Po bën bujë në rrjetet sociale një e diel e kryeministri holandez.
Mark Rutte kishte takim të rëndësishëm dje në Hagë ku pritej të diskutohej për masat e reja në shtetin që ai është kryeministër.
Kryeministri i Holandës nuk dallonte fare nga qytetarët tjerë në asnjë aspekt.
Me veshje sportive, me biçikletë mesatare, me farmerka, bluzë, syzet në kokë, dhe një kafe në dorë, Rutte shkoi në zyre të takonte kabinetin qeverisës.
Shembull i mirë, apo jo?/ KultPlus.com
Vetëm tre ditë pas publikimit të albumit të saj “Anima Rara”, sopranoja shqiptare Ermonela Jaho ndodhet e para në listën e “Warner Classic” “Operat që duhet t’i dëgjosh” në disa nga platformat digjitale si: Spotify, iTunes & Deezer.
Sopranoja jonë me famë botërore Ermonela Jaho e ka rregjistruar këtë album që përmban 70 minuta muzikë, nëntorin e vitit të kaluar në Palau de les Arts Reina Sofia de Valencia (Spanjë)Për këtë album debutues ylli i skenës lirike Jaho bashkëpunoi me “Orquestra de la Comunitat Valenciana” nën drejtimin e dirigjentit Andrea Battistoni.
Albumi “Homazh Rosina Storchio-s. Anima Rara” sjell bashkë në një përmbledhje të vetme muzikën që ka kënduar sopranoja italiane Rosina Storchio, e njohur edhe për krijimin e rolit të Cio-Cio San në kryeveprën e Pucinit “Madama Batërflai” kur ajo u interpretua premierë në vitin 1904 në La Scala të Milanos.
Në këtë përmbledhje Ermonela interpreton ariet e Puçinit (“Un bel dì vedremo”, “Con onor muore… Tu? Tu? Piccolo Iddio” de Madama Butterfly), Leonkavalos (“Musette svaria sulla bocca viva”, “Mimì Pinson, la biondetta” de La bohème), Maskanjit (“Un dì (ero piccina)” de Iris; “Ah! Il suo nome!… Flammen, perdonami” de Lodoletta; “Son pochi fiori” de L’amico Fritz), Massenet (“Pendant un an je fus ta femme”; Prélude Acte V y “Demain je partirai” de Sapho; “Allons! Il le faut… Adieu, notre petite table” nga Manon), Giordano (“Nel suo amore rianimata” de Siberia), Verdi (“Teneste la promessa… Addio del passato” de La traviata) dhe Catalani (“Ebben? Ne andrò lontana” de La Wally).Albumi doli në 25 shtator dhe u lancua fillimisht në orën 18.00 të kësaj date në faqen e FB të Opera Raras.
Ndërkohë “Sopranoja më e famshme në botë” sipas “The Economist”, apo “Madama Batërflai më e mirë që Londra ka parë në shumë vite” sipas “Independent”, e “ Paraqitjes triumfuese në Madama Batërflai” sipas the “Guardian” ndodhet në Greqi.Shfaqja do të mbahet në datën 10 tetor në Sallën Stavros Niarchos të Operës Kombëtare të Greqisë.
Ja si e përshkruante vetë Teatri i Operës së Greqisë pjesëmarrjen e divës shqiptare: “E vetmja Ermonela Jaho, një nga sopranot më të rëndësishme të planetit është tashmë në Athinë për provat Madama Butterfly me Teatrin Kombëtar të Greqisë”.
Të dielën sopranoja shqiptare ishte në kopertinën e revistës “ΒΗΜagazino” e cila i kushtoi një vend të veçantë në faqet e saj me rastin e intervistës së parë të Ermonelës për një media greke.
Shitja e biletave ka nisur tashmë si për këtë shfaqje po ashtu edhe për shfaqjet e sezonit tetor – dhjetorit, te cilat ende rrezikojnë të mos mbahen për shkak të numrit në rritje te rasteve me COVID, cka mund të sjellë një karantinë të dytë për Athinën./ KultPlus.com
Ardianë Pajaziti
Ishte nisur nga Finlanda për në Krakovi të Polonisë dhe nuk e kishte menduar se ai udhëtim do të jetë një udhëtim që do ta ndante për një kohë nga familja e tij, pasi që në mars të këtij viti u mbyllën kufijtë si pasojë e Covid 19.
Arkitekti gjilanas Lulzim Behxheti tregon për KultPlus, për këtë udhëtim që e kishte bërë bashkë me djalin e tij Gencin, por Genci ishte kthyer për në Finlandë, e Lulzimi kishte vazhduar për të përfunduar edhe disa punë të tij, punë që e bllokoi për disa muaj në këtë qytet të Polonisë.
Lulzim Behxheti që tashmë është shndërruar në një figurë të njohur për themelimin e Vjosa Foundation dhe Vjosa Campus, kujton mbylljen e tij në Poloni, dhe mënyrën se si mundohej ta kalonte monotoninë e karantinës dhe pandemisë.
“E realizova një portret të një mikes sime, dhe e njëjta e postoi portretin e saj në Facebook, dhe ky ishte momenti kur filloi gjithçka, komentet rreth atij portreti më motivuan që të realizoj portrete edhe për miq të tjerë, qoftë miq që i njoh prej viteve por edhe atyre virtual, dhe kështu krijova shumë portrete pa ndalë”, tregon Behxheti, i cili tashmë numëron qindra portrete të shumta, duke filluar prej pastruesve të rrugës e deri të figurat më të njohura të kombit shqiptarë, por edhe të huaj, portrete këto që ishin motivacion për themelimin e Vjosa Foundation dhe Vjosa Campus, iniciativë kjo për të ndihmuar personat autik në Kosovë, e që sipas Behxhetit, kushte të tilla mungojnë në Kosovë.
“Nisa me një portret e arrita ku jam tashti, nuk e kam besuar se do të ketë këtë masivitet që ka tashti”, kujton Behxheti, i cili krejt këtë rrugëtim e quan edhe nostalgji në raport me portretet, pasi që, sipas tij, një portret të tillë i kishte realizuar bashkëshortes së tij, 30 vite më parë, në kohën kur e kishte simpatizuar, dhe kjo kampanjë Lulzimin e ktheu sërish te portretet, pasi që brenda kësaj distance kohore, energjinë ia kishte marr arkitektura, dhe pak hapësirë kishte për portrete.
Dhe tashti, kur Lulzim Behxheti realizon edhe më tej portrete, dhe thotë për KultPlus se këto portrete do të vazhdojnë deri sa të vazhdojë Fondacioni Vjosa, ai tashmë ka kaluar në nivelin tjetër, për jetësimin e Vjosa Campus në Kosovë e Shqipëri, e për të cilën është duke punuar shumë, që ta realizojë sa më shpejt.
Emri Vjosa është emri i vajzës së Lulzim Behxhetit, e që është autike, dhe përvoja e tij me vajzën e tij dhe me trajtimin dhe tretmanin e duhur që ka marr në shtetin finlandez, ka bërë që Lulzimi të themelojë këtë fondacion, në mënyrë se sikurse ka pas fat vajza e tij për këtë tretman të lartë të shoqërisë finlandeze, të njëjtin ta kenë edhe personat autik në Kosovë.
