Bibliografia e përkthimeve në Shqipëri 2016, tashmë online

Biblioteka Kombëtare e Shqipërisë, në kuadër të Ditës Ndërkombëtare të Përkthimit, prezantoi publikimin online në faqen zyrtare të BKSH-së, të INDEXTRANSLATIONUM 2016, që përbën Bibliografinë e përkthimeve në Shqipëri për këtë vit.

Bibliografia e përkthimeve në Shqipëri në vitin 2016 përmban 526 tituj dhe përbën një ndihmesë të madhe për studiues, përkthyes dhe lexues.

Shqipëria si vend anëtar i UNESCO-s, prej vitit 1969, kontribuon në Index Translationum me bibliografinë e botimeve të përkthyera brenda kufijve të saj shtetërorë.

Index Translationum është Bibliografia ndërkombëtare e përkthimeve dhe përfshin katalogun bibliografik të botimeve të përkthyera në afro 190 vende të botës.

Çdo përkthim që botohet në një vend citohet në këtë bibliografi, e cila përgatitet nga baza e të dhënave elektronike të çdo vendi anëtar të Index Translationum.

Bashkëpunimi ndërkombëtar e bën Index Translationum një veprimtari unike në botë. / KultPlus.com

Arsyeja e pazakontë përse Dua Lipa do të mbajë edhe një koncert në Irlandë

Këngëtarja shqiptare Dua Lipa ka njoftuar për një show të dytë në kryeqytetin e Republikës së Irlandës, Dublin.

Ky koncert do të mbahet në vitin 2018, pasi për koncertin e planifikuar më 10 prill biletat ishin shitur për pak sekonda.

Tani ajo ka vendosur të ketë edhe një mbrëmje në Dublin dhe do të këndojë edhe më 9 prill në kuadër të turneut për vitin 2018.

Ky sukses i madh i Dua Lips vjen pas hitit “New Rules” që po vazhdon të dominojë në top-listat irlandeze, duke kaluar kështu javën e pestë në krye të top-listave, shkruan Albinfo.

Edhe albumi i saj i parë është në top-dhjetëshe të albumeve në gjashtë javët e fundit. / KultPlus.com

“Kullat mesjetare të sahatit në trojet shqiptare” 63 dëshmi vijnë në një ekspozitë në Berat

11 vite studim të hollësishëm mbi arkitekturën, historikun dhe teknikat e ndërtimit të kullave mesjetare të sahatit në trojet shqiptare, janë finalizuar me një ekspozitë, e cila ka sjellë mbrëmë në qytetin muze të Beratit 62 vepra në grafikë dhe një në pikturë.

Dritan Çoku, një emër i njohur në fushën e arkitekturës dhe trashëgimisë në këtë qytet ka sjellë mbrëmë për publikun nëpërmjet artit të grafikës artistike dhe pikturës dokumentimin e kullave të sahatit në 41 qytete shqiptare.

Modifikimi i mekanizmit nga orë matëse me tingull në mekanizëm me fushë ore është studiuar nga arkeologu Çoku, i cili ka sjell pamjet e kullave të sahatit nga qytete të Shqipërisë, Kosovës, Maqedonisë. Ishin tregtarët shqiptarë, të cilët kishin kontakte të shpeshta me qytetet evropiane, të cilët sollën mekanizmat e orës, ndërsa ndërtuesit vendas materializuan këtë sukses të mendimit njerëzor në vendin e tyre, duke krijuar kullat e sahatit si objekte për përdorim kolektiv për kohëmatje. E gjitha kjo ka tërhequr vëmendjen e studiuesit Çoku, i cili i ka kushtuar vite të gjata pune studimit të historikut të tyre.

Ekzistencën e këtyre sahateve autori e ka studiuar nga afër nga pikëpamja arkitekturore, nga ana historike dhe mënyrat e ndërtimit, për tja prezantuar më pas publikut në grafikë dhe pikturë. Hapja e ekspozitës ka tërhequr mbrëmë vëmendjen e studiuesve, historianëve dhe artistëve, të cilët ishin mbrëmë në galerinë e qytetit në çelje të saj.

Gjithë studimin fizik, por dhe dokumentimin për ato raste që kullat e sahatit nuk ekzistojnë, synojë që ta sjell së shpejtë në një monografi, pasi ndërtimi i kullave të sahatit në gjithë trojet shqiptare është një veçori, është diçka e rrallë, u shpreh Dritan Çoku.

“Ashtu si në viset e tjera të Ballkanit edhe në trojet shqiptare, ndërtimi i kësaj trashëgimie arkitektonike bëhej zakonisht në mjediset më të gjallëruara dhe më të dukshme të qyteteve, në sheshet e pazareve, pranë xhamive kryesore, apo vende të ngritura brenda kështjellave, tha Çoku. Për mungesë të dokumentacionit ilustrativ deri tani, këtyre qyteteve në vazhdim do ti shtohen edhe disa të tjerë me këtë kategori ndërtimore. Por, duket qartë dhe bindshëm se, ndërtimi i kullave të sahatit në trojet shqiptare është një veçori, diçka e radhe kjo për qendrat e tjera turke në periudhën osmane”, pohoi ai.

