Për nderë të festës së 28 Nëntorit, Trupa e Baletit Kombëtar të Kosovës, nesër më 28 nëntor, sjellë shfaqjen “Një legjendë për dashurinë”, shkruan KultPlus.
Kjo shfaqje me koreografi të Pullumb Agalliut, jepet në skenën e madhe të Teatrit Kombëtar të Kosovës, me fillim nga ora 20:00./ KultPlus.com
Në Ditën Ndërkombëtare të Dhunës ndaj Gruas, Baleti Kombëtar i Kosovës në bashkëpunim me UN Women, nesër më 25 nëntor do të sjellin për publikun premierën e shfaqjes “Një ditë”, e cila vjen nën koreografinë e Christie Coleman, shkruan KultPlus.
Gili Hoxhaj
“Një ditë”, në skenë do të vije përmes lojës së tetë balerinëve, në përbërje të katër çifteve ku bëjnë pjesë balerinët: Teuta Krasniqi, Sead Vuniqi, Leonora Rexhepi, Fisnik Smani, Fatmir Smani, Vjollca Llugiqi, Jeta Musolli dhe Donmir Biblali.
Kjo shfaqje është e frymëzuar nga tregimet e vërteta të grave të Kosovës, duke vënë në pah disa çështje gjinore në Kosovë. Shfaqja e titulluar “Një ditë” do të sjellë në skenë një ditë të familjes tradicionale, ku përmes personazheve do të preken disa nga çështjet kryesore me të cilat përballen gratë gjatë gjithë jetës së tyre. Hapja e kësaj shfaqje do të fillojë në mënyrën më të jashtëzakonshme, që do të nxjerrë shikuesit jashtë sallës së teatrit. Gjithçka do të nis para objektit të Teatrit, ku do të paraqitet një grua me një vallëzim të lirë, ndërsa më pas kufizohet brenda nga anëtarët e familjes të cilët i përkasin gjinisë mashkullore.
Ahmet Brahimaj, drejtor i Baletit Kombëtar të Kosovës sot gjatë një konferencë për media ka thënë se projekti është ofruar nga UN Women, ndërsa tregoi se shfaqja trajton temën e dhunës brenda dhe jashtë familjes.
“E kemi sjellë një punë të përbashkët me iniciativë të stafit të UN Women, të cilën ne e kemi pranuar me shumë kënaqësi. Për këtë shfaqje është bërë një punë shumë serioze, pasi që kemi punuar shumë së bashku në mënyrë që të sjellim një shfaqje sa më të suksesshme. Kjo shfaqje arrin që përmes lëvizjeve dhe përmes interpretimit ta thotë tekstin”, është shprehur drejtori i BKK-së, Ahmet Brahimaj.
Koreografja Christie Coleman, tha se përmes kësaj shfaqje do të trajtojnë një realiteti që prek edhe jashtë kufijve të Kosovës ndërsa shtoi se është ndjerë shumë e kënaqur që të bashkëpunoj për të dytën herë me trupën e Baletit Kombëtar të Kosovës.
“Jam kënaqur gjatë realizimit të kësaj shfaqje. Është shumë nder për mua të punoj me trupën e Baletit të Kosovës, valltarët e kësaj trupe janë shumë të mirë dhe punojnë me mjaft përkushtim. Shfaqja është e bazuar nga tregimet e njerëzve që jetojnë në Prishtinë por shumica e gjërave që ajo nxjerr në pah janë edhe probleme ndërkombëtare, kam dëgjuar që tregime të njëjta brengosin edhe miqtë e mi në Nju Jork . Andaj lidhur me këtë çështje ne duhet të jemi të gjithë të bashkuar në mënyrë që ta bëjmë progresin. Ne duhet të punojmë së bashku në mënyrë që ta rrisim barazinë gjinore”, ka thënë koreografja Coleman.
Vlora Nushi, nga Agjencioni i Kombeve të Bashkuara – UN Women, thotë se ky është aktivitetit qendror në kuadër të fushatës gjashtëmbëdhjetë ditore për sensibilizimin e shoqërisë lidhur me dhunën ndaj gruas.
“Un Ëomen e udhëheq globalisht për gjashtëmbëdhjetë ditë fushatën kundër dhunës ndaj gruas. Këto aktivitete në Kosovë dhe vende të tjera shërbejnë për sensibilizimin e njerëzve kundër dhunës ndaj grave. Këtë vit, ky është aktiviteti qendror të cilin më shumë dëshirë e ka mbështetur drejtoresha jonë, Flora Macula në bashkëpunim me teatrin kurse përmes një performance të Baletit Kombëtar të Kosovës pasqyrohen marrëdhëniet ndër-njerëzore dhe pabarazitë që lindin ndërmjet çifteve në jetën tonë të përditshme”, ka thënë Vlora Nushi sot gjatë konferencës për media.
Kjo shfaqje do të vjen nesër në Teatrin Kombëtar të Kosovës duke filluar nga ora 20:00. Shfaqja “Një ditë” shënon premierën e pestë për këtë vit nga trupa e Baletit Kombëtar të Kosovës. / KultPlus.com
Në Teatrin e Qytetit “Istref Begolli” në Pjesë, sonte më 24 nëntor vjen premiera e komedisë “Republika e brekëve”, shkruan KultPlus.
Kjo shfaqje vjen nën regjinë e Jeton Ahmetaj, ndërsa asistentë regjie janë Flormend Shabaj dhe Agon Bala.
Në kastën e aktorëve të kësaj shfaqje janë: Flormend Shabaj, Fitore Broqi, Agon Bala, Herodita Ramshaj, Fisnik Sykaj, Luan Daci, Shpresa Salihaj dhe aktor mysafir është Veton Osmani. / KultPlus.com
KultPlus, realizoi sot një intervistë të shkurtër me regjisorin Idrizi, i cili vjen për herë të parë si regjisor në Teatrin Kombëtar të Kosovës. Ai tha se ndihet i kënaqur të bashkëpunoj me një ekip të tillë veçmas me këtë brez të ri të aktorëve të cilët ai i quan bartës të frymës së re në teatër.
