan Nalin, dhe komedinë Blockbuster (2018) të July Hygreck, shpërndarë nga NETFLIX. Ajo ka bashkëprodhuar Mobile Homes të Vladimir de Fontenay (Cannes Director’s Fortnight 2017), Port Authority (Cannes – Un Certain Regard 2019), Martin Scorsese ka qene Producent Ekzekutiv, Last Film Show nga Pan Nalin (nominim për OSCAR 2023), dhe Tommy Guns nga Carlos Conceição (2 çmime në Festivalin e Filmit në Locarno). Ajo po zhvillon disa projekte të tjera, përfshirë The Wind Also Sings nga Handi Ghandour, She’s Not Gone nga Micky Levy dhe Borough Park nga Michale Boganim.

GEORG GEORGI

Georg Georgi është një profesionist i shumëanshëm nga Jena, Gjermani Lindore, një vend që nuk ekziston më, me ekspertizë në vallëzim, modë dhe media. Ai ka bashkëthemeluar Berlin Models dhe M4 Models dhe ka krijuar formate të rëndësishme shfaqjesh. Aktualisht, ai ndan kohën e tij ndërmjet zhvillimit të një rezidence artistike në Portugali dhe Berlin, ndërsa këshillon projekte ndërkombëtare filmi dhe merr pjesë në festivale filmi.

Edicioni 16-të i PriFest mbahet prej 10-15 shtator 2024 në Kino Armata./ KultPlus.com

Sot shënohet Dita Ndërkombëtare e Bamirësisë

Posted on by Kult Plus

5 shtatori shënon Ditën Ndërkombëtare të Bamirësisë, të shpallur si e tillë nga Organizata e Kombeve të Bashkuara, për nder të Gonxhe Bojaxhiut – Nënës Terezë e cila vdiq më 05.09.1997, përcjell KultPlus.

Gjatë gjithë jetës së saj, Nëna Terezë kishte princip të jetës ndihmën e njerëzve në nevojë dhe atyre që janë të sëmurë.

Mirëpo, edhe pse arriti shumë dhe madje fitoi edhe çmimin Nobel për Paqe, nuk i harroi asnjëherë rrënjët e saja shqiptare.

Sot janë bërë 27 vjet nga dita kur ajo vdiq, derisa figura e Nënës Terezë nuk do të vdesë asnjëherë. /KultPlus.com

Dy ngjarjet më të bukura që i ka përjetuar Nënë Tereza, dëshmi e dashurisë së vërtetë

Posted on by Kult Plus

Shën Nënë Tereza është thesar i papërsëritshëm, si në mësim e porosi ashtu edhe në veprimtarinë e saj të dashurisë, bamirësisë dhe humanizmit. Për të shpjeguar konceptin e dashurisë së vërtetë, atë dashuri e cila arrin deri në fund, derisa sa dhemb, Shën Nënë Tereza tregon dy ngjarje të bukura dhe unike që i ka përjetuar në jetën e saj, si dëshmi, provë e gjallë si realizohet ajo.

Ngjarja e parë

Unë nuk do ta harroj kurrë, se si dy të rinj para shumë kohësh erdhën në shtëpinë tonë dhe më dhanë një shumë të madhe parash. Unë i pyeta: ‘Ku i keni marrë të gjitha këto para?’. Ata thanë: ‘Ne jemi martuar para dy ditësh. Para se të martohemi, kishim vendosur, që mos të blejmë rroba martese. Ne nuk bëmë dasmë. Paratë e dasmës jua japim Juve.’ Dhe unë e di saktësisht, se ç’do të thotë në vendin tonë, në një familje hindu, të mos blesh rroba martese dhe të mos bësh dasmë. Prandaj i pyeta përsëri: ‘Po, përse? Përse vepruat kështu?’ Ata thanë: ‘Ne e duami njëri-tjetrin aq shumë, sa që gëzimin e dashurisë duam ta ndajmë me njerëzit, të cilëve ju u shërbeni.’ Si e përjetojmë ne gëzimin e dashurisë? Si e përjetojmë ne këtë? Tek japim, derisa dhemb.

Ngjarje e dytë

Para se unë të shkoja në Etiopi, në Kalkutë erdhën disa fëmijë të vegjël tek unë. Ata kishin dëgjuar, se unë do të shkoja atje. Ata kishin ardhur, sepse kishin dëgjuar nga motrat, që fëmijët në Etiopi vuanin shumë. Ata vinin, dhe secili prej tyre jepte diçka, disa edhe ato pak para që kishin. Një djalosh i vogël erdhi tek un dhe më tha: ‘Unë nuk kam asgjë, nuk kam para, thjeshtë nuk kam asgjë. Por, e kam këtë copë çokollate. Dhe ti merre me vete dhe jepua fëmijëve në Etiopi!’ 
Ky djalosh i vogël dashuronte me shumë dashuri, sepse ai mbase për herë të parë në jetën e vet, mbante një copë çokollate në dorë. Dhe e dha atë. E dha plot gëzim, për ta ndarë me të tjerët, për ta zbutur sadopak dhimbjen e dikujt tjetri në Etiopinë e largët. Kjo do të thotë gëzim i dashurisë: të japësh, derisa të dhemb. I dhembte Krishtit, që na donte neve, sepse ai vdiq në kryq, për të na mësuar neve se si duhet të duami. Kjo është rruga, se si duhet të duami edhe ne: derisa të dhemb.

(Pjesë nga libri: Leo Maasburg, Nënë Tereza. Histori Magjepsëse, Shtëpia Përkujtimore e Nënë Terezës, Shkup 2010, f. 88-89.)/KultPlus.com

78 vite nga lindja e Freddie Mercury

Posted on by Kult Plus

78 vite nga lindja e këngëtarit dhe kompozitorit anglez Freddie Mercury, shkruan KultPlus.

Freddie Mercury ishte një këngëtar, kompozitor anglez. Ishte kengetari kryesor i një bande rroku që quhej Queen. Ai lindi me 5 shtator 1946 dhe vdiq më 24 nëntor 1991.

Disa nga këngët me të famshme të bandës ishin: We will rock you, Show must go on, We are the champions, Bohemian Rhapsody, Don’t stop me now, Somebody to love etj.

Ai lindi ne Zanzibar dhe për disa kohë kur ishte fëmije jetoi në Indi. Ai është cilësuar si një nga zërat më të mirë. Freddie Mercury vdiq nga bronkopneumonia kur ishte vetëm 45 vjeç. Për nder te tij janë ngritur edhe disa statuja./KultPlus.com

Begaj: Bija e shenjtë shqiptare Nënë Tereza, shembull i fuqisë së shpirtit dhe besimit

Posted on by Kult Plus

Presidenti i Republikës së Shqipërisë, Bajram Begaj uroi sot Ditën e Shenjtërimit të Nënë Terezës.

“Sot kremtojmë ditën kushtuar bijës së shenjtë shqiptare, Nënë Terezës, shembull i fuqisë së shpirtit dhe besimit, me një jetë të kaluar në dedikim e shërbim ndaj të vuajturve”, u shpreh Begaj.

“Mësimet e saj mbeten frymëzim për çdo shqiptar dhe mbarë njerëzimin”, theksoi Begaj.