“Adoleshenca është fazë jo e lehtë edhe për fëmijët autik, andaj kemi menduar ta themelojmë këtë Fondacion, ku do të punojmë në ngritjen e një kampusi prej 30 shtëpive në periferi të Prishtinës, e që do të kenë sistemin finlandez, sistem që do ti ndihmojë përgjatë trajnimit se si të pavarësohen këta fëmijë. Vjosa e jonë i ka gëzuar këto trajnime në Finlandë, dhe pse mos ti gëzojnë edhe fëmijët autik në Kosovë”, ka thënë Behxheti, i cili këto shtëpi do ti ndërtojë nën brendin e kompanisë së tij “BVG Housing”, pasi që, sipas tij, me sistemin dhe përpunimin e drurit që e praktikojnë në kompaninë e tij, për të cilat kanë shkruar shumë medie prestigjioze, janë shtëpi që ofrojnë standard të lartë jetese, sepse janë të shëndetshme, antibakteriale, me cilësi të ajrit dhe shumë benefite të tjera shëndetësore.
Lulzim Behxehti shpreson që për këtë projekt me sistem finlandez ta mbështesë Komuna e Prishtinës, pasi që, sipas tij këto kampuse nuk duhet të ekzistojnë prej ndihmave, por të kenë mbështetje institucionale. Ai njofton se për realizimin e këtij projekti do të jetë trekëndëshi Vjosa Kampus, familjarët e fëmijëve autik dhe Komunës së Prishtinës, në mënyrë që të jetë funksionalë ky projekt.
Ndryshe, Fondacioni Vjosa tashmë është mbështetë nga shumë organizata botërore, sikurse që ka edhe ambasadorët e kësaj kauze, duke përfshirë Erza Muqollin dhe shumë artistë të tjerë.
Sot, Ambasada e Finlandës në Kosovë ka falënderuar nëpërmjet faqes zyrtare Lulzim Behxhetin për angazhimin dhe iniciativën e tij, duke potencuar se së shpejti do të hapet një ekspozitë me portretet e Behxhetit në Burksel, për të vazhduar më pas në Kosovë./ KultPlus.com
Suada Qorraj
Vendi nuk do të ekzistonte dot pa historinë, të kaluarën, të bëmat, popujt e shumtë që kanë ikur e kanë ardhur, heronjtë, të rënët, themelet mbi të cilat sot ngritet e ardhmja jonë. Historia që shekuj më parë mësohej përmes këngëve e gojëdhënave, tashmë është shkruar në libra, e fillon të mësohet që në ditën e parë kur fëmijët ulen në bankat shkollore, shkruan KultPlus.
Ndonëse për popujt e Ballkanit ekzistonin libra të veçantë që tregonin historinë e secilit vend, themeluesit e OJQ-së “Center for Democracy and Reconciliation in Southeast Europe”, me seli në Selanik, kishin angazhuar historianë nga të gjitha vendet e Ballkanit për hartimin e gjashtë librave mësimorë alternativë të historisë, të titulluar “Projekti i Historisë së Përbashkët”, të cilat tashmë janë botuar në njëmbëdhjetë gjuhë të botës.
Por, në këta libra të botuar në vitin 2016 ekzistojnë mangësi të shumta, shtrembërime të mëdha dhe fshehje të fakteve lidhur me historinë e Kosovës dhe të shqiptarëve që nga periudha e Perandorisë Osmane. Mbase një gjë e tillë do të kishte kaluar nën hije, do mbetej e panjohur për opinionin, sikur të mos fillonte botimi i analizave për këta libra nga Shkëlzen Gashi.
Në një intervistë për KultPlus, Gashi ka treguar se fillimisht ai kishte analizuar librin e gjashtë që flet për luftën e fundit në ish Jugosllavi. Sipas tij, ishte pikërisht prezantimi jo i denjë dhe mungesa e fakteve që e shtyu atë të lexonte edhe librat tjerë dhe të analizonte përfaqësimin e historisë së Kosovës në to.
“Vitin e kaluar lexova vetëm librin e gjashtë se më interesonte të shoh se si janë prezantuar luftërat e fundit në ish Jugosllavi, e sidomos lufta në Kosovë. Lufta e fundit në Kosovë ishte prezantuar shumë keq, prandaj dhe e bëra një shkrim për të. Pas publikimit mendova që është më mirë të analizohen se si prezantohen shqiptarët edhe në pesë librat e tjerë”, ka pohuar ai.
Ai ka shtuar se është e rëndësishme që të analizohen këta libra dhe të shihet se si prezantohet Kosova, sepse këta libra të shkruar në anglisht, tashmë janë përkthyer në gjuhët e të gjitha vendeve të Ballkanit, madje edhe në japonisht. Gashi ka thënë se rëndësia e analizimit të këtyre teksteve qëndron edhe në faktin që Kosova e ka pasur përfaqësuesin e saj në Selanik dhe ka dhënë pëlqimin për përdorimin e tyre.
Të gjashtë librat u promovuan në shumë nga kryeqytetet e vendeve rajonale, e edhe në Prishtinë në vitin 2018, ku pjesëmarrës në këtë promovim ishte edhe bashkautori i këtyre librave, akademiku Frashër Demaj.
Shkëlzen Gashi ka pohuar se nuk ka mundur ta besoj që autori i cili ka prezantuar Kosovën në këtë projekt, Frashër Demaj, nuk i ka prezantuar krimet e forcave serbe ndaj shqiptarëve, përderisa në librat shkollorë në Kosovë ai i ekzagjeron këto krime.
“Kam kritikuar tekstet mësimore të historisë në Kosovë, autor i të cilave është Frashër Demaj, i cili ka marrë pjesë në këtë projekt në Selanik. Kam kritikuar këto tekste për shumë arsye: këto tekste përmbajnë gjuhë të urrejtjes, pasaktësi e ekzagjerime. Në librat tonë të historisë krimet që janë kryer nga shteti serb ndaj shqiptarëve të Kosovës prej vitit 1878 e deri më 1999 dyfishohen. Kam problem me tekstet e hartuara në Kosovë sepse i ekzagjerojnë këto krime, por edhe me tekstet e hartuara në Selanik sepse nuk i prezantojnë fare këto krime, te cilat duhet të prezantohen saktë. Si të shpjegohet që i njëjti person – Frashër Demaj – në Prishtinë i dyfishon krimet e forcave serbe, në Selanik nuk i prezanton fare?”, ka thënë ai.
Sipas tij, Frashër Demaj duhet të bëjë një distancim publik, jo vetëm moral por të bëjë një distancim duke u dërguar letra botuesve të librit dhe të kërkoj ndryshimin e këtyre teksteve.
“Ky duhet jo një distancim publik veç moral, por duhet ta bëjë një distancim duke ju dërguar letër të gjithë përfaqësuesve në Selanik, duke kërkuar jo vetëm distancim por edhe ndryshim të këtyre teksteve”, ka thënë Gashi.
Shkëlzen Gashi për KultPlus ka dhënë disa nga pikat kryesore të analizës që i ka bërë deri më tani, prej aty që janë publikuar e deri tek ato që priten të publikohen gjatë javëve në vazhdim.
Në librin e parë mungojnë faktet për kryengritjet shqiptare kundër Perandorisë Osmane të udhëhequra nga Skënderbeu, nuk përmenden fare kryengritjet e shqiptarëve, nuk jepen fakte se si shqiptarët arritën të bëheshin pushtetarë në pozita të larta gjatë kohës së Perandorisë Osmane. Madje, shqiptarët përgjatë këtij libri shfaqen si ushtarë që punonin me pagesë dhe u ndihmonin ushtrive të armikut si dhe prezantohen si njerëz që nuk dinin se ç’është dashuria, e madje edhe i përbuznin gratë. Kurse gratë shqiptare paraqiten të paarsimuara që nuk flisnin gjuhë tjetër përpos asaj amtare.
