Ministri i Kulturës, Rinisë dhe Sportit, Hajrulla Çeku, në një ceremoni solemne, ka bërë dhënien e Çmimit Kombëtar për Vepër Jetësore “Azem Shkreli” dhe për Çmimet Vjetore për Letërsi, shkruan KultPlus.
Çmimi Kombëtar Letrar për Vepër Jetësore “Azem Shkreli” i ndahet Adem Gashit.
Gashi filloi fjalimin e tij ku në mënyrë sipërfaqësore falënderoi Ministrin Çeku për këtë çmim.
Fjalimin e tij ai e vazhdoi duke treguar për kohën kur ai punonte si një këshilltar në Ministrinë e Kulturës, për ta përfunduar në fund duke u shprehur i lumtur për çmimin e fituar. /KultPlus.com
Ministri Hajrulla Çeku priti sot në takim skitarët Kiana Kryeziu dhe Albin Tahiri të cilët prezantuan Kosovën në Lojërat Olimpike Dimërore, Pekin 2022.
Ata tashmë përfunduan garat dhe u kthyen në vend duke sjell nga atje një përvojë të shkëlqyer dhe rezultate mjaft të suksesshme.
Në takim ishin gjithashtu Kryetari i Komitetit Olimpik të Kosovës, Ismet Krasniqi, Kryetari i Federatës Skitare të Kosovës, Milaim Kelmendi, dhe trajneri i skitarisë, Agim Pupovci.
Bashkë diskutuan për garat dhe paraqitjen e shtetit tonë në këtë ngjarje sportive, gjë që na bënë krenar të gjithëve.
Çeku përgëzoi skitarët për prezantimin dhe suksesin e arritur në gara gjithashtu folën për planet që ka MKRS-ja për zhvillimin e programeve të reja dhe investimet tjera në sport, ku bënë pjesë edhe skijimi. /KultPlus.com
Dje ka vdekur profesori Bahri Drançolli, njëri ndër themeluesit e Artit Modern dhe Artit Grafik, si dhe njohës i shkëlqyeshëm i arteve figurative, shkruan KultPlus.
Ndërsa, sot përmes një postimi në llogarinë zyrtare të Ministrisë së Kulturës, Rinisë dhe Artit, Ministri Hajrulla Çeku dërgoi një telegram ngushëllimi për gjithë familjen e Bahri Drançollit.
“Telegram ngushëllimi
E nderuar familje Drançolli,
Me pikëllim të thellë mora lajmin për ndarjen nga jeta të më të dashurit tuaj, profesor Bahri Drançolli.
Në emrin tim dhe të Ministrisë së Kulturës shpreh ngushëllimet më të sinqerta për humbjen tuaj.
Skena e artit në Kosovë humbi një person që dha shumë për shoqërinë, njërin ndër themeluesit e artit modern dhe artit grafik, si dhe njohësin e shkëlqyeshëm të arteve figurative.
Krijimtaria dhe vlerat artistike që ka lënë si pasuri e trashëgimi, do të mbeten të paharruara siç do të mbetet edhe kujtimi ynë për të.
Ndarja nga jeta e një prej artistëve pionierë të artit akademik në vend ka lënë një boshllëk të pazëvendësueshëm në fushën e artit figurativ në Kosovë dhe më gjerë.
Ngushëllime familjes, miqve dhe dashamirëve të profesorit Bahri Drançolli.
Hajrulla Çeku
Ministër i Kulturës, Rinisë dhe Sportit“, ka shkruar ai.
Bahri Drançolli do të mbetet përherë i njohur për artdashësit gjermanë dhe botërorë me ekspozitat e tij personale veçanërisht në: Marsyas Gallery (Germany), Hesler Gallery, Munich (Germany), Studio M Gallery Bamberg (Germany) Gallery Kunstwerkstatt, Darmstadt (Germany), Kunstverein Rosenheim, Munich, Keislich Gallery Munich, Van Laar Gallery Munich, Stuckvilla, Munich, (Germany), etj. / KultPlus.com
Diskutimet e hapura mes Ministrit Hajrulla Çeku dhe komunitetit artistik tashmë janë shndërruar në një platformë të takimeve shumë konstruktive dhe efektive.
Pas Prishtinës ka filluar cikli i diskutimeve në qytetet tjera të Kosovës.
Mbrëmë takimi i mbajt në qytetin e Mitrovicës, një prej qendrave më të mëdha në Republikën e Kosovës dhe burim i shumë mekanizmave, organizatave dhe institucioneve kulturore.
Qëllimi i këtyre diskutimeve është që të dëgjohet zëri dhe propozimet e vet komunitetit kulturor për të parë këndvështrimin e tyre se si të rregullohet dhe zhvillohet më tej kultura në vendin tonë.
Ministri Çeku tha se ndjehet i lumtur që adresa e parë pas Prishtinës është Mitrovica, si një zgjerim i diskutimit me komunitetin për nevojat e reformës së përgjithshme kulturore e cila ka për bazë koncept dokumentin për kulturën si një udhëzues i përgjithshëm që do të parasheh rregullimin e legjislacionit, politikat lidhur me organizimin e institucioneve publike të kulturës, raportin e shtetit me skenën e pavarur kulturore, një vizion të ri për zhvillimin kulturor në Republikën e Kosovës.
Temat që u diskutuan ishin fondi për kulturën, gjetja e modaliteteve më të mira për hartimin e politikave kulturore, qasja e zhvillimit strategjik kulturor nga niveli qendror në atë lokal apo anasjelltas, investimet në infrastrukturën fizike, rinovimin e infrastrukturës ekzistuese, ndërtimin e objekteve të kulturës, harmonizimi i kuadrit artistik me tregun e punës, rritja e përkrahjes për punonjësit e artit në nivelin lokal, rinovimin e objekteve të trashëgimisë kulturore, përmirësimin e listës së trashëgimisë duke mënjanuar objektet që nuk ekzistojnë, rritje e komunikimit mes muzeve në Kosovë, përmes krijimit të një rrjeti të muzeve lokale, kultura sportive tek fëmijët, rregullimi i çështjes së ansambleve të teatrove të qyteteve, përgatitja e kuadrove të reja teknike deficitare që janë pjesë e realizimit të aktiviteteve kulturore, bashkëpunimi mes teatrove duke rritur konkurrencën mes tyre nëpërmjet organizimit të ndonjë festivali, mbështetja e teatrove alternative, jo vetëm e teatrove profesioniste, mungesa e hapësirave kulturore, si kinematë, stimulimin e të rinjve që të merren më shumë me kulturë, zhvillimi i aktiviteteve dhe artit edhe në pjesën veriore të qytetit të Mitrovicës, galeria e artit të qytetit, rritja e aktiviteteve kulturore edhe në fushën e folklorit dhe tematika tjera që ndërlidhen me fuqizimin dhe përmirësimin e jetës kulturore në rajonin e Mitrovicës.
