Kim Kardashian arriti në Met Gala 2022 në Nju Jork të hënën e veshur me fustanin e Marilyn Monroe. Këtë fustan aktorja Monroe e kishte veshur kur këndoi për presidentin amerikan John F Kennedy për ditëlindjen e tij në 1962.
Met Gala, e njohur për listën e të ftuarve të profilit të lartë dhe paraqitjet ekstravagante, shënoi hapjen e ekspozitës vjetore të modës në Institutin e Kostumeve të Muzeut Metropolitan të Artit.
Paraqitja e Kardashian erdhi si “gjëja më amerikane që mund të mendoni”.
“Dhe kjo është Marilyn Monroe”, tha ajo për Vogue. “Për mua, momenti më i madh i Marilyn Monroe është kur ajo i këndoi JFK-së Happy Birthday”.
CECIL STOUGHTON/AP/SHUTTERSTOCK
Transformimi i Kardashian në Monroe për tapetin e Met Gala-s mori vëmendje të madhe.
Përveç veshjes, Kardashian bëri edhe një ndryshim fizik. Përveç zbardhjes së flokëve, Kardashian tha se humbi 7 kg në më pak se një muaj për t’u përshtatur me fustanin.
“Ishte një sfidë e tillë,” tha ajo. “Ishte si një rol. Isha e vendosur ta përshtatja këtë. Vishja një kostum sauna dy herë në ditë, vrapoja në rutine, heqja plotësisht sheqerin dhe të gjitha karbohidratet dhe haja vetëm perimet dhe proteinat më të pastra.”
Marrja e fustanit ishte gjithashtu një sfidë. Ai ishte shitur në vitin 2016 për 4.8 milionë dollarë dhe mban rekordin për veshjen më të shtrenjtë të shitur në ankand, siç raportohet nga Vogue.
AP/SHUTTERSTOCK
E ruajtur zakonisht në një kasafortë të kontrolluar nga temperatura në muzeun e Ripley’s Believe It Or Not në Orlando, Florida, fustani u transportua në shtëpinë e Kardashian në Calabasas, Kaliforni me aeroplan privat dhe i shoqëruar nga roje.
Ajo u ngjit në tapetin e kuq me fustanin miliona dollarësh, në krye me një shall të bardhë gëzofi. Me flokët e saj të sapozbardhur të futur në topuz, ajo pozoi pranë partnerit të saj, Pete Davidson. Aktori i humorit kishte veshur një kostum të zi dhe syze dielli.
Kur u vesh nga Monroe në vitin 1962, fustani – i dizajnuar nga Jean Louis bazuar në një skicë të Bob Mackie – bëri bujë.
“Në ditët e sotme të gjithë veshin fustane të tejdukshme, por atëherë nuk ishte kështu”, tha Kardashian për Vogue. “Në njëfarë kuptimi, është fustani origjinal i zhveshur. Kjo është arsyeja pse ishte kaq tronditëse.” / Vogue / KultPlus.com
Më 3 maj të vitit 1877, në Janinë, nën kryesinë e Abdyl bej Frashërit, u formua Komiteti i Janinës.
Qëllimi i komitetit ishte mbrojtja e tokave shqiptare nga rreziku i copëtimit nga shtetet fqinje.
Komiteti i Janinës vendosi lidhje edhe me qarqet politike që vepronin në viset e tjera të atdheut, me të cilat shqyrtoi çështjen e përgatitjes së kryengritjes së armatosur. Në të njëjtën kohë ai ra në kontakt me oficerët shqiptarë që shërbenin në garnizonet osmane të vendit dhe që treguan gatishmëri për të marrë pjesë në kryengritjen e armatosur. Pas kësaj, shqetësimi kryesor i Komitetit u përqendrua në aspektin diplomatik të çështjes shqiptare.
Udhëheqësit e Komitetit të Janinës ishin të ndërgjegjshëm se qeveria greke nuk do të hiqte dorë aq lehtë nga qëndrimi i saj i vjetër, nuk ishte e prirur që të pranonte kërkesën e shqiptarëve për të përfshirë në shtetin e tyre krejt Shqipërinë e Jugut deri në Prevezë, sepse ishte pushtuar nga lakmia për të aneksuar krejt vilajetin e Janinës, deri te lumi Seman. Megjithatë ata shpresonin se përballë gjendjes kritike që ishte krijuar për Greqinë nga përparimi i ushtrive ruse, Athina mund të hiqte dorë nga platforma që kishte parashtruar vitin e kaluar dhe do ta shikonte me një sy realist propozimin e shqiptarëve./ Diaspora shqiptare/ KultPlus.com
Për disa ditë çdo vit, në një livadh në Mal të Zi, mund të shihet uji që buron nga trungu i një mani 100-vjeçar.
Fenomeni natyror në fshatin Dinoshë është një pamje spektakolare dhe e pazakontë për ata që kanë fatin ta dëshmojnë atë.
Ky fenomen natyrorë është bërë lajm edhe në mediat botërore.