Kurse në librin e dytë të kësaj serie gjashtë pjesëshe nuk theksohet synimi i vërtetë i Rilindjes Kombëtare Shqiptare, mungojnë të dhënat për dëbimin e shqiptarëve nga trevat e Sanxhakut të Nishit, mungojnë elementet kryesore të Vendimit të Gjykatës Ndërkombëtare të Drejtësisë të vitit 2010, se Deklarata e Pavarësisë së Kosovës është në përputhje me të drejtën ndërkombëtare. E mbi të gjitha, mungon edhe shpjegimi për domethënien e flamurit të Kosovës, vetë flamuri i Kosovës, të dhënat për himnin dhe stemën e saj.
Edhe në librin e tretë ekziston një numër i madh i pasaktësive, por edhe i mosprezentimit të fakteve. Në këtë pjesë, shqiptarët fajësohen për humbjen e forcave osmane përgjatë luftërave ballkanike, nuk ka të dhëna për krimet e forcave serbe dhe malazeze ndaj shqiptarëve, si dhe figurojnë të dhënat për viktimat e të gjitha vendeve përgjatë luftërave ballkanike, përjashtuar shqiptarët. Libri i katërt i këtij vëllimi “Lufta e Dytë Botërore” nuk përmban asgjë për Kosovën dhe shqiptarët në ish Jugosllavi.
Ndërkaq, në librin e pestë ku trajtohet periudha prej Luftës së Dytë Botërore e deri tek rënia e Ministrit të Brendshëm të Jugosllavisë, Aleksander Rankovic më 1966 nuk jepen të dhëna për Kosovën dhe shqiptarët në Jugosllavi. Në këtë libër edhe demonstratat e vitit 1968 trajtohen në mënyrë krejtësisht sipërfaqësore. Nuk ekzistojnë as të dhëna për reformën agrare që preku edhe shqiptarët e Kosovës, si dhe nuk ka të dhëna mbi faktin se si regjimi serb nxiti myslimanët e Kosovës të deklaroheshin si turq, duke e fryrë kështu numrin e turqve në vend.
Dhe në fund, në librin që edhe e shtyu Shkëlzen Gashin që të bëjë një analizë më të detajuar të këtij vëllimi, pra në librin e gjashtë, ‘Luftërat, Ndarjet dhe Integrimi’, lufta e fundit në Kosovë nuk paraqitet me faktet që kanë ndodhur, tentohet të bëhet fshehja e tyre dhe njëkohësisht zbehja e tyre.
Shkëlzen Gashi ka pohuar se në librin e gjashtë prezantohen vetëm dy monumente, që të dyja në Serbi, kurse për masakrën e Reçakut, të vetmen që prezantohet në këtë libër, thuhet se ishte vetëm një incident.
“Tek lufta e fundit në Kosovë prezantohen dy memoriale për luftën në Kosovë, por të dyja janë në Serbi. Prezantohet një monument për punëtoret e vrarë të Radio Televizionit të Serbisë që janë vrarë prej bombardimeve të NATO-s dhe një memorial në një park në Beograd për fëmijët e vrarë si pasojë e bombardimeve të NATO-s. Nuk prezantohet asnjë memorial nga Kosova. Për më shumë, nuk prezantohet asnjë prej masakrave në Kosovë, përveç masakrës së Reçakut, madje edhe për të thuhet se ishte incident, masakër kontraverse, sepse ka dy versione: versioni i shqiptarëve dhe i ndërkombëtarëve në njërën anë, dhe versioni serb në anën tjetër. Kjo është shumë shqetësuese”, ka shtuar tutje ai.
Në librin e gjashtë të këtij vëllimi theksohet se ishin sulmet e UÇK-së ato që sollën migrimin e popullsisë serbe. Kurse për dëbimet e mbi 80% të kosovarëve thuhet se u bë gjatë bombardimeve të NATO-s, por nuk jep të dhëna se kush i dëboi refugjatët gjatë luftës. Madje, në këtë libër tregohet edhe për shkatërrimin e 39 kishave ortodoksë serbe pas luftës në Kosovë, por nuk jepen të dhëna që ishin kosovarët ata që me taksat e tyre mundësuan renovimin e tyre. Lufta e fundit ilustrohet vetëm me dy fotografi, që të dyja për dëmet në Serbi nga bombardimet e NATO-s. Kurse për të dënuarit dhe të liruarit nga Tribunali i Hagës për ish Jugosllavinë, përmendet vetëm aktakuza për krime kundër njerëzimit ndaj Millosheviq, por jo edhe lirimi i komandantëve të UÇK-së.
Shklëzen Gashi ka thënë se pas publikimit të të gjithë artikujve duhet të reagojnë të gjitha institucionet përgjegjëse në Kosovë e në Shqipëri. Ai ka shtuar se është i nevojshëm edhe distancimi nga ana e BE-së, meqenëse këta libra janë të financuar prej BE-së. Madje, ai ka pohuar se ekziston një tendencë e ndërrimit të versionit në gjuhën shqipe të këtyre librave.
“Kur të përfundon publikimi i këtyre artikujve do të ishte mirë që të reagonin Instituti i Historisë në Prishtinë e Instituti i historisë në Tiranë, Akademia e Shkencave dhe e Arteve e Kosovës dhe Akademia e Shkencave e Shqipërisë, komisionet parlamentare për Arsim të të dyja vendeve dhe ministritë e Arsimit të të dy vendeve. Ka pasur një tendencë për ta ndryshuar versionin shqip të këtyre librave, por gjëra triviale”, ka thënë tutje ai.
Gashi krejt në fund ka shtuar se pas publikimit të artikujve do të bëhet përmbledhja e tyre në një libër të vetëm nga “ADMOVERE”, me mbështetje nga Ambasada e Zvicrës në Kosovë dhe do t’u dorëzohet Instituteve të Historisë në Kosovë e në Shqipëri, Instituteve Albanologjike, Akademive të Shkencave, Komisioneve Parlamentare për Arsim, Ministrive të Arsimit, e edhe Ministrive të Jashtme.
KultPlus ka kontaktuar edhe Frashër Demaj, por ky i fundit nuk i është përgjigjur pyetjeve të bëra nga ana e redaksisë tonë./ KultPlus.com
Është ndarë nga jeta në moshën 83-vjeçare dirigjentja e parë shqiptare, Rozmari Jorganxhi. E ëma e kantautorit Gjergj Leka ka ndërruar jetë në Trieste të Italisë.
Rozmari Jorganxhi ka nisur karrierën e saj që në vitin 1959 si soliste lirike. Ishte “mezzosoprano” në TOB dhe ka interpretuar me profesionalizëm në nivele të larta role nga operat ndërkombëtare, por edhe ato kombëtare. Nga viti 1967-1984 ajo ka dirigjuar Korin e TOB duke qenë femra e parë dirigjente e këtij institucioni unik të kulturës shqiptare.