Për Faruk Borovën, një emër i njohur në fushën e trashëgimisë dhe kulturës në Shqipëri, kryetar i Bordit Drejtues të Institutit Shqiptar të Mendimit dhe qytetërimit Islam, që mbështeti hapjen e kësaj ekspozite studime të tilla e nderojnë qytetin e Beratit, pasi është një punë përveçse voluminoze dhe mjaft cilësore. / KultPlus.com

Erjola Azizolli

Ekspozohen letrat e rralla dhe sendet personale të At’ Fishtës e At’ Pllumit (FOTO)

Dorëshkrimet, botimet, sendet personale të At Gjergj Fishta dhe At Zef Pllumi u ekspozuan për publikun e gjerë në katedralen e Shën Palit.

Nuk është i rastësishëm takimi i dy françeskanëve në këtë ekspozitë. At Zef Pllumbi ka ruajtur një sërë dorëshkrimesh dhe sende personale të at Fishtës të cilat sot janë pjesë e pasurisë kombëtare dhe bibliotekave françeskane.

I tillë është dorëshkrimi i Fishtës Juda Makabre i ruajtur nga At Zef Pllumbi, botimi origjinal i Lahutës së Malësisë që i parkete dy shtatorit 1939, dy bastunët personal të françeskanëve, dhe maska mortore e Gjegj Fishtës.

At Zef Pllumi ka dorëshkrimet dhe kujtimet gjatë kohës së internimit dhe vuajtjes së dënimit për më shumë se 20 vjet. Ai është një nga figurat e qëndresës nën diktaturë dhe mendimit të përparuar shqip. Kreu i Kishës Katolike, ipeshkv i dioqezës Tiranë-Durrës George Frendo u shpreh i lumtur që kjo pasuri letrare u ekspozuan për besimtarët katolik dhe për të gjithë qytetarët.

George Frendo: Këtu janë shkrimet e At Gjergj Fishtës që i kishte ruajtur vetë padër At Zef Pllumbi, at Hanton Arapi.

Klerikët thonë se At Zef Pllumi, është një ndër figurat e ndritura të njeriut që “Rrnojti për me tregue” dhe dëshmoi para Zotit dhe gjithë brezave vuajtjet gjatë diktaturës, djegien e Kishave, tentativat e shfarosjes së besimit dhe mënyrës se si trajtoheshin barbarisht besimtarët, pjesë më e madhe e tyre të shpallur martirë.

Në botimet voluminoze “Rrno me tregue: At Zef Pllumi shkruan “Unë tanë jetën e kam kalue në burg, por mendimtár i lír. Ta mendojmë vedin zogj të lirë e fluturojmë ku të duem…”./KultPlus.com


Ekspozita e Llapashticës hapë “Javën e Gjidhënies” në Kosovë (FOTO)

Vetëm 40 për qind e fëmijëve të moshës nën gjashtë muaj, ushqehen me qumësht të gjirit të nënës.

Për ta rritur këtë përqindje edhe më shumë, në hapjen e Javës Botërore të Gjidhënies me temën “Ta mbështesim gjidhënien së bashku”, u tha se ushqyerja e fëmijëve me qumësht gjiri, mbron shëndetin e tyre.

Përfaqësuesja e Ministrisë së Shëndetësisë, Merita Vuthaj, ka thënë se po angazhohen që të jenë një hap më përpara se kompanitë farmaceutike që zëvendësojnë qumështin e gjirit të nënës, duke iu ofruar mbështetje nënave që t’i ushqejnë foshnjat me qumësht gjiri, raporton KTV.

Ndërkaq, kryetari i Prishtinës, Shpend Ahmeti, ka thënë se gjidhënien, si shoqëri, nuk guxojmë ta kthejmë në tabu, pasi, sipas tij, qumështi i gjirit të nënës është i pazëvendësueshëm dhe mbron shëndetin e fëmijëve dhe të nënës nga sëmundje të ndryshme.

Java e Gjidhënies ka nisur me hapjen e një ekspozite, ku janë paraqitur në fotografi shumë nëna nëpër ambiente të ndryshme duke i ushqyer fëmijët e tyre me qumësht gjiri të bëra nga fotografi Arben Llapashtica. Ekspozita qëndron e hapur në Sallën e Kuqe të Pallatit të Rinisë, Prishtinë. / KultPlus.com

Poezia e poetit Pablo Neruda që frymëzon prej dekadash gjithë botën

Me punën e tij të përkthyer në shumë gjuhë të huaja, Pablo Neruda konsiderohet një ndër poetët më të mëdhenj të shekullit të XX. Në vitin 1971 Neruda fitoi çmimin Nobel për letërsi, një çmim ky i kundërshtuar për shkak të aktivitetit të tij politik. Novelisti kolumbian Gabriel Garsia Markez e quajti “Poeti më i madh i shek. XX”.

Kënga Gjithëpërfshirëse e tij (Canto general, 1950), u bë simbol i rreshtimit për letërsinë e popullit kilean.