Banorët e fshatit nuk kanë ndonjë shpjegim specifik se pse ndodh ky fenomen, por sipas tyre është një pamje e mahnitshme e cila e shndërron pjesën rreth trungut në një liqe të vogël. / KultPlus.com
Arkivi Qendror Shtetëror i Filmit ka njoftuar se kinemaja e institucionit do të jetë në dispozicion të publikut për shfaqje në ekranin e madh të filmave në ditët dhe oraret e kërkuara nga publiku duke filluar nga e premtja, datë 6 maj 2022.
Programi ‘KINOJONË’ do të nisë me shfaqjen e filmit ‘Vdekja e Kali’ (Saimir Kumbaro 1992) në versionin e tij dixhital të restauruar, një shfaqje që ndodh paralelisht me shfaqjen në arte.tv (mars-qershor 2022), platformë që promovon kinematografinë europiane dhe që e ka shtrirjen territoriale në vendet e EU, EFTA, UK dhe Zvicër. Duke qenë se arte.tv nuk e mbulon territorin shqiptar dhe filmi i restauruar ‘Vdekja e kalit’ nuk mund të shihet nga publiku në Shqipëri, AQSHF do ta verë atë në dispozicion të publikut me shfaqje në sallën e kinemasë në AQSHF.
“Jemi të lumtur që arti dhe kultura mund të kapërcejnë kufijtë që vendos gjeopolitika dhe jemi krenarë që kinematografia shqiptare është tashmë pjesë e kinematografisë europiane duke u promovuar krahas 19 vendeve të tjera në programin ArteKino Classics në arte.tv.”, thuhet në njoftim.
‘Vdekja e Kalit’ (Saimir Kumbaro 1992), shfaqje e versionit të restauruar me introduksion mbi restaurimin dhe prezantime videosh para dhe pas restaurimit vjen më datë 6 maj në ora 18:00. Në këtë ngjarje do të jenë të pranishëm edhe artistët dhe autorët e filmit.
Në njoftim është bërë e ditur që çdo ditë pas datës 6 maj 2022, ju mund të dërgoni kërkesën tuaj për shfaqje në adresën [email protected] duke lajmëruar titullin e dëshiruar nga fondi i AQSHF-së si dhe datën dhe orarin e parapëlqyer. Stafi i AQSHF-së do t’ju kontaktojë për konfirmimin. / KultPlus.com
3 Maji është Dita Botërore e Lirisë së Shtypit. Kjo ditë shënohet që nga viti 1993 e vendosur nga Asambleja e Përgjithshme e Kombeve të Bashkuara, e cila shërben për t’ua përkujtuar qeverive nevojën e respektimit të përkushtimit të tyre për lirinë e shtypit dhe po ashtu është një ditë reflektimi në mesin e profesionistëve të mediave për lirinë e shtypit dhe etikën profesionale, shkruan KultPlus.
Sipas organizatës “Reporterët pa Kufij” mbi gjendjen e lirisë së mediave për vitin 2021, Kosova ka shënuar përparim sa i përket lirisë së mediave.
Në këtë indeks, Kosova sivjet radhitet në pozitën e 61-të, në krahasim me pozitën e 78-të, që ka mbajtur në vitin 2021.
Me rastin e shënimit të kësaj dite, Asociacioni i Gazetarëve të Kosovës (AGK) do të mbajë sot një konferencë për media. (Para Qeverisë së Kosovës, ora 11:00)
3 maji është po ashtu dita e përkujtimit të atyre gazetarëve që e kanë humbur jetën në ndjekje të së vërtetës dhe raportimit profesional. / KultPlus.com
“The Telegraph” mendon se qyteti më i mirë në botë ndodhet në Spanjë. Gazeta britanike, në rubrikën e saj të udhëtimeve, ka zgjedhur Barcelonën për diellin, distancën nga aeroporti, hotelet me pesë yje, restorantet me yje Michelin dhe plazhet.
“Barcelona kombinon gjithçka që është më tërheqëse në qytetet mesdhetare, me ndikimin kulturor dhe dizajnin e qyteteve në veriun e ftohtë”, lexohet në “The Telegraph”.
“Barcelona ka plazhe spektakolar, ku mund të argëtohesh dhe të bësh sporte në mëngjes, pasdite dhe natë. Vlen të përmenden gjithashtu 19 restorantet me yje Michelin dhe 39 hotelet me pesë yje, dhe se aeroporti ndodhet vetëm 11 kilometra nga qendra e qytetit, i lidhur shumë mirë me autobus, metro dhe tren”, shton tabloidi.
Barcelona ka marrë 588 nga 810 pikët e mundshme në kategori si oferta kulturore, histori, arkitekturë, gastronomi apo siguri, 32 pikë mbi qytetin e renditur në vendin e dytë, që është Sidnej.
Në vendin e tretë në klasifikim është Kejp Taun, në të katërtin Lisbona dhe në të pestin Venecia. / KultPlus.com
Periudha e pandemisë ka qenë vërtetë e vështirë për një vend që më së shumti bazohet tek turizmi. Por Vietnami tashmë ka një atraksion të ri për të gjithë ata që po përfitojnë nga rihapja e kufijve.
Bëhet fjalë për “Kuçedrën e Bardhë, siç e kanë quajtur urën prej xhami që është ndërtuar së fundmi në rajonin Bach Long.
Ura është e gjatë 632 metra, dhe ndodhet rreth 150 metra nga toka, në një terren ku xhungla fsheh kafshë dhe rreziqe të shumta, duke i ofruar atyre që kalojnë një eksperiencë të papërshkrueshme dhe plot adrenalinë.
