Nga: Eros Ramazzotti & Tina Turner Shqipëroi: Bujar Meholli
Këto janë situata njerëzore momentet midis nesh ndarjet dhe rikthimet rrodhën e ne s’kuptuam gjë prej gjëje, por unë e di se s’mund të pushoj së menduari për ty.
Këto kontradikta mes njerëzve i bëjnë të ndihen sa të lumtur sa të trishtuar nëpër trancizione emociolane siç i kishim dhe ne. Dhe sa kujtime kemi lënë pas…
Po, duhet ta dish se kjo është e vërtetë! Unë thjesht s’mund të pushoj së menduari për ty dhe kohët që kemi kaluar bashkë. Ah! Sa do të doja ta ndiejmë prapë gjithë atë dashuri që kishim dikur…
Në zemrën e vetmuar qëndron gjithçka kapur fort pas kangjellave të krenarisë, por, oh, s’mund të pushoj së menduari për ty dhe për ne…
Këto janë gjërat e kësaj jete ca të mira, ca të këqija, por çfarë është jeta pa një ëndërr që ta mbajë?
T’ia kapësh dorën dikujt dhe mos t’ia lëshosh kurrë është pjesë e një jete të përbashkët, por a thua ka të ardhme?
Në këtë natë që ikën ngadalë para meje, përpiqem të të takoj, dhe të kuptoj, edhe nëse zemrat tona janë zhytur si anije në det përherë i kujtoj e kurrë s’mund t’i harroj.
Oh, s’mund të pushoj së menduari për ty dhe për ne, për kohët tona. Thjesht, s’mund të pushoj duke të menduar… /KultPlus.com
Janë ngjyrat e vjeshtës që do të kenë vendin kryesor te veshjet, atletet dhe mobiliet e reja të stilistëve, pas vitesh rigoroziteti dhe nuancash neutrale dhe totalisht të bardha.
Çdo ngjyrë korrespondon me një ose më shumë emocione dhe krijuesit e dinë këtë.
Thuhet se e kuqja identifikon pasionin, dashurinë ose zemërimin.
Portokallia identifikon energjinë dhe vitalitetin.
E verdha lumturinë dhe jo çuditërisht, në një nuanca të paprecedentë, është edhe ngjyra aktuale e vitit, në një frymëmarrje shprese nga pandemia.
E gjelbra kombinohet me fillimet e reja, bollëkun dhe natyrën, bluja me qetësinë dhe trishtimin dhe vjollca me kreativitetin dhe pasurinë.
Ka miliona modele dhe klasifikime mbi kuptimet e nuancave me të cilat luajnë stilistët, krijuesit dhe stilistët nga e gjithë bota, veçanërisht në këtë moment historik që ndoshta ka nevojë për një shtytje shtesë për të shpërqendruar veten.
Dizajnerët më premtues të momentit si Haris Faslani dhe Joe Perez po vënë bast për gjithçka në universin kromatik duke u mburrur me krijime ultrakromatike për atletet ”Nike”, ngjyra tronditëse për afro-amerikanët më të paguar Kanye West dhe ambiente shumëngjyrëshe me ndikim të lartë për këngëtaren Beyonce.
Artisti dhe stilisti kreativ Matt Pecina gjithashtu kap ngjyrat e rrugës dhe i bën ato të tijat në krijimin e stolave, kolltuqeve, kapeleve dhe televizorëve.
Nga vijnë këto ngjyra?
Nga ngjyrat e botës, kopshtet, lulet, pemët, natyra por edhe nga metropolet, rrugët, mbishkrimet dhe muralet, madje edhe nga tabelat e qytetit.
Ngjyra është përreth, ju vetëm duhet të dini se si ta kapni apo refuzoni atë në krijime origjinale me një përmbajtje të lartë emocionale.
”I dua ngjyrat që përcjellin emocione, më pëlqen t’i përziej dhe të zgjedh veshje shumëngjyrëshe, t’i kombinoj me njëra-tjetrën. Teknologjia na vjen në ndihmë dhe me aplikacionet celulare mund të kap stimujt kromatikë që gjej në rrugë ose në park dhe t’i transferoj te ekipi krijues”, thotë Hillary Taymour./KultPlus.com
Mania artistike në Gjakovë është rikthyer me Festivalin Artmania, i cili po shfaqet për herë të parë ndonjëherë, shkruan KultPlus.
Profesionistët dhe adhuruesit e artit janë mbledhur në një ombrellë për të garuar rreth disa çmimeve që kanë të bëjnë me shfaqjen më të mirë, aktorin më të mirë dhe aktoren më të mirë.
ArtMania përmes jurisë që përbëhet nga regjisori Fatos Berisha, regjisorja Myrvete Kurtishi aktore duajene nga Teatri i Gjakovës dhe Rovena Lule regjisore dhe profesoreshë në akademinë e arteve ne Tiranë do të bëjnë edhe ndarjen e çmimeve.
Më 25 nëntor Teatri i Gjakovës “Ando Zako Çajupi” nisi i pari këtë festival, me shfaqjen “A flasim për Burrat?” me regji të Andeta Radit.
Kjo shfaqje ka të bëjë me tri vajza të cilat përmes interaktivitetit me publikun dhe bisedave mes vete, flasin për burrat e tyre.
Ndërkaq, nesër më 27 nëntor Teatri Kombëtar i Kosovës do të jetë pjesë e këtij festivali me shfaqjen “La Rrem” me regji të Kushtrim Koliqit.
Disa prej shfaqjeve tjera që do të shfaqen ditëve në vazhdim janë “Gratë” me regji të Qendrim Rijanit dhe “Kosovo for Dummies” me regji të Blerta Neziraj.
“Artmania” ka njoftuar se do të bëjë prezantimin e pesë shfaqjeve teatrale nga Kosova, Shqipëria dhe Maqedonia e Veriut.
Përpos shfaqjeve që do të paraqiten, në agjendë janë të përfshirë edhe ekspozita, muzikë e stand-up comedy.
Ky festival po mbahet në Teatrin e Qytetit të Gjakovës “Hadiu Shehu” nga trupat profesioniste sipas agjendës së paraqitur. /KultPlus.com
Është mbyllur thirrja vjetore i Qendrës Kinematografike të Kosovës për mbështetje të projekteve filmike.
Këtë vit të drejtën për të vazhduar konkursin për mbështetje të projekteve filmike e kanë fituar gjithsej 42 projekte filmike.
Nga këto projekte:
8 projekte kanë aplikuar në kategorinë e metrazhit të gjatë artistik;
8 projekte në kategorinë e bashkëprodhimeve minore për film të metrazhit të gjatë artistik
3 projekte në kategorinë e filmit të metrazhit të gjatë dokumentar
1 projekt në kategorinë për postproduksion të filmit të metrazhit të gjatë artistik
5 projekte në kategorinë e filmave të regjisorëve debutant
8 projekte në kategorinë e filmave të shkurtë artistik
1 projekt në kategorinë e filmave të shkurtë dokumentar
1 projekt në kategorinë e filmave të shkurtë të animuar dhe
7 projekte në kategorinë për zhvillim skenari për film të metrazhit të gjatë artistik, dokumentarë, dhe të animuar.