Ministri Çeku tha se duke dëgjuar për së afërmi kërkesat dhe shqetësimet e komunitetit, me reformën që ka nisur do të tentohet t’u jepet përgjigje këtyre problematikave. Ndërsa në fokus të investimeve në infrastrukturën fizike të objekteve të kulturës do të jenë rinovimet objekteve ekzistuese, me theks, teatrot e qyteteve. Pastaj, mundësinë e rritjes së bashkëpunimit kulturor duke e de burokratizuar dhe decentralizuar kulturën, çështjen e ansambleve, duke gjetur modalitetet më të mira, qoftë edhe përmes audicioneve, për të rritur konkurrencën, gjetjen e formës më të mirë të financimit dhe përkrahjes së institucioneve të kulturës dhe skenës së pavarur kulturore, ndërtimin e politikave më të mira shtetërore për veprimtarinë kulturore në vendin tonë, ishin disa prej pikave ministri vuri në pah se duhet të marrin përgjigje me reformën kulturore.
Ndër diskutuesit që kontribuuan me idetë dhe propozimet e tyre ishin: Valdete Idrizi, drejtoreshë për kulturë në Komunën e Mitrovicës, Lulzim Hoti nga OJQ “7 Artet”, Kushtrim Mehmeti regjisor, Adem Zhitopotoku nga Teatri i Qytetit të Mitrovicës, Erhan Mujka nga Kosovaars, Enis Kelmendi nga Shoqata e Historianëve në Mitrovicë, Nora Prekazi-Hoti, nga Muzeu i Qytetit Mitrovicë, Mehmet Preteni aktor nga Teatri “Muharrem Qena” në Mitrovicë, Zekë Murseli, nga OJQ “Aleksandër Moisiu”, Nerimane Ferizi artdashëse dhe aktiviste e shoqërisë civile në Mitrovicë, Erdogan Muhamet nga Birlik Mitrovica Turk Dernegi, dhe përfaqësues tjerë të shoqërisë civile./ KultPlus.com
Ministri i Kulturës, Rinisë dhe Sportit, Hajrulla Çeku, ka reaguar së fundmi për Shtëpinë e Xhafer Devës, shkruan KultPlus.
Monumenti është pronë publike, ka vlera të mëdha estetike dhe për nga tipologjia e ndërtimit paraqet ndër shembujt e parë në Kosovë të kalimit në arkitekturën moderne europiane. Është pjesë e kujtesës kolektive të banorëve të Mitrovicës dhe së fundmi edhe simbol i rezistencës qytetare karshi betonizimit. Është ndërtuar në vitin 1930 dhe në Listën e Trashëgimisë Kulturore figuron si “Shtëpia e Xhafer Devës” edhepse kryesisht ka pasur përdorim publik, përfshi si shtëpi shëndeti. Prandaj nuk është e thënë që duhet ta mbajë këtë emër me çdo kusht.
Për vite me radhë ka qenë cak i grupeve të caktuara të interesit, përveç që i është vënë flaka, ndërtime të reja shumëkatëshe e kanë ngufatur nga të gjitha anët. Emri që mban monumenti është shënjuesi më i parëndesishëm krahasuar me funksionet publike dhe vlerat që përfaqëson kjo ndërtesë për qytetin dhe qytetarët. Ndërtesa ka marrë statusin e asetit të trashëgimisë kulturore në mbrojtje të ligjit në vitin 2011. Në vitin 2010 është hartuar për herë të parë projekti për restaurim, ndërsa i njëjti është reviduar në vitin 2017. Ndërhyrja e kaluar restauruese nga Ministria e Kulturës është bërë në vitin 2018 (faza e parë, kryesisht konsolidim strukturor).
Nisma e fundit për restaurimin e këtij monumenti i takon verës së vitit të kaluar (faza e dytë dhe e fundit, funksionalizim), dhe është pjesë e programit të përbashkët të Ministrisë së Kulturës me Bashkimin Europian dhe UNDP-në, ku bëjnë pjesë edhe monumente të tjera (xhami, kisha, shtëpi, kulla, muze). Përzgjedhja e këtyre monumenteve është bërë në bashkëpunim me partnerët ndërkombëtarë. Lajmin për këtë e kemi publikuar fillimisht në muajin qershor të vitit të kaluar dhe më pas në disa raste të tjera, ndërsa kjo temë është trajtuar gjerësisht edhe nga mediet. Është e habitshme se si muaj më pas dhe krejt papritur kjo u shndërrua në “çështje shqetësuese”. Pas restaurimit, monumenti është planifikuar t’i shërbejë komunitetit dhe përveç akomodimit të Qendrës Rajonale për Trashëgimi Kulturore Mitrovicë do të ketë hapësirë për galeri arti, funksion muzeal dhe ngjarje të tjera kulturore. Në atë galeri mund të ekspozohen fotografi e dëshmi mbi të kaluarën e Xhafer Devës apo ndonjë personaliteti tjetër historik (i pëlqeu dikujt apo jo), apo mbi historitë e hebrenjve që u shpërngulën në Kosovë e Ballkan për t’i shpëtuar Holokaustit. Hapësira muzeale mund t’i dedikohet vrasjeve gjatë Luftës së dytë Botërore. Mirëpo e kaluara e personalitetit përkatës nuk mund të jetë faktor përcaktues nëse ai monument e meriton të restaurohet. Monumenti i restauruar le të shërbej edhe si hapësirë e ballafaqimit me të kaluarën, ku mund të dokumentohet dhe ekspozohet edhe ana e errët e historisë sonë. Përpjekja për ta zhvendosur debatin në rrafshin e narracionit mbi personalitetin përkatës historik dëmton rëndë përpjekjet për mbrojtjen e trashëgimisë kulturore. Për më keq, kjo qasje legjitimon dhunën ndaj arkitekturës dhe artefaktit. Askush nuk është kundër fakteve historike, ato duhen thënë zëshëm dhe pa asnjë rezervë, para se gjithash nga profesionistët. Mirëpo, kundërshtimi i restaurimit duke u thirrur në narracionin historik është në kundërshtim me konventat botërore dhe praktikat e përparuara europiane për mbrojtjen e trashëgimisë kulturore. Ne nuk bëjmë revizionizëm historik dhe rehabilitim të figurave. Në fakt, burimi i gjithë kësaj zhurme të panevojshme është fqinji ynë verior që revizionizmin historik e ka politikë kombëtare dhe që reagon ndaj secilit zhvillim pozitiv në Kosovë.