Ndërtuesit deklarojnë se ura është më e gjata në botë e këtij tipi, pra me xhamin që të jep më shumë ndjesinë e fluturimit sesa të ecjes.
Ura, që mund të mbajë deri në 450 persona njëkohësisht, mendohet si një atraksion për të gjithë zonën. /A2CNN / KultPlus.com
Presidenti i Ukrainës, Volodymyr Zelensky do të mbajë një fjalim ditën e sotme në Kuvendin e Shqipërisë përmes një video-mesazhi me ligjvënësit shqiptarë.
Lideri ukrainas pritet të flasë për situatën në vend dhe nevojën për më shumë mbështetje humanitare dhe armatime për të cilat ka nevojë ushtria në përballimin e hordhive ruse.
Fjala e Zelenskyt në Kuvendin e Shqipërisë pritet të mbahet rreth orës 13:00 dhe jo në orën 11:00 nga sa ishte paralajmëruar më herët.
Fjalime të ngjashme, presidenti i Ukrainas ka mbajtur në shumë parlamente të botës që nga nisja e ofensivës ruse më 24 shkurt. / KultPlus.com
Platforma e transmetimit Netflix Inc (NFLX.O) tha të dielën se kishte vendosur të ndalonte punën në serialin familjar të Meghan Markle “Pearl”, transmeton KultPlus.com
Heqja dorë nga disa projekte, përfshirë atë të Markle, ishte pjesë e vendimeve strategjike për prodhimin e serialeve të animuar, tha kompania në një deklaratë, pa dhënë detaje të mëtejshme mbi vendimin e saj.
Archewell Productions, kompania e krijuar nga Markle dhe bashkëshorti i saj, Princi Harry, tha vitin e kaluar se ajo do të ishte një producente ekzekutive e “Pearl”. Seriali do të përqendrohej në aventurat e një vajze 12-vjeçare e cila është frymëzuar nga gra me ndikim të historisë.
Çifti njihet zyrtarisht si Duka dhe Dukesha e Sussex.
Netflix gjithashtu vendosi të mos ecë përpara me dy serialet e animuar për fëmijë “Dino Daycare” dhe “Boons and Curses”.
Vendimi për të anuluar këto shfaqje vjen pasi Netflix raportoi një humbje prej 200,000 abonentësh në tremujorin e parë, duke rënë shumë larg parashikimit të tij për të shtuar 2.5 milionë abonentë. Pezullimi i shërbimit në Rusi pas pushtimit të Ukrainës mori një dëm, duke rezultuar në humbjen e 700,000 anëtarëve./ KultPlus.com
Kosova ka shënuar përparim sa i përket lirisë së mediave, tregon Indeksi i Lirisë së Shtypit Botëror, i publikuar nga organizata Reporterët pa Kufij.
Në këtë indeks, Kosova sivjet radhitet në pozitën e 61-të, në krahasim me pozitën e 78-të, që ka mbajtur në vitin 2021.
Trendi i rritjes vjen pas rënies që ka shënuar vitin e kaluar – për tetë pozita – në krahasim me renditjen e vitit 2020.
Por, edhe përkundër përparimit, Kosova vazhdon të mbetet në mesin e vendeve me “situatë problematike”, siç e vlerësojnë Reporterët pa Kufij.
Në këtë kategori radhiten edhe vendet e tjera të Ballkanit Perëndimor, si: Shqipëria, Maqedonia e Veriut, Serbia, Mali i Zi dhe Bosnje e Hercegovina.
Prej tyre, ngjashëm si Kosova, përparim kanë shënuar: Maqedonia e Veriut në pozitën e 57-të nga 90; Serbia në pozitën 79 nga 93 dhe Mali i Zi në pozitën 63 nga 104.
Shqipëria ka pësuar përkeqësim – nga pozita 83 ku ka qenë vitin e kaluar, në pozitën 103.
Ngjashëm edhe Bosnje e Hercegovina: vitin e kaluar ka qenë në pozitën 58, sivjet në 67.
Situata në Evropë
Raporti i Reporterëve pa Kufij vjen në Ditën Botërore të Lirisë së Shtypit, që shënohet çdo 3 maj.
Raporti vlerëson gjendjen e gazetarisë në 180 vende dhe territore të botës.
Në Evropë, sipas raportit, Norvegjia mbetet në krye të Indeksit Botëror të Lirisë së Shtypit, por, megjithatë, ka pabarazi të konsiderueshme.
Estonia dhe Lituania – dy ish-shtete komuniste – janë tani në dhjetëshen e parë, ndërsa Holanda nuk është më.
Greqia, ndërkaq, ka zëvendësuar Bullgarinë në vendin e fundit në Evropë.
Këto zhvillime dhe pabarazi pasqyrojnë tri tendenca kryesore, thuhet në raport.
E para: vrasja e gazetarëve. Raporti përmend në mënyrë specifike vrasjen e gazetarëve: Giorgios Karaivaz në Greqi dhe Peter R. De Vries në Holandë, në vitin 2021.
“Përgjegjësit për vrasjen e Daphne Caruana Galizias në Maltë dhe të Jan Kuciakut në Sllovaki, para vitit 2020, nuk janë dënuar ende”, thuhet po ashtu në raport.