Ja një nga poezitë më frymëzuese të tij…

Dalëngadalë vdes ai që bëhet skllav i zakonit,
që përsërit të njëjtat gjëra çdo ditë,
që nuk ndryshon rrugë,
që nuk rrezikon,
që nuk ndryshon ngjyrën e veshjeve,
që nuk i flet atij që nuk e njeh.

Dalëngadalë vdes ai që nuk përmbys tryezën,
që është i pakënaqur nga puna,
që nuk rrezikon sigurinë nga pasiguria për të ndjekur një ëndërr,
që nuk i lejon vetes asnjëherë në jetë të thyejë rregullat e vendosura.

Dalëngadalë vdes ai që nuk udhëton,
që nuk lexon,
që nuk dëgjon muzikë,
që nuk zbulon hijeshi te vetja e tij.

Dalëngadalë vdes ai që shpërfill krenarinë e tij,
që nuk i lë të tjerët ta ndihmojnë,
që i kalon ditët duke u qarë për fatin e tij të keq,
që ankohet për shiun që nuk pushon.

Dalëngadalë vdes ai që i shmanget projektit para se të fillojë,
që nuk pyet për gjërat që nuk i di dhe
që nuk përgjigjet për gjërat që di.

E shmangim vdekjen me doza të vogla,
duke kujtuar gjithmonë se të jesh gjallë
kërkon një përpjekje shumë më të madhe
se thjeshtë fakti që marrim frymë.

Vetëm durimi i paepur
do të na bëjë të arrijmë
lumturinë më të madhe. / KultPlus.com

50 Cent mahnitet nga kënga e re e Era Istrefit (FOTO)

Era Istrefi ka lansuar ditën e djeshme projektin e saj më të ri muzikor “No i Love Yous” në bashkëpunim me artistin botëror French Montana, shkruan KultPlus.

Menjëherë pas publikimit kënga ka filluar të shpërndahet me të madhe nga fansat e saj por edhe kolegë të këngëtares. Por një përkrahje asaj i ka ardhur edhe nga reperi i famshëm botëror 50 Cent, dhe ky padyshim që mund të shënohet si një tjetër sukses i artistes kosovare.

50 Cent pëlqimin për këngën e Erën e ka bërë përmes shpërndarjes së këngës në Twitter duke konfirmuar se po e pëlqen mjaft shumë.

“No I love Yous” deri në këto momente shënon 493,790 views në You Tube. / KultPlus.com

Gazeta franceze: Arratisja e Ismail Qemalit dhe tre djemve të tij nga Turqia

Nga Aurenc Bebja

Gazeta franceze, “Le Constituionnel”, ka botuar, të premten e 4 majit 1900, në ballinë, një shkrim në lidhje me arratisjen e Ismail Qemalit dhe tre djemve të tij nga Turqia.

Atdhetari shqiptar, i emëruar nga sulltani në postin e Valit në Tripoli, kishte planifikuar të udhëtonte drejt këtij destinacioni nëpërmjet anijes “Fuad”, por gjithçka ka ndodhur ndryshe.

Arratisja e Ismail Qemal Beut vazhdon të jetë objekt i të gjitha komenteve.

Ndryshe nga ajo që u tha më parë, Ismail Qemali, pasi u largua nga “Yildiz Kiosk”, nuk hyri në bordin e “Fuadit”, i cili do ta çonte atë në Tripoli, nga ku do të nisej natën. Ismail Qemali, duke dalë nga “Yildiz Kiosk”, hyri fare thjeshtë në luftanijen angleze “Salamander”, me tre djemtë e tij, dhe kërkoi strehim që iu akordua menjëherë.

Ambasada angleze informoi Portën e Lartë për atë që kishte ndodhur dhe e paralajmëroi se Ismail Qemali dëshironte të strehohej jashtë vendit për të jetuar tashmë atje. Sulltani ishte shumë i habitur dhe u përgjigj se Ismail Qemali, sipas dëshirës së tij, mund të shkonte, ose në postin e tij në Tripoli, ose të largohej jashtë vendit.

Ismail Qemali dhe tre djemtë e tij u larguan sot nga “Salamanderi” për tu nisur me një avullore (anije me avull) të Kompanisë “Rubattini”, e cila do t’i çojë ata në Marsejë.

Ismail Qemali ka reputacionin e një njeriu të drejtë dhe të kthjellët : vendimi që ai ka marrë, për të braktisur vendin e tij, tregon qartësisht se ai e konsideron të pamundur jetesën e çdo individi inteligjent në Turqi.

https://www.darsiani.com/la-gazette/le-constitutionnel-1900-arratisja-e-ismail-qemalit-dhe-tre-djemve-te-tij-nga-turqia-nepermjet-luftanijes-angleze-salamander/

Orkestra e RTSH-së solli koncert me krijimtarinë e kompozitorit Aleksandër Peçi

Koncerti simfonik i Orkestrës së Radio-Televizionit Shqiptar mbrëmjen e djeshme me krijimtarinë e kompozitorit Aleksandër Peçi, u duartrokit nga artdashësit kryeqytetas.