Detyra jonë është t’i mbrojmë monumentet tona. Sepse duke i mbrojtur, ato mund t’ua vëmë në shërbim shoqërisë. Monumentet tona janë hapësira që lehtësojnë dialogun për paqe mes komuniteteve, njëherit duke ndihmuar edhe zhvillimin ekonomik të lokaliteteve. Dialogu mund të mos jetë i lehtë, historia mund të mos i pëlqej njërës apo palës tjetrës, por ekzistenca e artefaktit është parakusht për dialogun. Diskursi që legjitimon dhunën kundër arkitekturës është i rrezikshëm, sepse ai çon drejt zhdukjes së kulturës materiale. Popujt e civilizuar e ruajnë kulturën e tyre materiale, pra dëshmitë e prekshme të historisë së tyre, ndërsa historia, siç e dimë të gjithë, nuk është gjithmonë e lavdishme. Kjo e fundit nuk duhet të na frikësojë dhe as të shndërrohet në argument kundër trashëgimisë kulturore. Ministria e Kulturës është duke investuar në gjithë trashëgiminë tonë kulturore, pa dallim, përfshi xhami e monumente islame, kisha ortodokse, kisha katolike, shtëpi tradicionale, lokalitete arkeologjike, trashëgimi shpirtërore, muze, ndërtesa publike dhe të tjera. Sivjet do të restaurohet ndërtesa që do të akomodojë Qendrën Hebraike në Prizren, ndërsa kemi dakordim në parim që Jewish Museum Vienna të na ndihmojë në kurimin e hapësirës. Në planet e Ministrisë së Kulturës për sivjet janë edhe Muzeu i Nënës Terezë në Prizren, Kisha Katolike në Ferizaj, Xhamia “Suudi Efendi” në Prishtinë, Kulla e Sylejman Vokshit në Gjakovë, Hamami i Qytetit në Mitrovicë. Ndërhyrje do të ketë edhe në shumë monumente të tjera që mbajnë emra personalitetesh nga historia e hershme dhe e vonshme. Mulliri i Gjikokajve, Dyqani i Musa Goranit, Kompleksi Emin Gjiku, Kulla e Et’hem Godenit, Hamami i Gazi Mehmed Pashës, Shtëpia e Hynilerëve, Rezidenca e Ibrahim Rugovës, Lagjja e Hajdinëve, Shkolla Jeronim de Rada. Në listën e mbrojtjes ka shumë monumente që mbajnë emra të sulltanëve e pashallarëve, mbretërve e shenjtorëve, familjeve me shtëpi tradicionale e atyre me kullë, prijësve politik, ushtarak e fetar. Secili histori më vete, në kohë e regjime të ndryshme, mundësi e vullnete të diskutueshme. E përbashkëta e gjithë këtyre? Dëshmitë materiale të së kaluarës, ose ajo që quhet trashëgimia kulturore e Kosovës. Dhe për fund, duhet thënë hapur që ndihma e shteteve mike të Kosovës në betejën tonë për ta shpëtuar trashëgiminë kulturore është jetike. Prandaj, u bëj thirrje që sikurse në të kaluarën, të na qëndrojnë pranë edhe më tej.
Me ndihmën e tyre, monumentet tona do t’i shpëtojnë më shpejt degradimit në mënyrë që t’i shërbejnë nevojave socio-ekonomike të të gjithë qytetarëve të Kosovës, pa dallim etnie, feje a përkatësie tjetër. /KultPlus.com
Ministri i Kulturës, Rinisë dhe Sportit, Hajrullah Çeku, sot nëpërmjet një postimi në rrjetin social Facebook, ka përgëzuar punën e skitarëve tonë, Kiana Kryeziut dhe Albin Tahirit, të cilët me paraqitjen e tyre kanë bërë krenarë një popull të tërë, përcjell KultPlus.
“Kiana me paraqitjen e saj na ka bërë krenarë të gjithëve, ndërsa ka hapur dyert që rrugën e saj ta ndjekin edhe shumë vajza të tjera”, ka shkruar ai.
Mëposhtë KultPlus ju sjell postimin e tij të plotë:
Skitarët tanë sot bënë paraqitjet e para në Lojërat Olimpike Dimërore në Pekin. Është kënaqësi dhe ndjenjë e veçantë të shohësh garat e tyre në një prej organizimeve më të mëdha sportive në botë.
Kiana Kryeziu, 17 vjeçare u bë vajza e parë garuese nga vendi ynë dhe zuri vendin e 49-të nga 82 garuese. Kurse Albin Tahiri doli në vendin e 35-të nga 43 garues në garën e parë dhe do të vazhdojë me dy gara të tjera.
Kiana me paraqitjen e saj na ka bërë krenarë të gjithëve, ndërsa ka hapur dyert që rrugën e saj ta ndjekin edhe shumë vajza të tjera.
I përgëzoj për punën që kanë bërë deri tash duke e përfaqësuar denjësisht shtetin e Kosovës dhe u uroj shumë suksese më tutje. / KultPlus.com
Është një prej objekteve më të veçanta të trashëgimisë kulturore në Mitrovicë.
Gjatë ditës së djeshme filluan punimet restauruese në Shtëpinë e Xhafer Devës, shtëpi e ndërtuar në vitin 1930 në qendër të vjetër të qytetit nga arkitektë dhe punëtorë austriakë.
Shtëpia e Xhafer Devës ka vlerë të jashtëzakonshme shoqërore, kulturore, historike dhe arkitektonike për tërë rajonin.
Për nga stili i ndërtimit, kjo shtëpi i përket arkitekturës moderne euro-perëndimore dhe shquhet me elemente të shumta dekoruese në pjesën e jashtme. Si e tillë kjo është një ndër shtëpitë e para të këtij stili në Mitrovicë dhe Kosovë. Stili i ndërtimit të kësaj shtëpie, paraqet kthesë radikale të kalimit nga ndërtimi i objekteve me ndikim të arkitekturës të stilit oriental, në ndërtim të objekteve me stil të arkitekturës moderne europiane.
Procesi i restaurimit do të përfshijë ndërhyrjet në pjesën e jashtme dhe të brendshme të ndërtesës. Fokusi kryesor jashtë është në restaurimin e dekorimeve në fasada, punimet e zdrukthëtarisë dhe ndërrimin e dritareve dhe dyerve. Brendësia do të revitalizohet dhe përdoret si hapësirë komunitare për aktivitete kulturore në katin përdhes, ndërsa kati i parë dhe i dytë janë planifikuar të shërbejnë për zyrën e Qendrës Rajonale për Trashëgimi Kulturore në Mitrovicë.
Projekti pritet të përfundojë në fund të këtij viti.