Duke përmendur arsyen e dytë të gjendjes në kontinent, raporti thotë se gazetarët – të barazuar gabimisht me qeveritë – janë përballur me armiqësi nga protestuesit, që kanë kundërshtuar masat kundër koronavirusit.
“Në Gjermani, Francë, Itali dhe Holandë, gazetarët janë sulmuar fizikisht, ndërsa janë përballur me fyerje dhe kërcënime të të gjitha llojeve në të gjithë kontinentin”, thuhet në raport.
Arsyeja e tretë, sipas raportit, është se disa qeveri të Bashkimit Evropian dhe të vendeve fqinje, kanë ashpërsuar ligjet kundër gazetarëve, sidomos në Slloveni, Poloni, Hungari, Shqipëri dhe Greqi, por aty nuk jepen detaje se për cilat ligje është fjala.
Pesë vendet e fundit në listën e Reporterëve pa Kufij, ku situata me të bërit gazetari konsiderohet si “shumë serioze”, janë: Koreja e Veriut, Eritrea, Irani, Turkmenistani dhe Mianmari./REL / KultPlus.com
Ti je e lodhur, (mendoj) nga ky mister i vazhdueshëm i të jetuarit e vepruarit. Edhe unë.
Ndaj, eja me mua të ikim larg e më larg- (veç unë dhe ti, kupton!)
U argëtove, (mendoj) dhe i bëre copë e çikë lodrat e tua më të shtrenjta, e tani disi e lodhur je; E lodhur nga gjërat që thyhen, dhe- Thjesht e lodhur. Edhe unë.
Por sonte vij me një ëndërr në sytë e mi, dhe trokas me një trëndafil në portën e pashpresë të zemrës sate- Hapma! Do të të rrëfej për vende që Askush s’i di, e nëse do, vendin e përsosur për të marrë një sy gjumë.
Ah, eja me mua!
Hënën do ta shfryj, atë bulë të mrekullueshme, që kurdoherë pluskon dhe një ditë; do t’këndoj këngën e zymbylit të yjve të mundshëm;
Do kuturis nëpër stepat e qetë të ëndrrës derisa të gjej Lulen e Vetme që do ta ruajë (mendoj) zemrën tënde të vogël kur hëna del nga deti.
Hakmarrja është një nga temat qendrore në traditën narrative norvegjeze. Synimi i saj ishte të rivendoste nderin e nëpërkëmbur të një personi apo të familjes së tij. Nëse një fyerje nuk ndiqej nga një reagim hakmarrës, kjo sjellje nënkuptonte përjashtimin e dikujt nga shoqëria e lashtë norvegjeze.
Historia e princit viking Almet (Amlóði në norvegjishten e vjetër), është një nga rrëfimet e shumta që përqendrohen tek hakmarrja e pamëshirshme e një personazhi, pavarësisht nga rreziqet që përfshin ajo. Diçka e tillë është mjaft e njohur në kulturën norvegjeze, pasi për të ka aludime të shumta në burimet mesjetare.
I vetmi version i plotë i ruajtur nga periudha mesjetare, është ai i treguar nga kleriku danez Sakso Gramatikus në veprën e tij monumentale “Veprat e danezëve” (Gesta Danorum), e cila u shkrua në latinisht në fillimin e shekullit XIII 13-të.
Ky tekst përmbledh gjithçka që Sakso dinte për historinë e Danimarkën, dhe më gjerësisht për Skandinavinë, për sa kohë jetoi. Ajo që ai shkroi, ka të ngjarë të jetë bazuar tek realiteti. Por studiuesit bien dakord se pjesa e parë e veprës së tij, është një koleksion mitesh dhe legjendash, më shumë se sa diçka që kishte të bënte me historinë.
Heronjtë e tregimeve që përmend Sakso në veprën e tij, përfshijnë luftëtarët e mirënjohur Ragnar Lotbrok (ose Lodbrok) dhe Latgerta (i njohur më shpesh si Lagerta për fansat e serialit televiziv Vikingët), si dhe perëndi norvegjeze dhe krijesa mitike.
Sakso i kushton një hapësirë të madhe rrëfimit mbi Amletin. Ashtu si edhe tek drama “Hamleti” e Uilliam Shekspirit, babai i princit të ri vritet nga xhaxhai i tij Fengi (Klaudi tek vepra e Shekspirit). Më pas, xhaxhai martohet me të venë e vëllait të tij, Mbretëreshën Geruta(Gertrud tek Hamleti), ndërsa Amlet shtiret si i çmendur dhe qëndron pranë vatrës, zhgërryhet në dyshemenë e pisët duke thënë fjali enigmatike që i futin të gjithë në mendime.
Shumë shpejt mësojmë se sjellja e tij e çuditshme, është një hile për të krijuar tek Fengi dhe oborrtarët e tij idenë e rreme sikur ishte çmendur, ndërkohë që fshehurazi bën plane për t’u hakmarrë për vdekjen e babait të tij.
Pjesa tjetër e tregimit përshkruan luftën për pushtet mes xhaxhait dhe nipit. Fengi përpiqet ta heqë qafe Amletin në mënyra të ndryshme, por nipi i tij në çdo rast tregohet shumë i kujdesshëm. Dhe në fund krijohet mundësia që Amleti të hakmerret.
