Gjashtë ditarë të një shkolle në Prizren janë “avulluar” gjatë ditës së djeshme. Për këtë rast, tashmë janë identifikuar dy të dyshuar.
Përmes raportit 24 orësh, Policia ka njoftuar se me vendim të prokurorit rasti shkon në procedurë të rregullt.
“Është raportuar se të dyshuar të panjohur kanë asgjësuar gjashtë (6) ditarë të shkollës. Njësitet policore kanë identifikuar dy të dyshuar meshkuj K-Shqiptarë. Nuk raportohet për të arrestuar ndërsa me vendim të prokurorit rasti shkon në procedurë të rregullt”, thuhet në raport. /Express / KultPlus.com
Prizreni është gati të mirëpresë festivalin e16-të Ndërkombëtar të Stripit dhe Karikaturës, përcjellë KultPlus.
Shoqata e strip artistëve Kosovar
“XhennetComics” është organizatore e festivalit, të cilën i ka bërë të gjitha përgatitjet
me kohë. Nga data 17 e deri më 20 tetor 2019-të ky festival do t’i shtrijë
aktivitete e tij me një program të pasur.
Në këtë festival do të mbahen
edhe disa debate që ndërlidhen me stripin dhe karikaturën dhe i paraprijnë
festivalit. Se festivali ka bërë jehonë gjithandej botës e tregon më së miri
edhe numri prej 410 artistëve që kanë konkurruar, nga 57 shteteve të botës me
2227 punime, ndërsa prej tyre janë përzgjedhë 14 artistë për tu prezantuar në
festival. Gjithashtu janë 20 artistë , mysafirë nga tetë shtet të botës (Angli,
Turqi, Qipro, Maqedoni, Mali i zi, Serbi, Shqipëri dhe Bulgari),të cilën kryesisht
merren me strip dhe karikaturë. Tema e edicionit të XVI-të të festivalit të
stripit dhe karikaturës është “Idealisti”.
Vlen të ceket se si mysafir special në këtë festival do të jetë
artisti nga Anglia David Lloyd i cili është ilustruesi dhe krijuesi i stripit
të njohur “V FOR VENDETTA” dhe në seritë si “Hellblazer”, “Alien”, “Global
Frekuency “, “War Stories” dhe ”Kickback”.
Një nga artistët pjesëmarrës është edhe Strip artisti Bullgar,
Peter Stanimirov , i cili është ilustrues i të gjitha kopertinave të librave të
shkrimtarit të njohur botëror Stephen King, pos këtyre artistëve Prizreni është
nikoqir edhe i kryesisë dhe artistëve të Shoqatës të karikaturistëve të Qipros,
dhe në kuadër të këtij festivalit do të këtë edhe shumë debate për strip e
karikaturë. Debati kryesor do të jetë tema në lidhje me 50 vjetorin e Alan
Fordit dhe prezantimi i stript të numrit të parë të “ALAN FORD”-it të botuar në
gjuhën Shqipe. Paneli do të jetë i prezantuar nga koleksionisti dhe analisti i
njohur Marjan Matic nga Beogradi. Mysafir i rëndësishëm i këtij edicioni është
edhe botuesi i stripave FORMA B, Ilija Mirovic nga Beogradi.
Organizatorët u bëjnë ftesë adhuruesve të këtij lloji arti, e me theks të veçantë të rinjve që t’iu bashkëngjiten në hapjen solemne të festivalit, më datën 19 tetor 2019 me fillim në ora 19:30 në ambientin e Kompleksit “Evropa”, përkatësisht në Doku Kino. / KultPlus.com
Këtë të shtunë, më 12 tetor, mbahet manifestimi letrar, kulturor e shkencor ”Takimet e Gjeçovit”, shkruan KultPlus.
Manifestimi këtë
vitit shënon edicionin e 48-të me radhë dhe pritet të filloj në Shëngjergj për
të vazhduar më pas deri në Zym të Hasit (komuna e Prizrenit).
Në
manifestim do të mbahet ora letrare ”Anton Pashku”, ku do të lexojnë 15-të
poetë, poashtu, do të hapet edhe ekspozita e Jasmir Morinës e titulluar
”Gjeometri ornamentesh”.
Çmimet që do
të dorëzohen janë: Pena e Pjetër Bogdanit, Pena e Shtjefën Gjeçovit, Paketa e
Anton Pashkut dhe Unaza e Katit. Gjithashtu do të mbahet manifestimi ”Dita e
bukës zymjane” duke u përcjellur më pas me programin kulturo-artistik
”Katerina Josipi”.
Manifestimi mbahet nën patronatin e Ministrisë së Kulturës Rinisë dhe Sportit, kurse e organizon ”Shtjefën Gjeçovi” në Zym. /KultPlus.com
Kjo javë do të jetë historike. Nga 20 deri më 27 shtator miliona të rinjë në mbi 150 vende të botës janë duke u mbledhur në mbështetje të protestuesve që kërkojnë ndaljen e emetimit të gazrave, shkruan KultPlus.com
“Kriza klimatike nuk do të ndalet, ashtu që edhe ne nuk duhet të ndalemi. Të rinjtë e kanë zgjuar pjesën më të madhe të botës me protestat e tyre të fuqishme të Premteve për të Ardhmën Tani, miliona të rritur po bashkohen në një valë të madhe që do të fillojë me veprime në të gjithë botën.
Urgjenca e krizës klimatike kërkon një qasje të re dhe një përgjigje të drejtë të përqendruar në të drejtat e njeriut, barazinë dhe drejtësinë. Të interesuarit mund të na bashkohen për takimin planifikues, të Mërkurën më 25 shtator në ora 15:00 në Kinemanë Lumbardhi. Prizreni do t’i bashkohet lëvizjes globale #FridaysForFuture të Premtën më 27 shtator, me fillim në ora 12:00.
Ju ftojmë qëtë vini edhe s’bashku t’i konkretizojmë idetë, edhe me u përgaditë për protestën e së Premtës dhe që së bashku t’i përgadisim pankartat në letër të recikluar me sa ma shume fakte në to”, thuhet në njoftimin e organizatorëve.
Çiklistët në Prizren së shpejt do të kenë shtigjet e tyre për qarkullim, duke mos u rrezikuar nga automjetet. Kjo pasi tashmë Komuna e Prizrenit është në përfundim të procedurave të prokurimit për rregullimin dhe hapjen e stazave të reja për çiklistë.
Komuna e Prizrenit ka zgjedhur kompaninë që do të bëjë rregullimin dhe hapjen e shtigjeve të reja për çiklistë. Nga gjashtë tenderë të pranuar, kontrata për këtë projekt i është dhënë operatorit ekonomik “Hysen Sopa B.I”, në vlerë rreth 6 mijë euro (5.7200 euro), shkruan Ndërtimi.info.