Në koncertin e dhënë në sallën e Universitetit të Arteve, ku ishin të pranishëm njerëz të njohur të artit, artdashës etj, 3 muzikantët, dirigjenti Eno Koço, violinisti Klaidi Sahatçi si dhe pianistja Merita Rexha Tërshanam, të shoqëruar nga orkestra e RTSH, interpretuan “Rapsodia Koncertale për Violinë, Piano dhe Orkestër” e kompozitorit Aleksandër Peçi.

“Është hera parë që luaj me orkestrën simfonike të RTSH dhe ndaj skenën me partneren Merita Rexha Tershana dhe kam kënaqësinë e madhe të luaj me të” , është shprehur Klaidi. “Është detyra jone dhe misioni ynë si muzikantë që të luajmë muzikë bashkëkohore, sepse muzika ka nevojë por edhe vendi ynë ka nevojë”, ka thënë ai.

Violinisti Klaidi Sahatçi dhe pianistja Merita Rexha, janë një dyshe muzikore që solli përveç tingujve muzikorë dhe teknikës së lartë edhe një elegancë në interpretim.

“Këtë herë jam dyfish më e kënaqur, e para sepse luajta muzikë shqiptare të Aleksandër Peçit, e dyta sepse luajta me Klaidin”, tha pianistja Rexha.

“Është detyrë e instrumentistëve shqiptarë, të cilët janë ata që duhet ta luajnë këtë muzikë, sepse Brahmsin dhe Bet’hovenin e luan gjithë bota, kurse muzikën shqiptare na takon ne ta luajmë”, është shprehur ajo.

Pjesë e koncertit të orkestrës së RTSH-së ishte kompozitori Aleksandër Peçi me Valsi i trëndafilave, Fryn veriu dhe Valle scherzante e Tiranës (Tre pjesë për orkestër harqesh)- Rapsodia Koncertante për Violinë, Piano dhe orkestër-Premierë Botërore , me solistë Klaidi Sahatçi, Violinë Merita Rexha Tërshana, Piano; kompozitori P.I.Tchaikovsky – Fantasy -Uverturë nga Romeo dhe Juliet; kompozitori Camille Saint-Saens me Introduksion &Rondo kapriçioza./ KultPlus.com

Shfaqja “Një Shqiptar, Një Serb dhe Ushtarët” pjesë e Festivalit të Teatrit në Izmir të Turqisë

Shfaqja “Një Shqiptar, Një Serb dhe Ushtarët” është ftuar që të marrë pjesë në Festivalin Ndërkombëtar të Teatrit në Izmir të Turqisë, përcjellë KultPlus.

Për një gjë të tillë ka njoftuar regjisori dhe producenti i kësaj shfaqje Avni Abazi, i cili ka falënderuar aktorët e shfaqjes si dhe gjithë ekipin realizuese.

“Si regjisor dhe producent i kësaj shfaqje i falënderoj aktorët: Armend Zeqiri, Gani Morina, Bashkim Alaj, Teuta Sadiku. Falënderoj Mentor U. Berisha për skenografinë, Agnesa Muharremi-Kastrati për Kostumet, Skender Latifin për punën e pa lodhshme që bënë në Dodonë, si dhe në mënyrë të veçantë falënderoj autoren Ibadete Abazi për këtë tekst të mrekullueshëm, i cili pa dyshim do të këtë rrugëtim të gjatë edhe në gjuhë tjera”, është shprehur regjisori Abazi.

Për të realizuar udhëtimin e epikes së shfaqjes në këtë festival, regjisori gjithashtu kërkon mbështetje financiare, dhe me këtë rast i bënë thirrje kryetarit të Komunës së Prishtinës që ta mbështesë këtë projekt, pasi që më këtë shfaqje prezantohet Teatri i qytetit ‘Dodona’. Përderisa pret që MKRS të vazhdojë me mbështetjen e mëtutjeshme të këtij projekti. / KultPlus.com

Më poshtë po ju sjellë ftesën:

Sherr midis Inva Mulës me Zana Çelën

Disa ditë para se të vihej në skenë shfaqja e fundit nga Teatri Kombëtar i Operas dhe Baletit, situata aty nuk ka qenë dhe aq e qetë. Një mosmarrëveshje e cila ka degraduar deri në tone të larta, ka ndodhur mes sopranos së mirënjohur shqiptare Inva Mula dhe drejtueses së këtij instutucioni, Zana Çela.

Të dyja kanë debatuar ashpër në zyrën e Çelës për sa i përket fondeve të cilat pretendoheshin nga ana e sopranos. Sipas saj, ishin të pakta fondet e dhëna për operan “Peshkatarët e Perlave”, e cila u vu në skenë nga TKOB për herë të parë pas 40 vitesh, gjatë fundjavës që sapo kaloi. Sipas burimeve të brendshme të këtij institucioni, tone të larta janë dëgjuar nga ana e të dyja artisteve, gjë e cila u pasqyrua në vijim edhe në konferencën për shtyp ku secila prej tyre qëndronte larg dhe ftohtë me njëra-tjetrën, siç bëjnë me dije burime për ‘Xing.al’.