Misionarja shqiptare Agnes Gonxhe Bojaxhiu, lindi në Shkup,  në vitin 1910. Më 1928 shkoi në Indi, ku iu përkushtua ndihmës ndaj të varfërve. Në vitin 1948 ajo u bë një qytetare indiane dhe themeloi urdhrin e Misionarëve të Bamirësisë në Kalkuta, në vitin 1950, duke marrë famë për punën midis të varfërve dhe atyre që po vdisnin në atë qytet.

Për më shumë se 45 vjet ajo u shërbeu të varfërve, të sëmurëve, jetimëve dhe të vdekurve, ndërsa drejtoi zgjerimin e Misionarëve të Bamirësisë, fillimisht në Indi dhe më pas në vende të tjera, duke përfshirë bujtina dhe shtëpi për më të varfërit dhe të pastrehët.

Nënë Tereza vdiq më 5 shtator 1997, në moshën 87-vjeçare.

Në njohje të rolit të bamirësisë në zbutjen e krizave humanitare dhe vuajtjeve njerëzore brenda dhe midis kombeve, si dhe të përpjekjeve të organizatave dhe individëve bamirës, ​​duke përfshirë punën e Nënë Terezës, Asambleja e Përgjithshme e Kombeve të Bashkuara, përmes një rezolute, caktoi 5 Shtatorin, ditën e vdekjes së Nënë Terezës, si Ditën Ndërkombëtare të Bamirësisë./atsh/KultPlus.com

Presidentja Osmani: Nënë jonë Terezë mbetet një fanarë dhembshurie, përulësie dhe shërbimi vetëmohues ndaj njerëzimit

Posted on by Kult Plus

Presidentja e Republikës së Kosovës, Vjosa Osmani, ka përkujtuar Nënë Terezën në 27-vjetorin e vdekjes, duke u shprehur se në Ditën e Humanizmit, nderojnë jo vetëm jetën dhe trashëgiminë e një gruaje të jashtëzakonshme, por edhe vlerat që ajo mishëroi – dhembshurinë, dashurinë dhe shërbimin ndaj njerëzimit.

“Me gjak unë jam shqiptare. Me shtetësi jam indiane. Me besim unë jam një murgeshë katolike. Sipas profesionit tim, unë i përkas botës…” – Shën Tereza”, ka shkruar Osmani në fillim të postimit të saj.

Tutje, ajo është shprehur se Nënë Tereza mbetet një fanarë dhembshurie, përulësie dhe shërbimi vetëmohues ndaj njerëzimit.

“Përkushtimi i Nënë Terezës për më të varfrit, besimi i saj i palëkundur dhe dashuria për njerëzit, pavarësisht nga prejardhja e tyre, duhet të jenë udhërrëfyes për një botë më humane. Në 27 vjetorin e ikjes në amshim e kujtojmë me respekt dhe jemi krenar që botës i dhamë nënën më të madhe që njohu njerëzimi, Gonxhe Bojaxhiun, të Shenjtën Terezë”, ka shkruar tutje presidentja Osmani.

Rama: Dita e Shenjtërimit të gruas së paqes në botë, shqiptares Nënë Tereza

Posted on by Kult Plus

Kryeministri i Shqipërisë, Edi Rama, uroi sot Ditën e Shenjtërimit të Nënë Terezës. Ai u shpreh se Nënë Tereza është gruaja e paqes në botë.

Rama ndau edhe shprehjen e Nënë Terezës, “Gjej një minutë për të menduar, gjej një minutë për t’u lutur, gjej një minutë për të qeshur”.

Anjezë Gonxhe Bojaxhiu, lindi në Shkup,  në vitin 1910. Më 1928 shkoi në Indi, ku iu përkushtua ndihmës ndaj të varfërve. Në vitin 1948 ajo u bë një qytetare indiane dhe themeloi urdhrin e Misionarëve të Bamirësisë në Kalkuta, në vitin 1950, duke marrë famë për punën midis të varfërve dhe atyre që po vdisnin në atë qytet.

Për më shumë se 45 vjet ajo u shërbeu të varfërve, të sëmurëve, jetimëve dhe të vdekurve, ndërsa drejtoi zgjerimin e Misionarëve të Bamirësisë, fillimisht në Indi dhe më pas në vende të tjera, duke përfshirë bujtina dhe shtëpi për më të varfërit dhe të pastrehët.

Nënë Tereza vdiq më 5 shtator 1997, në moshën 87-vjeçare./KultPlus.com

27 vite nga vdekja e Shën Nënë Terezës

Posted on by Kult Plus

Sot janë bërë 27 vite nga vdekja e Shën Nënë Terezës, shkruan KultPlus.

Anjezë Gonxhe Bojaxhiu ka lindur në Shkup më 26 gusht 1910. Ajo është e njohur zakonisht si Nënë Tereza e Kalkutës (dhe e nderuar në kishën katolike si Shën Tereza e Kalkutës), ishte një murgeshë dhe misionare me prejardhje shqiptare.

 U lind në Shkup, asokohe qendra e Vilajetit të Kosovës në Perandorinë Osmane. Jetoi në vendlindje për tetëmbëdhjetë vjet, ajo u shpërngul në Irlandë dhe më pas në Indi, ku jetoi pjesën më të madhe të jetës së saj.

Nënë Tereza themeloi Misionarët e Bamirësisë, një kongregacion katolik, i cili në vitin 2012 kishte më shumë se 4,500 motra dhe ishte aktiv në 133 shtete. Ato ofrojnë shtëpi për njerëzit që janë duke vdekur nga HIV/AIDS, lebra dhe tuberkulozi; ato ofrojnë ushqime, klinika të lëvizshme, programe këshilluese për fëmijët dhe familjet, jetimore, dhe shkolla. Anëtarët duhet t’i përmbahen betimit të “dëlirësisë, varfërisë dhe bindjes”, si dhe një kusht të katërt, për të dhënë “shërbime falas e me gjithë zemër për më të varfërit e të varfërve”.

Nënë Tereza është nderuar me çmimet dhe nderimet më të larta, duke përfshirë: më 1962 Çmimin e Paqes Ramon Magsaysay dhe 1979 Çmimin Nobel për Paqe. Më 19 tetor 2003, ajo u lumturua dhe u quajt “Tereza e Bekuar e Kalkutës”.

Për t’u kanonizuar në shenjtore, asaj duhej t’i njiheshin dy mrekulli.

Dy mrekulli të njohura botërisht i hapën rrugën shenjtërimit të Shën Nënë Terezës:

Dëshmia e parë ishte ajo e  Monika Besra nëna e 5 fëmijëve. Ajo është shprehur se lutja përpara ikonës në Nënë Terezës e shëroi nga sëmundja e tumorit në stomak. Kjo ngjarje kishte ndodhur  një vit pas vdekjes së saj në vitin 1998. Ajo rrëfeu se ishte udhëzuar nga shoqërueset e saj në një kishë ku iu tha që të lutej para fotos së Nënë Terezës. Ato i kishin dhënë një medaljon të Nënës Terezës të cilin e vendosën mbi stomakun e saj. Kur u zgjua Besra tha se dhembja e sëmundja ishte zhdukur. Kjo mrekulli u njoh në vitin 2003 Papa Gjon Pali i Dytë.

