Etiketë: GKK

Majlinda Kelmendi solli të shkuarën, të tashmen, ëndrrat e saj dhe vijën e kuqe në mes tyre

Posted on by KultPlus

Alberina Haxhijaj

Mbrëmë në Galerinë Kombëtare të Kosovës është bërë hapja e ekspozitës së artistes Majlinda Kelmendi, shkruan KultPlus.

Artistja Kelmendi në veprat e saj të fundit të cilat erdhën të ekspozuara mbrëmë tregoi lidhshmërinë që ka ajo me të kaluarën, të tashmen por edhe me procesin e të ëndërruarit.

Sipas kuratorit Edison Çeraj, artistja Majlinda Kelmendi nuk i rikthehet të shkuarës ngaqë është e magjepsur prej saj, as për t’u arratisur prej të tashmes, por mbi të gjitha, për të njohur veten dhe për të kuptuar kohën në të cilën jeton.

“Ashtu siç nuk zgjedhim se çfarë kujtojmë e çfarë harrojmë, po ashtu nuk zgjedhin se kur do mendojmë e kur do ndiejmë. E gjitha rrjedh, vetëm rrjedh. Ne dorëzohemi, pastaj ngrihemi. Më pas zgjedhim, pastaj harrohemi. Me pas kujtohemi, me shpresën që të mos jetë vonë. Edhe kur është vonë, ka gjithmonë një xhep kohë për të bërë atë që duhet. Është ai xhep kohë që të rikthen të gjithë “kohën e humbur”. Kelmendi e kërkon me ngul këtë “kohë të humbur”, atë kohë të ndaluar ku lejohej vetëm ajo që diktohet “vija e partisë”. Ajo kërkon gjurmët e asaj periudhe në të tashmen e saj, në atë çfarë ajo është sot jo vetëm si artiste por mbi të gjitha si njeri”, thekson Çeraj.

Koncepti i ekspozitës “A është e shkuar ëndërr” sipas artistes Kelmendi ka ardhur pikërisht duke kërkuar përgjigje në këtë pyetje e cila sipas saj na shoqëron të gjithëve. Mirëpo përtej kësaj pyetje ajo tregoi për KultPlus se në veprat e saj dëshiron që të vejë afër njëra-tjetrës të shkuarën dhe realitetin për një analizë pasi që sipas saj pa e njohur të shkuarën nuk mundemi të derivojmë në të tashmen.

“Ne kemi pasur tranzicion të gjatë në Shqipëri dhe në Kosovës dhe historianët e ndryshëm janë përpjekur që të manipulojnë me virtytin dhe me historinë tonë por jo me ëndrrën tonë. Me këtë kam dashur që edhe të ngacmojë publikun, në mënyrë që sa të ketë jetë të ketë edhe ëndërr. E shkuara nuk duhet që të ndikojë në të ardhmen tonë por gjithsesi ajo është aty afër nesh dhe ne duhet të përpiqemi për pak ndryshim”, u shpreh ajo duke thënë se e gjithë ekspozita e saj është lojë me simbole diçka që mund të vërehet edhe nga vizitorët të cilët do e shohin këtë ekspozitë.

E rëndësishme sipas artistes përtej historisë si e shkuar në rrafsh shoqëror është se çdo njeri ka një të shkuar në rrafsh individual në këtë rast kujtimet. Pikërisht këto kujtime sipas saj- të cilat mund të barten në forma të ndryshme si përmes shkrimeve apo në këtë rast përmes artit- krijojnë së bashku memorien kolektive.

Veprat e Kelmendit të cilat erdhën te ekspozuara sonte duke përfshirë këtu edhe video-instalacionet, shtriheshin përgjatë mureve të lyera me të bardhë apo të zezë. Ngjyra tjetër që veçohej në këtë ekspozitë ishte e kuqja, një përzgjedhje e tillë për modifikimin e hapësirës ekspozuese sipas artistes është bërë në mënyrë të qëllimshme dhe krijon lidhshmëri me veprat e video-instalacionet e ekspozuara.

“Shumë gjëra të së shkuarës janë në tym në kujtesën tonë por herë pas herë ngjarje apo histori të caktuar, qofshin ato të bukura ose jo, ngelin në kujtesën tonë ashtu siç janë sot. Ndërsa e kuqja simbolizon dy gjëra, së pari kujtimet që mbeten sikurse janë sot, reale. Pastaj edhe si ngjyrë që lidhet me atë si për shembull në komunikacion e që ndalon diçka, për t’u larguar nga diçka që nuk të bënë mirë për të tashmen”, u shpreh artistja për KultPlus.

Ekspozita do të qëndrojë e hapur gjatë gjithë këtij muaji për të gjithë të interesuarit të cilët dëshirojnë që të zbërthejnë më shumë lidhshmërinë në mes të së kaluarës, të tashmes dhe ëndrrës që ka sjell artistja Majlinda Kelmendi përmes artit të saj. / KultPlus.com

Gani Llalloshi sjellë ekspozitën “Qielli është i kaltër” në GKK

Posted on by KultPlus

Galeria Kombëtare e Kosovës, të enjten mirëpret ekspozitën e artistit Gani Llalloshi të titulluar“Qielli është i kaltër”.

Gani Llalloshi u lind më 8 maj 1965 në Prishtinë. Pas diplomimit në Akademinë e Arteve të Bukura në Prishtinë në vitin 1989, në drejtimin e pikturës në klasën e profesor Nysret Salihamixhiqit, po të njëjtin vit u regjistrua në Akademinë e Arteve të Bukura në Lubjanë, Slloveni.

Studimet pasuniversitare në pikturë i përfundoi në vitin 1991 te profesor Andrei Jemec, ndërsa në vitin 1993 e përfundoi grafikën te profesor Lojze Logar. Si bursist nga Qeveria Gjermane me bursën DAAD në vitet 1997/98 studioi në HDK (Shkolla e Lartë e Artit) në Berlin.

Që nga viti 1989 është anëtar i Shoqatës së Artistëvetë Kosovës si dhe nga viti 1990 është anëtar i ZDSLU (Shoqata e artistëveSlloven). Ai jeton dhe punon në Piran, Slloveni.

Kjo ekspozitë është kuruar nga Andrej Medved. Ceremonia e hapjes do të bëhet të enjten më 20 dhjetor duke filluar nga ora 20:00 në Galerinë Kombëtare të Kosovës./KultPlus.com

Fakte nga arkitektura socialiste në Shqipëri u shpalosën sot në ekspozitën ‘Nën presion’

Posted on by KultPlus

Jeta Zymberi

Galeria Kombëtare e Kosovës sonte kishte tejkaluar kufijtë kulturorë Kosovë – Shqipëri, për të sjellë një ekspozitë me fakte nga arkitektura socialiste në Shqipëri, shkruan KultPlus.

“Nën Presion” titullohej ekspozita e cila hapi dyert sonte për të mirëpritur një numër të madh vizitorësh të cilët ishin kuriozë për të zbuluar gjithçka që ishte shpalosur sonte për ta.

Ekspozita e cila për autor kishte Gjergj Islami, Denada Veizaj, Gjergj Thomai dhe Enrico Fontanari erdhi e kuruar nga Eliza Hoxha dhe Ilir Gjinolli.

Në këtë ekspozitë u prezantuan tetë episode, ku secili episod i kishte pikat, elementet kryesore dhe karakteristikat e veta.

Qysh në hyrje të kësaj pjese ekspozuese, të priste një ambient që i ngjasonte një dhomë pritjeje, një ambient i ngrohtë ku në prapavijë dukej edhe flamuri kombëtarë, dhomë e cila të dërgonte në një kontekst tjetër social, politik dhe kulturorë.

Shpesh ju bie të udhëtoni për në Shqipëri, e rrugës hasni në ndërtesa të ndryshme të cilat sonte ishin pjesë e ekspozitës, por shumë pak dinë se çfarë rrëfimi fshihet pas tyre. Si kanë ardh ato ndërtesa në jetë, si ka qenë procesi i ndërtimit, kush ka qenë vendimmarrës dhe pse është ajo formë e tillë e ndërtesës dhe cilës kohë i takon. E pikërisht kjo ekspozitë shpalosi sonte gjithçka çfarë fshihet pas atyre ndërtesave sa të bukura, aq edhe unike.

Në fjalën hapëse të kësaj ekspozite fillimisht foli drejtoresha e Galerisë Kombëtare të Kosovës, Arta Agani e cila vlerësoi këtë iniciativë të shumëpritur. Ajo tutje prezantoi para të pranishmëve autorët e ekspozitës për të ja kaluar fjalën kuratores Eliza Hoxha.

