Përveç shkarkimit të Këshillit Drejtues – që e kërkoi qysh në ditën e parë kur u rikthye si drejtor i përgjithshëm i Teatrit Kombëtar të Kosovës – Agim Sopi i ka shtuar kërkesës së tij edhe dy të tjera: auditimin e pavarur financiar e ligjor të këtij institucioni dhe kod të pavarur buxhetor.
Me këtë kërkesë, zyrtarisht i është drejtuar ministrit të Kulturës, Rinisë dhe Sportit, Kujtim Gashi. E ka dorëzuar të martën e javës së kaluar, por as pas një jave nuk ka marrë asnjë përgjigje. Këshilltari i ministrit ka dhënë përgjigje për secilën kërkesë, nëpërmjet gazetës.
Sopi ka përsëritur edhe në shkresë akuzat që i ka bërë sapo ishte kthyer në pozitën e drejtorit, të hënën e kaluar në një konferencë për media: se shumica e anëtarëve të Këshillit Drejtues nuk posedojnë kualifikimet përkatëse dhe kanë konflikt interesi.
E krejt në fund, ai ka renditur kërkesat: Të ndërmerrni hapa urgjentë për rikthimin e Ligjit në TKK; të shkarkoni Këshillin Drejtues të kundërligjshëm të TKK-së dhe ta zëvendësoni me një kompozicion me ‘persona kredibilë, me autoritet dhe me përgatitje profesionale në fushën e teatrit; të ndërmerrni hapa urgjentë ligjorë për zhbllokimin financiar të TKK-së duke krijuar Kodin e veçantë buxhetor; të urdhëroni auditim të pavarur financiar dhe ligjor në TKK, ka shkruar Sopi, përcjell Koha Ditore./ KultPlus.com
Pas grevës nëntë ditore të Teatrit Kombëtar të Kosovës dhe institucioneve të tjera vartëse të Ministrisë së Kulturës, TKK-ja ka treguar se po u rikthehet shfaqjeve me program të ri sa u përket datave, shkruan KultPlus.
TKK njofton se prej ditës së hënë fillon programi i muajit shtator me premierën e shfaqjes “Kopshti i Vishnjeve”, nga Anton Çehov me regji të Ilir Bokshit, pastaj reprizat do jenë më datë 18 dhe 19 shtator.
Repertori vazhdon me shfaqjen “Arturo Ui” në regji të Bekim Lumit, mandej “Kaligula” nga Albert Kamy, duke vazhduar me paraqitje edhe në Festivalin e Teatrove në Tiranë.
“Shfaqja “Bordel Ballkan” në regji të Andras Urban, pas ndryshimit të orarit nuk ka qenë e planifikuar të luhet në repertor të këtij muaji”,ka njoftuar TKK-ja./ KultPlus.com
Gati gjashtë muaj pasi u shkarkua, regjisori Agim Sopi do të rikthehet në pozitën e drejtorit të përgjithshëm të Teatrit Kombëtar të Kosovës. Këshilli Drejtues i Teatrit Kombëtar të Kosovës del ta ketë shkarkuar pa kurrfarë arsyeje ligjore.
Sopit këtë ia ka vërtetuar Këshilli i Pavarur Mbikëqyrës për Shërbimin Civil të Kosovës. Nëpërmjet një vendimi, të cilin vetëm Gjykata mund ta hedhë poshtë, Ministria e Kulturës dhe Këshilli Drejtues i TKK-së duhet ta kthejnë regjisorin Sopi në punë.
“Obligohet Këshilli Drejtues i Teatrit Kombëtar të Kosovës dhe ministri i Ministrisë së Kulturës, Rinisë dhe Sportit për zbatimin e këtij vendimi në afatin prej 15 ditësh nga dita e pranimit të tij, duke kthyer ankuesin Agim Sopi në vendin e punës ‘Drejtor i përgjithshëm i Teatrit Kombëtar të Kosovës’”, shkruhet në vendimin e KPMShCK-së të protokolluar të martën, shkruan Koha Ditore.
Shoqata e Artistëve të Teatrit të Kosovës ka dalë me një reagim të cilët e mbështesin grevën e aktorëve dhe performuesve, si pasojë e mospërmbushjes së kërkesave. KultPlus më poshtë ju sjellë të plotë reagimin e kësaj shoqate.
Kumtesë nr. 19
(Përkitazi me grevën e aktorëve dhe punëtorëve të Teatrit Kombëtar të Kosovës – TKK për mos-rritjen e pagës bazë)
Bordi Ekzekutiv i Shoqatës së Artistëve të Teatrit të Kosovës (SHATK) ka ndjekur me vëmendje të gjitha zhvillimet rreth rritjes së premtuar të pagës bazë të aktorëve dhe punëtorëve të TKK-së që është kërkuar që nga qershori i vitit 2016 dhe në vazhdimësi.
