Kori i Filharmonisë së Kosovës do të rikthehet në Tiranë me një koncert premierë për të përmbyllur vitin më mënyrën më të mirë të mundshme, shkruan KultPlus.
Përmes një postimi në llogarinë zyrtare në “Facebook”, Kori njoftoi se këtë koncert do ta bëjnë në kuadër të kalendarit të ngjarjeve në shënim të 75 vjetorit të themelimit të Liceut Artistik “Jodan Misja”.
“Në drejtimin e Hajrullah Sylës në këtë ngjarje do interpretohen vepra nga Rafet Rudi, Vasil S. Tole, Laura Jēkabson, Peder Karlsson, Jake Runestad dhe Ola Gjeilo. Koncerti mbahet në sallën e koncerteve “Tonin Harapi” (Liceun Artistik “Jordan Misja” – Tiranë) më 9 dhjetor 2021”, shkruhet mes tjerash në njoftim.
Ky koncert do të fillojë në ora 19:00, derisa është bërë thirrje e vazhdueshme që të përmbahen në përpikmëri masat COVID-19 pasi që hyrja do të jetë e lirë. /KultPlus.com
Tetë ndërmarrje të vogla dhe të mesme të turizmit nga Kosova po marrin pjesë në Panairin e Turizmit në Izmir “Travel Turkey Izmir”.
Panairi ka mirëpritur këtë javë në Izmir të Turqisë dy hotele dhe gjashtë operatorë turistik nga Kosova.
Pjesëmarrja e këtyre kompanive ka ardhur si nismë e Unionit të Turizmit të Kosovës (UTK) dhe është përkrahur nga Swisscontact.
Takimet biznes me biznes (B2B) po zhvillohen midis operatorëve turistik vendas dhe operatorëve turistik turq, të ndihmuar nga një konsulent i vendit pritës. /KultPlus.com
I prezantuar në Festivalin Ndërkombëtar të Filmit të Venecias 2021 në seksionin Horizont, por mbi të gjitha fitues i Çmimit të Madh të Festivalit të Filmit në Tokio, filmi “Vera Dreams of the Sea” me regji të Kaltrina Krasniqi është një film që ndërthur dramën gjenerative dhe individuale në humorin e tensionuar të thriller, shkruan KultPlus.
I hollë në nëntekste dhe i montuar pa pushim, ky film realizohet mbi të gjitha nën interpretimin e aktores Teuta Ajdini Jegeni, një ndërthurje mes shtytjes rebeluese dhe zakonit të heshtjes.
Regjisorja kosovare e paraqet talentin e saj – të dukshëm mbi të gjitha në vendosmërinë dhe saktësinë e zgjedhjeve stilistike shkruhet në gazetën italiane Info Oggi.
Krasniqi tregon se si nëna e saj, Vera dhe Vera në film janë në thelb dy gra shumë të ndryshme, por ka ngjashmëri mes tyre.
“Ato janë gra të të njëjtit brez, që jetuan në një sistem vlerash dhe traditash që i privuan plotësisht gratë nga çdo mundësi veprimi kur ishte fjala për të ndjekur atë që është e tyre – siç është e drejta për të trashëguar, e cila më shpesh përkthehet si pavarësi ekonomike”, thotë Krasniqi.
Ajo tutje shpjegon historinë se si nëna e saj u divorcua nga babai, kur edhe luftoi në gjykatë për më shumë se katër vjet që të sigurojë një pjesë të pronës së saj, për ta humbur në fund gjyqin.
“Nëna ime shpejt e kuptoi se edhe gjyqësori ishte patriarkal. Megjithëse ligji i garantonte të drejta të barabarta pronësore, ajo nuk arriti të transferonte pasuritë e saj, sepse procesi i saj i vendimmarrjes ishte i bazuar në një traditë që historikisht favorizonte burrat. Vera, nga ana tjetër, në film përpiqet të negociojë pozicionin e saj me traditën, e vetëdijshme se ndërhyrja e shtetit nuk ka peshë kur të drejtat e saj pronësore si grua janë në pyetje”, shpjegon tutje regjisorja.
Fituesja e disa çmimeve ndërkombëtare, pohon se Kosova është një vend i blinduar dhe se patriarkati është universal.
“Kosova është një vend i blinduar. Nocioni ynë për detin është romantik, por edhe deti është një vend i panjohur. Kur Vera sheh një mundësi për një jetë të re buzë detit, pas vetëvrasjes së të shoqit, ajo kthehet në një makth të përsëritur mbytës. Uji është një mjet klasik shprehës i kinemasë dhe në këtë rast është në shërbim të një gjuhe pamore që flet në emër të psikikës së Verës”, thotë ajo.
Më pas, Krasniqi jep edhe detaje të tjera nga filmi, ku tregon se si Vera ka lindur në vitet 1950 dhe është personi i parë që shkoi në universitet, derisa nëna dhe gjyshja e saj mezi dinin të shkruanin dhe lexonin.
“Kjo e mban atë vazhdimisht në disavantazh kur bëhet fjalë për përfaqësimin ose negocimin e të drejtave të saj”, përfundon ajo.
zhytur në një atmosferë të tensionuar, “Vera Andrron Detin” është një portret intim por edhe universal i një gruaje e cila lufton një realitet të vrazhdë pabarazisë gjinore thellë të rrënjosura në shoqëri edhe në ditët e sotme’.
Në film luajnë: Teuta Ajdini Jegeni, Alketa Syla, Refet Abazi, Astrit Kabashi, Arona Zyberi, Aurita Agushi, Ilire Vinca, Xhevat Qorraj, etj. Drejtoreshë e fotografisë: Sevdije Kastrati; Producent: Shkumbin Istrefi.
Vera andrron detin’ është bashkëprodhim në mes të Kosovës (Puntoria Kreative Isstra, Vera Films), Maqedonisë së Veriut (Dream Factory) dhe Shqipërisë (Papadhimitri Productions) i mbështetur nga Qendra Kinematografike e Kosovës, Agjencia e Filmit e Maqedonisë së Veriut dhe Qendra Kombëtare e Kinematografisë – Shqipëri. /KultPlus.com
Dje është hapur Ekspozita Tradicionale vjeotre e Asociacionit të Artistëve Vizual të Kosovës, shkruan KultPlus.
Në përfundimin e kësaj ekspozite u bë edhe ndarja e çmimit vjetor, ku disa artistë e ndanë së bashku këtë çmim.
Artistët Zake Prelvukaj, Isa Alimisa dhe Burim Myftiu u dekoruan me Çmimin Vjetor të Ekspozitës Tradicionale vjetore të Asociacionit të Artistëve Vizual të Kosovës.
Hapjen e kësaj ekspozite që përfshiu piktura nga më të ndryshmet e bëri kryetari i AVVK-së, artisti Kamuran Goranci.