Madje nga burime të afërta me artistet është bërë e ditur që Zana Çela refuzoi të merrte pjesë edhe në një emision ku ishin të ftuara të dyja për të folur për shfaqjen. / KultPlus.com

Hapet audicion për aktorët shqiptarë për serialin e prodhimit turk

Është hapur audicion për aktorë për serialin e prodhimit turk, me titull pune të propozuar- “Fëmijët e lumtur ( Të lagjes pa drita)”, përcjellë KultPlus.

Për këtë serial kërkohet: Një aktore profesioniste shqiptare për rol kryesor, mosha nga 28 deri 33 vjeç ( tiparet: zeshkane, pesha trupore: e dobët, jodoemos të dijë akcent turqisht por gjithsesi gjuha turke do të jetë referencë e madhe në përzgjedhje). Rol me pagesë sipas standardit të tregut-audiencës së dedikuar.
Gjithashtu kërkohet edhe një aktor i moshës nga 55 deri 60 vjeç- shqiptar. Rol dytësor ( njohja e gjuhës turke e domosdoshme).

Xhirimet e serialit fillojnë në fillim pranvere të vitit të ardhshëm në Turqi dhe pastaj kryesisht Kosovë (Maqedoni dhe Shqipëri) dhe pas xhirimit të episodës së tretë, xhirimet përqendrohen kryesisht në Turqi.
Aktorët e përzgjedhur duhet të posedoj sigurim shëndetësor për vitin 2018,verifikim nga gjykata që nuk është i/e ndjekur dhe pasaporta të jetë valide deri në fundvitin 2019. ( Kërkesat e tilla janë të domosdoshme për shkak pjesëmarrjes në xhirime gjatë kohës së punës dhe banimit në Turqi ).

Të selektuarit nga producentët ( në rast se), informohen përmes email adresës me kohë për orarin, vendin, datën e mbajtjes së audicionit të organizuar vetëm për të selektuarit.

Të interesuarit mund të dërgojnë CV të plotë dhe në detaje, poashtu edhe foto profili dhe total në email adresën: [email protected] / KultPlus.com

Kalaja e Lezhës, e restauruar dhe me shërbime të reja për vizitorët e turistët e shumëfishuar (VIDEO)

Kryeministri Edi Rama ka postuar sot në rrjetin social një video me pamje nga Kalaja e Lezhës, e cila është restauruar dhe tashmë ofron shërbime të reja për vizitorët e turistët e shumëfishuar.

“Mirëmëngjes dhe ju uroj një ditë të mbarë me këto pamje fantastike nga Kalaja e Lezhës, e restauruar dhe me shërbime të reja për vizitorët e turistët e shumëfishuar”, shkruan kryeministri Rama.

Kalaja e Lezhës ngrihet në majë të një kodre me lartësi 186 metra, në lindje të qytetit. Kalaja ka origjinë ilire. Në vitin 1440 ajo iu nënshtrua një rindërtimi nga venedikasit, ndërsa në vitin 1522 pas pushtimit osman u rindërtua edhe nga ana e tyre. Këtu mund të shikohen gjurmë të arkitekturave ilire, romake, bizantine dhe osmane. Objektet më interesante për t’u vizituar janë rrënojat e ndërtesave osmane brenda kalasë, xhamia, kulla në murin juglindor me një hark romak dhe kulla ilire në murin jugor. Kalaja e Lezhës është monument kulture. Prej saj shihet një pamje mjaft e bukur e fushës së Lezhës dhe e detit Adriatik. /KultPlus.com

Gjidhënia promovohet nëpërmjet ekspozitës

Ministria e Shëndetësisë me përkrahjen e UNICEF-it do të organizojnë sot foto ekspozitën për ta promovuar të ushqyerit me qumësht të gjirit me moton “Ta mbështesim gjidhënien së bashku”.

Kjo ekspozitë hapet në kuadër të javës për të ushqyerit me qumësht të gjirit, e cila do të mbahet nga 1 deri më 7 tetor , dhe organizohet në bashkëpunim dhe përkrahje të Postës së Kosovës, Shërbimet Klinike Universitare të Kosovës, institucionet lokale dhe Qendrat Kryesore të Mjekësisë Familjare, Shoqatën e Mamive, grupet përkrahësve të nënave për të ushqyerit me qumësht të gjirit, grupin për Institucionet Mike të Foshnjës, Kryqin e Kuq të Kosovës, Save the Children, Asociacioni për nëna dhe fëmijë.

Foto ekspozita është realizuar nga Arben Llapashtica me angazhimin dhe pjesëmarrjen e nënave dhe baballarëve nga vendet e ndryshme. Foto ekspozita do të mbahet në sallën e kuqe të Pallat të Rinisë, nga ora 11:00 – 13:00. / KultPlus.com

Ambasadorja e Holandës në Kukës: Turizmi në Shqipëri po merr një hov të madh zhvillimi

Në kuadër të “Ditës Kombëtare të Trashëgimisë Kulturore”, Bashkia Kukës organizoi një aktivitet në Muzeun Etnografik të qytetit me synim promovimin e vlerave, ndërgjegjësimin dhe ruajtjen e trashëgimisë kulturore si pjesë integrale e identitetit tonë.