Ekspozita titullohet “Nën presion” por dua të ju them se krejt ky rrugëtim ka qenë pa asnjë presion, me shumë dashuri dhe kënaqësi. Periudha e cila trajtohet në këtë ekspozitë është koha e komunizmit ose socializmit të interpretuar në hapësirë ose në formë, në fakt përveç që është një periudhë e njëjtë në krejt bllokun lindorë, për shkak të kushteve politike ka dallime në mes të asaj se çka ka ndodhë në Shqipëri dhe çka ka ndodhë në Kosovë në disa kontekste të tjera”, është shprehur Hoxha e cila tutje përmendi edhe faktin se në kontekstet socialiste gjithçka që është bërë ka qenë nën ombrellën e shtetit, toka ka qenë nën ombrellën e shtetit, zhvillimet janë parapa nga shteti dhe ndërtimet gjithashtu. Domethënë relacioni midis pushtetit dhe arkitekturës është një prej temave kryesore që shqyrtohet brenda kësaj ekspozite.

Kjo ekspozitë është e rëndësishme sidomos për të rinjtë, të cilët shumë pak dinë për kontekstin e socializmit dhe komunizmit. Por, autorët përveç që kishin sjellë punën e tyre për të shpalosur shumë gjëra rreth kësaj teme, ato morën fjalën dhe sqaruan disa gjëra para tyre.

Njëra nga autorët e kësaj ekspozite, Denada Veizaj, tha se ky projekt fillimisht lindi si një kuriozitet profesional.

“Ne jemi arkitekt dhe kërkues shkencorë në të njëjtën kohë, sigurisht që duke qenë arkitekt ne kishim një lloj kuriozitetit se cila ishte rutina e arkitektëve të gjeneratës së para viteve 90-ta. Ky është viti i katërt gjatë të cilit ne jemi duke u marrë me këtë projekt. Gjatë këtij projekti jemi përpjekur të tregojmë dy histori, një histori kontekstuale e cila lidhet me historinë e Shqipërisë, me kuriozitetin që ne kemi se çfarë ka ndodhur në periudhën e komunizmit, dhe historia e dytë është një temë më gjenerike, e cila në thelb sjellë një variacion mbi temën që arkitektura krijon me pushtetin”, u shpreh ndër të tjera Veizaj.

Ndërsa arkitekti dhe njeherit njëri ndër autorët e kësaj ekspozite, Gjergj Islami, u shpreh fillimisht i lumtur që po shihte shumë të rinj në sallë, e që besonte që nuk e njohim mirë se çfarë është komunizmi në Shqipëri, historinë e mirëfilltë të tij dhe se si ky komunizëm mund të prodhojë një arkitekturë që është unike dhe e lidhur tërësisht me raportin që politika dhe pushteti kanë pasur mbi projektuesin.

“Padyshim që në komunizëm ka një seri elementësh të veçantë që e kthejnë realitetin e Shqipërisë të asaj kohe të jetë i lidhur fortë me arkitekturën dhe se si arkitektët e bënin punën e tyre. Shkolla e parë e arkitekturës është hapur në Shqipëri në vitin1969 dhe shumica e profesorëve ishin inxhinier dhe më pas këta njerëz nuk patën më asnjë kontakt me botën e jashtme deri në vitin 1990”, tha Islami para të pranishmëve.

Të gjithë vizitorët sonte u panë shumë kureshtarë teksa po hulumtonin të mësonin të vërteta rreth asaj kohë që ndoshta për disa të rijnë ishte e mjegullt e për disa e panjohur. Por, kishte edhe prej atyre që po i diskutonin me shumë delikatesë çështjet e asaj kohe.

Ekspozita do të mirëpres edhe shumë vizitorë të tjerë për të ndarë bashkë gjërat që ndoshta si keni ditur më herët. /KultPlus.com


“Nën Presion” sonte në GKK

Posted on by Kult Plus

Në Galerinë Kombëtare të Kosovës, sot më 21 nëntor me fillim nga ora 20:00, hapet ekspozita “Nën Presion – Fakte nga arkitektura socialiste në Shqipëri”, shkruan KultPlus.

Ekspozita vjen nga Gjergj Islami, Denada Veizaj, Gjergj Thomai dhe Enrico Fontanari të kuruar nga Eliza Hoxha dhe Ilir Gjinolli.

Ceremonia e hapjes do të bëhet në Galerinë Kombëtare të Kosovës sonte në orën 20:00./ KultPlus.com

Lulzim Zeqiri solli udhëtime në tri pika kyçe të jetës e krijimtarisë së tij (FOTO)

Posted on by Kult Plus

Gili Hoxhaj

Një pamje ndryshe i kanë dhënë Galerisë Kombëtare të Kosovës shtyllat e vendosura në katin e poshtëm të saj.

Ato simbolizojnë të ardhmen në sytë e autorit, duke përshkruar shoqërinë në tranzicion. Nëse shihet në kontekstin e aktiviteteve të përditshme simbolizon qartë edhe një bazament që të krijon frikë e siguri në të njëjtën kohë. Po ashtu përmes pikturave në ekspozitë, autori shpreh lidhshmërinë mes gjendjes shpirtërore e asaj fizike, ku përshkruan pjesën e fundit të ditës së një gruaje, e cila këmbëzbathur qëndron si gjysmë e fjetur e gjysmë e zgjuar që paraqet një prehje shpirtërore. Hija e vendosur në pikturë u jep atyre kahe kah instalacioni. Derisa shikon shtyllat e vendosura jo shumë larg tyre, e kujton simbolikën e tyre se si gruaja është parë gjithnjë si shtyllë e shtëpisë edhe pse në këtë rast paraqitet roli i saj i amvisërisë që e ka shoqëruar gjatë viteve.

“Sa i përket shtyllave lidhja më e mirë kish qenë me tranzicionin, ku e shoh si një ngarkesë për të ardhmen por në anën tjetër kur bëjmë aktivitetet tona, shtyllën mund ta shohim edhe si suportuese por në anën tjetër na jep frikën sepse e dimë se saktë diçka është përmbi. Në anën tjetër gratë në piktura paraqesin një gjendje të caktuar shpirtërore e fizike që paraqesin një gjendje që vetëm në vetmi mund ta përjetojnë një gjuhë të trupit”, tregon autori duke shtuar se shtyllat mund të përballin gratë si diçka fisnike.

Ekspozita që erdhi mbrëmë nga Lulzim Zeqiri, shpreh të gjitha bindjet e dilemat e autorit për profesionin për të cilin shprehet se nuk “ua lejon ta ndërrojnë”. Ai tregoi për KultPlus se titulli “Muzeu i Tri Pikave” e ekspozita si tërësi paraqet një vazhdimësi që lidhet me fëmijërinë e tij, me pasionin për profesionin dhe me të ardhmen që e ka bazën në tranzicon.

“Titulli “Muzeu i Tri Pikava” ka qenë një titull për të cilin kam menduar mjaft gjatë se si ta vendos titullin pasi që është si një derë e hapur prej nga njerëzit mund ta shohin veprën. “Tri pika” e kam menduar si një vazhdim sepse kjo është një intervenim hapësinor ku janë përmbledhur punimet ose gjërat të cilat i kam marr prej fëmijërisë, i kam liruar nga bota e rëndomtë dhe janë vendosur në një gjendje tjetër dhe kjo është një pikë. Pastaj është pasioni im, piktura me të cilën unë merrem e që s’ma lejon të mos merrem me të, e që paraqet pikën e së tashmes dhe pika tjetër është për një të ardhme me të mirë për vendin tim dhe ekzistencën që është e paraqitur në këto shtylla që sado na japin një siguri e në anën tjetër na japin edhe një lloj frike”, shpjegoi Zeqiri për KultPlus.

“Shaping the Infinite” paraqet fotografi të veturave të mbledhura ndër vite. Duke i dhënë formë infinitit. Ky instalacion vjen si monument i lumturisë të cilën artisti thotë se shpesh e synojmë nganjëherë pavetëdijshëm.
“Ky instalalacion paraqet fotografi të mbledhura ndër vite nga vëllai im, unë i kam ndihmuar kohë pas kohe. Më ka fascinuar pasioni i tij pavetëdijshëm dhe numrat që i ka mbledhur, këtu e vëren atë të pakufishëm për lumturi tek fëmija”, pohon tutje Zeqiri.

Mbi letrat me mbishkrimet qëndrojnë farat, ato letra janë letra që artisti i ka shkëmbyer me babanë e tij e pikërisht aty takohen dy bindje në një pikë. Farat dhe poezia të cilat momentin që i hedh i përkasin krejt dikujt tjetër. Aty autori shtjellon idenë për të përsosurën e pakompromis.

“Atij që i vendos farat i intereson ta ketë një letër për t’i terur ato, atij nuk i intereson se çfarë shkruan, në anën tjetër, ato fara që i merr prej frutit më të mirë, nuk varen asnjëherë prej tij por edhe prej kohës, tokës dhe shumë gjërave kurse sado që e shkruan një poezi të mirë kurrë se di a është më e mirë, sepse pastaj nuk varet prej teje po prej lexuesit”, shtoi artisti Lulzim Zeqiri.