Mostrajtimi i dinjitetshëm ndaj aktorëve dhe punëtorëve të TKK-së si nga ana e Ministrisë së Kulturës së Kosovës ashtu dhe nga ana e Kuvendit dhe Qeverisë së Republikës Kosovës, pas shumë kërkesave të bëra rreth rritjes së pagës bazë jep për të kuptuar se arti dhe krijuesit e tij nuk vlerësohen por nënçmohen pasi që kërkesat e tyre nuk trajtohen me seriozitet.
Mospërfillja e kërkesave të shumta të drejtuara ndaj MKRS-së dhe Qeverisë, shkelja e vet premtimeve të dhëna nga ana e vet Ministrisë së e Kulturës, trajtimi nënvlerësues ndaj performuesve kulturor duhet të marrë fund.
SHATK, shpreh indinjim të thellë për mosrealizimin e premtimeve dhe për mostrajtimin serioz të kësaj çështje dhe kërkon këndjellje dhe reagim të menjëhershëm nga ana e zyrtarëve kompetent të MKRS-së dhe Qeverisë së Republikës Kosovës.
SHATK përkrah grevën e nisur nga aktorët dhe punëtorë e TKK-së, deri në plotësim të kushteve të kërkuara – rritjen e pagës bazë për performuesit e kulturës. SHATK me këtë rast fton edhe publikun të tregojë mirëkuptim ndaj kërkesave të shprehura dhe solidarizim me to.
Bordi Ekzekutiv i SHATK-së i bën thirrje Ministrisë së Kulturës, Rinisë dhe Sportit që të realizojë premtimin e dhënë, e njëherit SHATK shpreh përkrahje të plotë për performuesit e kulturës deri në plotësimin e kërkesës legjitime, për trajtim të dinjitetshëm.
Prishtinë, 05/09/2018 Bordi Ekzekutiv i SHATK-së
Në Teatrin Kombëtar të Kosovës mbrëmë është dhënë premiera e shfaqjes “Si ta vrasim presidentin” me tekst të dramaturgut, Miro Gavran e regji të Marigona Bekteshi-Ferati, shkruan KultPlus.
Dy vëllezër të rritur së bashku, Igoro dhe Roberti takohen pas disa viteve mirëpo pikëpamjet e tyre tani janë të kundërta. Gëzimin që vëllezërit do bëhen së bashku e zbeh vrasja e presidentit të Amerikës, që po e planifikon Igoro.
Igoro i cili erdhi përmes lojës së aktorit Mirsad Ferati është kundër globalizimit dhe është i përgatitur të luftojë në çfarëdo forme për një botë të re. Ai vjen nga kontinenti i Amerikës për të takuar të vëllain dhe këmbëngulë në besimin e tij se shtetet e mëdha po e shfrytëzojnë ndikimin e tyre në botë për të shkatërruar vendet më të dobëta.
Zgjedhja e vetme sipas tij dhe grupit që ai udhëheq është vrasja e presidenti dhe njerëzve të cilët janë në pozita të larta.
Por a do lejojnë vëllai i tij Roberti (aktori Fatmir Haliti) dhe gruaja e tij (aktorja Rabije Kryeziu) diçka të tillë? Po e fejuara e tij (aktorja Njomza Tmava), do e përkrahë këtë plan?
Pikërisht këto elemente intriguese dhe shumë të tjera, të cilat i ka përfshirë në tekst dramaturgu Miro Gavran kanë zgjuar kureshtjen e regjisores, Marigona Bekteshi-Ferati, e cila për herë të tretë me radhë inskenon tekste të dramaturgut Miro Gavran në Kosovë.
Një tekst të këtij dramaturgu regjisorja zbuloi për KultPlus se do e inskenojë edhe në Shqipëri, në muajin tetor gjersa thekson se kjo shfaqje në qendër ka vendet të cilat janë duke kaluar nëpër tranzicion.
“Kemi dy vëllezër që kanë pikëpamje të ndryshme ku njëri është kundër globalizmit dhe tjetri pro. Njëri mundohet që të bind tjetrin se ne jetojmë në një botë jo të mirë, ku nuk kemi të drejta. Tjetri mendon që ata jetojnë në kohën më të mirë. Pra shfaqja është e hapur dhe më mundësi zgjedhjeje. Publiku mund ta përkrahë Igorin kundër globalizmit apo Robertin i cili është pro globalizmit”, tha ajo.
Mirëpo edhe pse regjisorja tashmë e ka të njohur punën e dramaturgut Gavran, i cili prinë në listën e autorëve më të përkthyer kroat për aktoren Rabije Kryeziu kjo ka qenë hera e parë që punon me një tekst të tij.