Për këtë projekt Komuna e Prizrenit kishte planifikuar mbi 8 mijë euro (8.200 euro), ndërsa çmimi më i lartë i ofruara nga operatorët ekonomik ishte 7 mijë e 850 euro. / KultPlus.com
Drejtoria e Turizmit dhe Zhvillimit Ekonomik ka botuar hartat turistike të qytetit të Prizrenit, të cilat tashmë janë shpërndarë dhe mund të gjenden në qendrat informuese për turistë, dhe në të gjitha agjensionet turistike, hotelet, motelet dhe hostelet e ndryshme që operojnë në Prizren e më gjërë./ KultPlus.com
Harta turistike në anën e përparme përmban hartën në formë të ilustruar të qendrës historike të qytetit, me anë të së cilës mund të bëhet orientimi i lehtë për gjetjen e monumenteve kryesore të trashëgimisë kulturore, ndërsa në anën e prapme gjendet harta e tërë territorit të komunës, si mjet orientus për destinacionet turistike në zonat jo urbane të komunës, si dhe shënimet lidhur me kulturën dhe traditën e Prizrenit.
Botimi i hartave turistike është bërë në gjuhën shqipe, angleze, turke dhe boshnjake.Këto harta janë falas dhe u shërbejnë turistëve për orientim më të lehtë derisa vizitojnë qytetin e Prizrenit
Kino Lumbardhi ka publikuar programin e shtatorit i cili përfshinë një kombinim të pasur të shfaqjes së filmave dhe aktiviteteve tjera artistike dhe kulturore.
“Lumbardhi ka kënaqësinë të prezantojë programin e shtatorit, i cili përfshin një kombinim të pasur të performancave, programit të filmit dhe shfaqjeve të veprave të video-artit në sallën e kinemasë”, thuhet në njoftimin e tyre, përcjellë KultPlus.
Programi fillon me 1 shtator teksa për këtë program është kërkuar një mbështetje financiare nga Ambasada dhe Media vendore.
“Programi fillon të dielën me 1 shtator me performancën e bendit
indian “Tapi Project”, pasuar nga programi i filmit “Retrospektiva e Wim Wenders”,
lansimi i projektit më të ri muzikor nga AJO dhe seria e shfaqjeve të
video-artit të komisionuar Protocinema “Of Our Own
Making” e cila do të organizohet në natën e 14 shtatorit në kuadër të Nuit
Blanche te Lumbardhi.
“Programi i shtatorit i paraprin rijetësimit të Kino Bahçes dhe
ciklit dimëror të programit të rregullt te Lumbardhi i cili fillon me 1 Nëntor
2019”.
Ky program është mundësuar me partneritetin e BpB, Gjirafa, Goethe Institut, Ambasadës Gjermane në Prishtinë, Fondacioni Wim Wenders, Protocinema, Grupi KOHA dhe Komuna e Prizrenit.
Këtu keni programin e plotë të publikuar nga Lumbardhi:
PROGRAMI:
1 Shtator, e Diel, 21:00
Performancë: Tapi Project
6 Shtator, e Premte, 20:00 – 29 Shtator, e Diel, 20:00
Programi i filmit: “Retrospektiva e Wim Wenders”
13 Shtator, e Premte, 21:00
AJO, lansim i albumit
14 Shtator, e Shtunë 20:00 – 07:00 Protocinema prezanton: “Of Our OWn Making”. / KultPlus.com
Filmi u shfaq mbrëmjen e të enjtes para një publiku të madh në numër në kinemanë verore “Lumbardhi”, në kuadrin e festivalit DokuFest në Prizren.
Një qendër kulturore fshati, prej kohësh e shndërruar në gërmadhë, i ka shërbyer piktorit Petrit Halilaj si frymëzim për të realizuar filmin “Shkrepëtima”. Filmi i ka marrë titullin revistës shkollore “Shkrepëtima” që e botonin arsimtarët dhe nxënësit e shkollës fillore të fshatit Runik të Drenicës, që është dhe vendlindje e Petritit, shkruan albinfo.ch.
Po ashtu “Shkrepëtima” në rrafshin e ideve është emër i qëlluar për të identifikuar një periudhë iluminimi e shpërthimi kulturor të popullatës së fshatit në fjalë e më gjerë.
Petrit Halilaj është piktor që gëzon një shkallë të lartë të njohjes në qarqet artistike ndërkombëtare prandaj dhe “Shkrepëtima” e tij ka bërë një jehonë të konsiderueshme në këto qarqe. Vetë filmi është realizuar si ilustrim për performancën e tij artistike me po këtë emër, që ai e ka shfaqur prej më shumë se një viti në qendra të ndryshme evropiane të artit.
Ndërsa filmi u shfaq mbrëmjen e të enjtes para një publiku të madh në numër në kinemanë verore “Lumbardhi”, në kuadrin e festivalit DokuFest në Prizren.
Filmi “Shkrepëtima” flet me një gjuhë specifike, do të thoshim autoriale artistike, që e cilëson edhe shprehjen e Halilajt në pikturë dhe performancë. Një krijim arti me një figuracion të pasur dhe jo lehtë të zbërthyeshëm për publikun e gjerë, shkruan albinfo.ch. Megjithatë, ajo që kuptohej nga të gjithë ishte fryma humane dhe kulturëdashëse që përshkon gjithë filmin.
Duke marrë fjalën gjatë prezantimit, para dhe pas shfaqjes së filmit, Petrit Halilaj ka theksuar se është impresionuar shumë nga puna të cilën e kishte bërë gjenerata e “Shkrepëtimës” për ndriçimin kulturor e arsimor të popullatës së Runikut e më gjerë.
Së këndejmi, Halilaj veç tjerash ka thënë: “Kur gjenerata e prindërve tanë na e ka lënë një trashëgimi të tillë shpirtërore, artistike të krijuar në kushte të vështira, a nuk është detyrim i yni që edhe ne të mendojmë çfarë t`u lëmë trashëgim brezave që po vijnë pas nesh?”.
Në rrjedhën e filmit, autori ka ndërfutur pjesë nga një numër dramash të luajtura në teatrin që ka funksionuar në kuadrin e shtëpisë së kulturës të fshatit Runik. Prandaj tani, rreth 30 ose 40 vite pas shfaqjes së tyre të parë, kemi parë, tashmë në ekran filmi, inskenimin e sërishëm të fragmenteve nga shfaqjet si “Toka e jonë”, “Hakmarrja” etj., tipike për repertorin e teatrove tona amatore të asaj kohe, shkruan albinfo.ch.
Në inskenimin e tyre për nevoja të filmit, janë angazhuar aktorë të njohur profesionistë nga Kosova por edhe amatorë ose qytetarë të thjeshtë që kanë hyrë në magjinë e shprehjes artistike të Halilajt.
Ndërsa një pjesë e madhe, mbase mbizotëruese, e rrëfimit filmik, është realizuar përmes lojës koreografike. Figura mitologjike vallëzojnë mbi kokën e djaloshit të fjetur në një ambient imagjinar të vendosur në gërmadhat e shtëpisë së Kulturës, në Runik.
Një prani të konsiderueshme në këtë rrëfim e ka edhe okarina, një instrument i thjeshtë frymor nga koha e neolitit, i cili është gjetur pikërisht në fshatin Runik të Skënderajt. Okarina si instrumenti më i vjetër, këtu simbolizon vazhdimësinë ose ripërtëritjen e jetës, ruajtjen e trashëgimisë. Pikërisht të asaj trashëgimie të cilën autori i filmit, Halilaj, apelon që t`ua bartim brezave të rinj… / albinfo.ch / KultPlus.com
Prej sot e deri më 10 gusht mbahet edicioni i 18-të i festivalit të filmit “DokuFest”, ndërsa tematika e këtij edicioni është zgjedhur të jeta e vërteta.