Përpara se të vrasë xhaxhain e tij, ai kap edhe oborrtarët e Fengit dhe i djeg të gjithë brenda sallës, duke arritur kështu të marrë fronin. Përgjatë rrëfimit të Saksos, në pjesën më të madhe të veprës i bëhet një gjykim i madh moral Fengit – i cili vrau vëllain për shkak të ambicieve që kishte ndaj tij – si dhe ndaj atyre që e përkrahnin atë.
Personazhi kryesor i veprës Amleti u mban një fjalim të gjatë danezëve, se pse e kishin lejuar veten të sundoheshin nga një mbret kaq inferior. Ai gjithashtu i hakërrehet nënës së tij për humbjen e dinjitetit dhe prestigjit, pasi ajo u martua me njeriun që i kishte vrarë bashkëshortin.
Metoda e Amletit për t’`u shtirur si i çmendur në versionin që rrëfen Sakso është e pazakontë. Por tregimi ka detaje dhe tema të përbashkëta me tekstet e tjera norvegjeze. Vrasja e të afërmve, sallat e djegura, dhe i riu që qëndron i turpëruar pranë vatrës, gjenden të gjitha në sagat nordike.
Edhe saga islandeze, Gisla, përfshin një skenë në të cilën heroi i historisë pretendon sikur është budalla për t’u shpëtuar armiqve që e ndjekin. Ajo që haset më së shumti në tregimet norvegjeze, është perceptimi se njerëzit gjithnjë kanë një plan të zjarrtë hakmarrjeje, të cilin e mbartin për periudha shumë të gjata, madje edhe vite, përpara se ta vënë atë në zbatim.
Sipas, “History Extra”, ai mund të jetë personi të cilit i është bërë një padrejtësi, por në pjesën më të madhe është figura rrëqethëse e nënës, ajo e cila nxit djalin apo një mashkull që qëndron pranë saj, për t’u hakmarrë në momentin e duhur.
Në sagën Laksdela, është nëna ajo e cila u kujton bijve të saj detyrën e marrjes së hakut tëbabait të tyre sapo të jenë mjaftueshëm të rritur, pra shumë vite pas vrasjes së tij. Në veprën e tij, Sakso zgjedh që mos t`i kushtojë shumë rëndësi personazhit të nënës së Amletit, duke mos e sjellë herë pas here në vëmendjen e lexuesit dhe duke e përmendur rrallë.
Autorët e teksteve mesjetare norvegjeze dhe filmi “The Northman” (Njeriu i Veriut), trajtojnë rolin që luanin gratë në nxitjen e ciklit të gjakderdhjes, dhe atë çka sillte detyrimi për të marrë hak me çdo kusht. Këto histori të vrasjeve të të afërmve, ku hakmarrja është një temë kaq qendrore, pasqyrojnë strukturën shoqërore norvegjeze gjatë epokës së vikingëve.
Familja ishte njësia shoqërore bazë, dhe nuk kishte shtet apo polici që të vendoste paqen. Ndaj njerëzit ishin në mëshirë të njëri-tjetrit për të mbetur gjallë dhe për të pasur siguri. Që të parandalonin grindjet mes tyre, familjet krijuan lidhje të ndërsjella përmes aleancave dhe martesave të përziera.
Megjithatë, këto lidhje nuk u ruajtën gjithmonë, sidomos kur hynë në lojë emocionet universale si lakmia dhe xhelozia. Filmi “The Northman”, me regji të Robert Egers dhe bashkë-skenar të Egers dhe shkrimtarit islandez Sjon, është një realizim spektakolar për dashamirësit e filmave dhe historisë.
I xhiruar në shumë vende historike, dhe me një kostumografi dhe skenografi që i kushton një vëmendje të jashtëzakonshme detajeve historike, ai tregon historinë e princit legjendar viking Amlet. Në film, Amleti (Aleksander Skarsgard) bëhet dëshmitar i vrasjes së babait të tij, mbretit viking Orvandil (Etan Houki), nga xhaxhai i tij Fjolnir (Klaes Bang).
Ai arrin që të arratiset dhe rritet diku larg për t’u bërë vetë viking. Por e braktis këtë jetë për të marrë hak për të atin, dhe për të shpëtuar nënën e tij Mbretëreshën Gudrun (NikolKidman). Por Amleti zbulon se misioni i tij i hakmarrjes, nuk ishte edhe aq i lehtë sa mendonte.
Filmi përshkruan pengesat që ai has në synimin e tij, të vendosura përkundër botëkuptimit të dallueshëm të vikingëve, mënyrave të jetesës dhe ritualeve të tyre të veçanta. Në vend të botës mitiko-legjendare të Sakso, filmi është vendosur në një kontekst të njohur të shekullit X-të.
Pas vrasjes së babait të tij, Amleti bashkohet me një grup luftëtarësh vikingë dhe shkon në Rusi (Ukrainën dhe Rusinë e sotme). Fati i Gudrun dhe Fjolnir merr një kthesë dramatike menjëherë pas vrasjes së Orvandil, që më pas pasohet nga pushtimi i mbretit norvegjez Harald, kohë në të cilën atyre u duhet të largohen nga mbretëria e tyre, e cila ishte në një ishull në veri të Skocisë.