Drejtoresha e Galerisë Kombëtare të Kosovës, Arta Agani tha që artistin Lulzim Zeqiri e njeh qysh moti dhe prej tij ka mësuar se si t’i vendos kornizat në pikturë, ndërsa tha se ekspozitën e mbrëmshme e cilëson si të jashtëzakonshme.

Në mesin e shumë vizitorëve që kishin mbushur Galerinë Kombëtare të Kosovës, ishte edhe shkrimtari e publicisti Shkëlzen Maliqi. Ai tha për KultPlus se Lulzim Zeqiri përfaqëson një nga figurat më të rëndësishme të skenës artistike në Kosovë. Në këtë ekspozitë, Maliqi theksoi piktura që vijnë në formën e i pikturës konceptuale dhe që shfaq një imazh të Kosovës, veçmas të grave kosovare e që ne nuk e shfaqim shumë shpesh.

“Lulin e njoh që prej të 90-ve dhe si student ka qenë një prej artistëve më të mirë të brezit të tij. Kohëve të fundit nuk e kam përcjellë aq shumë pasi që ai ka qenë në Austri e unë në Shqipëri por kjo ekspozitë apo ekspozitë në treshe është shumë interesante, sidomos ajo pjesa me pikturat ku më ka befasuar, po ashtu me shtyllat e vendosura në galeri që e ka një efekt të përditshmërisë së Kosovës”, u shpreh Maliqi për KultPlus duke shtuar se kjo dëshmon se ndonjëherë artistët kur janë larg duket se e konceptojnë më mirë vendlindjen.

Zeqiri ka përfunduar Fakultetin e Arteve, drejtimi pikturë, në vitin 2002 në klasën e Xhevdet Xhafës, ku më pas edhe ka magjistruar në vitin 2007, në klasën e Rexhep Ferrit.

Është pjesëmarrës në shumë ekspozita ndërkombëtare e vendore, si dhe fitues i disa çmimeve. Në vitin 2003 ka fituar çmimin e parë në edicionin e parë të shpërblimit ndërkombëtar, “Muslim Mulliqi” , kurse më 2011 ka marrë çmimin “Filmi më i mirë kombëtar” në Dokufest për filmin “Portreti i humbur”.

Po ashtu është fitues i çmimit të dytë për inovacion në artin publik nga Zyra e BE-së në Prishtinë në vitin 2012./ KultPlus.com

Lulzim Zeqiri me ekspozitë personale në Galerinë Kombëtare të Kosovës

Posted on by Kult Plus

Galeria Kombëtare e Kosovës, më 19 nëntor sjellë ekspozitën “Muzeu i tri pikave” të artistit Lulzim Zeqiri, shkruan KultPlus.

Ekspozita “Muzeu i tri pikave” hapet të hënën me fillim nga ora 20:00 në Galerinë Kombëtare të Kosovës.

Ekspozita do të qëndrojë e hapur deri më 12 dhjetor./ KultPlus.com

https://www.facebook.com/Galeria.Kombetare.e.Kosoves/videos/2889631541062735/

A janë histori kujtimet tona?

Posted on by Kult Plus

Më 18 tetor me fillim nga ora 19:00, në Galerinë Kombëtare të Kosovës, hapet edicioni i 12-të i ekspozitës dhe Çmimit Muslim Mulliqi, shkruan KultPlus.

Iniciuar në vitin 2003 nga Ministria e Kulturës e Kosovës për të promovuar artistët vizual në Kosovë, ekspozita e Çmimit Muslim Mulliqi është ekspozita më e rëndësishme për artet bashkëkohore vizuale në Kosovë.

Kjo është një ekspozitë e kuruar me pjesëmarrës vendorë dhe ndërkombëtarë, përgatitur nga një apo shumë kurator të jashtëm që përzgjedhin artistët vendorë edhe ata ndërkombëtarë.

Tani në edicionin e tij të 12-të, Çmimi Muslim Mulliqi tenton të pozicionohet si një nga projektet më interesante të artit bashkëkohor në regjion. Një katalog ekskluziv do të botohet dhe shpërndahet ndërkombëtarisht.

Juria profesionale do të përzgjedh një fitues që merr çmimin për veprën më të mirë të paraqitur të artit pamor.

Juria e këtij edicionit të dymbëdhjetë të MM është:
Visar Mulliqi, profesor i pikturës në Fakultetin e Arteve në UP;
Dita Starova-Qerimi, drejtoreshë e Galerisë Kombëtare të Maqedonisë;
Valentina Bonizzi, artiste vizuale.

Ekspozita Çmimi “Muslim Mulliqi” do të mbledh së bashku si artistët kosovarë ashtu edhe ata ndërkombëtarë dhe do të përfshijë si veprat ekzistuese ashtu edhe projektet e bërë posaçërisht për ekspozitën. Nga shikimi i parë i lidhjes tradicionale ndërmjet artit dhe shoqërisë, ekspozita ka për synim që të tërheq një publik të gjerë që do të zbulojë përmbajtjen konceptuale, sociale dhe politike pas një hapësire tërheqëse vizuale.

Autorja e konceptit dhe përzgjedhësja e artistëve të këtij edicioni është Iara Boubnova, kuratore e artit bashkëkohor dhe kritike arti nga Sofja./ KultPlus.com

Sislej Xhafa për protestën që mbahet sot nga UFA: Unë jam vegjetarian, ju dua pa e ditur

Posted on by Kult Plus

Sarandë Selimi

Sot më 24 korrik, është paralajmëruar protestë para Galerisë Kombëtare të Kosovës nga aktivistët për të drejtat e kafshëve – United for Animals – UFA.

Krejt kjo, ka ardhë pas hapjes së ekspozitës së artistit kosovar të njohur ndërkombëtarisht Sislej Xhafa, i cili në ekspozitën e titulluar “Të dua pa e ditur”, përveç të tjerash ka edhe veprën “Eight Kosovo Cows”, ku në oborrin e Galerisë Kombëtare të Kosovës, është ndërtuar një ahur në të cilin janë gjithsej tetë lopë që qëndrojnë dhe do të qëndrojnë aty përgjatë 1 muaji, shkruan KultPlus.

Kësisoj, pak orë para se të nisë protesta e thirrur ditë më parë, udhëheqësit e Galerisë Kombëtare të Kosovës, kanë thirrur konferencë për media ku u bë e ditur e gjithë mirëmbajtja e lopëve. Në konferencë të pranishëm ishin drejtoresha e galerisë Arta Agani, përfaqësuesi i Këshillit Drejtues të galerisë Driton Axhami dhe pronari i lopëve Arben Avdiu.

Si fillim Arta Agani, tha se është e dhembshme që detyrohet të diskutojë çështje të cilat sipas saj duhet të jenë të nënkuptuara dhe të bazuara në kredibilitetin e institucionit të cilin ajo drejton dhe MKRS.

“Është e dhembshme që një artist i përmasave botërore, dhe institucioni kryesor për art vizual në Kosovë, vihen në pyetje për çështje teknike, derisa qëndron e hapur një ekspozitë origjinale, gjeniale që në formë shumë unike, i referohet çështjeve të ekzistencës, mbijetesës, migrimit, identitetit të Kosovës dhe historisë së saj”, tha ajo duke vazhduar të thotë se të gjitha ato që janë thënë janë spekulime.

“Sipas disa spekulimeve, ne i paskemi izoluar në një “ahur të improvizuar” dhe po “trajtojmë mizorisht” lopët në GKK, kinse edhe ua paskemi shkelur te drejtat lopëve. Ne kemi qenë maksimalisht transparent gjatë rrjedhës së organizimit të ekspozitës së Sislej Xhafës, “Love you without knowing” dhe qëndrojmë pas çdo veprimi dhe çdo vendimi që është marrë për të realizuar këtë ekspozitë. Askush nuk është dëmtuar e aq më pak kafshët për të cilat, disa individë në emër të mbrojtjes së kafshëve po trumbetojnë se ua kemi shkelur te drejtat”, tha Arta Agani.

Gjatë konferencës fjalën e mori edhe pronari i lopëve Arben Avdiu, i cili tha se lopët janë të fermës, nuk janë lopë të natyrës. Ai theksoi se lopët në GKK, kanë trajtim më të mirë se sa në fermën e tij.

“Unë vetë në shtëpi i mbajë brenda në fermë, po sikur të kishin qenë të natyrës, këto nuk kishin mundur të rrinë brenda. Kushtet i kanë shumë të mira, që të gjitha i kanë, kujdesje kanë 24 orë, që unë në shtëpi time natën nuk rri t’i ruaj, a këtu e kanë përkujdesjen 24 orë”, theksoi Avdiu.

Ndërsa, sa i përket krejt kësaj ‘zhurme’ që është krijuar rreth kësaj ekspozite, vetë artisti Sislej Xhafa është deklaruar vetëm me një fjalë të cilën ia kishte dërguar drejtoreshës së GKK-së, për ta lexuar.

“Unë jam vegjetarian, ju dua pa e ditur”, ka thënë Xhafa.

Ndërkohë, protesta do të mbahet sot më 24 korrik, para Galerisë Kombëtare të Kosovës, me fillim nga ora 16:30.