Restaurimi po bëhet në kuadër të programit “Trashëgimia kulturore si nxitës për dialogun ndër-komunitar dhe kohezionin social”, i cili bashkëfinancohet nga Zyra e Instrumenti për Stabilitet dhe Paqe i BE-së dhe, Ministrisë së Kulturës, Rinisë dhe Sportit, dhe zbatohet nga UNDP.
E lindur më 1945, Alije Vokshi vdiq në moshën 76 vjeçare, ajo ishte piktorja e parë shqiptare e diplomuar në universitet, shkruan KultPlus.
Përmes një postimi në llogarinë zyrtare të Ministrisë së Kulturës, Rinisë dhe Artit, Ministri Hajrulla Çeku dërgoi një telegram ngushëllimi për gjithë familjen e Alije Vokshi.
“Me pikëllim mora lajmin për ndarjen nga jeta e të dashurës tuaj, piktores tonë, Alije Vokshit.
Në emrin tim dhe të Ministrisë së Kulturës, u shprehim ngushëllimet tona më të sinqerta, për humbjen tuaj.
Piktorja Alije Vokshi që u specializua në Paris, përpos aktivitetit kreativ artistik, me një korpus të madh të veprave që la pas, ajo u angazhua edhe në edukimin e artistëve si ligjëruese në Fakultetin e Arteve në Universitetin e Prishtinës.
Krijimtaria dhe vlerat artistike që ka lënë si pasuri e trashëgimi, do të mbeten të paharruara siç do të mbetet edhe kujtimi ynë për të.
Ndarja nga jeta e piktores Alije Vokshi ka lënë një boshllëk të pazëvendësueshme në fushën e artit pamor në Kosovë.
Ngushëllime familjes, miqve dhe dashamirëve të Alije Vokshit”, shkroi Çeku.
Kur flitet për artin dhe pikturën në raport me gratë kosovare, padyshim që duhet ndalur në një pikë, se historia e pikturimit me gruan shqiptare në Kosovë fillon pikërisht me emrin e Alije Vokshit. /KultPlus.com
Në mbrëmjen e 29 janarit në Sallën e Kuqe, në Pallatin e Rinisë dhe Sportit është mbajtur koncerti premierë i këtij viti nga Orkestra e Filharmonisë së Kosovës.
Nën udhëheqjen e dirigjentit izraelito-gjerman, Maayan Franco dhe pianistit shqiptaro-rumun, Herman-Med Cerisha janë interpretuar koncerti për piano dhe orkestër nga kompozitori Edvard Grieg dhe Simfonia në d mol e kompozitorit Cesar Franck.
Për të ndjekur koncertin i pranishëm ishte edhe Ministri i Kulturës, Hajrulla Çeku. /KultPlus.com
*SHËNIM: Të gjitha fotografitë janë realizuar nga Arben Llapashtica
Në oborrin e Kompleksit muzeor të Lidhjes Shqiptare të Prizrenit, sot u bë promovimi i lojës “Mos u Nxeh Prizren!”.
Loja e përgatitur nga organizata ‘EC Ma Ndryshe’ është prezantuar në format të hapësirës publike dhe atë të formës së lojës për tavolinë.
Në promovim morën pjesë Ministri i Kulturës, Rinisë dhe Sportit, Hajrulla Çeku, i shoqëruar nga këshilltarja Nora Arapi-Krasniqi, përfaqësuesit e organizatës “Ec Ma Ndryshe”, Drejtori i QRTK-Prizren, Samir Hoxha, mësimdhënësit e shkollës “Emin Duraku” dhe shkollave të tjera.
“Si ministri besojmë që edukimi për trashëgiminë kulturore duhet të fillojë qysh prej moshës më të re dhe mënyra më e mirë për të mësuar diçka është përmes lojës, përmes argëtimit dhe bashkëpunimit me njëri tjetrin”, ka thënë ministri Çeku.
“Kjo mund të duket diçka e vogël por është një metodologji shumë e avancuar për t’i edukuar fëmijët tanë me idenë që duhet mbrojtur kultivuar dhe promovuar vlerat tona të trashëgimisë”, u shpreh tutje ministri.
“Përmes këtij aktiviteti po bëhet prezantimi i vlerave të trashëgimisë kulturore, edukimi joformal i gjeneratave të reja”, ka thënë mes tjerash, drejtori i QRTK-së në Prizren, Samir Hoxha.
Kjo lojë kreative e dizajnuar për qytete të ndryshme të Shqipërisë, si: Gjirokastra, Tirana, Shkodra, Korça, etj. tanimë në Kosovë për herë të parë është prezantuar në Prizren.
Loja, përveq që synon të ‘pushojë’ fëmijët nga ekspozimi i tepërt në pajisje elektronike, poashtu synon rikthimin e një nostalgjie të shumë familjeve kosovare, tanimë në një format ndryshe.
Fëmijët përmes lojës e argëtimit do të mund të (ri)zbulojnë elemente të ndryshme të trashëgimisë së qytetit të tyre përderisa të rriturit, evokojnë kujtimet që ofron loja dhe mund të diskutojnë hapur për temat e mbrojtjes së trashëgimisë sonë të përbashkët kulturore.
Edicioni i lojës “Mos u Nxeh Prizren” është dizajnuar nga organizata ‘EC Ma Ndryshe’ në partneritet me GuideKS (Asociacionin e Guidave Turistike të Kosovës) dhe kontribut të çmuar nga stafi profesional i Qendra Rajonale për Trashëgimi Kulturore – Prizren, përderisa është financuar nga Ministria e Kulturës, Rinisë dhe Sportit. / KultPlus.com
Artisti Jakup Ferri do të përfaqësojë Republikën e Kosovës në Edicionin e 59-të të Bienales së Artit në Venedik për vitin 2022, ndërsa kuratore do të jetë Inke Arns.
Për të përcjellë përgatitjet dhe parë nga afë punën e artistit, sot në studion e tij qëndroi për vizitë Ministri Hajrulla Çeku dhe këshilltarja Nora Arapi-Krasniqi, ku takuan artistin Jakup Ferrri, kuratoren Inke Arns dhe ekipin e pavijonit.
Ekipi i Kosovës që do të prezantohet në Bienalen e Venedikut, e njoftuan për përgatitjet që janë duke u bërë dhe punës që do të përzgjidhet për prezantim si në Sale D’armi, Arsenale në Venedik.
Artisti Ferri shpalosi pikturat, tapiseritë dhe qëndisjet të cilat i punon së bashku me gratë të cilat vazhdojnë t’i ruajnë këto tradita artizanale.