Gili Hoxhaj
“Zoti i Masakrës” me tekst të Yasmina Reza dhe me regji të Besfort Idrizi, është premiera e radhës në Teatrin Kombëtar të Kosovës e cila vjen në fund të këtij viti, në skenën e vogël.
Tashmë ka dhjetë ditë kanë filluar përgatitjet për këtë shfaqje e cila do të jetësohet përmes lojës së aktorëve May-linda Kosumoviq, Donikë Ahmeti, Shpëtim Selmani dhe Labinot Raci ndërsa në përbërjen e këtij ekipi janë edhe skenografi Enes Deari dhe kostumografi Ines Golia nga Shkupi.
KultPlus, realizoi sot një intervistë të shkurtër me regjisorin Idrizi, i cili vjen për herë të parë si regjisor në Teatrin Kombëtar të Kosovës. Ai tha se ndihet i kënaqur të bashkëpunoj me një ekip të tillë veçmas me këtë brez të ri të aktorëve të cilët ai i quan bartës të frymës së re në teatër.
Kjo shfaqje trajton një problem universal që lidhet me përballjen dhe zgjidhjen e problemeve ndërsa ngjarja ngërthen në vete takimin e dy prindërve për ta zgjidhur një problem lidhur me një zënkë të fëmijëve të tyre kurse ky takim përfundon me një zmadhim edhe më të madh të këtij problem nga vet prindërit.
Regjisori Idrizi tregoi për KultPlus, se ideja e punimit të këtij teksti i kishte lindur shumë më herët. Ai tregon se fillimisht këtë projekt ka dashur ta prezantoi në Maqedoni, pasi që, ka qenë i nxitur nga konfliktet në baza etnike që ndodhnin atje.
“Këtë tekst kam dashur ta punoj para disa viteve në Maqedoni, shkaku i gjendjes që ishte atje pasi që kishte rrahje në baza etnike. Pra, para disa viteve ndodhnin rrahje mes nxënësve shqiptar dhe maqedonas ndërsa ky problem mbeti përherë i pazgjidhur. Problemi nganjëherë shuhej apo merrte përmasa edhe më të mëdha por në të vërtetë nuk kishte gatishmëri nga asnjëra anë për t’i dhënë fund atij problemi, pra as nga ana e prindërve e as nga institucionet shtetërore”, shpjegoi regjisori.
Duke qenë se kjo shfaqje e sjellë për herë të parë Besfort Idrizin, në rolin e regjisorit brenda Teatrit Kombëtar të Kosovës, ai e përshkruan realizimin e kësaj shfaqje një sfidë të re për të.
“Çdo shfaqje është një sfidë e re, një shqetësim i ri por ardhja ime për herë të parë si regjisor në një mjedis tjetër është një barrë më e madhe, pasi që, edhe pritjet janë më të mëdha”, ka thënë ai.
Besfort Idrizi poashtu tregoi se kjo do të jetë një shfaqje e varfër sa i përket elementeve brenda skenës, duke i lënë kështu më shumë hapësirë lojës së aktorëve.
“Ky ishte një koncept i imi apo një sfidë e re për mua që shfaqja të mos jetë e ngarkuar me shumë elemente teatrore por të bazohet më shumë në lojën e aktorëve, shfaqja do të ketë skenografi dhe kostumografi por nuk do të ketë muzikë, koreografi apo ndonjë element tjetër shtesë”, është shprehur regjisori duke përfunduar të thotë se shfaqja premierën do ta ketë në pjesën e dytë të muajit dhjetor. / KultPlus.com
Bazuar në “Gurë në xhepat e tij” nga autorja Marie Jones, së shpejti vjen shfaqja “Hollishit”, me regji të regjisorit Ilir Bokshi e producente Albulena Kryeziu, shkruan KultPlus.
Kjo shfaqje premierën do ta ketë në Teatrin Dodona në kryeqytet me ç’rast edhe hapet ky teatër pas renovimit, saktësisht “Skena e mbrëmjes”.
Shfaqja është një tragjikomedi për një qytezë-provincë e cila “pushtohet” nga një produksion hollivudian të cilët vijnë për të xhiruar një film. Në qendër të storjes janë Çarlli Konllon dhe Xhejk Kuin, të cilët sikurse shumica e banorëve të qytezës, janë punësuar si statistë filmi. Komedia rrjedhë nga përpjekjet e produksionit që të krijojnë një “ndjesi provinciale” -një nocion romantik, i cili shpesh bie ndesh me realitetin jetësor.
Shfaqja jetësohet nga aktorët Adrian Morina dhe Ylber Bardhi, ndërsa pas skene ka një ekip në përbërje të: dramaturg-Shkëlzen Berisha, asistent regjie-Butrint Pasha, muzika-Art Lokaj, kostumografe-Albulena Borovci e producente Albulena Kryeziu.
“Hollishit” është mbështetur nga Ministria e Kulturës së Kosovës, Drejtoria për Kulture e K.K. Prishtinës dhe teatri AAB “Faruk Begolli”./ KultPlus.com
Vepra “Mashtrimi” rikthen në skenën e Teatrit Kombëtar Artan Imamin. Shkruar nga Anthony Shaffer vepra vjen në skenë me regji nga Artan Imami, një shfaqje që ka bërë bashkë aktorë shqiptarë dhe të huaj. Shfaqja ngjitet premierë të premten në skenën e teatrit për të vijuar dhe të shtunën e të dielën, dhe rolet në vepër interpretohen nga Artan Imami, Indrit Çobani, Carolyn Murphy e Endrin Pastore. Një shfaqje me katër personazhe, një vepër që dhe në mediet botërore më herët ka gjetur vlerësime.
