Muaj: Qershor 2019

Modelja shqiptare pjesë e sfilatës së Guess (FOTO)

Posted on by KultPlus

Mes shumë markave për të cilat ka sfiluar Oriola Marashi, është edhe e famshmja Guess.

Para pak kohësh, Oriola sfiloi për herë të parë për markën e njohur. Ajo ka sfiluar sërish për këtë markë dhe sërish shkëlqeu. Modelja u kujdes të ndante me ndjekësit momentet më të bukura nga ngjarja e rëndësishme, foto e video, ku shfaqet duke ecur me vetëbesim në pasarelë.

“Gjithmonë kam ëndërruar dhe punuar fort për këtë moment dhe të mund ta përjetoja këtë me skuadrën më të mrekullueshme ka qenë një bekim në jetën time! E lumtur që jam një modele e Guess. Një falënderim i madh për të gjithë”, ka shkruar Oriola përkrah fotove. / KultPlus.com

https://www.instagram.com/p/By5fjgph4UH/
https://www.instagram.com/p/By7_Qgrh2HU/

Shqiptarja që po konkurron për kopertinën e revistës Muscle & Fitness Hers

Posted on by Kult Plus

Shqiptarja Disola Horst që jeton në Amerikë, po konkurron për të zënë vend në kopertinën e revistës prestigjioze Muscle & Fitness Hers.

Ajo bën një jetë të shëndetshme dhe merret prej kohësh me fitnes, ndërsa në këtë garë përfaqëson më shumë se sa sportin. Disola është shembull për vajzat e reja, se si të jetojnë shëndetshëm duke u marrë me sport.

“Fillova t’i jap shëndetit prioritet dhe të merrem me fitnes në vitin 2011, ndërsa luftoja me depresionin. Vëreja se fitnesi më ndihmonte për ta përmirësuar shëndetin tim në përgjithësi, dhe ma rriti dashurinë e besimin” shprehet ajo. /KultPlus

Votimi i Disolës për këtë garë, mund të bëhet përmes këtij linku:

https://mshealthandfitness.com/2019/disola-horst

Si pasojë e mbylljes së kalasë bie numri i vizitorëve në Novobërdë

Posted on by KultPlus

Ka rreth 4 muaj që Kalaja e Novobërdës po qëndron e mbyllur për vizitorë.

Kjo për shkak të rrezikut nga shembja e mureve të kalasë, të cilat janë të vjetra dhe të punuara keq.

Disa vizitorë që po qëndronin në Novobërdë për herë të parë thanë se janë të zhgënjyer që nuk mund të hynin brenda monumentit historik.

Ata, madje, drejtuan edhe kritika ndaj institucioneve përgjegjëse, për mosmonitorim të punimeve.

Të dielën, numri i vizitorëve te Kalaja e Novobërdës nuk ishte i madh dhe për banorët e kësaj ane, në këtë ka ndikuar restaurimi i ngadalshëm.

Është tentuar që të xhirohet nga brenda Kalanë e Novobërdës, por Luan Gashi nga Instituti Arkeologjik i Kosovës, përmes telefonit, ka thënë se nuk mund të xhirohet shkaku i rrezikshmërisë, si dhe ka kërcënuar ekipin që nëse xhirohet ndonjë pjesë e njohur si ‘hulumtime të arkeologëve’, do të padisin televizionin.

E, nga Ministria e Kulturës kanë thënë që për projektin janë në bashkëveprim me Zyrën e BE-së dhe se dëmet e bëra do të riparohen.

Investimet në Kalanë e Novobërdës kanë nisur në fillim të vitit 2015 dhe kanë përfunduar në tetor të 2016-s, e janë financuar nga Komisioni Evropian, me 1.1 milion euro/koha.net / KultPlus.com

Fotografia: Arben Llapashtica


“Prerja e Frikës” e Fehmi Pireva me skena tipike tradicionale shqiptare

Posted on by KultPlus

 

Nga Salihe Salihu

“Prerja e Frikës” është një roman ku lexuesi gjen një ciklon ndjenjash të autorit që në mënyrë të rrjedhshme janë strukturuar e përmbledhë përjetimet e tij në hapësirat ku autori ka jetuar, aty rreth lumit Llap dhe malit Kulinë. Po ta shohim sfondin e këtij narrativi shihet se përpos perspektivës historike lexuesi menjëherë gjen perspektivën kulturor e sociologjik mbi ngjarjet e ndodhura meqë aty dalin skena tipike tradicionale shqiptare të cilat janë të ngulitura në memorien e autorit që në moshën e re.

Ky rrëfimi i gdhendur është pjesërisht i nxjerrë nga përditshmëria ndërsa pjesërisht kombinohet me imagjinatën e një fëmije duke u përpjekur që të risjell të kaluarën me një përshkrim të kujdesshëm. Përshkrimi i të kaluarës është i mbushur me traditat e zakonet ku shtjellohet përditshmëria e mënyrës së jetesës duke lakuriqësuar elementet kulturore e sociologjike me paraqitjen e kodeve të shkruara e të pashkruara të cilat ishin në funksion të jetës së shqiptarëve.

Po ashtu, në këtë përshkrim dallohet një karakteristikë e veçantë që autori përdor duke pajisur perspektivën historike jo vetëm përmes përjetimeve të veta por edhe përmes përjetimeve të paraardhësve. Me mjeshtëri autori rikthehet në kujtimet tek përrallat e gjyshes, duke bërë një shfletim të kujtesës së tij duke e bërë mjaft të këndshëm përshkrimin.

Autori nga rrëfimi i përrallave nxjerrë në pah heroizmin dhe prijësin e popullit tonë – heroin kombëtar Skënderbeun dhe luftërat e popullit tonë kundër okupuesve. Nga ky segment shohim se si historia aq e largët afrohet dhe bashkohet me tregimet e historisë së afërt, e që producent të kësaj historie të freskët janë brezat e një pas njëpasnjëshëm që u angazhuan për lirinë e këtij vendi.

Perspektiva historik e mbështjellur me dimensionin kulturor e sociologjik përmes fabulës ”Prerja e Frikës” në mënyrë interaktive është inkoopruar me dimensionin psikologjik.

