Detina Zalli, e cila është asistente në Universitetin e Kembrixhit, së fundi ka dhënë një intervistë për gazetaren amerikane në Mbretërinë e Bashkuar, Trisha Goddard në të cilën ka rrëfyer tmerrin e largimit nga Shqipëria gjatë vitit në vitin 1999, kur Shqipëria po përjetonte Krizën Piramidale, transmeton KultPlus
Zalli, shpjegon se gjatë kësaj kohe në Shqipëri, të gjithë madje edhe fëmijët mbanin një armë me vete, e kjo e bënte shumë të vështirë jetesën.
“Ne kemi kaluar në kohë shumë të vështira në vitin 1997. Në atë kohë unë isha vetëm 9 vjeç dhe nuk kisha dëgjuar kurrë më parë për Universitetin e Harvardit, të Kembrixhit apo të Oksfordit, as nuk e dija që ekzistojnë sepse shqetësimi i shpirtit tim ishte ta gjeja babanë tim të gjallë sepse frikësohesha që ai mund të jetë qëlluar rrugës për në shtëpi, kështu që kam dalë nga shtëpia fshehurazi në mes të natës, mes të plumbave dhe granatave vetëm për ta gjetur atë sepse siç thuhet “S’ka frikë më të madhe për një fëmijë sesa humbja e një prindi”, rrëfen Zalli, e cila më tutje shpjegon se edhe shokët që dikur lunate me ta, atë kohë mbanin armë me vete e që e pamundësonte qëndrimin me ta.
E gjithë kjo vështirësi, e kishte bërë familjen Zalli që ta mendojnë largimin nga Shqipëria përmes rrugëve ilegale.
“Fillimisht babai ynë ra në kontakt me një doktor në Shqipëri i cili e kishte siguruar babanë tim që ishte një rrugë që qonte njerëzit nga Shqipëria për në Britaninë e Madhe përmes airoplanit, pra ne duhet të paguanim 12,000 dollarë, të cilat ne nuk i kishim, e që babai im u detyrua t’i marrë hua nga 12 njerëz për pesë ditë e që ishte një detyrë shumë e vështirë dhe pasi ne i dhamë paratë, plani ndryshoi dramatikisht, ne mësuam që doktori ishte pjesë e një grupi mafioz dhe kur ne shkuam në aeroport për të udhëtuar për një Mbretërinë e Bashkuar na thanë që të shkojmë në shtëpi sepse s’ka një udhëtim të tillë përderisa na i kishin drejtuar armët”, deklaron Zalli.
Ajo thotë se familja e saj u detyroua që të merrte rrugën për në Itali, në fillim ishte e planifikuar që të udhëtonin me anije të shpejta por më pas plani ndryshoi dhe ata udhëtuan me traget, e nga aty mund të shkonin për në Milan e Paris me tren.
“Ne fillimisht ishim në Paris dhe atje na thanë që rruga e vetme ishte të udhëtonim për në Bolonja dhe mënyra e vetme për të shkuar ishte përmes kamionëve. Ajo ishte si skenë filmi, ti duhej të ishe shumë i përgatitur për të udhëtuar me kamion. Të gjitha veprimet bëheshin gjatë natës, dhe të fshiheshe prapa pëlhurave të kamionit për t’I ikur policisë franceze. Ishte shumë e frikshme por ne duhej ta realizonim këtë udhëtim për të ikur sepse s’kishim zgjidhje tjetër, sepse ata na kishin marrë paratë dhe s’kishte mundësi kthimi.”, thotë Detina Zalli, duke rrëfyer tmerrin dhe frikën që kanë përjetuar gjatë asaj ikje.
Por, Zalli shpjegon që jeta e tyre ndryshoi komplet pasi shkuan në Angli, sepse atje meqë ajo dhe motra e saj kanë pasur njohuri për gjuhën angleze ka qenë më e lehtë pavarësisht vështirësive që jeta prej refugjati ofron.
Më pas ajo tregon se për të siguruar jetesën e familjes së tyre ato janë veshur me taka për t’u dukur më të mëdhaja në mënyrë që të mund të punojnë.
E gjithë historinë e tyre, binjaket Zalli e kanë shfrytëzuar për të punuar më shumë, e çka e dëshmojnë edhe me arritjet që ato tani i posedojnë.
“Kam bërë disa vite hulumtime shkencore, kam pasur rastin të punoj me shumë laureatë të çmimit Nobel, kam punuar në Universitetin e Harvardit, tani jam në Kembrixh, po ashtu jam themeluese e organizatës “Ëe speak Science”, po ashtu kam bërë shumë bashkëpunime në fushën e biologjisë”, thotë Zalli, e cila po ashtu thekson se bashkë me motrën e saj kanë hapur një qendër bamirësie për njerëzit që vuajnë nga kanceri e të cilën e kanë titulluar ‘Afërdita ime’.
Ndërkaq, historinë e tyre, Detina dhe Argita Zalli do ta publikojnë në librin ‘Good Morning, Hope’ I cili do të promovohet më 7 mars 2023 në Amerikë./ KultPlus.com
Më poshtë mund të shihni intervistën e plotë të Detina Zallit:
