Ministria për Kulturë, Rini dhe Sporte është në vlug të organizimit të edicionit të dytë të programit shtetëror “Drejt Malit”, ku këtë vit do të marrin pjesë 800, nxënës. KultPlus ju sjell të plotë njoftimin e MKRS për këtë aktivitet.
A të pëlqen vullnetarizmi dhe përvojat e reja?
Atëherë bëhu pjesë e edicionit të dytë të programit shtetëror “Drejt Malit”.
Federata e Sportit Shkollor të Republikës së Kosovës është në kërkim të 40 vullnetarëve entuziastë të cilët do të asistojnë mbarëvajtjen e procesit në aktivitetet e skijimit ku do të marrin pjesë rreth 800 nxënës.
Konkursi do të jetë i hapur deri më 24 shkurt. Aplikuesit duhet të dërgojnë CV-në e tyre në emailin: [email protected]/ KultPlus.com
RTK-ja gjatë këtij viti do të themelojë orkestrën e saj dhe poashtu do të organizojë edicionin e parë të Festivalit të Këngës. Këto aktivitete janë pjesë e një memorandumi më të gjerë bashkëpunimi me Ministrinë e Kulturës që u nënshkrua nga të dyja institucionet.
Nënshkrimi i këtij memorandumi u bë pas disa muajsh bisedimesh, i filluar nga qershori i vitit 2022, ndërmjet MKRS-së dhe drejtuesve të RTK-së, duke marr për bazë edhe modelet e transmetuesve të tjerë publik. Ky bashkëpunim i mundëson RTK-së që të zgjerojë mbulimin e aktiviteteve kulturore anekënd Kosovës dhe për realizimin në praktikë të synimeve të Bordit dhe Menaxhmentit për shndërrimin e RTK4, në RTK Art. Me këtë memorandum, RTK do të rris kapacitetet e saj të produksionit dhe do të jetë edhe më afër artdashësve.
Memorandumi i Bashkëpunimit është nënshkruar për një periudhë 5 vjeçare.
Ministri i kulturës Hajrullah Çeku, në një postim në rrjetin social Facebook , shkroi:
“Ministria e Kulturës dhe Radio Televizioni i Kosovës nga sot nisin një bashkëpunim afatgjatë për të mirën e kulturës në vendin tonë. Ndër zotimet kryesore të marrëveshjes pesë vjeçare që nënshkruam sot është themelimi i kanalit të RTK-së kushtuar eksklusivisht kulturës, organizimi i festivalit të këngës, fuqizimi i kapacitetit orkestral të RTK-së, mbulimi i programit të institucioneve të kulturës dhe përcjellja e ngjarjeve të kalendarit vjetor kulturor”. /KultPlus.com
Zëvendësministrja e Sportit, Daulina Osmani, priti sot në takim udhëheqësit e 6 federatave sportive.
Pas rekomandimit pozitiv të Komisionit për licencim në kuadër të Ministrisë së Sportit, i janë dorëzuar zyrtarisht licencat për ushtrimin e veprimtarisë Federatës Skitare, Federatës së Tenisit, Federatës së Boksit, Federatës së Shenjëtarisë, Federatës së Autosportit dhe Federatës Muaythai./ KultPlus.com
Rritja e pagave për punonjësit e shtetit pasqyron vlerësim për punën dhe kontributin e tyre ndaj komuniteteve të cilave u shërbejnë, përcjellë KultPlus.
Një skemë e tillë vlerëson edhe vështirësitë e përfshira në përmbushjen e detyrave të krijuesve dhe performuesve të kulturës, artit dhe trashëgimisë kulturore, të cilët do të marrin pagat e tyre me rritje.
Ministria e Kulturës, Rinisë dhe Sportit, sot ka publikuar dy skema ku paraqet me qartësi të plotë rritjen e pagave për institucionet e artit dhe kulturës duke u shprehur se përmes këtij ndryshimi po rindërtojnë sistemin duke vlerësuar kontributin e gjithsecilit.
Në këtë skemë vërehet rritje në 126% për drejtorët e institucioneve të kulturës, çka nënkupton barazim më drejtorët e institucioneve të tjera, ashtu siç edhe ishte premtuar. / KultPlus.com
Së fundmi filmi “Prishtina 2002” është prezantuar në festivalin prestigjioz Clermont-Ferrand në Francë, shkruan KultPlus.