Ata përfundojnë në Islandë, ku fillojnë të jetojnë si fermerë, ndërkohë që kërkoheshin nga Amleti. Personazhi Amlet i Sakso, ngjitet triumfalisht në fron pas vdekjes së xhaxhait të tij, dhe detyra e tij e parë ishte të qortonte bashkatdhetarët e tij për dobësinë e treguar për të rrëzuar Fengin.
Por filmi “The Northman”, ofron një panoramë më komplekse mbi koston që ka hakmarrja, dhe Amleti në film mbërrin në një pikë ku kupton se hakmarrja do ta çojë drejt një rruge pa kthim. Zgjedhja e tij përfundimtare, do të tërheqë shikuesit e filmit, po aq sa ata që dikur dëgjonin tregimet mbi luftëtarët, mbretërit dhe mbretëreshat vikinge qindra vjet më parë.
Shënim: Dr.Jóhanna Katrín Friðriksdóttir, historiane e Mesjetës, e specializuar mbi historinë, letërsinë dhe dorëshkrimet e Norvegjisë së Vjetër. /bota.al/ KultPlus.com
Është çelur më 29 prill në “Galleria Bianca” në Milano në bashkëpunim me “Loppis” ekspozita personale e artistit shqiptar Erjon Nazeraj.
Ekspozita e cila do të qëndrojë e hapur për publikun deri më 5 qershor 2022, çdo ditë ora 10:00 me 19:00 paraqet punët më të fundit të artistit Erjon Nazeraj, një seri tablosh me bojëra uji që modelojnë trupa që bien, të varura në sfondin e bardhë të letrës poroze. Titulli i referohet lëvizjes së cilës i nënshtrohet trupi, këmbët, krahët, gjoksi që përdridhen në forma plastike. Rënie që nuk parashikojnë zbarkim, sepse janë figura të lira, emigrantë, trupa që kërkojnë perspektiva të reja, iluzione të reja pa gjetur kurrë një qetësim vendimtar.
Akuareli, nëpërmjet rrjedhshmërisë së lëngshme që e karakterizon, nënvizon humbjen e ekuilibrit dhe paqëndrueshmërinë e gjestit.
Punimet e Erjon Nazerajt shfaqen si shtresime të lehta, vëllime të mbivendosura, në një proces transformimi të përhershëm. Vetëm iluzioni i vizatimit lejon një pauzë, Nazeraj kthen kornizat në të cilat trupi duket se gjen pozicionin e tij të saktë dhe të pafuqishëm, por është vetëm një ushtrim i përkohshëm, i zhdukur si piktura./diasporashqiptare/ KultPlus.com
600 persona i mbijetuan sulmit në teatrin Mariupol më 16 mar, ndërsa 300 persona humbën jetën, të cilët ndodheshin në katet e sipërme të godinës dhe në pjesën e pasme të teatrit.
Rikujtojmë se më shumë se 1000 njerëz ishin strehuar në teatër kur u shënjestrua nga forcat ruse, pavarësisht paralajmërimeve se në teatër strehoheshin fëmijë.
Ndërkohë vazhdojnë përpjekjet për pastruar teatrin nga mbetjet e bombardimit të forcave ruse, sipas fotove të publikuara nga skynews.
Fansat e mërzitur kanë pyetur pse një seri shfaqjesh u anuluan papritur në teatrin Bolshoi të Rusisë këtë javë.
Edhe pse teatri nuk dha asnjë arsye për ndërprerjen e shfaqjeve të regjisorëve Timofey Kuliabin dhe Kirill Serebrennikov, ata të dy janë shprehur kundër luftës.
Kuliabin ka përdorur llogarinë e tij në Instagram për të shprehur solidaritetin me Ukrainën, duke bërë thirrje që Mariupol të shpëtohet dhe duke shkruar se “jo të gjithë rusët janë fashistë”.
Muajin e kaluar, Serebrennikov i tha France 24 se “është mjaft e qartë se Rusia e ka nisur luftën” dhe se ai e konsideroi situatën zemërthyese.
“Është luftë, është duke vrarë njerëz, është gjëja më e keqe që mund të ndodhë ndonjëherë me qytetërimin, me njerëzimin… Është një katastrofë humanitare, janë lumenj gjaku,” tha ai.
Shfaqjet nga dy regjisorët janë zëvendësuar, duke marrë kritika në internet nga qindra komentues./ KultPlus.com
Ministrja e Kulturës, Elva Margariti ftoi sot qytetarët të marrin pjesë në eventet për Javën e Eropës 2022 nga datat 3-12 maj.
Margariti u shpreh se eventet do të organizohen më 3 Maj në Shkodër tek Pedonalja, më 5 Maj në Vlorë tek Lungomare, më 9 Maj në Tiranë tek Pedonalja.
“Të takohemi për të festuar trashëgiminë tonë të pasur kulturore dhe vlerat e përbashkëta Evropiane”, theksoi Margariti, e cila nënvizoi se në këto evente janë përgatitur edhe disa aktivitete simpatikë për fëmijët.
