Shqiptarja Elly Iseni, e cila jeton dhe vepron në Danimarkë, është shpalur fituese e edicionit të këtij viti 2020 në talent show “Hell’s Kitchen” në Danimarkë.
Thuhet se Elly Iseni është me prejardhje nga Tetova dhe ka emigruar në Danimarkë që në moshën 5-vjeçare.
Në profilin e saj në Facebook ajo ka shkruar se ajo është fituese e kuzhinës në DENMARK 2020. / KultPlus.com
Në festivalin e 21 të Filmit Europian që po zhvillohet në Leçe të Italisë, nga 31 tetori deri në 7 nëntor, Shqipëria është prezantuar nga katër projekte kinematografike.
“Delegacioni” nga Bujar Alimani, “Dita zë fill” i Gentian Koçit, “Portret i pambaruar” i Namik Ajazit dhe “Open door” nga Florenc Papas janë katër produksionet e përfunduara kohët e fundit. Filmi “Open Door” është pjesë e konkurrimit së bashku me 11 filma të tjerë europianë, ndërsa të tjerët janë pjesë ë projeksioneve në seksionin e filmit Ballkanik.
Alberto Lamonica i cili është edhe drejtori i festivalit, shprehet se është tepër e rëndësishme që në këtë festival të paraqesim aktualitetin dhe situatën në Europë dhe për këtë arsye edhe Shqipëria duhet të përfaqesohet. “Ne kemi krijuar edhe seksionin e filmit ballkanik ku Shqipëria dhe Mali i Zi e përfaqesojnë këtë rajon më së miri”, u shpreh ai.
Nesër mbrëma pritet të jetë edhe nata e fundit e këtij festivali të rëndësishëm europian ku do të ndahen edhe çmimet për produksionet dhe kategoritë më të mira. /atsh/ KultPlus.com
Medina Pasoma
Muzika klasike ishte një përditshmëri në familjen e saj andaj ajo vendosi që lidhjen me muzikën klasike ta forcojë duke u lidhur ngushtë me pianon. Gishtërinjtë e saj krijuan melodi që nga shkolla e mesme e deri te studimet pasuniversitare, ndërkaq Adea Badivuku pritet t’i sjell tinguj publikut duke lansuar albumit e saj të parë, shkruan KultPlus.
Ishte e vogël në moshë por jo edhe për art, atëherë kur i lindi dëshira për piano. Nga një pasion për ushqim të shpirtit, dikur ajo vendosi që muzikën ta ketë edhe drejtim studimi, kur u bë nxënëse në bankat e shkollës së mesme të muzikës ‘Prenk Jakova’, e pastaj studente e Fakultetit të Arteve në Universitetin e Prishtinës dhe me gradimet tjera akademike në Universitetin Qendror të Michigan-it në Shtetet e Bashkuara të Amerikës, aty edhe ku punon si asistente e diplomuar.
Gjithë këtë rrugëtim artistik dhe detajet e publikimit të albumit të saj të parë ‘ADE Duo’ e cila është në bashkëpunim me artistin Deniz Caglarcan, Adea vendosi ta ndaj me KultPlus.
‘Qysh në moshë të vogel, kur isha 5 vjeçe lindi interesimi im për të luajtur në piano, e me përkrahjen e vazhdueshme të prindërve dhe të familjes ëndrra u bë realitet’’, nis rrëfimin e saj Adea Badivuku.
Nga ky moment pianoja u bë pjesë e pandashme e jetës së saj, duke nisur me performanca kur ishte 7 vjeçare dhe për ta kthyer këtë në një udhëtim të bukur përplotë 18 vite.
‘’Piano dhe muzika klasike tashmë janë pjesë e rutinës ditore dhe burim i pashtershëm i kënaqësisë për mua’’, shprehet Badivuku.
Në anën tjetër ‘’ADE Duo’’ është albumi i parë i Adeas i përbërë nga gjithsej 10 këngë, teksa është një gërshetim mes tingujve të dala nga pianoja dhe viola.
‘’Albumi përmban cover të këngëve të njohura të muzikës pop, jazz dhe klasike të transkriptuar nga ne për piano dhe violë’’, thotë Adea.
Përderisa kjo përmbledhje veprash është bashkëpunim i Badivukut me violistin, kompozitorin dhe dirigjentin nga Turqia, Deniz Caglarcan, ata vendosën që edhe emërtimi të rrjedh nga ta. ‘’ADE’’ është gërshetim i dy shkronjave të para të këtyre artistëve, teksa ‘’Duo’’ nënkupton bashkëpunimin e tyre në çift.
Ideja për albumin i cili pritet të lansohet në fillim të vitit të ri kishte lindur gjatë kohës kur e gjithë bota ishte në një izolim total dhe kishte rastin të vlerësonte domosdoshmërinë e artit në jetërat tona. Kështu, edhe këta dy artistë muzikën e panë si rrugëdalje.
‘’Ideja për të realizuar albumin ka lindur gjatë kohës së pandemisë duke përshkuar mesazhin se edhe atëherë kur gjërat nuk shkojnë si deshirojmë, muzika është shpresë për ne’’, vlerëson Badivuku.
Një bashkëpunim i cili zgjati 4 muaj kishte synimin e krijimit të muzikës së bukur dhe ndarjes së saj me të tjerët, në mënyrë që thellësia e artit të depërtoj te gjithsecili. 10 këngët e albumit ‘’ADE Duo’’ do të lansohen së shpejti dhe dëgjuesit do të kenë rastin t’iu qasen në platforma të ndryshme. / KultPlus.com
Këngëtarja Dua Lipa ka publikuar videoklipin e këngës së saj më të re “Fever”.
Këtë këngë ajo e ka sjellë në bashkëpunim me artisten belge Angele. Ajo në rrjetet sociale ka thënë se i ka pëlqyer ta bënte këtë bashkëpunim sërish.
Vlen të ceket se këngëtarja shqiptare së fundi ka pozuar disa herë me flamurin shumëngjyrësh, të cilin e ka edhe pjesë të klipit të saj shumë të suksesshëm, “Blow Your Mind” për revistën prestigjioze ‘Attitude’.
Joe Biden është zgjedhur Presidenti i 46-të i Shteteve të Bashkuara të Amerikës, sipas projeksionit të Decision Desk, një organizate kredibile amerikane që analizon rezultatet e zgjedhjeve.
Sipas projeksionit të Decision Desk, kandidati demokrat për President të ShBA-ve ka fituar garën në shtetin federal të Pensilvanisë dhe 20 vota elektorale për t’ia siguruar atij 173 vota elektorale në total.
Me përmbysjen e rezultatit dhe fitoren e siguruar në Pensilvani, sipas Decision Desk, Joe Biden ka triumfuar në Zgjedhjet Presidenciale. Ai do të jetë Presidenti i ri i ShBA-ve, bazuar në projeksionet e Decision Desk.
Në vitet ’20 në Shqipëri do të vinte një mision amerikan që do të angazhohej për të kapërcyer pasojat e Luftës së Parë Botërore.
Misionarët e Kryqit të Kuq Amerikan do të ofronin strehim, ushqim, vizita mjekësore e arsimim për popullatën shqiptare
Shqiptari i shumëkërkuar nga misionarët amerikanë në vitet ’20:
Ai është një xhevahir, flet 18 gjuhë dhe të gjitha në mënyrë të mençur!
Në misionin e tyre, ata do të asistoheshin nga shqiptarë të ndryshëm të cilët do të ofronin shërbimet e tyre për sigurinë fizike, transportin, përkthimin etj.
