Etiketë: Prizren Fest

‘PrizrenFest’ bën bashkë teatrot e Kosovës, Tiranës dhe Shkupit, miratohet një dokument me listë të rekomandimeve

Posted on by Kult Plus

Në kuadër të edicionit të dytë të Festivalit të Teatrit, Prizrenfest, është mbajtur konferenca teatrore e organizuar nga Teatri Kombëtar i Kosovës, Teatri Kombetar Tiranë dhe Teatri Shqiptar Shkup në bashkëpunim me PrizrenFest.

Konferencën e moderuan Kushtrim Sheremeti, drejtori i përgjithshëm i Teatrit Kombëtar të Kosovës; Altin Basha – drejtor i Teatrit Kombëtar të Tiranës dhe Adem Karaga – drejtor i Teatrit Shqiptar të Shkupit, me temë diskutimi: “Bashkëpunimi ndërmjet teatrove shqiptare – sfidat, mundësite dhe përparësitë”. Në këtë konferencë një ditore, morën pjesë artistë dhe përfaqësues të institucioneve teatrore shqiptare nga të tre vendet.

Ndër të tjera u shpalosën edhe detaje të Marrëveshjes për bashkëpunim teatror të nënshkruar rishtazi nga Ministrat e Kulturës, Hajrullah Çeku dhe Elva Margariti.

Ne fund të konferencës u miratua dhe një dokument me një listë të rekomandimeve që do të quhen, “Rekomandimet e Prizrenit” i cili do t’i dorëzohet ministrave të kulturës të Kosovës, Shqipërisë dhe Maqedonisë së Veriut./KultPlus.com

Magji teatrore në Prizren Fest, katër shfaqje për një natë për publikun prizrenas

Posted on by Kult Plus

Festivali Ndërkombëtar i Teatrit në Ambient të Hapur- Prizren Fest, në natën e dytë të edicionit të tij, që ishte mbrëmë, brenda natës ofroj për shikuesin prizrenas katër shfaqje, gjë që nuk ishte aspak problem që secila nga to të ketë audiencën e saj.

E para ishte shfaqja “Çelësi Magjik”, e cila solli vërtetë një magji teatrore për më të vegjlit tanë.

Nata e dytë vazhdoj me shfaqjen “Aurora” nga Çekia nën regjinë dhe koreografinë e Carolina Arandia. Aurora është një pjesë vallëzimi, një përvojë hipnotike dhe medituese në të cilën dy valltarë imagjinojnë se si ritmi i tyre është i kompozuar bashkë me rendin e universit. Bëhet fjalë për një lidhje, për brishtësinë dhe fuqinë e saj, e cila na e zbulon dimensionin sublim që format e takimit të saj marrin në raport me tërësinë…

“Babai dhe Babai” nga Jeton Neziraj dhe në regjinë e Kushtrim Koliqit, ishte shfaqja e tretë të cilën artdashësit patën mundësinë ta shohin në kuadër të Prizren Fest-it. “Babai dhe Babai”, në dukje një dramë për sfidat e zakonshme të jetës së një familjeje, na zbulon një histori tronditëse dhe një traumë të thellë shoqërore, një plagë që ka ngelur e pashëruar dhe e cila personazhet i mban peng, përgjithmonë…

E natën e mbrëmshme të Prizren Fest-it, e përmbylli shfaqja “Tatuazhi i Trendafili” e cila u dha në oborrin e Lidhjes së Prizrenit me regji nga Zana Hoxha. Shfaqja që Tennessee Williams e quajti “loja e tij e dashurisë për botën”, është një përrallë pasionante e besëtytnive, premtimeve dhe mundësisë së dashurisë dhe pasionit pas një zemre të thyer. Tatuazhi i Trëndafilit ofron një komedi të zgjuar dhe interaktive me publikun ndërsa i kujton atyre që të hapin zemrat dhe të gjejnë shpresën atje ku nuk e presin…

Programi i ditës së sotme i Prizren Fest-it do të vazhdoj me shfaqjen “Tomi dhe Xheri” nga ora 20:00 në Abi Çarshia, pastaj në orën 20:30 shfaqja nga Italia e cila jepet në oborrin e Lidhjes së Prizrenit, dhe e fundit për natën e tretë të festivalit, jepet shfaqja nga Mali i Zi në ora 21:30 në Kino Lumbardhi.

Prizren Fest do të vazhdoj deri me datën 28 Korrik me një program shumë të pasur. / KultPlus.com

Festivali Ndërkombëtar i Teatrit, “Prizren Fest” zbulon programin e plotë për edicionin e radhës

Posted on by Kult Plus

Vetëm katër ditë na ndajnë nga fillimi i edicionit të dytë të Festivalit Ndërkombëtar të Teatrit në Ambient të Hapur- Prizren Fest, i cili mbahet në Prizren, përcjell KultPlus.

Që nga data 22 deri më 28 Korrik, artdashësit do të kenë mundësi të jenë pjesë e një javë të mbushur me aktivitete të shumta që do të mbahen në kuadër të Prizren Fest-it.

Në këtë vit për dallim nga viti i kaluar, programi i shfaqjeve është dyfishuar. Në natën e hapjes me 22 Korrik, do të shfaqet “Maidan Inferno” nën regjinë e Clement Peretjatko (Ukrainë-Francë) nga ora 20:30 në Kino Lumbardhi, për të vazhduar në netët në vazhdim deri me 28 Korrik, me shfaqje nga Italia, Çekia, Bullgaria, Greqia, Sllovakia, Kosova, Shqipëria, Mali i Zi e Maqedonia e Veriut.

Në veçanti në këtë edicion Prizren Fest ka menduar edhe për fëmijët, ku gjatë gjithë javës ka program shumë të pasur për më të vegjlit.

Pjesë e programit plotësues janë edhe punëtoritë për të rinjë, ku të gjithë pjesëmarrësit do të kenë mundësi që t’i zgjerojnë njohurit e tyre për teatrin nga ekspertë evropian.

Jo më pak të rëndësishme janë dy konferencat që do të mbahen me datën 26 dhe 27, tek Shtëpia e Shani Efendisë.

Lokacionet që do të jepen shfaqjet janë: Kino Lumbardhi, Kino Plato, Abi Carshia, Oborri i Lidhjes së Prizrenit, Katedralja Katolike e Zojës Ndihmëtare, Sinan Pasha Kej, Teqja e Halvetive, Platforma në Lumë.

E sigurisht që ky edicion i Prizren Fest-it,  do të ishte i pamundur pa mbështetjen e sponzorëve kryesor që janë- Komuna e Prizrenit, Ministria  e Kulturës, Rinisë dhe Spotit si dhe Banka Ekonomike. / KultPlus.com