Ka reaguar sot Këshilli për Mbrojtjen e të Drejtave dhe Lirive të Njeriut për lajmin se është përkeqësuar ushqimi për fëmijët e kopshteve publike në Prishtinë. Këtë veprim KMDLNj e ka konsideruar të papranueshme dhe të papërgjegjshëm.

Në reagimin e KMDLNj-së u bëhet thirrje dhe të gjitha institucioneve dhe organizatave të pavarura që monitorojnë institucionet publike parashkollore, që të ketë monitorime më të shpeshta për të parë gjendjen e të drejtave të njeriut për fëmijët në kopshtet publike.

Lexoni të plotë reagimin:

A PO JUSTIFIKOHET RRITJA E PAGESËS NË KOPSHTET PUBLIKE PËRMES PËRKEQËSIMIT TË USHQIMIT TË FËMIJËVE?!

Në kopshtet publike në komunën e Prishtinës ka disa javë që ushqimi për fëmijë ka filluar të pakësohet në sasi e që ndikon direkt në gjendjen e tyre emocionale dhe shëndetësore. Ushqimi në të gjitha kopshtet publike në komunën e Prishtinës përgatitet nga Kuzhina Qendrore dhe çdo mëngjes bëhet shpërndarja në të gjitha këto institucione.

Kohë më parë është pasuruar menyja ditore e javore duke shtuar perime dhe smoothie për të vegjlit, por edhe nga një mes-shujtë pas zgjimit nga gjumi.

Në kopshtet publike orari fillon prej 6:30 deri në 17:00. Gjatë këtij orari fëmijëve u ofrohen dy shujta ushqimi dhe një “zamër” që përfshinë pemë sezonale ose jogurt apo tambëloriz (e që kohëve të fundit edhe këtë po e sjellin rrallë). Mëngjesi starton prej 8:30 deri 8:45, dreka 11:30, koha e gjumit është ora 12:00 deri në zgjimin e fëmijëve në orën 14:00.

Pas zgjimit fëmijët ushqehen vetëm me “zamër” e që kryesisht është pemë sezonale e cila është e pamjaftueshme për një ushqyerje të mirë të këtyre fëmijëve. Kohë më parë komuna e Prishtinës për këta fëmijë ua kishte shtuar në meny edhe nga një kifle e që ka disa javë që këto janë zhvendosur në shujtë të mëngjesit.

KMDLNj-së në mënyrë anonime ia kanë shprehur dhe konfirmuar këto shqetësime edhe disa udhëheqës të këtyre Institucioneve Parashkollore dhe se janë në përpjekje që së bashku me komunën e Prishtinës të përmirësojnë gjendjen me ushqimin e fëmijëve dhe se po supozohet një rritje e çmimit eventual. Në kopshtet publike në komunën e Prishtinës çmimi për një fëmijë në bazë mujore është 50 euro kurse nëse ka dy fëmijë të të njëjtës familje çmimi për të dy është 85 euro.

Përkeqësimi i ushqimit për fëmijët e kopshteve publike në komunën e Prishtinës për KMDLNj- në është e i papranueshëm dhe i papërgjegjshëm. Andaj, KMDLNj-ë i rikujton komunës së Prishtinës, Drejtorisë së Arsimit se në këtë mënyrë ata po shkelin të drejtat e njeriut për fëmijët në kopshtet publike duke mos i ushqyer në mënyrë të plotë dhe të mjaftueshme. Aq më parë nëse  kjo po bëhet për të arsyetuar një rritje të çmimit e që do të vë në vështirësi edhe më të mëdha shumë familje në këto kohë kur të gjitha produktet dhe shërbimet kanë pasur rritje të papërballueshme për shumë familje.

Andaj, KMDLNj-ë i bënë thirrje dhe të gjitha institucioneve dhe organizatave të pavarura që monitorojnë institucionet publike parashkollore që të ketë monitorime më të shpeshta për të parë gjendjen e të drejtave të njeriut për fëmijët në kopshtet publike. / KultPlus.com

Presidentja e Republikës së Kosovës, Vjosa Osmani ka takuar në një mëngjes pune, ambasadorët e Shteteve të Bashkuara të Amerikës, Britanisë së Madhe, Gjermanisë, Francës, Italisë dhe të Bashkimit Evropian, për të diskutuar situatën aktuale në veri të vendit pas sulmit terrorist dhe aktit të agresionit të Serbisë kundër Republikës së Kosovës.