Gjatë qëndrimit të tyre në Shqipëri, misionarët amerikanë do të dokumentonin me foto punën e tyre e do të jepnin përshtypjet e tyre për vendin.
Aftësitë gjuhësore të shqiptarëve e sjellja e tyre do t’i impresiononte misionarët e huaj e për këtë qëllim ata do të bënin vlerësime pozitive.
Në listën e personazheve që misionarët i kanë cilësuar si të jashtëzakonshëm ishin edhe dy përkthyes.
Në arkivin e Librarisë së Kongresit Amerikan gjendet fotoja e përkthyesit kryesor që quhej Kolë.
Ai konsiderohej nga misionarët amerikanë si një burrë i ndershëm e i besueshëm.
Kola kishte punuar për 30 vite në konsullatën e Francës në Shkodër ndërsa në vitin 1920 i ishte bashkuar misionit të Kryqit të Kuq si përkthyes dhe si mesazher konfidencial.
“Të gjithë punonjësit e misionit amerikanë shprehen se ai është një “xhevahir” dhe ky është një kompliment i madh për një burrë që i vjen doresh” shkruhet në diçiturën që shoqëron foton.
Reputacioni i tij do të dilte edhe jashtë vendit, ku gazeta amerikane do të shkruanin për aftësitë e shqiptarit që fliste 18 gjuhë të ndryshme “në mënyrë të mençur”.
Artikulli i gazetës amerikane do të evidentonte faktin se Kola, me aftësitë e tij komunikative, arrinte të ishte ndërmjetës mes fiseve shqiptare të përfshira në konflikte të ndryshme të armatosura.
“Kola, përkthyesi kryesor i përfaqësuesve të misionit të Kryqit të Kuq Amerikan në Shqipëri ka te vendasit reputacionin e “gjuhës më të mençur” në Shqipëri.
Ai thuhet se flet 18 gjuhë dhe të gjitha në mënyrë të mençur.
Kjo është diçka të pazakontë në Shqipëri.
Kjo nënkupton se ai është i aftë të flasë me secilin prej fiseve të shumta të vendit, pa thënë ndonjë fjalë që mund të lerë mundësinë e keqkuptimin sikur po mban anë në përplasjet që kanë palët mes tyre.
Ai ka qenë një faktor i rëndësishëm për të mbajtur jashtë sherreve e grindjeve, misionin amerikan që shpërndan ndihma.
Kola është një nga ata pak banorë të Tiranës që nuk mban me vete armë zjarri” shkruhet në artikullin e gazetës së Minnesotas së datës 3 maj 1920.
Një personazh tjetër i jashtëzakonshëm për aftësitë komunikative që evidentohet në arkivën e misionit amerikan është edhe një djalë i vogël që fliste 5 gjuhë të ndryshme.
Në diçiturën që shoqëron foton, djali nga Tirana cilësohet si një “talent i ri dhe premtues” në fushën e gjuhësisë.
“Ky djalë shqiptar flet 5 gjuhë të ndryshme.
Ai është punësuar nga misionarët amerikanë si përkthyes dhe mesazher.
Ky djalë nuk ka shkuar kurrë në shkollë por i është dhënë mësim nga babai i tij, prefekti i Tiranës, i cili është diplomuar në Kolegjin Amerikan të Kostandinopojës”, është diçitura që shoqëron foton e djaloshit. / KultPlus.com
Shoqata e Shkrimtarëve Shqiptaro-Amerikanë i ka ngjarë një familje të madhe duke vlerësuar krijimtarinë e atyre autorëve shqiptarë që kanë kaluar me veprat e tyre kufijtë gjeografikë. Me këtë ndjesi kanë ndjekur edhe krijimtarinë e shkrimtarit Visar Zhiti.
Kryesia e Shoqatës e ka shpallur “Anëtar Nderi” poetin disident Visar Zhiti.
“Ne jemi duke jetuar në këtë pandemi që paralizoi gjithë botën, por si krijues vazhdojmë të krijojmë në mënyrë vetjake. Dëshira për të zhvilluar një ceremoni për këtë nder dhe për atë që ai ka bërë dhe bën për fjalën e bukur dhe të lirë shqipe në mbarë botën për dorëzimin e dekorimit “Anëtar Nderi, është mjaft e madhe. Është obligim i madh, por që nuk mund të realizohet për arsye të pandemisë”, thuhet nga organizatorët.
Megjithatë, Visar Zhiti, ky vigan i madh i letrave shqipe, në vend të një takimi të përbashkët do të ndajë dashurinë me secilin anëtar të Shoqatës me krijimtarinë e tij të pasur letrare.
“Në pamje të parë quhet nderi i madh për atë që e merr këtë dekoratë mirënjohjeje, por në rastin e këtij shkrimtari tepër të dinjitetshëm, është më se e qartë se është nderi ynë që e kemi mes nesh, që na bën të frymojmë me fjalën e tij të ngrohtë, të bukur, të vërtetë. Si të kishim një diell që mezi e presim që të gdhijë në një agim tjetër. Ai është nga ata poetë që kapërcejnë jo vetëm kufij vendesh, po edhe kufij kontinentesh”, potencojnë anëtarët e organizatës.
Amerika, ku e shtrin aktivitetin e saj krijues edhe Shoqata e Shkrimtarëve Shqiptaro-Amerikanë është Shtëpia e shkrimtarëve, ku vlerësohet fjala e tij e bukur, e ngrohtë, me një art tepër origjinal të rrëfimit. Ai quhet në kuptimin e plot të fjalës “Poeti i lirisë”, me një shpirt të butë e të gjerë.
Për shkrimtarët shqiptaro-amerikanë ai është një zë i fuqishëm, një model i përkryer i artit që ka vetëm të ardhme që shpesh ngrihet mbi sakrificat e së kaluarës./ Epoka e Re/ KultPlus.com
Në Kosovë, situata epidemiologjike po tregon sinjale të përkeqësimit, pasi të enjten (5 nëntor) Kosova ka shënuar rekord të rasteve të konfirmuara me koronavirusin e ri COVID-19 me 661 raste të reja.
E duke e parë këtë situatë, Komitetit për vlerësimin dhe koordinimin e situatës rreth Covid-19 ka propozuar një varg veprimesh për t’i mënjanuar kështu shifrat e larta të koronavirusit në vend, shkruan Express.
Sot do të kumtohet vendimi për mbylljen e të gjitha subjekteve afariste dhe bizneseve, qendrave tregtare e rekreative, supermerketeve, subjekteve që ofrojnë shërbimet e gastronomisë (restoranet, kafiterite dhe të ngashme) në tërë territorin e Republikës së Kosovës prej orës 20:00 datë: 06/11/2020 ( e Premte ) deri më datë: 09/11/2020 9 (e Hëne) në orën 05:00, përveç:
“1.1 Furrave të bukës, barnatoreve, marketeve të vogla, pompave të derivateve.”
Në vazhdim i gjeni masat:
1. Ndalohet veprimtaria e te gjitha subjekteve afariste dhe bizneseve, qendrave tregtare e rekreative, supermerketeve, subjekteve që ofrojnë shërbimet e gastronomisë (restoranet, kafiterite dhe të ngashme) në tërë territorin e Republikës së Kosovës prej orës 20:00 datë: 06/11/2020 ( e Premte) deri më datë: 09/11/2020 9 (e Hëne) në orën 05:00, përveç:
1.1 Furrave të bukës, barnatoreve, marketeve të vogla, pompave të derivateve.
1.2 Institucionet shëndetësore publike dhe private për nevoja mjekësore, prodhim, furnizim dhe shitje të mallrave esenciale.
1.3 Për shërbime dhe aktivitete që ndërlidhen me menaxhimin e COVID 19 të (menaxhmenti dhe personeli esencial qeveritar dhe komunal nga këta sektorë – shëndetësi, siguri dhe administratë shtetërore).
1.4 Operatorët ekonomik dhe transporti i lirë i mallrave/shërbimeve për të siguruar funksionimin e zingjirit të furnizimit.
2. Pezullohen paragrafet 7,8,11,12,13,14,20 e vendimit të qeverisë 01/39 të datës 01.11.2020 deri në kohën e përcaktuar sipas dispozitivit 1 të këtij vendimi.
E Instituti Kombëtar i Shëndetësisë Publike të Kosovës, njofton se në 24 orët e fundit, janë regjistruar 661 raste të reja me COVID-19, sëmundjen që e shkakton koronavirusi.
Rastet e reja – që përbëjnë shifrën më të lartë të infektimeve brenda një dite në Kosovë që prej fillimit të pandemisë – dalin pas testimit të 1,617 mostrave.
Ndëkaq dje IKSHPK-ja ka njoftuar se edhe gjashtë pacientë me koronavirus kanë vdekur.
“Rastet e vdekjes janë nga komunat: Gjakovë 3, Ferizaj 1, Gjilan 1 dhe Malishevë 1 të cilat i përkasin grup-moshës 50-59 vjeç 1 rast, 60-69 vjeç 2 raste, 70-79 vjeç 1 rast me mbi moshën 80 vjeçare janë 2 raste”, u tha në njoftimin e IKSHPK-së.
Sipas të dhënave të fundit, numri i përgjithshëm i rasteve me COVID-19 në Kosovë ka arritur në 22,206. Prej tyre, 720 pacientë kanë vdekur dhe 15,921 janë shëruar.
Ndërkaq, raste aktive janë 5,565./ Insajderi/ KultPlus.com
Medina Pasoma
Rreth 400 tituj me ekzemplarë të shumtë sot u gjendën në një nga tavolinat e Teatrit Kombëtar të Kosovës, për të marrë vendet e tyre në raftet e bibliotekës së këtij institucioni, si dhuratë nga Qendra Multimedia, shkruan KultPlus.
Vepra nga autorë vendas e të huaj, kombinime të zhanreve të ndryshme letrare duke përfshirë poezi, prozë e kryesisht dramë dhe dimensione e pikëpamje të ndryshme përbrenda tyre, sot iu dhuruan Teatrit Kombëtar të Kosovës. Ishte Qendra Multimedia ajo e cila e bëri këtë donacion në kuadër të bashkëpunimit të këtyre dy palëve në edicionin e sivjetmë të Kosovo Theater Showcase.
Këto libra u vendosën në raftet e bibliotekës së institucionit më të lartë teatror në vend, për të kaluar tash e tutje në duar të lexuesve të cilët pëlqejnë mënyrën e shkrimit, tematikat dhe autorët e veprave. Të pranishëm në ceremoninë e dhurim-pranimit të këtyre titujve ishin përfaqësues nga dy palët, teksa fjalën e morri i pari aktori i njohur Adrian Morina, i cili njëherit është edhe u.d i Teatrit Kombëtar të Kosovës.
“Sot e kemi kënaqësinë shumë të madhe që si Teatër Kombëtar i Kosovës të pranojmë një dhuratë, e cila është më e shtrenjta që dikush ia ka bërë këtij institucioni. E tëra kjo vjen në kuadër të një bashkëpunimi që Teatri Kombëtar i Kosovës tash e një kohë e ka me Qendrën Multimedia, duke qenë partner të një Showcase-i teatror i cili e ka edicionin e tretë në Kosovë”, u shpreh Morina.
Për bibliotekën e TKK-së, Morina tha se është relativisht e varfër dhe se ka mungesë të dramave, me këtë rast shfrytëzoj rastin të bëj thirrje që edhe shtëpitë botuese tjera të dhurojnë donacione.
“Komuniteti ynë ka shumë pak mundësi ose qasje në tekste të dramave të huaja prandaj, ju bëj ftesë krejt atyre që kanë mundësi t’i bëjnë një dhuratë si kjo e sotmja Teatrit Kombëtar të Kosovës sepse kemi nevojë që ta krijojmë një librari tonën ashtu siç e ka pasur dikur, e të cilën kemi pasur mundësi ta shohim përmes fotografive”, theksoj Morina.
Në anën tjetër ai u shpreh se në këtë institucion kulturor është krijuar një imazh që çdokush provon të merr diçka, e jo të dhuroj. Andaj pikërisht edhe donacionet e librave do ta dëshmonin të kundërtën.
Përgjatë ceremonisë, Adrian Morina shfrytëzoj rastin të tregoj për bashkëpunimet dhe punët e tjera që pritet t’i realizoj Teatri Kombëtar i Kosovës.
“Ne besojmë që në javën e ardhshme do të hapim thirrjen për laboratorin e dramës shqipe, në të cilën jemi bashkëorganizatorë Teatri Kombëtar i Kosovës, Qendra Multimedia, Teatri i qytetit të Ferizajt, Gjilanit dhe Etno Teatri në Kukaj”, njoftoj Morina.
Drejtori i Qendrës prej ku erdhën librat, Jeton Neziraj tregoj se këto libra janë koleksione të botimeve të përvjetshme të Multimedias, e që përbrenda vitit ata publikojnë 10 tituj.
“Sot i kemi sjellur rreth 400 tituj, shumica e tyre janë drama të autorëve kosovarë, të Shqipërisë, nga rajoni dhe ata ndërkombëtar, të cilat janë botuar në një periudhë prej 10 vitesh”, theksoj Neziraj.
Përtej Teatrit Kombëtar të Kosovës si institucion kulturor qendror, Qendra Multimedia dhurimin e librave e ka nisur edhe në teatrot lokale, duke përfshirë atë të Gjilanit e Ferizajt.
“Donacioni vjen si pjesë e serisë së dhurimit të librave që Qendra Multimedia e ka nisur këto dy vite, kryesisht bibliotekave të qyteteve të ndryshme, ku për këtë periudhe kemi shpërndarë nëpër biblioteka, falas, afërsisht 5000 tituj”, tha drejtori i kësaj Qendre.
Pjesëtarja e Qendrës Multimedia, Aurela Kadriu është shprehur se është e rëndësishme që të njëjtën iniciativë ta marrin edhe të tjerët, në mënyrë që të zgjerohen adresat e lexuesve.
“Ne e kemi parë në proces të punës që jo vetëm bibliotekat kanë nevojë të pasurohen me libra por, ka nevojë në rritje që teatrot të kenë kënde të leximit”, ka thënë Kadriu.
Tutje ajo theksoj se përgjatë tre viteve punë, kanë vëzhguar për së afërmi gjendjen e bibliotekave publike e lokale si dhe atyre të teatrove dhe se nuk është situata e kënaqshme.
“Mund të themi që gjendja është ‘për gjynah’ dhe ka nevojë për dhurata të tilla që ta mirëmbajmë kulturën e leximit”, vlerësoj Kadriu.
Ky aktivitet u zhvillua në kuadër të projektit ‘’Culture for change’’ nga Qendra Multimedia. / KultPlus.com
Biblioteka Kombëtare në kuadrin e 100-vjetorit të krijimit të saj hapi në COD pranë ambienteve të Kryeministrisë një ekspozitë shumë të rrallë të pasurisë që disponon. Këto vepra janë një pjesë e trashëgimisë Kombëtare dhe jo vetëm e bibliotekës.