Një mrekulli e dytë i është njohur nga Papa Françesku, në dhjetor të vitit 2015, duke i hapur rrugën që ajo të shpallet e shenjt nga Kisha Katolike e Romës. Kanonizimi i saj është bërë më 4 shtator 2016, një ditë para 19-vjetorit të vdekjes së saj (5 Shtator), ku njihet edhe si dita e saj e festës.

Një figurë e diskutueshme si gjatë jetës dhe pas vdekjes së saj, Nënë Tereza u admirua gjerësisht nga shumë njerëz për veprat e saj bamirëse.

Biografia e saj e autorizuar u shkrua nga Navin Chawla dhe u botua në 1992.

Ajo vdiq më 5 shtator 1997 në Kalkutë të Indisë./KultPlus.com

“Daily Express”: Shqipëria – destinacioni evropian që sfidon pritshmëritë e turistëve

Posted on by Kult Plus

Me rritjen e kostove të pushimeve verore, turistët po kërkojnë destinacione që ofrojnë eksperienca të pazakonta pa ndikuar në buxhetin e tyre, shkruan Unzela Khan në një artikull të botuar në të përditshmen britanike “Daily Express”.

Ne kemi zbuluar disa vende jo shumë të njohura por miqësore me portofolin, që sfidojnë pritshmëritë standarde të turistëve, duke siguruar aventura të vërteta me shpenzime minimale.

Jason Higgs, një ekspert udhëtimesh, ka identifikuar nëntë vende të çmuara të fshehura – që janë të përballueshme por të pasura në përvojë – mes të cilave kryeson Shqipëria.

Shqipëria, destinacioni evropian me dete blu të ndezur dhe qytete të bukura – ka një kosto mesatare ditore prej vetëm 27 euro.

“Hulumtimi ynë tregon se disa nga përvojat më të paharrueshme të udhëtimit mund të gjenden në qoshet më pak të eksploruara të botës”, tha Higgs.

“Këto destinacione ofrojnë kursime të konsiderueshme, dhe gjithashtu zhytje autentike kulturore dhe bukuri natyrore mahnitëse”, shtoi ai.

Shqipëria – ky thesar ballkanik krenohet me peizazhet malore mahnitëse, qytetet e bukura bregdetare dhe trashëgiminë e pasur kulturore.

Nga qyteti historik i Beratit në Rivierën piktoreske Shqiptare, Shqipëria ofron një mori përvojash me kosto të përballueshme krahasuar me fqinjët e saj evropianë.

“Në Shqipëri, ju mund të shpenzoni mesatarisht 27-37 euro në ditë, duke përfshirë akomodimin, transportin dhe ushqimin. Ushqimet e kuzhinës së shijshme mesdhetare si mishi i qengjit, djathi dhe ushqimet e detit janë shumë të lira”, tha Higgs./atsh/KultPlus.com

Turistët vizitojnë Muzeun Kombëtar ‘Gjergj Kastrioti Skënderbeu’ në Krujë

Posted on by Kult Plus

Turistët vendas e të huaj gjithnjë e më shumë kanë kuriozitet për t’u njohur me historinë e popullit shqiptar dhe në veçanti me atë të heroit tonë kombëtar Gjergj Kastriot Skënderbeu.

Kryeministri Edi Rama ndau sot foto nga turistët të cilët kanë shijuar perëndimin e diellit në oborrin e Muzeut Kombëtar “Gjergj Kastrioti Skënderbeu” në Krujë.

Muzeu Kombëtar “Gjergj Kastriot Skënderbeu” është një nga muzetë më të vizituar në Shqipëri.

I vendosur në brendësi të rrënojave të kalasë shekullore të Krujës, muzeu u hap më 1982.

Ndërtesa është e konceptuar si një fortesë e një kështjelle mesjetare shqiptare, me fokus kryesor dokumentimin e jetës dhe veprës së Gjergj Kastriot Skënderbeut, heroit tonë kombëtar./ atsh/ KultPlus.com

Një udhëtim në sferat e artit dhe filozofisë nga Jetullah Haliti-Eti në Galerinë e Qytetit të Gjilanit 

Posted on by Kult Plus

Shkruan: Ilir Muharremi, kritik i artit  

Në ambientet  e Galerisë së Qytetit të Gjilanit, ditë më parë u hap një ekspozitë që është më shumë se një grumbull veprash artistike – është një udhëtim në thellësitë e qenies njerëzore dhe në labirintet e mendjes. “Kur flet arti nderohet kombi dhe atdheu” nga Jetullah Haliti-Eti nuk është thjesht një koleksion pikturash dhe skulpturash; është një reflektim dhe një meditacion mbi thelbin e ekzistencës dhe shpirtit, mbështetur nga Drejtoria e Kulturës, Rinisë dhe Sportit (DKRS). 

Ky univers krijues është një rrugëtim nëpërmjet abstraksioneve të cilat jo  vetëm që sfidojnë perceptimet tona, por gjithashtu i japin formë dhe substancë koncepteve të thella mbi qenien. “Embrionet ” janë një alegori për ndarjen e brendshme të qenies njerëzore, një përpjekje për të zbuluar veten në një botë që shpesh është e turbullt dhe e paqartë. Aty ku nisesh pa gjini, rrugëton neutral dhe si i drejt.  Forma abstrakte dhe ngjyrat e përziera krijojnë një dialog të përjetshëm ndërmjet natyrës së brendshme dhe jashtme, duke simbolizuar përpjekjet e pafundme të shpirtit për të depërtuar në thellësitë e vetvetes dhe për të kapur kuptimin e qenies. E Bardh, bluja janë një uragan ngjyror me forma të lakuara dhe të rrumbullakosura, që mund të interpretohen si paraqitje stilistike të fazave të hershme të zhvillimit të jetës. duket si një embrion i përfshirë në një hapësirë që duket si një qelizë ose një membranë amniotike. Ngjyrat e errëta dhe të lehta krijojnë një kontrast që e thekson këtë formë, duke i dhënë asaj një ndjesi të mbylljes dhe mbrojtjes. Piktura tjetër e të së njëjtës temë ka një sfond më të ndritshëm dhe të gjallë, me linja dhe rrjeta të ndërthurura që mund të simbolizojnë proceset biologjike dhe qelizore që ndodhin gjatë zhvillimit embrional. Kjo pikturë ngjall një ndjesi dinamike dhe të gjallë, duke treguar ndoshta fazat e ndryshme të zhvillimit të një embrioni. Piktura e tretë  ngërthen  ngjyra të arta dhe të kuqe që krijojnë një formë qendrore që gjithashtu ngjan me një embrion. Ajo ngjall një ndjesi të ngrohtë dhe të mbrojtjes, sikur të përfaqësonte momentet e para të jetës brenda një ambienti të sigurt dhe ushqyes. 

Në “Karbonizimet”, artisti zbulon realitetin e shpërbërjes dhe transformimit, duke krijuar një pasqyrë të pasigurisë dhe traumave që përshkojnë shpirtin kolektiv. Forma të deformuara dhe të karbonizuara janë metafora për pasojat e dhunshme të jetës dhe shkatërrimit që përndjekin mendjen dhe shpirtin njerëzor. Ky cikël është një reflektim mbi ecurinë e natyrshme të shkatërrimit dhe riformësimit, një ndihmë për të kuptuar sesi tronditjet dhe transformimet e jetës ndihmojnë në formësimin e qenies dhe identitetit. 