Në këtë ekspozitë morrën pjesë edhe disa nga artistët sikurse Fatmir Krypa, Luan Mulliqi, Bardha Buza, Faik Krasniqi, Kamuran Goranci, Agron Mulliqi, Trific Tomislav, Musë Prelvukaj, Naim Spahiu, Muhamet Ahmeti Metis, Sabri Behrami, Fehmi Hoxha Feho, Mjellma Goranci Firzi, Refki Gollopeni, Shkurte Ramushi, Pranvera Sylejmani, Lebibe Topalli dhe shumë të tjerë. /KultPlus.com
UNICEF dhe USAID kanë bashkuar forcat për të përmirësuar qasjen në vaksina për popullatat e cenueshme në Kosovë, për t’u siguruar që ata janë të fuqizuar për të kuptuar përfitimet, dhe për të rritur kërkesën për vaksinimin kundër COVID-19, shkruan KultPlus.
Lajmin e ka bërë të ditur Programi i Unicefit në Kosovë, ku ka thënë se në bashkëpunim me organizata lokale kanë nisur fushatën derë më derë për vaksinim kundër COVID-19.
“Askush nuk lihet pas në këtë proces”, është edhe motoja e këtyre dy organizatave, që kanë për qëllim të arrijnë 25 mijë individë nga komunitetet rom, ashkali dhe egjiptian dhe familjet që jetojnë në varfëri të vaksinohen kundër COVID-19.
Një ekip i mrekullueshëm, i quajtur “Ekipi i Qendrës së Komunikimit” (Communications Hub Team), po bën përpjekjet e tyre të palodhura në punën e përditshme të këtij projekti. Ata po punojnë me vullnetarë të punës në terren, me OJQ dhe qendra shëndetësore komunale dhe po përdorin kanale komunikimi për të përhapur mesazhe për vaksinim.
Nol Sahatçiu do të punojë në komunikimin strategjik dhe do të udhëheqë Comms Hub. – Fillojeta Konjuhi, e cila do të punojë për mbarëvajtjen e proceseve administrative dhe monitorimin e aktiviteteve në terren . – Dhe Artan Sadiku do të mbështesë qendrën në shkencat e sjelljes dhe monitorim e evaluim. /KultPlus.com
Ngjarja e përvitshme tradicionale – mbledhja e Republikës së Kosovës dhe asaj të Shqipërisë – u mbajt sot në Elbasan, kur edhe u mbledhën krerët e të dyja shteteve, shkruan KultPlus.
Sesionin e mbledhjes së përbashkët e hapën me fjalët e tyre kryeministrat Albin Kurti dhe Edi Rama duke ua lënë vendin anëtarëve të kabineteve që të parashtrojnë marrëveshjet që do të nënshkruhen nga ministritë përkatëse.
Ministri i Kulturës, Rinisë dhe Sportit, Hajrulla Çeku, shpalosi marrëveshjet që do të nënshkruajë ministria dhe institucionet qendrore të kulturës.
Kalendari i Përbashkët Kulturor Vjetor, Marrëveshja e bashkëpunimit në fushën e Trashëgimisë kulturore dhe muzeve; Protokolli i bashkëpunimit mes Teatrit Kombëtar të Operas, Baletit dhe Ansamblit Popullor të Republikës së Shqipërisë dhe Operës, Filharmonisë, Baletit Kombëtar të Kosovës dhe Ansamblit Kombëtar të Këngëve dhe Valleve “Shota” të Republikës së Kosovës, Marrëveshja e Bashkëpunimit të Muzeut Kombëtar të Kosovës dhe Muzeut Historik Kombëtar; Marrëveshja e Bashkëpunimit të Bibliotekës Kombëtare të Kosovës “Pjetër Bogdani” dhe Bibliotekës Kombëtare të Shqipërisë; Marrëveshja e Bashkëpunimit të Parkut Arkeologjik “Ulpiana” dhe Parkut Arkeologjik Kombëtar Apolonia; janë marrëveshjet që do të nënshkruhen në fushën e kulturës e të trashëgimisë; si dhe Marrëveshja e bashkëpunimit mes Agjencisë Shtetërore të Arkivave të Kosovës dhe Drejtorisë së Përgjithshme të Arkivave të Shqipërisë.
Ministrat Hajrulla Çeku dhe Elva Margariti nënshkruan Kalendarin e Përbashkët Kulturor Vjetor mes Ministrisë së Kulturës, Rinisë dhe Sportit të Republikës së Kosovës dhe Ministrisë së Kulturës së Republikës së Shqipërisë.
Kalendari, ndër të tjera, parasheh edhe Menaxhimin Kulturor dhe shkëmbimin e artistëve në fushat e ndryshme kulturore dhe atë të trashëgimisë.
Në fushën e bibliotekave parashihet Konferenca Kombëtare e Bibliotekonomisë, konferenca shkencore për shënimin e 40–vjetorit të ndarjes nga jeta të Branko Merxhanit, 400–vjetorit të vdekjes së Pjetër Budit, 50-vjetorit të vdekjes së Krist Malokit.
Në fushën e filmit parashihet pjesëmarrje e përbashkët në Festivalin Ndërkombëtar të Filmit në Berlin, në Festivalin e Kanës me shtand të përbashkët të Qendrës Kinematografike të Kosovës dhe Qendrës Kinematografike Kombëtare, si dhe bashkëpunimi me festivalet e tjera ndërkombëtare të filmit.
Në bashkëpunimin mes teatrove, ansambleve dhe baleteve, parashihet realizimi i shfaqjeve “Carmina Burana”, në Tiranë, realizimi i shfaqjes “Monger” në Prishtinë, pastaj shfaqja e përbashkët “Gjerdani i Artë” midis Ansamblit Popullor dhe Ansamblit “Shota” në nderim të artisteve Nexhmije Pagarusha dhe Fitnete Rexha. Po ashtu, parashihen aktivitete në Teatrin Kombëtar Eksperimental “Kujtim Spahivogli” si dhe në Qendrën Kombëtare të Kulturës për Fëmijë në Tiranë. Baleti Kombëtar i Kosovës gjatë qershorit të vitit të ardhshëm do të paraqitet me shfaqje në Tiranë.
Sipas këtij kalendari, bashkëpunimi do të vazhdojë edhe në fushën e trashëgimisë kulturore, ku Muzeu Kombëtar do të realizojë dy ekspozita në Muzeun Kombëtar të Kosovës, do të botohet një katalog i përbashkët i dy muzeve “Arkeologjia e Shqipërisë dhe e Kosovës” si dhe do të realizohet punëtoria “Muzeu i komunitetit – Programet Edukative në Muzeun Historik Kombëtar dhe Muzeun Kombëtar të Kosovës”. Po ashtu, do të realizohen vizitat dhe ekspozitat e përbashkëta në Berat si dhe koncerti me muzikë tradicionale popullore me artistë nga Vlora dhe Prizreni.
Ndërkaq, në Butrint, në dhjetor të vitit 2022 kur pritet të regjistrohet në listën e UNESCO-s, do të ketë aktivitete, konferenca e ekspozita të përbashkëta.