Në vijim po sjellim të plotë listën me gjërat e detajuara të cilat u servohen lopëve në GKK, e krejt këto, sipas rekomandimeve të Ministrisë së Bujqësisë:

Sipas rekomandimit nga Ministria e Bujqesise të cilën e kemi marrë me datën 25 Prill 2018, ndërsa e kemi përditësuar dje, për shkak të spekulimeve të lartpërmendura, këto janë kushtet të cilat duhen përmbushur dhe konform të cilave ne e kemi ndërtuar objektin.

Kafshëve gjatë gjithë kohës së ekspozimit u sigurohet ujë i pastër për pirje dhe baza ushqyese për plotësimin e kushteve fiziologjike dhe kërkesave sipas prodhimtarisë: ushqimit voluminoz (sane apo silazhë), ushqimi i koncentruar për kategorinë përkatëse ( psh për lope qumështore apo për majmëri). Uji dhe ushqimit duhet të jenë të mjaftueshëm gjatë gjithë ditës ( ab limitum);

Në rast se janë në fazën e prodhimtarisë së qumështit bëhet mjelja e tyre së paku 2 (dy) here në ditë. Në rast se kafshët janë në fazën e mëmëzimit ( të vogjlit që janë në fazën e thithjes së qumështit) duhet të mos pengohet mëmëzimi;

Hapësira ka shtrojë të thatë që i mundëson qëndrim komod në vend të thatë (pa lagështi). Për shtrojë zakonisht përdoret kashta, ku ne kemi shtruar beton dhe kashtë.

Hapësira është mjaftueshme për qëndrim. Sipas standardeve zooteknike kërkohet që për gjedhe të ketë të paktën 4 m² për krerë në hapësirë të mbyllur dhe 8 metra katrorë në të hapur. Objekti ynë i ka 120 metra katrorë, pjesërisht të mbuluar, që do të thotë se janë 15 metra katrorë për kokë, tri herë më shumë se hapësira e rekomanduar për brenda dhe dy herë më shumë se hapësira e rekomanduar për jashtë.

Hapësira është e ndriçuar mirë, në mungesë të ndriçimit natyral ka ndriçim të mjaftueshëm artificial ( elektrik);
Lagështia është 75-80% maksimum ndërsa temperatura mbahet nën kontroll.

Gjatë ekspozimit kafshët janë nën mbikëqyrje, ku vetë pronari kujdeset për to dhe ka përgjegjësi të plotë.

Largimi i jashtëqitjeve fiziologjike është i rregullt dhe i vazhdueshëm meqë është instaluar kanalizimi me gropë septike.

Rekomandohet që kafshët të jenë në lëvizje së paku 1 orë në ditë, ku ne brenda objektit e kemi hapësirën në të cilën ato mund të lëvizin lirshëm. Po ashtu, pronari ka mundësi që të nxjerrë ato jashtë objektit, kurdo që e ndien të nevojshme./ KultPlus.com

Ekspozita Arttenn Club solli një pasqyrë të jetës së adoleshentëve

Posted on by Kult Plus

Alberina Haxhijaj

Gerta Sahiti, Diona Krasniqi, Erza Qorroli, Odise Lokaj, Anton Junçaj, Nita Shala, Erika Arllati, Bora Shala, Eurta Salihu, Ideal Ndrecaj, Lum Gashi, Hana Puka, Blega Halimi dhe Zana Begolli për tre muaj kanë punuar së bashku në projektin Artteen Club. E pas kësaj kohë mundi i tyre është kurorëzuar me hapjen e ekspozitës së tyre të përbashkët në Galerinë Kombëtare të Kosovës, shkruan KultPlus.

Të 14-të pjesëmarrësit në ekspozitën Artteen Club-Laboratori i kreativitetit që nga muaji mars kanë punuar së bashku në projektin i cili u implementua në kuadër të programit të edukimit i cili vazhdon ende të zhvillohet në GKK. Punën e bërë gjatë këtyre muajve, nxënësit, të cilët vinin nga shkolla dhe qytet të ndryshme të Kosovës, e prezantuan para të pranishmëve mbrëmë në Galerinë Kombëtare të Kosovës.

Nxënësit pjesëmarrës në ekspozitë përmes punimeve shpalosnin dëshirat e tyre, shfaqnin detaje nga ambienti në të cilin janë rritur, ëndrrat, preokupimet, por edhe dashurinë dhe anën fëmijërore të tyre. Pikërisht këto elemente e bënin më të veçantë këtë ekspozitë në Galerinë Kombëtare të Kosovës.

Drejtoresha e Galerisë Kombëtare, Arta Agani, u shpreh e lumtur që ky institucion po mirëpret punën e këtyre artistëve të ri përmes të cilëve ajo uroi që edhe bota të dëgjojë në të ardhmen për artin në Kosovë.

“Programi i edukimit për ne është program shumë i rëndësishëm pasi që ne dëshirojmë që të promovojmë rritjen e publikut, duke pasur si vizitorë pikërisht fëmijët nga shkolla të ndryshme dhe sigurisht stimulimin e artistëve të ri”, tha ajo.

Koordinatorja e programit të edukimit, Vlora Hajdini-Hajrullahu, ka treguar se gjatë periudhës sa nxënësit ishin pjesë e këtij programi ata kanë marrë pjesë në kurse inovative përmes të cilave kanë zbuluar forma të ndryshme të shprehjes përmes artit.

“Gjatë këtyre muajve kemi kaluar një kohë mjaftë produktive së bashku dhe fëmijët të cilët kanë qenë mjaft aktiv dhe të interesuar për të njohur më shumë boten e artit dhe për të punuar në atë drejtim”, tha ajo.

E udhëtimi nga Ferizaj për të qenë pjesë e këtij programi nuk ka qenë një pengesë për Gerta Sahiti e cila ishte pjesëmarrëse.

“Kemi pasur ligjërata dhe punëtori. Në kuadër të punëtorive kemi pasur instalacione, zinë art dhe fotografi. E mirë e projektit është që kemi pasur punë individuale si pjesa zinë art dhe fotografitë por kemi punuar edhe së bashku si instalacionet të cilat janë më shumë punë kolektive”, tregoi ajo për KultPlus.

Krejt në fund, Gerta Sahiti e cila ka dy vite që ndjek kurse për pikturë dhe vizatim theksoi se më e rëndësishmja e këtij programi ka qenë të mësuarit se arti nuk është vetëm pikturë dhe vizatim por ka edhe forma dhe mundësi të tjera shprehëse. /KultPlus.com

Në GKK hapet ekspozita “Artteen Club-Laboratorit të kreativitetit”

Posted on by Kult Plus

Më 20 qershor me fillim nga ora 19:00, në Galerinë Kombëtare të Kosovës, hapet ekspozita “Artteen Club-Laboratorit të kreativitetit”, shkruan KultPlus.

Kjo ekspozitë përmbyllëse e projektit me titull Artteen Club – Laboratori i kreativitetit, promovon punën e nxënësve, punë kjo që u realizua gjatë periudhës Mars – Qershor 2018 .

Ky projekt u implementua në kuadër të programit të edukimit i cili vazhdon ende të zhvillohet në GKK.

“Krijimet e këtyre të rinjve të cilat do të keni rastin t’i shihni në këtë ekspozitë do të ju lidhin direkt me sinqeritetin tyre e mbi të gjitha dëshirën e tyre për t’u shprehur përmes artit”, thuhet në njoftim./ KultPlus.com

Lorik Sylejmani, solli një kombinim të pazakontë të elementeve përmes “Eja të shohësh vetminë” (FOTO)

Posted on by Kult Plus

Alberina Haxhijaj

Mbrëmë në Galerinë Kombëtare të Kosovës është bërë hapja e ekspozitës “Eja të shohësh vetminë”. Të pranishmit patën mundësinë të shohin një përzgjedhje të punës së artistit Lorik Sylejmani e cila erdhi përmes 24 punimeve. Punime këto të cilat ishin edhe një ftesë për të hyrë në botën e artistit duke reflektuar njëkohësisht edhe mbi vetminë.

Artdashësit të cilët ishin të pranishëm arritën të kuptojnë se vetmia sipas Sylejmanit është një ndër vetit kryesore të njerëzimit. Mirëpo pikërisht vetminë artisti e sheh si gjendje dhe nuk e konsideron një emocion. Këtë ai e zbuloi në intervistën që dha për KultPlus.

“S’jam bazuar në emocion por vetminë e kam marrë si gjendje. Është një gjendje të cilën nuk mund ta paracaktojmë por mund të ndodh vetvetiu. Në këto njëzet vite punë është vështirë të bëhet një përzgjedhje, por kur e vendos temën e ekspozitës është akoma më e vështirë të përshtatësh punët dhe të bësh një përzgjedhje në katër hapësira”, tha ai duke shtjelluar tutje disa konceptet që fshiheshin brenda këtyre hapësirave.

