Etiketë: Can Yücel

Nga Can Yücel

Përktheu Rozana Belli

Unë mund ta duroj vetminë por, të mbeturit vetëm kurrsesi,

Nuk është bukur të plakesh vetëm, duke parë muret.

Duke kërkuar me sy një mik

Me tik-takun e orës…

Bashkë me lumturinë mund ta shtyj kohën, s’kam frikë,

Por,

Duhet të jetë dikush që të thotë “Mirëmëngjes! Natën e mirë”.

Ndonjëherë duhet të më cingërrijë në vesh një telefon, gjithsesi

Përndryshe nuk është vështirë, nuk është fare e vështirë

Të përziej çajin në gotë,

Dhe ta shijoj krejt i vetëm.

Por,

Ndonjëherë duhet një zë që pyet

“Me sa sheqer e do?”/ KultPlus.com

Nga Can Yücel

Mos u lidh pas një gjëje kaq marrëzisht
Mos thuaj kurrë “S’rroj dot pa të”!
Mos thuaj dhe pikë!
Sepse edhe mund të rrosh.
S’ka nevojë për fjalë kaq të fisme
Vetëm mos dashuro aq shumë,
Sepse do të thyhesh kur do të të dojë më pak.
E ajo gjithsesi do të të dojë më pak…
Po s’dashurove shumë, s’ do kesh as dhembshuri.
Po nuk zotërove shumë, as nuk do t’i përkasësh kujt.
As dorën e këmbën dot mos ia përvetëso
Sillu sikur s’të përkasin ty
Se kur të mos kesh gjë prej gjëje, s’do t’i kesh frikë as humbjet.
Sillu sikur mundesh edhe pa to.
Kur s’ke, për shembull, shumë gjëra në shtëpi,
Lirshëm do të mund të ecësh në të.
Po deshe patjetër të kesh dicka tënden
Vijën e horizontit zotëroje,
Qiellin e tërë,
Diellin, hënën, yjet…
Bie fjala, le të jetë yti Ylli Polar
“Imi është” thuaj!
Nëse patjetër do të duash të zotërosh dicka…
Bëje ylberin tëndin përgjithmonë
Nëse patjetër dëshiron t’i përkasësh dikujt, jepiju ngjyrave.
Portokallisë apo të trëndafiltës, për shembull.
Jeto pa zotëruar shumë dhe pa qenë i zotëruar.
Trajtoje jetën sikur çdo çast mund të të shkasë nga duart,
Po edhe sikur e jotja do të jetë gjithmonë.
Duke iu ngjitur pandashëm e duke e mbajtur për kindesh. / KultPlus.com