Qendrat Rajonale të Trashëgimisë Kulturore të Prizrenit, Mitrovicës dhe Gjilanit do të realizojnë ekspozita në Vlorë, Korçë, Berat, Gjirokastër e Korçë. Edhe Muzeu Kombëtar i Kosovës do të ketë 4 aktivitete në Muzeun Kombëtar në Tiranë, me organizimin e ekspozitave dhe programeve edukative.
Bashkëpunim parashihet edhe për programin e Evropës Kreative dhe për të Drejtat e Autorit.
Përpos kalendarit të përbashkët kulturor, ministrat Hajrulla Çeku e Elva Margariti kanë nënshkruar Marrëveshje për bashkëpunim ndërmjet Ministrisë së Kulturës, Rinisë dhe Sportit të Republikës së Kosovës dhe Ministrisë së Kulturës të Republikës së Shqipërisë në fushën e trashëgimisë kulturore dhe muzeve, e cila parasheh zhvillimin dhe mbështetjen e bashkëpunimit kulturor mes dy vendeve në fushën e trashëgimisë kulturore dhe muzeve, shkëmbimin e përvojave dhe realizimin e aktiviteteve të përbashkëta në përputhje me standardet ndërkombëtare.
Ndërsa ditën e nesërme pritet të nënshkruhen Protokolli i bashkëpunimit mes Teatrit Kombëtar të Operas, Baletit dhe Ansamblit Popullor të Republikës së Shqipërisë dhe Operës, Filharmonisë, Baletit Kombëtar të Kosovës dhe Ansamblit Kombëtar të Këngëve dhe Valleve “Shota” të Republikës së Kosovës, Marrëveshja e Bashkëpunimit të Muzeut Kombëtar të Kosovës dhe Muzeut Historik Kombëtar; Marrëveshja e Bashkëpunimit të Bibliotekës Kombëtare të Kosovës “Pjetër Bogdani” dhe Bibliotekës Kombëtare të Shqipërisë; si dhe Marrëveshja e Bashkëpunimit të Parkut Arkeologjik “Ulpiana” dhe Parkut Arkeologjik Kombëtar Apolonia.
Bashkëpunimi mes Republikës së Kosovës dhe asaj të Shqipërisë përmes një kalendari të përbashkët ka filluar në vitin 2014 kur është nënshkruar për herë të parë një program i tillë. /KultPlus.com
Qeveria e Kosovës dhe ajo e Shqipërisë kanë mbajtur mbledhjen e shtatë të përbashkët, ku edhe kanë bërë nënshkrimin e disa marrëveshjeve, shkruan KultPlus.
Pas nënshkrimit të marrëveshjeve, ndodhi edhe një konferecë e përbashkët mes kryeministrit të Shqipërisë, Edi Rama, dhe atij të Kosovës, Albin Kurti.
Që të dy, kur u pyetën nga gazetarët nëse janë pro apo kundër bashkimit kombëtar, u përgjigjën pa hezitim se janë pro një gjëje të tillë.
Megjithatë, edhe Kurti edhe Rama thanë se bashkimi kombëtar nuk është diçka që është aty dhe vetëm duhet të thuhet ‘po’, por kërkohet diçka përtej kësaj.
Kosova dhe Shqipëria nënshkruan një sërë marrëveshjesh gjatë ditës së sotme. /KultPlus.com
Qeveria e Republikës së Kosovës ka udhëtuar gjatë ditës së sotme për në Elbasan, që të takohet me Qeverinë e Republikës së Shqipërisë për të nënshkruar një sërë marrëveshjesh, shkruan KultPlus.
Kryeministri i Kosovës, Albin Kurti, pati një fjalim në këtë mbledhje, ku edhe tha se duhet të flasim si diplomatë, por të punojmë sikurse patriotë.
“Të thuash se jemi të lumtur që jemi një komb i ndarë do të ishte marrëzi, Të thuash se jemi të lumtur që kemi dy shtete sepse kështu jemi të fortë, do të ishte sa tepri, po aq edhe shkurtëpamësi, Të thuash se angazhohesh për bashkim kombëtar, do të shquanin për nacionalist, Të thuash se do të bashkohemi në bashkimin evropian, të shquajnë për diplomat, Kam përshtypjen se këta të fundit po tregohen më të suksesshëm, kështu që, le të flasim si diplomatë, por le të punojmë si patriotë”, tha Kurti mes tjerash.
Disa prej marrëveshjeve që pritet të nënshkruhen sot kanë të bëjnë me leje qëndrimin e shtetasve të Kosovës në Shqipëri, leje të punës dhe shumë gjëra të tjera. /KultPlus.com
Të premten e 26 nëntorit në Elbasan do të mbahet mbledhja e përbashkët, e shtata me radhë e Qeverisë së Republikës së Kosovës dhe Qeverisë së Republikës së Shqipërisë.
Disa marrëveshje pritet të nënshkruhen në këtë mbledhje. Por, ato që tashmë janë bërë të ditura, janë marrëveshja për sigurime shoqërore, ku është kërkuar autorizimi për nënshkrim nga Presidentja e Kosovës, Vjosa Osmani, marrëveshja për lejet e qëndrimit në afat 5-vjeçar, përmes një aplikimi të thjeshtë dhe ajo për lehtësimin e procedurës së njohjes së diplomave. Ministrja e Arsimit, Shkencës, Teknologjisë dhe Inovacionit, Arbërie Nagavci në një prononcim për Telegrafin ka bërë të ditur se marrëveshja në fushën e arsimit do të jetë për lehtësim të procedurës së njohjes së diplomave.
“Marrëveshja që do te nënshkruhet në fushën e arsimit është: Marrëveshje dypalëshe për lehtësimin e procedurës së njohjes se diplomave nga IAL-te (të konfirmimit të të diplomuarve nga Qendrat Kombëtare respektive të Njohjes së Diplomave). Në fushën e njohjes dhe njësimit reciprok të diplomave, certifikatave dhe gradave shkencore, të lëshuara nga institucionet e arsimit të lartë dhe institucioneve të tjera të autorizuara”, ishte shprehur Nagavci.
Siç është bërë e ditur nga agjenda, delegacioni i Kosovës do të mbërrijë në ora 09:45 në Shqipëri, derisa do të ketë një ceremoni deri në ora 13:10. /KultPlus.com
Institucioni themelor i ruajtjes së trashëgimisë së shkruar dhe të shtypur në Republikën e Kosovës, kremtoi 77 vjetorin e Ditës së Bibliotekës Kombëtare, me ç‘rast edhe u nënshkrua një marrëveshje gjithëpërfshirëse mes tri ministrive të Kosovës, për krijimin e një rrjeti bibliotekar të Kosovës, shkruan KultPlus.
Në bashkëpunim me Ministrinë e Kulturës, Rinisë dhe Sportit, Ministrisë së Arsimit, Shkencës dhe Teknologjisë, e gjithashtu edhe Ministrinë e Administrimit të Pushtetit Lokal, u nënshkrua marrëveshja për krijimin e një rrjeti bibliotekar të Kosovës.
Zëvendësministrja e Kulturës, Rinisë dhe Sportit, Daulina Osmani, pati një fjalim përshëndetës me rast të nënshkrimit të marrëveshjes dhe ditës ndërkombëtare të Bibliotekës Kombëtare të Kosovës.