Para publikut janë zgjedhur të shfaqen 282 filma, si dhe muzikë e panele të ndryshme ku do të trajtohen tema që kryesisht synojnë fuqizimin e të rinjve në tregun e punës.
Drejtoresha e festivalit “DokuFest”, Nita Deda tha se këtë vit ky festival do të ketë një program të larmishëm duke përfshirë ekspozita, muzikë dhe filma për të gjitha kategoritë.
Drejtori artistik i “DokuFest”, Veton Nurkollari, tha se nga 2500 filma garues janë përzgjedhur 16 sish që do të garojnë në gjashtë kategori.
Sipas tij, risi këtë vit do të jetë kinemaja mobile, e cila do të udhëtojë në disa lagje më të skajshme të Prizrenit, për ta sjellë festivalin në çdo pjesë të Prizrenit.
Nurkollari u shpreh se edhe këtë vit “DokuFest” do të ketë një festival muzikor që do të shtrihet në katër skenat e festivalit.
Drejtori artistik njoftoi po ashtu se në këtë edicion do të shfaqen edhe 50 filma për të rinj dhe fëmijë.
Sipas përzgjedhësit të filmave të shkurtër, Samir Karahoda tha e programi i filmit të shkurtër përmban gjithsej 30 filma që janë përzgjedhur gjatë tërë viti. Ai tha se tema e këtyre filmave do të jetë migrimi, racizmi e çështje gjinore.
Linda Llulla, drejtoresha ekzekutive e “DokuFest”, u shpreh se krahas filmave dhe muzikës, publiku do të mund të argëtohet dhe edukohet edhe përmes paneleve të ndryshme që synojnë fuqizimin e të rinjve për tregun e punës. / Insajderi / KultPlus.com
Prizreni tashmë i ka ndarë datat për ditët kur do të ‘pushtohet’ nga vizitorët. Përgatitjet për këto data kanë filluar dhe i gjithë qyteti po mobilizohet për një pritje të jashtëzakonshme. Është festivali ‘DokuFest’ ai i cili e shndërron qytetin e Prizrenit për një javë rresht si vendin më të vizituar në Kosovë. Kjo jo rastësisht, por DokuFest ngërthen në vete vizitorët me programin e tyre tejet të pasur dhe atraktiv, shkruan KultPlus.
Rrugët
e Prizrenit pritet të vërshohen nga turistët e shumtë vendas dhe të huaj të cilët
do të vendosen aty për 9 ditë sa zgjatë festivali për të përjetuar një aventurë
të re për ta e që padyshim do të mbetet në kujtesën e tyre si një ndër javët më
të mbushura në jetën e tyre.
Me kinematë e jashtëzakonshme të cilat janë vendosur në ambiente ku natyra krijon një vend ideal për të shikuar një film dhe përjetuar atmosferën e këndshme të qytetit antik, ju do te keni rastin të shihni filma të mrekullueshëm.
Kalaja
e qytetit të Prizrenit është një nga destinacionet më të bukura të këtij
festivali, që me pamjen e saj do të ju magjeps e shpalosja e programit në një
ambient të tillë do të ju bëj të dashuroheni në gjithë atë që do të përjetoni
gjatë këtyre ditëve.
Ky
edicion i DokuFest-it na sjell një mori ngjarjesh për të gjitha moshat. Përveç
programit të pasur me filma të cilët do të shfaqen në kinematë tashmë
tradicionale të festivalit, ju do të bëheni një me performancat muzikore të
cilat gjithashtu tashmë i kanë krijuar skena e veta. Muzikë elektronike,
eksperimentale e deri te iso-polifonia do të ju shoqërojnë përgjatë 9 netëve të
magjishme që po priten me shumë entuziazëm nga adhuruesit e festivalit më të
mirë në vend. Ekspozita, punëtorit e masterklasa të ndryshme do të shpalosen për
ju gjatë këtyre ditëve që aq sa po i prisni ju, edhe ato po ju presin juve.
Nga
280 filma që do të shfaqen, mbi 100 filma do të jenë pjesë e programit garues
përmes dokumentarëve të mrekullueshëm si dhe filmave të shkurtë dhe të kinemasë
eksperimentale që vinë nga 40 shtete të ndryshme, kjo është ajo që edhe e
karakterizon programin e këtij edicioni.
Ajo që e shquan këtë vit është edhe numri i madh i regjisorëve, filmat e të cilëve do të debutojnë për herë të parë nëpër seksionet e ndryshme garuese të festivalit si dhe regjisorë që marrin pjesë për të disatën herë me radhë.
Duke
zgjedhur TË VËRTETËN si temë të edicionit të 18-të të festivalit, DokuFest i
bashkohet diskutimit mbi atë se çfarë është e vërtetë dhe çfarë është e rreme
dhe mënyrën se si kjo na ndikon të gjithëve. Me partner të përhershëm ProCredit
Bank, DokuFest ju fton t’i bashkoheni këtij udhëtimi shumëngjyrësh mes
realitetit dhe fantazisë, gënjeshtrave subjektive dhe të vërtetave objektive –
politikës në një botë të globalizuar dhe peizazhit dixhital të së
post-vërtetës.
Ndërsa sa i përket shfaqjes speciale për këtë edicion, ne ju tregojmë se filmi “Shkrepëtima” i Petrit Halilajt do të jetë i tillë. Filmi ndjek projektin artistik me po të njëjtin emër i cili një vit më parë ndezi një dritë në komunitetin e fshatit të artistit Halilaj, në Runik. Filmi do të ketë premierën kombëtare në Lumbardh, me datën 08 Gusht dhe do të përcillet me një diskutim mes Petrit Halilaj dhe kuratorit Leonardo Bigazzi.
11
filma të regjisorëve shqiptarë, filmbërësve të rinj premtues si dhe të
studentëve janë pjesë e garës kombëtare të DokuFest XVIII.
18 dokumentarë të rinj pjesë e prodhimeve vjetore të DokuLab të cilët shpalosin tregime të guximshme nga një gjeneratë jashtëzakonisht e talentuar, do ta kenë premierën e tyre në Kino Lumi.
Programi
i sivjetmë i fotografisë DokuPhoto, do të shënohet përmes bashkëpunimit me
artisten dhe kuratoren Blerta Hoçia, e cila ka krijuar punimin që reflekton
temën qendrore të festivalit. Ekspozita do të qëndrojë e hapur gjatë gjithë
festivalit dhe të gjithë jeni të ftuar të merrni pjesë.
Kjo nuk është e gjitha, por ju duhet të shkoni dhe përjetoni nga afër magjinë e këtij festivali për të cilin ne besojmë se ju do të jeni të radhës që do të shkruani një letër kujtimi për gjithë aventurën tuaj në qytetin antik me programin e begatshëm të DokuFest që pritet të shpaloset për ju prej datës 2 deri më 10 gusht në qytetin e bukur të Prizrenit. /KultPlus.com
Në oborrin e shtëpisë së Familjes Kirajtani që gjendet në rrugën “Shuaip Spahiu”, nr. 15, EC Ma Ndryshe gjatë 27 korrikut organizon një aktivitet ku përgjatë orëve 12:00 – 15:00 do të shërbehen pije dhe ëmbëlsira për vizitorët.