Pas mbylljes së konkursit është formuar komisioni i konkursit i cili verifikon secilin aplikacion se a i plotëson kriteret e përcaktuara me konkurs dhe aktet ligjore në fuqi. Komisioni ka hartuar raporte të veçanta për secilin projekt dhe një raport gjithëpëfshirës të projekteve filmike të cilët nuk kanë plotësuar kushtet për të vazhduar konkurimin.
Me përfundimin e procesit të punës së komisionit të konkursit dhe atij financiar, është emëruar juria vlerësuese të cilët do të shqyrtojnë dhe vlerësojnë projektet./KultPlus.com
Albumi “30” i artistes Adele është bërë albumi më i shitur i vitit deri më tani.
Deri më tani janë regjistruar 261,000 shitje vetëm në javën e parë, duke kaluar kështu edhe albumin debutues që shënoi rikthimin e grupit muzikor “ABBA”, me 204.000 shitje.
Megjithatë, shifrat e shitjeve të ”30” janë dukshëm më të ulëta se ato të albumit të saj të mëparshëm “25”, të publikuar në vitin 2015.
Ai album, i treti i saj, u hap me 800,000 shitje në javën e parë, që do të thotë se “30” ka shitur 32% të paraardhësit të tij.
Rënia mund të shpjegohet pjesërisht me rritjen e madhe të transmetimit në gjashtë vitet e fundit. Përveç kësaj, pati një nxitje më të madhe për fansat për të blerë “25”, pasi u mbajt jashtë platformave të transmetimit për gjashtë muajt e parë të publikimit./KultPlus.com
Shqetësimi për një variant të ri të koronavirusit është në rritje.
I fundit është versioni më i mutuar i zbuluar deri më tani – dhe ka një listë kaq të gjatë mutacionesh, saqë u përshkrua nga një shkencëtar si “i tmerrshëm”. Ndërsa një tjetër tha se ishte varianti më i keq që ata kishin parë.
Janë ende ditët e para dhe rastet e konfirmuara janë akoma të përqendruara kryesisht në një provincë në Afrikën e Jugut, por ka të dhëna se mund të jetë përhapur më tej. Menjëherë ka pyetje rreth asaj se sa shpejt përhapet varianti i ri, aftësia e tij për të anashkaluar një pjesë të mbrojtjes së dhënë nga vaksinat dhe çfarë duhet bërë për këtë. Ka shumë spekulime, por ka shumë pak përgjigje të qarta.
Pra, çfarë dimë ne?
Varianti quhet B.1.1.529 dhe ka të ngjarë t’i jepet një emër i koduar grek (si variantet Alfa dhe Delta) nga Organizata Botërore e Shëndetësisë sot (e premte).
Është gjithashtu tepër i mutuar. Prof Tulio de Oliveira, drejtori i Qendrës për Reagimin dhe Inovacionin Epidemik në Afrikën e Jugut, tha se kishte një “plejadë të pazakontë mutacionesh” dhe se ishte “shumë i ndryshëm” nga variantet e tjera që kanë qarkulluar.
“Ky variant na befasoi, ka një kërcim të madh në evolucion [dhe] shumë mutacione të tjera që ne prisnim,” tha ai.
Në një konferencë për media, Prof de Oliveira tha se kishte 50 mutacione në përgjithësi dhe më shumë se 30 në proteinën spike, e cila është objektivi i shumicës së vaksinave dhe çelësi që virusi përdor për të zhbllokuar derën në qelizat e trupit tonë. Ai ka 10 mutacione, krahasuar me vetëm 2 për variantin Delta që përfshiu botën.
Ky nivel mutacioni ka shumë të ngjarë të ketë ardhur nga një pacient i vetëm, i cili nuk ishte në gjendje të mposhtte virusin.
Shqetësimi tani është se ky virus është rrënjësisht i ndryshëm nga origjinali që u shfaq në Wuhan, Kinë. Kjo do të thotë se vaksinat, të cilat janë krijuar duke përdorur variantin origjinal, mund të mos jenë aq efektive.
Prof Richard Lessells, nga Universiteti i KwaZulu-Natal në Afrikën e Jugut, tha:
“Ajo që na shqetëson është se ky virus mund të ketë transmetueshmëri të rritur, aftësi të rritur për t’u përhapur nga personi në person, por gjithashtu mund të jetë në gjendje të kapërcejë pjesë të sistemit imunitar.”
Ka pasur shumë shembuj të varianteve që janë dukur të frikshme fillimisht, por nuk kanë qenë ashtu. Varianti Beta ishte më shqetësuesi në fillim të vitit, por në fund ishte Delta me përhapje më të shpejtë dhe ajo që pushtoi botën.
Studimet shkencore në laborator do të japin një pamje më të qartë, por përgjigjet do të vijnë më shpejt nga monitorimi i virusit në botën reale. Është ende herët për të nxjerrë përfundime të qarta, por tashmë ka shenja që po shkaktojnë shqetësim.
Ka pasur 77 raste të konfirmuara plotësisht në provincën Gauteng në Afrikën e Jugut, 4 raste në Botsvana dhe 1 në Hong Kong (i cili është i lidhur drejtpërdrejt me udhëtimet nga Afrika e Jugut).
Megjithatë, ka të dhëna se varianti është përhapur edhe më gjerësisht.
Pra, tani për tani dimë vetëm se kemi të bëjmë me një variant që ngre shqetësime të rëndësishme, pavarësisht nga boshllëqet e mëdha në njohuritë tona. Ai duhet parë nga afër dhe shtron pyetje të thella se çfarë të bëjmë dhe kur.
Por nga pandemia kemi nxjerrë një mësim se nuk mund të presim gjithmonë derisa t’i kemi të gjitha përgjigjet./KutlPlus.com
5 artistë, muzikantë të talentuar sollën mbrëmjen e djeshme për publikun krijimet e tyre, si “eksplorim” në polifoninë shqiptare me tingujt e pianos. Koncerti u mbajt për artdashësit në sallën “Tonin Harapi” të liceut artistik “Jordan Misja”, në kuadër të edicionit të nëntë të Festivalit “Pianodrom”.
Ky koncert përkoi me 25 nëntorin e përfshirjes së isopolifonisë shqiptare në UNESCO, si pjesë e trashëgimisë kulturore botërore. Sipas kompozitorit Aleksandër Peçi, i cili ka kuruar koncertin, janë 5 “arkitektë” që kanë nisur një projekt të ri.
“Muzika botërore nuk është marrë me polifoninë shqiptare, por edhe vetë muzika shqiptare më shumë ka gërmuar materialin melodiko-pentatonik në sipërfaqe, pa hyrë thellë në galeritë e ngrehinës polifonike”, shprehet Peçi.
“Jam absolutisht krenar, se “Pianodrom” është festivali më avangard në muzikën e kompozicionin shqiptar”, tha Peçi.
Veprat e luajtura në skenën e “Tonin Harapit” janë 8 kompozicione moderne, “Albphonia 2”, “Muzikë kabaistike”, “Ves”, “Toc- Alb- atta”, “Fragment nga Sonata n. 2 Argjiro”, “PolifonISO”, “Vajzë e valëve”, “Baticë-zbaticë dallgësh polifonike” në interpretimin e një ekipi fantastik: Merita Tërshana, Laura Lila, Paola Budani, Mimoza Kosturi.