Ekspozita e ndarë në dhoma fillonte me “Dhomën pa pamje”, totalisht të vetmuar. Pikërisht në hyrje të kësaj hapësirë artisti ka përdorur tingullin si element për të bërë një vepër artistike. Artisti i cili ka një lidhje të përjetshëm më muzikën ka zgjedhur këngën “God Save the Queen” nga Sex Pistols, duke marrë kështu gjurmët e zërit të këngës dhe duke i shtrirë në flamurin anglez. Po ashtu në këtë cikël të punëve me tingull ai shfaq edhe punën ‘Marcele Duchamp zbret shkallëve’.

Ndërsa “Dhoma e Lou Reed dhe Laurie Anderson”, e që ai i kishte idhuj kohë më parë, paraqet punime të magjistraturës së viteve 1996-1997. Punime të cilat artisti më nuk i posedon pasi që janë shitur por që ai i riciklon, ripunon ndonjë herë edhe duke i ndryshuar ato.

Në dhomën e tretë “Arti imiton jetën”, paraqiten punime me panterna të ndryshme, të cilat artisti i ka imituar nga copat e shtofit të cilat i ka blerë, duke ricikluar kështu materialin dhe duke ridizajnuar atë.

Ndërsa në dhomën e katërt “Videoplex”, paraqiten dy video. Aty këngës “Rabini” nga grupi Bankrot e cila nuk ka videoklip, i është realizuar një i tillë përmes montazhesh së artistit. Kështu në videoklip shihet artisti në ditën e tij të parë në shkollë, lindja e vëllai të tij dhe dasma e dajës së artistit. Filmi i fundit është “Won’t you come and see loneliness”, Një film eksperimental 5 minuetesh prej të cilit edhe ka marrë emrin ekspozita.

Enë hyrje të galerisë qëndronte i vendosur mbishkrimi “Video sex” të cilën artisti e konsideron edhe si deklaratë e tij të fundit.

“Nëse e merr vetminë, njerëzit në dashuri e kërkojnë shpëtimin, e ajo është ideja kryesore. Mirëpo sot mund ta konvertosh edhe në këto proceset, ngacmimet seksuale që po ndodhin. Pas dy a tri vitesh mund të dëgjojmë një burrështetas i huaj që ka pasur një skandal seksual dhe ta lidhës me atë pra është një temë që riciklohet çdo herë”, tha ai duke shtuar se elementi që i bashkon të gjitha këto punime të prezantuar është vetmia.

Kjo është ekspozita e parë e artistit që nga pas lufta, në qytetin e tij të lindjes. Mungesë mund të arsyetohet pasi që ai më shumë ka marrë pjesë nëpër ekspozita ndërkombëtare. Pikërisht për këtë rikthim të tij në Prishtinë artisti e falënderon drejtoreshën e Galerisë Arta Aganin dhe gjithë stafin për punën që kanë bërë, duke e quajtur këtë ekspozitë, një kurorëzim të punës së tij 20 vjeçare.

E në anën tjetër ky kombinim i elementeve të ndryshme në këtë ekspozitë sipas drejtoreshës së Galerisë Kombëtare të Kosovës mund të kuptohet duke kujtuar se cilës gjeneratë i takon artisti, e të cilën ajo e quan ‘Change-gen’.

“Në ekspozitën “Eja të shohësh vetminë” artisti përfundon duke tërhequr vëmendjen kah vetja si vëzhgues i pazëshëm i çmendurisë konsumatore dhe integritetit të kompromentuar njerëzor, duke u distancuar nga to me një barrierë vetmie si faktor i refleksionit të thellë” është shprehu Arta Bunjaku.

Ekspozita do të qëndrojë e hapur në Galerinë Kombëtare të Kosovës deri më 11 maj 2018./ KultPlus.com

Agron Blakçori, sjellë ekspozitën e radhës në GKK

Posted on by Kult Plus

Artisti Agron Blakçori, këtë të enjte sjellë ekspozitën “A mund ta imagjinosh këtë si diçka të bukur”, me kurator Mehmet Behlulin, shkruan KultPlus.

“A mund ta imagjinosh këtë si diçka të bukur”, ka filluar me një imazh të një peizazhi urban, një fotografi e cila është shkrepur nga artisti afër shtëpisë së tij në Podujevë, Kosovë. Fotografia është prekëse; ajo paraqet një “intervenim” të rëndomtë të mbeturinave të njerëzve dhe natyrës. Një strukturë delikate dhe e brishtë e ndërtuar nga plastika dhe degë të thata duke kaluar nëpër hapësirë, duke krijuar një ndjenjë të perspektivës. Prapa, në plan të tretë, shtëpi të reja të cilat sapo janë ndërtuar nga një ekonomi artificiale paraqiten të ndara dhe të mbrojtura nga një muri brenda hapësirës kolektive të mbyllur.

I diplomuar nga Fakulteti i Arteve të Universitetit të Prishtinës me master në skulpturë, kryesisht punët e Blakçorit janë të inspiruar nga objektet dhe situatat në rrugë, përballja në të cilin artisti i jep kuptim asaj e cila ka mbetur e fshehur nga njerëzit e tjerë të cilët e kanë injoruar. Agron Blakçori është po ashtu fitues i edicionit të pare të Artistëve të rijnë në Galerinë Kombëtare të Kosovës në vitin 2016.

Kjo ekspozitë hapet këtë të enjte në Galerinë Kombëtare të Kosovës, duke filluar nga ora 19:00 ndërsa ekspozita do të qëndroj e hapur deri më 1 prill./ KultPlus.com

Thomas Hirschhorn: Pikësellimi apo mjegullimi ka marrë përsipër rolin e autentikes (FOTO)

Posted on by Kult Plus

Gili Hoxhaj

Thomas Hirschhorn është artist i njohur zviceran por që tash e një kohë jeton në Paris. Veprat e tij janë ekspozuar në shumë muze e galeri të botës, përfshirë këtu edhe Bienalen e Venedikut, Documenta 11, Bienalja e 54-të e Venedikut, Bienalja e 9-të e Shangait, Galeria Gladstone në New York e vende të tjera.

Kurse sonte do të ekspozoj punën e tij në Galerinë Kombëtare të Kosovës.

Para kësaj ekspozite, ai mbrëmë mbajti një takim me dashamirët e artit pamor. Në Galerinë Kombëtare të Kosovës ai prezentoi pikëpamjet e punës së tij që lidhen me imazhet konfrontuese dhe përballjen me teknikat e rrejshme dhe maskuese të mediave. Pyetja e tij thelbësore është se ‘Pse është e rëndësishme sot të tregojmë dhe shikojmë imazhe të trupave të shkatërruar të njerëzve’. Viteve të fundit, Hirschhorn ka zbarkuar në këtë lloj pune thellësisht personale, politike dhe sociale, e cila eksploron limitet dhe mashtrimet e kulturës dhe media.

Nikoqirja e kësaj mbrëmje, Arta Agani- Bunjaku ishte ajo që u uroi mirëseardhje artistit zviceran Thomas Hirschhorn dhe kuratorit të ekspozitës Dirk Snauwaert. Ajo fillimisht lexoi biografitë e tyre në mënyrë që publiku të njihet me gjerësisht me punën e tyre. Në mes të tjerash ajo përmendi edhe çmimet e shumta të Thomas Hirschhorn si çmimin “Marcel Duchamp”, çmimin “Joseph Beuys”, çmimin “Kurt Schwitters”…

Thomas Hirschhorn para se të filloi prezantimin e tij, tha se ndihet shumë i lumtur që është këtu dhe se kjo ishte hera e parë e tij në Kosovë. Tematika e tij lidhej me Kolazhin që bëhet përmes piksellimit e që identifikohet edhe në shumë punime që ai prezantoi mbrëmë. Kolazhi që është shumë i pranishëm në punën e këtij artisti është një punë që ai e ka dashur qysh si i vogël ndërsa mbrëmë tregoi edhe disa arsye të kësaj.

“Më pëlqen të bëjë kolazhe sepse më pëlqen që t’i bashkoj elementet e punëve ekzistuese dhe arsyeja përse bëj kolazh është sepse tregon se ajo nuk është një punë e përfunduar por është gjithnjë në progres”, tregoi artisti Hirschhorn.

Në mes tjerash artisti zviceran Hirschhorn ngrit çështjen mes raportit të estetikës dhe etikës jo vetëm në nivel individual të gjykimit por edhe në nivel kolektiv. Për të ngjallur debat lidhur me këtë ai prek disa tematike ekstreme të dhunës, gjymtimit, vojërizmit dhe urgjencës së imazheve. Me punën e tij aq sa përpiqet të nxjerrë pjesën e të vërtetës, ai mundohet ta nxjerrë në pah edhe pjesën manipulative dhe atë që ne nuk mund ta shohim dhe që i mohon faktet. Ndërsa në fotografitë e mjegulluara është gjithnjë një arsye përse dikush ka vendosur që t’i mjegulloi ato.