Më 1993 Jorganxhi në moshën 56-vjeçare fiton audicionin dhe fillon si këngëtare profesioniste në Teatrin Giusepe Verdi të Triestes ku këndoi për 10 vjet. Zonja Jorganxhi ka dhënë dekada mësim në Universitetin e Muzikës duke i dhënë kulturës shqiptare emra artistësh si në fushën e dirigjimit ashtu edhe në atë të kantos. / KultPlus.com
Të gjithë çmimet do të shpallen live në nobelprize.org
Institucioni i dhënies së çmimeve ka vendosur të shpallë vendimet si më poshtë:
FIZIOLOGJI OSE MJEKËSI – e Hënë 5 tetor, 11:30
The Nobel Assembly te Karolinska Institutet, Wallenbergsalen, Nobel Forum, Nobels väg 1, Solna
http://www.nobelprizemedicine.org
[email protected]
FIZIKË – e martë 6 tetor, 11:45
The Royal Swedish Academy of Sciences (Kungl. Vetenskapsakademien, KVA), Sessionssalen, Lilla Frescativägen 4A, Stockholm
www.kva.se/pressroom
[email protected]
KIMI – e mërkurë 7 tetor, 11:45
The Royal Swedish Academy of Sciences, Sessionssalen, Lilla Frescativägen 4A, Stockholm
www.kva.se/pressroom
[email protected]
LETËRSI – e enjte, 8 tetor, 13:00
The Swedish Academy (Svenska Akademien), Börssalen, Källargränd 4, Stockholm
http://www.svenskaakademien.se/en
[email protected]
PAQE – e premte, 9 tetor, 11:00
The Norwegian Nobel Committee, The Norwegian Nobel Institute (Norska Nobelinstitutet), Store Sal, Henrik Ibsens gate 51, Oslo
https://www.nobelpeaceprize.org
[email protected]
ÇMIMI SVERIGES RIKSBANK NË SHKENCA EKONOMIKE NË KUJTIM TË ALFRED NOBEL – e hënë, 12 tetor, 11:45
The Royal Swedish Academy of Sciences, Sessionssalen, Lilla Frescativägen 4A, Stockholm. / KultPlus.com
Sot, Letërsia për Fëmijë humbi një nga autoret më përfaqësuese të saj.
Lajmi u bë i ditur nga Qendra Kombëtare e Librit dhe Leximit, e cila e konsideronte veprën e Vretos si një vepër që do të mbetet gjithnjë pjesë e Bibliotekës së Librit Shqip.
”QKLL u shpreh ngushëllimet më të sinqerta familjarëve!”, thuhet tutje në njoftim.
Vreto ishte autore e disa librave për fëmijë. Ajo ka bërë disa skenarë për filmat artistikë dhe për filmat e animuar. Në vitin 1978 ka shkruar skenarin e filmit vizatimor “Mirela”. Në vitin 1981 së bashku me Xhanfizé Kekon kanë realizuar skenarin e filmit “Kur xhirohej një film”. Pas pesë vjetësh vjen e vetme si autore në realizimin e filmit “ Fillim i vështirë”.
Vreto poashtu me Petrit Rukën ka bashkëpunuar edhe në filmin “Një djalë dhe një vajzë” në vitin 1990.
Disa nga librat që ka shkruar Vreto janë: “Shokë Shkolle”, “Vit i paharruar” etj. Pas viteve 1990 ka ideuar “Sirena e vogël” dhe “Bota ime”. Gjithashtu ka drejtuar një bibliotekë për fëmijë, për 12 vjet rresht. / KultPlus.com
Seriali spanjoll “La Casa de Papel” u bë hit në vitin 2017, ndaj jo më kot u ble nga Netflix duke u kthyer në serialin më të shikuar jo në gjuhën angleze.
Më poshtë mund të lexoni këshillat e suksesit dhe sipërmarrjes që mund të fitoni nga “La Casa de Papel”.
1 – Dëshira e zjarrtë
Profesori kishte një dëshirë të madhe për të grabitur Royal Mint of Spain, si një dedikim për të atin e ndjerë. Disa studime thonë se 90% e sipërmarrjeve dështojnë në vitin e parë. Napoleon Hill e cilësoi dëshirën si hapin kryesor drejt pasurisë te “Mendo dhe bëhu i pasur”. Niçe shprehej se “ai që ka një arsye për të jetuar, do të përballojë pothuajse çdo gjë”. Me pak fjalë, nëse nuk zgjoheni me dëshirë të zjarrtë për të patur sukses, nuk do ta keni.
2 – Besimi ju çon larg
Kurdoherë që komunikimi mes profesorit dhe ekipit kishte probleme, ky i fundit i bindte se ai do të kthehej. Besimi ka rëndësi në një ekip sepse i paraprini suksesit. Nëse doni të shkoni larg, kini besim te vetja dhe të tjerët.
3 – Fuqia e vizualizimit
Stephen Covey në “7 zakonet e njerëzve shumë efektivë” shkruante se gjërat krijohet dy herë. Në fillim është krijimi mendor, ose i parë, dhe më pas është krijimi fizik, ose i dytë. Sa më shumë kohë të shpenzoni duke e menduar nismën tuaj, aq më të lehtë do ta keni ta krijoni fizikisht.
4 – Planifikimi me detaje
Profesori është padyshim një shahist me përvojë. Fuqia e tij qëndron te planifikimi me detaje. Sa më i fortë të jetë plani juaj i punës, aq më pak probleme do të keni.
5 – Të qenurit markë e rëndësishme te zemrat e njerëzve
Një rregull i rëndësishëm në “La Casa de Papel” ishte të mos kishte gjakderdhje. Qëllimi i tyre ishte që të mos dilnin si bandë kriminale, por si Robin Hood. Kjo gjë lidhet me mënyrën si konsumatori ju sheh dhe ju përcakton. E ne të gjithë e dimë se konsumatori është mbret.
6 – Qëndrueshmëria
Kur qëllimet tuaja forcohen dhe në të njëjtën kohë copëtohen në plane të mirëfillta ditore, gjithçka është më e lehtë. Sipërmarrësi amerikan Jim Rohn deklaronte se “Suksesi nuk është magjik dhe misterioz. Suksesi është pasojë e zbatimeve të vazhdueshme të gjërave themelore”.
7 – Këmbëngulja
Pavarësisht gjithë taktikave të policisë spanjolle, Berlini gjithnjë thoshte “ne i përmbahemi planit”. Të tejkalosh vështirësitë është ajo që ndan të suksesshmit nga ata që “duan të jenë të suksesshëm”.
8 – Udhëheqja
Vjen një moment kur duhet të delegoni punët, të motivoni ekipin. Vetëm mos harroni që udhëheqja fillon më së pari nga vetja.
9 – Bashkëveprim
Në sezonin e tretë, Berlini i thotë Palermos se “do të përdorin talentin dhe shkencën”. Asgjë nuk arrihet vetëm dhe suksesi është padyshim bashkëveprim me njerëz që dinë të bëjnë mirë diçka të caktuar.
10 – Barazpesha
Nëse e keni parasysh, Profesorit iu desh shumë kohë që të krijonte një lidhje, pasi ishte shumë i dhënë pas planit të tij. Barazpesha mes punës dhe jetës personale ka rëndësinë e vetë ndaj mos e anashkaloni. /am/ KultPlus.com
“Ushqim për të Gjithë” u quajt organizimi që u mbajt më 20 shtator në Jerome Avenue, në lagjen Bedford Park në Bronx.
Ngjarja u organizua nga Aleksander Nilaj, themelues dhe president i Shoqatës Shqiptaro Amerikane “Albanian American Open Hand Association Inc. (AAOHA)” si dhe me ndihmën e organizatës vullnetare “Bake Back America”, Miriam Quiñones reportere dhe fotografe në “Noreood News”, dhe Melisa Subin nga “Subin Associates, LLP”.
Rreth 80 kuti me ushqime të thata dhe të freskëta iu dhanë rreth 75 banorëve vendas.
Shoqata Shqiptaro Amerikane “Albanian American Open Hand Association Inc. (AAOHA)” ka planifikuar shpërndarje të ngjashme ushqimore në Bronx për muajt në vazhdim dhe planifikon të bëjë më shumë në të ardhmen pasi pasiguria ushqimore vazhdon të jetë një shqetësim pas rënies ekonomike të shkaktuar nga pandemia e koronavirusit.