Mbi 80 për qind e këtyre materialeve shfaqen për herë të parë tek publiku, sepse janë thesare që datojnë që nga periudha e antikitetit Grek, Bizanti, Orienti, Venecia etj.
Janë rreth 800 libra dhe dorëshkrime që ekspozohen. Gjithashtu shumë materiale datojnë edhe nga periudha e viteve 1400 deri 1800 dhe klasifikohen si Antikuare pasi këto libra dhe vizatimet që janë kunabula, janë rezultat i një pune të bërë me dorë.
Të ekspozuara gjithashtu janë si materiale nga Pjetër Budi, Pjetër Bogdani, historia që nga periudha e Skënderbeut etj. Është e pamundur të veçosh tituj në këtë ekspozitë pasi bëhet fjalë për një pasuri të jashtëzakonshme të materialeve edhe botërore që tashmë janë pjesë e pronës jo vetëm të bibliotekës kombëtare, por e të gjithë shqiptarëve.
Ekspozita nuk pritet që në një kohë të afërt të ketë një shfaqje të dytë, duke e kthyer në rast të rrallë për ta vizituar.
Për shkak të vëmendjes së madhe që ka marrë kjo ekspozitë, është vendosur të shtyhet edhe disa ditë më tepër, pra deri në datë 11 nëntor, që te ketë mundësi të vizitohet, përfshirë këtu edhe fundjavën.
Drejtuesit e ekspozitës shprehen se megjithëse janë marrë masat antiCovid, janë të vetëdijshëm që ekspozitën nuk do të mundet ta vizitojnë të gjithë të interesuarit. Ndaj, ekspozita do të xhirohet në formatin 3D që të mund të shihet edhe në faqen e COD.
Pirro Misha që është edhe drejtori i Bibliotekës Kombëtare e vlerëson shumë këtë ekspozitë. Ai shprehet se Biblioteka Kombëtare kërkon investime sepse mungojnë kushtet të cilat janë të rëndësishme për të ruajtur pasurinë që ky institucion disponon.
Ai vlerëson gjithashtu edhe punën e bërë nga ish-drejtuesit sepse falë tyre kemi një thesar të grumbulluar në 100 vite të Bibliotekës Kombëtare. /atsh/ KultPlus.com
Muaji i Pavarësisë së Shqipërisë, në Amerikë çdo vit shënohet me aktivitete të ndryshme kulturore-artistike në çdo vend ku ka shqiptarë.
Kompania Shqiptare “Protect Dismantling”, e njëjta kompani që kontribuoi për projektin e Nëna Terezës, të vendosur në Brooklyn, New York, me pronarë dy djem nga Dibra e Madhe në SHBA, Belul Qoku dhe Murat Marke, kanë gjetur mënyrën e tyre origjinale për të treguar krenarinë shqiptare në rrugët e New York-ut në çdo përvjetor të Pavarësisë së Shqipërisë.
Siç shihet edhe në këto fotografi, kamionët janë të lyer me ngjyrë të kuqe, ndërsa mbi kapakun e madh të mbulesës së motorit të këtyre kamionëve është vendosur një shqiponjë e zezë e madhe sa e gjithë pjesa e përparme e motorit të kamionit.
Kamionët me ngjyrë të kuqe dhe me një shqiponjë të zezë, e madhe sa e gjithë mbulesa e kamionit, kanë nisur mbarë muajin e Nëntorit të pavarësisë së Shqipërisë nëpër rrugët e New York-ut, duke i rënë borisë dhe lajmëruar amerikanët se shqiptarët këtë muaj kanë festë, është Nëntori Kuq e Zi, 28 Nëntori i Shpalljes së Pavarësisë së Shqipërisë.
Kompania Shqiptare “Protect Dismantling” i ka të gjithë kamionët e biznesit të tyre të lyer krejt me ngjyrat e flamurit tonë kombëtar, flamurin kuq e zi dhe në mes të tyre kanë vendosur shqiponjën e zezë dykrenare, si dhe në zyrat e saj sot kudo është vendosur flamuri kuq e zi.
“Ata janë disa kamionë të peshave të rënda, që pothuajse mund t’i shohësh gati çdo ditë pune në rrugët e Brooklinit dhe qytetet tjera të New York-ut të lëvizin lirshëm nëpër kantiere ndërtimi”, ka njoftuar Beqir Sina. /KultPlus.com
Biblioteka “Hivzi Sulejmani” në Prishtinë ka njoftuar sot se nga data 9 nëntor e deri më datë 13 nëntor do të qëndrojë e mbyllur, përcjellë KultPlus.
Objekti i bibliotekës do të qëndrojë i mbyllur për shkak të punimeve që do të bëhen në objekt (renovimi i dyshemesë).
Ky vendim për mbyllje të objektit ka ardhur në bashkëveprim me drejtorinë e kulturës së komunës së Prishtinës, drejtorinë e bibliotekës, menaxherëve të projektit dhe operatorit punues. / KultPlus.com
Një studim i dhëmbëve të 106 individëve të varrosur në lokalitetin arkeologjik Castellón Alto (Granada, Spanjë) ka zbuluar se gratë i përdornin dhëmbët e përparmë si mjet për të bërë fije e kordha.
Ndërmjet viteve 2200 dhe 1550 para erës sonë, kultura e El Argarit u zhvillua në juglindje të Siujdhesës së Iberisë. Dihet mirëfilli se kjo ishte shoqëri komplekse që praktikonte diferencimin shoqëror të mbështetur në gjini, moshë e specializim në detyra të tilla si zejet – që nënkupton punën me qeramika, tekstile e metale. Kjo njohuri është riafirmuar nga një studim i ri i botuar së fundmi në “Journal of Archeological Science”, transmeton KOHA.
Ky studimi ka gjetur se dhëmbët e përparmë të grave përdoreshin për të bërë fije e kordha për prodhimin e tekstileve dhe shportave. Përveç kësaj, studimi ka treguar se gratë e mësonin zejen qysh në adoleshencë dhe vazhdonin punën gjatë gjithë jetës, ashtu që dhëmbët e grave më në moshë kanë më së shumti dëmtime. Diçka e tillë nuk është hasur në dhëmbët e burrave.
Zbulimi tjetër i studimit është dëshmia që, në fund të epokës së bronzit, që i bie 4000 vjet më parë, kishte një ndarje të dyfishtë të punës: një grup i vogël njerëzish u dedikoheshin zejeve në bërjen e fijeve (baza e prodhimit të tekstileve), dhe ky grup përbëhej ekskluzivisht prej femrave që përdornin dhëmbët e tyre si vegla.
Po ashtu, marrë parasysh faktin se kjo dukuri është identifikuar në mbetjet e individëve në mosha të ndryshme, mund të merret me mend se ky specializim fillonte në adoleshencë dhe gratë vazhdonin ta performonin këtë detyrë gjatë jetës së tyre. / KultPlus.com
Ministrja e Kulturës, Rinisë dhe Sportit, Vlora Dumoshi, ka zhvilluar një takim me Këshillin Drejtues të Teatrit Kombëtar të Kosovës, pas konsolidimit të këshillit të ri, në përbërje të: Agron Shala, Besim Rexhaj, Ismet Azemi, Munish Hyseni, Mustafë Halili Samka Ferri dhe Feim Maliqaj – përfaqësues i MKRS-së.
Me anëtarët e Këshillit të Teatrit, Ministrja Dumoshi, diskutoi për mbarëvajtjen e punës dhe realizimin e repertorit të Teatrit Kombëtar të Kosovës, e cila është ndër sfidat e TKK-së pasi që shumë shfaqje premierë nuk kanë mundur të realizohen sipas planit të paraparë për shkak të rrethanave të krijuara nga pandemia.