“Java e Evropës2022 është pothuaj këtu! Ju presim të na bashkoheni më: 3 Maj në Shkodër tek Pedonalja; 5 Maj në Vlorë tek Lungomare; 9 Maj në Tiranë tek Pedonalja. Le të takohemi për të festuar trashëgiminë tonë të pasur kulturore dhe vlerat e përbashkëta Evropiane. Ejani së bashku me më të vegjlit, kemi përgatitur disa aktivitete simpatike për ta”, theksoi Margariti në një postim. /atsh/ KultPlus.com
Violinisti i mirënjohur shqiptar, Olen Çezari, vjen me një koncert të veçantë këtë muaj. Me 5-6 Maj në Pallatin e Kongreseve të gjithë do të kenë mundësinë të shijojnë performancat e veçanta ku do të përfshinë jo vetëm violinistin Olen Cezari por edhe plot emrat të mirënjohur të muzikës Italiane. Në emisionin “Rreze Dielli” Olen Cezari ndau detaje tepër interesante nga koncerti i shumëpritur.
“Jemi në finalen e madhe po afrojnë ditët e koncertit, jemi në tension për 100 gjëra, pjesa muzikore është gati, organizimet po mbarojnë. Jam shumë i lumtur që po ia dal të sjellë këtu maksimumin e teknologjisë që ekziston dhe kjo do një falenderim gjigand për partnerët e mi që më kanë mbështetur, mund të them vetëm një detaj, vetëm qeraja e pallatit të Kongreseve është 25 mijë euro. Është një kosto marramendëse për një gjë gjigande që po vjen në Tiranë” u shpreh ai.
Ndryshe nga herët e tjera, ajo që bën edhe më magjik këtë koncert është se si asnjëherë më parë në Shqipëri, do të ketë maksimumin e teknologjisë, që do të sjellë një ndriçim fantastik në sallë.
Është një eksperiencë unike sepse për herë të parë po vjen një ekip nga Roma që merret me ndriçimin lazer që s’ka qenë ndonjëherë në koncertet e mia, është një eksperiencë paparë si për mua dhe për publikun. Çdo këngë, çdo pjesë që ndodh është një spektakël. Kemi të ftuar pa fund që vijnë nga Italia Fiorella Mannoia, Lavilia Mancusi, Carlos Paz, Salsano Rrapin, kam fatin të kem edhe Ansamblin Kombëtar të Këngëve dhe Valleve, pastaj kam edhe një nga balerinat më të famshëm në botë që vjen nga Argjentina. Repertori është pafund.
Pjesë e koncertit do të jetë edhe orkestra muzikore ‘International clandestine orchestra’ e cila prej 12 vitesh tashmë e shoqëron në çdo koncert violinistin e mirënjohur Olen Çezari, duke sjellë tingujt më magjik dhe performancat më profesionale.
“Është familja ime muzikore , kemi 12 vjet që jemi bashkë, janë artistët më të mirë në botë që jetojnë në Itali që unë i kam piketuar me kokrra dhe i kam marr me vete. Ka qenë provokues për faktin se ne një farë momenti të jetës sonë të gjithë ishim klandestinë në Itali ose na kishin skaduar dokumentat ose kishim ardhur dhe s’kishim bërë dokumentat dhe u vendos ky emër” u shpreh ai.
Violinisti, Olen Çezari, dhe grupi i tij do të interpetojnë në skenën e Pallatit të Kongreseve më 5 dhe 6 Maj në orën 19:30. /diasporashqiptare/ KultPlus.com
Filmat ‘Venom 3′ dhe ‘Ghostbusters: Afterlife’, vazhdimësi, janë në prodhim në kompaninë Sony.
Sony Pictures dha dritën e gjelbër për realizimin e filmit të tretë Venom pasi që filmi i vitit 2021 Venom: Let There Be Carnage dhe ai i vitit 2018 Venom kanë arritur sukses të madh në box office. Filmi i vitit 2018 në box office botëror ka fituar 856 milionë dollarë, e ai i 2021-tës 502 milion dollarë.
Kjo studio po ashtu njoftoi se filmi tjetër “Ghostbusters” do të jetë vazhdimësi e atij të vitit 2021 “Ghostbusters: Afterlife”, i cili në box office botëror ka fituar $200 million.
Sony njoftoi për planet e realizimit të këtyre dy filmave vazhdimësi gjatë festivalit CinemaCon në Las Vegas. Përgjegjës të saj thanë se filmat janë në prodhim.
Në filmin Venom, aktori Tom Hardy luan rolin e gazetarit Eddie Brock dhe të Venom.
Në anën tjetër, regjinë e filmit Ghostbusters Afterlife e ka bërë Jason Reitman. Regjinë e filmit origjinal Ghortbusters në vitin 1984 e ka bërë babai i tij, Ivan Reitman.
Në filmin e parë me role paraqiten: Bill Murray, Dan Aykroyd, Ernie Hudson dhe Harold Ramis. Ky film arriti sukses të madh, ku më vonë bazuar në të u realizuan edhe seri të animuara, video-lojëra dhe filmi i dytë Ghostbusters Afterlife.
Ngjarja në filmin e vitit 2021 “Ghostbusters” ndodh dekada pas atyre në filmin origjinal.
