Muaj: Korrik 2017

Cara Delevingne, përveç modelimit dhe aktrimit, ka vendosur të merret edhe me muzikë, shkruan KultPlus.

24 vjeçarja britanike, Delevingne dje ka lansuar në YouTube, këngën saj të parë të titulluar ‘I Feel Everything’.

‘I Feel Everything’ është punuar nga këngëtari dhe producenti i njohur amerikan, Pharrell Williams dhe Luc Besson, regjisori i filmit ‘Valerian and the City of a Thousand Planets’, ku luan edhe Cara Delevingne, shkruan ‘Cosmopolitan’, përcjellë KultPlus.

Këngën e parë, Cara Delevingne e solli edhe me videoklip, dhe kjo është paraqitja e saj e parë si solo këngëtare.

Në videoklipin e ri, modelja, aktorja tashmë edhe këngëtarja, shfaqet mjaft e veçantë me stile të ndryshme të flokëve në të cilat nuk është parë më herët.

Për më shumë shikoni videoklipin e këngës ‘I Feel Everything’ nga Cara Delevingne. /KultPlus.com

Këngëtari Agim Llapashtica i njohur si Gima ka lansuar këngën e re të quajtur ‘Vjollcat’, shkruan KultPlus.

Teksti dhe komponimi origjinal i këngës është realizuar nga Violeta Rexhepagiqi, ndërsa vjen e përpunuar nga Gima.

Incizimi dhe mixi i këngës është realizuar nga Pëllumb Ballata në ‘Homebasesound’, kitarat elektrike dhe akustike Leonard Canhasi, bas kitarë Emir Plava dhe bateri Teoman Ukqa, ndërsa në back vocals qëndron Emir Plava.

Regjia është realizuar nga Ylber Yascha Mehmedaliu. / KultPlus.com

Nisur si një festë e vogël në plazhin e mrekullueshëm të Drymades, tashmë në edicionin e tij të gjashtë, Turtle Fest ka arritur që të kthehet në një ndër festivalet më të rëndësishëm të rajonit për shkak se përmbledh muzikën e mirë, efekte vizuale të mrekullueshme dhe rivierën unike shqiptare, përcjellë KultPlus.

Tashmë, në prag të tre netëve të gjata dhe ditëve të freskëta, festivali publikoi dhe tre emrat të cilët do udhëheqin tre mbrëmjet e tij, duke formuar kështu dhe natyrën e secilës natë.

General Levy (UK) do jetw nw Turtle Fest 2017

General Levy, legjenda londineze e muzikës, i cili prej 20 vitesh është Headliner në eventet më të rëndësishme europiane tw muzikës Reggae, Jungle, Drum and Bass, vjen për të parën herë për të performuar Live në skenën kryesore të Turtle Fest. I njohur ndryshe si Mr. Incredible, ai ka qenë influencë e shumë Mc-ve dhe zhanreve të ndryshme urbane që janë zhvilluar për pasojë.
General Levy do çelë natën e parë të Turtle Fest, në të cilën do mbizotërojë muzika reggae, hip-hop, jungle dhe drum’n’bass, në një eksperiencë e cila do ju bëjë të kërceni gjithë natën.

Prej më shumë se 20 vitesh në skenë, General Levy është absolutisht veterani më i madh i skenës urbane të muzikës në Mbretërinë e Bashkuar. Ai u rrit nën influencat e muzikës reggae dhe kulturës afro-amerikane. Falë vëllait të tij të madh, i cili është një fans shumë i madh i muzikës, General Levy krijoi një variabël të kulturës muzikore e cila varion nga ska në rock steady, nga calypso në muzikën soul, nga hip-hop në reggae.

Shumë shpejt nisi të shkruajë tekstet e këngëve të tij, ndaj suksesi nuk vonoi, pasi vetëm në moshën 19 vjeçare General Levy fitoi vëmendje botërore, duke fituar dhe shumë çmime si albumi më i mirë reggae, për publikimin e tij të parë të quajtur “Third Dimension”, kënga më e mirë e vitit për “Heat” dhe vlerësimin si MC më i mirë në UK.

Mandej, kënga e tij “Incredible”, një sukses botëror, nuk arriti thjesht majat e klasifikimeve botërore, por u përdor dhe në filma si “Ali G” dhe “Seuls Two”.

Në skenat e mëdha festive, General Levy ka ndezur publikun e Garance Reggae Festival apo Summer Jam dhe gjithashtu të Reggae Sun Ska apo Realbeat Reggae Festival. Të gjitha këto evente janë pushtuar nga ky talent dhe performues i jashtëzakonshëm.