“Kur e kam lexuar tekstin kam pasur dyshimet e mia për shkak se është një tekst i bazuar në eksperiencën e aktorëve dhe në fuqinë e aktorëve. Mirëpo i kam në qejf sfidat dhe kam pasur dëshirë të sfidoj veten. Prezenca e autorit e ka bërë edhe më të vështirë lojën tonë dhe gjithmonë ka qenë ajo dilemë nëse po bëjmë atë që është e duhur”, tha aktorja për KultPlus.
Këtë dramë Miro Gavran e shkroi 15 vite më parë, në kohën kur në Kroaci është diskutuar për globalizimin se a është apo jo ajo një çështje jetike. Në vorbullën e mendimeve se vendet të cilat synojnë globalizmin a janë duke shkuar në drejtimin e duhur.
“Në dramë kam dashur që të tregoj në rrëfim familjar. Momentet më të rënda të njeriut janë kur botëkuptimet në lidhje me jetën nuk janë të njëjta me anëtarët e familjes. Në këtë rast të Igorit, më vëllain dhe gruan e tij. Kjo dhemb më shumë sesa kur ke mosmarrëveshje me dikë tjetër. Unë këtu nuk kam dhënë përgjigje por publiku duhet t’i gjejë përgjigjet dhe të vendos se cila është më e përafërt me mendimet e tyre”, tregoi dramaturgo Miro Gavran për KultPlus, i cili ka ardhur në Kosovës, enkas për këtë shfaqje.
Sipas dramaturgut kur janë në pyetje temat politike është mirë që të tregohen botëkuptimet e kundërta.
Viteve të fundit ai ka shkruar shumë komedi pasi që siç thotë ai, është kënaqësi të bësh njerëzit të qeshësh, duke mos u larguar nga dramat tek të cilat kthehet herë pas herë.
Tutje dramaturgu, Miro Gavran, bisedoi për KultPlus edhe për mënyrën e inskenimit të tekstit të tij në skenën e vogël të TKK-së.
“Secili aktorë e ka mbrojtur rolin e vet në mënyrë të mirë dhe jam i lumtur edhe më punën e regjisores e cila ka bërë disa shkurtime por që nuk kanë penguar shfaqjen e cila e ruan kuptim dhe që mban një ritëm. Të gjitha kanë qenë në nivel. Unë them se një shfaqje është e mirë kur e ka erën, ngjyrën edhe shijen dhe shpresoj që kjo shfaqje i ka pasur të tirja dhe do të depërtojë të shikuesit”, tha ai duke theksuar se kjo shfaqje e nxitë publikun që të mendojë për jetën e tyre.
Sonte të gjithë të interesuarit mund të shohin reprizën e parë të kësaj shfaqje në Teatrin Kombëtar të Kosovës, duke filluar nga ora 21:00. Ndërsa, kjo është shfaqja e fundit për këtë sezonë në Teatrin Kombëtar të Kosovës, aty ku deri më 1 shtator nuk do të ketë më premiera./ KultPlus.com
Këmishat e varura mbi skenë e dërgojnë publikun në një realitet jo dhe shumë të lehtë. Përmes njollave të gjakut kuptohet lehtë se nga do të ecën loja e aktorëve, përmes yllit të Davidit që qëndron nën këmishat kaltër e bardhë, historia e Anne Frank vjen më afër se kurrë për publikun e Prishtinës.
Publiku është i vendosur në të tri anët e shfaqjes, shpesh nuk e ndan as edhe një hap me personazhet që jo rrallë herë do t’i shohin në sy. Derisa publiku zë vend, aktorët i gjenë në skenë, nën avullin e këmishëve që zihen në kazanët pranë tyre. Këmishat e varura, herë ngrihen e herë zbresin poshtë. Ato përfaqësojnë simbolikën e krejt asaj çfarë do të zhvillohet mes lojës së aktorëve.
“Ana dhe Zefi” është vepër e shkruar nga dramaturgu holandez Ad de Bont, dramat e të cilit janë mjaft të njohura në Gjermani. “Ana dhe Zefi”, e cila është shkruar në vitin 2009 nga dramaturgu holandez, mbrëmë erdhi premierë për publikun e Prishtinës, duke ngre paralelet mes një viktime të Holokaustit që donte fort të shkruante dhe një viktime të gjakmarrjes që donte fort të bëhej aktor. Vdekja u zbulon të përbashkëtën e tyre. Anne Frank e cila njoftohet me historinë e një shqiptari të vrarë, e ka të vështirë ta kuptoj këtë përcaktim të kanunit. Të dy dëshmojnë vetëm për 15 vite jetë, të cilave u paraprijnë dy vite izolim. Në vdekje duket se gjejnë lirinë ndërsa zbrazin para publikut të kaluarën me kujtime. Përqafojnë njëri-tjetrin ashtu siç përqafojnë historitë e ngjashme të tyre, të cilat ua kanë përcaktuar të tjerët. “Para se m’e gjujtë, bani za. Kujdesu mos m’e lanë të plagosun. Vraje me nji plumb. Ktheje trupin n’shpinë. Vendose pushkën te kryet e tij”, vjen përmes zërit të secilit personazh, derisa të gjithë zërat bashkohen e veçse e fuqizojnë këtë thirrje që e përfaqëson Kanunin e që është përfaqësuar shpesh në veprime të ndryshme, një vrasje e përcaktuar në rregulla që fton për vrasje të tjera me ceremoni para dhe pas saj.