Në takim, Presidentja Osmani ka falënderuar ambasadorët për solidaritetin dhe ngushëllimet e shprehura për vrasjen e heroit të Kosovës, rreshterit të Policisë së Kosovës, Afrim Bunjakut, si dhe lëndimit të disa policëve tjerë. Ajo ka vlerësuar lartë punën e shkëlqyeshme dhe profesionale të Policisë së Kosovës dhe institucioneve të tjera të sigurisë në ballafaqimin me sulmin terrorist.

Presidentja Osmani ka theksuar rëndësinë e bashkëpunimit të ngushtë me shtetet aleate dhe koordinimit të institucioneve të sigurisë, me qëllim të parandalimit të përsëritjes së akteve të tilla.

“Kosova është e vendosur që të vazhdojë ta promovojë paqen dhe stabilitetin në rajon, si dhe të punojë me komunitetin lokal serb për t’i afruar dhe integruar në shoqërinë dhe institucionet e Kosovës”, ka theksuar Presidentja Osmani.

Presidentja ka bërë të ditur se institucionet e Republikës së Kosovës janë të përkushtuara në menaxhimin e situatës aktuale dhe për të ndihmuar në arritjen e ruajtjen e paqes dhe stabilitetit.

Sipas Presidentes Osmani, duhet të kërkohet llogaridhënie nga Serbia për veprimet e saj kundër Kosovës, duke ia bërë të qartë se duhet të ndalojë financimin, mbështetjen dhe shtytjen e grupeve kriminale për veprime terroriste.

“Mungesa e masave të tilla mund të keqpërdoret nga ana e Serbisë dhe për rrjedhojë mund të kemi përsëritje të veprimeve terroriste”, ka nënvizuar Presidentja Osmani. / KultPlus.com

Për herë të parë që nga themelimi, Universiteti i Prishtinës është renditur në Times Higher Education (THE), pikë referimi global për përsosmëri në arsim të lartë, kërkim shkencor dhe inovacion.

Renditja vjetore “THE” vlerëson universitetet në mbarë botën në: mësimdhënie, hulumtim, citime, të hyrat nga industria dhe nga perspektiva ndërkombëtare duke përdorur 13 tregues të performancës për të ofruar krahasime gjithëpërfshirëse dhe të balancuara.

Në këtë renditje përfshihen 1,904 universitete nga 108 vende të ndryshme të botës, të cilët rangohen duke llogaritur përformancën e institucioneve të arsimit të lartë.

Lajmin e ka bërë të ditur ministrja e Arsimit, Arbërie Nagavci e cila ka përgëzuar Universitetin e Prishtinës duke premtuar mbështetjen e vazhdueshme drejt arritjes së standardeve që qojnë në avancim të cilësisë dhe performancës.

“Përgëzoj Universitetin e Prishtinës dhe gjithë stafin për punën e tyre drejt përmirësimit të cilësisë dhe rangimit të universitetit në lista të njohura ndërkombëtarisht.

Si Ministri e Arsimit do të vazhdojmë ti mbështesim plotësisht drejt arritjes së standardeve që qojnë në avancim të cilësisë dhe performancës.

Më shumë detaje në: https://www.timeshighereducation.com/world-university-rankings/university-prishtina?fbclid=IwAR1VmqDZVdwmOImU2cB5N77fj1t6GTmU5dgBnyQWbqYgHXREXIXx3qZWRbg”, shkruan ministrja Nagavci. / KultPlus.com

Dyqanet pranë shkollave duhet të ndalohen të shesin vapa për të mbrojtur fëmijët, thonë shefat botërorë të shëndetësisë.

Organizata Botërore e Shëndetësisë tha se shkollat janë “të pozicionuara në mënyrë unike” për të goditur më fort nxënësit që pinë duhan dhe avullojnë.

Në një udhëzues të botuar këtë javë, OBSH-ja tha se autoritetet duhet “të ndalojnë shitjen e nikotinës dhe produkteve të duhanit pranë shkollave”, si dhe të ndalojnë përdorimin e tyre në kampus.

Cigaret elektronike me përdorim të vetëm përballen me ndalimin për të reduktuar mbetjet dhe për ta vështirësuar blerjen e tyre nga të rinjtë. Prodhuesit gjithashtu mund të kufizohen në përdorimin e cigareve elektronike me shije frutash, raporton The Sun, transmeton KlanKosova.tv.