Përmes një postimi në “Facebook”, MKRS bën të ditur se ky është një tjetër suskes i rëndësishëm i radhës për kinematografinë dhe filmin e shkurtër të Kosovës.
Postimi i plotë:
“Filmi “Prishtinë 2002” prezantohet në Clermont-Ferrand në Francë
Filmi i metrazhit të shkurtër “Prishtinë 2002” me regjisore Trëndelinë Halili dhe producent Ermal Gërdovci, shfaqi premierën në festivalin e filmit të shkurtër Clermont-Ferrand në Francë, njërin prej festivaleve më të mëdha ndërkombëtare të filmit të shkurtër në botë i kategorisë A, dhe i dyti në Francë pas festivalit të Kanës sa i përket audiencës.
Një sukses i rëndësishëm i radhës për kinematografinë dhe filmin tonë të shkurtë. Njëkohësisht edhe dëshmi për nivelin dhe kulturën e arritur nga kineastët tanë në tregimin e copëzave të jetës përmes mediumit të kinemasë.
“Prishtinë 2002” u shfaq në ekranet franceze në kuadër të edicionit të 45-të të festivalit, i cili ka nisur më 27 janar dhe do të vazhdojë deri më 4 shkurt 2023.
Realizimi i filmit është mbështetur nga Qendra Kinematografike e Kosovës dhe Komuna e Prishtinës, dhe prodhuar nga shtëpia e filmit Kandërr”, thuhet në postimin e MKRS-së. /KultPlus.com
Fotografitë ndihmojnë në formimin e të kuptuarit tonë për kulturën, historinë dhe identitetin. Si një mjet dokumentimi i saktë dhe objektiv, fotografia është përdorur edhe nga Alban Bujari, në arkivin e të cilit ndodhen imazhe të panumërta që i përkasin periudhës së luftës në Kosovë (1997-1999).
Për të “fotografitë e luftës” nënkuptojnë më shumë sesa thjesht imazhe. Përmes tyre tregohet dhimbja e madhe e luftës.
Të renditura në ekspozitën “Erë gjaku”, 28 fotografitë rikujtojnë janarin e vitit 1999 dhe përkujtojnë 21 persona të vrarë nga forcat serbe, përfshirë luftëtarë të Ushtrisë Çlirimtare të Kosovës dhe civilë të fshatit.
Ekspozita do të qëndrojë e hapur për dy javë në Lapidariumin e Muzeut Kombëtar të Kosovës.
MKRS do të vazhdojë përkrahjen e projekteve të tilla në mënyrë që e vërteta e Kosovës të tregohet me zë edhe më të fuqishëm. / KultPlus.com
Mbështetjen për nxitjen e krijimtarisë artistike MKRS po e kalon në një nivel tjetër.
Për zhvillimin e një politike të re të orientuar në promovimin e leximit, janë ndarë 1 milion euro. Botimi dhe blerja e librave e revistave letrare këtë vit është mbështetur me gjysmë milion euro, teksa gjysma tjetër do të shkojë për bibliotekat e Kosovës dhe autorin e pavarur për zhvillim dhe botim të librit.
Krahasuar me vitin 2022 kur buxheti total i këtyre thirrjeve ishte 160 mijë euro, buxheti i këtij viti është gjashtë herë më i lartë.
Konkursi i parë për përkrahje financiare për librat dhe revistat tashmë është i hapur për aplikim: https://bit.ly/3HGWAy8
Përmes tij synohet kultivimi i vlerave artistike e kulturore. E për të krijuar përvoja të reja leximi, gjatë vitit do të hapen edhe thirrjet për fondin e bibliotekës, mbështetjen e autorit dhe aktivitetet tjera letrare. / KultPlus.com
Për fëmijët dhe të rinjtë me sindromën Down, sot ishte një ditë më ndryshe. Ata u njohën me historitë e monumenteve të trashëgimisë kulturore dhe veprat e shumë llojeve e zhanreve brenda muzeve.
Në kuadër të projektit “Trashëgimia Kulturore për integrim Social të personave me Sindromën Down” të mbështetur nga Ministria e Kulturës, ata vizituan Muzeun e Kristaleve të Kosovës ”Trepça”, Muzeun Etnologjik të Mitrovicës, Hamamin e qytetit të Mitrovicës dhe Kishën e Shën Pjetrit. / KultPlus.com
Ministria e Rinisë po vazhdon mbështetjen e organizatave joqeveritare që për mision kanë ngritjen e kapaciteteve të të rinjve në fusha të caktuara.