Gjithashtu, ministrja tha se për shkak të hyrjes në fuqi të ligjit të ri për zyrtarë publikë, i cili parasheh edhe ndryshimin e procedurave të rekrutimit, ka krijuar vonesa në hapjen e konkursit për zgjedhjen e drejtorit dhe udhëheqësit artistik të teatrit.
“Bashkë me Ministrinë e Punëve të Brendshme jemi duke punuar në hartimin e akteve nënligjore të cilat përcaktojnë kriteret dhe mënyrën e përzgjedhjes së zyrtarëve publikë, e në këtë rast edhe të pozitave drejtuese të Teatrit Kombëtar të Kosovës. Sapo të miratohen këto akte nënligjore, ne menjëherë do ta shpallim konkursin për drejtor dhe udhëheqës artistik të teatrit dhe në këtë proces drejtpërsëdrejti jeni të përfshirë ju si anëtarë të Këshillit Drejtues”, u tha mes tjerash ministrja anëtarëve të KD të TKK-së.
Ministrja Dumoshi tha se në interesin e saj dhe si prioritet në fushën e kulturës ka forcimin e institucioneve kombëtare të kulturës dhe se me Këshillin Drejtues të TKK-së pret një bashkëpunim konkret dhe dinamik me qëllim të rritjes së efikasitetit dhe performancës së institucionit të teatrit.
“Ne si MKRS, në vazhdimësi e kemi përkrahë teatrin dhe kemi investuar edhe në infrastrukturë. Ka edhe shumë për t’u punuar dhe ne në bazë të mundësive dhe kapaciteteve do të bëjmë më të mirën për teatrin. Forcimi i mëtejmë i institucionit të teatrit është një ndër objektivat e mia, sepse Teatri Kombëtar i Kosovës është një prej institucioneve më të rëndësishme të kulturës në Kosovë”, u shpreh ministrja.
Nga ana e tyre, anëtarët e Këshillit Drejtues të TKK-së, falënderuan ministren për takimin dhe gatishmërinë e treguar për bashkëpunim dhe për mbështetjen e pakursyer për teatrin.
Në kuadër të kompetencave dhe hapësirës ligjore, KD i TKK-së do të bëjnë maksimumin që institucioni i teatrit të jetë në vendin e merituar në kulturën e Kosovës, ka thënë kryesuesi i KD i TKK-së, Agron Shala, i cili edhe e informoi ministren se tashmë veç e kanë mbajtur mbledhjen e parë ku kanë biseduar për prioritetet dhe sfidat që ka teatri.
Ndër të tjera, Këshilli Drejtues i TKK-së në kuadër të kompetencave ka mbikëqyrjen punës së teatrit; aprovon politikat afatgjata të zhvillimit të teatrit dhe politikën artistike; me propozim të drejtorit të përgjithshëm, miraton planin vjetor buxhetor të teatrit; me propozim të udhëheqësit artistik dhe në përputhje me buxhetin vjetor miraton programin artistik vjetor të teatrit; shqyrton dhe miraton raportin vjetor financiar të teatrit; harton dhe propozon statutin, rregulloret dhe aktet tjera nënligjore të teatrit, të cilat i miraton Ministrja e Kulturës, Rinisë dhe Sportit; interviston kandidatët dhe zgjedh drejtorin e përgjithshëm dhe udhëheqësin artistik; inicion procedurën dhe shkarkon drejtorin e përgjithshëm dhe udhëheqësin artistik. / KultPlus.com
Natasha Kandiq, themeluesja e Qendrës për të Drejtën Humanitare tha se Serbia duhet të përgjigjet për trupat e shqiptarëve të vrarë në luftë.
“Në lidhje me gjykimet e Thaçit dhe komandantëve të tjerë të UÇK-së, Serbia do të duhet të përgjigjet shumë shpejt se ku janë trupat e shqiptarëve të vrarë në Beleg, ku janë trupat e të vrarëve të mbetur në fshatin Kraljane, trupat e të vrarëve të mbetur në Izbice”, ka thënë Kandiq.
Ajo tha se pritej që të konfirmohej padia kundër Hashim Thaçit, Kadri Veselit dhe përfaqësuesve të tjerë të UÇK-së.
“Sa i përket viktimave, ka indikacione serioze se prokuroria, për shkak të mungesës së provave të besueshme, nuk u mor me “Shtëpinë e Verdhë dhe heqjen e organeve njerëzore”, por sigurisht që do të hapë tema të ndaluara në Kosovë – vrasje të shqiptarëve, romëve dhe serbëve dhe gjykata do të arrijë në përfundime. gjë që do të çmitizojë rrugën nga urdhri në kryerjen e krimit – thekson Kandiq për Danas.
Në dy ditët e fundit u është konfirmuar aktakuza kundër Hashim Thaçit, Kadri Veselit dhe Rexhep Selimit, ndërsa u bastis shtëpia e Jakup Krasniqit, i cili u arrestua nga Policia e EULEX-it dhe u dërgua në Hagë. /Express/ KultPlus.com
Arrestohet 55 vjeçari nga Skrapari, pasi nxirrte pllaka guri dekorative nga Mali i Tomorit që tashmë prej muajsh është shpallur ”Park Kombëtar” apo zonë e mbrojtur.
Vijon kontrolli për parandalimin, evidentimin dhe goditjen e veprimtarisë së kundërligjshme që shkakton dëmtime në zonën e mbrojtur te malit te Tomorit.
Ushtronte aktivitetin e nxjerrjes së pllakave dekorative në mënyrë të kundërligjshme, arrestohet 1 shtetas për veprën penale “Dëmtimi i habitateve në zonat e mbrojtura mjedisore”.
Procedohet penalisht edhe transportuesi i pllakave dekorative, për veprën penale “Fshehja e të ardhurave”.
Në vijim të goditjeve të njëpasnjëshme ndaj veprimtarisë së kundërligjshme të nxjerrjes së pllakave të gurit në malin e Tomorit, nga specialistët e Seksionit për Hetimin e Krimit Ekonomik e Financiar u bë arrestimi në flagrancë i shtetasit:
•B. L., 55 vjeç, banues në Skrapar.
Si dhe u procedua në gjendje të lirë shtetasi P. M., 40 vjeç, banues në fshatin Çërrave, Pogradec.
Arrestimi i shtetasit B. L. u bë pasi dyshohet se në mënyrë të kundërligjshme ka nxjerr pllaka guri dekorative, në Malin e Tomorit, zonë e shpallur “Park Kombëtar”, duke dëmtuar habitatin natyror të zonës së mbrojtur.
Ky shtetas, materialin e gurit të nxjerrë në mënyrë të paligjshme, ia ka shitur shtetasit P. M., i cili u kap nga shërbimet e Policisë duke transportuar me mjetin tip kamion, 9 m3 pllaka dekorative pa dokumentacionin përkatës.
Materialet u referuan në Prokurorinë pranë Gjykatës së Shkallës së Parë Berat, për veprime të mëtejshme. / KultPlus.com
Ministria meksikane e Kulturës ka vënë në pikëpyetje përdorimin e motiveve të komuniteteve indigjene meksikane nga dizajneria franceze Isabel Marant, duke bërë kështu ankesën e fundit të qeverisë mbi brendet e modës që po përvetësojnë stile lokale.
Sipas ministrisë, koleksioni i mbramë i Marantit, përfshirë një pelerinë të gjatë me vija e dizajne me shoka me ngjyra në të hirtë e të kafenjtë, përfshin elemente nga populli Purepecha në Meksikë, transmeton KOHA shkrimin e Reuters.