Ernest Zymberi në rolin e Zef Bungës është rritur në një shtëpi që mes shumë rrobave, mbante një këmishë të gjakosur që priste që ngjyra e gjakut të nxihej, atëherë dhe tensionet në shtëpi do të rriteshin nga nëna e tij e cila beson që Kanuni është më i rëndësishëm se secili që është në atë familje. Përmes lojës së Irena Cahanit, ajo nuk njeh rregull tjetër pos Kanunit, i cili ka ekzistuar para tyre e do të vazhdojë të jetoj edhe pas tyre. Ajo lëviz nga një kënd në tjetrin bën punët e shtëpisë pa zhurmë veçse e ngrit fort zërin kur flitet për gjakmarrjen, ajo ia rikujton shpesh të shoqit se e kundërta e gjakmarrjes është veçori themelore e një frikacaku. Burrin e saj, babai i Zefit që vjen përmes lojës së Kushtrim Qerimit qëndron me ngulm në atë se Kanuni është shpikje e njerëzve të një kohe tjetër dhe si i tillë duhet të mos zbatohet. Nuk gjen përkrahjen e gruas as kur me valigje tregohet i bindshëm se do të largohet.
Regjisori Erson Zymberi, tha se shfaqja ka arritur konceptin e tij regjisorial pasi që shfaqja arriti fuzionin e lidhjes mes aktorëve dhe spekatatorit, kjo veçmas bazuar në përkushtimin e disiplinën e aktorëve. Ai tha se shfaqja vjen si shpëtim për ata që ëndërrojnë dhe si dënim për ata që vrasin ëndrrat.
“Shfaqja ngre dy paralale mes vajzës së famshme hebreje dhe shqiptarit Zef Bunga. Shkrimi i ndërlidh aq bukur këto histori sa që nganjëherë harrojmë se cili është shqiptari dhe cili është çifut pasi që vuajtja është e njëjtë në secilin vend. Përshtypjet e mija për këtë tekst kanë qenë që ta bëj të komunikueshëm me publikun ku jepet shfaqja dhe në anën tjetër duke mos u humb gjuhën me të cilën komunikon teksti, ky ka qenë pikësynimi im i parë, duke marrë parasysh që gjakmarrja është evidente akoma në veri të Shqipërisë, shfaqja thërret për dashuri dhe jo për vrasje”, tregoi regjisori Zymberi.
Ai tutje u shpreh se shkrirja mes zërave të kanunit të Lekë Dukagjinit për vrasje deri në një psherëtime të lehtë për dashuri, ka ardhur e tillë për t’iu shmangur vendndodhjes gjeografike të personazheve por që të arrijë ta prek një mesazh universal.
Vet shfaqja e cila fillon me thirrjen e fuqishme për gjakmarrjen ecën drejt një psherëtime të lehtë “Të dua”, në kërkim të dashurisë. Anne Frank e cila vjen përmes aktores Verona Koxha, shpreh copëzat e ditarit të cilat prekin fëmijërinë e saj deri sa më nuk kujton asgjë. Duke u rrokullisur në tokë, e herë duke lëvizur nga njëri skaj tek tjetri skaj i skenës, ajo kujton një natë të tmerrshme të verës së vitit 1944.
Për aktoren e re Verona Koxha, kjo ishte hera e parë që dëshmohet në një rol në skenën e Teatrit Kombëtar të Kosovës. Ajo e veshur me një fustan klasik të zi, mbi bluzën e bardhë e me dy gërsheta në kokë, shpreh brendinë e Anne Frankut përmes naivitetit e ndjenjave të brendshme, duke nxjerrë edhe anën më të pjekur të saj me shpresën që një ditë do ta shihte përsëri babain, ajo ecën në kujtimet e saj derisa më nuk kujton asgjë, kur sëmundja e pashërueshme përhapet me shpejtësi në kampin e përqendrimit në Bergen-Belsen.
Ngjashëm Ernest Zymberi e sjellë fëmijërinë e Zef Bungës, i cili dikur rivalitetin e vetëm që njihte në jetë, ishte ai në një lojë futbolli, ku luante me Edi Markaj që më pas do bëhej vrasësi i tij. Që nga zërat komentues të asaj loje, që ende i mungon, ai arrin deri tek lajmi për një vrasje që është vazhdimësi e një zingjiri vrasjesh për shkak të gjakmarrjes.