Dr Ruediger Krech, drejtor në OBSH, tha: “Pavarësisht nëse jemi ulur në klasë, duke luajtur lojëra jashtë apo duke pritur në stacionin e autobusit të shkollës, ne duhet t’i mbrojmë të rinjtë nga tymi vdekjeprurës i dorës së dytë dhe emetimet toksike të cigareve elektronike, si dhe reklamat që promovojnë këto produkte”.

Ekziston një mbështetje e fortë për rregulla më të rrepta për cigaret elektronike dhe shefi mjekësor i Anglisë, Sir Chris Whitty, ka thënë se është “krejtësisht e papranueshme” që reklamuesit duket se synojnë të rinjtë.

Por disa janë gjithashtu të shqetësuar se shtrëngimi shumë i fortë mund ta bëjë më të vështirë për duhanpirësit të lënë duhanin./kk/ KultPlus.com

Nga Aurenc Bebja

“Il Piccolo di Trieste” ka botuar, të mërkurën e 20 nëntorit 1912, në faqen n°2, intervistën ekskluzive me Ismail Bej Qemalin pak para se të nisej nga Trieste në drejtim të Shqipërisë për të shpallur pavarësinë e vendit të shqiponjave, të cilën, Aurenc Bebja, nëpërmjet blogut të tij “Dars (Klos), Mat – Albania”, e ka sjellë për publikun shqiptar:

Shpallja e Pavarësisë së Shqipërisë është shumë e afërt

Intervista jonë me Ismail Qemalin

Dje në mëngjes ka mbërritur në qytetin tonë, direkt nga Vjena, kreu i partisë së pavarur shqiptare, Ismail Qemal Bej Vlora. Me të udhëtonin katërmbëdhjetë personalitete të shquara shqiptare. Ai u prit në stacion nga udhëheqësi i ri shqiptar Mark Kakarriqi, i njohur për studimet e tij mbi çështjen shqiptare dhe nga fisnikët e kolonisë. Ismail Qemal Beu zbriti në “Excelsior Palace Hotel” për t’u ndalur disa orë dhe u largua në orën dy pasdite me vaporin “Brünn” për në Shqipëri. Një nga redaktorët tanë, i prezantuar me dashamirësi nga z. Mark Kakarriqi, zhvilloi një bisedë të shkurtër me Ismail Qemalin.

Ai është një plak i pashëm, rreth të shtatëdhjetave, me një vështrim të gjallë dhe depërtues, një mjekër të bardhë të gjatë dhe një sjellje fisnike dhe të ashpër. Ai është një njeri i kulturuar që ka udhëtuar shumë dhe ka jetuar në kryeqytetet e Evropës. Për shumë vite ai ishte guvernator i Tripolit. Me ardhjen në pushtet të xhonturqve dhe kthimin e Kushtetutës së vitit 1877, Ismail Qemal Beu ishte deputet i Vlorës.

— Unë do të qëndroj në Trieste vetëm për disa orë, sa për të parë disa miq dhe për të ngrënë mëngjes. Kështu që unë do të nisem për në det.

— A më lejon të të pyes se ku po shkon?

— Dëgjo: vapori me të cilin hipëm nuk shkon normalisht në portin ku kam ndërmend të zbarkoj, por i detyrohem mirësjelljes së drejtuesve të Lloyd’s, që pranuan një zbarkim të jashtëzakonshëm. Po shkoj në Durrës.

— Porti i dëshiruar nga serbët…

— Nuk mendoj se serbët do të arrijnë atje para meje. Në Durrës më presin me padurim. Terreni është përgatitur me durim.

— Dhe çfarë do të ndodhë pas mbërritjes tënde?

— Diçka shumë e thjeshtë, por e dëshiruar me zjarr prej nesh: “Shpallja e Pavarësisë” së atdheut tonë. Ne duam të përgatisim Evropën për këtë fakt të kryer. Do të krijohet një qeveri e përkohshme dhe ndoshta unë do të jem kreu i saj.

— Po racat e tjera, malësorët, mirditorët?

— Ju siguroj se të gjithë jemi dakord për idenë e pavarësisë, të gjithë të një mendjeje. Ne jemi ata që filluam luftën e hakmarrjes kundër qeverisë së keqe të xhonturqve, duke pushtuar këtë verë Shkupin, ne jemi ata që kemi mbështetur betejat e vazhdueshme, për vite e vite të tëra, dhe është e drejtë që aspiratat tona të konkretizohen në realitet. Koha nuk mund të ishte më e përshtatshme. Qeveria turke në Shqipëri nuk është gjë tjetër veçse një hije e largët. Komunikimet me Kostandinopojën janë ndërprerë. Çfarë më shumë? Në Shkodër janë shqiptarët ata që mbështesin me heroizëm rrethimin.