Shndërrimi një-ditor i kësaj shtëpie në një hapësirë si “kafeteri” po realizohet me qëllim që të përcillet mesazhi se objektet me vlera të tilla mund të kthehen në destinacione të ndryshme turistike dhe nxitëse të zhvillimit ekonomik njëkohësisht, nga ku të ardhurat do të përmirësonin gjendjen, do të rrisnin vetë-qëndrueshmërinë dhe nivelin e mirëmbajtjes së vlerave të ndërtesave të tilla. / KultPlus.com
Në mbikqyrje të Agjencisë Turke për Koordinim dhe Zhvillim (TIKA) në Prizren është mbajtur shfaqja teatrale “Usta” nga regjisori turk Ahmet Yenilmez, e cila me temë ka jetën e Abdulhamitit të Dytë.
Në shfaqjen teatrale të organizuar në Shtëpinë e Kulturës “Xhemajli Berisha” nga Lidhja e Shoqatave Joqeveritare Turke në Maqedoni (MATÜSITEB), morën pjesë kryetari i delegacionit turk në Misionin e Forcave Paqeruajtëse (KFOR) në Kosovë, koloneli Numan Baş, koordinatori i TIKA-s në Prishtinë, Hasan Burak Ceran dhe shumë të ftuar të tjerë.
Shfaqja kishte temë jetesën e Abdulhamitit të Dytë duke filluar nga vitet e rinisë së tij e deri në ditët e fundit. Shfaqja kohë pas kohe shkaktoi emocione tek publiku dhe u ndoq me vëmendje.
Artisti Rıdvan Dağlar, u tha gazetarëve se kanë dalur në rrugëtim për të pasqyruar një ngjarje historike që ka ndodhur para 100 viteve.
“Jemi shumë të lumtur që gjendemi në Kosovë”, tha ai.
Shfaqja teatrale e regjisorit turk Ahmet Yenilmez, më 26 qershor ditën e mërkurë, gjithashtu do të takohet me artdashësit në kryeqytetin e Maqedonisë së Veriut, Shkup./AA
Njëri prej festivaleve më unike në Kosovë, Bunarfest, ka shpallur të hapur thirrjen për aplikim për të interesuarit të cilët dëshirojnë të jenë pjesë e garës së lëshimit me goma në lumin Lumbardhi të Prizrenit, në kuadër të edicionit të 15-të të festivalit Bunarfest.
Organizatorët kanë bërë të ditur tashmë se ky edicion do të mbahet në datat 8-9 qershor, ku së pari më 8 qershor (e shtunë) do të organizohet aktiviteti i pastrimit të lumit me vullnetarë dhe në mbrëmje do të organizohet koncerti muzikor me artistë të njohur nga vendi, derisa më 9 qershor (e diel) do të organizohet gara e lëshimit me goma, shtegu i së cilës fillon nga lokacioni i njohur si “Centralla” dhe përfundon në qendër të qytetit tek “Ura e Gurit”, ku është edhe finishi i garës.
Sikurse edhe në vitet e mëparshme, festivali nuk do të ketë karakter garues dhe qëllimi mbetet që në formë atraktive dhe argëtuese t’i jepet mesazhi qytetarëve për ta mbrojtur dhe mos e ndotur lumin.
Makinat kanë zënë vend njëra pranë tjetrës, por vetëm një vit më parë në vendin afër qendrës historike në Prizren qëndronte shtëpia e familjes Myftiu, e cila besohet se ishte ndërtuar në shekullin e XIX. Ani pse ajo ishte pjesë e trashëgimisë kulturore u rrënua.
E për ketë rast dhe shumë të tjera të dëmtimit të objekteve të trashëgimisë kulturore, në Prokurorinë Themelore të Prizrenit, që nga viti 2018 e deri më tani janë ngritur disa kallëzime penale.
“Kemi pranuar gjatë vitit 2018, 14 kallëzime penale, kundër 29 personave, kemi ngritur 13 aktakuza gjatë vitit 2018, kundër 24 personave”.
Se Qendra Kulturore e Prizrenit po dëmtohet e thonë edhe në organizatën “Ec ma ndryshe”.
“Këto ndërtesa në momentin kur po rrënohen po shfrytëzohen për parkingje edhe shfrytëzohen për ndërtesa të reja, që normalisht është në kundërshtim edhe me ligjin në fuqi për Qendrën Historike të Prizrenit”, thonë ata.
Me rastin e evidentimit të shkatërrimit të objekteve kulturore është duke u marrë edhe Inspektorati i Trashëgimisë, në kuadër të Ministrisë së Kulturës.
“Inspektorati i Trashëgimisë Kulturore ka iniciuar shtatë procedura penale, për persona që kanë dëmtuar ose shkatërruar trashëgiminë kulturore, prej këtyre shtatëve numri më i madh i kallëzimeve penale është drejtuar tek regjioni i Prizrenit”.
Deri më tani Inspektorati i Trashëgimisë Kulturore ka dhënë 32 rekomandime për institucionet e Trashëgimisë kulturore, derisa ka thirrur të gjitha komunat e shtetit që të marrin masa të cilat ndikojnë në ruajtjen dhe mbrojtjen e trashëgimisë kulturore./Klan Kosova / KultPlus.com
Ministri i Kulturës, Rinisë dhe Sportit, Kujtim Gashi, ka marrë pjesë në aktivitetin e prezantimit të projektit: “Revitalizimi dhe integrimi socio-ekonomik i komunitetit lokal në rrugën ‘Marin Barleti’ në Prizren”.
Ky projekt është iniciuar që nga viti 2017 dhe është koordinuar nga Qendra Rajonale e Trashëgimisë Kulturore në Prizren dhe organizata EC Ma Ndryshe. Projekti në fjalë është financuar nga MKRS-ja, Zyra e BE-së në Kosovë, Ambasada Britanike në Prishtinë dhe është mbështetur nga Komuna e Prizrenit.
Në këtë prezantim që u mbajt në Doku Kino, morën pjesë edhe ambasadori britanik, Ruairi O’Connell, zëvendës udhëheqësi për bashkëpunim-Zyra e BE-së, Libor Chlad dhe përfaqësues të Komunës së Prizrenit.
Me këtë rast ministri Gashi fillimisht falënderoi të gjithë ata që kanë punuar në realizimin e këtij projekti edhe përkundër sfidave me të cilat janë ballafaquar në terren.
“Falënderoj në veçanti stafin e QRTK-së në Prizren të cilët së bashku me partnerë lokal dhe ndërkombëtar, me zell e përkushtim kanë arritur të hartojnë ketë projekt shumë dimensional dhe gjithëpërfshirës”.
Ministri po ashtu tha se ky projekt i hap rrugët për investime në këtë lagje të rëndësisë së veçantë për qytetin e Prizrenit dhe me këtë rast falënderoi edhe pronarët e ndërtesave të lagjes të cilët siç tha ministri treguan gatishmëri për tu bërë palë në këtë proces tejet të ndërlikuar por shumë të rëndësishëm për të ardhmen e tyre por edhe të qytetit të Prizrenit.