“Trekëndëshi i Bermudës” shpreh një përpjekje për të kuptuar misteret e ekzistencës, një hapësirë ku çdo hap është një mundësi për të humbur dhe për të kërkuar. Ky trekëndësh është një alegori për përpjekjet e pafundme të njeriut për të zbuluar dhe kuptuar më shumë rreth natyrës së realitetit dhe ekzistencës, në një botë që është përherë e mbushur me enigma dhe sfida. 

Në “Homazhin e Jezus Krishtit”, artisti eksploron dimensionet e shpirtit dhe besimit, duke ofruar një vizion të thellë mbi lidhjen e njeriut me të pavdekshmen dhe transcendentin. Ky portret është një përpjekje për të kapur dhe shprehur shpirtin e besimit dhe përkushtimit, duke ofruar një përmirësim të thellë në kuptimin e lidhjes së individit me të pavdekshmen. 

“Dritarja Artistike” është një simfoni e poetikës dhe filozofisë, ku duar që përshëndesin njëra-tjetrën janë një alegori e fuqisë transformuese të artit. Kur arti hyn në hapësirë, ai nuk eklipsohet nga asgjë tjetër; ai ndriçon dhe transformon realitetin, duke krijuar një ambient të mbushur me dritë dhe kreativitet që reflekton thellësitë e shpirtit. 

“Portreti Tragjik” është një meditacion mbi dhimbjen dhe vuajtjen njerëzore, një pasqyrë e ndjeshmërisë që shfaq sfidat dhe dhimbjet më të thella të individëve. Në të njëjtën kohë, peizazhet e vizatuara nga lartësia ofrojnë një perspektivë sublime mbi botën, duke theksuar lidhjen e përjetshme ndërmjet njeriut dhe natyrës, dhe ndikimin që ky realitet ka mbi jetën tonë. 

“Rrënjët e Shpirtit” është një eksplorim i pasur dhe i shumëdimensional i artit që nxit mendimin dhe ndjenjat më të thella. Është një mundësi për të hyrë në thellësitë e shpirtit dhe mendjes, për të reflektuar mbi historinë dhe përvojat që ndihmojnë në formësimin e identitetit tonë si individë dhe si shoqëri. Skulpturat, të ringjallura nga gurët e lashtë me formë të ndryshme tregojnë stilin e veçantë në skulpturë dhe stilizim të thellë.  

Në këtë ekspozitë, arti i Jetullah Haliti-Eti është një reflektim mbi thelbin e qenies dhe mbi ndihmën që artin mund të ofrojë në ndriçimin e natyrës njerëzore, në përpjekjen për të kapur dhe për të përjetuar thellësitë e mendjes dhe shpirtit në një botë që është përherë e mbushur me mistere dhe enigma. 

Në ekspozitë u shfaq edhe një film i punuar nga Klodi Kadillari e cila kishte trajtuar jetën e artistit Eti. 

Ekspozita do të mbyllet të premten. / KultPlus.com

Ag Apolloni: Ka 25 vjet që mendoj se në Kosovë, pas titullit ‘ekspert për arsim’ qëndron një sharlatan trim

Posted on by Kult Plus

Nga Ag Apolloni

Sot e lexova një prononcim të një eksperti të arsimit që thoshte: “Njeriu i paarsimuar e lë Kosovën dhe shkon diku tjetër për të gjetur shpresën. Njeriu i arsimuar mirë e merr punën në Kosovë. Njerëzit po dalin nga Kosova edhe si rezultat i arsimimit të dobët”.

S’po ndalem te gramatika e gërditshme e ekspertit, por po shtoj se unë di raste kur njerëz të diplomuar dhe me tituj shkencorë, mjaft të aftë në profesionin e tyre, pasi nuk kanë mundur të gjejnë punë në Kosovë, kanë ikur jashtë, në shtete të tjera, ku tash kryejnë punë që s’janë të profesionit të tyre, madje disa me diploma master punojnë edhe si punëtorë krahu.

T’i ofendosh ata që ikin dhe t’i lavdërosh ata që rrinë, mund të jetë qasje e mirë për t’iu vardisur pushtetit, por është gënjeshtër e ulët.

Eksperti duhet ta dijë që Kosova është edhe e atyre që, për arsye të ndryshme, hyjnë tek ajo kategoria që ai e quan “të paarsimuar”. Shteti nuk është klasë që ti t’u thuash njerëzve: ti s’paske mësu’, dil jashtë (n’Gjermani)!

Si i arsimuari, si i paarsimuari, kanë të drejtë të punësohen në Kosovë. Por, si i arsimuari, ashtu edhe i paarsimuari, kanë ikur dhe po ikin me të madhe.

Kosova nuk është universitet, por shtet që duhet t’u ofrojë punë të gjithë qytetarëve të vet. Janë pikërisht “ekspertët e arsimit” që e kanë shkatërruar arsimin, dhe tani i fajësojnë “të paarsimuarit”, që janë viktima të eksperimenteve të tyre.

Kam qenë në shumë vende të Evropës dhe kam takuar shqiptarë të arsimuar dhe që punojnë punë jashtë profesionit të tyre, ndërkohë që ëndërrojnë të kthehen dhe të punojnë në Kosovë. Nuk e di se si ndihen ata kur lexojnë apo dëgjojnë prononcime të tilla ekspertësh. Budallenjtë jashtë, të mençmit brenda!, ky është nënteksti i atij prononcimi prej eksperti. Sipas tij, shteti ynë ideal nuk paska vend për ata që s’janë arsimuar mirë.

Në vend se të ulemi e të diskutojmë me shqetësim se si ta konsolidojmë shtetin, si ta bëjmë vendin tonë të jetueshëm, dalim e hapareshemi nëpër televizione, duke i quajtur të paedukuar ata që po ikin. Po harrojmë që ata janë vëllezërit tanë dhe motrat tona.

Për ta përmirësuar shtetin, duhet ta kritikojmë pushtetin, jo ta shajmë atë të shkretën a të shkretin, që në pamundësi për të gjetur veten këtu, lë shokë, shoqe, familje e shtëpi, dhe merr botën me lot në sy.

Ka 25 vjet që mendoj se në Kosovë, pas titullit ‘ekspert për arsim’ qëndron një sharlatan trim./ KultPlus.com

Teatri i Gjilanit me marrëveshje unike në Kosovë, zhvendos shfaqjet teatrale në lokal të shërbimit gastronomik

Posted on by Kult Plus


Teatri  i Qytetit të Gjilanit dhe  “Tabu Lounge Bar” për herë të parë në Kosovë kanë arritur marrëveshje bashkëpunimi për realizimin e  shfaqjeve teatrale në lokal të shërbimit gastronomik.

Menaxhmenti i “Tabu Lounge Bar’’ janë shprehur jashtëzakonisht të kënaqur me këtë marrëveshje, pasi sipas tyre e ka shëndrruar Gjilanin në një qytet unik.