OJQ “BSC Kosovo” po zbaton projektin “Ndërmarrësi, Inovacione dhe Digjital Marketing” përmes të cilit pjesëmarrësit po mësojnë më shumë rreth përpilimit dhe zhvillimit të një plani biznesi, në fokus të veçantë planin e marketingut për ndërmarrjet e reja. / KultPlus.com
Gjetjet e para të studimit të fizibilitetit drejt Menaxhimit të Integruar të Qendrës Historike të Prishtinës, janë duke u diskutuar nga përfaqësues të MKRS-së dhe MMPHI, Kuvendit të Kosovës, Komunës së Prishtinës dhe OJQ-ve.
Anëtarët e grupit punues po shqyrtojnë analizën mbi gjendjen aktuale të Qendrës nga perspektiva e strukturës urbane, kornizës ligjore dhe kufijve të qendrës historike.
Projekti “Studimi i fizibilitetit dhe plani i menaxhimit për qendrën historike të Prishtinës” synon të integrojë trashëgiminë kulturore në një zhvillim të qëndrueshëm, të gjelbër dhe gjithëpërfshirës për të ardhmen e kryeqytetit.
Ai financohet nga MKRS dhe mbështetet nga UN-Habitat Kosovë, përmes Programit të Zhvillimit Gjithëpërfshirës të financuar nga Qeveria e Suedisë. / KultPlus.com
Artistët si: Afrim Hajrullahu, Afrim Spahiu, Agim Balaj, Agron Blakçori, Agron Mulliqi, Alban Muja, Alban Nuhiu, Albe Hamiti, Albulen Neziri, Altin Krasniqi, Anmansa Petroviç, Arbana Hajredinaj, Arben Llapashtica, Arbnor Karaliti, Argenita Fetahu, Armend Nimani, Artan Hajrullahu, Arton Behrami, Avni Demiri, Astrit Ismaili, Avni Rudaku, Bedri Haziraj, Biljana Veselinova Komoni, Blerta Hashani, Brilant Milazimi, Burim Myftiu, Dardan Zhegrova, Dion Zeqiri, Daors Hoxha, Doruntina Kastrati, Driton Hajredini, Enesa Xheladini, Enver Hoxhaj, Erblina Karaliti, Esat Valla, Eshref Qahili, Fatmir Jusufi, Fatmir Mustafa, Faton Mazreku, Fidan Bejtullahu, Fikrete Misini, Gëzim Brestovci, Haki Xhakli, Hazir Reka, Hekuran Sokoli, Haveit, Redon Kikaj, Hysni Krasniqi, Ilir Balaj, Jakup Ferri, Jehon Gallapeni, Jeton Gusia, Jetullah Sylejmani, Kaltrina Hoda, Liridona Gjuka Bogu, Lorik Sylejmani, Luan Bajraktari, Lulzim Zeqiri, Mal Myrtaj, Mehmet Behluli, Mehmed Vokshi, Mimoza Sahiti, Nevruz Musa, Nexhmi Bardhi, Nimon Lokaj, Remzi Limani, Renea Begolli, Rexhep Ferri, Rrezartë Bajrami, Roland Masurica, Rron Qena, Sali Musliu, Shkamb Jaka, Shyqri Nimani, Urtina Hoxha, Valdrin Thaqi, Violeta Xhaferi, Yll Xhaferi, Zana Begolli dhe Zeni Ballazhi, kanë qenë personazhet kryesorë të koleksionit të veprave të artit të blera për 300 mijë euro nga Ministria e Kulturës, Rinisë dhe Sportit me anë të thirrjes publike të vitit 2022, shkruan KultPlus.