“Rruga ‘Marin Barleti’ zë pjesën kyçe të Qendrës Historike të Prizrenit, ndaj dhe revitalizimi urban dhe shoqëror i tij do të ndikon në krijimin e kushteve optimale për ruajtjen e vlerave të trashëgimisë kulturore dhe zhvillim të qëndrueshëm lokal në të gjithë Qendrën Historike të Prizrenit”, tha ministri Gashi.
Ai më tej sqaroi se projekti është ndarë në dy komponentë, atë të konservimit dhe të zhvillimit.
Ministri Gashi ritheksoi zotimin e tij se MKRS-ja do të vazhdojë ta trajtoj me prioritet Qendrën Historike të Prizrenit, e me theks të veçantë rrugën “Marin Barleti”, në aspektin ligjor, profesional dhe buxhetor.
“Pa dyshim që në këtë aspekt, edhe pres përkushtimin e Komunës së Prizrenit që të angazhohen në këtë drejtim me qëllim të koordinimit të punëve dhe veprimeve tona të përbashkëta të cilat do të shkojnë në dobi të ruajtjes së Qendrës Historike të Prizrenit e cila përveç që paraqet vlera të jashtëzakonshme të trashëgimisë kulturore dhe historike për vendin donë, na detyron të gjithë ne bartësve të institucioneve për angazhim maksimal”, u shpreh ministri Gashi.
Në fund, ministri ftoi të gjithë që të bëhen pjesë e procesit duke dhënë rekomandimet e tyre për të cilat ai siguroi se do të vlerësohen. /KultPlus.com
Në kuadër të kalendarit të përbashkët kulturor vjetor të nënshkruar nga ana e Ministrit të Kulturës, Rinisë dhe Sportit, Kujtim Gashi dhe Ministres së Kulturës së Republikës së Shqipërisë, Elva Margariti, të premten me datë 19 prill hapet ekspozita “Grafika nga Trashëgimia Kulturore e Qarkut Korçë”, shkruan KultPlus.
Kjo
ekspozita u mundësua nga bashkëpunimi i Drejtorisë Rajonale të Trashëgimisë
Kulturore – Korçë dhe Qendrës Rajonale për Trashëgimi Kulturore – Prizren.
Ekspozita do te hapet, të premten duke filluar nga ora 19:00 në Galerinë e Hamamit të Gazi Mehmet Pashës. /KultPlus.com
Komuna e Prizrenit ka vendosur që t’i largojë të gjitha reklamat nga pjesët që janë në menaxhim të Qendrës Historike të Prizrenit.
Bizneset kanë afat deri në fund të muajit mars që t’i largojnë reklamat që janë mbi kulmet e objekteve historike dhe të cilat janë mbi një metër katror, raporton KTV.
Thaqi ka treguar që është formuar një komision për ta plotësuar ligjin që mbikëqyr çdo gjë që përfshihet në qendrën historike të këtij qyteti.
Ndërkaq, pronarët e bizneseve, të cilët nuk kanë dashur të flasin para kamerës, kanë thënë se duhet ta zbatojnë çdo vendim të komunës, pavarësisht se a u përshtatet atyre.
Ndërkaq, qytetarët të cilët edhe e kanë mirëpritur vendimin e komunës, kanë thënë se në sezonën e verës qyteti është shumë më i mbingarkuar.
Komuna e Prizrenit, muaj më parë, ka larguar shufrat e metalit nëpër lokale, të cilat kanë qenë të vendosura në ambiente që ishin pronë e ish-drejtorëve.
Një pjesë e qytetit të Prizrenit vazhdon të jetë e mbrojtur me ligj të veçantë për shkak të trashëgimisë kulturore. / KultPlus.com
Para 74 viteve më 12 shkurt 1945 në Prizren nisi të dalë gazeta tradicionale e Kosovës Rilindja, në frymën e Konferencës së Bujanit – të Rezolutës për vetëvendosje e të drejtë bashkimi me Shqipërinë, me angazhimin e intelektualëve më të shquar të asaj kohe, me shkronja plumbi që u sollën me arka nga Tirana.
“Shkronja për Rilindjen dërgoi Tirana pasi në Shtypshkronjën
e Rilindjes në Prizren nuk kishte shkronja të mjaftueshme të
derdhura në plumb për shkrim në gjuhën shqipe”, shkruan në shtojcën monografi të gazetës së 22 Shkurtit 2008 “Rilindja 63 vjet –
Kosova në Rilindje drejt pavarësisë”.
Theksohet se, “numri i parë i gazetës Rilindja, që kishte katër
faqe, u radhit me dorë për rreth 72 orë dhe për këtë u deshën katër arka
shkronja shqipe të derdhura në plumb, që u sollën nga Tirana”.
“T’i përvishemi punës…”, ishte kryeartikulli në ballinë i numrit
të parë të gazetës Rilindja, që mbanë datën 12 Fruer (Shkurt) 1945 e që kishte
çmimin edhe 1 Lek, e që sipas shkrimeve Kosovën e përcaktonte si një vend të
veçantë.
“Jehona e vendit” ishte rubrika, ku janë të botuara 6 lajme e informata nga Kosova, e të 4 lajmet e tjera janë të jashtë vendit nga fronte të ndryshme të Luftës së Dytë Botërore, që ende vazhdonte (Froni i Lindjes, i Perëndimit, i Jugosllavisë dhe ai i Italisë).
Numri i parë i gazetës Rilindja u shtyp në një tirazh prej
mëse 3.000 ekzemplarësh dhe u shpërnda në gjithë Kosovën. Në fillimet e saj, në
rrethanat e një shkalle të lartë të analfabetizmit të asaj kohe në Kosovë,
gazeta Rilindja u përdor edhe për mësimin e shkronjave shqipe, shkrimit e
leximit.
Shkrimtari Esad Mekuli, drejtor përgjegjës në shënimin e
njëvjetorit të daljes së gazetës Rilindja më 1946, ndër të tjera, shkruante:
“… ‘Rilindja’ duhet të dalë çdo javë rregullisht…duhet të bahet
pasqyrë e veprimtarisë s’onë…”
Më 11 Qershor 1950, Rilindja (që rëndom dilte një here në
javë) njoftonte se, “tash e mbas del dy herë në javë, t’ejtën dhe të shtunën”.
Më pastaj, gazeta Rilindja shpeshtoi daljet dhe që nga fundi i
nëntorit të vitit 1958 filloi të botohet përditë.
E përditshmja Rilindja me fizionomi të re, me ngjyrën e kaltër, që
iu shtua faqeve bardhezi, filloi të dalë të dielën e 17 Prillit të vitit 1966.
Gazeta historike Rilindja në 19 Nanduer (Nëntor) 1946 jepte
lajmin e madh për abetaren e parë në gjuhën shqipe të botuar në Kosovë: “Sot
duel nga shtypi abetarja e parë në gjuhën shqipe e cila me punën vetëmohuese të
punëtorëve grafikë u shtyp, për një kohë relativisht të shkurtë…Abetarja përmban
58 faqe dhe asht shtypë në 5.000 ekzemplarë”.