Në këtë gërshetim të perspektivave është shkoqitë në mënyrë të detajuar përditshmëria e jetesës së shqiptarëve. Por, sido që ta analizojmë këtë përshkrim ne nuk mund ta ndryshojmë të kaluarën që autori e përshkruan. Prandaj, ky pasqyrimi jetësor me përfshirjen e këtyre elementeve do jetë në shërbim për brezat e rijnë, për pasardhësit tanë, që të pajisen me njohuri se në çfarë mënyre e në çfarë kushte kanë jetuar paraardhësit të tyre. Veçanërisht, ky përshkrim mund të ju shërbejë pasardhësve që të seleksionojnë se çfarë mund të ruhet nga

tradicionalja dhe se çfarë duhet braktisur njëherë e përgjithmonë – si për shembull veprimet misterioze, siç ishte prerja e frikës – gjë që është edhe mesazh i vetë autorit.

Autorin në femërinë e tij e kanë tmerruar sjelljet misterioze për ”Prerjen e Frikës” dhe për ta çrrënjosë këtë dukuri të mistifikuar autorit iu nevojit që të sjell në këtë rrëfim paraqitjen e intelektualëve që me iluminizmin e tyre i bënë varrin dhe larguan shumë adete apo zakone të dëmshme që ngulfateni zhvillimin e dijes dhe prosperitetit në trojet tona.

Figurat iluministe paraqiten jo vetëm për përmbysjen e zakoneve të këqija por edhe për rezistencën e tyre ndaj okupimit, duke i përshkruar si njerëz të sakrificës që përkundër burgosjeve dhe maltretimeve nuk u mposhten por vazhduan si pishtarë lirie për të sjellë një fije dritë të rrezeve të lirisë në trojet e përvuajtura.

Përmes romanit “Prerja e Frikës” gjejmë dialektikën jetësore të shqiptarëve dhe hapa e tyre vetëdashës për të braktisur format mitologjike të jetesës dhe për ti kultivuar vlerat civilizuese në këto troje. Autori në përkrahje të vlerave civilizuese thotë: “Me kaq marrin fund edhe trillet e plakave…” gjithashtu më pastaj autori inkurajon zhvillimin e individit duke dhënë porosinë: “Duhet të mësosh të ecësh vetë…”. Këto formulime flasin vetëvetiu se çfarë autori synon që të përçon tek lexuesi.

Duke e përgëzuar autorin për këtë roman mund të them se autori ka arritur ti paraqet ndryshimet historike të ndodhura nëpër kohë si në aspektin kulturor, sociologjik e psikologjik të cilat në mënyrë të vetëdijshme e me plotë sakrifica u kultivuan tek ne.

Në fund mund lirshëm të them se mesazhi i romanit si pikë të fortë ka transformimet civilizuese të cilat janë nxitur nga intelektualët shqiptarë që aspironin një jetë sa më demistifikuese dhe sa më humane. Urojë që të shtohet numri i krijimtarive prozaike me mesazhe të tilla, për një të ardhme më të ndritshme dhe larg e më larg nga “Prerja e Frikës” sikurse janë përfshirë në këtë roman. / KultPlus.com

(Recension i librit “Prerja e Frikës” të autorit Fehmi Pireva)

Katari ndërton bibliotekën më të madhe në botë, ky është numri i librave

Posted on by KultPlus

Plot fëmijë rrëmojnë në raftet e saj ose ulen me libra në duar, në këmbët e shtyllave të mëdha, që mbështesin mega-strukturën e “Rem Koolhaas”, prej 45.000 metra katrorësh.

Në 6 muajt e parë të vitit, thonë drejtues të saj, çdo libër i seksionit të fëmijëve është huazuar, çka tregon se përpjekjet për të tërhequr dhe më të vegjlit, kanë dhënë fryt.

QNL-ja, e shitur si një bibliotekë “e zhurmshme”, përmban një auditor me 120 vende dhe një zonë eventesh në zemër të hapësirës, së mbushur me dritë natyrale, e cila të kujton një aeroport modern.

“Të gjithë librat që shihni në këtë vend mund të huazohen nga përdoruesit. Ndryshe nga shumë biblioteka kombëtare, ne kemi një funksion të bibliotekës publike që bashkërendohet me funksionin kombëtare dhe atë kërkimor”, është shprehur Stuart James Hamilton, zëvendës drejtori ekzekutiv i bibliotekës.

Me mbi një milion libra dhe 500,000 botime digjitale, biblioteka e ndodhur në Doha, është më e madhja në Lindjen e Mesme.

Megjithatë konkurrenca nuk mungon, Emiratet e Bashkuara Arabe po përpiqen t’ia kalojnë Katarit me bibliotekën më të re, në Dubai, “Mohammed Bin Rashid”, e cila kur te çelet, thuhet se do ti ofrojë plot 1.5 milion libra, publikut për lexim.

Katari ndërton bibliotekën më të madhe në botë

Posted on by Kult Plus

Plot fëmijë rrëmojnë në raftet e saj ose ulen me libra në duar, në këmbët e shtyllave të mëdha, që mbështesin mega-strukturën e “Rem Koolhaas”, prej 45.000 metra katrorësh.

Në 6 muajt e parë të vitit, thonë drejtues të saj, çdo libër i seksionit të fëmijëve është huazuar, çka tregon se përpjekjet për të tërhequr dhe më të vegjlit, kanë dhënë fryt.

QNL-ja, e shitur si një bibliotekë “e zhurmshme”, përmban një auditor me 120 vende dhe një zonë eventesh në zemër të hapësirës, së mbushur me dritë natyrale, e cila të kujton një aeroport modern.

“Të gjithë librat që shihni në këtë vend mund të huazohen nga përdoruesit. Ndryshe nga shumë biblioteka kombëtare, ne kemi një funksion të bibliotekës publike që bashkërendohet me funksionin kombëtare dhe atë kërkimor”, është shprehur Stuart James Hamilton, zëvendës drejtori ekzekutiv i bibliotekës.

Me mbi një milion libra dhe 500,000 botime digjitale, biblioteka e ndodhur në Doha, është më e madhja në Lindjen e Mesme.