Afro 80 vepra kanë mbizotëruar në dy katet e Galerisë Kombëtare të Kosovës. Me tematika, teknika e gjendje të ndryshme, pikturat kanë shpërfaqur një horizont të gjerë e të llojllojshëm të artistëve, veprat e të cilëve kanë ardhur në mënyrë të veçantë. Muri i bardhë poshtë, e ai i zi në katin e dytë, ka qenë element kyç që ka treguar qartazi se artistët kosovarë janë në gjendje të jenë unik në stilin dhe paraqitjen e tyre. Të pranishmit, qenë ata që mbushën gjithsej galerinë, duke filluar nga ora 19:00. Nuk pati hapje zyrtare e as katalogë për të pranishmit, por kjo nuk i ndali ata që të shijojnë secilin cep që ishte mbushur me ngjyrë.
Me tone të ngrohta, shpesh edhe të zbehta, kanë qenë ngjyrat që kanë dominuar dukshëm në secilën vepër. Me përmasa të ndryshme, pikturat kanë portretizuar shpesh atë që është shfaqur në titull. “Dita e Shën Valentinit”, “Intrusive Rocks”, “Dritarja e Gjergjit”, “Loja”, “Oksimoron”, “Futbolli”, “Karllo O Hajn”, “Artisti”, “Heshtja”, “Cirku”, “Në shesh”, “Etja”, “Skenderbeu”, “HUMAN”, janë titujt që shpërfaqën gjithë atë se çka ishte ngjyrosur në pikturë, nëpërmjet mendjes artistike të tyre.
Ndërkohë nëntë veprat si: “Pa titull”, “Hapësira në kohë”, “The big ship”, “Kalldërëmi i Prizrenit”, “Kthimi”, “Melodia e ngjyrosur”, “Definition”, “Kallinjët” dhe “Pishat e Deçanit”, kanë përçuar një atmosferë krejtësisht mallëngjyese. Një qetësi absolute kaplonte shpirtin njerëzor kur fokusi vinte mbi këto piktura. Preciziteti, emocioni dhe situatat e ndryshme të “rrëzuara” në këto nëntë piktura ishin ato që ranë në sy më së shumti, e që njëkohësisht kaplonin mendjen. Po ashtu, pikërisht në këto copa arti, këmbët e të pranishmëve ndaleshin pakëz më shumë se sa koha e zakonshme, prej tridhjetepesë sekondash.
Tutje në vazhdim, përpos instalacioneve, video-instalacioneve, skulpturave dhe fotografive me motive që shpalosnin një dhimbje të thellë dhe përjetime të rralla, ishte edhe piktura e artistit Alban Muja ajo që tregonte mesazhin se gratë vazhdojnë ende të luftojnë për të drejtën e tyre në pronë, brenda dhe jashtë mureve të shtëpisë. Emërtimi ‘Brotherhood’ çoi direkt tek pranimi se djemve u premtohet shtëpia e paraardhësve të tyre.
Komunikimi i veprave me audiencë qe e lirshme, e kuptueshme por ndonjëherë edhe konfuze. Ndonëse, ekspozimi i veprave nuk ishte bërë në formën më të mirë të mundshme, hapësira në të dy katet me gjithë grumbullin që posedonte, shfaqi një anë të dukshme të këtyre artistëve që me punën e tyre po dëshmojnë vazhdimisht se pasioni, dashuria dhe përkushtimi ndaj artit pamor, për ta është primare.
Artisti Fidan Bejtuallahu për KultPlus ka potencuar konceptin e veprës “Melodia e ngjyrosur”.
“Duke jetuar në kryefjalë të melodisë vdes një e keqe dhe një e mirë në detin e kaosit. Mbretëresha (melodia e ngjyrosur) bërtet – më lëshoni këtu – në një natë filmi e ndjekur apo imagjinon një melodi e cila i kujton një ngjarje, ose me herët kishte pas një harresë sepse kishte shpresuar veten në një barkë të peshkimit e rrethuar me melodi qetësuese. Vonë kjo e gjitha, nё tetorin e peshkimit, për të mos u kthyer më kurrë dhe për ta ndaluar një kimikal prej fishekzjarri në qiellin e mbrëmjes, jep një tingull melodie të ngjyrosur, por në ditën tjetër kthehet në jë mjegull të dendur – një melodi e dashuruar pas perëndimit; shkon në oborrin e kompozimeve – mё shumë se njësoj dhe ushqehet në datëlindjen e saj qё vjen poshtë reve të shoqeve të saj, të cilat vijnë pasi kanë pushuar në paqe, por në një të hëne të vetmuar mëngjesi ato vijnë të ngjurosin një tingull që nuk jep melodi”, ka thënë ai.