Fjalimi i saj filloi me përshëndetje të të gjithë pranishmëve dhe shprehi kënaqësinë e saj me rast të kremtimit të 77 vjetorit të BKK-së.
“Misioni i Bibliotekës si mision është sigurimi i qasjes së lirë dhe të hapur në burime të shkruara dhe të shtypura për njerëzit të të gjitha moshave dhe të gjitha përkatësive. Bibliotekë është një pjesë e pandashme e zhvillimit të të rinjve. Përmes shërbimeve specifike dhe ofrimit të qasjes në koleksione të larmishme deri më sot, jetësohet përmbushja e nevojave specifike të komunitetit, të cilat lidhen ngushtë me edukimin, rritjes së lejueshmërisë dhe rolit të librit në përgjithësi”, tha Osmani.
Ajo tutje gjithashtu deklaroi se ndjehet shumë e kënaqur për një bashkëpunim të madh mes ministrive.
“Synimi i kësaj marrëveshje është të siguroj futjen e bibliotekave të Kosovës në një formë të përbashkët të shërbimeve bibliotekare, me ç ‘rast bibliotekat kryesore të vendit të kenë mundësi të shfrytëzojnë materialet që biblioteka ofron. Po ashtu ndjehemi shumë të lumtur që BKK po e vazhdon traditën e saj, ku edhe sivjet me rastin e shënimit të kësaj dite do të bëjë ndarjen e çmimit “Pjetër Bodgani”.
Në fund zëvendës ministria tha se MKRS-ja shpreh përkushtim dhe gatishmëri të plotë për rritje të gatishmërisë dhe koordinimit ndër institucional si në nivel qendror dhe në nivel lokal, që të sigurohet zbatimi i këtij projekti”, përfundoi Osmani.
Zëvendës Ministrja Daulina Osmani
Në anën tjetër, edhe Ministrja Arsimit, Arbërie Nagavci, pohoi se një marrëveshje e tillë ka qenë e nevojshme dhe se do të punojnë pa ndalë që të arrihet zbatimi i aktit të nënshkruar.
“Shpresoj që të punojmë bashkë që çdo ditë të jetë ditë e librit. Në kuadër të misionit tonë e së bashku me pasionin e përfshirë, do të punojmë që të zbatojmë në përpikëri marrëveshjen. Do të sigurohemi të aplikojmë çdo gjë që është nënshkruar në këtë memorandum”.
Nagavci gjithashtu zbuloi se janë duke punuar vazhdimisht që të krijojnë edhe biblioteka të reja, por jo vetëm për nxënësit.
“Jemi duke punuar që të krijojmë në biblioteka të veçantë për mësimdhënës, që t’ia mundësojmë këtyre të fundit mësim nxënien më të suksesshme. Do të jemi një partner i përkushtuar që bibliotekat të jenë vende të dashura dhe në vëmendje të të rinjve”, tha ajo në fund.
Ministrja Arbërie Nagavci
Ministri i Administrimit të Pushtetit Lokal, Elbert Krasniqi, në fjalimin e tij të rastit uroi të gjithë për ditën e bibliotekës.
“Jam shumë i lumtur që jam pjesë e kësaj marrëveshje. Jam i obliguar që të angazhohem që të mirat dhe këto mundësi të shpërndahen gjithandej në Komunat e Kosovës”, deklaroi ai.
Krasniqi tutje theksoi se Kosova ka bashkëpunime të mëdha me shumë shtete të ndryshme nëpër botë dhe tash janë në momentin të gjejnë arsye dhe aktivitetet konkrete me të cilat mund të bashkëpunojnë.
“Në një udhëtim jashtë shtetit, e patëm edhe temë diskutimi pjesën e krijimit të bibliotekave lokale. Një hapësirë kur të gjithë janë të mirëseardhur, një hapësirë ku në hyrje nuk thuhet qetësi, por mund të vazhdosh përpara dhe të shijosh muzikën në një hapësirë të veçantë. Ky memorandum është diçka shumë e mirë”, përfundoi ministri.
Ministri Elbert Krasniqi
Kjo ishte hera e parë që BKK po mbështetet një projekt, i cili do të mundësojë krijimin e rrjetit bibliotekar në Kosovë. Këtë gjë e pohoi edhe drejtori i Bibliotekës Kombëtare të Kosovës, Fazli Gajraku, i cili falënderoi ministrat Çeku, Nagavci e Krasniqi për mbështetjen e veçantë.
Marrëveshja e memorandumit që u nënshkrua sot ka qëllimin e vetëm përfshirjen e bibliotekave të Kosovës në një Platformë të Shërbimeve Bibliotekare që do të mundësojë krijimin e një rrjeti funksional të bibliotekave të vendit tonë. Avancimi i të rinjve duke punuar për të siguruar shërbime më të mira në platformat e reja, formate të reja dhe praktika të domosdoshme, janë pikërisht fokus kryesor i aktit trepalësh.
Ndërkaq, Këshilli drejtues i bibliotekës kombëtare të Kosovës ka ndarë çmimin “Pjetër Bodgani” për profesorin nga Kalifornia e Shteteve të Bashkuara të Amerikës, Robert Montoya.
Ministria e Kulturës, Rinisë dhe Sportit, me nënshkrimin e kësaj marrëveshjeje merr përsipër mbështetjen financiare të projektit me 77 mijë e 632 euro dhe rrjeti i bibliotekave që do të krijohet do të përbëhet nga Biblioteka Kombëtare si udhëheqës e rrjetit, 38 biblioteka publike, 7 biblioteka akademike dhe 2 biblioteka speciale
Dita e themelimit të Bibliotekës është në nëntor të viti 1944 në Prizren, me një koleksion të vogël të librave. Ndërkaq, sot Biblioteka ka një fond bibliotekar me mbi 2 milionë ekzemplarë të materialit të ndryshëm bibliotekar. /KultPlus.com
Këngëtarja me origjinë nga Kosova, Dua Lipa, ka njoftuar se do të bëjë lansimin e një platformeje të quajtur “Service95”, shkruan KultPlus.
Lipa në një intervistë për British Vogue ka njoftuar publikun se kjo platformë do të përfshijë shumëçka në të.
Duke filluar nga një buletin, në të cilën 26 vjeçarja do të paraqesë rekomandime, nga udhëtimet, muzika, ushqimi dhe libra të ndryshme.
“Fotografitë e mia janë një blog për jetën time. Tani do të ketë një faqe interneti ku njerëzit mund të shkojnë dhe të kërkojnë në të vërtetë gjithçka.“, tha Dua.
Ajo planifikon të përdorë Service95 për të nxjerrë në pah kauzat filantropike për të cilat ajo kujdeset. Krahasimet me Goop të Gwyneth Paltrow, e cila e nisi si një buletin falas me email që përmban rekomandimet e aktores duken të pashmangshme, por megjithëse universi i Dua-s do të prekë bukurinë dhe mirëqenien.