Sopiqoti: Muzikë kontemporane bazuar mbi “Mbeçë more shokë mbeçë”
“Albphonia 2” titullohet vepra e kompozitorit Kris Sopiqoti, e cila hapi koncertin e cila u luajt në piano nga Paola Budani. Kompozitori Sopiqoti u shpreh pas koncertit se “AlbPhonia 2” është shkruar posaçërisht për këtë ngjarje artistike, bazuar mbi këngën “Mbeç more shokë, mbeçë”.
“Kënga në vetvete është një lamento e kënduar, kështu që duke u bazuar në melosin dhe ‘gjendjen emocionale’ të këngës, u shkrua një vepër për piano, e sjellë në kohën tonë me teknikat dhe mendimin muzikor kontemporan, por duke u ndjerë që është polifoni dhe muzikë shqiptare”, u shpreh kompozitori.
Sopiqoti shpjegon se “Albphonia 2” mban këtë titull pasi është vepra e dytë nga albumi “Albphonia”, i cili është një album me vepra solo për të zbuluar skajet dhe teknikat e instrumenteve të ndryshëm por gjithmonë bazuar në muzikën tonë, duke vënë në dukje se emri formohet nga dy fjalë Alb (Albania) dhe Phonia (tingull).
“Falënderoj profesor Peçin që mendon vazhdimisht për muzikën kontemporane shqiptare dhe si nismëtar i këtij koncerti”, u shpreh kompozitori Kris Sopiqoti.
Kompozitori shton se muzika kontemporane duhet të luhet dhe të shkruhet më shumë, ndërkohë që është e pëlqyeshme dhe e domosdoshme për edukimin e publikut artdashës.
Kris Sopiqoti ka mbaruar Universitetin e Arteve në klasën e mjeshtrit Aleksandër Peçi për kompozicion dhe tashmë është pedagog i jashtëm në këtë universitet. Ai ka qenë pjesë e programit Erasmus në konservatorin “Giusepe Tartini” të Triestes në Itali, në klasën e Fabio Nider, ku u vlerësua me 30/30 Lode.
Kompozitori ka marrë pjesë në mjaft koncerte, ashtu sikundër kompozimet e tij janë luajtur edhe në sallën e Universitetit të Arteve, ndërsa vepra e tij “AlbPhonia” për klarinetë solo u luajt nga Xhovani Dimo në klarinetë në Kolumbi dhe Ansambli i Dhomës Sirius premierë në Australi, e performuar nga Ian Sykes në vitin 2019. Kjo vepër është luajtur edhe nga Jerome Comte i Ansamblit Kontemporan të Parisit
Kompozitori Kris Sopiqoti po ashtu bashkëpunon me Ansamblin Kontemporan “Enydra ensemble“ të Venecias./atsh/KultPlus.com
Vrasja e mori nga kjo jetë mirëpo, muzika e tij ende frymon. Haki Misini nuk mbetet vetëm një zë i bukur që dëgjohet por, ai është kthyer në një ndër figurat kryesore të muzikës rok, shkruan KultPlus.
Ani pse kanë kaluar 22 vite prej kohës kur ai u vra, krijimtaria e tij e bujshme do të vazhdoj të jetojë gjatë.
“Në syrin tënd pashë një lot”, “Dashuri e humbur”“Moj e mira te pojata”, “Tri gota”, “Idila verore”, “Qenke rritë moj s’të zen këmisha”, janë këngët që edhe sot vazhdojnë të dëgjohen e interpretohen nga artistë të ndryshëm.
Sot KultPlus ua risjell tekstin dhe videon e këngës “Në syrin tënd pashë një lot,”:
Në syrin tënd pashë një lot, që rrjedhte qetë në vetmi, loti sikur më tha, djal pse rrinë ne largësi?
Prej meje kush të largoj? Dhe zemrat na i helmoj, vet’ thoshe të dashuroj, ai premtim tash, ku shkoj?
Ku janë netët e haresë? Ku janë ditët e rinisë? Vallë çdo gjë, u vu në harresë i lamë çastet e vetmisë.
Në zemër dritë më nuk ka, errësira seç na kaplon, unë më nuk te shoh, as dielli më nuk më ngroh.
Prej meje kush të largoj? Dhe zemrat na i helmoj, vet’ thoshe të dashuroj, ai premtim tash, ku shkoj?
Ku janë netët e haresë? Ku janë ditët e rinisë? Vallë çdo gjë, u vu në harresë i lamë çastet e vetmisë./ KultPlus.com
pa dyshim se sot janë shkrue shumë poezi me titullin “bora e parë në dhé të huej” ku asht folë e asht tjerrë gat për gacat e vagullta të votrës qi e mbajnë insanin nxehtë aty ku menxi shkrep qibriti;
për miq të largët qi janë ba mukajet në çdo herë të motit kur s’ka punue as kryet, as dora — qi janë rrekë me çupuritë zjermin kur dyjesë i ka ra mardha;
për vetminë në rrugë të reja me kulme të thepisuna neobaroke qi, sado të bukra, ia nxjerrin njérit rropullitë hap mbas hapi e tingujtë e guhëve të huja lundrojnë në vrotomet e gjakut qi jesin mbrapa;.
për kangët qi harrohen dita-ditës fjalët e të cilave dikur kanë jehue nëpër ajri dhe avujt e rakisë ku kanë pluskue hokat tona të papasoja e dëshirat irreale për me ia hangër njani-tjetrit zemrën;
për nanë, për babë, për kusherij për kujtime sa të ngrohta, aq edhe të zbehta për xiglitjen e barit të oborrit në themër.
pa dyshim se janë shkrue shumë të tilla sot, “bora e parë në dhé të huej” edhe mirë bajnë qi shkruejnë,
po unë s’po kam takat me përsiatë e me mendue qysh këto tufa fraktalesh, qi dikur kanë ra në ftyra të dashtunish e janë shkri në procese ngrykimesh, dijnë me t’mbush me kaq shumë vner.
“bora e parë në dhé të huej” shpresoj qi krejt këto poezi qi janë shkru sot botohen në ni përmbledhje,
pos kësaj. kte po e baj kruspull e po e gjuej në voter për me i dhanë pak hez zjermit./KultPlus.com
Regjisori i trilogjisë, “Lord of the Rings”, Peter Jackson, ka zbuluar që bendi The Beatles kishte dashur ta realizojë versionin e vet të kësaj serie të romaneve në të 1960-tat.
Jackson, që e solli këtë trilogji në vitet e para të shekullit 21, së fundi e publikoi dokumentarin “The Beatles: Get Back”, që përcjell ditët intensive të grupit legjendar në krijimin e albumit të tyre të fundit bashkë, “Let It Be”.
“Ishte diçka që John [Lennon-i] po e shtynte, dhe J.R.R. Tolkieni ende i kishte të drejtat filmike atëbotë, por nuk i pëlqente ideja që ta bënin The Beatles. Andaj ai e mbyti atë ide”, ka thënë Jackson për People.