E pranishme në këtë aktivitet ishte edhe Ambasadorja e Holandës në Shqipëri, Dewi Van de Werd e cila përgëzoi iniciativën e Bashkisë Kukës për promovimin e trashëgimisë kulturore dhe turizmit dhe nënvizoi se turizmi në Shqipëri, po merr një hov të madh zhvillimi.

Luan Përzhita, Drejtues i Institutit të Arkeologjisë duke theksuar rëndësinë e zonës së Kukësit në arkeologji e trashëgimi kulturore, për të pranishmit në aktivitet bëri një përmbledhje të historikut të qytetit të Kukësit dhe zonave të pellgut të Drinave.

“Duhet të ndjehemi krenar për ato që kemi trashëguar. Tani është momenti që edhe të tjerët të dinë rëndësinë e kësaj zone” u shpreh Përzhita.

Duke falenderuar pjesëmarrësit në këtë aktivitet Kryetari i Bashkisë, Bashkim Shehu në fjalën e tij tha se promovimi i vlerave dhe trashëgimisë kulturore është një ndër prioritetet e Bashkisë edhe si pjesë e strategjisë për zhvillimin e turizmit.

“Duhet të bëjmë të pamundurën që turistët ti mbajmë sa më gjatë në Kukës dhe ti njohim ata jo vetëm me bukuritë natyrore por edhe me ato çfarë ne kemi trashëguar, qoftë me Kalanë e Pecës, Kalanë e Gradishtës, Muzeun apo Tumat Ilire në Çinamakë.” / KultPlus.com

Pallati i Kulturës në Pukë, merr emrin e “Artistit të Popullit” Ndue Shyti

Nga sot, Pallati i Kulturës në qytetin e Pukës, do të mbaj emrin e “Artistit të Popullit”, Ndue Shyti.

Zbulimi i pllakatit nga kreu i bashkisë së Pukës, Gjon Gjonaj dhe nënkryetari Astrit Kuçi u bë pikërisht dje në Ditën Kombëtare të Trashëgimisë Kulturore.

Ju mund të riktheni shikimin e përsosur pa lazer

Ju mund të riktheni shikimin e përsosur pa lazer

Në fjalën e tij, kryebashkiaku i Pukës, Gjon Gjonaj u shpreh i lumtur se pikërisht sot përjetësohet emrin e një prej themeluesve të Ansamblit Puka, artistit të shquar dhe virtuozit të papërsëritshëm, Ndue Shyti.

Më pas, për Ndue Shytin dhe rrugën e gjatë e plotë suksese të Ansamblit Puka, folën dhe instrumentistë, bashkëkohës e studiues te jetës dhe veprimtarisë së tij, por dhe mbar artit e kulturës pukjane.

Pjesë e kësaj veprimtarie ishte dhe interpretimi i regjisorit Fran Vukaj kushtuar jetës dhe veprës së themeluesi të Ansamblit Puka, “Artistit të Popullit” Ndue Shyti.

Drejtori i Pallatit të Kulturës, Alban Doçi falënderoi në fjalën e tij dhe emigrantët Gentjan Lala dhe Florian Marku të cilët mundësuan ndërtimin e pllakatit me emrin e Ndue Shytit, emër të cilin nga sot do ta mbaj Pallati i Kulturës në Pukë.
Në kuadër të kësaj veprimtarie të pranishmit në këtë ceremoni zhvilluan dhe një vizitë në mjediset e muzeut etno-grafik pranë Pallatit të Kulturës “Ndue Shyti” Pukë.

Nderimi i jetës dhe veprës së Ndue Shytit erdhi përmes një vendimi unanim nga këshilli bashkiak i Pukës, i cili vendosi që institucioni më i rëndësishëm kulturorë të mbaj emrin e artistit të madh, Ndue Shyti i cili e filloi dhe mbylli karrierën e tij muzikore në shërbim të këtij institucioni. /KultPlus.com

Letra më e bukur që Gabriel Garsia Markez la për njerëzimin para vdekjes

Kjo mund të konsiderohet testamenti shpitëror i shkrimtarit kolumbian (Çmim Nobel për Letërsi më 1982): me këtë poezi dërguar miqve, ai në fakt tërhiqet nga jeta publike për asrsye shëndetësore.

“Sikur Zoti të harronte për një moment që unë jam një dordolec i ndrequr me rrecka dhe të më dhuronte një copëz jetë, mbase nuk do ti thosha të gjitha ato që po mendoja, por sigurisht do ti mendoja ato që po them. Do i jepja rëndësi gjërave jo për vlerën, por për domethënien e tyre. Do flija pak, do ëndërroja më shumë, sepse çdo minutë që mbyllim sytë humbasim 60 sekonda dritë. Do vazhdoja kur të tjerët do ndalonin, do zgjohesha kur të tjerët do flinin. Do dëgjoja kur të tjerët do flisnin, dhe sa do e shijoja një akullore me çokollatë!