“Një kryevepër argëtuese, ku konflikti seksual ndërthuret me atë klasor dhe racor. Drama dhe tragjedia transmetohen nga një humor i zi”, kështu shkruan për “Mashtrimi” një nga gazetat më prestigjioze “New York Times”. “Mashtrimi” (“Sleuth”), një nga veprat më të njohura të dramaturgut Anthony Shaffer është ngjitur në skenën e Broadway, fitues i “Tony Award”, adaptuar tre herë si film dhe kandidat për çmimin “Oscar”. Një vepër e ndërtuar mbi një zinxhir intrigash, ku imagjinata dhe realiteti shkrihen në një. Në vepër tradhti, pasion, gënjeshtra, pushtet, bindje, lojë dhe kjo përcillet përmes aktorëve të njohur të teatrit. Regjisor në shfaqje, Artan Imami vjen në rolin kryesor atë të Wyke, në atë të Milo Tindle të dashurit të gruas interpreton aktori Indrit Çobani dhe në rolet e tjera janë Carolyn Murphy dhe Endrin Pastore. Këtë vepër ai e përshtati për versionin filmik me aktorët Laurence Oliver dhe Michael Cane në vitin 1972, i nominuar për çmimin “Oscar”. Në vitin 2007, “Sleuth” u përshtat për një tjetër version filmik me regjisor Kenneth Branagh dhe me aktorë Michael Cane dhe Jude Law.
Poashtu, vepra është shfrytëzuar si bazë për filmin “Tamanna” (2014), një prodhim britaniko-pakistanez, me regji të Steven Moore. Firmën e tij mban edhe skenari i trillerit të Alfred Hitchcock “Frenzy” (1972) si dhe “The Wicker Man”. Artan Imami është një nga emrat e dashur për publikun në skenën e teatrit. Në aktivitetin e tij me teatrin gjithmonë është vlerësuar dhe tashmë ai vjen para publikut si regjisor dhe aktor. Këto ditë aktori i njohur me shfaqjen “Lukrecia Borxhia” ishte në Francë, ku trupa e Teatrit Kombëtar u prezantua me këtë vepër teatrore.
Ngjarjet në “Mashtrimi”
“Mashtrimi” në skenë është me skenografi nga Genc Shkodrani. I zhvillon ngjarjet në shtëpinë e dinastisë Wiltshire të shkrimtarit të suksesshëm Andrew Wyke. Shtëpia e tij duket si një reflektim i veprave që shkruan. Në dijeni të tradhtisë të së shoqes, fton në shtëpi të dashurin e saj, Milo Tindle, dhe e bind që të grabisë bizhuteritë e gruas. Që prej këtij propozimi, zë fill një zinxhir ngjarjesh që e mban lidhur publikun edhe në dilemën nëse ajo që po shohin është e vërtetë apo fryt i fantazisë së Wyke dhe fillon realiteti.
Më herët për këtë vepër autorit Anthony Shaffer është shprehur se ajo ishte pjesërisht e frymëzuar nga një prej miqve të tij, kompozitori Stephen Sondheim, i cili mishërohet në rolin e Wyke. “Sleuth” konsiderohet si një triller i klasit të parë, mbushur me intriga, kthesa të befta dhe një suspansë të vazhdueshme.
Gjithashtu, është një lloj parodizimi i literaturës policeske dhe investigative, por nga ana tjetër përdor të gjithë elementet e zhanrit në fjalë për të arritur qëllimin e tij artistik. Praktikisht, vepra është një studim dramatik i betejës për seksualitet dhe xhelozi, midis një të riu dhe një burri në moshë. Anthony Shaffer ka lindur në Liverpul, më 15 maj 1926, dhe i përket një familjeje dramaturgësh të suksesshëm. (Marrë nga SotNews)./ KultPlus.com
Në Teatrin e Qytetit “Istref Begolli” në Pjesë, më 24 nëntor vjen premiera e komedisë “Republika e brekëve”, shkruan KultPlus.
Kjo shfaqje vjen nën regjinë e Jeton Ahmetaj, ndërsa asistentë regjie janë Flormend Shabaj dhe Agon Bala.
Në kastën e aktorëve të kësaj shfaqje janë: Flormend Shabaj, Fitore Broqi, Agon Bala, Herodita Ramshaj, Fisnik Sykaj, Luan Daci, Shpresa Salihaj dhe aktor mysafir është Veton Osmani. / KultPlus.com
“Let’s have sex”, me regji të regjisorit Valon Pallaskës, të premten mbrëma shfaqet premierë në Teatrin e Qytetit “Hadi Shehu”, në Gjakovë, shkruan KultPlus.
Kjo shfaqje sjellë në kastën e aktorëve Edmond Hafizademi, Vlera Pylla, Ylber Mehmeti, Yllka Lota dhe Altina Kusari.
Personazhet vijnë nga askundi dhe shkojnë në askund, ata janë të njohur për njëri tjetrin e megjithatë duket sikur e shohin njëri tjetrin për herë të parë. Veprimet e personazheve motivohen nga vetmia, nga nevoja e tyre për dashuri dhe për lidhje emocionale, nga dëshira e tyre për të ikur. Të gjithë personazhet në këtë dramë të çuditshme flasin dhe mendojnë vetëm për seksin!
Shfaqja nuk lejohet për personat nën moshën 16 vjeç, ndërsa vjen premierë më 17 nëntor me fillim nga ora 20:00. Reprizat e shfaqjes janë: 18, 22, 23 nëntor. / KultPlus.com
Sonte është nata e fundit e edicionit të parë të festivalit “Othello”, i cili ka nis më 9 nëntor në Gostivar, shkruan KultPlus.
Në natën e fundit të këtij festival do të jepet shfaqja nga Teatri i Kumanovës, me regji të regjisorit kosovar Ilirjan Himaj ‘Mësimi”.