Megjithatë konkurrenca nuk mungon, Emiratet e Bashkuara Arabe po përpiqen t’ia kalojnë Katarit me bibliotekën më të re, në Dubai, “Mohammed Bin Rashid”, e cila kur te çelet, thuhet se do ti ofrojë plot 1.5 milion libra, publikut për lexim./ Insajderi/ KultPlus.com

“Ç’ke humb mos e kërko, ç’ke në dorë mos e lësho”

Posted on by Kult Plus

150 fjalë të urta shqipe

Amanetin as deti nuk e mban, e qet në lëndinë. Dukagjin

– Burri o të mbyt, o të fal; i ligu as të mbyt, as të fal. Shkodër

– Besa asht ma e fortë se vdekja. KRUJË

– Besa e burrit, pesha e gurit. VERI

– Burri i mirë flet një herë. KRUJË

– Frika nuk e len lepurin me u majtë. SHKODËR

– Gungaçit vetëm varri ia drejton samarin. SHKODËR

– Kur ke zemër ke edhe krahë. KRUJË

– Pushka don pushkën. TROPOJË

ATDHEU
– Atdheu e nana nuk harrohen. TROPOJE

– Fjala në vend të huej, bahet gur. VERI

– Kush ka vdekë për atdhe, nuk ka vdekë por kale. SHKODËR

– Mbroje atdhenë si shqiponja folenë. SHKODËR

– Nje zogu që i prishet foleja, hidhet degë më degë. MAT

– Qeni te shpia e vet gjithmonë asht trim. VERI

– Gjakut të derdhur të shqiptarit i bie dielli e nuk e than, i bie shiu dhe nuk e lan. VERI

– Kush rren shtetin, rren vetin. TROPOJË

MENÇURIA
– Gjuha e ka rrënjën në zemër. VERI

– Po nuk e njohe hidhërimin, nuk do të kuptosh dhe gëzimin.

– Hileqari nuk të shef në sy, po shef në tokë. DIBËR

– Me pasë bishtin ta presin, mos me pasë ta ngjesin. SHKODËR

– Mos e ban penin tra. DIBËR

– Me sa ka peshk pa halë, aq ka dhe të bukur pa fjalë. KRUJË

– Burimi i mirë duket në thatësirë. KRUJË

– Kalit të mirë shtoi tagjinë. SHKODËR

– Mendja është në majë të gjuhës. SHKODËR

– Mendja e lehtë rëndon të zonë. KRUJË

– Mos bëj petulla me ujë. DIBËR

– S’mbartet ujë me shportë. SHKODËR

– Si është vendi bëhet kuvendi. VERI

– Thesi i zbrazët s’qëndron në këmbë. KRUJË

THJESHTËSIA
– Duro sa mund, gëzohu pa fund. VERI

– Edhe guri pëlcet kur nxehet. KRUJË

– Fjal e ëmbël thyhen të fortin. SHKODËR

– Fjala e mirë në ditë të keqe. KRUJË

– Hiq inatin gjej rehatin. KRUJË

– I buti thyen të fortin. SHKODËR

– Me njoftë veten asht urti, me qeverisë veten, është trimni.

TE TJERA
– Trim i mirë quhet ai që përcjell zemërimin. KRUJË

– Atij që nuk e do, i thuaji: “Të hyftë vetja në qejf”. SHKODËR

– Ena bosh zhurmon më tepër. KRUJË

– Marrija ma e madhe asht me kujtue vedin të mençëm.

– S’e lenë hunda me pa larg. KRUJË

– Bëne vath e ve në vesh. SHKODËR

– Dami të bëhet mësim. DIBËR

DREJTËSIA
– Ban mirë e harro, ban lig e kujto. VERI

– Edhe ëngjëlli, edhe djalli, janë brenda tek i gjalli. KRUJË

– I ligu kur të hipën mbi shpinë, nuk din me zbritë kurrë. TROPOJË

– Malli i keq shifet në bojë, dhe njeriu i keq shifet në sy. SHKODËR

– Sëpatës bish mos iu ban. DIBËR

– Ska din zemra, atje shkon mendja. SHKODËR

– Difton fëmija, ç’ka shtëpia. VERI

LIRIA
– Bilbili te kafazi s’këndon nga qejfi, po nga marazi. SHKODËR

– Burri nuk shtrihet as për së vdekmi. MIRDITË

– Ç’hall ke, vështroje. VERI

– Ec me këmbë tueja e jo me mend e huaja. SHKODËR

– Gjithkush teshat i lan në shtëpinë e vet. VERI

– Kafshata e huaj të mbet në fyt. SHKODËR

– Kur se mbajnë njëzet e katër tuejt, nuk e mbajnë as katërdhetë e tetë të huejt. SHKODËR

– Leku i huj, peshon rëndë në xhep. PUKË

– Më mirë një ditë në liri, se njëqind vjet në robni. KRUJË

– Më mirë i lig e i lirë, sesa shëndoshë e me zinxhirë. KRUJË

– Më mirë Sokol një herë, se sorrë gjithherë. SHKODËR

– Mos u ban mjaltë, se të han mizat. SHKODËR

– Qëndro shtyllë e mos u bëj urë. KRUJË

– S’mbahet shpirti me falimnders. VERI

– Shqiponja nuk gjuan miza. KRUJË

– Trimëria dhe liria janë si nanë e bijë. KRUJË

PUNA
– Bujku i mirë, ia merr me zorr bukën tokës. TROPOJË

– Dembeli është nëna e të gjithë veseve. VERI

– I mjeri ai që s’mend0n për pleqëri. SHKODËR

– Kushtrimi del për të ligshtin, pse trimi kujtohet vet. SHKODËR

– Me fal gjakun është burrni. KOSOVË

– Me mirë “punë e mbarë”, se “mirë se të gjej”. SHKODËR

– Sa më shpejt kositet livadhi; aq më shpejt lind bari. TROPOJË

– Ujku e ka qafën e trashë, se ka kambët e shpejta. KRUJË

– Vure vezën more pulën. KRUJË

– Kerkoje punen qe ta gjesh. KUKES

MATURIA
– As copën e madhe mos e ha pa u menduar. KRUJË

– Dijet e mëdha janë në fjalë të shkurtra. SHKODËR

– Lakmia, lakfyt. PUKË

– Lulja e këputun nuk mbin ma. KRUJË

– Më mirë një pulë nesër, se nji vezë sot. DIBËR

– Mos i bjer të mirës me shkelm. DIBËR

– U mbush kupa do të derdhet. KRUJË

– Unë baj barrën, ti djersin. VERI

– Vera sa ma e ëmbël të jetë, ma fort të zenë. SHKODËR

– Nata s’ka shahit. SHKODËR

– Barka mbytet edhe për një lëkurë lepuri. SHKODËR

– Ç’ka humbe mos e kërko, ç’ke në dorë mos e lësho. KRUJË

– Çohet një i marrë e qet një gur në ujë, çohen njëzet të urtë e s’mund ta nxjerrin. SHKODËR