Nëse Zoti do më jepte një copëz jetë, do vishesha thjesht, do shtrihesha përballë diellit duke e lënë të pambuluar jo vetëm trupin, por edhe shpirtin tim.
Ah Zoti im, sikur të kisha një copëz jetë, nëse do mundesha, do shkruaja urrejtjen time mbi akull, dhe do prisja të dilte dielli. Nuk do të lejoja të kalonte as edhe një ditë pa i thënë njerëzve që dashuroja se i dashuroja. Do të bëja çdo burrë dhe grua të besojnë se janë njerëzit që dua dhe do të dashurohesha me dashurinë. Te njerëzit do të tregoja se sa gabim bëjnë kur besojnë se ndalojnë së dashuruari kur plaken, pa kuptuar se plaken kur ndalojnë të dashurojnë. Fëmijës së vogël do t’i jepja pendë, por do ta lija të mësonte vetë sesi të fluturojë. Pleqve do t’u tregoja se vdekjen nuk e sjell pleqëria por “harresa”.

Mësova kaq gjëra nga ju, njerëzit. Mësova se të gjithë duan të jetojnë në “majën e malit”, pa kuptuar se lumturia qëndron në mënyrën se si zbret “faqen e pjerrët”.
Mësova se kur fëmija i porsalindur shtrëngohet mbi pëllëmbën e tij të vogël, për herë të parë gishti që zgjatet i babit të tij e robëron përgjithmonë.
Mësova se njeriu ka të drejtë ta shohë tjetrin nga lart, vetëm kur duhet ta ndihmojë të çohet….

Të thuash gjithmonë atë që ndjen dhe të bësh gjithmonë atë që mendon…
Nëse do ta dija që sot do të ishte hera e fundit që do të të shihja duke fjetur, do të të përqafoja fort, fort dhe do t’i lutesha Zotit që të bëhesha roja e shpirtit tënd.
Nëse do e dija se kjo do ishte hera e fundit që do të të shihja të dilje nga dera, do të të përqafoja dhe do të të jepja një puthje dhe do të të thërrisja përsëri që të të jepja edhe të tjera.
Nëse do ta dija që kjo do të ishte hera e fundit që do ta dëgjoja zërin tënd, do të regjistroja çdo fjalë tënden që të mund të të dëgjoja përsëri, përsëri…
Nëse do të dija që këto do të ishin momentet e fundit që do të të shihja, do të të thosha “të dashuroj” dhe do të supozoja jo logjikisht se e dije më parë.
Ekziston gjithmonë një e nesërme dhe jeta na jep edhe mundësi të tjera që t’i bëjmë gjërat siç duhet, por nëse bëjmë gabime na mbetet vetëm e sotmja.
Do të doja të të thoja se sa shumë të dua dhe se kurrë s’do të të harroj. E nesërmja nuk është e sigurt për askënd, si i ri, si i vjetër.
Sonte mund të jetë hera e fundit që i shikon njerëzit që do. Prandaj mos prit më, bëje sot sepse e nesërmja nuk vjen kurrë.

Sigurisht do pendohesh për ditën kur nuk gjete kohë për një buzëqeshje, një përqafim, një puthje dhe sepse ishe i zënë për të realizuar një dëshirë të tyre.
Mbaji ata që dashuron pranë vetes, thuaju duke mërmëritur se sa shumë ke nevojë për ta, dashuroji, sillu mirë, gjej kohën për ta, thuaju “më vjen keq”, “më fal” , “faleminderit” dhe të gjitha fjalët e dashurisë që di. Asnjëri nuk do të të mbajë mend për mendimet e tua të fshehta…”/konica.al

BBC: Ansambli Saz’iso çon sazet shqiptare në Londër

Pas tri dekadave dalje prej komunizmit, një grup muzikor në Shqipëri po provon të depërtojë në tregun muzikor të botës.

BBC e nisë kësisoj një shkrim mbi sazet shqiptare dhe grupin Saz’iso të cilët krijojnë muzike folklorike kryesisht nga qytetet e jugut shqiptar.

Pas disa javësh, grupi do të performojë në Londër, në St.Luke’s, Barbican Center, me ndihmën e një prej producentëve më të cilët ka bashkëpunuar grupi Pink Floyd, Joe Boyd.

“Jam fascinuar me muzikën. Është kaq e pasur muzikalisht, dhe menjëherë e kam ditur se duhet promovuar në lloj i tillë i melodisë. Kur isha në Gjirokastër para tre vitesh jam njoftuar për herë të parë me sazet” tregon Boyd për BBC.

Ky edhe do të jetë koncerti i parë i grupit jashtë Shqipërisë, shkruan KultPlus.
Donika Pecallari, Adrianna Thanou, Robert Tralo, Aurel Qirjo, Telando Feto, Agron Murat, Agron Nasi dhe Pëllumb Meta janë pjesë e këtij ansambli. / KultPlus.com

Momentet më të mira nga Paris Fashion Week (FOTO)

Parisi mbetet ndër qytetet ku e bukura merr frymë çdo ditë.

Java e Modës në Paris këtë javë ka sjellë koleksionet e ndryshme të cilat kanë parakaluar në këtë edicion. Si gjithmonë, Java është plot aktivitete dhe defile modelesh nga e mbarë bota.