“Sigurisht që kjo ka qenë kërkesë e jona që përvec performancave muzikore të kemi dicka më ndryshe nga ajo se cfarë ofrohet në lokalet të shërbimit gastronomik, dhe patjetër që jemi shumë të lumtur që Teatri i Qytetit të Gjilanit, menaxhmenti dhe trupa artistike janë bashkëpunues të nivelit të tillë, duke bërë që jeta kulturore të mos mbetet vetëm në ambientet e dedikuara për to, por të shpërfaqet edhe në lokalet e gastronomisë, duke bërë Gjilanin ndryshe nga qytetet tjera”, thuhet në njoftim.

Më tej në njoftim thuhet se kjo marrëveshje ka për qëllim të krijojë një bashkëpunim të ri dhe inovativ në qytetin e Gjilanit, duke sjellë për herë të parë shfaqje teatrore dhe artistike në ambientet e Tabu Lounge Bar.

“Bashkëpunimi do të fokusohet në organizimin e shfaqjeve të ndryshme teatrale, përfshirë stand-up komedi dhe ngjarje të tjera kulturore në këtë ambient unik të cilat do të shfaqen gjate gjithë vitit. Kjo dorë bashkëpunimi e ofruar nga Teatri i Qytetit në Gjilan është lehtësim i madh jo vetëm për Tabu Lounge Bar, por besojmë dhe shpresojmë që aktivitete të tilla të shtrihen edhe tek të tjerët”, thuhet në shkrim.

Stafi i “Tabu Lounge Bar” ka falënderuar  Teatrin e Qytetit të Gjilanit, drejtorin Erson Zymberi, dhe gjithë trupën e teatrit./ KultPlus.com

Granit Xhaka nominohet për ‘Topin e Artë’

Posted on by Kult Plus

Futbollisti shqiptar Granit Xhaka është nominuar për çmimin prestigjioz të “Topit të Artë”. Kjo është një arritje e jashtëzakonshme për mesfushorin shqiptar.

Kjo është hera e parë që Xhaka është pjesë e listës së kandidatëve për këtë çmim të rëndësishëm në futbollin ndërkombëtar.

Ceremonia e ndarjes së Topit të Artë do të mbahet më 28 tetor në Paris, ku do të mblidhen personalitete të njohura nga bota e futbollit për të nderuar më të mirët e vitit, transmeton telegrafi, përcjell Albinfo.ch.

Këtë vit, disa lojtarë të tjerë janë gjithashtu në garë për çmimin, duke përfshirë Vinicius Jr. i Real Madridit, Rodri i Manchester City-t dhe Jude Bellingham, që të gjithë janë konsideruar si favoritë për të fituar Topin e Artë.

Nominimi i Granit Xhakës është një dëshmi e suksesit të tij dhe ndikimit që ka pasur në fushë gjatë vitit të fundit, duke e bërë këtë një moment të veçantë për karrierën e tij dhe për tifozët e tij.

Graniti fitoi Bundesligën me Bayer Leverkusein pa pësuar asnjë humbje, po ashtu shtoi DFB Pokal dhe Superkupën e Gjermanisë./Albinfo.ch/ KultPlus.com

Pas New York-ut ‘Tango Nights’ vjen në TKK, përmes artit të vallëzimit zbërthehet kompleksiteti i marrëdhënieve njerëzore

Posted on by Kult Plus

Vjollca Duraku

Pas Shteteve të Bashkuara të Amerikës, Baleti Kombëtar i Kosovës në bashkëpunim me “Ajkun Ballet Theatre” kanë sjellë premierë në Prishtinë shfaqjen  “Tango Nights”, të koreografes Chiara Ajkun, shkruan KultPlus.

“Tango Nights”, e cila nuk shfaqë domosdoshmërisht një histori të bazuar në ndonjë ngjarje reale, paraqet jetën e viteve 1990 në Buenos Aires, ku tangoja ishte forma e vetme e argëtimit. Në këtë kontekst, koreografja Ajkun kapet për elementet e “Tangos” si kërcim i pasionit, zjarrit dhe luftimit, duke e zbërthyer deri te kompleksiteti i madh i marrëdhënieve njerëzore.

Ngjarja në Amfiteatrin e Teatrit Kombëtar të Kosovës filloi në një formë të mistershme, ku shpërthimi i një tymi në formë të çrregullt tërhoqi vëmendjen e publikut, duke e shënuar edhe fillimin e shfaqjes së baletit, e cila zgjati rreth 90 minuta.

Misteri vazhdonte edhe më tej në një errësirë totale për disa sekonda, derisa një dritë e kuqe, e fokusuar mbi subjektin e ngjarjes, filloi të qartësoj gjithçka. Një zotëri i dehur plotësisht, mbi një tavolinë nën dritat e barit ku pinte, dhe e dashura e tij e dëshpëruar për këtë fakt, ishte pika e parë interpretuese.

“Vera” në këtë shfaqje paraqitet si element thelbësor rreth së cilës inkorporoheshin vallëzimi, pasioni, misteri, joshja, dhe aktet e çuditshme, të cilat në mënyrë profesionale u sollën nga pjesëtarët e trupës së baletit në solo, duo, trio, quatro duke dhuruar për publikun art përmes profesionalizmit, bukurisë elegante dhe muzikës së mrekullueshme në prapavijë.

Një skenë e cila e tërhoqi shumë vëmendjen e publikut ishte ajo ku përmes sharmit të jashtëzakonshëm dy djem me lëvizje plot takt ziheshin për të fituar zemrën e një vajze, e cila i tundonte të dy me lëvizjet e saj joshëse, bukurinë e së cilës e shtonte edhe më shumë fustani me ngjyrë të kuqe, i cili i ndiqte lëvizjet dhe secilin hap të saj.

Ndërsa fundin e kësaj shfaqje e shënoi një pikë interpretuese nga një pjesë e madhe e trupës së baletit në të cilën paraqiteshin: trishtimi rreth dehjes, marrëdhëniet mes dyja gjinive, puthjet, ledhatimet, loja me karta, zjarri e pasioni duke e përmbyllur me shfaqjen me skenën e njejtë të fillimit, të zotëriut të dehur mbi tavolinë.

Këtë shfaqje e cila u pëlqye nga publiku e sollën balerinët: Mërgime Morina, Jeta Musolli, Vjollca Llugiqi, Leonora Rexhepi, Besarta Shaljani, Fatmir Smani, Sead Vuniqi, Fisnik Smani, Muhamet Bikliqi, Kreshnik Musolli, Momoko Burbine, Klevis Tafaj, Areum Jeong, Jeffrey Salce, Megan Dollar, Abbi Johnson, Telmen Munkherdene, Bailey Smith, Hitomi Ippongi, Tomas, Martinelli, Elisa Molinari, Bianka Skenderi dhe Risa Tada.

Pas shfaqjes, koreografja Chiara Ajkun tregoi për përvojën e saj në realizimin e këtij projekti me BKK.

“Bashkëpunimi lindi pasi unë shpreha interesimin tim te drejtori i Baletit Kombëtar të Kosovës, Sinan Kajtazi,  i cili ishte duke kërkuar të ndërmarrë bashkëpunime. Unë kam ardhur këtu në muajin Mars, ku edhe më pëlqeu shoqëria dhe kultura e jashtëzakonshme dhe kështu unë krijova këtë “Tango Nights” për Baletin Kombëtar të Kosovës”, ka thënë koreografja Ajkun.