Kjo shfaqje jetësohet nga aktorët Shkëlqim Islami, Hajat Tocilla dhe Enver Halimi, ndërsa shfaqja e cila është një dramë e teatrit avangardë francez, flet për një nxënëse adoleshente të etur për mësime. Nevoja dhe dëshira për të vjelë dije e përballë nxënësen me vrazhdësinë dhe dhunën e një profesori psikopat.
“Mësimi”, shfaqet sonte në “Shtëpinë e kulturës” në Gostivar me fillim nga ora 19:00 ndërsa menjëherë pas shfaqjes edhe ndahen çmimet për më të mirët e këtij festival.
Në edicionin e parë të Festivalit të Teatrove “Othello”, kanë marrë pjesë gjithsej pesë shfaqje, ku dy nga to janë nga Kosova, si shfaqja “Psikozë n’4:48” me regji të Fatos Berishës dhe “Copë Copë” me regji të Zana Hoxha Krasniqit./ KultPlus.com
Në Teatrin e Qytetit ‘Bekim Fehmiu’ në Prizren, të premten vjen premiera e shfaqjes me tekst e regji të Kushtrim Bekteshit ‘Ata që ikin’, shkruan KultPlus.
‘Ata që ikin’, është drama e cila ka mbledhur rreth vetës gjithsej 12 aktorë, të cilët do i dhënë frymë kësaj shfaqje. Ndërsa trajton fatet e njerëzve që ikin, qoftë nga e kaluara, nga dashuria, nga tmerri i përditshmërisë nga realiteti që ua zë frymën, nga vetvetja; me shpresë se një ditë do të ndjehen të plotësuar dhe të lumtur.
Në një intervistë të mëhershme për KultPlus, regjisori i cili rrëmbeu disa çmime me shfaqjen ‘Tartufi’, të realizuar në Teatrin ‘Migjeni’ në Shkodër, pati treguar për këtë dramë të cilën e ka shkruar para dhjetë vitesh.
“‘Ata që ikin’ është një dramë që e kam shkruar para dhjetë vitesh. Shpesh kam menduar ta inskenoj, por kur më është ofruar mundësia jam tërhequr sepse konsideroja se më duhet kohë derisa të krijoj distancën e duhur për t’iu qasur tekstit si regjisor, e duke shmangur subjektivitetin e të qenurit vetë autor i tekstit. Tanimë e ndjej se e kam krijuar atë distancë”, pati thënë për KultPlus, regjisori Bekteshi.
Në kastën e aktorëve të kësaj shfaqje bëjnë pjesë gjithsej 12 aktorë: Xhevdet Doda, Donikë Ahmeti (aktore mysafire), Ernest Malazogu, Fetah Paçarizi, Alban Krasniqi, Zanë Duraku, Hajat Toçilla, Edona Sopaj, Alban Morina, Rifat Smani, Alban Çela si dhe Afrim Kasapolli.
‘Ata që ikin’ vjen premierë më 10 nëntor, me fillim nga ora 20:00 në Teatrin e Qytetit “Bekim Fehmiu” në Prizren./ KultPlus.com
Sonte teatri AAB “Faruk Begolli” në kuadër të festivalit “Albania Dance” do të sjellë shfaqjen “Dashuria e thjeshtë”. Kjo shfaqje vjen me koreografi dhe koncept të Roberta Ferrara, me këshilltar muzikor Vito CAusarano, ndërsa në skenë shfaqja do të vije përmes Silvia Sisto & Nicola de Pascale, shkruan KultPlus.
“Dashuri e Thjeshtë” është një rrëfim i thjeshtë ku strukturat e fjalës dhe strukturat joverbale nuk janë te nevojshme. Gjesti i treguar në formë të shenjtë e të deshifruar do ta zërë vendin e foljes, përmes trupave të cilët lëshohen dhe ngërthehen me njëri tjetrin dhe heshtazi vështrojnë se si Dashuria dhe Arti të ngërthyera janë të brishta e delikate. Është një pasqyrim i pastër i ndjenjave: një vorbull, një nxitje e balancit dhe kompromisit që duhet gjetur vizualisht bashkë me trupin, kurse konceptualisht me zemrën dhe mendjen
Sinqeriteti është prapaskena e kësaj vepre që nxit momente të qetësisë, kujtimeve, aromave; një nevojë për të gjetur paqen e brendshme, një moment kur koha dhe hapësira nuk ekzistojnë dhe japin një dashuri të thjeshtë e të çiltër.
“Dashuri e thjeshtë”, shfaqet sonte me fillim nga ora 19:00./ KultPlus.com
Forum Teatër “Stigma – Kërko të drejtën tënde” është një ndër shfaqjet e para në Kosovë organizuar nga Qendra për Art dhe Komunitet – ARTPOLIS, ku adresohet stigma e shoqërisë kosovare dhe ballafaqimet e të mbijetuarave të dhunës seksuale. Nevoja që zëri i tyre të dëgjohet dhe të mbështeten nga komuniteti për ta vazhduar jetën si çdo njeri tjetër, përcjell KultPlus.
Pasi që zbulon se biri i saj Dreni është dashuruar me një vajzë nga Prishtina, Mira kthehet Kosovë për herë të parë pas 18 viteve të kaluara në Angli. Edhe pse e përgatitur të ballafaqohet me të kaluarën ajo befasohet nga një takim i planifikuar që merr një kahje tjetër nga qëllimi fillestar. Ky është pak a shumë sinopsisi i këtij forum teatri i cili është shfaqur si premierë më 26 tetor në Shërbimin korrektues të Lipjanit, ndërkaq tani vazhdon reprizat nëpër qytetet e Kosovës.
Regjisor dhe moderator i diskutimeve është Lulzim Bucolli ndërsa në kastën e aktorëve vijnë: Anisa Ismajli, Kushtrim Qerimi, Qendresa Kajtazi, Gani Rrahmani.