“Ju kërkojmë juve, zonja Isabel Marant, të sqaroni publikisht se me çfarë të drejte privatizoni një pronë kolektive…dhe si përfiton komuniteti krijues i saj”, ka thënë ministrja e Kulturës, Alejandra Frausto, në letrën e nisur në adresë të dizajneres.
“Disa simbole që ju morët kanë kuptime të thella për këtë kulturë”, ka thënë Frausto, duke bërë thirrje për mbrojtje të artizanëve që historikisht ishin të “padukshëm”.
Kompania “Marant”, Isabel Marant, nuk i është përgjigjur menjëherë kërkesës për të dhënë sqarime. Webfaqja e brendit të njohur thotë se është e përkushtuar për sjellje etike e të përgjegjshme.
Më 2015, kompania ishte akuzuar ngjashëm për përfshirjen e dizajneve nga shteti jugor i Meksikës, Oaxaca.
Vitin e kaluar Meksika kritikoi dizajneren venezueliane Carolina Herrera dhe shtëpinë franceze të modës “Louis Vuitton”, për përdorim të motiveve tradicionale në dizajnet e tyre, pa kurrfarë konsiderate ndaj njerëzve që i krijuan ato. / KultPlus.com
Përkujtojmë sot shkrimtarin, dramaturgun dhe poetin disident, Kasëm Trebeshina (8 gusht 1926-6 nëntor 2017)
Kasëm Trebeshina u lind në Berat më 8 gusht 1926. Filloi studimet në Shkollën Normale të Elbasanit, por i ndërpreu më 1942 sepse u aktivizua që në rini në Luftën Nacionalçlirimtare. Pas vendosjes së regjimit komunist në Shqipëri, ai shërbeu si oficer i Drejtorisë së Mbrojtjes Popullore. Trebeshina ndërpreu studimet e larta në Institutin e Teatrit “Ostrovski” të Leningradit dhe iu kushtua tërësisht krijimtarisë letrare.
Ai do ta kundërshtonte që në nismë metodën e realizmit socialist. Letra e tij “Promemorje” për Enver Hoxhën, shkruar më 5 tetor 1953, denoncon vendosjen e sistemit diktatorial në Shqipërinë e Pasluftës së Dytë Botërore. Ky kundërshtim i hapur i drejtimit që synohej t’i jepej letërsisë dhe arteve do t’a çonte atë mëse një herë në burg dhe do t’i hiqte të drejtën e botimit.
Në 1954 Trebeshina dënohet me 3 vjet burg me akuzën për agjitacion dhe propagandë kundër pushtetit. Më 18 maj 1962 komisioni i internim–dëbimeve e dënoi atë me 5 vjet internim, që filloi më datë 18 maj 1962 dhe mbaroi në datë 18 maj 1967.
Në vitin 1961 boton poemën “Artani dhe Min’ja” dhe një përkthim të poetit spanjoll Garsia Lorka. Një pjesë e veprave të Trebeshinës kanë nisur të botohen në fillim të viteve ’90 në Prishtinë por pjesa më e madhe e veprës së tij: 18 vëllime me poezi, 42 pjesë teatrore, 21 romane e vëllime me tregime etj., janë ende në dorëshkrim. “Stina e stinëve”, është vepra më përfaqësuese. Në këtë vëllim janë përfshirë tri novela: “Stina e stinëve”, “Odin Mondvalsen” dhe “Fshati mbi shtatë kodrina”. Vepra të tjera të njohura të tij janë: ”Mekami, melodi turke” ,“Histori e atyre që nuk janë”, “Legjenda e asaj që iku”.
Kasëm Trebeshina vdiq në Ankara, më 6 nëntor 2017. / KultPlus.com
Qeveria norvegjeze njoftoi sot ndalimin e shitjes së alkoolit gjatë natës, si edhe uli kufirin në tubimet private, duke synuar frenimin e rritjes së mprehtë të rasteve të COVID-19.
Që nga e premtja, shitja e alkoolit do të ndalohen nga mesnata dhe restorantet e baret nuk do të lejohen të pranojnë klientë të rinj pas orës 22:00.
“Ne po shkojmë në drejtim të gabuar”, tha kryeministrja Erna Solberg në parlament.
“Komunat ose qytetet me norma shumë të larta infektimi duhet të marrin në konsideratë masa të tilla si mbylljen e qendrave të stërvitjes, pishinat, bibliotekat dhe muzetë”, shtoi ajo.
Kufiri aktual i 50 personave për tubime private u ul në 20 vetë, duke filluar nga e hëna.
Banorëve u është kërkuar që të kufizojnë kontaktet e tyre shoqërore dhe të qëndrojnë në shtëpi sa më shumë që të jetë e mundur, duke përfshirë shmangien e udhëtimeve jothelbësore në familje.
Norvegjia, një vend me 5,3 milionë banorë, ka regjistruar rreth 22 000 raste infektimi dhe 282 vdekje të lidhura me virusin./ atsh/ KultPlus.com
Organizata e shoqata ndërkombëtare e kanë kritikuar Qeverinë e Kosovës për shtyrje të afatit të pagesës së tarifave për veprat audiovizuale me të drejta autoriale. Një gjë e tillë, deri më tash, është vlerësuar si akt i papranueshëm nga tri organizata, të cilat kanë përvojë të gjatë në këtë fushë.
Të premten e javë së kaluar Qeveria me propozim të ministres së Kulturës, Vlora Dumoshi, ka ndryshuar Vendimin që mori më 19 tetor sa u përket tarifave të përgjithshme mujore për shfrytëzimin e lëndës së mbrojtur me rastin e ritransmetimit. Në vendimin paraprak Qeveria kishte vendosur që Vendimi të hynte në fuqi në ditën e publikimit në Gazetën Zyrtare. Publikimi bëhet rreth dy javë pas miratimit të një vendimi. Por ekzekutivi ka vendosur që operatorët kabllorë të mos kenë kurrfarë detyrimi për pagesën e tarifave deri në ditën e parë të prillit të vitit që vjen.
Janë “Association of European Performers’ Organisations” (Asosiacioni i Organizatave Evropiane të Performuesve), “The Societies’ Council for the Collective Management of Performer’ Rights” (Këshilli i Shoqërive për Menaxhimin Kolektiv të të Drejtave të Performuesve) dhe “Writers & Directors Worldwide”(Shkrimtarët dhe Regjisorët në Mbarë Botën) që i janë drejtuar me shkresa Zyrës së Kryeministrit dhe Ministrisë së Kulturës.
“Association of European Performers’ Organisations” me seli në Bruksel, që përfaqëson 400 mijë artistë nga 26 shtete, përmes shkresës së të mërkurës i është drejtuar kryeministrit Avdullah Hoti se shoqata e Kosovës VAPIK është duke u ballafaquar me kundërshtim të operatorëve kabllorë sa u përket pagesave të tarifës.
“Kjo është e dëmshme jo vetëm për interpretuesit në Kosovë, por më globalisht për të gjithë interpretuesit në Evropë dhe më gjerë, e po ashtu për rolin e tyre themeltar në kulturë. Me këtë letër dëshirojmë t’i shprehim mbështetjen tonë VAPIK-ut dhe t’ju bëjmë thirrje që të siguroheni që tarifat e vendosura nga Qeveria të zbatohen”, shkruhet në letrën e nënshkruar nga Tilo Gerlach, president i AEPO-ARTIS. Sipas Asociacionit, të drejtat e shpërblimit dhe menaxhimi i tyre kolektiv janë elementet kryesore në mbrojtjen e interpretuesve dhe garantojnë që ata të marrin shpërblim të drejtë dhe proporcional kur prodhimet e tyre përdoren në transmetime.