“Do të ketë shumë zëra të ndryshëm, artikuj interesantë dhe shënimin tim personal për atë që kam bërë dhe çfarë kam zbuluar,” shpjegon këngëtarja. Service95 do të lansohet në fillim të vitit 2022, pikërisht kur ajo përgatitet të nisë turneun e saj botëror Future Nostalgia. /KultPlus.com
Kryeministri i Republikës së Kosovës, Albin Kurti, ka shprehur keqardhje dhe e ka dënuar fuqishëm aktin e fundit të diskriminimit ndaj komunitetit Rom, Ashkali dhe Egjiptian, që sipas raportimeve, disa lokale të gastronomisë kanë refuzuar t’u shërbejnë këtyre komuniteteve.
Në fjalimin e mbajtur në Samitin e antigjipsizmit, kryeministri Kurti po ashtu dënoi ashpër dhunën fizike që u shpërfaqë po ndaj këtyre komuniteteve ditëve të fundit.
Këto janë akte të dënueshme si nga ligjet tona e po ashtu edhe nga ndërgjegjja jonë. Nuk është as në kulturën e as në historinë tonë që të jemi diskriminues e aq më pak përjashtues, tha kryeministri, duke shtuar se qytetarët e çdo etnie, komuniteti e race janë në radhë të parë qytetarë të barabartë të Republikës tonë.
Kryeministri tha se angazhohet njëlloj për të gjithë qytetarët e Republikës, e sidomos për ata që janë më të varfër, sepse siç tha ai, përveçse Kryeministër, jam edhe social-demokrat, e si social-demokrat progresin e zhvillimin e shoqërisë tonë e mati, jo me atë se sa mirë po jetojnë ata që kanë më së shumti, por ata që kanë më së paku.
Ai shtoi se si social-demokrat zhvillimin e matë me përfshirjen dhe kualitetin e edukimit që marrin jo vetëm pjesa e privilegjuar e shoqërisë, por pjesa më e diskriminuar e saj.
Në këtë drejtim, ai veçoi shpalljen e konkursit për ndarjen e bursave për nxënësit e shkollave të mesme të larta për komunitetet Rom, Ashkali dhe Egjiptian për vitin shkollor 2021/2022, me çka synohet përfshirja e këtyre nxënëseve në arsimin e mesëm të lartë në shkollat publike dhe sigurimi i iniciativave për të reduktuar braktisjen e mësimit. /KultPlus.com
Shqipëria do të nënshkruajë një marrëveshje shumë të përshtatshme dhe pozitive për të gjithë shtetasit e Kosovës, shkruan KultPlus.
Ministri i Brendshëm i Shqipërisë, Blendi Çupi, ka njoftuar se shtetasit e Kosovës mund të marrin lejen e qëndrimit 5 vjeçare me vetëm një aplikim të thjeshtë.
Siç raporton A2 News, Çuçi ka thënë se ky është një lajm shumë i mirë, pasi shqiptarët që jetojnë në Kosovë që do të marrin leje qëndrimi me procedura të thjeshtuara. Është në vazhdën e disa marrëveshjeve që do të nënshkruajmë brenda sektorëve që përfshin Ministria e Brendshme”, tha Çuçi.
Përveç lejës së qëndrimit, shtetasve të Kosovës do t’iu ofrohet edhe leja e punës.
Probleme të tilla kanë shqiptarët nga Lugina e Preshevës, që vazhdojnë të mbesin të diskriminuar në Kosovë mbi këtë aspekt. /KultPlus.com
Presidentja e Kosovës, Vjosa Osmani, ka reaguar lidhur me lajmin tragjik për aksidentin e ndodhur në mëngjesin e së martës në Bullgari, shkruan KultPlus.
Osmani përmes një postimi në llogarinë zyrtare në “Facebook” ka shkruar se ndjejnë pikëllim të thellë për familjet e viktimave.
“Në këtë moment pikëllimi të thellë, ndajmë dhimbjen me familjet e viktimave dhe lutemi për të mbijetuarit. U shprehim ngushëllime popullit dhe autoriteteve të fqinjit tonë, Maqedonisë së Veriut, prej nga vinin shumica e udhëtarëve, si dhe atyre të Bullgarisë, në tokën e të cilëve ndodhi tragjedia”, shkroi Presidentja.
Tutje Osmani tha se Republika e Kosovës vetëm pak kohë më parë e përjetoi një tragjedi të tillë dhe i di mirë përmasat e dhimbjeve të tilla.
“I dimë përmasat e dhimbjeve të tilla, por edhe nevojën për të reaguar shpejt, prandaj do t’u qëndrojmë afër miqve tanë në këto momente të vështira për ta”, shtoi ajo.
Bullgaria vitet e fundit njihet si një vend që ka pasur shumë aksidente, më së shumti për shkak të kushteve në rrugë, makinave të vjetra dhe shpejtësisë. /KultPlus.com
Jeffrey Hovenier do të jetë ambasadori i ri i Shteteve të Bashkuara në Kosovë, ku do të trashëgojë punën e bërë nga Philip Kosnett, shkruan KultPlus.
Mandati i Kosnett përfundon në fund të vitit dhe qysh nga viti 2022, Kosova do të jetë me një ambasador të ri nga SHBA-ja.
Shteti më i fuqishëm në botë, është konfirmuar nga Senati amerikan, i cili ka një karrierë të shërbimit të jashtëm amerikan.
Presidenti Joe Biden dhe miqësia e tij me Kosovën daton qysh moti, e ky i fundit edhe ka propozuar emrin e Hovenier si ambasador të shtetit më të ri në Evropë. /KultPlus.com
Poetja Vlora Konushevci ka bërë të ditur se ka dalur në shtyp antologjia me titull “Alternative War” nga shtëpia botuese “B Cubed Press” në Shtetet e Bshkuara të Amerikës, ku prezantohet ajo dhe poezia e saj për luftën në Kosovë, shkruan KultPlus.
Konushevci ka bërë të ditur lajmin përmes një postimi në llogarinë zyrtare “Facebook”, ku edhe ka treguar emocionet që i ndjeu në publikimin e poezisë së saj.
“Ndoshta s`mund të bëjmë shumë, por mund të bëjmë çdo ditë ngapak që shtetin dhe historinë tonë ta vendosim në harta ndërkombëtare për të mirë”, shkroi ajo.
Kosova përmendet edhe në njoftimin e botuesit ku ndër tjera thuhet: “Alternative War” është një përzierje e fantashkencës dhe ngjarjeve aktuale. Lufta dhe pasojat e saj i lidhin fort këto histori në një vëllim të përpiluar me shumë kujdes. Autorët që janë luftëtarë, diplomatë, politikanë, mësues e shumë çka tjetër, këtu rrëfejnë copëza të historisë së tyre.
Linkun në Amazon për blerje të librit është në vijim si dhe poezia e autores në anglisht mund ta shihni duke klikuar KËTU./KultPlus.com
Kohët e fundit dukuria e vetëvrasjes në Kosovë ka qenë një temë në përhapje e sipër, e gjithashtu ka shumë të atillë që nuk janë të gatshëm për të biseduar e diskutuar për këtë temë, shkruan KultPlus.