“Me shumë gjasë shumë këngë të mira do të dilnin nga albumi filmik”./KultPlus.com
Dje u shënua dita e tretë, e cila u karakterizua me panele, diskutime dhe aktivitete si: promovim librash dhe bashkëbisedim me veteranët e UÇK-së dhe familjet e dëshmorëve.
Mbrëmja zyrtarisht u hap nga Konsulli i Përgjithshëm, Arjan Kashtanjeva, ku fillimisht shprehu keqardhjen për të vdekurit dhe solidaritetin për familjarët e viktimave nga aksidenti i rëndë në Bullgari.
Konsulli i Përgjithshëm, Kashtanjeva, fjalimin e tij e vazhdoi duke u uruar mirëseardhje të gjithë të pranishmëve, e veçanërisht veteranëve të UÇK-së, duke shprehur mirënjohje të thellë për kontributin madhor, sakrificat dhe çdo gjë që kanë bërë e flijuar për lirinë dhe pavarësinë e Kosovës. Të pranishëm ishim edhe familjet e dëshmorëve: Ardian Krasniqit, Mujë Krasniqit, Xhemajl Fetahaj dhe të Tonit e Murtajës.
Konsulli i Përgjithshëm, Kashtanjeva, falënderoi edhe mysafirët nga Kosova, autorin dhe veteranin e UÇK-së, Gazmend Bytyçi, Komandantin e UÇK-së nga Zona Operative e Nerodimes, Ilmi Ramusholli -Graniti, gazetarin Nuhi Bytyçi dhe profesorin Xhevdet Pantina.
Veçantia e kësaj dite ishte edhe promovimi i dy librave ‘Karabina e Gjyshit’ dhe ‘Mallkimi i Shekujve’ me autor z. Gazmend Bytyçi. Para se fjala të kalonte tek autori, asistentja ekzekutive, Saranda Gashi, bëri recensionin e romanit ‘Mallkimi i Shekujve’, duke sjellë kështu një lexim analitik dhe të detajuar.
Autori i dy librave ‘Karabina e Gjyshit‘ dhe ‘Mallkimi i shekujve’ z. Gazmend Bytyçi, para të pranishmëve bëri një përmbledhje të dy romaneve të tij, të cilat kanë një tematikë të përbashkët, atë të luftës dhe vështirësitë që kaloi vendi ynë. z. Bytyçi shprehu një falënderim të veçantë për KP Kashtanjeva dhe për të gjithë stafin e Konsullatës, për angazhimin, punën e mirë që po e bëjnë si dhe për përfaqësimin e denjët të institucioneve të RKS-së dhe prezantimin e vlerave.
Pal Sokoli nga “Lidhja e Shkrimtarëve Shqiptarë në Gjermani”, por edhe të pranishmit vlerësuan lart librat dhe organizimin.
Me një fjalë rasti, të pranishmëve ju drejtua edhe Komandat Graniti, i cili evokoj disa çaste nga vijat e frontit, duke vlerësuar heroizmin e treguar nga bashkëluftëtarët, ku në mesin e tyre shumë janë dëshmor dhe invalid të UÇK-ës
Konsulli i Përgjithshëm, Arjan Kashtanjeva, në përmbyllje shkurtimisht njoftoi të pranishmit edhe për rrjedhën e punës në Konsullatë dhe aktivitet që do ta pasojnë Javën e kulturës.
Gjithashtu KP Kashtanjeva falënderoi gastronomin Servet Hajrullahi, i cili edhe pse larg, nga Bielefeldi, kishte marrë përsipër ushqimin dhe shërbimin për eventin, gjë që u vlerësua lart edhe nga të pranishmit. /albinfo/KultPlus.com
Mbrëmë në KultPlus Caffe Gallery u bë hapja e ekspozitës ‘Distanca’ e Nagip Tashit nga Tërrnoci. 15 mozaikë të punuar në dru, nga zdrukthëtari Tashi paraqesin disa nga figurat më të rëndësishme të historisë shqiptare por edhe ndërkombëtarëve, shkruan KultPlus.
Tashi, i cili ka punuar në këta mozaikë në 20 vitet e fundit, në ekspozitën personale ‘Distanca’ ka paraqitur figura të rëndësishme nga arti dhe politika, përfshirë Bekim Fehmiun, Gjergj Kastrioti Skënderbeun, Ibrahim Rugovën, Ukshin Hotin, Adem Demaçin, Adem Mikullovcin, Arbën Xhaferin, Hadi Shehun, Leze Qenën, Muharrem Kadriun, Llukman Halilin, Abdurrahman Shalën, Ridvan Qazimi- Vajën, Ibrahim Kodrën dhe Barac Obamën.
E një numër i madh i artdshësve dhe familljarë të personazheve të cilëve u janë realizuar portrete, kishin zënë hapësirat e KultPlus Caffe Gallery dhe prisnin padurim për hapjen e ekspozitës.
Fjalën e para e mori drejtoresha e KultPlus, Ardianë Pajaziti e cila shprehet e lumtur për hapjen e kësaj ekspozite e cila sipas saj paraqet një përzgjedhje me një shije të hollë të figurave të ndryshme, figura këto që kanë kontribuar dhe vepruar qoftë në politikë ashtu edhe në kulturë.
“Jemi shumë të kënaqur për hapjen e ekspozitës ‘Distanca’ edhe për këtë përzgjedhje të veprave. Jemi poashtu të lumtur që në këtë ngjarje kemi të pranishëm edhe familjarë të personazheve, portretetet e të cilëve do të jenë të ekspozuar për dy javë për artdashësit”
Po ashtu, Pajaziti e konsideron hapjen e kësaj ekspozite një festë që i paraprin festës së 28 Nëntorit.
“Jam shumë e lumtur që sidomos në këtë kohë të festës së 28 nëntorit, e kemi sjellë Luginën dhe një pjesë shumë të madhe të bashkëvendasëve të Nagipit, me ardhë dhe me pa këtë ekspozitë”- shtoi ajo.
E i emocionuar për hapjen e ekspozitës së tij personale, foli autori Nagip Tashi, i cili falënderoi drejtoreshën Pajaziti që ia bëri të mundshëm ekspozimin e punimeve të tij para një mase më të madhe njerëzish.
“Ekspozitën e kam titulluar ‘Distanca’ për shumë arsye, është shumëdimensionale. Së pari, mozaikët e mi nuk shihen prej larg, e dyta, me kriju një lloj kulture se punimeve nuk duhet me iu afru shumë afër, e ka një lloj distance e distanca paraqet vendin prej nga vij unë, më është dashtë me ardhë në Prishtinë me i ekspozu punimet e mia, jo pse atje nuk ka vend, por sigurisht se këtu ka vend dhe masë më të madhe.”- thotë Tashi duke vazhduar se secilin mozaik ai e ka realizuar për shkak se i ka dashur këta persona, shkruan KultPlus.
Me lot në sy, ai rrëfen para pjesëmarrësve se te secila figurë e paraqitur në këto 15 punime, ai sheh nënën e tij.