Kujtojmë se koleksioni i veprave të artit i blerë nga MKRS në vitin 2022, do të jetë i hapur për publikun deri më 15 Janar 2023. / KultPlus.com
Nesër duke filluar nga ora 19:00, Galeria Kombëtare e Kosovës do të prezantojë koleksionin e veprave të artit të blera nga Ministria e Kulturës, Rinisë dhe Sportit me anë të thirrjes publike të vitit 2022, përcjell KultPlus.
Koleksioni do të jetë i hapur për publikun deri me 15 Janar 2023.
Ministria për Kulturë, Rini dhe Sport, përmes një ekspozite do ta bëjë prezantimin e koleksionit të veprave të artit të blera me anë të thirrjes publike të vitit 2022.
Hapja e ekspozitës do të bëhet më 20 dhjetor, duke filluar nga ora 19:00 në Galerinë Kombëtare të Kosovës.
Koleksioni do të jetë i hapur për publikun deri më 15 janar të vitit 2023, njofton Klan Kosova.
Janë gjithsej veprat e 82 artistëve që janë përzgjedhur nga komisioni i MKRS-së për pasurimin e fondit publik të artit në Kosovë.
Më poshtë i gjeni emrat e artistëve, veprat e të cilëve do të ekspozohen në GKK:
Në mbledhjen e 113-të të Qeverisë së Kosovës është miratuar Projektligji për Kinematografinë dhe Koncept-dokumenti për Rininë.
Projektligji për Kinematografinë rregullon veprimtarin, organizimin, financimin, prodhimtarinë, distribuimin dhe shfaqjen e veprave filmike. Synim ka inkurajimin e krijimtarisë, promovimin, mbrojtjen, ruajtjen dhe studimin e trashëgimisë kinematografike. Projektligji në fjalë e shpall veprimtarinë kinematografike në Republikën e Kosovës si fushë të interesit të veçantë publik.
Ndërsa koncept-dokumenti për Rininë rekomandon avancimin dhe fuqizimin e rinisë në Kosovë.
Ministri Çeku, pas mbledhjes së Qeverisë në një konferencë për media, ka thënë se të dy vendimet e miratuara janë shumë të rëndësishme për kulturën dhe për rininë. Projektligji për Kinematografinë, sipas tij, parasheh tërheqjen e investimeve të huaj në film, e Koncept-dokumenti për Rininë i hapë rrugën një reforme të plotë për rininë dhe zhvillimin e saj./ KultPlus.com
Është pasuruar lista e trashëgimisë kulturore në mbrojtje të përkohshme nga shteti, shkruan KultPlus.
Lajmi është bërë i ditur nga Ministria e Kulturës, Rinisë dhe Sportit, përmes një postimi në Facebook.
Në vijim gjeni postimin e plotë:
Në bazë të Ligjit Nr.02/L-088 për Trashëgimi Kulturore, në pajtueshmëri me Nenet 3 dhe 4, listës së trashëgimisë nën mbrojtje të përkohshme iu shtuan edhe 19 asete të reja.
Asetet të cilat janë marrë nën mbrojtje të përkohshme i takojnë trashëgimisë arkitekturore dhe asaj shpirtërore dhe janë këto:
• Kroi i fshatit në Istog
• Ndërtesa e ish Pallatit te Shtypit “Rilindja”- Salla e shtypshkronjës, Prishtinë
• Materniteti “Nënë Tereza”, Prishtinë
• Shtëpi Banimi – (Shtëpia e zjarrit) Hysë Popova, Podujevë
• Kulla e Hamit Berishes, Harilaq, Fushë Kosovë
• Shtëpia-Kullë e lsmet Xhemailit, Keçekollë, Prishtinë
• Xhamia e Vjetër, Orllan, Podujevë
• Shtëpia e Kulturës “Xhemajli Berisha”, Prizren
• Hani i familjes Zaimi, Prizren
• Bodrumi i Vjetër, Suharekë
• Kompleksi i Familjes Kodra, Çadrak, Suharekë
• Ndërtesa e Selisë sëPartive Politike, Mitrovicë
• Ndërtesa e Turist Kosovës, Mitrovicë
• Kulla e Shaban Lushtakut, Mitrovicë
• Xhamia në fshatin Abri, Skenderaj
• Xhamia ne fshatin Burojë, Skenderaj
• Mbathtorja e Agës Xhelë, Pogragjë, Gjilan
• Shkolla e vjetër në Kokaj, Gjilan
• Shtëpia e ldriz Feratit, Çelik, Gjilan
Gjithmonë në harmoni me Konventat ndërkombëtare, qëllimi i mbrojtjes së ndërtesës është definimi profesional i vlerave dhe rëndësisë që ka, si dhe transmetimi i tyre tek brezat e ardhshëm./KultPlus.com
Ministri i Kulturës, Hajrulla Çeku priti në takim Yuliia Hnat, Alex Fisher, Kateryna Iakovlenko dhe Kateryna Botanova, përfaqësues nga fusha e kulturës dhe artit nga Ukraina.