Ndërsa balerini i trupës së baletit “Ajkun Ballet Theatre”, Klevis Tafaj, tha se ndihet jashtëzakonisht i lumtur që edhe në Prishtinë arritën të sjellin me po të njejtin sukses këtë shfaqje, pasi sipas tij baleti është një formë e fuqishme e përfaqësimit të shtetit.

“Sigurisht ishte një emocion i dyfishtë për mua të performoj para një publiku shqiptar. Ndjehem i lumtur për vetë faktin që jemi këtu dhe për bashkëpunimin. Këto bashkëpunime ndihmojnë në zhvillimin e artit jo vetëm në Kosovë, por edhe në Shqipëri, sepse baleti është pjesë e rëndësishme e një shteti. Pati shumë emocione, shumë duartrokitje. Shpresojmë që ky bashkëpunim të vazhdojë edhe në të ardhmen” ka thënë balerini Tafaj.

Ai më tej u shpreh i ngazëllyer me mirëpritjen që Baleti Kombetar i Kosovës i kishte  bërë “Ajkun Ballet Theatre”.

“Unë jetoj në Amerikë, jam pjesë e kompanisë “Ajkun Ballet Theatre” pjesë e së cilës është edhe koreografja Chiara Ajkun. Me kolegët këtu ka dhjetë vite që njihem. Kam qenë këtu edhe para 10-të vitesh, para se të shkoj në amerikë, kur ka qenë drejtor Ahmet Brahimaj. Këtu gjithmonë jam ndier si në shtëpinë time, janë të gjithë të sjellshëm, të gjithë të dashur, të respektueshëm. Jemi munduar që atë respektin që na kanë dhënë këtu të ju japim edhe ne në Amerikë. Shfaqja edhe atje ka qenë një sukses i jashtëzakonshëm” ka thënë Tafaj.

Kurse, për balerinën Jeta Musolli  bashkëpunimi në mes të dy trupave të baletit ka qenë një përvojë me emocione të jashtëzakonshme.

“ Këtë shfaqje e kemi dhënë edhe në New York, në bashkëpunim me Chiara Ajkun dhe kompaninë e saj. Ishte majft emocionuese që dy trupa të bëhemi përsëri bashkë dhe të paraqitemi para publikut në Kosovë. Kësaj radhe është dashur që të japim dyfish më shumë energji për shkak se kemi qenë në pushim, por u munduam të mobilizohemi të gjithë dhe besoj që ja kemi arritur qëllimit. Jam shumë e lumtur që publiku e pëlqeu”, ka thënë balerina Musolli.

Ndërsa drejtori i Baletit Kombëtar të Kosovës, Sinan Kajtazi, tha se ndihej i lumtur që marrëveshja me koreografen Ajkun, sipas tij u realizua në tërësi sipas planit të paraparë.

“Më vjen mirë që i gjithë plani dhe gjithë marrëveshja që e kemi pasur me koreografen Chiara Ajkun është duke shkuar sipas asaj që e kemi planifikuar qysh në vitin e kaluar. Do të thotë shfaqja “Tango Nights” është planifikuar që fillimisht të shfaqet në NewYork pastaj edhe në Prishtinë. Jam i kënaqur që kemi arritur ta shfaqim edhe në Prishtinë. Është një shfaqje e cila është e bazuar kryesisht në solistë me një mozaik duetesh, triosh, kuartetesh”, ka thënë ai duke potencuar me krenari edhe pëlqimin e shfaqjes nga ana e publikut.

“Me sa e pashë, publikut i pëlqeu shfaqja, është një nga ato shfaqje nga të cilat nuk pritet të ketë ndonjë linjë dramaturgjike, por që me lëvizje të bukura, me një koreografi të bukur që Chiara e ka ndërtuar me balerinët tanë dhe balerinët e kompanisë “Ajkun Ballet Theatre”. Besoj që para publikut është shfaqur diçka shumë të bukur”, ka përfunduar drejtori Kajtazi.

BKK këtë muaj do të prezantohet në Korenë e Jugut dhe Seul. Pas këtyre aktiviteteve BKK do të fillojë përgatitjet për premierën e pestë për këtë vit, e cila do të shfaqet me datën 14 nëntor 2024./ KultPlus.com




‘Po valèvitè mbi toke t’Kastrjotit’

Posted on by Kult Plus

Poezi nga Gjergj Fishta

LAHUTA – Kanga e Tridhelle

po valèvitè mbi

toke t’

Kastrjotit,

si valèviti dikur motit:

e der’ m’ giellè ushton broh’ria

kah gèrthet fusha e malsia:

pèr jetè t’ jetes : rrnofte Shqipnia !

Edhe keshtu,

mbas sa mjerimit,

mbas sa giakut e shembtimit,

e p’r inatè t’ Shkjevet t’ Ballkanit

pèr gazep t’ atij Sulltanit:

si premtue kisht’ Perendia:

prap zojè m’ veti duel Shqipnia./KultPlus.com

“Metro”: Plazhi i Durrësit kryeson mes destinacioneve evropiane të këtij viti

Posted on by Kult Plus

Në kërkim të diellit dhe pa turma turistësh? Plazhi më pak i mbushur me vizitorë në Evropë tashme është zbuluar – dhe ndodhet në një vend relativisht të panjohur, shkruan Eleanor Noyce në të përditshmen britanike “Metro”.

Plazhi i Durrësit në Shqipëri ofron një hapësirë më të madhe për vendosjen e peshqirave nga plazhistët. Në fund të fundit, nuk ka asgjë më të keqe sesa të ndihesh ngushtë në një vend të mbipopulluar gjatë pushimeve.

Hulumtimi, i kryer nga Wizz Air, analizoi mbi 50 vende evropiane dhe plazhet e tyre më të mira për të përcaktuar vendpushimet më pak dhe më shumë të populluara.

Llogaritja përfshinte matjen e plazhit, ndarjen e zonës së tij me madhësinë e një peshqiri plazhi, dhe më pas me numrin mesatar të vizitorëve ditorë – për të bërë një vlerësim se sa hapësirë ofron çdo plazh për person.

Plazhi i Durrësit – rreth 10,5 kilometra i gjatë – u rendit në vendin e parë – duke mposhtur vende të njohura në Francë, Portugali dhe Spanjë.

I ndjekur nga plazhi Camber Sands në Sussex-in Lindor, Britani e Madhe – i cili la pas plazhet si Praia da Falésia e Portugalisë dhe Playa d’en Bossa të Spanjës – që u renditën respektivisht në vendin e shtatë dhe të dhjetë.

Playa Sa Caleta në Ibiza, Spanjë, rezultoi plazhi më i mbipopulluar.

Aktivitet që mund të bëni pranë Plazhit të Durrësit, Shqipëri

Plazhi i Durrësit mund të jetë cilësuar si “i bukur” nga platforma Reddit, por edhe si një nga qytetet më të vjetra në Shqipëri, këtu ka shumë histori për t’u zbuluar.

Amfiteatri i Durrësit është një trashëgimi e epokës romake dhe dikur kishte 20,000 njerëz. Ndërtimi filloi gjatë shekullit të II pas Krishtit, dhe ky mbetet amfiteatri më i madh i ndërtuar ndonjëherë në Gadishullin Ballkanik, kështu që ia vlen të vizitohet.