Ministri Çeku shprehu gatishmërinë e plotë të ministrisë në mbështetje pavijonit që Kosova të prezantohet sa më dinjitetshëm në Venedik. / KultPlus.com
Ministri i Ministrisë për Kulturë, Rini dhe Sporte Hajrulla Çeku ka listuar sukseset e këtij viti që po lëmë pas, duke e vlerësuar si një kthesë për fushën e kulturës dhe sportit, pikërisht me rritjen e buxhetit që është bërë në këto dy fusha. Çeku ka folë edhe për Sallën Koncertale, objektin e Teatrit të Operës dhe Baletit, propozimin e KultPlus për themelimin e Festivalit të Muzikës në kuadër të RTK-së, e ka vlerësuar si ide të mirë, sikurse që ka folë edhe për kishën ortodokse brenda Kampusit të UP-së.
KultPlus: Jemi në fund të vitit, dhe brenda kësaj periudhe sa edhe po e udhëhiqni Ministrinë për Kulturë, Rini dhe Sporte, e keni vlerësuar si vit që është bërë shumë për fushat të cilat edhe janë brenda kësaj ministrie, në fakt, cila është e arritura më e madhe që e konsideroni edhe si kthesë për kulturën kosovare?
Hajrulla Çeku: Dy shtyllat kryesore të angazhimit tonë në kulturë janë: institucionet publike të kulturës dhe skena e pavarur kulturore. Planet vjetore të prokurimit, aktivizimi i petty cash, angazhimi i zyrtarëve shtesë financiar, konkurset për drejtuesit, renovimet dhe sigurimi i hapësirave shtesë, janë disa nga veprimet për t’i adresuar nevojat e institucioneve publike të kulturës. Në anën tjetër, mbështetja e përgjithshme për artistë dhe organizata kulturore për vitin 2021 është 3.8 milionë Euro, një rritje prej 60 përqind, krahasuar me vitin e kaluar.
KultPlus: Edhe këtë vit, filmi dhe sporti janë dy fushat më të arrira, ku edhe Kosova është përfaqësuar dhe po vazhdon të përfaqësohet në mënyrën më të mirë, a do të krijoni një fond edhe më të madh për këto dy fusha?
Hajrulla Çeku: Fondi shtetëror për filmin është dyfishuar për 2022, ndërsa buxheti do të rritet edhe viteve në vijim. Gjatë vitit 2022 do të miratohet ligji i ri për kinematografinë për të krijuar kushte nxitëse për zhvillimin e industrisë së filmit. Buxheti për sportin është rritur gjatë vitit 2021. Mbështetja e përgjithshme për federatat e sportit, klubet sportive dhe sportistët është 6.35 milionë Euro, 57 përqind më tepër se në 2020 dhe 51 përqind më tepër se në 2019.
KultPlus: Serbia vazhdon të krijojë filma për luftën e Kosovës, duke e shtrembëruar të vërtetën, të cilët kanë realizuar filma edhe për Kosharen, Reçakun, duke mos përjashtuar edhe shumë filma dokumentarë po për luftën e Kosovës, a do të duhej të kishim një thirrje të veçantë, për filma me tematikë të caktuar, në mënyrë që të realizohen sa më shumë filma për luftën e Kosovës?
Hajrulla Çeku: Filmat për luftën e Kosovës janë prodhuar dhe do të prodhohen në vazhdimësi. Gjatë vitit 2022 do mbështesim krijimtarinë audio-vizuele për të promovuar të vërtetën mbi luftën dhe shtetin e Kosovës nëpër botë.
KultPlus: Kur jemi te kjo thirrje, duke pas parasysh edhe bashkëpunimin kulturor mes Kosovës dhe Shqipërisë, a do të duhej që një thirrje e tillë të ishte e përbashkët?
Hajrulla Çeku: Veprimtaria filmike ndjek metodën e bashkëprodhimit. Filmi “Zgjoi” është një shembull ilustrues, pasi edhe Shqipëria është njëra nga bashkëprodhueset. Besoj që viteve në vijim do të kemi bashkëpunim të shtuar me Shqipërinë në fushën e prodhimtarisë filmike.
KultPlus: Prej pasluftës e këndej, çdo ministër ka premtuar ndërtimin e objektit të Operës dhe Baletit të Kosovës, por që ende ky objekt mbetet vetëm premtim për zgjedhje. Në ndërkohë, para objektit, ju themeluat institucionin e operës, sa mendon se kemi kapacitet kuadrosh për funksionalizimin e një institucioni të tillë?
Hajrulla Çeku: Institucioni i Operës së Kosovës është themeluar, ka mbajtur koncertin inaugurues, ka miratuar aktet e brendshme, ka strukturën drejtuese dhe është në përgatitje të programit të rregullt vjetor për vitin 2022. Ne jemi në komunikim me Komunën e Prishtinës, dhe në momentin e ndarjes së lokacionit do të shpallet edhe konkursi për projektim, për te vazhduar pastaj me hapat e nevojshëm për ndërtimin e Teatrit të Operës.
KulPlus: E sa i përket objektit të Operës dhe Baletit, sa herë keni folur për këtë objekt, por edhe institucionit nuk iu keni referuar si Opera dhe Baleti i Kosovës “Ibrahim Rugova”, por vetëm Opera dhe Baleti i Kosovës, a ka ndonjë ndryshim në emërtim, pasi që më herët, këtij objekti i janë referuar me emrin e Ibrahim Rugovës?
Hajrulla Çeku: Fokusi im janë puna dhe realizimi i zotimeve. Institucioni është funksionalizuar, në radhë është ndërtesa.
KultPlus: E sa i përket Sallës Koncertale, do të mbetet objekti Gërmia, apo pritet të ketë ndonjë ndryshim?
Hajrulla Çeku: Procesin e ndërtimit të sallës koncertale në objektin e Gërmisë nuk mund ta kthejmë në pikën zero, pasi janë zhvilluar disa faza të procedurës. Viti 2022 duhet të na gjejë me dinamizim të punëve drejt synimit të përbashkët për sallë koncertale.
KultPlus: Ndërkohë, së fundi keni diskutuar me kryetarin e Komunës së Prishtinës, Përparim Ramën edhe për objektin e Muzeut të Artit Bashkëkohor, mund të na shpjegoni se ku dhe si do të realizohet ky objekt?
Hajrulla Çeku: Në fillim të vitit të ardhshëm do të ngritet një këshill profesional për konceptimin dhe themelimin e institucionit. Bashkë me Komunën e Prishtinës do ta identifikojmë hapësirën më të përshtatshme ku do të vendoset Muzeu i Artit Bashkëkohor. Bienalja nomade Manifesta do të jetë platforma profesionale e dialogut gjithëpërfshirës për themelimin e institucionit.
KultPlus: Kur jemi te objektet, mund të flasim për objektin e Kishës Ortodokse brenda kampusit, mund të jetë si alternativë për ndonjë projekt kulturor?
