Poezi e shkruar nga Azem Shkreli.
Ato lahen në gazin
tonë e në lotët e tyre.
Bëhen rojë murane
te krojet e shtera të gjirit.
Në ballin tonë për herë
u bëjnë dritë shejt gishtat.
Ditët na i prarojnë dhe rrugët
me nga një bekim më t’mirin.
Me rrëmetën e krrusur t’moteve
na ruajnë nga hijet e liga.
Një ditë shkojnë si të shkonin,
të mos vijë më vdekja.
E s’na kërkojnë asgjë,
pos një grusht dhe mbi krye.
Shkojmë. E sa herë vdes nënë,
vdes nënëmira ime.
Poezi e shkruar nga Azem Shkreli.
Më deshën ardhjet, tani një shkuarje më do
Oshëtimë e trishtë mungese mos më kërko
Më lër ndaj natës largësia le të ndodhi pahir
M’i duhet rrugëtimit pendesë e hidhur, e mirë
Nëse nuk piqemi, nëse pikëllimi ka mall
Më harro bukur, thuaj u pamë në një përrallë
Bari i harrimit përherë tek ndonjë breg tjetër
Mëkon ofkamave pushin e dhimbjes së vjetër.
Poezi e shkruar nga Azem Shkreli.
Ata vetëm do të ç´lodhen pak dhe do të vinë
në kremte tjera, nuk janë përmendore
mendimi të ftohtë në gurë, vallë e dinë
u kishte dhembje plaga apo fitore
kur ngriheshin rishtas dhe rishtas binin
me shikimin para, kushedi se ç´panë
tek përçartë flisnin diçka me Leninin
dhe shikonin para dhe s´dinin se ranë
dhe nuk ranë sepse u kishin lulet hije
ata na i dhanë dheut të etur bukuri
të kuqe, të ngrohtë, jo qumësht shpendarie
ata paqe nënshkruan, nënshkruan liri
liri, ajër të lirë, njerëz të lirë, troje
dhe kot i thërrasim me vargje e këmbora
ata janë dheu ynë i ashtëm që rri roje
bimës sonë, moshës sonë, në çeta, batalione
Ata vetëm do të ç´lodhen pak dhe do të vinë
në kremte tjera, nuk janë përmendore
mendimi të ftohtë në gurë, vallë e dinë
u kishte dhembje plaga apo fitore.
Poezi nga Azem Shkreli.
Sonte
Qava sonte për ty
Arbëri
Nuk më vjen turp
Pse qava
Më vjen turp pse s’munda
Të bëj tjetër
Nga turpi qava.
Azem Shkreli nga Peja dhe Ali Podrimja nga Gjakova janë përfaqësuesit më të mirë kosovarë sa i përket artit poetik, shkruan KultPlus.
Këta dy poetë shënuan kthesën e parë drejt hapjes dhe modernizimit të poezisë shqipe. Arti i tyre i veçantë poetik, tashmë ka depërtuar edhe në nivel ndërkombëtar, pasi që poezitë e tyre janë përkthyer edhe në shumë gjuhë të huaja. KultPlus ju sjellë një fotografi të përbashkët të këtyre dy poetëve. /KultPlus.com
Poezi e shkruar nga Azem Shkreli.
Mos u bëj poet nëse s’mund të lindësh
me seicilin varg, të lindësh me seicilën fjalë.
ngrehu mbi veten në dot t’rrokësh frerët e erërave,
të shkelësh shpërgajt e mërisë dhe shtrëngatat
e gjakut tënd.
n’se dashurohesh, dashurohu n’flakë e n’valë,
jo ne sy të kaltër, se bëhesh det i çmendur pendimi.
mos u bëj poet nëse s’mund të vdesësh
për secilën varg, të vdesësh për secilën fjalë.
Poezi e shkruar nga Azem Shkreli.
Shko se furishëm po fryn në mua erë mallkimi që s’të fal.
Dhe, dije mirë, kurrë më një e një nuk bëjn’ një si thonte Hikmeti, ai farë poeti me këngë prej zjarri.
Shko merri me vete lutjet tua, edhe hijen tënde hiqe zvarrë rrugëve si gjënë e ndyrë.
Mos u kthe pas.
Mos i harro sytë e përlotur në shtekballin tim.
Mos thuaj lamtumirë.
Asgjë mos thuaj.
Merri me vete gjurmët nëpër të cilat erdhe një natë më e përvuajtur se frika dhe hyre në mua.
Shko dhe bëhu fjalë e mbrame n’gojën time.
Bëhu shkrepetirë e fikur n’ylberin e shkrimit tim.
Bëhu çdo gjë pos Meje e Teje dhe asaj që e quajtëm Ne kur i zinim yjet si fluturat e ua ngjisnim nganjë emër mos ta harrojmë emrin tonë.
Shko, merri me vete edhe rrugët, të mos kthehesh kurrë në vesën e lotit të rrejshëm, gërmadhat e kujtimit t’i rrëzosh.
Shko, mbyllu në do kështjella të largëta harrimi, ku s’të zgjojnë më këmbonat e pendimit kur çmendet mallit vetmia ose kur buza buzën e han n’pikllim, që mëkatin s’e lan, që s’mundet ta shpojë Gurin e rëndë, gurin e ftohtë të ndarjes.
Shko, më mirë dhe hesht. Mos u kthe mbas.
Mos i harro sytë e përlotur n’shtekballin tim.
Mos thuaj lamtumirë.
E kur t’shkojsh larg, më larg se prej blerimi n’blerim
E kur t’shkojsh larg, më larg se prej zemre në zemër
Aq larg sa ta harrosh edhe emrin tënd dhe zërin tim, fshihu prej
vetes
Shkurto flokëgjatat, mate me to mendjeshkurtrën tënde dhe
mos qaj.
Shko se tmerrshëm po lodrojnë sonte n’mua rrëket e gjakut të
ndezur. / KultPlus.com