Bashkëpunimet e tij me studio e mëdha të prodhimit janë gjithashtu mbresëlënëse, duke nisur nga Capleton, Sly & Robbie, Danakil dhe Desmond Dekker.

Albumi i ri i General Levy sjell një gamë bashkëpunimesh me artistë të ndryshëm, për të sjellë si rezultat një publikim eklektik dhe të suksesshëm në rrymën funk, hip hop, jungle dhe reggae. “We progressive” mban vlera edhe sepse shënon bashkëpunime me artistë si Balik (Danakil), Big Red (Raggasonic) dhe Papa Style & Baldas. / KultPlus.com

Asnjë muzikant tjetër nuk i bashkon njerëzit e të gjitha moshave, si dhe të marrë vlerësimet maksimalisht në një spektër të gjerë stilesh muzikore, por David Garret mundet ta bëjë.

Në koncertet e tij, publiku hipnotizohet nga talenti dhe pasioni që ai përçon në interpretim dhe mënyrën në të cilën ai zbulon gamën e plotë të asaj që është e arrihet në luajtjen e violinës.
Përgjatë turneut të tij vjetor ai realizon rreth 160 koncerte në të gjithë botën.

Numrin më të madh të publikut Garret i ka në vendlindjen e tij në Gjermani, ku pjesëmarrja në një nga koncertet e tij shkon rreth 65,000 persona në stadiume, ose open air koncert e çmimet variojnë nga 300 euro deri në 85 euro për person dhe bileta janë “Sold out”- të shitura, në dy muajt e parë të vitit.

Koncertet e tij më të sukseshme transmetohen në Tv ZDF ekskluzivisht. Më pas renditet Amerika, vendlindja e nënës së tij, ku publiku shkon rreth 45,000 persona në një koncert dhe ku çmimet variojnë nga 230 USD deri ne 70 USD.

Në repertori i tij në koncerte ai përfshin muzikë klasike të ripërpunuar, si dhe pjesë të njohura të muzikës rock, blues të përshtatura për violinë.

Garrett ka sjellë një formë tërësisht të re shoë muzikor midis klasikes dhe modernes që ka tërhequr jashtmase audiencë në koncertet e ndryshme që ai realizon, shkruan Top-channel.

Shumë fansa të tij, si dhe publiku ka vlerësuar përshtatjen dhe risjelljen në violinë të disa prej hiteve më të njohura botërore nga Nirvana, Metallica, Guns ‘N Rosses, Pink Floyd, si dhe tribute e disa prej hiteve të Michael Jackson të realizuar enkas.

David Garret mësimet e para në violinë i mori në moshën 4-vjeçare dhe u regjistrua në konservatorin e Lubeck në moshën 7-vjeçare. Garrett iu dha falë bujarisë së presidentit gjerman në atë kohë Richard Von Weizsacker në moshën 11-vjeçare violina Stradivarius në përdorim.

Garret njihet si një ndër violinistët më të mirë botërorë dhe mban rekordin Guinness si violinisti që luan më shpejt.

Të ardhurat e tij vjetore, përveç koncerteve janë dhe nga imazhi i tij, ku realizon sete fotografike dhe spote komerciale të disa prej kompanive më të njohura botërore./KultPlus.com

Irma Libohova, Silva Gunbardhi dhe Eranda Libohova kanë postuar sot një video në rrjetin social Facebook ku i këndojnë Beratit.

Të tri këngëtaret janë nisur për në Berat, për të qenë pjesëmarrëse në Maratonën Verore. Ato i këndojnë Beratit, qytetit që shpesh cilësohet si një ndër më të bukurit në Evropë.

Këngëtaret janë mike prej vitesh dhe videoja tregon se sa të koordinuara janë edhe me vokalet e tyre.

Edicioni i këtij viti shënon dhe këtë bashkëpunim të shumëpritur në mes Turtle Fest dhe Hapësirës. Dy forca të mëdha të skenës së muzikës në Shqipëri dhe Kosovë janë bashkuar për t’ju sjellë një mbrëmje plot tundime dhe emocion, përcjellë KultPlus.

Turtle Fest është një festival i muzikës i cili sjell një lineup të emrave më të të mirë të rajonit dhe botës.

Eventi, i cili shënon edicionin e tij të gjashtë, është rritur në formë dhe cilësi, ndaj kur u publikuan të dhënat e para të emrave të cilët do kryesonin secilën mbrëmje, të gjithë mbajtëm frymën për të mësuar se cili do të mbyllë siparin e kësaj eksperience të papërsëritshme. Dhe ja tek erdhi.