Rilindja lindi në një kohë kur duhej luftuar analfabetizmi. Më 23 janar 1946 kjo gazetë botonte artikullin redaksional “Analfabetizmi asht anmiku i popullit”.
Ndërsa, ndonjë ditë më vonë shkruante se “afër 20.000 burra e
gra marrin pjesë në kurset për luftimin e analfabetizmit”. Rilindja e
datës 14 fruer (shkurt) 1947, në një titull të madh, shkrunte se në Kosovë
“Funksionojnë 2.485 kurse kundër analfabetizmit, ku janë përfshi 52.413
ndjekësa”.
Rilindja (e datës 1 janar) ka hyrë në vitin 1949 me një artikull
që angazhohej për të drejtën e shqiptarëve në “përdorimin e gjuhës së tyne
amnore” dhe shënon faktin se gjatë viteve 1945 -1949 në Kosovë “kanë mësue
shkrim-këndim mëse 100.000 analfabetë”.
Ndërkohë, krahas luftës kundër analfabetizmit, është zhvilluar
edhe aksioni për zgjerimin e rrjetit të bibliotekave. Sipas Rilindjes, në
fillimin e vitit 1949 në bibliotekat e Kosovës kishte 8.230 libra e broshura në
gjuhën shqipe. Kurset kundër analfabetizmit nëpër qytetet e fshatrat e Kosovës
kanë qenë tema e qindra shkrimeve në shumë numra e faqe të gazetës Rilindja.
Fushata – aksioni i Rilindjes për zhdukjen e analfabetizmit filloi qysh në
vitin 1945 dhe zgjati gati 7 vjet.
Më 1946 dhe 1947 Rilindja iu bashkua aksionit për emancipimin e
femrës shqiptare, ndërsa në vitet 1972 – 1975 aksionit për shkollimin e femrës
shqiptare.
Rilindja në 6 Gusht 1947 shkruante: “…Lufta kundër çarshafit
duhet të vazhdojë deri sa të zbulohet edhe femna e fundit. Tridhjetë mijë femna
shqiptare të zbulueme, në interes të popullit shqiptar kërkojnë që lufta kundra
çarshafit të vazhdojë deri në fund…”
Aksion tjetër i rëndësishëm në faqet e gazetës Rilindja ishte ai i
huasë popullore për ndërtimin e shkollave në Kosovë gjatë viteve 1970-1972…
“Universiteti i Prishtinës do të japë dritë, shkencë e kulturë”,
ishte kryetitulli në gjithë ballinën e gazetës Rilindja në 16 Shkurt 1970.
Kështu gazeta historike raportonte gjerësisht për themelimin e Universitetit të
Prishtinës – kryeqytetit të Kosovës.
Festa e madhe dhe e shumëpritur e themelimit të
Universitetit të Prishtinës u mbajt më 15 Shkurt 1970 me mbledhje solemne të
Kuvendit të Universitetit, vetëm tre ditë pas festës së 25 vjetorit të
Rilindjes, e cila në fillimet e saj kishte botuar abetaren e parë shqipe të
Kosovës.
“Në Rilindja, që është edhe abetare e parë, i kanë rrënjët edhe
Universiteti, edhe Akademia e Shkencave dhe e Arteve e Kosovës, edhe shumë
zhvillime e aspiratat tona”, shkruan në Monografi.
Universiteti i Prishtinës është themeluar me ligjin e miratuar nga
Kuvendi i Kosovës në 18 Nëntor 1969 edhe si kërkesë e demonstratave studentore
e gjithëpopullore kosovare një vit më herët – në 1968. Në prag të demonstratave
shqiptare, Rilindja ditën e diel të 6 Tetorit të vitit 1968 në ballinë kishte
shkrimin me titull “Përdorimi i lirë i flamujve kombëtarë”, që po riniste në
Kosovë për shqiptarët…
Rilindja e datës 6 Korrik 1962 shkruante se, Kosova “fitoi
këto ditë banorin e njimilionit…”
“Simbas regjistrimit të fundit të 31 marsit të vitit të
kaluem, në këtë teritor ka pasë 963.551 banorë…” shkruante gazeta duke
shtuar se “asht interesante” se në Kosovë “ka afër 40 mijë
mashkuj ma shumë se femna”.
Rilindja në 25 vjetorin e saj, në 12 Shkurt 1970, filloi të
dalë me gjuhën e njësuar letrare shqipe. Me këtë rast, në artikullin “Të
mësojmë me vullnet gjuhën letrare” bënte thirrje që gjuhës letrare t’i
kushtohet kujdes më i madh nga të gjithë.
Për këtë kishte angazhime e shkrime edhe vite më herët. Në Rilindja të 4 Dhjetor 1952, Idriz Ajeti (që në vitet 1979-1981 dhe 1996-1999 ishte edhe kryetar i Akademisë së Shkencave dhe të Arteve të Kosovës) shprehej “(…) Popujt e qytetnuem çmohen edhe përkah begatia, pasunija, përkah bamunia se sa kujdes i kushtojnë gjuhës së tyne amnore. Ata kanë themelata të posaçme që ruajnë dhe shtjellojnë gjithnjishëm mundësitë e saj shprehjore…”
Rilindja më 20 Nëntor 1971 informonte se një ditë më parë në
afërsi të Stadiumit të Prishtinës me një solemnitet rasti filloi ndërtimi i
Pallatit të Shtypit. Rilindja pasi kishte investuar në truallin e Pallatit
filloi edhe ndërtimin e tij, duke qenë udhëheqëse e punimeve dhe investitore.
Gazeta Rilindja në vitin 1972 (në shtator e tetor) shkruante
për zgjerime bashkëpunimi të Kosovës me Shqipërinë dhe për këtë nënshkrimin në
kryeqytetin shqiptar të protokolit mes Universitetit të Tiranës dhe
Universitetit të Prishtinës, bisedat në kryeqytetin kosovar mes
drejtuesve të “Kosova Filmit” dhe delegacionit të Kinostudios “Shpiqëria
e Re”, ardhjen e shkrimtarëve nga Shqipëria në Gjakovë e Prishtinë dhe bisedat
për shkëmbim të botimeve mes shtëpive botuese, Shfaqjen në Teatrin Kombëtar të
Prishtinës të “Gjenaralit të Ushtrisë së Vdekur”, që e solli i ardhur nga
Tirana Piro Mani si autor i dramatizimit e regjisor, derisa në premierë asistoi
edhe autori i romanit Ismail Kadare, siç shkruante kritiku teatror
Vehap Shita edhe në librin “Kur ndizen dritat”, botuar nga Rilindja, ku ka
punuar shumë vite…
Kosova po shkonte drejt Kushtetutës së vitit
1974, e cila i ka siguruar mëvetësi organizative si njësi
konstituive me të drejtë vetoje në federatën e atëhershme, nga
shpërbërja e së cilës dolën shtatë shtete të reja të rajonit –
Kosova, Sllovenia, Kroacia, Bosnja e Hercegovina, Serbia, Mali i Zi dhe
Maqedona…
Rilindja nuk u ndal edhe kur u ndalua me ndërhyrje
ushtarako-policore në shtypshkronjë nga regjimi okupues serb në 7 Gusht 1990,
edhe kur u dëbua kundërlishëm e padrejtësisht nga shtëpia e saj – Pallati i
Rilindjes në 21 Shkurt 2002 nga administrata e UNMIK-ut…Nga 18 Janari 1991
doli edhe me emrin “Bujku” gazetë e rezistencës, e lëvizjes e luftës për liri,
pavarësi e demokraci, me përcaktim e orientim të fuqishëm properëndimor
euroatlantik, kryeredaktor i parë-themelues i së cilës isha.