Ernest Zymberi tregoi për KultPlus se e cilëson si një shfaqje mjaft të ngarkuar psikologjike e fizike dhe se ka qenë mjaft impenjative për ta sjellë tekstin briliant të autorit, bazuar edhe në kërkesat e regjisorit me të cilin punon tash e një kohë të gjatë.
“Ideja dhe koncepti të bën të ndihesh në siklet gjatë gjithë kohës dhe për shkak të temës dhe mesazhit që trajton që është shumë e ndjeshme jo vetëm për aktorët por edhe për publikun. Si ekip nuk jemi të panjohur për Ersonin, kemi punuar edhe më herët me të, falë tij dhe punës së ekipit kemi arritur ta krijojmë këtë, përndryshe individualisht nuk do të mund të funksiononim siç nuk funksionon asgjë individualisht në një ekip”, është shprehur Zymberi për KultPlus.
Pothuajse të gjithë e dinë përfundimin e historisë së Anne Frankut dhe historinë se si ndodhë një vrasje për shkak të gjakmarrjes, ndërsa kjo shfaqje ecën në botën e përtejme, në ndërdijen e personazheve.
Regjisorja Marigona Bekteshi- Ferati thotë se përmes kësaj shfaqje vijnë pikërisht reagimet e personazheve pas vdekjes, gjë që vjen falë punës së aktorëve e veçmas imagjinatës së regjisorit.
“Ne pamë se çfarë mendojnë ata realisht, po të ishin gjallë si do të kishin reaguar, gjë që vetëm një imagjinatë e pasur e regjisorit mund ta sjellë. Se po të ishin ata gjallë, do të na fyenin e shumë gjëra që ata nuk mund t’i bëjnë pasi që të vdesin. Shfaqja mu duk shumë e mirë. Më rrëmbeu ajo ngjarje, për një kanun të cilin regjisori e sjellë afër për neve që nuk e kemi përjetuar. Për aq minuta sa zgjati shfaqja, regjisori na bëri të hyjmë në trupin dhe gjakun e aktorëve, të cilët e përjetonin”, u shpreh Bekteshi- Ferati për fund për KultPlus.
Shfaqja “Ana dhe Zefi”, sonte sjellë reprizën e parë në Teatrin Kombëtar të Kosovës, duke filluar nga ora 20:00./ KultPlus.com
Më 14 maj do të jepet premiera e shfaqjes “Kaligula” nga Albert Kamy më regji të Kushtrim Koliqit, në Teatrit Kombëtar të Kosovës, shkruan KultPlus.
Në kastën e aktorëve bëjnë pjesë: Adrian Morina, Allmir Suhodolli, Ard Islami, Armend Baloku, Besart Sllamniku, Gresa Pallaska, Meli Qena, Shkëlzen Veseli dhe Ylber Bardhi.
Drama “Kaligula” e Camus është shkruar për herë të parë në vitin 1938, për t’u botuar më në fund në vitin 1945. E shkruar në kohë të rëndësishme historike (Lufta e Dytë Botërore), para publikut vjen në një version të rishkruar, duke paraqitur figurën historike të një perandori romak që udhëhoqi Romën në vitet 37-41 pas Krishtit, i cili njihet në histori për çmenduritë dhe mizoritë e tij.
Drama Kaligula është një kryevepër e artit teatral. Aktuale si gjithmonë, për teatrin dhe për mendimin e sotëm, trajton revoltën dhe nënshtrimin, sjell pyetje rreth shpëtimit të shoqërisë dhe vlerave universale.
Kaligula është në kërkim të forcës absolute, është i helmuar nga mospërfillja dhe tmerri. Ai vendos të ushtrojë, përmes vrasjeve dhe perverzitetit sistematik ndaj të gjitha vlerave ekzistuese, lirinë e cila sërish i del e hidhur.
“Kaligula ynë vie duke nxitur reflektimin tonë, vie në kohën e pabarazisë dhe mjerimit, në kohën e shkeljes së të drejtave të njeriut dhe të lirive, vie në kohën e demokracisë së re, në kohën kur revolta qytetare kundër gjendjes absurde që na rrethon e që kërkon gjithnjë ndryshimin dhe përsosjen e sistemit demokratik duhet ekzistuar”, thuhet në njoftim.
Sipas të cilit Kaligula vie pranë nesh, që njohim revoltën, dhe pranë nesh që nuk njohim konceptin e revoltës…vie me shumë pyetje e shumë nxitje. Vie…apo është me nesh?!
Premiera do të jetë më 14 maj duke filluar nga ora 20:00. Ndërsa reprizat e para: 15 dhe 16 maj 2018; ora 21:00 në Teatrin Kombëtar të Kosovës. /KultPlus.com
Më 14 maj do të jepet premiera e shfaqjes “Kaligula” nga Albert Kamy më regji të Kushtrim Koliqit, në Teatrit Kombëtar të Kosovës, shkruan KultPlus.