“Linja e Jetës” është krijuar pikërisht për t’i ndihmuar atyre personave të cilët kanë në mendje të lëndojnë vetën apo edhe të shkojnë deri në mendimin e vetëvrasjes.
Përmes një postimi në llogarinë zyrtare në “Facebook”, Linja e Jetës ka bërë të ditur se në përvjetorin e dytë të themelimit deri tani kanë trajnuar mbi 81 vullnetarë dhe numëron mbi 5500 orë funksionimi.
“Përderisa reflektojmë në këto dy vite që po lëmë pas, ne jemi mirënjohës për të gjithë ata që kanë qenë pjesë e këtij rrugëtimi dhe që e kanë ndihmuar Linjën e Jetës ta ofrojë shërbimin e saj pavarësisht sfidave të shumta të paraqitura gjatë kësaj periudhe.”, shkruhet mes tjerash.
‘Linja e Jetës’ është pikërisht vendi në të cilin të gjithë dëshirojnë të kontribuojnë në të mirën e përbashkët duke u mbledhur vullnetarisht. / KultPlus.com
Ansambli i Këngëve dhe Valleve “ Kemajl Azizi” nga Vitia, është pranuar zyrtarisht partner i Organizatës CIOFF, që përndryshe është partner zyrtar i UNESCO-së (Organizata për Edukim, Shkencë dhe Kulturë e Kombeve të Bashkuara), përcjellë KultPlus.
Komuna e Vitisë ka njoftuar për lajmin përmes një postimi në llogarinë e tyre zyrtare në “Facebook”, ku edhe kanë bërë të ditur se me të gjitha votat e shteteve anëtare me të drejtë vote, është votuar në kongresin 50-të në Budabest të Hungarisë që A.K.V “Kemajl Azizi” nga Kosova të jetë partner zyrtar i kësaj organizate që cilësohet si ndër më të mëdha në botë.
Arsim Abazi, Drejtor Ekzekutiv i AKV “Kemaj Azizi”, ka potencuar rëndësinë e pranimit të Kosovës në këtë organizatë ndërkombëtare duke thënë se Integrimi ne arenën ndërkombëtare për promovimin e trashëgimisë kulturore në nivel ndërkombëtar është shumë e rëndësishëm për vendin tonë. Ai shtoj se përmes tyre, Kosova po promovon vlerat e mirëfillta kulturore të etnosit shqiptar në çdo cep të botës.
Drejtori Abazi falënderoj të gjithë ata që kanë mbështetur A.K.V “Kemaj Azizi” në këtë arritje në veçanti kryetarin e komunës së Vitisë, Sokol Haliti më pas edhe Ministrinë e Punëve të Jashtme dhe Diasporës, Ambasadën e Kosovës ne Hungari por edhe të gjithë artistet e këtij ansambli për punën e tyre të madhe duke u zotuar se ata do të vazhdojnë të promovojnë vlerat e mëdha që ka kultura shqiptare në Kosovë.
Këshilli Ndërkombëtar i Organizatave të Festivaleve Folklorike dhe Arteve Popullore është një organizatë ndërkombëtare joqeveritare në Partneritet Zyrtar me UNESCO-n dhe është i akredituar për të ofruar shërbime këshillimore për Komitetin e Konventës së UNESCO-s për Mbrojtjen e Trashëgimisë Kulturore. /KultPlus.com
Galeria ODA do ta mirëpres ekspozitën “Qielli në ToKë” të shtunën, kur edhe do të bëhet prezantimin i saj nga tre motra të lindura dhe rritura në Belsh të Elbasanit, shkruan KultPlus.
Puna e tyre i drejtohet disa mediumeve të artit pamor si pikturë, fotografi dhe dizajn.
Duke mos e toleruar realitetin e padrejtë, shpeshherë janë bërë pjesë e kauzave politike dhe sociale në vend. Ato kanë marrë pjesë në disa ekspozita kolektive brenda dhe jashtë vendit.
Kjo ekspozitë vjen si një përmbledhje nga disa punime në pikturë dhe skica të realizuara përgjatë udhëtimeve.
Piktura e tyre fakton si një ditar autobiografik të imazhit gjatë udhës, brenda tokës së tyre të brendshme, apo pranë intimitetit familjar, i cili qartëson nevojën humane të njeriut.
Ekspozita e pikturës do të jetë e hapur nga ora 17:00, më 20 nëntor në Galerinë Oda. /KultPlus.com
Prokuroria Themelore e Prishtinës ka njoftuar se ka ndaluar në kohëzgjatje prej 48 orësh një person me inicialet E.H, meqenëse i njëjti kishte ngacmuar Ambasadoren e Luksemburgut në Kosovë, raporton Express.
Sipas Prokurorisë, dje gjatë qarkullimit në trafikun rrugor në Prishtinë, ka shfaqur sjellje të padëshirueshme të ngacmimit ndaj Ambasadores së Luksemburgut në Kosovë.
“Prokuroria Themelore në Prishtinë, Departamenti i Përgjithshëm, me aktvendim të prokurorit të shtetit ka ndaluar në kohëzgjatje prej 48 orësh personin me inicialet E.H., pasi i njëjti dyshohet se ka kryer veprën penale “Ngacmimi”, nga neni 182 të Kodit Penal të Republikës së Kosovës. I dyshuari i lartcekur, më 10.11.2021, gjatë qarkullimit në trafikun rrugor në Prishtinë, ka shfaqur sjellje të padëshirueshme të ngacmimit ndaj Ambasadores së Luksemburgut në Kosovë. Ndaj të njëjtit, do të ndërmerren veprime të mëtejme procedural”, thuhet në njoftim./KultPlus.com
Në Kosovë, vaksina kundër papilloma virusit (HPV), e cila mbron nga sëmundja e kancerit të qafës së mitrës, nuk është në kalendarin e vaksinimit të Institutit Kombëtar të Shëndetësisë Publike.
Papilloma virus është infeksioni më i zakonshëm, i cili transmetohet përmes marrëdhënieve seksuale. Ky infeksion mund të shkaktojë disa probleme shëndetësore duke përfshirë edhe sëmundjen e kancerit të qafës së mitrës.
Sa 47 godina sa licem mlade devojke. Evo sta ona radi pre spavanj!
Vaksina HPV, në bazë të studimeve të bëra së fundmi nga Organizata e Britanisë së Madhe “Cancer Research”, tregon se kjo vaksinë ka zvogëluar rastet e kancerit të qafës së mitrës për gati 90 për qind.
Kanceri i qafës së mitrës vret qindra mijëra gra çdo vit në botë dhe është kanceri i dytë më i zakonshëm te gratë thonë profesionistët shëndetësorë.
Nëse zbulohet me kohë, profesionistët shëndetësorë thonë se është 100 për qind i shërueshëm.
Shpresa është se përmes vaksinimit, sëmundja mund të eliminohet.
Sipas të dhënave të Klinikës së Onkologjisë në Kosovë, në vit trajtohen deri në 120 gra me sëmundjen e kancerit të qafës së mitrës.