Nuk janë bërë të ditura datat se kur mund të lansohen këta dy filma./21Media/ KultPlus.com
Miliona ukrainas janë larguar drejt vendeve fqinje, që kur Rusia filloi sulmin ndaj vendit të tyre. Të tjerë janë zhvendosur drejt Ukrainës perëndimore, që për momentin është relativisht e sigurtë. Korrespondetja e Zërit të Amerikës, Anna Kosstutschenko, na sjell historitë e vullnetarëve në qytetin Lviv, që kanë hapur shtëpitë e tyre për të zhvendosurit.
Tre vjeçarit Matviy i pëlqen të luajë jashtë, të hidhet mbi trampolinë dhe të shëtisë në kopsht.
Gjërat do të ishin edhe më mirë nëse do të kishte babanë pranë. Por, kjo nuk është e mundur, pasi babai i tij ka shkuar në luftë.
“Përkrah meje gjendet motivuesi im kryesor. Ai nuk është fëmija im, nuk është nipi im, por jemi bërë miq që ditën e parë që u takuam dhe jam shumë i lumtur që e shoh çdo ditë!”, thotë Dr. Serhiy Rubanov, banor dhe vullnetar në qytetin Lviv.
Serhiy dhe Galyna Rubanov mirëpritën Matviyn dhe familjen e tij në shtëpinë e tyre në rrethinat e Lvivit në muajin mars, pasi atyre iu desh të largohen nga qyteti Kharkiv, të cilin forcat ruse vazhdojnë ta bombardojnë që kur filluan sulmin më 24 shkurt.
“Hodhëm sytë nga dritarja dhe dukej si një mjegull. Zhurma ngjasonte me bubullimat, por shumë më e lartë. Ndezëm televizorin dhe morëm vesh se po sulmoheshim nga të ashtuquajturit vëllezërit tanë”, thotë Anna, gjyshja e Matviyt.
Më 4 mars, e gjithë familja, së bashku me stërgjyshen invalide të Matviyt dhe qenin e tyre, u larguan nga Kharkivi. Kur mbërritën në Lviv, vullnetarët i vendosën në banesa të përkohshme derisa një familje vendase u ofroi strehim.
“Gjyshi dhe babai i tij e sollën djalin këtu dhe u kthyen prapë për të luftuar. Cila është gjëja më e çmuar në vendin tonë? Fëmijët tanë, nipërit tanë. A mund të luftosh duke ditur se fëmijët gjenden në rrezik?”, thotë dr. Rubanov.
Familja e Matviyt gjeti këtu një shtëpi të re.
Ata gatuajnë, bëjnë pazar, madje edhe kujdesen për perimet në kopsht. Nëna e Matviyt, Katerina, thotë se po i ndihmon normaliteti i rikthyer në jetën e përditshme të familjes.
“Kur mbërritëm na duhej diçka për të hequr mendjen. Galyna na e dha këtë mundësi. Mbollëm qepë të njoma, rrepa, majdanoz dhe patate. Serhiy na ndihmoi për gjithçka”, thotë Katerina.
Megjithëse janë të sigurtë këtu, lufta ka lënë gjurmët e saj në familje. Matviy vazhdon të trembet nga zhurmat e larta.
“Ka shumë ankth, frikësohet nga zhurmat e larta dhe avionët që fluturojnë… Ka një batanije që e mban me vete që nga koha kur ishte foshnje”, thotë gjyshja e Matviyt, Anna.
Kateryna dhe familja e saj luten që lufta të përfundojë së shpejti dhe babai dhe gjyshi i Matviyt të kthehen të gjallë në shtëpi. Kateryna ëndërron që një ditë djali i saj i vogël të mos ketë më frikë nga zhurmat e larta./VOA /KultPlus.com
Pesë orë e ka bartur mbi shpinë dritaren e shtëpisë së fshatit kur arriti në qytet e vendosi në shtëpinë e re i gëzuar hyri në dhomë dhe po shikonte nëpër dritare nuk e kuptonte pse nuk e shihte peizazhin e fshatit ishte e njëjta dritare nëpër të cilën kishte shikuar tërë jetën Pas nëntë muajve vdiq nga trishtimi. / KultPlus.com
“Jazz not war” është motoja nën të cilën zhvillohet këtë vit festivali i jazz-it në Shkodër, një event i përvitshëm artistik që evokon dhe promovon muzikën jazz.
Kryeministri Edi Rama ndau sot pamje nga atmosfera e veçantë që sjell ky event në qytetin e Shkodrës.
“Shkodra në një atmosferë të veçantë jazz-i”, tha Rama, ndërsa ndau albumin e fotove.
Nën tingujt e jazz-it dhe veshje të viteve ’30, Shkodra mirëpriti eventin e përvitshëm që ka për synim të ringjallë ndjenjën e lirisë kulturore, në një qytet me traditë të lashtë muzikore dhe artistike.
30 prilli njihet si Dita Ndërkombëtare e muzikës Jazz , e cila festohet me qëllim rritjen e vetëdijes për vlerat e Jazzit si një mjet edukativ dhe forcë për paqen, unitetin, dialogun dhe bashkëpunimin e zgjeruar mes njerëzve.
UNESCO ka caktuar 30 prillin për këtë ditë, me rezolutën e miratuar në Konferencën e Përgjithshme të kësaj organizate, në nëntor 2011. /KultPlus.com