“Punimin e parë kur kam fillu me punu, atë të Bekim Fehmiut, e kam pasë si provë me punu nënën time. Pasi e kam përfundu, e kam thirrë nanën edhe e kam vendosë 20 metra larg punimit, e kam pyet kush është tha Bekim Fehmiu, kështu që kjo dëshmon se unë jam shumë i lidhur emocionalisht me këto punime se përndryshe nuk i kisha punu.”- shtoi ai.
Në këtë ngjarje, nuk mungoi as gruaja e Adem Mikullovcit, e cila ndau me emocion mbajti një fjalë rasti ku u shpreh se ndjehet e lumtur që po i sheh të gjitha këto figura që i ka njohur dhe ka punuar me ta.
“Më pëlqen që te Ademi e ke nxjerrë atë shkimin e tij, sytë, nuk është lehtë të realizohet një skulpturë, e sidomos skulpturë nga druri”- thotë Mikullovci duke e përgëzuar autorin për punën e bërë.
Ndërkaq, arkitekti Arbër Sadiku, foli pa hezitim për këto vepra të Nagip Tashit, me të cilin ai thotë se njihen që moti dhe e kishte idoll në fëmijërinë e tij duke e kujtuar si një person që gjatë gjithë kohës ka pikturuar.
“Nagipi, e përmendi disa herë që është zdrukthëtar, por pak rëndësi ka se çka je, me rëndësi është të jesh mjeshtër në punën që e bën.”- shton Sadiku.
E pranishme në këtë mbrëmje, ku ishte e ekspozuar portreti i nënës së saj ishte edhe vajza e Leze Qenës, Argjenda Qena-Hajdini, e cila shprehet e lumtur që në një formë apo tjetër, ajo nuk po harrohet.
“Më erdhi shumë mirë që në një mënyrë apo tjetër mama nuk po harrohet, e për këtë jam shumë e lumtur. Njerëzit që e kanë pasë një peshë duhet me u kujtu e mos me u harru se sigurisht që na familjarët nuk i harrojmë asnjëherë.”- shprehet ajo për KultPlus.
Mozaikët do të jenë të ekspozuar për dy javë në KultPlus Caffe Gallery. Të gjitha punimet janë në shitje dhe të gjithë të interesuarit mund të kontaktojnë me autorin./KultPlus.com
Mbrëmë në Shtëpinë e Kulturës “Reshat Çoçaj” ka nisur edicioni i 32 e Festivalit “Hasi Jehon” me jehonën e lajmit që Festivali “Hasi Jehon” do ta merr statusin e asetit në Mbrojtje të Përhershme. Edhe edicioni i 32 ka nisur me ekspozitën e Prodhimeve të bukës të përgatitura në shtëpi nga gratë hasjane ose në furra modërne duke e bërë një lidhshmëri mes të vjetrës dhe modernes.
Haziz Hodaj drejtor i Festivalit tha se është bërë traditë hapja e ekspozitës së prodhimit të bukës
“Para se të nis proframi festiv e Festivalit “Hasi Jehon” traditë tanimë është edhe hapja e ekspozitës së prodhimit të bukës, me të cilën Hasi ka mbijetu nëpër shkeuj, ka ekzistu nëpër shekuj dhe i ka mbijetu shumë sfidave, pra buka është simboli jonë….edhe bujarisë, edhe i fisnikrisë edhe i mbijetesës, kështu që këto dhejtë vitet e fundit e kemi pa obligim që këtij evenimenti t’ia bashkëngjesim edhe këtë pjesë të festës” tha Haziz Hodaj.
Më tej ai tha se në “në kushte të zakonshme ne e kemi bërë edhe demonstrimin e gatimit në ambiente të Festivalit. Gra hasjane kanë gatuar në magje, kanë pjekë pite këtu, kanë pjekë flija, por tani jemi në kushte pak më të rënda dhe këto gatime, shumica janë gatime të shpisë, që i kanë bërë gratë tona, por edhe furrat për ta bërë një lidhshmëri në mes të të vjetrës dhe modernes”.
“E vlerësoj prezencën e juaj në këto kushte të rënda, pak specifike. Pran meje e kam drejtorin e Qendrës Rajonale të Mbrojtjes së Trashëgimisë, Samir Hoxha, i cili është iniciator që Festivali “Hasi Jehon” ka kapërcy në Komisionin Departamentit të Trashëgimisë të Ministrisë së Kulturës për të hy në mbrojtje të shtetit. Po e presim një vendim final, vetëm nga Komisioni Paralamentar dhe realisht pas kësaj Festivali “Hasi Jehon” do të jetë një pasuri shtetnore e jona, e cila do ta ketë përkujdessjen shtetërore.
Unë besoj që e kemi meritu një status të tillë sepse Festivali “Hasi Jehon” tashmë është njëri ndër Festivalet më të vjetra, sepse mosha e tij është 45 vjet, këtë vit, ndërsa është edicioni i 32” tha Haziz Hodaj.
“Sigurisht se jam shumë i lumtur me statusin që po na ipet sepse ne e kemi pas obligim që kemi punu me vite, që të ua bartim gjeneratave të reja një status më të sigurt për Festivalin Hasi Jehon. Jemi mundur që duke filluar prej kësaj sofre këtu edhe në skenë t’i plasojmë vlerat tona të trashëgimisë shpirtësore sepse kjo është alfa dhe omega e Festivalit “Hasi Jehon”.Pas marrjes së këtij statusi do të jemi edhe më të obligueshëm që këto vlera edhe t’I hulutmojmë, edhe t’I kultivojmë, por ti plasojmë edhe në skenë për t’ua bartë” tha Haziz Hodaj.
Skënder Zogaj: Hasi e ka njohur që në lashtësi shejtninë e bukës prandaj një sofër që jep bukë jep gjithëçka
Skender Zogaj, poet dhe publicist (ish kryetar e Komunës se Fushë Kosovës) tha se sot ka ardhur këtu “nga dëshira e thellë e një dëshmitari të hershëm, që në këto treva është luftu me shpirtin e njerëzve sepse 50 vjet më parë edhe qendrat më të mëdha të Kosovës ishte vështirë të thuhet një fjalë e mirë, të thuhet një këngë, të thuhet një varg etj. Hasi i njohur për thatësinë i ka ushqy së paku nja shtatë shtete të Rajonit tonë sepse kanë qenë mjeshtrit kryesor dhe është shumë e bukur dhe shumë simbolike sepse shejtnia ka të bëjë me bukë dhe Hasi e ka njohur që në lashtësi shejtninë e bukës prandaj një sofër që jep bukë jep gjithëçka”.
Unë sinqerisht nga zemra i uroj këta njerëz sepse këta kanë ditë me qëndru dhe konsidreoj së patriotizmi kryesor i njerëzve në këtë botën tonë është puna që nis nga buka dhe përfundon te kënga. Hasi është i njohur dhe jo që është Hasi I Prizrenit por unë mendoj që Hasi me punën e vetë është duke ndërruar këtë rend sepse jam I bindur që shumë shpejt Prizreni ka me thënë Prizreni i Hasit. Dhe unë uroj që Prizreni të jetë i Hasit.
Samir Hoxha drejtor i QRTK-së: Festivali “Hasi Jehon” propozohet që të merr statusin e asetit në Mbrojtje të Përhershme
Samir Hoxha drejtor i QRTK-së tha se për të është nder dhe kënaqësi e veçantë që sot në këtë edicion të 32 të Festivalit “Hasi Jehon” .