Hajrulla Çeku: Për strukturën në fjalë që gjendet brenda kampusit të Universitetit të Prishtinës ekziston një proces i hapur gjyqësor. Pa përfunduar procesi gjyqësor nuk mund të ndërmarrim ndonjë veprim.
KultPlus: Kur jemi te themelimi i institucioneve, objekteve dhe iniciativave të ndryshme kulturore, Kosovës edhe më tej i mungon festivali i këngës, e që do të duhej të funksiononte brenda RTK-së. E dimë që ende nuk jemi anëtarë të EBU-së, që Kosova të përfaqësohet në Eurovizion, por a nuk do të duhej që Kosova të krijonte një traditë me këtë festival edhe para se të fillonte përfaqësimin?
Hajrulla Çeku: Mendoj që është ide e mirë. Duhet të flasim me RTK-në.
KultPlus: Ndërkohë, kemi një përfaqësim super dinjitoz në nivel ndërkombëtar, kur kemi parasysh suksesin e Dua Lipës, Rita Orës, Erza Muqollit, “Gjon’s Tears” dhe shumë artistëve të tjerë, kur kemi gjithë këta artistë të famshëm, a do të duhej të mendonim më seriozisht për një projekt që mund ti bashkonte këta artistë?
Hajrulla Çeku: Edhe kjo mendoj që është ide shumë e mirë.
KultPlus: Dhe për fund, cili është plani kryesor i vitit 2022, qe është edhe prioritet i MKRS-së, por edhe i Qeverisë së Kosovës, sa i përket fushës së kulturës?
Hajrulla Çeku: Viti 2022 është i reformës në sferën e kulturës. Do ta ndërtojmë bazën e nevojshme për funksionim efikas të institucioneve publike të kulturës dhe partneritet strategjik e fuqizim të skenës së pavarur kulturore. Do t’i dinamizojmë procedurat për Sallën Koncertale, Muzeun e Artit Bashkëkohor, Teatrin e Operas dhe Baletit dhe Teatrin e ri Kombëtar./ KultPlus.com
Ministri i Kulturës, Rinisë dhe Sportit, Hajrulla Çeku, ka pritur sot në takim Kryetarin e ri të Komunës së Prishtinës, Përparim Rama, shkruan KultPlus.
“Investimet kapitale strategjike ne sektorin e kulturës, studimi i fizibilitetit dhe plani rregullues i hollësishëm për Qendrën Historike të Qytetit të Prishtinës, mbrojtja dhe promovimi i aseteve të trashëgimisë kulturore, përmirësimi i infrastrukturës fizike sportive, bienalja nomade Manifesta, janë vetëm disa nga pikat për të cilat u pajtuam të bashkëpunojmë gjatë vitit 2022, duke bashkërenduar përpjekjet institucionale për krijimin e kushteve të dinjitetshme për komunitetin artistik e sportiv”, shkroi mes tjerash Çeku në “Facebook”.
Ai gjithashtu tregoi se vitin po e përmbyllin me shumë nisma që trasojnë rrugën për zhvillim të qëndrueshëm të sektorit të kulturës e sportit në kryeqytet dhe më gjërë.
“Ministria e Kulturës, Rinisë dhe Sportit do të vazhdojë të jetë partner serioz zhvillimor, duke ndërtuar ura bashkëpunimi me të gjitha institucionet publike dhe shoqërinë civile”, shkruhet në fund të postimit.
Përpos mesazheve, Çeku e Rama ndanë edhe disa fotografi. /KultPlus.com
Ekipi i filmit “Zgjoi” është takuar me Ministrin e Kulturës, Rinisë dhe Sportit, Hajrulla Çeku, shkruan KultPlus.
Përmes një postimi në llogarinë zyrtare, Çeku njoftoi se ka pritur në takim ekipin që po bën historinë drejt çmimin prestigjioz “Oskar”.
“Institucionet e shtetit janë duke e ofruar gjithë mbështetjen e nevojshme në këtë rrugëtim të përbashkët”, shkroi Ministri në “Facebook”.
Ai tutje shtou se ky takim ishte një kënaqësi e veçantë për të. “Artistët tanë vazhdojnë të na përfaqësojnë dinjitetshëm. Kinematografia e Kosovës është duke ecur në hap me botën”, përmbylli postimin.
“Zgjoi” së fundmi është përfshirë në listën e ngushtë për nominimet në Oskar. /KultPlus.com
Kryetari i Komunës së Prishtinës, Përparim Rama, ka zhvilluar së fundmi një takim me Ministrin e Kulturës, Rinisë dhe Sportit, Hajrulla Çeku, shkruan KultPlus.
Përmes një postimi në llogarinë zyrtare në “Facebook”, Rama ka njoftuar se kanë diskutuar për një varg çështjes të cilat i kanë prioritet si qeverisje komunale.
“Ministrit Çeku i kërkova bashkëpunim për projekte të rëndësishme të kulturës dhe trashëgimisë kulturore, siç janë ndërtimi i Sallës Koncertale dhe Muzeut të Artit Bashkëkohor. Nga ana e tij, ministri Çeku më shprehu mbështetjen dhe përkushtimin për bashkëpunim ndërmjet institucioneve tona”, ka shkruar Rama mes tjerash.
Ndër të tjera, si temë e takimit ishin edhe përgatitjet e përbashkëta për Bienalen Nomade Evropiane, Manifesta, që vitin tjetër vjen në Prishtinë. /KultPlus.com
Rreth 455 mijë EUR është shuma shtesë që u sigurua javën e kaluar për federatat e sportit.
Mbështetja e përgjithshme për Komitetin Olimpik, federatat, klubet dhe sportistët gjatë vitit 2021 është 6,35 milionë EUR, një rritje prej 57 përqind krahasuar me vitin 2020 dhe 51 përqind krahasuar me vitin 2019, bënë të ditur ministri i Kulturës, Rinisë dhe Sportit, Hajrulla Çeku.
Brenda programit të ringjalljes sporti dhe sportistët kanë përfituar 2.28 milionë euro:
27 federata (dhe KOK e KPOK) 214 klube sportive (dhe organizata) 178 sportistë.
Mbështetja e përgjithshme për federatat e sportit gjatë vitit 2021 është mbi 4 milionë EUR, një rritje prej 115 përqind krahasuar me vitin 2020 dhe 60 përqind krahasuar me vitin 2019.