“The Societies’ Council for the Collective Management of Performer’ Rights” ia ka bërë me dije kryeministrit Hoti se çdo vit anëtarët e këtij Këshilli mbledhin mbi një miliard euro në emër të qindra mijëra interpretuesve. Në letër shkruhet se këto para u shpërndahen interpretuesve individualë prodhimet e të cilëve shfrytëzohen. Këshilli ka sqaruar se këto të ardhura ndihmojnë muzikën globale dhe ekonominë audiovizuale duke u mundësuar interpretuesve të vazhdojnë punën e tyre pasi bëhet fjalë për profesione që nuk ofrojnë siguri në të ardhura.
“Përmes grupit të tij të përkushtuar të bashkëpunimit dhe zhvillimit, SCAPR po ofron ndihmë për të gjitha shoqatat që janë apo jo anëtare të SCAPR. Duke thënë këtë, është sjellë në vëmendjen tonë që shoqata zyrtare audiovizuale në Kosovë, VAPIK, po lufton me zbatimin e tarifave audiovizuale për ritransmetimin kabllor që kanë qenë të miratuara së fundmi nga Qeveria e Kosovës”, shkruhet në letrën e nënshkruar nga drejtoresha Eanna Casey dhe drejtori menaxhues Rémy Desrosiers. Këshilli me seli në Bruksel ka kërkuar që tarifat të jenë të vendosura në mënyrë të pavarur dhe të jenë të ekuilibruara ekonomikisht.
“Ne mbështesim zbatimin e tyre sa më shpejt që të jetë e mundur në mënyrë që të përfitojnë gjithë interpretuesit”, shkruhet në këtë letër.
E “Writers & Directors Worldwide” është një organizatë që përfaqëson krijuesit audiovizualë nga 70 organizata të menaxhimit kolektiv në 62 vende të botës. Merret veçanërisht me regjisorët, skenaristët e filmave, programeve televizive dhe produksione të fushave të tjera. Organizata promovon interesat e tyre dhe garanton që ata të marrin pagesa për përdorimin komercial të veprave të tyre. Organizata me seli në Neuilly-sur-Seine të Francës është monitoruese e Organizatës Botërore të Pronësisë Intelektuale.
“Mision thelbësor i shoqatës në të gjithë botën është të mbështesim luftën e regjisorëve dhe skenaristëve për njohjen e tyre me ligjet kombëtare të së drejtës së autorit dhe shpërblimit të drejtë për çdo përdorim të punës së tyre. Ne duam të shprehim mbështetjen tonë në luftën që po bëjnë kolegët tanë të VAPIK-ut në Kosovë. Përdoruesit nuk mund të përdorin negociata të pafundme si një taktikë vonese për të shmangur pagesat për të drejtat e autorëve”, shkruhet në letrën e nënshkruar nga Yves Nilly, president i shoqatës.
Qeveria e Kosovës pa u bërë një javë nga miratimi i tarifave, i kishte rënë pishman veprimit të saj. Në ditën e 30-të të muajit të kaluar ministrja e Kulturës, Vlora Dumoshi, kërkoi plotësimin dhe ndryshimin e vendimit. Vendimi i është plotësuar duke precizuar se tarifat janë mujore, si dhe ka kërkuar që zbatimi të shtyhet për në prill. Pandemia ka qenë një prej arsyetimeve.
Tarifat kanë mbetur në vlera të njëjta dhe bazohen sipas grupimit të kanaleve televizive: deri në 70 kanale televizive – 0.30 euro për abonues; nga 71 deri në 100 kanale televizive – 0.35 euro për abonues; nga 101 deri në 150 kanale televizive – 0.40 euro për abonues; dhe mbi 151 kanale televizive – 0.45 euro për abonues.
KOHA të enjten ka adresuar pyetje edhe në Zyrën e kryeministrit Avdullah Hoti.
“Ju lutem që për këto çështje t’i drejtoheni kabinetit të ministres së Kulturës, zonjës Vlora Dumoshi. Kjo çështje është pjesë e përgjegjësive të kësaj ministrie”, ka thënë në një përgjigje me shkrim Antigona Baxhaku, këshilltare politike e kryeministrit Hoti.
Të enjten ministrja Dumoshi nuk u është përgjigjur pyetjeve të gazetës për reagimet ndërkombëtare për këtë çështje, përderisa katër ditë më parë, të hënën, nuk e kishte qartësuar procesin e ndryshimit të vendimit. Pasi që ka thënë se kjo është bërë me vendim të kryeministrit, ajo i kishte rekomanduar KOHËS që për këtë çështje të kontaktohet Valon Kashtanjeva, drejtor i Zyrës për mbrojtjen e të drejtave të autorit dhe të drejtave të përafërta.
Kashtanjeva s’i ka komentuar reagimet e organizatave të huaja, ani pse dy prej tyre i adresohen edhe Zyrës që ai drejton.
“Vendi duhet patjetër të ketë tarifa të aplikueshme. Vetëm me tarifa të aplikuara për ritransmetimin e lëndës që mbrohet me të drejtën e autorit zbatohet ligji. Tarifat janë obligim kushtetues e ligjor për vendin tonë, si dhe obligim i paraparë në kuadër të zbatimit të MSA-së”, ka thënë ai. Sipas Kashtanjevës, mbajtësit e të drejtave, autorët, performuesit, producentët dhe transmetuesit televizivë duhet të marrin kompensimin adekuat për materialin e tyre që ritransmetohet.
“Tarifat dhe aplikimi i tyre siguron zbatimin e ligjit dhe ofron siguri juridike edhe për ritransmetuesit si shfrytëzues të materialit që mbrohet me të drejtën e autorit”, ka thënë ai.
Më herët kishte thënë se Komisioni i ka bërë propozimet e veta qysh në dhjetor të vitit 2019. Ka sqaruar se janë shterur të gjitha mundësitë ligjore sa i përket përcaktimit të tarifave. Ka thënë se palët fillimisht kanë shkuar në negociata dhe nuk janë marrë vesh. Sipas tij, më pas ka pasur ndërmjetësim por edhe ky proces ka rezultuar i pasuksesshëm. Ka thënë se, sipas Ligjit për të drejtat e autorit, kushdo që shfrytëzon materialin e mbrojtur me të drejtën e autorit duhet të bëjë edhe kompozimin për të.
VAPIK ka qenë në negociata që nga viti 2013 me operatoret kabllorë për mbledhjen e të ardhurave për të drejtën e autorit të parapara me ligj. Pas gjashtë vjetësh, më 2019, me vendim të Qeverisë, MKRS-ja themeloi një komision ndërministror, i cili angazhoi një ekspert të huaj që në mënyrë të paanshme të sugjerojë tarifat me të cilat operatorët kabllorë u detyrohen artistëve vendorë dhe të huaj pasi që shfrytëzojnë veprat e tyre në ritransmetim.
Shoqata ka reaguar të hënën duke thënë se vendimi i ri i Qeverisë është marrë pa konsultuar të gjitha palët.