– Duhet me i fry lugës para se me të djeg. KRUJË

– Fusha ka sy, mali ka veshë. KRUJË

– I marri ç’flet nuk din, i urti ç’din nuk flet. VERI

– Kali nuk mbahet për bishti, po prej freri. TROPOJË

– Ka thënë Nastradini, edhe në diell merr ombrellë. SHKODËR

– Kij frikë nga një njeri që frikën ta ka. KRUJË

– Krushka për dhëndrin gjen peshk majë malit. SHKODËR

– Gjumi natës i randë i bën keq ditës. SHKODËR

– E thëna dhe e bëra janë larg. DIBËR

– Nuk është ar gjithë që ndrit. VERI

MIQËSIA
– Armiku s’pritet me fjalë, por me plumb. KRUJË

– Miku është mik deri sa nuk përzihet në hallet e shtëpisë. VERI

– Pa djalë e pa gocë rrova, pa shok nuk rrova. KRUJË

– Punën nuk e bën një gisht, po e bën grushti. TROPOJË

– Tek nusja hanë e pinë, te dhëndrri gja nuk dinë. VERI

– Ankohet kalorësi se po i varen këmbët. VERI

– Çilet dera, rritet ndera. VERI

– Fukara jam, po shpirtin nuk e kam fukara. VERI

– Nga fryn era kthen gëzofin. DIBËR

– Kush shkon pa thirrë, kthen pa u përcjellë. SHKODËR

– Kush vjen rrallë, ha bakllavanë, kush vjen shpesh ha përsheshë. KRUJË

– Miku i thirrur, duhet përcjellun. MIRDITË

– Miku nuk vjen për thelë e lëng, po për fjalë e për kuvënd. KRUJË

– Mikut i lëshohet vendi dhe i dëgjohet kuvendi. KRUJË

insjaderi/ KultPlus.com

“Bëhu fytyra ime” prek në emocionet e vizitorëve të huaj

Posted on by Kult Plus

Në Muzeun e Kosovës vazhdon të jetë e hapur për vizitorë ekspozita “Bëhu Fytyra ime”.

Në qendër të ekspozitës së autores Eliza Hoxha është i vendosur portreti i Vasfije Krasniqi-Goodman, e cila gjeti kurajën të rrëfente krimin që kishte përjetuar nga forcat serbe.

Përveç vendasve, ekspozita është e frekuentuar edhe nga të huajt.

Cornelius Young, turist nga Irlanda, po e viziton Kosovën për herë të dytë. Me të dëgjuar historinë e luftës në Kosovë, Young u bë kureshtar edhe për ekspozitën “Bëhu fytyra ime”.

E ka quajtur të tmerrshme aktin e dhunimit seksual nga serbët.

E për një moment, ai përjetoi edhe emocione.

Edhe sot, përveç Vasfije Krasniqit nuk ka viktima tjera të dhunës seksuale që dolën publikisht për t’u rrëfyer.

Në Kosovë janë mbi 20 mijë viktima të dhunës seksuale nga lufta vitit 1999.

Përderisa viktimat janë pothuajse të padukshme në përditshmëri, kjo ekspozitë ka për qëllim të sjellë copëza të rrëfimeve të tyre derisa vizitorët ftohen t’i vizitojnë ato./ Koha.net/ KultPlus.com

Vasfije Krasniqi-Goodman nesër dëshmon para Senatit dhe Kongresit italian

Posted on by Kult Plus

Aktivistja dhe e mbijetuara e dhunës seksuale në luftën e Kosovës, Vasfije Krasniqi-Goodman, me inicimin e Ambasadorës së Kosovës në Romë, Alma Lama, Krasniqi- Goodman pritet të dëshmojë para Kongresit dhe Senatit italian për dhunimet që kanë ndodhur në Kosovë, transmeton KultPlus

Me datë 26 qershor, Vasfije Krasniqi- Goodman do të pritet nga përfaqësues të Senatit dhe Kongresit të Italisë, ku do të dëshmojë para dy komisioneve për dhunimet që kanë ndodhur në luftën e fundit në Kosovë.

Në dëshminë e saj para këtyre komisioneve, nesër do të janë prezent edhe ish Presidentja Atifete Jahjaga dhe dy deputete të Kuvendit të Kosovës.

Vlen të përmendet se, tashmë znj.Vasfije Goodman nuk përfaqëson vetëm 20 mijë viktimat e dhunës seksuale në Kosovë, por me kurajon e saj, po ndihmon në kauzën ndërkombëtare për të ndaluar përdorimin e dhunës seksuale si mjet lufte./ KultPlus.com

Në kryeqytet së shpejti murale për Rita Orën, Dua Lipën dhe Era Istrefin

Posted on by Kult Plus

Në 3 vjetët e fundit, rruga B në kryeqytet ka pasur një transformim total.

Monotoninë e ndërtesave këtu, e kanë thyer grafitet shumëngjyrëshe të artistëve të ndryshëm.

Vizatimet e llojllojshme po pëlqehen edhe nga qytetarët dhe banorët e kësaj pjese.

Pamje të ngjashme do të marrin edhe disa lagje të Prishtinës.

Në komunën e Prishtinës thonë se shumë shpejt do të filloj edhe realizimi i muraleve për Dua Lipën, Rita Orën dhe Era Istrefi.

Për këtë qëllim tashmë kanë arritur më shumë se 100 artistë të huaj./ Koha.net /KultPlus.com

Filmi “Mommie Dearest” dhe abuzimi me fëmijë nga ylli i Hollywood-it

Posted on by Kult Plus

Filmi i viteve 1981 Mommie Dearest  i bazuar në kujtimet e ditarit të Joan Crawford, shpalos abuzimet e nënës së saj adoptuese, yllit të Hollywood-it Christina Crawford, ku nën ndikimin e alkoolit dhe substancave ë tjera, ushtronte dhunë në Joan-nën, duke e goditur, ofenduar me fjalë dhe detyruar që të pastronte e të gatuante.

Memoari i saj i jetës, në lidhje me kujtimet e abuzimit nga nëna e saj adoptuese, është ndoshta dëshmia e pare e dokumentuar e abuzimit me fëmijë.

Christina Crawford e adoptoi Joan Crawford në vitin 1940, por Joan në kujtimet e saj për Christinan paraqiten plotë dhunë dhe abuzime nga më të ndryshmet.

Mommie Dearest filmi i pare i këtij lloji, që dokumenton abuzimin e fëmijëve nga pikëpamja e një fëmije, ku ndryshoi rrënjësisht përfaqësimin e viktimave dhe ishte një pararendës i fuqishëm të drejtave të viktimave.