Aleksander Nilaj, u pa duke shpërndarë kuti me ushqime ditën, së bashku me disa lodra për fëmijë. Një “frigorifer për komunitetin” i mbushur me ushqime të paketuara ishte një tjetër risi në këtë ditë.
Mesazhi i përcjell nëpërmjet nismës “Frigoriferë për komunitetin” konsistonte në faktin që njerëzit mund të marrin atë që duan prej tyre dhe gjithashtu donatorët mund të dhurojnë ushqim dhe ta vendosin brenda për ta marrë të tjerët pa asnjë kosto. Sidoqoftë, njerëzit janë informuar që të mos lënë qumësht ose mish të gjallë.
Pothuajse të gjithë organizatorët dhe marrësit e ushqimit u panë duke mbajtur maska për të respektuar rekomandimet në lidhje me zvogëlimin e përhapjes së koronavirusit, ndërkohë që raportimet për një valë të dytë vazhdojnë në të gjithë botën.
Kutitë e ushqimeve të shpërndara u përgatitën nga “Great Performance” dhe sponsorizuan nga Shoqata Shqiptaro Amerikane e Duarve të Hapura “Albanian American Open Hand Association Inc. (AAOHA)”.
Miriam Quinoñes ishte e kënaqur me suksesin e ngjarjes dhe lëshoi një mesazh falënderimi në faqen e saj në Facebook.
“Aleksander Nilaj dhe unë falënderojmë të gjithë ata që erdhën për të ndihmuar në këtë nismë. Ne shpërndamë 80 kuti me ushqim. Zoti ju bekoftë të gjithëve. ” shkroi ajo. / KultPlus.com
Poetja shqiptare, Irma Kurti është vlerësuar me çmim të parë në Konkursin Ndërkombëtar “Universum Academy” në Zvicër në seksionin e poezisë së botuar.
Ajo konkuroi me librin me poezi në gjuhën italiane: “In una stanza con i ricordi” (Në një dhomë me kujtimet), i botuar në vitin 2019 nga Pedrazzi Editore.
Lajmin e bëri të ditur vetë poetja, përmes një postimi në llogarinë e saj personale në rrjetin social Facebook, ku u shpreh mjaft e gëzuar për marrjen e këtij çmimi.
“Jam e gëzuar për marrjen e këtij çmimi jo vetëm pse është një vlerësim për krijimtarinë time” thotë ajo, “po edhe pse isha e pranishme në ceremoninë e shpërndarjes së çmimeve, që ndonëse me vonesë, për arsye të pandemisë, u organizua në Montesilvano, Pescara, pak ditë më parë. Këtë çmim ia dedikoj prindërve të mi, Hasan e Sherife Kurti për mbështetjen e madhe që më kanë dhënë në çdo hap të rrugëtimit të gjatë letrar, por gjithashtu të gjithë dashamirësve, që më ndjekin e më inkurajojnë në këtë udhëtim të bukur e të vështirë”, shprehet Kurti në postimin e saj në Facebook.
Irma Kurti ka botuar 20 libra në gjuhën shqipe 12 libra në italisht, ndër të cilat poezi, tregime e romane. Librat e saj janë përkthyer dhe në gjuhën angleze, spanjolle, rumune etj. / KultPlus.com
Për herë të parë në historinë e organizimit të Javës së Modës në Milano, një shou i tërë dedikuar disenjatorëve italian me ngjyrë, ishte pjesë e kalendarit zyrtarë të kësaj ngjarje, dhe organizatorët shpresojnë se do ta theksojë mungesën e diversitetit në industrinë e modës.
Shou digjital me titull “We are Made in Italy”, u transmetua online të dielën më 27 shtator si dhe i shfaqi koleksionet Pranverë/Verë 2021 të pesë disenjatorëve të përzgjedhur zezak të cilët në të kaluarën kishin hasur në vështirësi për të depërtuar në këtë industri, transmeton KultPlus.
Ngjarja u organizua nga anëtarët e lëvizjes “Black Lives Matter” brenda kolektivit të modës në vend, dhe anëtarja e vetme me ngjyrë në këshillin italian të modës, disenjatorja Stella Jean, e cila vazhdimisht ka bërë fushatë kundër racizmit në botën e modës.
“Është shumë e rëndësishme për ne t’i tregojmë botës se rrobat e prodhuara në Itali nuk i takojnë një race, ngjyre apo komuniteti të caktuar. Ne duam t’i shkatërrojmë idetë paragjykuese në këtë industri, se të qenit Italian do të thotë të jesh i bardhë”, citohet të ketë thënë Jean për Reutersin.
Në mesin e pesë disenjatorëve që i shfaqën koleksionet e tyre në këtë ngjarje ishin: Fabiola Manirakiza, Mokodu Fall, Claudia Gisele Ntsama, Karim Daoudi dhe Joy Meribe.
Sfilata digjitale e xhiruar në sheshin “Palazzo Clerici” të Milanos, përfundoi me një video-montazh të disenjatorëve pjesëmarrës dhe me Stella Jeanin e cila me krenari thotë: “Italia është krijuar nga ne”. / KultPlus.com
Në një ekspozitë fotografike në heshtje edhe pa shumë bujë, përkujtohet në Muzeun Historik Kombëtar një ndër pionieret e kinematografisë dhe teatrit shqiptar, Marie Logoreci në 100-vjetorin e lindjes.
Artistja, që i dha shpirtin e saj artit, kujtohet përpos të birit Pjetër Logoreci, i cili ka organizuar së largu gjithçka, në pamundësi për të ardhur për shkak të Pandemisë Covid 19 në Shqipëri, edhe nga një tjetër i afërm, Franko Kovaçi, i cili përpos roleve kujton edhe vlerat e saj njerëzore.
“Një datë simbolike për një artistë, që për mua më shumë se artiste, ishte një njeri i ngrohtë që nuk të krijonte strese. Por, përpos aktore ka qenë edhe këngëtare edhe piktore”, thotë i afërmi i saj, Franko Kovaçi.
Përmes artit magjik, aktorja e qindra roleve e konsideruar nga kritika, si ‘realiste edhe me personalitet’ ka gdhendur portretin e gruas dhe nënës shqiptare, të malësores me karakter të fortë, veçmas në zonat e Veriut, si Lokja tek “Detyrë e posaçme”, Alisa tek “Rrënjët e thella”, Gjela te “Përmbytja e madhe”, apo të tjera role në teatër tek “Cuca e Maleve” dhe “Halili dhe Hajëria”.
“Shpresoj që ekspozita të ketë frekuentim, që brezi i ri të njihet më mirë, me disa figura që kanë lënë gjurmë në artin shqiptar. Lokja është një ndër personazhet më të kompletuar të saj. Edhe tek Çucat e Maleve, devotshmëria që shfaqte në interpretim ishte mbresëlënëse”, shprehet Franko Kovaçi, gjatë ekspozitës që do të qëndrojë hapur në Muzeun Historik Kombëtar deri në datë 2 tetor.
Marie Logoreci është shuar para 30 vitesh. Mban titujt “Nder i Kombit” dhe “Artiste e Popullit”. /shqiptarja/ KultPlus.com
Identikidi në foto është një punë përfundimtare e teknologjisë, referuar mbetjeve që i përkasin sundimtares së Egjiptit. Gjithsesi idealizimet artistike janë rrekur të sjellin modelin e përsosur të gruas, e cila rrëmbeu zemrën e e Jul Çezarit dhe Mark Antonit. Sipas filozofit të madh grek, Plutarku, ajo ishte argëtuese për të biseduar me të.