“Të jem pjesëmarrës sikurse edhe herave të tjera që e kemi ndjek nga afër në funksione dhe pozicione të tjera dhe Hazizi po na e lenë meritat neve, po na e kemi kry detyrat dhe përgjegjësit në përputhje me mandatin që e kemi si Institucion bartës i Ministrisë së Kulturës. Kontributi dhe merita kryesore i takon banorëve të Hasit, i takon Hazizit dhe bashkëpunëtorëve të tij, të cilët e mbajtën Festivalin edhe në rethana okupimi dhe pas luftës tha Samir Hoxha dhe shtoi… “Prozpozimi i QRTK-së për ti dhënë statusin e mbrojtur ligjor këtij Festivali në kategorinë shpirtërore… besoj fuqishëm që brenda këtij viti deri në vitin e ri do të formalizohet nga ana e Institucioneve, në këtë rast nga Këshilli I Kosovës për Tashëgimi dhe pastaj do të aprovohet edhe nga ministri dhe jam i bindun që nga viti i ardhshëm, përkujdesi shtetnor përveç atij komunal do të jetë me i shtuar. Do te jëtë obligim shtetnor përkujdesja e duhur dhe të merituar për këtë Festival”.
Hasi Jehon është njëra ndër ngajrjet më të rëndësishme, më të konsoliduara dhe më të vjetra në Kosovë
Pas “Ekspozitës së bukës”, në skenën e Festivalit “Hasi Jehon” Haziz Hodaj ka thënë se është i emocianuar edhe i gëzuar edhe krenar.
“Hasi Jehon është njëra ndër ngajrjet më të rëndësishme, më të konsoliduara dhe më të vjetra në Kosovë, në të cilën kultivohetet, ruhet, hulmutohet dhe plasohet në skenë vlera e trashëgimisë sonë shpirtërore. Malësori vjen me një program ekskluziv duke ia dediku kësaj trashëgimie, historisë sonë, trashëgimisë sonë për të cilën jemi shumë krenarë” tha Haziz Hodaj.
Na vazhdim më “Dasmën hasjane” është paraqitur mikpritësi, ShKA “Malësori”, ndwrsa pas saj janë paraqitur Ansambli “Çeta e Profetëve” nga Kruma e Hasit. Grupi Polifonik “Shpati”, SHKA “Bresana” nga Bresana dhe këngëtari Masar Sinani. /KultPlus.com
Shtetndërtimi i Kosovës, i mbështetur mbi formulën e barazisë në federatën e atëhershme jugosllave, që praktikisht do të thoshte çlirim nga zgjedha serbe, fillon me demonstratat e nëntorit të vitit 1968, të nisura në Prizren më 5 nëntor dhe të vazhduara në disa qytete, për t’u kurorëzuar me ato në Prishtinë, më 27 nëntor. Këto demonstrata, ku për herë të parë doli në pah kërkesa për Republikën e Kosovës, ua hapën rrugën ndryshimeve të mëdha që u pasqyruan me themelimin e Universitetit të Kosovës në Prishtinë në vitin 1970 si dhe institucioneve të tjera kombëtare, prej nga u ngrit brezi i një inteligjencie arsimore, kulturore dhe politike që mori përsipër proceset e mëtutjeshme të avancimit të pozitës kushtetuese të Kosovës në federatën jugosllave, që do të sanksionohen me ndryshimet kushtetuese të vitit 1974.Ideatorët dhe organizatorët e këtyre demonstratave do të mbesin në histori si shtysë e një procesi ndër më të rëndësishmit, që vuri në lëvizje ndryshimet historike me anën e kërkesave legale, jashtë konvencave ideologjike-revolucionare të viteve të pesëdhjeta dhe të gjashtëdhjeta mbi konceptin e një iredetizmi ideologjik. Ato vazhduan në vitin 1981, në vitin 1989, 1997, 1999 për t’u kurorëzuar me shpalljen e pavarësisë së Kosovës, më 17 shkurt 2008. /KultPlus.com
Festivali i Filmit DokuFest do të bëjë shfaqjen e disa filmave që vënë theks në të drejtat e njeriut dhe shkeljet e tyre në vazhdimësi, shkruan KultPlus.
Gjatë dhjetorit, DokuFest përmes programit filmik do të vë theksin në Muajin Universal të të Drejtave të Njeriut me filma që dëshmojnë shkelje të të drejtave të njeriut dhe krijon një forum për individë të guximshëm në të dy anët e objektivit për të fuqizuar audiencën me njohurinë se angazhimi personal mund të bëjë ndryshim.
“Ne në DokuFest bashkohemi me njerëzit anembanë globit për të mbrojtur barazinë, drejtësinë dhe dinjitetin e të gjithë njerëzve”, shkruhet në llogarinë zyrtare të “DokuFest”.
“For Sama, Why Slavery: A Woman Captured, Little Palestine, Diary of a Siege, Why Stories: Favela Frontlines, Notturno, Why Stories: Daphne a Pen too sharp”, janë filmat që do të shfaqen çdo të martë dhe të premte në DokuKino.
Të gjithë filmat do të shfaqen në orarin e njëjtë, 19:00. /KultPlus.com
Ngjarja e përvitshme tradicionale – mbledhja e Republikës së Kosovës dhe asaj të Shqipërisë – u mbajt sot në Elbasan, kur edhe u mbledhën krerët e të dyja shteteve, shkruan KultPlus.
Sesionin e mbledhjes së përbashkët e hapën me fjalët e tyre kryeministrat Albin Kurti dhe Edi Rama duke ua lënë vendin anëtarëve të kabineteve që të parashtrojnë marrëveshjet që do të nënshkruhen nga ministritë përkatëse.
Ministri i Kulturës, Rinisë dhe Sportit, Hajrulla Çeku, shpalosi marrëveshjet që do të nënshkruajë ministria dhe institucionet qendrore të kulturës.
Kalendari i Përbashkët Kulturor Vjetor, Marrëveshja e bashkëpunimit në fushën e Trashëgimisë kulturore dhe muzeve; Protokolli i bashkëpunimit mes Teatrit Kombëtar të Operas, Baletit dhe Ansamblit Popullor të Republikës së Shqipërisë dhe Operës, Filharmonisë, Baletit Kombëtar të Kosovës dhe Ansamblit Kombëtar të Këngëve dhe Valleve “Shota” të Republikës së Kosovës, Marrëveshja e Bashkëpunimit të Muzeut Kombëtar të Kosovës dhe Muzeut Historik Kombëtar; Marrëveshja e Bashkëpunimit të Bibliotekës Kombëtare të Kosovës “Pjetër Bogdani” dhe Bibliotekës Kombëtare të Shqipërisë; Marrëveshja e Bashkëpunimit të Parkut Arkeologjik “Ulpiana” dhe Parkut Arkeologjik Kombëtar Apolonia; janë marrëveshjet që do të nënshkruhen në fushën e kulturës e të trashëgimisë; si dhe Marrëveshja e bashkëpunimit mes Agjencisë Shtetërore të Arkivave të Kosovës dhe Drejtorisë së Përgjithshme të Arkivave të Shqipërisë.