Arti është rezistencë dhe si i tillë i reziston fakteve. Ai thotë se pikësillimi në abstraksionin e tij arrin ta krijoi një formë të re.

“Qëllimi është të kuptohet se si një fotografi ekzistuese e publikuar mund të bëhet abstraksion. Më duket që në mënyre paradoksale, gatishmëria autoritare përdor pikësillimin në mënyrë që ta fsheh, ta “mbrojë”, të mos paraqes, në të vërtetë është bërë një mënyrë për ta prekur të vërtetën. Të prekësh të vërtetën nuk nënkupton verifikim të informatave, të prekësh të vërtetën është veprim i emancipimi”, deklaron Hirschhorn.

“Unë dua ta përdor mjetin art sepse më lejon t’i rezistoj fakteve historike. Unë e përdor atë në mënyrë që vepra ime të arrij përtej historisë, historisë në të cilën unë jetoj. Arti është mjet për të mbajtur koncentrimin të përqendruar në atë që vlen për mua, në atë që është thelbësore në formë”, është një nga përgjigjet e artistit se përse e përdor mjetin apo instrumentin të cilin ai e përdor.

Ekspozita ‘Pixel-Collages’ e autorit zviceran do të hapet sonte në Galerinë Kombëtare të Kosovës duke filluar nga ora 19:00./ KultPlus.com

Galeria Kombëtare e Kosovës publikon programin e ekspozitave për këtë vit

Posted on by Kult Plus

Programi i ekspozitave vazhdon të jetë pjesa kryesore e programit të ekspozitave GKK do të zhvillojë edhe programet si ai i hulumtimit dhe publikimeve, ligjëratës dhe debatit, si dhe edukimit.

Ekspozitat tradicionale të GKK në vitin 2018 do të jenë: Edicioni i dymbëdhjetë i Bienales “Çmimi Muslim Mulliqi edicioni i XIII”, dhe “AR”- edicioni III. Në konkursin për programin e vitit 2018 kanë aplikuar 21 konkurrues. Ekspozita e parë e këtij viti është Vizatimi Sot me kurator Ismet Jonuzin, hapet me rastin e dhjetëvjetorit të pavarësisë së Kosovës.

16 Projektet e përzgjedhura të aprovuara nga Këshilli Drejtues që do të realizohen në kuadër të programit në GKK:

Ekspozitat Vetanake:

Thomas Hirschhorn – PIXEL COLLAGE: Ekspozitë e artistit të njohur ndërkombëtarisht, i ftuar nga GKK me përkrahje të SCO.

(Thomas Hirschhorn u lind në vitin 1957 në Bern, Zvicër. Fillimisht I trajnuar si dizajner grafik, Thomas Hirschhorn formon diskursin publik I cili lidhet me pakënaqësinë politike, dhe ofron modele te mendimit dhe mirëqenies alternative. – Duke besuar se çdo person lind me një kuptim mbi artin, Hirschhorn reziston kriteret estetike elitike dhe perjashtuese – për shembull, kualitetin – në favor të principeve dinamike të energjisë dhe bashkekzistencës.)

Sislej Xhafa, SHOW ME THE LOVE:

Artisti i njohur që përfaqësoi Kosovën në Benalen e 57 të Venecias, tani vjen ne GKK me ekspozitën e parë të tij vetanake në Kosovë. (Sislej Xhafa ka lindur në Kosovë në vitin 1970 dhe jeton në Neë York City. Xhafa është i njohur për punët që përkshruhen si “veprime” apo edhe strategji konceptuale që sfidojnë stereotipet kulturore, paragjykimet e fiksuara dhe strukturat institucionale. Duke eksploruar shpesh mënyrat nëpërmjet të cilave funksionon shoqëria bashkëkohore, ai hulumton realitetet sociale, ekonomike dhe politike dhe përfundimisht kritikon konsumizmin dhe mekanizmat e tij lëvizës. Rezultatet e prekshme sociale gjenden me të vërtetë në zemër të hulumtimit artistik të Sislej Xhafës, duke vërë në pikëpyetje statusin ligjor të shtetit të tij të origjinës, Kosovës. Duke punuar në shumë mediume nga piktura deri te vizatimi pastaj skulptura dhe instalacioni, angazhimi i tij me dimenzionet politike është gjithmonë direkt dhe i nënkuptuar, duke reflektuar në normat dhe strategjitë dhe mënyrat ku ata manipulohen në nënvetëdije).

Gani Llalloshi, artisti i njohur ndërkombëtarisht nga Kosova, aktiv në skenën ndërkombëtare i cili sjell për herë të parë ekspozitën vetanake në GKK;

Lorik Sylejmani, dizajner dhe artist multimedial me ekspozitën Come and see Loneliness, me instalacione dhe piktura;

Maksut Vezgishi arkitekt dhe artist që jeton dhe vepron në Bruksel me ekspozitën vetanake;

Lulzim Zeqiri, artist i njohur për videot dhe instalacionet si dhe vizatimet e tij, me ekspozitë vetanake;

Shpresa Faqi, artiste kosovare që jeton dhe vepron në Gjermani, me projektin multimedial DRIVING;

Emine Krasniqi dhe Leonid Palushaj, çift artistësh me ekspozitën e pikturave të tyre;

Ekspozitat kolektive:

– Projekti grupor me kuratorin Avi Lubin,me pjesëmarrës: Gazmend Ejupi, Driton Selami, Luan Bajraktari, Fatmir Mustafa-Carlo dhe Albert Allgeier; – Ekspozitë e arkitekturës socialiste UNDER PRESSURE, me autorë Denada Veizaj dhe Gjergj Islami, me kuratorë Eliza Hoxha dhe Ilir Gjinolli; Bashkëpunimet: – Koleksioni i artistëve francezë nga koleksioni Muzeu i Artit Bashkëkohor të Shkupit, inicuar dhe përkrahur nga Ambasada Franceze në Kosovë; – Amateras Foundation nga Bullgaria me ekspozitën Paper Innovation and Elemental Sculpture,në bashkëpunim me Ambasadën Bullgare ne Kosovë; – Projekti Desire for Freedom nga Bosnia dhe Hercegovina, shkëmbim me Galerinë Kombëtare të Bosnes dhe Hercegovinës; – Ekspozitat që planifikohen jashtë vendit në kuadër të shkëmbimit janë: Radiant Nature në Galerinë Kombëtare të BiH, aktivitete të ndryshme në Sofie dhe Plovdiv të Bullgarisë dhe me Turqinë. Në kuadër të programit të ligjeratës dhe debatit janë planifikuar: një Konferencë regjionale me rastin e pavarësise se Kosovës; ligjerata dhe prezentime nga kuratorë, menaxherë të artit dhe artistë mysafirë të ndryshëm; punëtori të organizuara paralelisht me ekspozitat që trajtojnë problematika të ngjashme. Vazhdon Programi i hulumtimit dhe publikimeve, përfundimi i së cilit do të realizohet me një ekspozitë me vepra të zgjedhura nga Koleksioni i GKK të interpretuara nga ekipi i teoricienëve të artit, si rezultat i hulumtimit gjatë vitit 2017. Programi I Edukimit vazhdon të zhvillohet në dy platforma: përmes vizitave të organizuara të nxënësve nga vende të ndryshme të Kosovës si dhe përmes organizimit të punëtorive të artit bashkëkohor. Risi do të jenë eventet e orientuara kah publiku ku çdo e enjte do të jetë mundësi që vizita në GKK dhe ekspozitat, të jenë të përcjella me ciceron.

Ekspozita “Vizatimi sot”, një pasqyrë 40 vjeçare e vizatimit në Kosovë

Posted on by Kult Plus

Alberina Haxhijaj

Adem Rusinovci, Agim Salihu, Alije Vokshi, Artan Balaj, Artan Hajrullahu, Burim Canolli, Esat Valla, Fjoruntina Sylejmani, Hysni Krasniqi, Jeton Muja, Leunora Salihu, Mehmet Behluli, Musa Prelvukaj, Nebih Muriqi, Orhan Kurtolli, Rexhep Ferri, Shpend Qeriqi, Shyqri Gjurkaj, Veli Blakçori dhe Vlora Hajrullahu janë bashkuar mbrëmë në Galerinë Kombëtare të Kosovës përmes punimeve të tyre duke sjellë kështu një pasqyrë 40 vjeçare të vizatimit në Kosovë.

Artdashësit të cilët e vizituan ekspozitën “Vizatimi sot”, e realizuar me rastin e dhjetëvjetorit të Pavarësisë së Kosovës, arritën që të marrin një përshkrim të tranzicionit që ka pësuar vizatimi ndër vite në Kosovë. Madje përmes vizatimeve arritën që të kuptojnë se cilat kanë qenë ngjarjet apo proceset nëpër të cilat ka kaluar Kosova e që kanë lënë gjurmë në veprimtaritë e artistëve. Gjithë kjo pasi që vizatimi paraqet shumëllojshmërinë përmes mediumeve që artistët kanë zgjedhur si dhe motiveve të shumëllojshme me të cilat ata konfrontohen si krijues.