— Çfarë mendon për kundërshtimin e Serbisë ndaj formulës: Shqipëria e shqiptarëve?

— Unë i di idetë dhe kundërshtimet e atyre qarqeve në pushtet: Ata gabohen. Shqipëria është e pjekur për shpengimin e saj civil. Ajo do të bëhet gjithashtu një faktor i rëndësishëm për zhvillimin e saj ekonomik. Kemi pasuri latente, pyje, miniera që nuk janë shfrytëzuar. Dhe Trieste, e cila dominon Adriatikun, do të jetë e para që do të ndjejë përfitimin. Dhe të gjitha portet e Adriatikut do të kenë përfitime të mëdha.

— Më lejo edhe një pyetje. Për udhëtimin tënd në Vjenë dhe Budapest, çfarë mund të më thuash ?

— Jam plotësisht i kënaqur. Aty janë të bindur tashmë se pavarësia e Shqipërisë është një zgjidhje e domosdoshme dhe mbi të gjitha e drejtë dhe e aftë për të thjeshtuar konformimin e ardhshëm të gadishullit ballkanik. Dhe të gjitha fuqitë evropiane dhe veçanërisht Anglia janë të të njëjtit mendim.

Pasi mori këto deklarata dhe informacione, rëndësia e të cilave nuk do t’i shpëtojë lexuesit, redaktori ynë u largua nga Ismail Qemali, duke lënë përshtypjen se kishte folur me një njeri të kthjellët, energjik dhe një apostull shumë të zjarrtë të çështjes së tij.

 https://www.darsiani.com/la-gazette/il-piccolo-di-trieste-1912-fale-mark-kakarriqit-arritem-te-intervistonim-ne-qytetin-tone-ismail-bej-qemalin-para-se-ky-i-fundit-te-nisej-per-te-shpallur-pavaresine-e-shqiperise/.

Profesori i Universitetit të Prishtinës Gëzim Selaci, përmes një postimi në rrjetet sociale, iu ka bërë thirrje të gjithë politikanëve dhe njerëzve që ofendojnë, etiketojnë dhe përdorin retorika për persona të caktuar në Kosovë për të braktisur degjenerimin e gjuhës politike.

Sipas tij, kjo gjuhë edhe mund të jetë efikase për ta shkatërruar kundërshtarin, por që sipas tij kostoja e kësaj gjuhe është e lartë sepse e dëmton rëndë jetën politike.

“Asnjë politikan nuk është pa përgjegjësi dhe pa faj që ka degjeneru gjuha politike në këtë derexhe. Pavarësisht nëse je politikan i VV-së, i PDK-së, i LDK-së a i AAK-së, nuk mundesh me u shfajësu tash kur kjo gjuhë po shpërndahet te qytetarët, sepse je vetë ti ai/ajo që je shërby me të në mënyrë aktive a pasive dhe e ke ushqy atë”, ka shkruar Selaci.

Prandaj, sipas Selacit ata që kanë etiketuar politikanët e mediat kosovare dhe analistët i kanë vetëm tri rrugë.

Denoncimin e të akuzuarit duke ofruar prova, braktisjen e akuzave të tilla ose marrjen e përgjegjësisë për çfarëdo që rezulton nga retorikat që përdoren nga këta individë që e degjenerojnë gjuhën politike.

Ky është statusi i plotë i Selacit:

Thirrje drejtuar politikaneve per te braktisur degjenerimin e gjuhes politike

Strategjia demobilizuese e zerave mospajtues dhe opozitare duke i delegjitimuar ata si tradhti kombetare ose qendrime pro-serbe, e te ngjashme, kalon cdo kufi te debatit politik te hapur e demokratik.

Mund te jete efikase per ta shkaterruar kundershtarin, prandaj edhe pelqehet nga politikanet dhe militantet e tyre, por kostoja e saj eshte e larte, duke qene se e demton rende jeten politike.

Lideret politike duhet ta braktisin perfundimisht kete retorike si vegel politike dhe te distancohen qartazi e te denojne kategorikisht gjuhen e stilit: jo, une patriot gjak shqiptari, jo, ti tradhtar gjak serbi.