“Ky vendim u mor pa pjesëmarrjen dhe pa u konsultuar me Shoqatën për Menaxhimin Kolektiv të të Drejtave të Autorit, si pala tjetër në këtë marrëveshje; dhe pa prezencën e Zyrës për të Drejtën e Autorit, si pala neutrale përfaqësuese e Qeverisë dhe propozuese e tarifës”, shkruhet në atë që VAPIK e ka titulluar “Reagim ndaj pishman-fermanit për të drejtën e autorit”. Sipas shoqatës, është në interes të operatorëve kabllorë që procesi të mos ketë asnjëherë sukses. Sipas shoqatës, vendimi i ri i Qeverisë godit në mënyrë direkte shtëpitë mediale, krijuesit e interpretuesit që bartin të drejtat e autorit. Të enjten gazeta ka adresuar pyetje te tre operatorët kryesorë kabllorë në Kosovë: “IPKO”, “Kujtesa” dhe “Art Motion”. Përderisa nga IPKO-ja kanë thënë se po i përgatisin përgjigjet, dy të tjerët s’janë lajmëruar fare./ Koha.net / KultPlus.com
Rok grupi kosovar MAK u formua në vitin 1973 dhe si grup ka funksionuar deri në vitin 1978.
Gjashtë anëtarët e këtij grupi ishin Haki Misini, Mehmet Tupella, Rexhep Ismajli-Bulli, Halil Bajraktari, Sedat Isufi dhe Xhevdet Gashi. Grupi “MAK”, konsiderohet pionier i rok muzikës kosovare dhe ka merita të mëdha për popullarizimin e rok muzikës në vend.
Haki Misini, është i vrarë nga forcat serbe gjatë luftës në Kosovë dhe Mehmet Tupella konsiderohet ende i zhdukur.
KultPlus, sot po e sjellë këngën “Moj e mira te pojata”, një ndër këngët më të famshme të këtij grupi që kanë lënë gjurmë të thella në muzikën shqiptare.
Moj e mira te pojata
Moj e mira o, te pojata, hije te paskan flokt e gjata
Hije t’paskan o, flokt e gjata, shkurtoj pak e tu preft nafaka
Syri yt vasho si filxhani, vetllat t’holla eh sikur gajtani
Shtati yt vasho si selvie, goja jote o si kutie
(Uh dala t’plastë)
Shumë o djal jam bo merakë zëmra don me m’plasë në bark
Smut jam kanë o qe sa javë nuk je ardhë me m’pa
Te kishe ardhë o dej te arra ish qu dada t’kish dal para
Po s’je ardhë o me m’pa mu prandaj mo s’të du
A s’ma falë vash syrin e zi e, ta run baca si synin e tij e
A s’ma falë vash gojën ni herë e, ta shijoj vetëm ty arblere
Uh djal i dadës
Djalë kam ra në krahror tan, shejë në faqe mos me m’lanë,
Shejë në faqe mos me m’lanë, nana më qorton
Dalim në bashqe me shetit, trëndofilet me i ujit
Du me m’than vetëm një fjalë, se të dua djalë… / KultPlus.com
Me iniciativë të organizatave shqiptare në Austri dhe nën përkujdesjen e Këshillit Koordinues të Shoqatave Shqiptare në Austri, artistë dhe aktivistë shqiptarë të cilët veprojnë atje u bënë bashkë për të nderuar viktimat duke vendosur kurora të luleve ne të gjashtë vendet ku ndodhi sulmi makabër në natën e 2 Nëntorit në Vjenë, datë e cila fatkeqësisht është e zezë për Austrinë dhe mbarë njerëzimin.
Ky akt terrorist pati katër viktima e shumë të plagosur duke shokuar kështu Austrinë dhe mbarë botën.
Ky marsh solidarizues nisi nga Sinagoga, nga edhe ku nisi sulmi i tmerrshëm terrorist si dhe vazhdoi në të gjitha vendet ku mbetën viktima civile, të cilat paguan me çmimin më sublim dashurinë e tyre për këtë qytet të mrekullueshëm.
Me këtë gjest simbolik komuniteti shqiptar në Austri i shpreh ngushëllimet më të thella familjarëve të viktimave si dhe mbarë popullit austriak, gjithashtu shpreh mbështetjen ndaj bashkëqytetarëve të tyrë austriakë duke përçuar mesazhin se do të qëndrojnë bashkë në këto momente të vështira.
‘Aktet e tilla teorriste nuk do të arrijnë të zbehin vlerat e larta të demokracisë, respektin dhe harmoninë ndërnjerëzore që e karakterizonë popullin austriak, por përkundrazi do të na bëjnë edhe më të vendosur në mbrojtjen dhe avancimin e këtyre vlerave universale që dy popujt tanë i bashkëndajnë. Ashtu siç Austria çdo herë ka mbështetur popullin shqiptar, ashtu edhe ne do të mbështesim çdoherë popullin mik austriak. Bashkë jemi më të fuqishëm’, potencon Këshilli Koordinues. / KultPlus.com
Dua Lipa është ndër këngëtaret që gjithmonë ka shprehur haptazi mbështetjen ndaj komunitetit LGBTI, shkruan KultPlus.
Ajo ka pozuar disa herë me flamurin shumëngjyrësh, të cilin e ka edhe pjesë të klipit të saj shumë të suksesshëm, “Bloë Your Mind”.
Së fundmi, Lipa ka pozuar për atë që njihet si revista më e shitur e këtij komuniteti, “Attitude”.
“Faleminderit ekipit të mrekullueshëm që më patën në kopertinën e revistës”, shkroi Lipa në Instagram, teksa ndau me ndjekësit dy fotografi nga kopertina e revistës.
Këngëtarja shqiptare do të jetë pjesë e numrit të revistës për muajin dhjetor të këtij viti. / KultPlus.com
– Jeta ime është e mbushur me dashuri, shprehte me shumë entuziazëm shkrimtari i madh, Ivan Turgeniev. Ai ishte dhe mbeti deri në fund i mendimit se vetëm dashuria i jep atë zhvillim të përsosur aftësive tona, që është aq e nevojshëm për artistin, për krijuesin.
Isha i ri dhe dashurohesha me të bijën e një mullixhiu, që banonte në afërsitë e Peterburgut, tregonte ai.
E shihja dhe takoheshim sa herë shkoja për gjah në ato anë.
Për aq vite sa njiheshim dhe frekuentoheshim nuk deshi të pranonte prej meje as edhe një gjilpërë.
Më habiti një ditë kur më tha:
– Iv, dua të më bëni një dhuratë. Sillmëni një sapun të parfumuar nga Petërburgu.
Kërkesa e saj ishte sa modeste aq dhe befasuese për mua, kujtonte shkrimtari. Gjithsesi pranova me kënaqësi që më në fund do t’i realizoja një dëshirë.
Herën që shkova ta takoja ia solla sapunin që më kishte kërkuar. Ajo e mori dhe duke më parë me ledhati me ato sytë e saj shkëlqyes, më bëri shenjë që të prisja, dhe u largua me vrap nga shtëpia e saj.
Pas më pak se dhjetë minutash ajo u kthye duke më treguar duart e bardha që kundërmonin erë të mirë nga sapuni, me të cilin i kishte larë. Pastaj më tha:
Tani puthmi duart e mia, sikurse damave nëpër sallonet e Petërburgut.
Deshi edhe ajo, qoftë edhe për një herë të vetme, jo të ndihej një madam sallonesh, se sa të më jepte prej vetes atë mondanitet vajze të ndrojtur fshati, dhe ta këmbeja me një puthje, me këtë kortezi kalorësiake këtë gjest.
Ato duar nuk kundërmonin vetëm aromën e sapunit, ato dehnin me ëmbëlsinë, ngrohtësinë dhe bardhësinë e tyre. Në ato duar kridhej e ndrojtur dhe e epshet i gjithë hiri i asaj vajze fshati, i asaj bukurie të dlirtë dhe erëmirë.
U ndanë, për tu ritakuar, sërish… dhe për të besuar te mrekullitë e dashurisë.
Përgatiti: Albert Vataj. / KultPlus.com