Pas performancës personazhet e shfaqjes do të diskutojnë me publikun çështjet që adresohen në shfaqje si dhe do të kenë mundësinë të angazhohen direkt gjatë ndonjë segmenti të caktuar.
“Stigma – Kërko të drejtën tënde” zbatohet në partneritet me Zyrën e Avokatit të Popullit dhe do të shfaqet në shtatë komuna të Kosovës sipas orarit:
Shfaqjet e radhës:
30.10.2017 – Pejë;
03.11.2017 – Mitrovicë;
08.11.2017- Gjilan;
14.11.2017 – Prizren;
05.12.2017 – Gjakovë;
06.12.2017 – Prishtinë.
Kjo shfaqje është krijuar në kuadër të projektit “Mbrojtja dhe Promovimi i të Drejtave të Njeriut në Kosovë Përmes Shoqërisë Civile Aktive”, projekt i financuar nga BE-ja dhe i menaxhuar nga Zyra e Bashkimit Evropian në Kosovë, nën Instrumentin Evropian për Demokraci dhe të Drejta të Njeriut, zbatuar nga Instituti Kosovar për Kërkime dhe Zhvillim të Politikave (KIPRED), Grupi për Studime Juridike dhe Politike (GLPS) dhe Artpolis./ KultPlus.com
Drama “Kandili i Argjandit”, shkruar nga Martin Camaj dhe vënë në skenë nga regjisori shkodran, Fatbardh Smaja erdhi për publikun nga trupa e teatrit “Migjeni” të Shkodrës në Teatrin Eksperimental “Kujtim Spahivogli”.
Një vepër që përcjell jo pak mesazhe për publikun. Në dramë interpretojnë Nana- Rita Gjeka; Leka -Jozef Shiroka; Besa- Merita Smaja; shkrimtari- Agron Dizdari; Dora-Eliona Shkreli; Prendi- Enver Hyseni; Njeriu i huaj- Nikolin Ferketa; Katundari- Simon Shkreli. Si aktore Rita Gjeka vlerëson jo pak dramën dhe mesazhin që përcjell përmes saj Martin Camaj.
“Ne mendojmë vetëm me shkelë tjetrin, por Camaj nuk shkelet dot. Martin Camaj është super aktual dhe sot me verën e tij”, pohon mes të tjerave aktorja Rita Gjeka njëkohësisht dhe drejtorie e teatrit “Migjeni” në Shkodër.
Aktorja Rita Gjeka risjell sërish në vëmendje punën e regjisorit Smaja për veprën. “Bardhi me besoi rolin e nënës dhe vazhdimisht më thoshte: Është një nënë me N të madhe dhe është e vërtetë, sepse personazhi im është aq kompleks sa gjatë punës kam pasur shumë kontradikta me veten, shumë dyshime, shumë frikë, por me Bardhin mbi krye mendoj se ja kam dalë”, vijon aktorja.
Në vepër aktorja Merita Smaja pohon se ka qenë një nga projektet për të cilin është punuar jo pak nga artistët dhe regjisori Smaja, i cili fatkeqësisht u nda nga jeta në kohën kur premiera erdhi në teatër. “Flasim për Martin Camaj, për një poet i cili si dramaturg pak është lançuar në Shqipëri. Por më vjen keq që më parë u vu në Tiranë, sepse erdh si një vepër që nuk tingëllon gëgnisht. Me trupën e teatrit tonë vepra ka marr vlerësime. Ka qenë projekt i Fatbardhit, i cili e deshti shumë dhe e punoi me gjithë shpirt, pavarësisht se nuk e pa fundin, nuk pa shfaqjen por ai jetoi me të. Që kur bëri zgjedhjen e veprës ai tha është vepra ime unike dhe më e dashur. Vërtetë që ndodhi ashtu si tha ai”, pohon aktorja Merita Smaja.
Më tej aktorja tregon se edhe pse e shkruar në vitin 1945 vepra i flet shumë dhe kohës sot. “Një vepër që i thotë shumë publikut, sepse nuk është shkruar shumë për atë periudhë pas çlirimit. Ajo që ndodhi me familjet pasura shqiptare pas çlirimit, të cilët u ndjenë nën trysninë e një pushteti diktatorial që i bëri të ndjeheshin jo vetëm keq, por të fuste dhe në grindje midis një familje. Kjo ndodh kur diktati është i madh dhe dhuna po ashtu”, tregon aktorja Smaja për veprën që mbrëmë erdhi në skenën e Tiranës.
Drama
“Kandili i Argjandit” është një dramë social-politike që mund të vetëkuptohet arsyeja pse i ka munguar lexuesit dhe spektatorit gjatë periudhës së diktatorit, por nuk mund të justifikohet tërësisht arsyeja e mungesës së saj në skenë për dy dekada. Ama vlen për t’u theksuar se regjisori Smaja pati mprehtësinë e duhur që, pikërisht në këtë situatë aspak shpresëdhënëse për spektatorin, të sjellë dritën e “Kandilit të Argjandit” në kohën më të volitshme të tij. “Kandili, dritëpërҫuesi i një jete të dalë nga errësira e kohës së territ e tmerrit, na jep tabllonë e frustrimit psikologjik që kanë kaluar mijëra familje shqiptare në periudhën e parë të vendosjes së regjimit komunist. Drama u shkruajt rreth viteve ’50, por tingëllon e afërt në kohë edhe pas kaq dekadash” thotë studiuesi Behar Gjoka. Arsyet sociale dhe politike duket sikur po përsëriten Fatbardh Smaja i solli publikut dramën e Camajt. Ai e plotësoi misionin e tij. Camaj dhe Smaja e thanë të vetën me dritën që sollën përmes “Kandilit të Argjandit”. (Marrë nga SotNews)./ KultPlus.com
Dje Aktorët Rezident të Teatrit Kombëtar të Kosovës, anuluan shfaqjen ‘Bordel Ballkan’, duke u futur kështu në grevë deri në plotësimin e kërkesave të tyre drejtuar MKRS-së, shkruan KultPlus.