Joane, tashmë në të 80-tat, shprehet “Ajo duhej të ishte në burg, duke u akuzuar për vrasje në tentativë.”/ The Guardian/ KultPlus.com

“Kërkoja kuptimin e ekzistencës, përndryshe do të isha i vdekur”

Posted on by Kult Plus

Kur në vitin 1996, Ernesto Sabato do të vizitonte Shqipërinë, shkrimtari argjentinas me origjinë nga arbëreshët e Italisë, do të shprehej më plot gojën: Jam shumë i emocionuar që ndodhem këtu, sepse një e katërta e gjakut tim është shqiptar.

Me prejardhje nga Kalabria e Italisë, i cilësuar si i barasvlefshëm me autorët e mëdhenj Borges, Marquez, Cortazar… atë ditë me re nuk harroi të tregonte se në studion e tij kishte një gravurë veneciane të heroit të madh të shqiptarëve, Gjergj Kastriot Skënderbeut.

Ernesto Sabato – shkencëtari, shkrimtari dhe eseisti i njohur argjentinas, i konsideruar në njëfarë mënyre si Dostojevski i romanit bashkëkohor në gjuhën spanjolle – lindi më 24 qershor 1911, në Rojas, një qytet i vogël në provincën e Buenos Aires. Më i vogli nga dhjetë fëmijët e një familjeje që kishte emigruar nga Italia në fund të shekullit XIX, trashëgoi emrin e një prej paraardhësve, vdekur që herët, gjë që në mendjen e tij, në sytë e prindërve, e bënte të ndihej si një zëvendësues.

Ai bën pjesë tek ajo gjeneratë intelektualësh ndërkombëtarë që kanë kaluar nëpër tragjeditë dhe utopitë e shekullit të kaluar. Doktor në fizikë, i specializuar në industrinë bërthamore – më saktë në laboratorin prestigjoz të Marie Curie – e braktisi shkencën, “neutraliteti moral” i së cilës e trondiste, për të gjetur kësisoj në letërsi mjetet verbale të shprehjes së vuajtjeve të njerëzve.

Ishte vetëm 13-vjeç kur hyri në liceun “La Plata”, ku nuk vonoi të lidhë miqësi me shokë të familjeve anarkiste.

I magjepsur nga romantizmi, nga Novalis (Georg Philipp Friedrich Freiherr von Hardenberg) tek François-Rene de Chateaubriand, nga Heinrich von Kleist tek Gerard de Nerval, për të cilën ruante në brendësi të shpirtit absoluten, ndjenjën e infinitit, do të arrinte drejt matematikës: “Kjo botë e objekteve të përjetshme dhe të pakorruptueshme”!

Për Sabaton, matematika dhe fizika rrjedhin nga ndjenja jonë estetike; ai i vendoste këto kuptime të shpirtit mes krijimeve supreme, të krahasueshme vetëm me muzikën

Iu kushtua me mish e me shpirt fizikës, sapo vuri këmbë në fakultet, rreth vitit 1930. Në të njëjtën kohë, aderoi në Partinë Komuniste e cila, pak vite më vonë, e dërgoi në një mision në Bruksel për të marrë pjesë në Kongresin kundër luftës dhe fashizmit që kryesoi Henri Barbusse.

Kishte planifikuar të shkonte në Moskë, por në platformën e stacionit mori trenin që shkonte drejt Parisit. Ishin pikërisht proceset e para staliniste, krimet e urdhëruara nga “Ati i vogël i popujve” për të vendosur fuqinë e tij, ato që i hapën sytë. I dëshpëruar e me besim të thyer, zbarkoi në kryeqytetin francez, ku e priste mjerimi i bohemisë studentore. Sapo u kthye në Argjentinë, iu akordua bursa e studimit për të punuar së bashku me fizikantët Irene dhe Frederic Joliot-Curie.

“Është e pabesueshme se deri në ç’pikë lakmia, zilia, pretendimi, fodullëku, makutëria dhe, në përgjithësi, i gjithë ky grup atributesh që përbëjnë gjendjen njerëzore, shkëlqejnë në fytyrë, në një qasje, në një vështrim”, shkruante Ernesto Sabato në librin “Tuneli”.

Në vitin 1979 merr titullin Kavalier i Legjionit të Nderit në Francë, ku romani “Engjëlli i errësirës” ishte vlerësuar si libri më i mirë i huaj. Në vitin 1984 merr gjithashtu çmimin “Cervantes”, vlerësimin më të lartë për letërsi në gjuhën spanjolle

Sabato la shkencën dhe iu drejtua letërsisë, në kohën e surealistëve parizianë, në vitet tridhjetë, sepse – siç shprehet autori: “Kërkoja kuptimin e ekzistencës, përndryshe do të isha i vdekur”.

Universi romanesk i Sabatos shënohet nga tensioni midis të keqes dhe të mirës, në sfondin nostalgjik të Buenos Airesit, në kurbë zbritjeje të kufijve të ferrit, që e shtyn lexuesin në një varavingo pasionante midis apologjive dhe kundërshtimeve.

“Nisemi drejt viseve të largëta, kërkojmë natyrën, jemi të etur për njohjen e njerëzve, shpikim qenie imagjinare, kërkojmë Zotin. Dhe pastaj e kuptojmë se fantazma që ndjekim nuk është tjetër veçse vetja jonë”, shkruante personi që e cilësonte veten herë si një “anarkist i krishterë”, herë si një “ateist”.

Mjetet shprehëse të tij po ndryshonin, por kurrsesi çështja midis realizmit dhe metafizikës. Në fund të jetës, kohë pasi kishte humbur bashkëshorten, dashurinë e tij të përjetshme, si dhe djalin, ngushëllimin për pesimizmin e gjeti në rrugën e besimit./ Insjaderi/ KultPlus.com

Akropoli i Athinës rrezikon të shkatërrohet nga përmbytjet e zjarret

Posted on by Kult Plus

Ndryshimet klimatike po kërcënojnë monumentet e lashta greke, e një prej tyre është edhe Akropoli, një prej vendeve arkeologjike më të vizituara në botë.

Zjarret dhe thatësia e madhe janë disa prej kërcënimeve, me të cilat po përballet Athina gjatë viteve të fundit.

Këto kërcënime u bënë të ditura nga ekspertë të ndryshimeve klimatike, që për këtë punë janë përkrahur edhe nga UNESCO, raporton KTV.