Aktorët e kësaj shfaqje janë: Adrian Morina, Allmir Suhodolli, Ard Islami, Armend Baloku, Besart Sllamniku, Gresa Pallaska, Meli Qena, Shkëlzen Veseli dhe Ylber Bardhi.
Drama “Kaligula” e Camus është shkruar për herë të parë në vitin 1938, për t’u botuar më në fund në vitin 1945. E shkruar në kohë të rëndësishme historike (Lufta e Dytë Botërore), para publikut vjen në një version të rishkruar, duke paraqitur figurën historike të një perandori romak që udhëhoqi Romën në vitet 37-41 pas Krishtit, i cili njihet në histori për çmenduritë dhe mizoritë e tij.
Drama Kaligula është një kryevepër e artit teatral. Aktuale si gjithmonë, për teatrin dhe për mendimin e sotëm, trajton revoltën dhe nënshtrimin, sjell pyetje rreth shpëtimit të shoqërisë dhe vlerave universale.
Kaligula është në kërkim të forcës absolute, është i helmuar nga mospërfillja dhe tmerri. Ai vendos të ushtrojë, përmes vrasjeve dhe perverzitetit sistematik ndaj të gjitha vlerave ekzistuese, lirinë e cila sërish i del e hidhur.
“Kaligula ynë vie duke nxitur reflektimin tonë, vie në kohën e pabarazisë dhe mjerimit, në kohën e shkeljes së të drejtave të njeriut dhe të lirive, vie në kohën e demokracisë së re, në kohën kur revolta qytetare kundër gjendjes absurde që na rrethon e që kërkon gjithnjë ndryshimin dhe përsosjen e sistemit demokratik duhet ekzistuar”, thuhet në njoftim.
Sipas të cilit Kaligula vie pranë nesh, që njohim revoltën, dhe pranë nesh që nuk njohim konceptin e revoltës…vie me shumë pyetje e shumë nxitje. Vie…apo është me nesh?!
Premiera do të jetë më 14 maj duke filluar nga ora 21:00. Ndërsa reprizat e para: 15 dhe 16 maj 2018; ora 21:00 në Teatrin Kombëtar të Kosovës. /KultPlus.com
Trupa rezidente e Teatrit Kombëtarë të Kosovës, dje kanë paralajmëruar se prej ditës së parë të majit do t’i rikthehen grevës dhe do të bëjnë bllokim total të këtij institucioni, shkruan KultPlus.
Aktorët e Teatrit Kombëtar të Kosovës, në tetor të vitit të kaluar u kishin dhënë dhjetë ditë afat ministrit të Kulturës e Qeverisë së Kosovës që të plotësoj kërkesa e tyre e cila vazhdon të jetë e njëjtë: rritja e pagave.
Mirëpo greva e cila ishte paralajmëruar pikërisht për sot është shtyrë përsëri, kanë njoftuar për KultPlus, aktorët e këtij institucioni.
“Tashmë u bënë disa muaj prej kur MKRS-ja së bashku me një grup punues vazhdimisht janë takuar dhe kanë punuar që të arrihet realizimi i kërkesave të aktorëve. Diçka është punuar dhe ka lëvizur por asgjë përfundimisht dhe konkretisht, prandaj ne shqyrtuam mundësin e rikthimit në grevë pasi që u bënë shumë muaj pritje. Tani na është kërkuar edhe një javë kohë pasi që Ministri i Kulturës qenka jashtë vendit deri këtë të premte. Ne sigurisht që nuk duam të bëhemi arrogant dhe ashtu siç kemi pritur këta muaj do të presim edhe një javë. Vazhdojmë te jemi optimist dhe akoma duam të besojmë në gatishmërinë pozitive të Ministrit Gashi. Pas të hënës që po vjen besoje do të kuptohet gjithçka”, thuhet në njoftimin dërguar redaksisë së KultPlus.
Pas një marrëveshjeje me Kujtim Gashin, ministrin e Kulturës, aktorët e patën pezulluar grevën pasi që patën marrë premtim verbal për rritje të rrogës. Mirëpo kjo çështje është bllokuar për shkak të Rregullores për gradimin dhe pagat e krijuesve e të performuesve të kulturës dhe punonjësve të trashëgimisë kulturore, e cila ende nuk është finalizuar./ KultPlus.com
Më 3 prill është data kur aktorja Kumrije Hoxha mori detyrën e udhëheqëses së detyrës së drejtorit në Teatrin Kombëtar të Kosovës.
Fiks sot pas dy javëve Kumrije Hoxha, nuk është më në krye të këtij institucioni, shkruan KultPlus. Kumrije Hoxha, ka dërguar dorëheqjen e saj tek Këshilli Drejtues i TKK-së, e krejt kjo për shkaqe shëndetësore.
Lajmin për dorëheqjen e Hoxhës, e ka konfirmuar për KultPlus, kryetarja e Këshillit Drejtues Burbuqe Berisha, e cila ka thënë se Kumrije Hoxha është dorëhequr për shkaqe shëndetësore.