“Për bukurinë e saj, siç na u tha, në vetvete nuk ishte fare e pakrahasueshme, as e tillë që të godiste ata që e shihnin; por biseda me të kishte një bukuri të parezistueshme, dhe prania e saj, e kombinuar me bindjen e ligjërimit të saj dhe karakterit e cila ishte disi e shpërndarë në lidhje me sjelljen e saj ndaj të tjerëve, kishte diçka stimuluese për të. Kishte ëmbëlsi edhe në tonet e zërit të saj; dhe gjuha e saj, si një instrument me shumë tela, ajo mund të kthehej me lehtësi në cilëndo gjuhë që dëshironte … ” / Albert Vataj/ KultPlus.com
Ministrja e Kulturës, Rinisë dhe Sportit, Vlora Dumoshi, ka pritur në takim Ambasadorin e Italisë në Kosovë, Nicola Orlando, me të cilin bisedoi për çështje që janë të interesit të përbashkët.
Ministrja Dumoshi e falënderoi ambasadorin dhe nëpërmjet tij edhe shtetin e Italisë dhe popullin e saj, për kontributin që ka dhënë në forcimin e shtetit të Kosovës. Ministrja tha se lidhshmëria e MKRS-së me ambasadën është në raport shumë të ngushtë ngase mund të konkretizohen shumë punë dhe ministrja ka thënë se beson që bashkërisht do t’i shtyjmë para shumë projekte në fushën e kulturës e të trashëgimisë.
Si temë bosht e takimit ishte marrëveshja e cila pritet të nënshkruhet për bashkëpunim në fushën e kulturës mes Republikës së Kosovës dhe Italisë.
“Me konkretizimin dhe nënshkrimin e marrëveshjes i hapet rrugë një bashkëpunimi konkret dhe thellimit të raporteve mes dy vendeve. Aty mund të hyjnë çështje konkret si një kalendar i përbashkët kulturor Kosovë-Itali, ku do të mund të përfshiheshin edhe arbëreshët në këtë bashkëpunim”, tha ndër të tjera ministrja Dumoshi.
Ndër të tjera, ministrja e njoftoi ambasadorin edhe për pjesë të programit që ka MKRS-ja për zhvillimin e kulturës dhe të trashëgimisë dhe për hapat konkret që ka ndërmarrë ministria sikurse është pasurimi i fondit të trashëgimisë shpirtërore duke futur asete të reja në kuadër të këtij fondi.
Ministrja tha se është e gatshme që me ambasadën të kemi një bashkëpunim shumë të ngushtë me zhvillimin e projekteve konkrete në të ardhmen ku përfshihen edhe investimin në kuadrot e reja pasi që MKRS-ja veçse ka nënshkruar një memorandum me Universitetin e Prishtinës për mbështetje të edukimit të kuadrove të reja në fushën e trashëgimisë, ekspertizë të cilën Italia e posedon dhe Kosova mund të përfitojë në këtë drejtim.
Ndërkaq, ambasadori Orlando e falënderoi ministren dhe e vlerësoi për idetë e shumta e të mira që janë në interes për Kosovën. Ai tha se pajtohet që marrëveshja për bashkëpunim në fushën e kulturës mes Kosovës e Italisë duhet të nënshkruhet sa më parë dhe se ai po mban kontakte me Romën zyrtare që kjo gjë të konkretizohet.
Ambasadori Orlando konfirmoi se bashkëpunimi mund të konkretizohet përmes ekspertëve dhe konsulentëve, përmes komunikimeve, videokonferencave dhe vizitave të ndryshme studimore.
Në këtë takim, palët u pajtuan që hapi i parë është konkretizimi i marrëveshjes me nënshkrimin e saj, si dhe mundësia për bashkëpunim në projektet konkrete në të ardhmen. / KultPlus.com
Foto: Daily MIrror
Gjysmë million peshkaqenë mund të therën për t’ua marrë një përbërës që mund të përdoret kundër koronavirusit.
Sipas mediave të huaja, “squalene” është një vaj natyral i përpunuar në mëlqinë e peshkaqenëve, është duke u përdorur në disa prej vaksinave që po zhvillohen aktualisht ndaj koronavirusit.
Kjo substancë është duke u përdorur edhe sot në mjekësi, gjë që rrit efektivitetin e vaksinave për krijimin e një reagimi më të lartë imunitar, shkruan metro.co
Gjigani i njohur britanik i barnave GlaxoSmithKline po e ka aplikon këtë përbërës tek vaksinat e gripit të zakonshëm ndërsa ka shtuar se do të prodhonte edhe një milliard doza të vaksinës me këtë vaj.
Sipas raportimeve të huaja, rreth 3 mijë peshkaqenë iu nevojiten shkenctarëve për të nxjerrë një ton squalenë.
Ndersa, një shoqatë e peshkaqenëve në Kaliforni ka deklaruar se duhen afro 250 mijë peshkaqenë për t’ia siguruar gjithë botës një dozë të vaksinës.
Piotr Cywinski, drejtori i muzeut shtetëror polak ”Auschwitz-Birkenau”, i shkroi presidentit të Nigerisë përmes Twitter-it duke i kërkuar faljen e një djaloshi 13-vjeçar, i dënuar me 10 vjet burg për blasfemi.
“Si drejtor i Memorialit të Aushvicit, i cili përkujton viktimat dhe ruan eshtrat e Kampit të Përqendrimit dhe shfarosjes naziste gjermane, ku fëmijët u burgosën dhe u vranë, unë nuk mund të qëndroj indiferent ndaj këtij vendimi të turpshëm për njerëzimin,” shkroi Cywinski.
Një kopje e letrës drejtuar presidentit nigerian, Muhammadu Buhari për çështjen 13-vjeçar, Omar Farouk u postua në llogarinë në Twitter të muzeut Auschwitz.
Në këtë letër, drejtori i muzeut deklaroi se ‘’ishte i gatshëm të vuante një pjesë të dënimit të djalit, nëse rezulton se fjalët e kësaj fëmije kërkojnë absolutisht 120 muaj burg’’.
‘’Nëse nuk jeni në gjendje ta ndryshoni atë, unë sugjeroj që në vend të fëmijës, 120 vullnetarë të rritur nga e gjithë bota, të mbledhur nga unë personalisht, ndërkohë që do të jem në mesin e tyre, të shërbejmë secili një muaj në një burg nigerian”, shkroi drejtori Cywinski.
Adoleshenti 13-vjeçar u dënua me 10 vjet burg me punë të rëndë të detyruar sepse gjatë një përleshjeje me një shok klase në shkollë ai përdori fjalë të konsideruara blasfemi në lidhje me Allahun.
Në 12 shtete nigeriane, kryesisht në veri të vendit ku ligji i sharias është në fuqi, blasfemia mund të dënohet me dënim me vdekje, pavarësisht se qeveria nigeriane ka deklaruar tërheqjen nga dënimi, katër vjet më parë.
Rasti i Farouk ka shkaktuar protesta në të gjithë botën. Më 16 shtator, përfaqësuesi i UNICEF në Nigeri, Peter Hawkins, paraqiti një protestë zyrtare te presidenti i vendit, duke treguar se Nigeria ishte nënshkruese e traktateve për të drejtat e fëmijëve/PAP / KultPlus.com
Ministri i Shëndetësisë, Armend Zemaj, sot është takuar me estradën. Ai njoftoi se ata do të përfshihen në paketën ekonomike, për kompensim.
Ai tha se rekomandimet që mori sot do t’i shtrojë për diskutim që masat e marra të prekin sa më pak ata dhe të jenë sa më të lehta për të gjithë, edhe për artistët.