Ndotja e ajrit dhe shiu po i gërryejnë monumentet dhe detajet e tyre që i kanë rezistuar kohës, ndërsa moti ekstrem ka çuar te problemet strukturale të mureve të lashta.

Ani pse Akropoli është në një kodrinë, aty ku qëndron edhe tempulli i Panteonit, dhe është një prej vendeve më të ruajtura arkeologjike, prapë ka shenja të ndryshimeve klimatike që kanë pasur efekt në monumente.

Muret e qytetit të lashtë të Athinës po kërcënohen më së shumti nga këto ndryshime klimatike.

Që prej vitit 2004, inxhinierët dhe restauruesit kanë përdorur teknologjinë me laser për të pastruar nga ndotja sipërfaqen e monumenteve të lashta.

Ruajtja e këtyre monumenteve nga ndotja vazhdon të jetë debati kryesor, madje disa prej ekspertëve kanë rekomanduar mbulimin e tempullit me një çati.

Ngritja e nivelit të detit dhe përmbytjet rrezikojnë të shkatërrojnë themelet e qytetit të lashtë dhe çdo vit Greqia ka investuar miliona euro për ruajtjen e tyre.

Pjesa periferike e Athinës vazhdimisht është përballur me përmbytje të mëdha dhe zjarre të shumta. Kryeqyteti shpesh është i mbuluar nga tymi e ndotja e trafikut.Koha.net / KultPlus.com

Një pikturë e Caravaggios shitet para se të dalë në ankand

Posted on by Kult Plus

Piktura “Giuditta e Oloferne”, e mjeshtrit të madh italian Caravaggio, që pritej të dilte në ankand të enjten në Tuluzë, iu dha me një marrëveshje të përbashkët një blerësi të huaj, njoftoi sot shtëpia e shitjeve Labarbe.

“Piktura, e vlerësuar mes 100 dhe 150 milionë euro, do të largohet nga Franca”, thotë në një komunikatë Labarbe.

“Kjo marrëveshje mbulohet nga një angazhim konfidencialiteti për sa i përket çmimit dhe identitetit të blerësit”, thekson shtëpia e ankandeve që kishte zbuluar këtë pikturë në një papafingo të këtij qyteti në jug të Francës/ ATSH/ KultPlus.com

“Gratë, Pasi e kanë transformuar një burrë në qengj, arrijnë gjithnjë ta bindin se është luan”

Posted on by Kult Plus

Disa thënie të veçanta për femrat nga kryevepra e Balzakut, “Komedia njerëzore”.

1-“Thonë se njerëzit janë të egër, edhe tigrat gjithashtu; por, as mizoritë e tigrave, as të nepërkave, as të diplomatëve, as të përfaqësonjësve të ligjës, as të xhelatëve, as të mbretërve nuk mund të krahasohen me dashurinë plot vrer, me ligësinë e ëmbël, me përbuzjen barbare që tregon një femër kundrejt një tjetre, kur njëra e quan veten më të bukur, më të lartë nga fisi e nga pasuria se tjetra, sidomos kur bëhet fjalë për martesë dhe për epërsi; me një fjalë, mizoritë që përmendëm, nuk mund të krahasohen me rivalitetin që kanë gratë midis tyre”.

2-“Gratë, pasi e kanë transformuar një burrë në qengj, arrijnë gjithnjë ta bindin se është luan dhe se ka një karakter të hekurt”.

3-“Ka disa femra që, kur ndahen, venë dhe gjejnë menjëherë një tjetër, shpesh ia rrëmbejnë nga duart dikujt, me gjasa kundërshtares. Këto femra ose e vrasin të dashurin e tyre, fizikisht apo moralisht, ose e degdisin në fund të botës; këto gra i ka rrëmbyer dallga fisnike e pasionit që shfaqet tek to më i fortë se çdo ndjesi drejtësie njerëzore; kjo ka bukurinë e saj. Ka femra të tjera që, kur gjenden ballë përballë me fatkeqësinë e ndarjes, humbjes së një dshurie, ulin kokën dhe vuajnë në heshtje; të gjithë thjesht ecim në rrugën drejt vdekjes, por këto femra ecin drejt saj gjysmë të vdekura, të ndrydhura, qajnë dhe ndihen fajtore, ato luten për njeriun që u shkaktoi dhimbjen dhe e kuptojnë atë deri në çastet e fundit të jetës; kjo është dashuri, dashuria e vërtetë, dashuria e engjëjve, që ka dhimbjen si ushqim dhe prej dhimbjes vdes”.

4-“Rrudhosja e lëkurës është një fakt i pashpjegueshëm, e prapë së prapë i natyrshëm, i cili qysh nga krijimi i botës, i ka hedhur në dëshpërim mjekësinë dhe gratë”.

5-“Ç’i shtyn gratë të shohin në shumë raste vetëm të metat te një njeri i talentuar dhe vetëm cilësitë te një budalla? Sepse ato kanë simpati të madhe për aftësinë e budallait për të qenë pa problem lajkatar, e si i tillë ai i lëvdon gratë pa menduar fare nëse është e vërtetë lëvdata, ai ua fsheh të metat e tyre. Kurse njeriu i talentuar ndjehet superior, për fat të keq ai nuk ia jep askujt kënaqësinë për t’i kompensuar nëpërmjet fjalëve të tij të metat e veta”.

6-“Zemra e një nëne është një humnerë, në fund të së cilës gjendet gjithnjë falja” / Insajderi/ KultPlus.com

Këngëtari i njohur kroat Skoro, kandidat për president

Posted on by Kult Plus

Në zgjedhjet presidenciale të Kroacisë, të planifikuara për në fund të vitit, është regjistruar sot edhe këngëtari Miroslav Skoro, i cili gëzon mbështetjen e së djathtës nacionaliste dhe sovraniste.

Skoro është një nga këngëtarët më të njohur në Kroaci, i njohur për këngët e tij me një sfond patriotik, sidomos ato të krijuara gjatë viteve ’90 gjatë konfliktit të armatosur serbo-kroat.

Tani për tani këngëtari është prezantuar si i pavarur, por është e qartë, se për pak kohë kandidatura  e tij do të do të gëzojë mbështetjen e së djathtës.

I njohur kryesisht si këngëtar, Skoro ka një përvojë politike modeste.

Në të kaluarën ai ishte konsull i Republikës së Kroacisë në Pecs, Hungari, dhe deputet në parlament/ ATSH/ KultPlus.com

Nesër nis revitalizimi i Urës së Terzive dhe asaj të Tabakëve në Gjakovë

Posted on by Kult Plus

Revitalizimi i dy urave me vlerë arkeologjike, turistike dhe kulturore, ajo e Terzive dhe e Tabakëve në Gjakovë, do të nisë nesër.