Rikujtojmë se ish-drejtori i Teatrit Kombëtar, Agim Sopi është shkarkuar me gjashtë vota për dhe një abstenim.
Në fillim të këtij viti Sopi kishte akuzuar anëtarët e Këshillit Drejtues të TKK-së si njerëz të ndikuar nga politika po censurojnë programin e teatrit./ KultPlus.com
Për shkak të lëndimit të aktorit Shkëlqim Islami në rolin kryesor të shfaqjes “Hamleti simbas Horacit”, me regji të Ilirjan Himajt, kjo shfaqje e paraparë ta ketë premierën sot më 16 prill, është anuluar, shkruan KultPlus.
Lajmi është bërë i ditur nga Teatri Kombëtar i Kosovës, të cilët në një njoftim kanë thënë se kjo shfaqje pritet të vijë me premierë përgjatë muajit maj.
“Njoftim
Të nderuar artdashës dhe publik i Teatrit Kombëtar të Kosovës. Me keqardhje ju njoftojmë se për shkak të lendimit të aktorit në rol kryesor, Premiera “Hamleti simbas Horacit” e planifikuar të mbahet me 16 Prill (e hënë) si dhe reprizat me 17.19 dhe 25 do të anulohen. Duke shpresuar në shërimin sa më të shpejtë të aktorit dhe rikthimit të tij në skenë, kjo shfaqje pritet të vijë përpara publikut gjatë muajit Maj.
Ju falenderojmë për mirëkuptim!”, thuhet në njoftimin e TKK-së./ KultPlus.com
Që nga dje repertori i Teatrit Kombëtar të Kosovës është ndërprerë, shkruan KultPlus.
Krejt kjo ka ardhë si pasojë e ujërave të zeza që kanë kapluar këtë institucion, për të cilën arsye para pak ditësh edhe vetë ministri i Ministrisë së Kulturës Kujtim Gashi, doli në inspektim të këtij institucioni. Edhe pse, premtimet që do të rregullohet shumë shpejt gjithçka u dhanë, një gjë e tillë nuk ka ndodhur dhe si pasojë e kësaj puna është ndërprerë.
“Njoftim
Ju njoftojmë së repertori i TKK-së ndërprehet përkohësisht për një afat të pacaktuar prej datës 10 prill 2018, për shkak të ujërave të zeza të shkaktuara në objektin e Teatrit (deri në dezinfektimin e hapësirës së TKK-së).
Për çdo eventualitet ju njoftojmë”, thuhet në një njoftim në rrjetin social Facebook, nga drejtuesit e Teatrit Kombëtar të Kosovës./ KultPlus.com
Ministri i Kulturës Kujtim Gashi sot ka vizituar Teatrin Kombëtar dhe Bibliotekën Kombëtare të Kosovës. Nga këto institucione ai është prononcuar se ministria do të realizojë projektet të cilat do të hyjnë në buxhetin e ministrisë duke bërë kështu që këto institucione të mos përballen me problemet të cilat i kanë sivjet edhe vitin e ardhshëm, shkruan KultPlus.
Teatri Kombëtar i Kosovës ditë më parë ka pasur probleme me kanalizimin ku nga bllokimi i kanalizimit afër teatrit, ujërat e zeza janë kthyer brenda hapësirave të vet këtij institucioni. Në anën tjetër problem me ujin ka edhe Biblioteka Kombëtare. Hapësirat e Bibliotekës e sidomos katet nën tokë mbushen me ujë kur ka reshje shiu. Po ashtu lagështia e cila krijohet në këto hapësira paraqet rrezik edhe për dëmtim të ekzemplarëve që gjenden aty.
Ministri i Kulturës me të arritur në Bibliotekën Kombëtare është shoqëruar nga drejtori i Bibliotekës Fazli Gajraku në katin minus 2, ku gjatë shirave hynë uji dhe ekzemplarët por edhe hapësira atje pësojnë dëmtime. Drejtori i Bibliotekës Fazli Gajraku sqaroi procedurat të cilat i ndërmarrin për largimin ujit dhe sqaroi për dëmtimet të cilat i pësojnë koleksionet e çmueshme të cilat ruhen në ato hapësira.
Ministri i Kulturës, Kujtim Gashi pas takimit me bordin drejtues u shpreh se intervenimi në sanimin e problemeve të tilla si kanalizimi në Teatrin Kombëtar dhe vërshimet e ujit në Bibliotekën Kombëtare do të jenë prioritet i kabinetit të tij.
“Kjo vizitë është në vazhdën e vizitave për shkak të problemeve të ujit. Ne biseduam me menaxhmentin për intervenimet që do ti bëjmë gjatë vitit 2018. Ky objekt nuk ka as kanalizim dhe as sistem për mbrojtje nga lagështia. Ne po punojmë në rishikimin e buxhetit dhe jemi duke shikuar për të investuar në ruajtjen e të gjithë atyre ekzemplarëve”, tha ai duke shtuar se kjo ministri ka trashëguar probleme të mëdha të cilave po përpiqen të ju gjejnë zgjidhje.