“Siç e kemi shpallur nga fillimi, sporti është prioritet nacional i qeverisë. Viti i ardhshëm, ndër tjerash, do të na gjejë me:
Strategjinë dhe Planin e Veprimit për zhvillimin e sportit, Programin afatgjatë për funksionalizimin e ligave sportive në të gjitha shkollat e vendit, Përfundimin e disa projekteve të trashëguara dhe nisjen e të rejave në infrastrukturë sportive, Programin për brandimin ndërkombëtar të Kosovës si “Shtet i Xhudos”, Formulën e re të financimit të klubeve sportive nga shteti (përfshi trajnerët sportiv), Politikën e re të kategorizimit, vendosjen e rregullsisë financiare dhe rilicensimin e federatave të sportit”, shkruan ai. / KultPlus.com
Sot Ministri i Kulturës, Hajrulla Çeku i ka dorëzuar Kryetares së Bordit të Këshillit të Kosovës për Trashëgimi Kulturore 54 dosje, propozime që 54 asete të trashëgimisë kulturore të hyjnë në listën e mbrojtjes së përhershme.
Dosjet për vlerësim janë dorëzuar me propozim të institucioneve kompetente të trashëgimisë kulturore në përputhje me ligjin për trashëgiminë kulturore, ndërsa i përkasin trashëgimisë arkitekturale dhe arkeologjike.
Ministri Çeku dhe kryetarja e KKTK-së, Halimi vlerësuan se në kuadër të koordinimit dhe bashkëpunimit të institucioneve të trashëgimisë ka ardhur edhe deri tek ky hap konkret në proces të mbrojtjes së aseteve të trashëgimisë tonë të pasur kulturore.
Kjo nismë do të hap rrugë drejt përfshirjes së trashëgimisë kulturore në plane hapësinore, duke mundësuar shfrytëzimin e potencialit që kemi për zhvillim ekonomik e mirëqenie sociale. / KultPlus.com
Ministri i Kulturës, Rinisë dhe Sportit, Hajrulla Çeku, ka njoftuar se është miratuar projekt-ligji për arkivat shtetërore, një nismë që synon zhvillimin modern dhe efikas të sistemit arkivor të Kosovës, shkruan KultPlus.
Përmes një postimi të publikuar një rrjetin social “Facebook”, Çeku, njoftoi se ky dokument është i rëndësishëm.
“Ky dokument i rëndësishëm parasheh rregullat themelore për organizimin, administrimin dhe funksionimin unik të shërbimit arkivor si dhe kompetencat e organeve për krijimin, pranimin ruajtjen, mbrojtjen, përpunimin dhe shfrytëzimin e materialit arkivor të shtetit tonë”, shkroi ai.
Lëndët arkivore kanë rëndësi historike, shkencore dhe kulturore ato duhet të ruhen, të pasurohet fondi dhe koleksionet e arkivit me dokumente të rëndësishme të vendit dhe të shfrytëzohen në mënyrën më të mirë.
Ky projekt-ligj u miratua në mbledhjen e fundit të mbajtur nga Qeveria e Kosovës. /KultPlus.com
Mbrëmë në Kino Armata në Prishtinë, u mbajt takimi i fundit për këtë vit, mes ministrit Hajrulla Çeku dhe komunitetit artistik.
Kësaj radhe u diskutua me komunitetin e teatrove, njofton Ministria e Kulturës, Rinisë dhe Sportit.
Me pjesëmarrësit u fol për identifikimin e sfidave, nevojave dhe hapat e përbashkët të veprimit për adresimin e shumë çështjeve me rëndësi.
Bashkëbisedimi filloj me një prezantim nga ministri për punën që është bërë në fushën e teatrove dhe për idetë për të ardhmen.
Në lidhje me teatrin, koncepti është që jeta teatrore të organizohet edhe përtej institucioneve publike dhe për këtë duhet të obligohet ministria në të ardhmen që të krijojë hapësira të reja për teatro të tjera dhe për organizime teatrore, sidomos në shkolla të Kosovës, veçoi ministri Çeku.
Ndër të tjera gjithashtu foli për financimin për teatrot dhe projektet teatrore, i cili është dyfishuar këtë vit.
Ndër temat kyçe që u diskutuan në këtë takim të përbashkët ishin mbledhja e analizës mbi gjendjen e tanishme të sektorit dhe ku duam ta dërgojmë teatrin, reforma ligjore në kulturë, e posaçërisht në fushën e teatrit, ku të parashihet edhe çfarë do të vije pas 20-30 viteve.
Në diskutim u fol edhe për çështjen e këshillave drejtues, organizimin sindikal në sektorin e teatrit, sundimin e ligjit, deburokratizimin sa më të madh të kulturës, rritjen e krijimtarisë dhe vlerave artistike në fushën e teatrit, për krijimin e hapësirave të reja për artistët e rinj, financimin e qëndrueshëm të teatrov, duke zgjidhur menaxhimin e financave nga vet teatrot, për zhvillimin e një konkurrence të shëndoshë të angazhimit të artistëve në shfaqjet teatrale, bashkëpunimi mes pushtetit lokal dhe teatrove të qyteteve, dhe nçështje tjera që ndërlidhen me këtë fushë.
Ndër diskutuesit që kontribuuan në këtë takim të përbashkët ishin: Florent Mehmeti nga Teatri Oda, Naim Berisha nga Shoqata Sindikale e TKK-së, Flutura Zymi, aktiviste, Sokol Plakolli, artist, Fatmir Hyseni, nga Teatri i Ferizajt, Agron Gërguri nga Teatri i Podujevës, Vedat Haxhiislami, aktor, Fadil Hysaj, regjisor, pedagog, Saranda Elshani nga Teatri i Suharekës, Xhevat Limani, artist nga Shqipëria, Edi Kastrati nga Teatri i Gjakovës, Elhame Kutllovci, regjisore e teatrit, Valina Muçolli, aktore, Shefqet Gjoca, drejtor në AKKV “Shota”, dhe Gyner Halili, aktor. / KultPlus.com
Ministri i Kulturës, Rinisë dhe Sportit, Hajrulla Çeku, ka njoftuar se së shpejti do të nisin ndërhyrjet e para emergjente në ndërtesat e rrezikuara brenda Kompleksit Memorial “Adem Jashari” në Prekaz, shkruan KultPlus.
Përmes një postimi në llogarinë zyrtare në “Facebook”, Çeku ka njoftuar se përgjatë muajve të fundit kanë bërë hapa konkret.
“Kemi vlerësuar gjendjen fizike të ndërtesave brenda kompleksit, tani po nisim ndërhyrjet emergjente me karakter shpëtimi. Kemi identifikuar ekspertët më të mirë të vendit dhe nga jashtë, dje kemi themeluar Komisionin e Ekspertëve. Kemi nisur vlerësimet e para për çështjet pronësore brenda kompleksit, ndërsa nga fillimi i vitit të ardhshëm fokusi ynë do të jetë projekti i madh, pra hartimi dhe zbatimi i master-planit për kompleksin memorial.”, shkruan ai mes tjerash.