UNDP njofton se Komuna e Gjakovës, Zyra e Bashkimit Evropian (BE) dhe Programi i Kombeve të Bashkuara për Zhvillim (UNDP) do të fillojnë punimet në revitalizimin e Urës së Terezive dhe Urës së Tabakut, të mërkurën, më 26 qershor, nga ora 14:00 tek Ura e Terezive dhe në 14:45 tek Ura e Tabakëve.

Ky aktivitet bëhet në bashkëfinancim me komunën e Gjakovës dhe është pjesë e projektit Dialogu Ndërkomunitar Gjithëpërfshirës për Ruajtjen e Trashëgimisë Kulturore, të financuar nga Instrumenti i BE-së për Paqe dhe Stabilitet (IcSP / BE) dhe implementuar nga UNDP.

Punimet në këtë projekt, që do të zgjasin tre muaj, përfshijnë: zbukurimin e ambientit përreth urave, krijimin e shtigjeve të reja, vendosjen e ulëseve, elektrifikimin dhe shënimet historike / interpretimin e vendndodhjes.Koha.net/ KultPlus.com

Analizë e filmit “Yesterday”: Gjeniu s’ka lidhje me logjikën!

Posted on by Kult Plus

Komedia e fundit e Richard Curtisit është imagjinatave dhe qesharake – një homazh për grupin The Beatles, shkruan Caryn James. Pjesë të shkrimit të saj.

Richard Curtis i shkruan në mënyrë aq joshëse komeditë romantike – më të njohurat “Four Weddings and a Funeral” dhe “Love Actually” – sa që do të donim që ato të ishin reale. Filmat e tij janë të hareshëm dhe prekës, ndërsa karakteret dhe situatat e tyre janë më interesante se jeta e përditshme.

Filmi “Yesterday” i ka këto cilësi, përveçse këtë herë afera e dashurisë është mes adhuruesve të filmave dhe grupit “The Beatles”. Ndërsa, premisa e çuditshme dhe e qesharake është se një muzikant i pasuksesshëm i rrugëve të Suffolkut, i quajtur Jack Malick, zgjohet një ditë si i vetmi njeri në Tokë që e kujton grupin. Katalogu i krijimtarisë Lennon-McCartney, papritmas është i gjithi i tij.

Aktori Himesh Patel – i cili për audiencat e Britanisë së Madhe njihet nga seria “EastEnders” e që është i panjohur në SHBA – e bën Jackun aq të talentuar sa që shoqja e tij Ellie (Lily James) bëhet menaxhere i tij. Ata nuk e pranojnë simpatinë reciproke, por filmi këtë e bën të qartë për ne.

Kur një ndërprerje e energjisë për pak kohë errëson gjithë botën, Jack goditet nga një makinë dhe shihet në një shtrat spitali. Ditët e mëvonshme, duke mos pasë dhëmbët e përparmë e as pamje tërheqëse, e këndon këngën “Yesterday”. Ellie qan nga ajo këngë e mrekullueshme që supozon se ai shkroi.

Komedia, e mbushur me plot referenca të pop-kulturës, fillon kur Jack përpiqet të zgjidhë konfuzionin. Duke kërkuar “The Beatles” në Google, rezultatet dalin me insekte (disa herë filmi ngacmon me mundësinë që Paul McCartney dhe Ringo Star të shfaqen e ta akuzojnë Jackun për mashtrim). Tash pretendon se muzika e tyre është e tij dhe ecë duke u përpjekur për të kujtuar fjalët e këngës “Eleanor Rigby”.

Komedia kalon një provë vendimtare. Edhe pse reklama e filmit na ofron disa shaka, ato prapë janë qesharake kur shfaqen në ekran. Meera Syal, si nëna e Jackut, ka ritëm të përsosur komik kur me vetëbesim i tregon fqinjit se kënga e re e Jackut quhet “Leave It Be”. Edhe aktorët tjerë mbështetës janë po aq të shkathët dhe të natyrshëm, përfshirë aktorin Sanjeev Bhaskar si babanë e Jackut, dhe aktorin Joel Fry si shokun e tij besnik (Ed Sheeran në film luan një version të vetes, e po ashtu edhe James Corden).

Kur Jack merr një kontratë incizimi që e çon në Los Angeles, Curtis ironizon me drejtuesit dhe këshilltarët kur përpiqen të plasojnë gjeniun e ri në treg. Sheeran sugjeron se “Hey, Dude” (kënga “Hey Jude”) është përmirësim në lirikën origjinale të Jackut. Ndaj, filmi kështu tregon se gjenialiteti nuk ka të bëjë me logjikën.

Çuditërisht për një film të Curtisit, pjesa më e dobët këtu është komploti romantik midis Elliet dhe Jackut. Por, edhe pse romanca çalon, pjesa Beatles te “Yesterday” është mjaft e mjaftueshme për ta mbajtur filmin.

Çdo Krishtlindje, rrjeti Twitter “shpërthen” nga debatet për filmin “Love Actually”, me ata që e adhurojnë dhe të tjerët që mendojnë se është plagë e civilizimit. Por, Curtis gjithmonë ka mbështetur sentimentalizmin duke krijuar skenarë që shkëlqejnë nga zgjuarsia. Ndaj, nëse jeni në mesin e shikuesve që i perceptojnë filmat e tij shumë të ëmbël, gjithçka që mund të shtoj për “Yesterday” është: zgjedhja është e juaja! /Telegrafi/KultPlus.com

Opera “Beatrix Cenci” me protagonist Gëzim Myshketën merr çmimin e madh të kritikës franceze

Posted on by Kult Plus

Sindakata e Kritikës së specializuar Franceze të Teatrit Operas dhe Baletit u mblodh ditën e hënë për të vendosur fituesit e çmimeve të kritikës për vitin 2019.

Me çmimin prestigjoz “GRAND PRIX” u vlerësua shfaqja “Beatrix Cenci” e Operës së Strasburgut me protagonist baritonin shqiptar Gëzim Myshketa.

Mbi këtë shfaqje, premierë absolute franceze, Gazeta online për kulturë KultPlus, ka publikuar disa shkrime në muajt e shkuar.