Njoftimi i plotë:
Në një takim me estradën, theksova se ndjejmë përgjegjësinë për mbarëvajtjen e shëndetit publik dhe shëndetësisë, duke u kujdesur me tërë mundësitë që të pengojmë sëmundjet, para shërimit. Të tilla janë edhe masat anticovid.
Ato vendime, janë jo çdo herë të lehta, por domosdo duhet respektuar.
Sigurisht, rekomandimet e marra gjatë takimit të sotëm, do t’i shtroj për diskutim që masat e ndërmarra të prekin sa më pak ata dhe të jenë sa më të lehta për të gjithë, edhe për artistët.
Besoj, ceka në takim, me paketën ekonomike të gjitha veprimtaritë që janë dëmtuara nga pandemia duhet të përfshihet për kompensim.
Punë të përbashkët, rezultate të përbashkëta andaj vlerësimi e pastaj edhe përgatitja për ecjen më tej do te jenë fokus i punës sonë të përbashkët!
Secili të japim maksimumin për ta luftuar virusin. / KultPlus.com
Në raundin e parë të votimit nga 96 deputetë që kanë votuar për Avokatin e Popullit, 27 fletë votime kanë qenë të pavlefshme.
Edona Hajrullahu që sipas vlerësimit të Komisionit intervistues ka qenë kandidatja më e pikëzuar, ka marrë 17 vota dhe është eliminuar nga gara.
Kurse dy kandidatë që në rundin e parë kanë marrë më së shumti vota Naim Qelaj, 29 vota dhe Xhavit Shala ka marrë 23 vota, kanë garuar në rsundin e dytë të votimit.
Në rundin e dytë të votimeve nga 66 deputetë që kanë votuar, Naim Qelaj ka marrë 32 vota kurse Xhavit Shala 22 vota, ndërsa 12 fletëvotime kanë qenë të pavlefshme.
Në rundin e tretë të votimeve nga 93 deputetë sa kanë votuar, Naim Qelaj ka marrë 69 vota dhe është zgjedhur Avokat i Popullit. / Indeksonline/ KultPlus.com
Gjinekologia nga Gostivari, Hatije Ismaili sot dekorohet nga presidenti i Republikës së Sllovenisë, Borut Pahor, me çmimin “Mjeku më i mirë në gjithë Sloveninë”. Ajo falë numrit të lartë të pikëve u shpall fituese edhe e çmimit “Mjeku më i mirë i Slovenisë”. Ky çmim përfaqëson një akt krenarie jo vetëm për Gostivarin, vendlindjen e saj, por për mbarë shqiptarinë, shkruan Authentic Press.
Hatije Ismaili, u lind në Gostivar ku edhe kreu shkollën fillore, në Sh.F. Ismail Qemali (Mosha Pijade – asokohe) dhe dy vitet e para të shkollës së mesme. Më pas, u transferua në shkollën e mesme të mjekësisë në Mitrovicë ku kreu vitin e tretë, ndërsa të katërtin e kreu në shkollën e mesme të mjekësisë në Prishtinë. Më pas ka vijuar studimet në Fakultetin e Mjekësisë në Rijekë të Kroacisë. Specializimin në fushën e gjinekologjisë e ka kryer në Ljubljanë të Sllovenisë. Aktualisht punon dhe vepron në Novo Mesto të Sllovenisë. Është doktoreshë e licensuar e mjekësisë, e specializuar në gjinekologji, me një eksperiencë të madhe dhe profesionale në fushën ofurogjinekologjisë.
Në mediat sllovene ajo shpesh konsiderohet si një model integrimi i emigrantëve në shqoerinë sllovene e cila ka thyer stereotipet për gratë emigrante: që ato kryesisht qëndrojnë prapa mureve të shtëpisë, nuk janë të arsimuara, nuk punojnë dhe nuk vijnë në takimet e prindërve dhe orët e fjalimeve në shkollë.
Pas studimeve për mjekësi në Kroaci, ajo u transferua në Novo Mesto 16 vjet më parë, mori një punë si gjinekologe në spitalin e përgjithshëm lokal ku ende punon dhe krijoi një familje. Sot ai ndihet si në shtëpinë e tij në Slloveni. / KultPlus.com
Festivali i Arteve dhe Kulturës Tradicionale pavarësisht gjendjes pandemike ka përmbushur edicionin jubilar të organizimit. Ndërkaq, në përfundimin e këtij festivali juria profesionale ka ndarë edhe çmimet kryesore të Festivalit, shkruan KultPlus.
Dedikuar grave dhe diellit, në edicionin e tij të 10-të, EtnoFest ka sjellur në fshatin Kukaj ekspozita, muzikë live, shfaqje teatrore, diskutime në panel dhe kuzhinë tradicionale mendjehapur (liberale). Ndërkaq këtë edicion nuk kanë munguar as ndarjet e çmimeve.
KultPlus ju sjell të plotë çmimet e këtij viti:
EtnoFest për herë të parë ka nisur rrugëtimin e tij në shtator të vitit 2011 dhe tashmë është shndërruar në një festival tradicional. /KultPlus.com
Organizata për Rritjen e Cilësisë në Arsim bashkë me organizatën “Qëndresa Qytetare” mbajtën aksion protestues përpara ambasadave të Kosovës e Shqipërisë, duke akuzuar dy ministrat e shteteve shqiptare për plagjiaturë dhe duke bërë thirrje bashkimi kundër këtij fenomeni, shkruan KultPlus.
Për ORCA-në dhe OJQ “Qëndresa Qytetare” ministri i arsimit të Kosovës, Ramë Likaj dhe ai i Shqipërisë, Elvis Kushi kanë bërë plagjiaturë në punimet e tyre akademike.
“Plagjiatura është vjedhje. Është hajni e pronës intelektuale së dikujt. Plagjiatori është hajdut. Hajn që ka vjedhur nga tjetri”, thuhet në komunikatën e ORCA-së.
Madje, përveç shkrimit “Kundër plagjiaturës të përbashkuar”, organizatat kanë ndërruar vargjet e himnit kombëtar, duke i përshtatur ato sipas thirrjes së tyre anti-plagjiat.
“Përballë bashkimit të tyre, Qëndresa Qytetare si organizatë e shoqërisë civile në Shqipëri dhe Organizata për Rritjen e Cilësisë në Arsim (ORCA) në Kosovë, ftojnë qytetarët e Kosovës dhe Shqipërisë të përbashkohen, siç na fton himni kombëtar, kësaj radhe kundër plagjiaturës”, thuhet tutje në komunikatë.
Ndër të tjera, ata kanë përmendur edhe rezultatin e dy shteteve në testit PISA, mesataren më të dobët në rajon për punime shkencore nga këto shtete, mesataren më të dobët të prodhimit shkencor në rajon. / KultPlus.com
Poezi nga Ervin Hatibi
Poezia e humbjes
Ti asnjëherë s’e kupton çfarë humb.
Lodron si një mace në hapësirën
e gjelbër të syve të tu
dhe unë i fyer, i poshtëruar
të përgjoj pas hijes sime.
Bëhet vonë, sa vonë nga ndarja.
Unë mbi prush thyej shkarpa
si idiot i fryj hirit.
Ndizu zjarr,
dhe hedh lule, shami, vjersha,
rroba e çdo gjë që kam.
E ngel një lakuriq i varfër,
zhveshur
që zjarri dot më s’e ngroh.
Ti asnjëherë s’e kupton çfarë humb.
Lodron si një gjethe në lulishtet
pa anë të syve të tu.