Gazeta Rilindja, kryeredaktor i së cilës isha në kohën e dëbimit
nga UNMIK e deri në numrin e fundit, pas datës 21 Shkurt 2002 deri kur doli
përditë, doli me numra të jashtëzakonshëm të kohëpaskohshëm e protestues duke e
bërë gazetën tradicionale edhe histori të Kosovës që nga koha e rreth një viti
pas Konferencës së Bujanit, e nisur në 31 Dhjetor 1943 dhe e përfunduar në
2 Janar 1944, deri në shpalljen e pavarësisë së Kosovës në 17 Shkurtin
historik 2008 e njohjet ndërkombëtare…
Gazeta tradicionale e Kosovës Rilindja
për 17 Shkurtin historik 2008 doli numër i jashtëzakonshëm festiv me
kryetitullin me shkonja ngjyrë
ari: Kosova shpalli pavarësinë bota e njeh shtetin më të ri.
Po në ballinë, nën
imazhet e nënshkrimit të Deklaratës së Pavarësisë së
Kosovës, të Flamurit e Stemës së
shtetit të ri evropian dhe fishekzjarreve të festimeve
në Prishtinë, Rilindja shkruante poashtu me shkronja ngjyrë
ari: 17 Shkurti 2008 dita më e madhe shqiptare pas
28 Nëntorit 1912 të pavarësisë së Shqipërisë.
Lart te logoja po në faqen e parë
shkruante: Rilindja ju uron shpalljen dhe njohjen e Kosovës
shtet i pavarur.
Gazeta Rilindja, kronikë e zhvillimeve historike të Kosovës, pasi
doli me botime speciale edhe për ngjarjen historike të shpalljes së pavarësisë
dhe njohjet ndërkombëtare që pasuan, ka përmbyllë daljet e mëse 40 numrave të
jashtëzakonshëm të kohëpaskohëshëm në 30 Dhjetor 2008, me numrin festiv të
Vitit të Ri 2009, në ballinë me kryetitullin e ëndërres dhe të ardhëmes:
Kosova shtet në OKB. Dhe me paralajmërimin: Duke besuar në sundimin e ligjit në
shtetin e Kosovës presim që nga numri i ardhshëm Rilindja të dalë përditë.
Pas 10 vitesh, gazeta tradicionale e Kosovës Rilindja në
ndërrim motesh – në mbrëmjen e 31 Dhjetorit 2018 të pritjes së
2019-tës, ridoli simbolikisht (botim digjital) për protestë dhe me
kërkesën e përsëritur për t’u rikthyer e përditshme – për privatizim, sipas
shembullit të gazetave në rajon e në botë që kishin status të njëjtë ndërmarrje
shoqërore e që janë privatizuar e vazhdojnë të dalin…
Një nga titujt e kësaj ridalje simbolike të gazetës Rilindja
është: “23 Tetor 2018: Lajm i mirë nga Qeveria e Kosovës – Vendimi për
kryerjen e pagesës për shpronësimin e Ndërtesës së ish-Ndërmarrjes Shoqërore
Rilindja.
“Punëtorët e gazetës tradicionale të Kosovës Rilindja presin që në
2019-tën Qeveria të bëjë pagesën për shpronësim dhe të realizojnë 20
përqindëshin, se tepër shumë gjatë presin të drejtën – 17 vjet nga dëbimi i
dhunëshëm, i padrejtë e i kundërligjshëm nga adminisrata e UNMIK-ut në 21
Shkurt 2002 nga Pallati Rilindja, ku pastaj pas shpalljes së Pavarësisë së
Kosovës ka 10 vjet që janë vendosur disa ministri të Qeverisë së Shtetit të
Kosovës”, theksohet në shkrimin e gazetës tradicionale të Kosovës Rilindja që
ridoli simbolikisht pas 10 vitesh, botim digjital.
Kërkesa për privatizim-ridalje të gazetës tradicionale të Kosovës
Rilindja i është bërë edhe Agjencisë Kosovare të Privatizimit, e cila është
themeluar si një organ i pavarur publik, në bazë Ligjit të miratuar nga Kuvendi
i Republikës së Kosovës, si pasardhëse e Agjencisë Kosovare të Mirëbesimit e
themeluar nga Misioni i OKB i pas luftës në Kosovë.
Në arsyetimin e kërkesës për privatizim
theksohet edhe se
emri dhe tradita e gazetës Rilindja është një
vlerë shumë e madhe, e krijuar gjatë mëse shtatë
dekadave, është pasuri me vlerë më të madhe
se e çdo pallati, dhe kjo
duhet të vlerësohet edhe në procesin e privatizimit.
“Dhe, ai që do ta blejë gazetën Rilindja dhe natyrisht
do e nxjerrë këtë të përditshme
historike dhe tradicionale të Kosovës do jetë
pronar i një pasurie të madhe mediale kombëtare,
do të jetë trashëgimtar i ligjshëm i firmës-emrit,
traditës. Rilindja ishte, është dhe mbetet edhe si një
shenjë identiteti”, theksohet në kërkesën drejtuar Agjencisë
Kosovare të Privatizimit.
(Autori – kryeradaktor i gazetës Rilindja deri në numrin e fundit dhe në kohën e dëbimit nga Pallati i Rilindjes. Kryetar i Këshillit Drejtues nga zgjedhjet me votim të fshehtë-referendum të 7 Shkurtit 2002, që i mbajtëm për të krijuar legjitimitet përfaqësimi në luftën për të drejtën derisa kishim presionet e ultimatumet e UNMIK-ut për të na dëbuar nga puna dhe Pallati, që ndodhi disa ditë më vonë në 21 Shkurt 2002 dhunëshëm). /KultPlus.com
Ka dhjetë ditë që fëmijët anembanë Kosovës
nuk po mbajnë mësim për shkak të grevës së mësimdhënësve.
Por një mësuese
nga Prizreni ka hequr dorë nga greva për hir të nxënësve. Tash e nëntë ditë,
nxënësit e klasës së dytë të shkollës fillore “Xhevat Berisha” në Prizren po
mbajnë mësim të rregullt.
Mësuesja e cila nuk ka
dashur të flasë para kamerave, ka thënë për TV Prizreni se e përkrahë grevën,
por nuk do që të dëmtohen nxënësit e saj.
Kurse drejtori i kësaj
shkolle, Samidin Ramadani, ka treguar se mësimdhënësja në fjalë hoqi dorë nga
greva qysh në ditën e dytë dhe filloi mësimin.
“Përgjigja ime ka qenë
kështu, të gjithëve iu kam thënë, kush do të mbajë mësim, le të vazhdojë,
kushtet të gjitha do t’i kenë të plotësuara si në çdo ditë tjetër të mësimit.