Ministrat Hajrulla Çeku dhe Elva Margariti nënshkruan Kalendarin e Përbashkët Kulturor Vjetor mes Ministrisë së Kulturës, Rinisë dhe Sportit të Republikës së Kosovës dhe Ministrisë së Kulturës së Republikës së Shqipërisë.
Kalendari, ndër të tjera, parasheh edhe Menaxhimin Kulturor dhe shkëmbimin e artistëve në fushat e ndryshme kulturore dhe atë të trashëgimisë.
Në fushën e bibliotekave parashihet Konferenca Kombëtare e Bibliotekonomisë, konferenca shkencore për shënimin e 40–vjetorit të ndarjes nga jeta të Branko Merxhanit, 400–vjetorit të vdekjes së Pjetër Budit, 50-vjetorit të vdekjes së Krist Malokit.
Në fushën e filmit parashihet pjesëmarrje e përbashkët në Festivalin Ndërkombëtar të Filmit në Berlin, në Festivalin e Kanës me shtand të përbashkët të Qendrës Kinematografike të Kosovës dhe Qendrës Kinematografike Kombëtare, si dhe bashkëpunimi me festivalet e tjera ndërkombëtare të filmit.
Në bashkëpunimin mes teatrove, ansambleve dhe baleteve, parashihet realizimi i shfaqjeve “Carmina Burana”, në Tiranë, realizimi i shfaqjes “Monger” në Prishtinë, pastaj shfaqja e përbashkët “Gjerdani i Artë” midis Ansamblit Popullor dhe Ansamblit “Shota” në nderim të artisteve Nexhmije Pagarusha dhe Fitnete Rexha. Po ashtu, parashihen aktivitete në Teatrin Kombëtar Eksperimental “Kujtim Spahivogli” si dhe në Qendrën Kombëtare të Kulturës për Fëmijë në Tiranë. Baleti Kombëtar i Kosovës gjatë qershorit të vitit të ardhshëm do të paraqitet me shfaqje në Tiranë.
Sipas këtij kalendari, bashkëpunimi do të vazhdojë edhe në fushën e trashëgimisë kulturore, ku Muzeu Kombëtar do të realizojë dy ekspozita në Muzeun Kombëtar të Kosovës, do të botohet një katalog i përbashkët i dy muzeve “Arkeologjia e Shqipërisë dhe e Kosovës” si dhe do të realizohet punëtoria “Muzeu i komunitetit – Programet Edukative në Muzeun Historik Kombëtar dhe Muzeun Kombëtar të Kosovës”. Po ashtu, do të realizohen vizitat dhe ekspozitat e përbashkëta në Berat si dhe koncerti me muzikë tradicionale popullore me artistë nga Vlora dhe Prizreni.
Ndërkaq, në Butrint, në dhjetor të vitit 2022 kur pritet të regjistrohet në listën e UNESCO-s, do të ketë aktivitete, konferenca e ekspozita të përbashkëta.
Qendrat Rajonale të Trashëgimisë Kulturore të Prizrenit, Mitrovicës dhe Gjilanit do të realizojnë ekspozita në Vlorë, Korçë, Berat, Gjirokastër e Korçë. Edhe Muzeu Kombëtar i Kosovës do të ketë 4 aktivitete në Muzeun Kombëtar në Tiranë, me organizimin e ekspozitave dhe programeve edukative.
Bashkëpunim parashihet edhe për programin e Evropës Kreative dhe për të Drejtat e Autorit.
Përpos kalendarit të përbashkët kulturor, ministrat Hajrulla Çeku e Elva Margariti kanë nënshkruar Marrëveshje për bashkëpunim ndërmjet Ministrisë së Kulturës, Rinisë dhe Sportit të Republikës së Kosovës dhe Ministrisë së Kulturës të Republikës së Shqipërisë në fushën e trashëgimisë kulturore dhe muzeve, e cila parasheh zhvillimin dhe mbështetjen e bashkëpunimit kulturor mes dy vendeve në fushën e trashëgimisë kulturore dhe muzeve, shkëmbimin e përvojave dhe realizimin e aktiviteteve të përbashkëta në përputhje me standardet ndërkombëtare.
Ndërsa ditën e nesërme pritet të nënshkruhen Protokolli i bashkëpunimit mes Teatrit Kombëtar të Operas, Baletit dhe Ansamblit Popullor të Republikës së Shqipërisë dhe Operës, Filharmonisë, Baletit Kombëtar të Kosovës dhe Ansamblit Kombëtar të Këngëve dhe Valleve “Shota” të Republikës së Kosovës, Marrëveshja e Bashkëpunimit të Muzeut Kombëtar të Kosovës dhe Muzeut Historik Kombëtar; Marrëveshja e Bashkëpunimit të Bibliotekës Kombëtare të Kosovës “Pjetër Bogdani” dhe Bibliotekës Kombëtare të Shqipërisë; si dhe Marrëveshja e Bashkëpunimit të Parkut Arkeologjik “Ulpiana” dhe Parkut Arkeologjik Kombëtar Apolonia.
Bashkëpunimi mes Republikës së Kosovës dhe asaj të Shqipërisë përmes një kalendari të përbashkët ka filluar në vitin 2014 kur është nënshkruar për herë të parë një program i tillë. /KultPlus.com
Qeveria e Kosovës dhe ajo e Shqipërisë kanë mbajtur mbledhjen e shtatë të përbashkët, ku edhe kanë bërë nënshkrimin e disa marrëveshjeve, shkruan KultPlus.
Pas nënshkrimit të marrëveshjeve, ndodhi edhe një konferecë e përbashkët mes kryeministrit të Shqipërisë, Edi Rama, dhe atij të Kosovës, Albin Kurti.
Që të dy, kur u pyetën nga gazetarët nëse janë pro apo kundër bashkimit kombëtar, u përgjigjën pa hezitim se janë pro një gjëje të tillë.
Megjithatë, edhe Kurti edhe Rama thanë se bashkimi kombëtar nuk është diçka që është aty dhe vetëm duhet të thuhet ‘po’, por kërkohet diçka përtej kësaj.
Kosova dhe Shqipëria nënshkruan një sërë marrëveshjesh gjatë ditës së sotme. /KultPlus.com
Asambleja e Përgjithshme e Frankofonisë, për Europën këtë të premte në mbledhjen e kësaj të premte ka vlerësuar akademikun dhe shkrimtarin Ismail Kadare.
Akademikut i është akorduar dekoratën “Kalorës i Madh i Urdhrit të Yllësisë së Frankofonisë dhe dialogut midis kulturave”.
Dekorata e shkrimtarit i është dorëzuar zonjës së tij Helena Kadare
“Ansambleja e Përgjithshme e Frankofonisë, për Europën, e mbledhur sot në Tiranë në sesionin e saj të 33-të, i ka akorduar akademikut dhe shkrimtarit Ismail Kadare dekoratën e lartë: “Grand Chevalier de l’Ordre de la Pléiade de la Francophonie et du dialogue des cultures” (“Kalorës i Madh i Urdhrit të Yllësisë së Frankofonisë dhe dialogut midis kulturave”).