“Portret”, “Muret”, “Vetmi e madhe”, “Nostalgjia”, “Vizatim në autobus”, Mëngjesi i Orfeut”, “Kthimi në shtëpinë e djegur”, “Furtuna”, “Larg dhe afër”, “Torzo në mal”, “Qele zemrën”, “Çelësi i jetës”, “Qyteti im”, “Jeta është e bukur”, “Gurët në hapësirë”, “Shikimi brenda humnerës”, “Kolltuku”, “Retro copë”, ishin disa nga punime e sjella në këtë ekspozitë, të cilën drejtoresha e Galerisë Kombëtare të Kosovës, Arta Agani e konsideroi të rëndësishme për faktin se në qendër ka vizatimin.

“Për këtë ekspozitë kemi vendosur që t’i qasemi një disipline, një formë të artit e cila nuk trajtohet shpesh nëpër ekspozita. Vizatimi është zgjedhur pasi që është forma e parë e komunikimit ndër njerëzor dhe atij mes gjeneratave. Po ashtu vizatimi është forma më e sinqertë në të cilën nuk ka hile, dhe vizatimi mund të jetë ose i mirë ose i keq por nuk ka mes”, u shpreh ajo duke sqaruar se ky vit ka filluar mbarë për galerinë edhe për faktin se artisti Rexhep Ferri, ia ka dhuruar galerisë vizatimin ‘Portreti i dyfishtë”.

Kjo është e rëndësishme pasi që koleksioni të cilin e posedon galeria nuk është përtërirë me vite.

Në mesin e artistëve pati edhe tre artistë kosovarë nga diaspora të cilët në mënyrë të suksesshëm janë duke e përfaqësuar vendin e tyre si artisti Shyqri Gjurkaj që jeton në Suedi. Pastaj Leunora Salihu e cila tashmë po njihet në Evropë e veçanërisht në Gjermani, dhe Artan Balaj i cili jeton dhe vepron në Belgjikë.

Kuratori i ekspozitës, Ismet Jonuzi tha se realizmi i një ekspozite e cila përmban punime të 20-të artistëve ishte një procedurë e vështirë dhe e këndshme njëkohësisht.

“Artistët janë kryesisht ata që e përfaqësojnë të sotmen dhe janë të moshave të ndryshme, që nga ata që kanë formuar Fakultetin e Arteve në Prishtinë e deri të gjenerata më e re që sapo ka përfunduar Fakultetin e Arteve. Vet titulli dhe koncepti i ekspozitës “Vizatimi sot” ka të bëjë me të sotmen, dhe më atë se çfarë po ndodh me vizatimin sot në skenën e artit pamor dhe një pasqyrë e saj. Natyrisht që në këtë hapësirë nuk mund të përfshihen të gjithë dhe kjo është vetëm këndvështrimi im si autor për të përfaqësuar këta artistë në mesin tuaj”, u shpreh ai.

Një ekspozitë e tillë mirëpo me artistë nga Shqipëria ishte menduar që të shfaqej edhe në Tiranë në të njëjtën kohë mirëpo që për shkaqe të caktuar një gjë e tillë nuk ka arritur që të realizohet. Për piktorin Agim Salihu realizmi i një ekspozite të tillë do të ishte i mirë për faktin se vizatimi trajtohet ndryshe në Shqipëri dhe në Kosovë. Sipas tij në Shqipëri i bëhet një trajtim shumë i mirë vizatimit klasik kurse në Kosovë atij bashkëkohorë.

“Që një kohë të gjatë nuk janë bërë ekspozita të vizatimit dhe kjo tregon një pasqyrë të mirë se çfarë po ndodh me vizatim në Kosovë. Vizatimi ka një traditë të gjatë mirëpo për një kohë ka qenë i lënë anash edhe përkundër faktit se vizatimi ka një rëndësi të madhe pasi që gjithçka realizohet prej një fryme dhe nuk mundet shumë me improvizu, pra është një materie ku tregohet një profesionalizëm shumë i madh”, u shpreh Salihu për KultPlus, duke theksuar se Kosova duhet të prezantojë vetën në botë pikërisht përmes artit.

Ekspozita synon të paraqesë realitetin krijues të skenës së artit pamor aktual por edhe tendencat e reja nga artistët e rinj, e që i bashkon të gjithë në një koncept të vetëm. Por disa prej tyre në mesin e të cilëve është edhe Jeton Muja paraqesin edhe realitetin në Kosovë, përmes video instilacionit, dhe vizatimeve të tij.

“Në vitin 2015 kur kosovarët filluan që të emigrojnë, emigracioni u bë një preokupim i imi si qytetar por edhe si artist. Kjo temë më ka ngacmuar dhe kam filluar ta zhvilloj dhe gjithë puna që kam bërë është në autobus. Koncepti është i tillë që autobusi vizatonte me dorën time”, pohoi ai për KultPlus, duke shtuar se vizatimet janë bërë gjatë udhëtimit në autobus edhe jashtë Kosovës si në Holandë, Romë, Zvicër, Belgjikë, Gjermani e vende të tjera.

Artistët e përzgjedhur tregojnë ecurinë e piktorëve, skulptorëve, grafistëve dhe artistëve medial, që aktualisht janë aktiv në skenën e artit bashkëkohor kosovarë. Kjo i ka lënë përshtypje edhe artistes Vlora Hajrullahu.

“Jam shumë e lumtur që jam pjesëmarrëse me punimet e mia në këtë ekspozitë pasi që jam bashkëpjesëmarrëse me disa nga profesorët e mi të cilët tani i kam edhe kolegë. Vizatimi akoma vazhdon të përdoret në punime e mia edhe pse kam bërë ndryshime shumë. Pra vizatimi mbetet por i përshtatur më ngjyrën dhe i harmonizuar me pjesën tjetër”, tregoi ajo për KultPlus, duke theksuar se është pikërisht teksti i cili e shtynë që të hyjë në koncept të vizatimit.

Ekspozita e hapur më 15 shkurt do të qëndrojë përgjatë këtij muaji në Galerinë Kombëtare të Kosovës. / KultPlus.com

GKK sjellë punëtorinë me An Paenhuysen “Gratë në Art në Gjermani”

Posted on by Kult Plus

Në Galerinë Kombëtare të Kosovës, mbahet punëtoria me An Paenhuysen “Gratë në Art në Gjermani”, shkruan KultPlus. Kjo punëtori i paraprin ekspozitës së artistes së famshme Gjermane Rosemarie Trockel në GKK.

Zonja Paenhuysen është kuratore e pavarur, teoriciene dhe mësimdhënëse e artit që jeton në Berlin. Ajo ligjëron për kulturën dhe teorinë e artit në Qendrën Node për studime kuratoriale. Krahas me kursin e saj Format Kreative të Shkrimit për Art, ajo publikoi një seri librash elektronikë, prej të cilëve i fundit ishte mbi rrëfimin në shkrimet për art. Në Muzeun për Art Bashkëkohor Hamburger Bahnhof, ajo udhëhoqi vizitat- ku artisti i preferuar i saj ne koleksion është Andy Warhol.

Në Hamburger Bahnhof filloi edhe karriera e saj kuratoriale, më 2009, duke bashkëkuruar ekspozitën e Paul Pfeifferit, ndërsa në 2010, së bashku me Wolfgang Mullerin, kuroi ekspozitën Pause. Valeska Gert: Bewegte Fragmente. Së fundmi ka kuruar ekspozitën Up and Down në – Qendrën për Art Bashkëkohor në Berlin, KINDL. Ajo studio historinë e kulturës në Universitetin e Leuvenit në Belgjikë, ku mori titullin PhD që u materializua në publikim të librit në gjuhën holandeze, mbi kritikën kulturore të avant-gardës Belge në vitet e 1920’ta. Ajo vazhdoi studimet postdoktorale në me hulumtimin e fotografisë urbane të Berlinit në vitet e 1920ta në UC Berkeley, Universitetin Columbia në New York, dhe Universitetin Humbold në Berlin, para se të kyçej në botën e artit bashkëkohor.

Punëtoria mbahet më 18 dhjetor me fillim nga ora 16:00 në Galerinë Kombëtare të Kosovës. Për regjistrim për pjesëmarrje, kontaktoni GKK.
Për më shumë informata: http://www.anpaenhuysen.de/ / KultPlus.com

‘Evetari – Ringjallja e alfabetit të harruar Shqiptar’ nesër në Prishtinë

Posted on by Kult Plus

Në Galerinë Kombëtare të Kosovës nesër hapet ekspozita ‘Evetari – Ringjallja e alfabetit të harruar Shqiptar’ me Edon Muhaxherin, shkruan KultPlus.

Prezantimi do të mbahet nesër, më 1 dhjetor me fillim nga ora 18:00 në GKK.