Aty pranë ndodhet edhe Muzeu Arkeologjik i Durrësit, i cili, si muzeu më i madh arkeologjik në vend, tregon historinë e Shqipërisë përmes objekteve prehistorike.

Përveçse është plazhi më pak i mbipopulluar i Evropës, Durrësi ofron shumë diell, det dhe rërë në plazhin Copacabana dhe në plazhin Ohana.

Gjithashtu, Durrësi është i njohur për kulturën e tij të verës.

Si të shkoni në Plazhin e Durrësit, Shqipëri

Mënyra më e lehtë për të arritur në Durrës është të fluturoni drejt Tiranës, kryeqytetit të Shqipërisë, e cila është rreth 38 minuta larg me makinë.

Ofrohen fluturime nga Aeroporti Luton i Londrës nëpërmjet Wizz Air, të cilat zgjasin më shumë se 3 orë, ndërsa me linjën ajrore Ryanair nga Stansted zgjat 2 orë e 55 minuta.

Kur të shkoni në Plazhin e Durrësit, Shqipëri

Nëse jeni duke kërkuar pushime të minutës së fundit për t’i dhënë lamtumirën verës, lajmi i mirë është se temperaturat mbeten të larta në këtë periudhë të vitit në Shqipëri – duke arritur mesataren prej 21 gradë Celsius në shtator dhe 16 gradë Celsius në tetor.

Megjithatë, Shqipëria përjeton temperaturat më të ngrohta gjatë qershorit, korrikut dhe gushtit, me temperatura që variojnë midis 22 dhe 24 gradë Celsius. 

Biblioteka Kombëtare e Kosovës dhe Biblioteka Kombëtare e Universitare e Kroacisë thellojnë bashkëpunimin

Posted on by Kult Plus

Drejtoresha e Bibliotekës Kombëtare të Kosovës, Dr. Blerina Rogova Gaxha është takuar sot me Dr. Ivanka Stričević, drejtoreshë e Bibliotekës Kombëtare dhe Universitare të Kroacisë. Në takimin e mbajtur në Zagreb, u diskutua për projekte, iniciativa dhe tema me interes të përbashkët.

Drejtoresha e BKK-së tha se ky takim krijon mundësinë për ta forcuar partneritetin ndërmjet Bibliotekës Kombëtare të Kosovës dhe Bibliotekës Kombëtare dhe Universitare të Kroacisë: “Është misioni ynë ta avancojmë kauzën e bibliotekës sonë kombëtare, duke punuar më mirë së bashku në shkëmbim të përvojave dhe duke arritur më shumë sesa mund të bëjmë vetëm.” Prof. Stričević ndërkaq pohoi se “Ne jemi entuziastë për mundësinë e bashkëpunimeve në të ardhmen dhe besojmë se vizita juaj do të jetë një hap kyç në thellimin e bashkëpunimit tonë në të ardhmen”.

Tutje, u diskutua për rëndësinë e bibliotekës si institucion lider i kujtesës dhe rolin e rëndësishëm që luan ajo në zhvillimin intelektual, arsimor, kulturor e social të vendit dhe komunitetit të cilit i shërben.

Biblioteka Kombëtare dhe Universitare në Zagreb, është biblioteka më e madhe kroate dhe funksionon si bibliotekë kombëtare e Kroacisë dhe si bibliotekë qendrore e Universitetit të Zagrebit. /Gazeta Express/ KultPlus.com

Publikohet juria e filmave të shkurtër në PriFest

Posted on by Kult Plus

Prishtina International Film Festival- Prifest sot ka prezantuar anëtarët e jurisë të kategorisë garuese së filmave të shkurtër.

BLERTA BASHOLLI

Blerta Basholli është skenariste/ regjisore me një stil unik vizual realist. Tregimet e saj trajtojnë çështje sociale dhe gjinore nga vendi ku është lindur dhe rritur, Kosova, dhe përtej saj. Filmi i saj debutues “Zgjoi” (2021) theu rekordet në Sundance, ku ajo fitoi Çmimin e Jurisë së Madhe, Çmimin për Regji, dhe Çmimin e Publikut në kategorinë e Kinemasë Botërore Dramatike, duke u bërë filmi i parë në historinë e Festivalit të Filmit Sundance që i arrin të tria këto çmime. Në vitin 2008, ajo u nderua me Bursën e Dekanit në Programin e Filmit në Tisch School of the Arts – NYU. Ajo jetoi në Neë York për katër vjet, ku pati mundësinë të punonte në disa projekte filmike si studente. Në vitin 2011, u kthye në vendlindjen e saj, dhe punoi në shumë filma të shkurtër dhe të gjatë.

MICHAEL PENTNEY

Producenti Michael Pentney nga Britania e Madhe ka qenë i angazhuar në filma të zhanreve të ndryshme, duke u fokusuar në tema me ton emocional dhe social. Së fundmi, pasi ka adoptuar dy fëmijë të vegjël, ai ka interes për përbërjen e shoqërisë dhe ndikimin që ambientet tona kanë mbi ndjenjat dhe veprimet tona. Përveç prodhimit të filmave, ai është pjesë e ekipit drejtues në një nga kompanitë më të vjetra dhe më të suksesshme të post-produksionit në Mbretërinë e Bashkuar.

ARMENIS NOKSHIQI

Amernis Nokshiqi është aktore e njohur e Teatrit Shqiptar të Shkupit, me shumë role të suksesshme në filma dhe teatër. Ndër projektet e saj të fundit janë filmat “Heshtja e sirenave” dhe “Pranverë e paharruar në fshatin e harruar”. E vlerësuar me çmime të shumta në rajon, Amernis vazhdon të shkëlqejë në teatër dhe film.

Edicioni 16-të i PriFest mbahet prej 10-15 shtator 2024 në Kino Armata./ KultPlus.com


25-vjetori i themelimit të policisë, fëmijët e uniformuar, të prirë nga djali i heroit Bunjaku parakalojnë në Prishtinë

Posted on by Kult Plus

Ministri i Punëve të Brendshme, Xhelal Sveçla, ka bërë të ditur se sot janë hapur aktivitetet e 25-vjetorit të themelimit të Policisë së Kosovës.

Në kuadër të këtyre aktiviteteve, Sveçla tha se ishte edhe parakalimi i fëmijëve me pjesëtarë policorë, të prirë nga Fatlumi, djali i heroit Afrim Bunjkaku, teksa pas tij, siç tha ai, ishin fëmijët e nipërit e heronjve të Kosovës të rënë në krye të detyrës dhe fëmijë nga komunitetet e ata me nevoja të veçanta.

“Ky është mesazhi më i fuqishëm që japim në 25 vjetorin e themelimit të Policisë së Kosovës. Përkundër çdo sfide që na del përpara, do i shërbejmë Republikës sonë me përkushtim, nder e dinjitet”.

“Me aktivitete të tjera kulturore e sportive, bashkë me këta fëmijë, me Kryeministrin Albin Kurti e Drejtorin e Përgjithshëm të Policisë Gazmend Hoxha, hapëm aktivitetet e 25 vjetorit të themelimit të Policisë së Kosovës”, tha Sveçla, transmeton Klankosova.tv.

Tutje, ai tha se e ardhmja e sigurt dhe prosperuese për brezat e rinj, janë qëllimi i punës së tyre.