Kësisoj mbrëmë njëri ndër aktorët e kësaj trupe Armend Baloku, shpalosi nëpërmjet rrjetit social Facebook, disa fotografi që tregojnë lëndimet që ka pasur gjatë shfaqjes ‘Bordel Ballkan’. Me këto fotografi dhe me një mbishkrim Armend Baloku, ka treguar se pagat që kanë aktorët e këtij teatri janë të mjerueshme, duke pasur parasysh punën që bëhet.
“Foto ne vazhdim tregojne demtimet qe i kam pasur nga shfaqja e fundit ne Teatrin Kombetar. Keto demtime i kam cdo here pas shfaqjes “Bordel Ballkan”. Nuk kam pushim as te shtuneve e as te dieleve. Po ashtu nuk kam pushim as diteve qe shteti yne ka feste. Prova mbaje qe nga mengjesi e deri naten vone. #proteste #mbeshtetjeperteatrin #mbeshtetjeperaktoret”, ka shkruar Baloku.
Që nga sot e deri në 9 ditët e ardhshme repertori i TKK-së, do të vazhdoj ashtu siç ka qenë ndërsa pas 10 ditësh nëse nuk plotësohen kërkesat e aktorëve, atëherë ata kanë thënë se do ta përshkallëzohet situata dhe do të bllokohet i gjithë repertori i Teatrit Kombëtar të Kosovës./ KultPlus.com
Më datë 18 tetor me fillim nga ora 20:00 në Teatrin Kombëtar në Tiranë shfaqjet ‘55 Shades Of Gay’, një performancë teatrore e Qendrës Multimedia nga Prishtina, shkruan KultPlus.
Me tekst të Jeton Neziraj e regji nga Blerta Neziraj, shfaqja sjellë në kastën e aktorëve Tristan Halilaj, Bujar Ahmeti, Shengyl Ismaili, Semira Latifi, Alketa Sylaj dhe Luan Durmishi (vokal). Skenografia dhe kostumet: Sebastian Ellrich / Muzika: Irena Popovic / Koreografia: Florian Bilbao.
Hyrja do të jetë gratisë por megjithatë organizatorët sygjerojnë që publiku të rezervon ulëset në numrin: 042223022.
Qendra Multimedia nga Prishtina, e konsideruar si ‘njëra nga kompanitë teatrore më interesante nga Evropa Juglindore’ [kazaliste.hr], sjell sërish në skenë, në një trajtim krejtësisht politikisht jo-korrekt, një performancë argëtuese politike dhe provokative, kësaj here mbi çështje që kanë të bëjnë me komunitetin LGBTI.
55 shades of gay është një rrëfim burleskë për politikat rreth LGBTI në Ballkan dhe Evropë. Politikanët lokalë të Ballkanit përpiqen të manipulojnë e mashtrojnë zyrtarët e BE-së, mercenarët humanitarë të NGO-ve ndërkombëtare shpesh shfrytëzojnë terrenin homofob për të vjelur fonde e për të realizuar projektet e tyre sociale e edukative [të tipit të punëtorive e seminareve për mënyrën e përdorimit të kondomëve], ndërsa që zyrtarë të BE–së, duke shfrytëzuar pozitën e tyre superiore financiare e politike, përpiqen t’i nënshtrojnë të gjithë.
Në këtë trini [Manipulim. Abuzim. Nënshtrim], pyetja që shtron shfaqja është:
a është i mundur një çlirim seksual [sexual liberation] në Ballkan? Ose, a mundet Ballkani ta nisë një ‘Pranverë ballkanike të revolucionit seksual’?
Në shfaqje, një çift gay bën kërkesë për kurorëzim në një qytet provincial konservativ dhe thellësisht homofob. Kërkesa bëhet në kohën kur shoqata italiane Don Bosco ka nisur në qytet ndërtimin e një fabrike për prodhimin e prezervativëve, një projekt ky që është përkrahur financiarisht nga Bashkimi Evropian dhe që synon zvogëlimin e papunësisë në atë qytet ku papunësia shkon deri në 90%. Intelektualë, artistë, politikanë, përfaqësues të fesë e bombahedhës profesionistë angazhohen që kjo martesë të mos ndodhë, pavarësisht se martesa e çifteve të së njëjtës gjini lejohet me kushtetutën e vendit, të cilën kryeministri e ka nënshkruar simbas udhëzimeve të BE-së.
55 shades of gay është realizuar nga një kastë e 5 aktorëve të mrekullueshëm kosovarë dhe nga një ekip i artistëve teatrorë eminentë nga Gjermania, Kosova, Franca dhe Serbia.
Kjo shfaqje është financuar nga The Olof Palme International Center dhe Goethe Institute.
Menaxhere e skenës: Lendita Idrizi / Ass. e produksionit: Verona Koxha / Drejtor teknik: Denis Berisha / Ndriçimi: Mursel Bekteshi./ KultPlus.com
Regjisori i njohur boshnjak Dino Mustafiq është rikthyer sërish në Tiranë, pas suksesit me veprën “Equus” që u ngjit në skenën e Teatrit Kombëtar.
Nën shoqërinë e Ema Andreas, Mustafiq ka dëgjuar intepretimet e aktorëve meshkuj që hynë në audicion për një rol në shfaqjen “Nëna e fëmija”, e Jon Fosse që do të vihet në skenë nga Dino Mustafiq. Dukej një numër i madh djemsh nën moshën 25 vjeç të interesuar për këtë rol.
Në këtë audicion u përzgjodh aktori Matia Llupa. Tulla – Culture Center do të presë ‘Nëna e fëemija’ të Fosse, me regji të Dino Mustafiq në fund të muajit tetor.