Edon Muhaxheri është artist i diplomuar në RIT Kosova. Në Maj 2017, ai prezantoi temën e diplomës së Masterit në Artet e bukura. Evetari, i cili fokusohet në ringjalljen e alfabetit origjinal të harruar, nga libri i parë Shqipëtar ABC në vitin 1844.

Për mbrojtjen e temës së Edonit, MFA në Praktikën e Ilustrimit në Institutin e Maryland, Kolegji i artit aranzhoi prezencën e Ellen Rixford, një artist i mirënjohur dhe kontribues në botën e sotme të automatizuar. Puna e tij autentike i siguroi një intervistë me Steven Heller për Magazinën PRINT, e cila u pasua me shfaqjen në GDUSA, AIGA Eye on Design, Design Ëeek, Hoë Things Ëork, dhe media tjera lokale dhe ndërkombëtare, duke përfshirë AFP, KOHA, Prishtina Insight, Flatra dhe shume tjera. Së fundmi, programi
Fulbright ka shënuar punën e Edonit me një storje personale në blogun e tyre
zyrtar.

Puna e tij vazhdimisht ndiqet dhe vlerësohet publikisht nga Shkëlqesia e saj ambasadorja e Republikës së Kosovës në DC, Vlora Çitaku, dhe Shkëlqesia e tij ambasadori i Shteteve të Bashkuara të Amerikës në Kosovë, Greg Delaëie. Ai ka prezantuar punën e tij disa herë në MICA, Ambasadën e Shqipërisë në DC, dhe në Universitetin George Ëashington, gjatë ngjarjes së Fulbright. Këtë Nëntor Ministria e Punëve të Jashtme të Republikës së Kosovës dhe Ministria e Kulturës së Shqipërisë, së bashku kanë ftuar atë të prezantojë punën e tij në Korçë, vendlindja e Naum Bredhit, autorit të librit të parë Shqiptar ABC, në vitin 1844.

Edoni, është i angazhuar si mësim-dhënës në studimet postdiplomike MFA in
Illustration Practice, dhe ‘Eksperienca e vitit të parë’, niveli bachelor, në Maryland Institute, Kolegji i Artit në Baltimore./ KultPlus.com

Sonte në GKK, hapet ekspozita e artistëve nga Maqedonia

Posted on by Kult Plus

Sonte më 27 nëntor me fillim nga ora 19:00, në Galerinë Kombëtare të Kosovës do të hapet ekspozita kolektive e artistëve nga Maqedonia “Esenca e ekzistencës”, shkruan KultPlus.

Ekspozita do të qëndroj e hapur në GKK, deri më 12 dhjetor ndërsa po ju sjellim një pjesë të shkurtër rreth asaj se çfarë përmban kjo ekspozitë”

“…është një koncept artistik i cili u drejtohet sferave të ndryshme të përditshmërisë, të jetës, ekzistencës, perceptimeve të cilat vijnë nga aspekte të ndryshme drejt esencës së qenies, të mbijetesës, të funksionimit. Këtu përfshihen gjeneza e dashurisë, shpirtërores, të ushqyerit… kurse nën këtë diskurs zbulohen edhe çështjet e dinjitetit, ideologjisë, politikës, jetës sociale. …Ky koncept me një kuptim të përgjithshëm do t’i përfshijë aspektet e tridhjetë artistëve bashkëkohorë të Maqedonisë të cilët reagojnë në mënyra të ndryshme ndaj parimeve ekzistencialiste, duke përdorur media të ndryshme të shprehje vizuale – nga ato klasiket: piktura, grafika, skulptura, duke kaluar te instalimet, objektet, fotografitë, e deri te video projektimet, printimet digjitale, performansat, audioinstalimet. Artistët e përzgjedhur, Ismet Ramiçeviq, Metodi Angellov, Atanas Botev, Vana Urosheviq, Irena Paskali, Aleksandar Stankoski, Velimir Zhernovski, Gjorge Jovanoviq, Marija Sotirovska, Igor Sekovski, Osman Demiri, Sllavica Janeshlieva, OPA, Mihaela Jovanovska, Zero, Nehat Beqiri, Zeni Ballazhi, Zhaneta Vangeli, Dita Starova Qerimi, në fjalorin e tyre krijues përdorin elemente të cilat i shkojnë për shtat diskursit kryesor të konceptit, ndërkohë që secili prej tyre i shqyrton gjërat esenciale të ekzistencës në mënyra të ndryshme dhe prej këndvështrimeve të ndryshme. Shpresojmë dhe besojmë se me këtë pamje tematike do të ofrojmë një mundësi këndvështrimi të artit bashkëkohor të Maqedonisë.” – Ana Frangovska, Goranço Gjorgjievski, Maja Çankullovska./ KultPlus.com

Halil Muhaxheri me ekspozitë retrospektive në GKK

Posted on by Kult Plus

Galeria Kombëtare e Kosovës, më 20 nëntor hapë ekspozitën e artistit Halil Muhaxheri, shkruan KultPlus.

Kjo ekspozitë retrospektive e Halil Muhaxherit vjen me titullin “Në shqetësime dhe heshtje”.

Ceremonia e hapjes do të bëhet në Galerinë Kombëtare të Kosovës në orën 19:00./ KultPlus.com

GKK shpallë emrat e 19 artistëve për ekspozitën ndërkombëtare “Gjon Mili”

Posted on by KultPlus

Galeria Kombëtare e Kosovës shpalli sot emrat e artistëve pjesëmarrës të edicionit të pesëmbëdhjetë të Ekspozitës Ndërkombëtare të Fotografisë, Çmimit “Gjon Mili”, shkruan KultPlus.

Ekspozita“Gjon Mili” do të hapet më 13 tetor dhe do të qëndrojë e hapur deri më 13 nëntor 2017.
Juria profesionale do të përzgjedhë fituesin, të cilit do t’i ndahet shuma prej 1000 Euro.

E organizuar nga Galeria Kombëtare e Kosovës ,“Gjon Mili” është ekspozita më e rëndësishme për fotografi bashkëkohore në Kosovë.

Kuratori ALFREDO CRAMEROTTI përzgjodhi 19 artistë vendor dhe ndërkombëtar të ekspozojnë veprat e tyre në kuadër të konceptit kuratorial “Hiperimazhi! Imazhet Brenda dhe jashtë ekraneve tona”:

§ Have it
§ Margo Wolwiec
§ Anne De Vries
§ Erica Scourti
§ Clare Strand
§ Jeff Guess
§ Eliza Hoxha
§ Alice Pedroletti
§ Christopher Meerdo
§ Oskar Schmidt
§ Brilant Pireva
§ Kushtrim Asllani
§ Jordan Tate
§ Dardan Zhegrova
§ Sadi Suhodolli (TADI)
§ Thomson&Craighead
§ Eva&Franco Mattes
§ Thomas Galler
§ Claudia Sola

Të gjithë Artistët pjesëmarrës në Ekspozitën e çmimit Gjon Mili kanë interesim të përqëndruar në përdorimin e teknologjisë së re ose reimazhimin e përdorimit të të vjetrës, në mënyrë që të arrihet qasja interdisciplinare dhe sociale ndaj fotografisë dhe krijimin bashkëkohor të imazhit. Duke hulumtuar ndikimin e fjalorëve vizual teknologjik, kulturor, shkencor dhe politik në shoqëri dhe mënyrën se si këto “sisteme estetike” luajnë një rol në formimin e perceptimit tonë të botës, përzgjedhja tenton që të testojë kufinjtë e fotografisë që e kemi njohur, duke krijuar një manifest të sjelljes sonë të një lloj “hiperimazhi” përmes imazheve. / KultPlus.com

GKK organizon punëtori të hapur për të rinj

Posted on by KultPlus

Galeria Kombëtare e Kosovës, në kuadër të programit të edukimit ka organizuar punëtori për të rinj. Andaj, të gjithë të rinjtë e moshës 13-15 vjeç mund të bëhen pjesë e kësaj punëtorie, përcjellë KultPlus.

Përmes kësaj punëtorie të rinjtë do të njoftohen me teknika të reja dhe krejt të lira të artit, duke u shprehur lirshëm në mënyrën e transmetimit direkt të emocioneve të tyre përmes artit vizuel. Të rinjtë do të mësojnë si ta njohin dhe ta interpretojnë artin vizuel, duke mos u kufizuar vetëm në artin tradicional, por edhe format bashkëkohore të shprehjes artistike dhe konceptuale.

Koncepti i workshopit me titull “Tregimi im me ngjyra” përkon me shprehjen mjaft individuale të secilit pjesëmarrës ku përmes materialeve të ofruara do të kenë mundësinë që në mënyre vizuele, figurative ose jo, të tregojnë përjetime apo parashikimet për ngjarjet dhe botën që i rrethon. Gjatë punës do të asistohen nga trajnerja Vlora Hajdini Hajrullahu.

Punëtoria do të mbahet më datë 28 gusht, duke filluar nga ora 11:00 në Galerinë Kombëtare të Kosovës. Të gjitha shpenzimet do të mbulohen nga GKK. / KultPlus.com