Asnje politikan nuk eshte pa pergjegjesi dhe pa faj qe ka degjeneru gjuha politike ne kete derexhe. Pavaresisht nese je politikan i VV-se, i PDK-se, i LDK-se a i AAK-se, nuk mundesh me u shfajesu tash kur kjo gjuhe po shperndahet te qytetaret, sepse je vete ti ai/ajo qe je sherby me te ne menyre aktive a pasive dhe e ke ushqy ate.

Prandaj, nese je ai/ajo qe i ke thene hashimit a ises, argat i serbise, albinit, agjent i rusise, gazetarit, mercenar i serbise, komentatorit politik, i shitur i serbise, ose i ke lene vetem dy mundesi politike: ja me uçk-ne, ja me milloshevicin; ja me rugoven, ja me serbine; ja me albinin, ja me vucicin, e pislleqe tjera, ose i perket nje partie a organizate politike qe i kane thene keto per rivalet ose kritiket politike, i ke tri rruge:

– ja ta denoncosh te akuzuarin duke ofru prova,

– ja te braktisesh e distancohesh nga akuzat e tilla,

– ja te bartesh pergjegjesi per cfaredo qe rezulton nga kjo retorike.

Per hir te kultures se komunikimit demokratik, lirise se opinionit dhe te sigurise se qytetareve, ndaloni kete gjuhe, duke e braktisur ate dhe duke u distancuar nga perdoruesit e saj! Kthejuni politikes! / KultPlus.com

Kryeministri i Kosovës, Albin Kurti, së bashku me Kryetarin e Kuvendit, Glauk Konjufca, ishin në vizitë sot në shtëpinë e rreshterit të ndjerë të Policisë, heroit të Kosovës, Afrim Bunjaku në fshatin Samadrexhë të Vushtrisë, përcjell KultPlus.

Kryeministri Kurti shprehu ngushëllimet më të sinqerta familjes Bunjaku.

“Afrim Bunjaku, nga rreshter i Policisë u bë hero i Kosovës. Emri i tij s’do të harrohet kurrë. Gjaku i tij s’do të humbë asnjëherë. Rënia e tij heroike ngrit lart Republikën e pavarur dhe përgjegjësinë shtetërore për ligj e rend e siguri anembanë për të gjithë dhe secilin. Lavdi!”, shkroi Kryeministri Kurti në librin e kujtimeve. /KultPlus.com

Kryeministri i Shqipërisë Edi Rama, ka deklaruar se KFOR-i duhet ta marrë nën kontroll veriun.

Me këtë rast, atij i është kundërpërgjigjur kryeministri i Kosovës Albin Kurti.

Në një intervistë për gazetën boshnjake Istraga, Kurti tha se kudo në Kosovë e para përgjigjet policia e pastaj KFOR e EULEX.

Kurti tha se ka nevojë për patrulla të përbashkëta të policisë sonë dhe KFOR-it në kufirin mes Kosovës dhe Serbisë, dhe kjo formulë nuk duhet ndryshuar.

“Për propozimin e kryeministrit shqiptar Edi Rama që KFOR-i të marrë kontrollin e veriut të Kosovës: “Ne kemi nevojë për patrulla të përbashkëta të policisë sonë dhe KFOR-it në kufirin mes Kosovës dhe Serbisë. E për sa i përket gjërave të tjera, kjo tashmë është vendosur. Kudo në Kosovë e para që përgjigjet është policia jonë, pastaj EULEX-i dhe më pas KFOR-i. Dhe nuk mendoj se kjo formulë duhet ndryshuar”, deklaroi Kurti për Istraga përcjell Klankosova.tv

Kjo intervistës sipas njoftimit të redaksisë së portalit boshnjak pritet të publikohet të dielën. /KultPlus.com

Seriali Tre Vllaznit do të fillojë me sezonin e dytë, pas pauzës që pati gjatë verës, shkruan KultPlus.

Si një sitcom që u bë për një kohë të shkurtër pjesë e familjeve shqipatre, “Tre Vllaznit”, nga e diela rikthehet përsëri në ekranet televizive.

Aktorët kryesorë: Ilir Tafa, Valmir Krasniqi dhe Lum Veseli, rikthehen nga e diela në ATV nga ora 20:30.

Seriali pritet që të ketë shumë befasi në këtë sezon të dytë.

Producent i këtij seriali do të jetë Zijad Mehic, i cili është i njohur për krijimtarinë e tij me filmat Fuse (2003), All for Free (2006) dhe Borderline Lovers (2005). /KultPlus.com