Vepra do të mbështetet nga Fondacioni M.A.M.I lindur në Bosnjë, me origjinë shqiptare, Dino Mustafiq, e ka lidhur jetën herët me skenën. Ai është diplomuar në Akademinë e Arteve të Bukura në Sarajevë, dhe është drejtor i një festivali ndërkombëtar teatror MESS, që mbahet në Sarajevë prej gati 20 vitesh. Në skenën e Teatrit Kombëtar ai solli pak muaj më parë një nga veprat më të vështira të Peter Shaffer.
Vendosja në skenë e veprës së Peter Shaffer nuk është hera e parë e bashkëpunimit të regjisorit Mustafiq me teatrot shqiptare.
Me Teatrin shqiptar në Shkup ka ngjitur në skenë shfaqjen “Gjenerali i ushtrisë së vdekur”, vepër e Ismail Kadaresë. Në bashkëpunim me Teatrin Kombëtar të Kosovës ka ngjitur në skenë veprën teatrore “Rock’N’Roll”. Po ashtu, sërish në bashkëpunim me Teatrin Shqiptar në Shkup, ka sjellë shfaqjen “Opera për tre grosh”. “Nëna e fëmija” e dramaturgut norvegjez Fosse është ngjitur më parë në skenën e Teatrit Kombëtar të Kosovës, nën regjinë e Bekim Lumit. Drama trajton një temë universal, që është ajo e abortit dhe braktisjes së fëmijës, përmes katër personazheve. Një djalë kthehet tek e ëma pas më shumë se 20 vjetësh në kërkim të arsyes për braktisjen e tij. / KultPlus.com
Para 3 muajsh në Teatrin Kombëtar të Kosovës, u dha premiera e shfaqjes ‘Aventurat e reja të Don Kishotit’ me regji të Dino Mustafic. Ky regjisor i cili sjellë gjithmonë inskenime interesante e mjaft të fuqishme, edhe atëherë në institucionin kulturor më të lartë në vend TKK, dha një premierë të fuqishme e cila ngriti publikun në këmbë nga tri monologët që kishin për detyrë t’i shkruanin vetë aktorët që kishin personazhet kryesore në këtë projekt.
Kësisoj sot aktori Armend Smajli, i cili kishte personazhin e Don Kishotit të mesëm, publikoi në rrjetin e tij social Facebook, monologun që kishte shkruar vetë për këtë shfaqje. Armendi, monologun se çfarë do të thoshte një ‘Don Kishot’ i zakonshëm i këtij vendi përveç që e ka shkruar me shumë emocion, ai edhe e pati interpretuar me po kaq emocion në dërrasat e Teatrit Kombëtar të Kosovës.
“Para 3 muajsh në Teatër Kombëtar kisha shfaqjen “Aventurat e reja të Don Kishotit”. Regjisori i shfaqjes Dino Mustafiç më dha për detyrë që ta shkruajë vetë një monolog se çfarë do të thoshte një “Don Kishot” i zakonshëm i këtij vendi. Për ata që nuk kanë pas dhe nuk kanë mundësi me e pa shfaqjen po e ndajë monologun këtu edhe me ju”, ka shkruar Smajli.
KultPlus, po e sjellë këtë monolog për lexuesit e vet, pa ndërhyrje në tekst të shkruar nga aktori:
…as edhe njē herë nuk dëgjuam njē shpërthim dashurie apo shpërthim humanizmi dreqi e marrtë, vetëm një bombë aty e shpërthim atje, krizë andej e luftë këndej. E dimë si është lufta. E kemi provuar edhe ne dikur. Na thonin që ishte luftë për liri, luftë për paqe por me kohë kuptuam se liria nuk qenka vetëm heqja e tytës.
Dikur ishim skllevër të okupuar, tashmë jemi vetëm skllevër.
Ndasi e madhe shoqërore, pabarazi, papunsi, shkelje e të drejtave të puntorëve, fëmijëve, grave. Shkollim e shendëtsi për faqe të zezë, krim e korrupsion, politizim i skajshëm për të gjetur një vend pune.
Shëmti në rrugë, shëmti në arkitekturë, shëmti në lumenjë, shëmti në parqe e shëmti në ajër. Turp, shëmti.
E sa herë ua theme këto, cinikët më thonë; O Don Kishot ti je I çmendur, ëndërrimtar, desperados.
E si t’mos çmendëm kur shohë që gratë mendojnë a të bejnë fëmijë apo jo se skllavo pronari i saj e përjashton nga puna sapo të merr vesh që ajo është shtatzënë. Si të mos çmendēm kur shohë që edhe në paqe njerëzit ikin nga vendi i tyre për t’kërkuar një copë bukë e dinjitet.
Si të mos çmendem kur shohë që avancimet e profesorëve të universitetit bëhën me dyer tē mbyllura e më publikime të punimeve të tyre të rrejshme.
Si të mos çmendëm kur shohë kapadaiun që në mes të rrugës hapë xhamin e xhipit të zi dhe blen mallboro nga fëmiu që shetë duhan në rrugē gjersa femiu i tijë n’Xhip lozë me Iphone 10.
Si të mos çmendëm kur në shkollë mësuesi nuk jep mësim por rrahë e nxënësi në vend se të mesojë rrahë.
Sigurisht se çmendëm, çmendëm kur shohë që pleqtë e plakat mezi rrojnë me atë penzion t’mutit I cili s’ju del as për rrymë e ujë e lerë më për barna.
Si t’mos çmendëm kur vajzës 3 vjeç i shembët objekti mbi të dhe vdes!
Heeej vajza ka vdekë, ka vdekë vajza 3 vjeç. Ka vdekë Xheneta Gashi. Nuk është më.