Deklarata e lartë iu dorëzua zonjës Helena Kadare”, bëhet me dije nga nsambleja e Përgjithshm e Frankofonisë për Evropën./abcnews.al /KultPlus.com
Festivali Ndërkombëtar i Teatrove “Prishtina International Theater Festival” këtë vit do të mbajë edicionin e pestë, shkruan KultPlus.
Ky edicion do të organizohet për të kujtuar figurën e regjisores Burbuqe Berisha, e cila vdiq këtë vit.
Edicioni i katërti PITF do të zgjasë nga 29 nëntori deri më 4 dhjetor, ku edhe pritet që të respektohen masat ndaj COVID-19.
Në programin garues do të jepen katër shfaqje, të trupave teatrore nga Bullgaria, Serbia, Turqia Maqedonia e Veriut, Shqipëri dhe Kosova. /KultPlus.com
Qeveria e Kosovës dhe ajo e Shqipërisë kanë mbajtur mbledhjen e shtatë radhazi në Elbasan, ku edhe kanë nënshkruar një sërë marrëveshjesh, shkruan KultPlus.
Njëra prej pikave që mori vëmendje të madhe është “shkrirja” e kufirit, ku edhe nga viti i ardhshëm nuk do të ketë më kolona nëpër kufinjë.
Kryeministri i Kosovës, Albin Kurti, së bashku me kryeministrin e Shqipërisë, Edi Raman, bënë nënshkrimin e këtyre marrëveshjeve
Marrëveshjet e nënshkruara:
-Marrëveshja për krijimin e sekretariatit koordinues ndërqeveritarë
-Marrëveshja për zbatimin e lehtësirave të ndërsjella në procedurat doganore ose të kontrollit hyrje/daljet e mallrave.
-Marrëveshja për lehtësimin e procedurave për marrjen e lejeqëndrimit të përkohshëm.
-Marrëveshja për rregullat e regjimit lokal të kufirit.
-Marrëveshja për hapjen e pikës së përbashkët të kalimit kufitar Shishtavec-Kukës-Kryshevc-Dragash.
-Marrëveshja për sigurime shoqërore.
-Marrëveshja për ndërtimin e linjës hekurudhore Durrës-Prishtinë
-Njohja dhe njësimi reciprok i diplomave, certifikatave dhe gradave shkencore të lëshuara nga institucionet e arsimit të lartë dhe institucionet tjera të autorizuara.
-Marrëveshja për ndihmë të ndërsjellë juridike në çështjet civile dhe tregtare.
-Kalendari i përbashkët kulturor vjetor Shqipëri-Kosovë
-Marrëveshja për avancimin e bashkëpunimit në fushën e bujqësisë
-Marrëveshja e bashkëpunimit mes Ministrisë së Shëndetësisë së Shqipërisë dhe Ministrisë së Financave të Kosovës.
-Marrëveshja për bashkëpunim mes Ministrisë së Kulturës së Shqipërisë dhe Kosovës në fushën e trashëgimisë kulturore dhe muzeve. /KultPlus.com
Shfaqja “Ëndërra e Hamltetit” ka shënuar suksese në arenën ndërkombëtare, ku regjisori Mentor Zymberaj ka fituar çmimin “Jaccues Lacarier Grand Prix 20211” në Festivalin Ndërkombëtar Teatror “Actor of Europe”, shkruan KultPlus.
Njoftimin për çmimin e fituar, Zymberaj e bëri përmes një postimi në “Facebook”, ku edhe falënderoi ekipin realizues për çmimin e fituar.
Kjo shfaqje është e bazuar në veprën e Shekspirit “Hamleti, Princi i Danimarkës”, me tekst të Nina Mazur dhe regji e interpretim të Mentor Zymberaj.
Zërat: Selman Lokaj, Igballe Qena, Veton Osmani, Dora Xhemajli, Edlir Gashi, Ermal Sadiku, Andin Randobrava, Valmir Krasniqi e Mikel Markaj.
“Ëndrrat e Hamletit” është realizim i Shtëpisë Teatrore Filmike AKT & ITI-Qendra në Kosovë, në bashkëpunim të teatrit Dodona dhe Komunës së Prishtinës. /KultPlus.com
Artisti Jakup Ferri do të përfaqësojë Kosovën në Bienalen e Venedikut, përkatësisht në edicionin e 59-të të Bienales së Artit në Venedik, shkruan KultPlus.
Ferri do të prezantohet me projektin “The Monumentality of the Everday”, dhe ky vendim është marrë nga ministri i Ministrisë së Kulturës Hajrulla Ceku, vendim konform ligjit.
Jakup Ferri njihet si artist mjaft unik në punën e tij, i cili deri më tashti është prezantuar me ekspozita brenda dhe jashtë vendit./ KultPlus.com
Ministri i Brendshëm i Shqipërisë Blendi Çuçi ka thënë se para sezonës së verës së ardhshme qarkullimi mes Kosovës dhe Shqipërisë do të bëhet pa ndalesë në kufi.
Çuçi tha se kanë rënë dakord me homologun e tij Sveçla që të vendosin një sistem kamerash në kufi dhe makinat të qarkullojnë pa ndaluar fare, raporton gazeta express.
“Nga ana tjetër, nuk është pjesë e marrëveshjes por me kërkesë të kryeministrit të Shqipërisë dhe Kosovës, kemi marrë masat dhe nuk do të presim sezonin e verës sidomos në pikën kryesore të kalimit mes vendeve tona, kemi rënë dakord me ministrin e Brendshëm të Kosovës që do të vëmë një sistem kamerash në kufi dhe qarkullimi do të bëhet pa ndalim dhe kamerat do të regjistrojnë çdo gjë përsa i përket identit të makinës që kalon përmes leximit të targës dhe çdo gjë do të jetë automatike pa pasur nevojë fare të ndalojë në kufi. Kemi bërë edhe planin e punës dhe do të jetë shumë më shpejt sesa fillimi i sezonës”, tha ai.
Ai poashtu tha se gjatë fundjavës së festave të nëntorit s’do të ketë kontrolla në kufirin Kosovë-Shqipëri.
“Kemi dhënë porosi që të mos ketë kontrolle dhe asnjë pengesë në qarkullim gjatë festës së 28 nëntorit. Besoj se jemi në rrugë të mbarë për të përjetuar një lehtësi qarkullimi pa e kuptuar se ne jemi dy shtete të ndryshme”, tha ai.
Këngëtarja me origjinë nga Kosova, Rita Ora, sot feston ditëlindjen e saj të 31-të, ku edhe ka marrë një urim shumë të veçantë nga nëna e saj, Vera Ora, shkruan KultPlus.
Në një video të publikuar në “Instagram”, nëna e Ritës ka kujtuar kohën e fëmijërisë me një video të saj dhe Ritës së vogël.
“Rita zog urime ditelindja jemi knaq gjithmonë, qe videoja ne hapat e pare to botes tende magjike”, shkruhet në postimin e Verës.
Rita, e cila ka shënuar suksese të mëdha nëpër botë, feston sot ditëlindjen e saj të 31-të, ku edhe ka marrë mesazhe të ndryshme nga fansat nëpër botë. /KultPlus.com