Një pjesë e mirë e koleksioneve i është kushtuar Guy Laroche – një dizajner francez ndoshta ndër më ikonikët. Homazh i është bërë edhe aktores Mireille Darc. / KultPlus.com

Carpe Diem: 5 thënie nga Haruki Murakami

Haruki Murakami, u lind me 12 Janar, 1949. Haruki Murakami është ndër shkrimtarët japonezë më të njohur sot në botë dhe ndër më të rëndësishmit e botës letrare, autor i pothuajse të gjitha çmimeve prestigjioze letrare dhe për disa vite radhazi një ndër pretendentët e çmimit Nobel në Letërsi.

Kritika e cilëson Murakamin si ndër mjeshtrat e rrëfimit sot, autori që tronditi letërsinë japoneze dhe përshfaqjen e saj në botën letrare përmes së ashtuquajturit “thjeshtësim i realitetit”, për çka në krye të debutimit të tij u keqkuptua nga kritika dhe autorët e tjerë, të cilët sot e kanë idhullin e tyre letrar.

Përkundër kanoneve, diskrecionit, tabuve që shpesh e kornizojnë letërsinë japoneze, Haruki Murakami e çliroi prozën e tij, duke e kthyer atë në një ndër më të lexuarat në botë.

Kombinimi i stilit të tij autentik, frymës magjike dhe joshëse që ka terreni i tij letrar japonez dhe turbulancës pasionale që shkakton leximi i romaneve të tij, e bëjnë atë autorin me fansat më të shumtë në botë.

“Shpenzoni paratë tek gjërat që paratë mund t’i blejnë. Kaloni kohën me gjërat që paratë nuk mund t’i blejnë”- (The Wind-Up Bird Chronicle)

“Unë ëndërroj. Ndonjëherë, mendoj se kjo është e vetmja gjë e duhur për t’a bërë.” – (Sputnik Sweetheart)

“Talenti nuk është gjë pa durimin dhe përqendrimin.” (Blind Willow, Sleeping Woman)

“Ata thonë që dashuria rindërton botën, kështuqë çdo gjë është e mundur, kur bëhet fjalë për dashurinë.” (Kafka on the Shore)

“Dua që gjithmonë të më kujtosh. A do t’më kujtosh se kam egzistuar dhe se kam qëndruar pranë teje, kështu siç jam tani?” (Norwegian Wood)

Fotografi kosovar fotografon Era Istrefin për këngën e re “No I Love Yous” (FOTO)

Kënga e saj më re dhe e shumëpritur doli sot, ndërsa ajo duket se nuk ka harruar të bashkëpunojë me shqiptarët për famën e saj kudo nëpër botë.

Era Istrefi sot publikoi videoklipin e këngës “No I Love Yous” në bashkëpunim me French Montana.

Fotografi kosovar Jetmir Idrizi ka publikuar një fotografi të Erës, realizuar nga ai. Bashkëpunimi mes dyshes duket se ka dalë perfekt, me një fotografi ku Era është seksi dhe gjithmonë e veçantë.

Fotografia po shfrytëzohet si zyrtarja për këngën më të re të Erës. / KultPlus.com

Botohet libri “Krijimi i dashurisë” i Ndue Ukajt

Festivali Ndërkombëtar i Poezisë “Ditët e Naimt” në prag të edicionit të sivjetshëm, boton librin me poezi të Ndue Ukajt, “Krijimi i dashurisë, shkruan KultPlus.

Këtë lajm e ka bërë drejtori i Festivalit Ndërkombëtar të Poezisë “Ditët e Naimit”, Shaip Emerllahu, nëpërmjet një postimi në faqen e tij në Facebook. Ky libër është përzgjedhje poetike nga librat e mëparshme të autorit./KultPlus.com

Shpend Ahmeti në përurimin e kiosqeve për librashitësit në kryeqytet (FOTO)

“Sot përuruam kiosqet e librave në sheshet kryesore të qytetit. Shitësit e librave për shumë vite kanë qëndruar në shesh në kushte të mjerueshme. Nga sot ata nisën t’i shfrytëzojnë shtëpizat e librave, me kushte shumë të mira për zhvillimin e kësaj veprimtarie.
Këto 8 shtëpiza janë rregulluar nga Komuna e Prishtinës në bashkëpunim me DEMOS-in zviceran.
Shitësit e librave falënderuan Komunën për këtë projekt, dhe shprehën mirënjohje për mënyrën e shpërndarjes së tyre, proces ky që ka qenë shumë transparent, dhe përmes të cilit kanë mbetur të gjithë të kënaqur”.


Ky ka qenë statusi i Kryetarit të Prishtinës – Shpend Ahmeti, sot në rrjetin social Facebook pasi janë përuruar kiosqet e librave në kryeqytet. Deri tani shitësit ambulantë të librave qëndronin në kënde të ndryshme të shesheve kryesore, edhe pse ka vite që kërkonin hapësirë për ekspozim e shitje të dinjitetshme të librave. / KultPlus.com