Bashkë diskutuan për zhvillimet aktuale në vendin tonë sa i përket kulturës, ngritjen artistike pas luftës dhe si mund të ndihmojë përvoja e Kosovës Ukrainën. Gjithashtu ndër të tjera u fol për ndikimin dhe organizimin e bienales Manifesta në Prishtinë, bienale kjo që pritet të mbahet në Ukrainë në vitin 2028 dhe për ruajtjen e trashëgimisë kulturore.
Ministri Çeku shprehu keqardhje për situatën e rëndë në Ukrainë, po ashtu mbështetjen dhe solidaritetin e vendit tonë me këtë shtet.
Delegacioni nga Ukraina po qëndronin në Kosovë në kuadër të Konferencës së Asociacionit Ndërkombëtar të Bienaleve që u mbajt në Prishtinë si pjesë e Manifesta 14./KultPlus.com
Me këtë ligj rregullohet veprimtaria, organizimi, financimi, prodhimtaria, distribuimi dhe shfaqja e veprave filmike në vend dhe jashtë vendit, inkurajimi i krijimtarisë, promovimi, mbrojtja, ruajtja dhe studimi i trashëgimisë kinematografike, zhvillimi, mbështetja, edukimi përmes filmit, promovimi dhe ruajtja e krijimtarisë kinematografike, përmes krijimit të kushteve për prodhimin e veprave filmike vendore dhe bashkëprodhimeve ndërkombëtare. / KultPlus.com
Ministria e Kulturës, Rinisë dhe Sportit rendit për vitin 2022 ndër prioritetet programore ngritjen e kapaciteteve profesionale dhe zhvillimin e kuadrove në fushat të kulturës, trashëgimisë kulturore dhe sportit.
Theks të veçantë ka edukimi artistik i të rinjve, mbështetja e hulumtimeve, kërkimeve dhe prezentimeve në fushën e trashëgimisë kulturore dhe edukimi profesional në fushën e menaxhimit dhe mjekësisë sportive.
Të drejtë aplikimi në thirrjen publike për mbështetje financiare studimore kanë individët që dëshmojnë se programi studimor është i profilizuar në fushat specifike të kulturës, trashëgimisë kulturore dhe sportit.
Për aplikim dhe detajet tjera rreth thirrjes gjeni bashkëngjitur linkun:
Ministria e Kulturës ka bërë të ditur se “Mitrovica Guitar Days” po sjell në qytetin e Mitrovicës artistë, kitaristë të jashtëzakonshëm ndërkombëtar dhe vendorë, koncerte dhe master klasa nga kitaristë të jashtëzakonshëm, shkruan KultPlus.
MKRS thotë se festivali u hap me performancën e mrekullueshme të kitaristit me renome botërore, Aniello Desiderio i cili për publikun nga Kosova ofroi një program të pasur artistik.
Të pranishëm në mbrëmjen e parë ishin, Ministri i Kulturës, Hajrulla Çeku, drejtoresha për kulturë në Komunën e Mitrovicës, Valdete Idrizi, zëvendësambasadori i Shteteve të Bashkuara në Kosovë, Alison Grunder, drejtori i festivalit, Erhan Mujka, studentë, artistë dhe shumë artdashës.
“Festivali që mbështetet nga Ministria e Kulturës do të qëndrojë i hapur deri me 12 tetor dhe në kuadër të tij do të organizohen masterclasses nga kitaristë me renome botërore, si dhe do të ketë punëtori, prezantime dhe koncerte të tjera”, thuhet në njoftimin e tyre. /KultPlus.com