Por unë dua të të dua
me çdo kusht. / KultPlus.com
Nga Musa Sabedini
Pandemia e njohur si COVID 19 na ka dhënë shumë shembuj dhe përvojë se jeta është e tillë për aq sa ke hapësirë veprimi e jetese. Tashmë jemi të gjithë të barabartë, sepse virusi po godet të gjitha shtresat. Pse janë të logjikshme deklarimet e Anthony Faucit dhe pse mediat duhet të jenë të kujdesshme në raportimet e tyre. Vjeshta dhe dimri mund të jenë edhe më sfiduese për mediat kosovare, sepse termet e raportimit kërkojnë logjikë të shprehjes. Mediet e kanë lodhur publikun duke ofruar lloj-lloj eksperti e duke krijuar konfuzione të çuditshme. Fauci lehtësisht e ka ndryshuar qëndrimin e tij profesional nga “Vala e dytë” në “Sfidë”. A duhet mediat kosovare të ndjekin këshillat e Faucit?!
Kur doli në skenë virusi vdekjeprurës me shumë të panjohura, ishte një sfidë e re edhe për të gjitha shtresat dhe kategoritë brenda popullit. Tashmë po mësohemi të jetojmë e veprojmë në kushte të barabarta. Virusi nuk po njeh as paranë, as miliarderë, as milionerë, as pushtet e as presion. Gati veçse jemi mësuar të jetojmë në mesin e të barabartëve dhe kjo do të jetë një përvojë e mirë për shekujt vijues.
Pandemia na dha mundësi të njohim ekspertë, virologë, infektologë, epidemiologë, mikrobiologë, kimistë, farmacistë, politikanë, të gjithë në stilin e tyre duke dhënë vlerësime e duke ofruar alternativa. Shumica pothuajse kanë dështuar, sepse realisht virusi nuk linte asnjë mundësi për ndonjë parashikim emergjent.
Këta ekspertët tanë realisht vetëm munden me u marrë me statistika se sa dhe kush po vdes gjatë ditës, sepse për të pasur ndonjë rezultat studimor, duhet të rrinë larg politikës e larg konferencave të shtypit.
T`i kthehem asaj çfarë do dua të them me pak fjalë rreth autoritetit të ekspertit të lartë të sëmundjeve infektive Anthony Fauci. Edhe ky ekspert bëri jo pak herë deklarata të pamatura dhe shpesh të nxituara, por megjithatë bota dhe Trump shpresat i kishin tek versioni i tij, i cili shpesh konsiderohej edhe ekstrem.
Fauci duke parë ndjeshmërinë që kanë deklaratat e njerëzve kompetent në stilin:”Vjeshta nis me fazën e dytë të pandemisë”, ose “Vendi po përgatitet për valën e dytë” e shumë tituj të tillë të ngjashëm, të cilët po e terrorizojnë publikun, vendosi që të bëjë një hap para në deklarimet e tija publike. Fauci po sugjeron që në vend se të thuhet “Vala e dytë” të zëvendësohet me termin: ”A jemi të përgatitur për sfidën e vjeshtës dhe dimrit?”.
Realisht deklarata e Faucit i përshtatet shumë medieve dhe raportimeve të tyre shpesh herë të ngutshme dhe neveritësese. Mediet online, në veçanti duhet të mësojnë, të edukohen, të përshtaten me realitetin që është krijuar tash e gjashtë muaj. Mediet duhet të kujdesën për shëndetin e popullatës më shumë se mjeku dhe sfera shëndetësore. Publiku shpesh ka nevojë edhe për ndonjë tekst të butë, të drejtë, këshillëdhënës, edukues gjithsesi, këshilla profesionale, sesa tekste dhe tituj bombastik që ndikojnë negativisht në psikikën e qytetarëve.
Media në përgjithësi duhet të përzgjedh fjalorin gjatë raportimit, duhet të ketë kujdes maksimal nga ajo që publikohet dhe thuhet, është urgjente që media të krijojë një agjendë për mënyrën e raportimit, duke respektuar kriteret dhe standardet aktuale të mënyrës së raportimit.
Ne shpesh mendojmë se ekspertët tanë ose ata që janë të thirrur të japin konstatime profesionale janë të përgatitur dhe të sinqertë në atë që e thonë, por në fakt ka prej kësaj kategorie që shpesh ua kanë huqur në ekstrem. Aty ku për virusin mediet citojnë infermieret dhe politikanët, aty s`ka bereqet.
Pra, media ka obligim të jetë e përgjegjshme, e përgatitur në maksimum që sfida e vjeshtës dhe e dimrit të jetë më e lehtë dhe më shumë aktive në raportimet e drejta.
Kur media raporton drejtë, saktë, dhe në mënyrë objektive, i mbetet publikut pastaj ta vlerësojë se çfarë duhet të përzgjedhë. Ne edhe në kohën e pandemisë kemi krijuar diferenca gjatë raportimit. Qytetarët shpesh bëhen nervozë, reagojnë në mënyrë të ndryshme për raportimet tona dhe ata shpesh detyrohen që t`i përzgjedhin qoftë portalet, gazetat apo TV e Radiot si mjete të informimit dhe komunikimit.
Pse, sepse shpesh disa media online i kanë tejkaluar kufijtë e etikës dhe ndërgjegjes profesionale. Pra, bëhuni pjesë e raportimit profesional, bëhuni pjesë e raportimit të shëndoshë dhe të “ëmbël” e të saktë për publikun dhe lexuesin tuaj.
Autori është ligjërues në degën e Medias dhe Komunikimit në UBT./ KultPlus.com
Këngëtarja e njohur amerikane, Taylor Swift e ka thyer edhe një rekord tjetër. Tani ajo e gëzon titullin e artistes femër e cila i ka kaluar më së shumti javë në pozitën e parë të toplistës “Billboard” të 200 albumeve më të mira, transmeton Koha.
Albumi i saj i fundit me titull “Folklore” u rikthye në pozitën e parë të toplistës “Billboard” këtë javë, pas shitjes së 87 mijë kopjeve ekstra nënë javë pas lansimit të tij. Kështu, Swift tani i numëron në total 47 javë të qëndrimit në pozitën e parë të kësaj topliste, gjatë karrierës së saj.
Në të kaluarën këtë rekord e mbante ikona e muzikës, Whitney Houston, e cila e kishte arritur këtë sukses në vitin 1987 me albumin e saj të dytë të incizuar në studio, “Whitney”.
Ndërkaq, para pop këngëtares Swift në renditjen e artistëve që kanë kaluar më së shumti javë në pozitën e parë të “Billboard 200” prijnë: grupi “The Beatles” me 132 javë, Elvis Presley me 67 javë, Garth Brooks me 52 javë dhe Michael Jackson me 51 javë. Këta janë artistët meshkuj të cilët me albumet e tyre kanë kaluar më së shumti javë në maje të toplistës së njohur muzikore.
Sipas toplistës “Billboard”, Swift tani ka shënuar rekord të qëndrimit për më së shumti javë në pozitën e parë, që nga lansimi i albumit të reperit Drake, “Views” në vitin 2016.
“Folklore” po ashtu e mban rekordin e albumit të vetëm jo R&B ose hip-hop nga një artiste femër, që e ka shënuar një sukses të këtillë, që nga lansimi i albumi “25” nga ylli i muzikës Adele.
Albumi i vetëm i Taylor Swiftit që nuk është pozicionuar në vendin e parë ishte ai me të cilin këngëtarja debutoi në muzikë në 2006.
Albumi i tetë i këngëtares i incizuar në studio erdhi si befasi në korrik të këtij viti, dhe është krijuar në bashkëpunim me themeluesin e bendit “The National”, Aaron Dessner dhe vokalistin e grupit “Bleachers”, Jack Antonoff.