Minitri tutje shpjegon se gjithashtu në mbledhjen e tretë, që u zhvillua dje, te Komitetit ndër-ministror për kompleksin memorial “Adem Jashari” në Prekaz, i cili kryesohet nga Kryeministri Albin Kurti, morën vendime të rëndësishme.
Gjatë prillit të këtij viti, Qeveria Kurti kishte themeluar Komitetin Ndërministror për përzgjedhjen e projektit dhe monitorimin e procesit të zbatimit të projektit për Kompleksin Memorial “Adem Jashari” në Prekaz. /KultPlus.com
Kosova përmes sportit në xhudo është ngritur në pediestalet më të larta në vendet, lojërat e kampionatet botërore, shkruan KultPlus.
Së fundmi, xhudistja e Kosovës, Distria Krasniqi është shpallur xhudistja më e mirë në sportin e xhudos për vitin 2021.
Përpos saj, edhe trajneri Driton Kuka është shpallur si trajneri më i sukesshëm për këtë vit në sportin ku ai tani ka veçse tri medalje të arta.
Rreth këtyre ngjarjeve historike kanë reaguar edhe krerët shtetror të Kosovës, kryeministri i Republikës së Kosovës, Albin Kurti, presidentja Vjosa Osmani dhe Ministri i Kulturës, Hajrulla Çeku.
“Një tjetër arritje e jashtëzakonshme e ekipit të xhudos të Kosovës. Urime Driton Kukës për fitimin e çmimit të arritjeve të trajnerit 2021, dhe Distria Krasniqit që u shpall xhudistja e vitit”.
“Kënaqem kur shoh ekipin tonë t’i sjellë më shumë lavdi vendit. Të gjithë e festojmë suksesin tuaj”, ka shkruar Kurti në ‘Twitter’.
Në anën tjetër, Osmani ka shtuar se këto dy rezultate janë historike për sportin e Kosovës.
“Edhe dy rezultate historike për sportin në Kosovë. Kampionia olimpike, Distria Krasniqi, është përzgjedhur nga Federata Ndërkombëtare e Xhudos si xhudistja më e mirë në botë”.
“Ndërsa, Driton Kuka, mjeshtri i xhudos, u zgjodh trajneri më i mirë në botë në këtë sport”.
“Krenari dhe emocione të jashtëzakonshme. Kosova e artë”, ka shkruar Osmani në një postim në Facebook.
Ministri Çeku përmes një postiomi në “Facebook”, uroi të dy për çmimet e merituara, derisa falënderoi ata për krejt çfarë po bëjnë për shtetin e Kosovës.
“Toni, trajner Kosove, më i miri në botë! Urime mjeshtër, faleminderit për krejt çfarë po bën për shtetin tonë. Kampionja jonë olimpike Distria Krasniqi shpallet xhudistja më e mirë e vitit në botë. Urime kampione, plotësisht e merituar”, ka shkruar ai.
Federata Kombëtare e Xhudos ka bërë shpërndarjen e këtyre çmimeve përmes një ceremonie virutale. /KultPlus.com
Këshilli i Kosovës për Trashëgimi Kulturore do të organizojë një tryeze me titull “Bashkëpunimi ndër-institucional në Fushën e Trashëgimisë Kulturore”, shkruan KultPlus.
Kjo tryezë pritet të zhvillohet më 20 dhjetor, bë hotel Sirius dhe do të përbëhet nga tre panelë të ndryshëm.
Në këtë tryezë do të jetë i pranishëm edhe Ministri i Kulturës, Rinisë dhe Sportit, Hajrulla Çeku, i cili do të shoqërohet së bashku nga Kreshnik Bajrami, Zanita Halimi dhe Ardian Gola për të bërë hapjen.
Përmes tre panelëve dhe diskutimeve nga 20 minuta respektivisht do të diskutohet rreth mbrojtjës së trashëgimisë kulturore, trashëgimia shpirtërore duke përfshirë praktikat dhe politikat, e gjithashtu edhe zhvillimi i qëndrueshëm dhe promovimi i trashëgimisë kulturore. /KultPlus.com
Ministri i Kulturës, Rinisë dhe Sportit, Hajrulla Çeku po vazhdon serinë e diskutimeve të hapura me komunitetin artistik e kulturor, ku mbrëmë është mbajtur takimi i katërt, shkruan KultPlus.
Në serinë e katërt ishte radha e komunitetit dhe ansambleve folklorike që të diskutojnë së bashku edhe me shoqëritë kulturore artisitke mbi artin e kulturën.
Fillimisht, ministri paraqiti vizionin që është në programin për kulturën që ndërlidhet me pjesën e ansambleve folklorike dhe shoqërive kulturore artistike, ku do të ketë mbështetje dhe konsolidim të vazhdueshëm të institucioneve që kultivojnë traditën folklorike në vendin tonë, mbështetja e institucioneve dhe organizatave që merren me folklor është edhe prej orientimeve strategjike, mbështetje mbi edukimin dhe dokumentimin e trashëgimisë shpirtërore folklorike i cili është një detyrim i përhershëm i ministrisë.
Adresimi i çështjeve si rregullimi i statusit të artistit të pavarur në kuadër të ligjit për kulturën, ku përfshihen edhe performuesit, valltarët, instrumentistët, mbështetja e qëndrueshme dhe rritja e buxhetit për Ansamblin Shota, konsolidimi dhe përkrahja për ansamblet që funksionojnë në Kosovë, prezantimi i kulturës tonë në skenën ndërkombëtare si interes strategjik që të kemi një prezencë më të madhe ndërkombëtare, infrastruktura kulturore, me theks ajo edukative mbi traditën tonë folklorike, janë ndër angazhimet e ministrisë në raport me përmirësimin e sektorit.
Edukimi për kulturë, në bashkëpunim me MASHTI-n është një për synimeve dhe me drejtuesit e Ansamblit Shota veç janë diskutuar dhe hartuar disa programe që të rinjtë të edukohen për folklorin dhe kulturën tonë në mënyrë që të bëhet ndërlidhja sa më e mirë mes shkollave të ciklit të ulët dhe të mesëm me krijuesit, performuesit dhe prodhuesve të aktivitetit kulturor.
Tema të tjera të cilat u diskutuan kishin të bënin me rregullimin e insfrastrukturës ligjore dhe fizike për të përmbushur edhe statustin e ansambleve dhe hapësirinë ku ato funksionojnë.
Kushtet më të mira për punë dhe vendi për t’u kryer aktivitet e tyre ishin disa prej kërkesave kryesore që u paraqitën në këtë diskutim të hapur që është mbajtur në ambientet e Kino Armatës. /KultPlus.com