Numri i rasteve që përfundojnë me vdekje nuk dihet.
Arnisa Osmani thotë se kur u diagnostikua me kancer në gji i premtoi vetes se do të luftonte deri në fund.
Profesionistët shëndetësorë të fushës së onkologjisë, me të cilët ka biseduar Radio Evropa e Lirë, u bëjnë thirrje institucioneve të shëndetësisë që të fusin vaksinën kundër papilloma virusit (HPV) në kalendarin e vaksinimit.
Drejtori i kësaj Klinike, Ilir Kurtishi thotë për Radion Evropa e Lirë se në të kaluarën kanë diskutuar me autoritetet për rëndësinë e kësaj vaksine, por deri më tani nuk ka diçka që ka filluar në këtë aspekt.
“Mendimi ynë është se kjo vaksinë duhet të fillojë të jepet edhe në Kosovë, siç bëhet në të gjitha vendet e Evropës pasi që kjo e zvogëlon numrin e rasteve të qafës së mitrës. Por, kjo është një çështje që merret nga Ministria e Shëndetësisë dhe Instituti i Shëndetit Publik dhe ekspertët që merren me trajtimin të sëmundjes”, thotë Kurtishi.
Ministria e Shëndetësisë nuk është përgjigjur në pyetjet e Radios Evropa e Lirë se a do të shqyrtojë përdorimin e kësaj vaksine.
Por, bisedat lidhur më këtë vaksinë në Kosovë datojnë nga viti 2018. Në atë vit zyrtarë të MSH-së patën deklaruar për Radion Evropa e Lirë se kjo vaksinë bart kosto të lartë financiare.
Vaksina HPV shpëton jetë
Nisur nga të gjitha studimet e bëra që vaksinën HPV e shohin si mundësi të mirë për zvogëlimin e kësaj sëmundjeje, kryetari i Shoqatës së onkologëve, Arben Bislimi thotë se në një situatë të tillë nuk ka shumë alternativa.
Ai thotë për Radion Evropa e Lirë se institucionet vendimmarrëse duhet ta fusin këtë vaksinë në kalendarin e imunizimit.
“Jo vetëm ky studim, por edhe studimet e mëhershme tregojnë se kanceri i qafës së mitrës, diku 95 për qind të shfaqjes është si pasojë e infeksionit me human papiloma virus. Derisa e dimë shakatarin që vjen deri te sëmundja, atëherë në këtë situatë parandalimi është vaksinimi”, thotë Bisilmi.
Kosova, shton Bislimi duhet të fillojë me kalendar të rregullt të vaksinimit për HPV për moshat 9-12 vjeç dhe prej 13- 25 për ato gra që nuk janë vaksinuar më herët.
Studimi i Organizatës së Britanisë së Madhe “Cancer Research”, ka vë në pah se reduktimi i rrezikut ishte më i dukshëm tek ata që ishin vaksinuar në moshat më të hershme të mundshme 12-13 vjeç, me një rënie prej 87 për qind.
Ata të imunizuar nga mosha 16-18 vjeç kishin një rënie të rrezikut prej 34 për qind.
Në disa shtete të rajonit vaksina HPV është e obligueshme
Vendet e rajonit si Maqedonia e Veriut, Serbia dhe Mali i Zi në kalendarin e vaksinimit kanë vaksinën kundër papilloma virusit.
Në Maqedoninë e Veriut, kjo vaksinë është në kalendar. Ndërkohë që nga viti 2013 dhe është obligative për gratë e moshës 12 deri në 26 vjeç dhe jepet në tri doza.
Në kalenderin e vaksinimit të këtij shteti ceket se kjo vaksinë duhet të jepet për vajzat në klasën e gjashtë.
Edhe Serbia, vaksinën HPV e ka në kalendar të vaksinimit. Vaksina nuk është e obligueshme, por e rekomanduar.
Sipas të dhënave, në Serbi deri në 1,500 gra çdo vit sëmuren nga kanceri i qafës së mitrës dhe kacereve të tjera, kurse vdesin 600 prej tyre.
Derisa vaksina është e rekomanduar dhe jo e detyrueshme sigurimi shëndetësor në Serbi nuk mbulon kostot e vaksinimit. Çmimi i vaksinës është rreth 300 euro.
Mali i Zi në vitin e kaluar kishte ndarë buxhet për vaksinën HPV, por ato mjete u përdorën për nevojat e trajtimit të pandemisë COVID-19.
Sipas autoriteteve në Mal të Zi vaksinimi me vaksinën kundër kancerit të qafës së mitrës do të vazhdojë kur të ketë një situatë më të favorshme epidemiologjike me COVID-19.
Në këtë, shtet sipas të dhënave, rreth 110 gra në vit trajtohen me sëmundjen e kancerit të qafës së mitrës.
Vaksina HPV është në përdorim edhe në Bosnje. Vaksina nuk është e obligueshme dhe ajo mund të blihet në barnatore me një çmim prej 180 euro.
Në këtë shtet brenda një viti 550 gra trajtohen nga kanceri i qafës së mitrës, kurse 140 vdesin./KultPlus.com
Hap dyert sot panairi më i madh i librit në botë, pas një viti pauzë si pasojë e pandemisë, në Frankfurt të Gjermanisë me mesazhin “RI:LIDHEMI”.
E ftuar nderi është Kanadaja. Janë mbi 70 vende nga e gjithë bota që marrin pjesë fizikisht në panair, ndër të cilët, tradicionalisht, i pranishëm është edhe shteti i Kosovës, organizuar e prezantuar nga Shoqata e Botuesve të Kosovës, me ndihmën e Ministrisë së Kulturës, Rinisë dhe Sportit. Ky vit është i veçantë për faktin që kemi një prezantim të përbashkët Kosovë-Shqipëri, me bashkëpunimin e Shoqatës së Botuesve të Kosovës dhe Qendrës Kombëtare të Leximit duke e vendosur një standard shumë të nevojshëm të prezantimit të përbashkët të letërsisë dhe traditës së përbashkët mbarëkombëtare.
Gjatë ditëve të panairit prezentohen botimet e dhjetëra botuesve e qindra autorëve, me praninë fizike të autorëve nga Kosova e nga Shqipëria.
Muaji tetor shquhet si muaji më i rëndësishëm për ngjarjet kulturore të fushës së librit me dy kryengjarjet: Çmimi Nobel dhe Panairi i Librit në Frankfurt.
E ftuara e nderit këtë vit është Kanadaja ku të gjithë pjesëmarrësit në panair do të kenë mundësinë të kuptojnë më mirë kulturën dhe letërsinë e pasur të Kanadasë. Si mysafir nderi i Frankfurter Buchmesse 2021, Kanadaja do të transformojë panairin me pavijonin dhe programin tërheqës, të cilat do të jenë në dispozicion të pjesëmarrësve për t’u njohur me autorët bashkëkohorë kanadezë dhe veprat e tyre në të gjitha zhanret.https://zeri.info/inarticle.html
Mysafiri i nderit do të prezantojë për herë të parë letërsinë në gjuhën angleze dhe frënge,duke shfaqur autorë me famë botërore si Margaret Atwood, Douglas Coupland, Dany Laferrière, Yann Martel, Alice Munro dhe Michael Ondaatje. Iniciativa do të mbështetet nga institucionet e kulturës gjermane dhe kanadeze. Botuesit, agjentët, autorët dhe përkthyesit nga Kanadaja do të përfshihen gjithashtu, duke e bërë Frankfurter Buchmesse 2021 një edicion për t’u mbajtur mend.