Turtle Fest në bashkëpunim me Hapësira arritën të sjellin një emër i cili jo vetëm ka shënuar histori si një ndër Dj më të mirë techno, por është dhe pjesë e shtëpisë më të madhe të kësaj rryme, “Afterlife”, bëhet fjalë për Locked Groove.

Energjia e skenës së muzikës techno dhe house ka qenë terreni më i natyrshëm dhe frymëzues për Locked Groove, artistin e lindur në Belgjikë dhe të vendosur në Berlin.

Prodhimet e tij, njësoj si setet e Dj-të kanë të përbashkët shkëlqimin e himneve klasike të Chicagos dhe elementët e errët të ritmeve industriale. Ky kompleksitet dhe vizion i guximshëm e dallon atë masivisht nga çdo artist tjetër, pasi karakteristika e tij dalluese që në gjenezë ka qenë aftësia për të mos bërë kompromise dhe për të mos u ndikuar nga asnjë influencë.

Ndaj, nuk përbën çudi që vetë Scuba u tërhoq nga tingulli i Locked Groove në vitin 2012. Debutimi i tij dhe ritmet që vijuan ishin të gjitha të vlerësuara në po të njëjtën mënyrë.
Deri më tani, Locked Groove ka nxjerrë publikime të suksesshme në bashkëpunim me shtëpi si Life and Death,Permanent Vacation apo Afterlife, shtëpia aktuale e cila prodhon dhe mbështet këtë talent absolut të muzikës.

Vit pas viti, Turtle Fest zhvillon dhe perfeksionon këtë prodhim që rritet pas çdo edicioni. Nga skena madhështore, vizualet, efektet e ndriçimit dhe piroteknikat janë bërë tashmë një pjesë integrale e eksperiencës që ky festival ofron. Në edicionin e 6-të, organizatoret kanë premtuar se do sjellin eventin më të mirë deri më tani, duke e bërë pritjen për muajin gusht ende më të paduruar. / KultPlus.com

Festivali i Muzikës ‘Turtle Fest’, i cili më 4 gusht nisë rrugëtimin e gjashtë të tij, tashmë ka publikuar emrat që do të jenë pjesë e këtij eventi, i njohur si më i madhi i muzikës elektronike.

‘Turtle Fest’, njoftoi sot se pjesë e këtij festivali do të jetë edhe Riva Starr, duke shënuar kështu bashkëpunimin e këtij festivali me një nga platformat më të mëdha muzikore: Electronic Beats.

Një festë e bukur kampi, si e tillë fillon historia 6 vjeçare e ‘Turtle Fest’, i cili në tri ditë dhe tri net mbledh Dj-të më të rëndësishëm të skenës Alternative Evropiane & Shqiptare dhe numëroi edicionin e kaluar pjesëmarrjen e mbi 4500 adhuruesve të muzikës.

Riva Starr, i njohur ndryshe si Stefano Miele ka shënuar tashmë emrin e tij në jetën e natës londineze.
Përveçse një ndër Dj-të më të vlerësuar, ai është producent dhe zotëron shtëpinë e tij të prodhimit “Snatch Records”, i cili ka krijuar një ndër larrierat më të larmishme deri më sot, duke ndryshuar stil dhe duke thyer vazhdmisht barrierat e zhanreve muzikore.

Nga Glastonbury, tek Fuji Rock Festival e deri në Tomorroëland, Riva Starr ka arritur të ndezë çdo skenë ku ka performuar. Tashmë, Snatch! zotëron hapësirën e saj në Creamfields [ndër festivalet më historike në Mbretërin e Bashkuar], teksa në karrierën si muzikant, Starr ka bashkëpunuar me emra si Jamiroquai, Fatboy Slim apo London Grammar.

Ajo çka e bën Riva Starr të pa ngatërrueshëm është aftësia e tij për të lëshuar një hit absolut i cili
arrin majat në platforma si iTunes, dhe njëkohësisht të krijojë himnin e ri të muzikës underground, duke prodhuar për kompani muzikore si Cajual, Hot Creations apo Moon Harbour.
I mbështetur nga emra si Giles Peterson, Jamie Jones, Matthias Tanzamann e deri tek legjendari Pete Tong, Riva ka arritur të krijojë emrin e tij si një ndër muzikantët më solid në treg dhe në preferencat e publikut.

Të premten, të shtunën dhe të dielën e datave 4,5 dhe 6 gusht 2017, Ishulli i Breshkës zbarkon për të 6-in vit radhazi në plazhin përrallor të Drimadhesit për të hapur dyert e Festivalit më të madh Open-Air Shqiptar./ KultPlus.com