Ministri i Punëve të Brendshme, Xhelal Sveçla, ka bërë të ditur se sot janë hapur aktivitetet e 25-vjetorit të themelimit të Policisë së Kosovës.

Në kuadër të këtyre aktiviteteve, Sveçla tha se ishte edhe parakalimi i fëmijëve me pjesëtarë policorë, të prirë nga Fatlumi, djali i heroit Afrim Bunjkaku, teksa pas tij, siç tha ai, ishin fëmijët e nipërit e heronjve të Kosovës të rënë në krye të detyrës dhe fëmijë nga komunitetet e ata me nevoja të veçanta.

“Ky është mesazhi më i fuqishëm që japim në 25 vjetorin e themelimit të Policisë së Kosovës. Përkundër çdo sfide që na del përpara, do i shërbejmë Republikës sonë me përkushtim, nder e dinjitet”.

“Me aktivitete të tjera kulturore e sportive, bashkë me këta fëmijë, me Kryeministrin Albin Kurti e Drejtorin e Përgjithshëm të Policisë Gazmend Hoxha, hapëm aktivitetet e 25 vjetorit të themelimit të Policisë së Kosovës”, tha Sveçla, transmeton Klankosova.tv.

Tutje, ai tha se e ardhmja e sigurt dhe prosperuese për brezat e rinj, janë qëllimi i punës së tyre.

Artisti kinez arrestohet për ‘fyerje’ të Mao Ce Dunit me skulpturat e tij

Posted on by Kult Plus

Artisti disident kinez Gao Zhen është arrestuar me dyshimin për “fyerje të heronjve dhe martirëve revolucionarë”, tha vëllai i tij dhe partneri artistik Gao Qiang.

Vëllezërit Gao janë të njohur për skulpturat e tyre provokuese, të cilat kritikojnë themeluesin e Republikës Popullore të Kinës, Mao Ce Dunin dhe regjimin e tij.

Gao Zhen u largua nga Kina dy vjet më parë për të jetuar përgjithmonë në Shtetet e Bashkuara, por kishte qenë për vizitë në familjen kur u kap nga autoritetet në provincën Hebei, tha vëllai i tij në një postim në Facebook, raporton BBC, transmeton Klankosova.tv.

Autoritetet kineze nuk i janë përgjigjur pretendimeve të Gao Qiang, i cili tha se rreth 30 oficerë policie sulmuan studion e artit të vëllezërve në Sanhe City më 26 gusht.

Ai shtoi se ata kishin konfiskuar disa vepra arti përveç ndalimit të Gaos.

Që nga vitet 1980, vëllezërit kanë tërhequr vlerësime ndërkombëtare për vepra të tilla si Faji i Maos, një statujë prej bronzi e ish-diktatorit komunist ku shfaqet i gjunjëzuar dhe i penduar.

Zhduken kangjellat e ‘Titanic’-ut?

Posted on by Kult Plus

Që kur filmi i James Cameron doli në kinema në vitin 1997, imazhet e para që vijnë në mendje kur mendohet për ”Titanic”-un janë Leonardo DiCaprio dhe Kate Winslet, të njohur si Jack and Rose, duke ‘fluturuar”’ para oqeanit me këmbët e tyre në kangjellat e anijes transatlantike, shkruan adnkronos.it.

Këto kangjella, tashmë ikonë, po zhduken.

Kjo risi u dokumentua nga ekspedita e re e organizuar nga ”RMS Titanic, Inc.” e cila pati mundësinë të shpenzonte qindra orë duke dokumentuar rrënojat me detaje të shkëlqyera falë teknologjisë më të mirë se sa ato të përdorura në të kaluarën.

”Pas 13 ditësh të përqendruar në rrënojat e ‘Titanic’-ut, skuadra ishte e ngazëllyer për të parë me padurim pamjen e parë të harkut, por emocionet u shuan shpejt nga një ndryshim i rëndësishëm”, thuhet në faqen e misionit.

”Atje mungonte maja platonike e anijes”, shtohet në të./ atsh/ KultPlus.com


Projektet për sheshin monumental Adem Jashari nxirren para publikut

Posted on by Kult Plus

Projektet e parakualifikuara në konkursin ndërkombëtar për sheshin monumental në nderim të sakrificës së Adem Jasharit dhe familjes Jashari janë nxjerr para publikut në trajtën e një ekspozite e cila është e hapur nga sot në orën 16:00.

Projektet të cilat , juria profesionale i kishte përzgjedhur si më të mirat, do të shfaqen për një javë rresht në objektet e Komunës së Prishtinës.

Monumenti synon të nderojë përkushtimin, guximin dhe sakrificën e palëkundur të Adem Jasharit dhe familjes së tij gjatë luftës së Kosovës për pavarësi dhe të shërbejë si një kujtesë e fuqishme për rolin e tyre kryesor në lëvizjen çlirimtare dhe përkushtimin e tyre ndaj kauzës kombëtare.

Qytetarët do të votojnë për projektin më të mirë.

E kryetari Përparim Rama tha se bashkë me familjen Jashari kanë zgjedhur top pesë projektet

“Pesë projekte të cilat janë si më të mirat, eksposozhen në hapësirat e komunës, ftoj edhe qytetarët tjerë të marrin pjesë në këtë ekspozitë, është domethënëse, për familjen Jashari, për sakrificën që kanë dhënë. Prandaj, ju ftoj të gjithëve që ditëve në vijim të vizitoni e po ashtu të votoni se cili prej këtyre projekteve ju duket më i miri. Në të ardhëm zotohemi e afërt të transformojmë këtë projekt në realitet në një pjesë të kryeqytetit. Kemi qenë në komunikim edhe me familjen Jashari. Ashtu edhe siç kemi premtuar, që heroi ynë kombëtar, Adem Jashari në të ardhmen e afërt do të ketë edhe vendin e vet në kryeqytet”, tha Rama./rtk/ KultPlus.com


Sekuestrohen rreth 3 mijë libra shkollorë, dyshohet se ishin prodhuar pa të drejtë autoriale

Posted on by Kult Plus

Task-Forca Kundër Piraterisë dhe Falsifikimit sot më 4 shtator ka sekuestruar rreth 3 mijë libra arsimore-shkencore dhe profesionale, dyshohet se ishin prodhuar pa të drejtë autoriale.

Në njoftimin e lëshuar thuhet se është bërë kontrollimi i subjekteve të cilat merren me prodhimin, shitjen dhe shpërndarjen e materialeve që mbrohen me të drejtën e autorit.

“Procesi kontrollues dhe mbikëqyrja e zbatimit të Ligjit për të Drejtat e Autorit nga ana e Task-Forcës, respektivisht Inspektoratit të Tregut në mbështetje të Policisë së Kosovës është zhvilluar në disa qytete të Kosovës dhe është bërë sekuestrimi i materialit pirat. Zhvillimi i këtyre veprimeve kundër piraterisë në vend ka sjellë si rezultat sekuestrimin e rreth 3,000 librave arsimore-shkencore dhe profesionale”.

“Ndaj bizneseve tek të cilat është gjetur materiali pirat, pa leje dhe pa marrëveshje me mbajtësit e të drejtave, institucionet e zbatimit të ligjit do të ndërmarrin masa ndëshkuese konform legjislacionit në fuqi”, thuhet në njoftimin e MINT-it.