Kosova bashkë me Shqipërinë janë të pranishme me një përfaqësim dinjitoz në sallën 4, sallë e botuesve dhe shteteve ndërkombëtare si: Belgjika, Italia, shtetet e Evropës Qendrore, Lindore e Juglindore, Turqia, Holanda, Evropa Veriore, Irani e të tjerë. Janë botimet më të reja të botuesve kryesorë të Kosovës, si: “Buzuku”, “Koha”, “Faik Konica”, “Pema”, “Artini”, “Albas”, “Dija”, “Meshari”, “Magjia e Librit”, “Noa”, e të tjerë, si dhe institucioneve si Akademia e Shkencave dhe e Arteve e Kosovës, Instituti Albanologjik, Instituti i Historisë dhe Universiteti i Prishtinës.
Në fundjavë, panairi hapet edhe për qytetarët dhe vizitorët e thjeshtë, me ç’rast mbahen promovime me autorë dhe orë letrare në stendën e Kosovës, që është edhe pikëtakim i qindra kosovarëve që jetojnë në Gjermani. Një rast i jashtëzakonshëm ky për të gjithë diasporën që jeton në Gjermani, që të njoftohet me prurjet nga letërsia dhe kultura shqiptare, duke mbajtur gjallë lidhjen e trashëgiminë kulturore./ KultPlus.com
Kosova i ka ofruar mundësinë Shteteve të Bashkuara që të krijojnë një bazë të përhershme ushtarake në Kosovë.
Ky propozim, në emër të Qeverisë së Kosovës, është dhënë nga ministri i Mbrojtjes së Kosovës, Armend Mehaj, i cili në Pentagon zhvilloi takim me nënsekretarin e Departamentit amerikan të Mbrojtjes, Colin Kahl.
Sipas një njoftimi për media, ministri Mehaj ka thënë se krijimi i një baze të tillë do t’i kontribuonte “shumë paqes dhe stabilitetit rajonal në Ballkan”.
Kampi Bondsteel në Ferizaj është kampi më i madh ushtarak që SHBA-ja ka në Kosovë.
Ndërkaq, nënsekretari Kahl, sipas njoftimit të Ministrisë së Mbrojtjes, ka rikonfirmuar përkrahjen e SHBA-së për Kosovën drejt integrimeve euroatlantike, “duke theksuar se vizioni i presidentit amerikan, Joe Biden për integrimin e Ballkanit Perëndimor, në BE, mbetet në agjendën prioritare”.
Po ashtu, Mehaj dhe Kahl kanë biseduar edhe për punën e Forcës së Sigurisë së Kosovës, teksa nënsekretari Kahl ka premtuar se përkrahja e shtetit të tij për FSK-në do të jetë e vazhdueshme.
Të dy e kanë vlerësuar lart partneritetin në misionin e parë paqeruajtës të FSK-së në Kuvajt dhe pjesëmarrjen e Kosovës në stërvitjen e forcave të NATO-s “Defender- Europe’21”.
Kosova, në bashkëpunim me forcat amerikane, dërgoi në mars në Kuvajt një kontingjent të FSK-së, që është misioni i parë jashtë vendit i kësaj force./ KultPlus.com
Bilal Xhaferri njihet si shkrimtar, disident, botues dhe aktivist shqiptar. Sot, më 14 tetor shënohet 35 vjetori i vdekjes së tij, shkruan KultPlus.
U lind më 1935 në fshatin Ninat afër Konispolit. Pasi kreu shkollën fillore në vendlindje, duke marrë dy klasë në një vit, më 1948 u largua për të gjetur punë në Sarandë si korrier. Rreth viteve 1962-1963 boton poezitë dhe tregimet e para në gazetat “Zëri i Rinisë”, “Drita”, në revistat “Nëntori”, Ylli”. Më 1966 i botohet vëllimi me tregime “Njerëz të rinj, tokë e lashtë” që pati një sukses jo të zakonshëm. Më 1967 i botohet vëllimi me poezi “Lirishta e kuqe”, por nuk u vu kurrë në qarkullim. Po atë vit konkurroi me romanin “Krastakraus” në konkursin letrar të mbajtur me rastin e 500 vjetorit të lindjes së Skënderbeut, por nuk fitoi. Ky roman do të botohej në vitin 1993.
Më 1968 shkroiskenarin për film artistik “Era shtyn mjegullat”. Prej 1974 deri më 1986 drejtoi, botoi dhe redaktoi revistën “Krahu i shqiponjës”, ku botoi shumë artikuj publicistikë, poezi, tregime, romane, skeçe, vizatime, karikatura, foto artistike, etj. Kjo revistë ishte tribunë e mendimit të lirë që trajtonte vazhdimisht temat e problematikat e çështjes çame, çështjes kombëtare shqiptare, temat rreth diktaturës në Shqipëri e, mbas vitit 1981, më dendur problemet lidhur me Kosovën.
Në faqet e revistës Bilali përveç krijimeve të tij letrare botonte edhe krijimtari letrare e përkthime të autorëve të tjerë shqiptarë e të huaj. Ai arriti të nxirrte 39 numra të kësaj reviste, në dy gjuhë, shqip e anglisht.
Sot, në në përkujtim të këtij poetit të njohur të letërsisë shqipe, KultPlus sjell njërën nga poezitë më të fuqishme të tij, që mban titullin ”Kosova”.
Me ndarje dhe nënndarje gjeografike Me ndarje dhe nënndarje historike Kosova Qe nga ujrat e kulluara të Ohrit Deri në errësirën e minierave të Mitrovicës Që nga brigjet e kaltra të Ulqinit Deri në Qelekullen e në fushën e Nishit Kosova Fushë e begatshme me fruta e grunore Që bie erë pranverës e tëra lule molle Kosova me male kreshnike Male të zhveshur me pisha e bredhishte Që e rrahin qiellin me krahë shqipesh Qe e dehin diellin me aromë rrëshire Qe e ndezin qiellin me zbardhëllime dëbore Kosova Krahinë shqiptare që në fillim të saj Tokë e Manastirit E Prizrenit E Plavës dhe e Gucisë Tokë e legjendave legjendare të Gjergj Elez Alisë Kosova Legjendë e mbetur në rrugëkryq të historisë Kosova Gjithnjë ashtu si gjithnjë Me dhëmbë të shtërnguar e me shpirt ndër dhëmbë Kosova Ku shqiptarët flasin një gjuhë dhe dëgjojnë dy gjuhë Kosova gjithnjë ashtu./ KultPlus.com