I kontaktuar nga redaksia e KULTPLUS baritoni shqiptar u shpreh tepër i kënaqur për këtë vlerësim që i bëhet një realizimi teatral ku edhe ai ka kontributin e tij si personazh kryesor në rolin e Kontit Francesco Cenci. Gjithashtu nuk dua të lë pa përmendur ,vijon Myshketa personat që kanë meritën kryesore në këtë sukses, regjisorin e shfaqjes Mariano Pensoti dhe Drejtorin e Orkestrës mjeshtrin Marko Letonja.

Çmimi i Sindikatës së kritikëve Francez është një njohje prestigjoze që në shumë vite ka nderuar artistët dhe shfaqjet më prestigjoze ndërkombëtare/KultPlus.

Filmi i animuar kosovar “N’kornizë” shfaq premierën në Anibar

Posted on by KultPlus

Në Festivalin e Animacionit Anibar që këtë vit organizon edicionin e tij të 10-të, do të shfaqet edhe premiera e filmit të animuar kosovar “N’Kornizë”.

Përveç që është njëri nga filmat e rrallë të animuar të prodhuar në Kosovë, veçantia e këtij filmi është realizimi me tekniken Stop-Motion Animation, pra nuk është një metodë tradicionale e animacionit të vizatimit, por është një teknik kinematografike ku aparati ndalet në mënyrë të përsëritur dhe fillon, për t’i dhënë figurave të animuara përshtypjen e lëvizjes.

Filmi “N’kornizë” i cili do të shfaqet për herë të parë gjatë Festivalit Anibarit është punuar me regji të Gëzim Ramizit, skenar nga Hana Zeqa dhe producent Rron Ismajlin, trajton historinë e një djali të ri që jeton në qytetin imagjinar të Prishtinës. Ai zotëron një dyqan të vogël ku bën korniza që njerëzit përdorin për të dekoruar kujtimet e tyre.

Festivali i Animacionit Anibar këtë edicion mbahet prej 15 deri më 21 korrik në qytetin e Pejës. Më shumë informata rreth filmave dhe programit që do të shfaqet mund ti gjeni në anibar.com.  /KultPlus.com

“Nata e Gretës”, së shpejti në Teatrin “Adriana” në Ferizaj

Posted on by Kult Plus

Pas disa javësh prova, është duke u finalizuar shfaqja “Nata e Gretës” e ndërtuar sipas tekstit të Igmar Villqist.

Në këtë dramë psikologjike, jashtëzakonisht të rëndë, peshën e roleve shumë komplekse do ta bartin dy aktoret e njohura: Gresa Gashi e Arjola Demiri, kurse regjisor i shfaqjes është Ben Apolloni, I cili ka bërë edhe kostumet dhe skenografinë.

“Nata e Gretës” rrëfen historinë e një vajze me zhvillim të vonuar, e cila është rritur nga një grua që ka humbur gjithçka në jetë dhe kur regjimi nazist fillon t’i mbledhë dhe djegë llojin e njerëzve çfarë është Greta, kinse për të pastruar racën, gruaja vendos që me çdo kusht ta mbroje vajzën që mos të bie në duar të vrasësve nazist. Shfaqja është përplot situata dramatike, komike e tragjike.

“Nata e Gretës” është shfaqje që prekë thellë në ndërgjegjën e njerëzimit. Premiera e shfaqjes do të jetë me 1 korrik, në Teatrin “Adriana” në Ferizaj, kurse me 2 korrik do të pasoje edhe repriza e parë. Ky projekt teatror është mbështetur nga Komuna e Ferizajt.

“Gjenerali …” i Kadaresë ndër 100 librat e shekullit

Posted on by Kult Plus

‘100 librat e shekullit’ është një renditje e librave që konsiderohen si librat më të mirë të shekullit realizuar përmes një sondazhi nga Fédération Nationale d’Achats des Cadres dhe gazeta pariziene Le Monde.

Duke filluar me një listë paraprake me 200 tituj të përpiluar nga librashitësit dhe gazetarët, 17,000 francezë votuan duke iu përgjigjur pyetjes, “Cili libër ka mbetur në kujtesën tuaj?” (« Quels livres sont restés dans votre mémoire ? »).

Lista e titujt e pretenduar përmban romane, poezi, drama të mirënjohura si dhe libra me figura komike. Pesëdhjetë titujt e parë të listës ishin subjekt i një eseje nga Frédéric Beigbeder, Iventari i fundit para shkatërrimit, në të cilën ai bujshëm tërhoqi vëmendje me karakterin e tij francez të përqendruar.

Në këtë listë gjendet ne vendin 81-të romani i famshëm i Ismail Kadare, ‘Gjenerali i ushtrisë së vdekur’.

Image

Genc Prelvukaj e Aurela Gaçe publikojnë “Adrenalinë” (VIDEO)

Posted on by KultPlus

Genc Prelvukaj dhe Aurela Gaçe kanë bashkuar forcat për të sjell një hit veror me titull “Adrenalinë”, shkruan KultPlus.

Kënga është realizuar nga vetë Prelvukaj i cili gjithashtu është përkujdesur edhe për tekstin e këngës.

Ajo është incizuar në “Black Fish Studios & United Records”. Ndërsa videoklipin e ka realizuar “Black Fish Entertainment”.

Kënga ka marrë kritika të mira menjëherë pas lansimit dhe pritet të jetë një hit veror. Përndryshe të dy artistët ndara tashmë kanë rezervuar data të shumta për koncerte verore në vende të ndryshme edhe jashtë Kosovës ku do të keni rastin t’i përcjellni e t’i dëgjoni këngët e tyre me performanca të shkëlqyera gjë për të cilën edhe njihen të dy artistët në fjalë. / KultPlus.com

Ali Podrimja, Robert Elsie e Jusuf Buxhovi në një fotografi

Posted on by KultPlus

Jusuf Buxhovi ka ndarë një fotografi të vjetër me ndjekësit e tij. Në këtë fotografi shihet bashkë me Ali Podrimja e Robert Elsie, shkruan KultPlus.

Buxhovi ka treguar edhe historinë e kësaj fotografie. Më poshtë po e sjellim postimin e plotë të Buxhovit.

Nga albumi i kujtimeve të paharrueshme:
Me miqt e penës: Ali Podrimja dhe Robert Elsi, në Gjermani, në vitin 1997, nga koha e madhe kur,si çdo gjë tjetër, edhe krijuesit dhe krijimtaria e tyre i nënshtrohej kauzës së lirisë, për ç’gjë, vargu i Podrimjes, “Kosova është gjaku ynë që nuk falet”, u kthye në betim të saj.( Foto. S. Gashi). /KultPlus.com