Pas kësaj përgjigje, ajo ka filluar prej ditës së martë (15 janar) duke mbajtur
mësim”, ka thënë Ramadani për Tv Prizreni.
SBASHK-u ka kërkuar që
koeficienti i pagave për punëtorët e arsimit të rritet 30 përqind, ndërkaq
qeveria i ka ofruar një rritje prej 0.20 përqind.
Ani pse qeveria ka deklaruar se nuk kanë mundësi buxhetore për më shumë rritje, SBASHK-u nuk është tërhequr ende nga greva.
Qendrës së Prizrenit sot i është shtuar një mozaik i ri i cili paraqet imazhin e Skënderbeut. Ky mozaik i realizuar nga Besart Gashi ka për qëllim që të kthej vëmendjen qytetarëve -të cilët do të kalojnë nga pjesa ku është vendosur mozaiku- të një figurë e shquar për kombin shqiptarë.
Realizimi i kësaj pikturë, para të cilës dhjetëra qytetarë ndaluan sot dhe realizuan edhe fotografi në nderim të Gjergj Kastriotit Skënderbe, e bënë shumë krenar realizuesin e saj, Besart Gashin.
“Për mua është nder e krenari që kam pas fatin që për herë të parë për qytetin e Prizrenit ta punoj një figurë për heroin tonë Gjergj Kastrioti Skënderbeu”, është shprehur Gashi për KultPlus.
Mozaiku është punuar me një konstruksion metali dhe me një lloj druri që është rezistues ndaj kushteve atmosferike. Në brendi të mozaikut janë të vendosur edhe dritat për ndriçim të cilat do e bëjnë të identifikueshme këtë vepër edhe gjatë natës. Dimensionet në të cilat është punuar ky mozaik janë 3m × 4m.
“Ideja për realizimin e këtij mozaiku me lindi pasi që më 28 nëntor 1443 u shpall rimëkëmbja e principatës së Kastriotëve. Mbi kështjellën e Krujës u ngrit flamuri me shkabën e zezë dykrenare të Kastriotëve. Për mua si artist më ka motivuar që po në këtë datë 28 Nëntor 2018 mbas 575 viteve të punoj një vepër arti për këtë hero kombëtar pasi që ky vit edhe është shënuar si viti jubilar i Skënderbeut”, ka treguar Gashi për KultPlus.
Kjo vepër artistike nuk është e vetmja që Gashi e ka realizuar. Ai u bë i njohur edhe për portretin e Adem Jasharit të cilin e realizoi me 200 mijë gëzhoja fishekësh. Këtë mozaik ai e përfundoi më 5 mars për nder të Epopesë së Ushtrisë Çlirimtare të Kosovës.
Për realizimin e kësaj vepre, Besart Gashi, është ndihmuar nga mërgimtarët të cilët jetojnë dhe veprojnë në Amerikë./KultPlus.com
Të dielën, me fillim nga ora 15:00, në hapësirën e Kompleksit Monumental të Lidhjes Shqiptare të Prizrenit, do të mbahet ceremonia e zbulimit të shtatoreve të tre liderëve historikë, Ymer Prizrenit, Abdyl Frashërit dhe Sylejman Vokshit.
Në këtë ceremoni, i pranishëm do të jetë edhe kryeministri i Kosovës, Ramush Haradinaj.
Kjo ngjarje është e organizuar në kuadër të shënimit të Vitit Mbarëkombëtar Gjergj Kastrioti Skënderbeu, nën patronatin e Kryeministrit./ KultPlus.com
Ansambli i këngëve dhe i valleve “Isuf Myzyri” nga Elbasani ka marrë çmimin e parë në festivalin dyditor “Kënga qytetare na bashkon në Prizren”.
Ndërsa ansambli “Marinarët nga Ulqini” është renditur i dyti dhe pas tij ansambli “Xheladin Zeqiri” nga Tetova. Ky festival, që është mbajtur për herë të parë në qytetin e vjetër, sipas organizatorëve, ka bashkuar tetë ansamble këngësh nga viset shqiptare. Pas paraqitjes së të gjitha ansambleve, festivali është mbyllur të enjten mbrëma.
informatorin e festivalit shkruan se ky festival është ideuar nga shoqëria kulturo-artistike “Agimi” dhe është përkrahur nga Ministria e Kulturës, Rinisë dhe Sporteve, Drejtoria e Kulturës, Rinisë dhe Sporteve të Komunës së Prizrenit dhe donatorë të tjerë.
“Interesimi për këtë festival ishte i jashtëzakonshëm, për çka një numër i madh i dashamirëve të këngës dhe vlerave të mirëfillta muzikore mbetën jashtë salle”, thuhet në informatorin e festivalit, në saje të së cilit është bërë thirrje për investime në objekte reprezentative kulturore në Prizren.
Aty theksohet se në natën e parë të festivalit në skenë janë paraqitur SHKA “Agimi”, “Marinarët” nga Ulqini, “Dogru Yol” nga Prizreni dhe “Tirana Folk” nga kryeqyteti i Shqipërisë, shkruan KohaDitore./ KultPlus.com
KFOR-i turk në bashkëpunim me Institutin Junus Emre në Prishtinë, Prizren dhe Pejë është duke e organizuar periudhën e dytë të klubit të fotografisë mes datave 10 shtator dhe 17 nëntor 2018.
Klubi i fotografisë së Institutit Junus Emre në Prizren dhe Pejë kishte mbajtur shëtitjen e parë të klubit të fotografisë në vitin 2017. Shëtitja e dytë e klubit të fotografisë u organiızua në bashkëpunim me KFOR-in turk me 23 shtator në qytetin e Gjakovës.
Ky klub dhe shëtitja e titulluar si Foto Safari synon zgjerimin e ndikimit të fotografisë si dhe të mësuarit e teknikave të fotografisë për të gjithë profesionist dhe amatorët. Përveç takimeve dhe shëtitjeve të tilla fotografitë e bëra nga anëtarët e klubeve do të garojnë mes veti dhe pasi të zgjidhen nga juria profesioniste do të kenë edhe shpërblime të ndryshme. Por ajo që është me e rëndësishmja që pjesëmarrësit do të kenë mundësin të përfitojnë në këtë klub prej fotografisë amatore në atë profesioniste, si dhe jemi në dijeni që kanë filluar ta shndërrojnë në punë dhe kanë filluar të fitojnë nga njohuritë që i kanë fituar gjatë këtij klubi.
Në këtë kuadër Foto Safari e katërta e klubit të fotografisë do të mbahet në qytetin e bukur të Prizrenit dhe do të eksplorohen bukuritë natyrale të Prizrenit. Foto Safari do të mbahet me datën 17 nëntor 2018 e shtunë. Në këtë Foto Safari do të takohen anëtarët e tri klubeve të fotografisë së Prishtinës, Prizrenit dhe Pejës nën udhëheqjen e moderatorëve të klubeve. Gjithashtu do të ketë edhe përfaqësues ushtarak të KFOR-it turk, adhuruesit e fotografisë, anëtarë të mediumeve të ndryshme si dhe mysafirë nga Turqia. /KultPlus.com