E bashkë me të kemi vdekur edhe shumë prej nesh. Ne që nuk kemi kërkuar llogari por kemi vazhduar të pimë kafe e të vëzhgojme nga largë kur është kërkuar përgjegjësi nga të papërgjegjëshmit.
Vetëm pak…
Oh, cinikët vazhdimisht më përshpërisin diçka sa herë që revoltohëm.
Oh, po po, e di se ka edhe gjëra pozitive dhe të bukura në këtë vend. Sigurisht qē ka. Por ato as që kam ndër mend t’ua themë. Për gjërat e bukura flisni ju, ju që mbani fajin kryesorë për këto shëmtit që ua thash.
Pse mos ju erdhëm në shtëpitë e juaja për t’ju thënë; Ju lutëm zgjohuni, ejani na udhëhiqni, na qevërisni, na shërbeni? Jo, vetë u zgjuat e na thatë se po deshironi të jeni shërbetorē të mirë. Prandaj nga unë mos pritni lavde por shërbeni, shërbeni sepse vetë kështu kërkuat, shërbeni nanën ua qifsha.
Poo i çmendur jam. Unë duhet të jem i çmendur, se kjo botë nuk do të egzistonte po t’mos kishte njerëz të çmendur si unë e si disa prej jush. Ua them këto sepse e di që Don Kishot nuk jam vetëm unë ketu, jemi më shumë sesa dëgjohemi.
Miq të mi, aman mos zgjidhni heshtjën e frikën karrshi shtypësve, se heshtja, frika nga pasojat i frymëzon edhe më shumë cinikët dhe shtypësit, e kjo na shëndrron në skllevër të diciplinuar. Hiqeni nga mendja juaj heshtjën, frikēn nga pasojat e shtypësve.
Ky rrugëtim është i zorshëm, shpeshëherë edhe jo pragmatik, i kotë për cinikët.
Sigurisht se do të humbasim ndonjë round, ndoshta edhe mē shumë rounde, por mos refuzoni të perpiqeni, mos refuzoni të endërroni.
Kjo botë mbase është përjetësisht e pandreqshme, por i përjetshëm është edhe ideali për ta ndrequr atë!
(Foto nga shfaqja: Jetmir Idrizi)
Sarandë Selimi
Në Teatrin e Qytetit ‘Bekim Fehmiu’ në Prizren, qysh më 27 gusht kanë nis provat për shfaqjen e re e cila njëherësh edhe do të hapë sezonin në këtë institucion. ‘Ata që ikin’ me tekst e regji të Kushtrim Bekteshit, është drama e cila ka mbledhur rreth vetës gjithsej 12 aktorë, të cilët do i dhënë frymë kësaj shfaqje.
Për të folur më shumë rreth tekstit, inskenimit dhe punës që është bërë deri më tani, për KultPlus, foli regjisori Kushtrim Bekteshi.
“‘Ata që ikin’ është një dramë që e kam shkruar para dhjetë vitesh. Shpesh kam menduar ta inskenoj, por kur më është ofruar mundësia jam tërhequr sepse konsideroja se më duhet kohë derisa të krijoj distancën e duhur për t’iu qasur tekstit si regjisor, e duke shmangur subjektivitetin e të qenurit vetë autor i tekstit. Tanimë e ndjej se e kam krijuar atë distancë”, tha për fillim regjisori Bekteshi, duke vazhduar tutje të flas për përrallën e kësaj drame.
Ai tregoi se drama trajton fatet e njerëzve që ikin, qoftë nga e kaluara, nga dashuria, nga tmerri i përditshmërisë nga realiteti që ua zë frymën, nga vetvetja; me shpresë se një ditë do të ndjehen të plotësuar dhe të lumtur.
Në kastën e aktorëve të kësaj shfaqje bëjnë pjesë gjithsej 12 aktorë: Xhevdet Doda, Donikë Ahmeti (aktore mysafire), Ernest Malazogu, Fetah Paçarizi, Alban Krasniqi, Zanë Duraku, Hajat Toçilla, Edona Sopaj, Alban Morina, Rifat Smani, Alban Çela si dhe Afrim Kasapolli, për të cilin regjisori Bekteshi, tha se ka një konsideratë shumë të lartë dhe ndjehet i nderuar që ka pranuar të jetë në ekipin e shfaqjes së tij.
“Jam shumë i kënaqur si po zhvillohet procesi i provave. Është hera e dytë që punoj në këtë teatër dhe shumicën e aktorëve i njoh shumë mirë, prandaj edhe kënaqësia e bashkëpunimit është po e njëjta si para dy vitesh. Bile mund të them se tani aktorët e këtij teatri i kam gjetur në kondicion edhe më të mirë, e kjo falë angazhimeve të vazhdueshme që kanë pasur në shumë shfaqje të suksesshme që janë realizuar në këtë teatër. Me pjesën tjetër të aktorëve, me të cilët po bashkëpunoj për herë të parë, ndjej të njëjtën frymë të bashkëpunimit kreativ, të njëjtën energji pozitive dhe elasticitet interpretues. Gjitha këto më japin një siguri se procesi i përgatitjes se shfaqjes do të rrjedh pa komplikime dhe besoj se produkti final do të rezultojë i suksesshëm”, theksoi regjisori Kushtim Bekteshi, ku poashtu tregoi edhe për pjesën tjetër të ekipit.
“Kostumografe është Samka Ferri, me të cilën është jo vetëm kënaqësi, por edhe privilegj të bashkëpunosh. Është shfaqja e katërt që bashkëpunoj me Samkën dhe besoj se do të bashkëpunojmë edhe në shumë shfaqje tjera. Ndërsa skenograf është Mentor Berisha, një skenograf i ri dhe tejet kreativ, me të cilin po bashkëpunoj për herë të dytë”, tha ai.
‘Ata që ikin’, pritet të dalë me premierë në fund të muajit tetor në Teatrin e Qytetit ‘Bekim Fehmiu’ në Prizren./ KultPlus.com