“Nga ajo që pamë shihet që është intervenim i kushtueshëm dhe kemi të bëjmë me dy kate nën tokë, do të bëjmë një projekt të përbashkët, në qershor do të bëjmë planin konkret dhe dimri i ardhshëm do ta gjejë të rregulluar. Këto janë probleme nga mos intervenimi i ministrave të kaluar. Do të fokusohemi në intervenime urgjente siç është teatri dhe biblioteka. Po ashtu do të shikojmë sa mjete kemi në dispozicion dhe projekte të cilat nuk janë primare do të anashkalohen në mënyrë që të kemi mjete të mjaftueshme”, tha ai.
Fazli Gajraku drejtor i Bibliotekës Kombëtare tha se është nevojë urgjentë rregullimi i hapësirave në mënyrë që të mos dëmtohen ekzemplarët.
“Mendoj që ky është lajmi më i mire që i jepet kulturës, pra intervenimin në Bibliotekë. Biblioteka i ka dy projekte që duhet të realizoj. Projekti i parë ka të bëjë me rregullimin e ngrohjes, problemit te kanalizimit dhe çështje tjera teknike. Ndërkaq Projekti i dytë është projekti i rinovimit të bibliotekës”, tha ai duke theksuar rendësin e paçmueshme që kanë ekzemplarët e bibliotekës për Kosovën dhe duke theksuar se pikërisht për këtë shkak, më shumë investime duhet që të bëhen në Bibliotekë./ KultPlus.com
Në Teatrin Kombëtar të Kosovës sot është zgjedhur Ushtrues Detyre aktorja Kumrije Hoxha.
Ajo sot ka marr këtë pozitë pasi që ish-drejtori i Teatrit Kombëtar, Agim Sopi është shkarkuar me gjashtë vota për dhe një abstenim.
Në fillim të këtij viti Sopi kishte akuzuar anëtarët e Këshillit Drejtues të TKK-së si njerëz të ndikuar nga politika po censurojnë programin e teatrit.
Agim Sopi ishte shkarkuar të hënën e javë së kaluar nga Këshilli Drejtues i Teatrit Kombëtar të Kosovës, përcjell Insajderi./ KultPlus.com
Mbrëmë në skenën e madhe të Teatrit Kombëtar të Kosovës, erdhi premierë shfaqja “Pasioni”, me tekst të Sabri Hamitit e regji të Martin Kočovckit, shkruan KultPlus.
Pamja e kësaj skene fillimisht vjen e mjegulluar, duke i lenë kështu të paidentifikuar personazhet e shfaqjes. Ata do të shfaqen më pas e jo dhe pak herë gjatë shfaqjes do të nisin në kor refrenin që nis me fjalët “Na duhet gjak”. Ata jetojnë në një tokë të djegur katër herë nga lufta e si e tillë qëndrojnë në plagët qindravjeçare. Në një vend ku kanë mbetur gjurmët e pashlyeshme të luftës, aty ku përditshmëria karakterizohet nga shtëpitë e djegura, fëmijë jetim e gra të përdhunuara. Në një vend në të cilin gjithçka merret si e mirëqenë, për ta përshkruar kështu masën amorfe në të cilën individët nuk kanë emra e as individualitet, një botë ku njerëzit janë shndërruar në numra përbrenda një jete virtuale, pa emocion, pa respekt e pa dashuri.
Dy vëllezër binjak qëndrojnë peng i një historie të pa rrëfyer për njëzetë vite, e në qendër të tyre qëndron nëna e tyre (Hana), e cila rrëfen vuajtjet për ta mbajtur gjallë familjen.
Regjisori i shfaqjes Martin Kočovcki tregoi për KultPlus se fillimisht ishte impresionuar nga teksti dhe kishte menduar që do të nxjerrë diçka të veçantë, por me kalimin e kohës e kishte kuptuar që teksti nuk ishte edhe aq i thjeshtë por gjatë punës me gjithë ekipin thotë se e kanë gjetur mënyrë për të sjellë diçka të veçantë.
“E gjithë shfaqja ka për qëllim të nxjerrë në pah se jeta jonë është si një rreth, ne jetojmë në kohë të paqes por gjithnjë shqetësohemi edhe për kohën e luftës. Le ta jetojmë kohën e paqes, le ta gjejmë atë që kemi brenda vetes dhe kështu mund t’i shtyjmë të këqijat që vijnë”, ishte mesazhi i regjisorit Kočovcki.
Loja e kësaj shfaqje u jetësua nga aktorët: ShkëlzenVeseli, Gresa Pallaska, Ard Islami, Arta Selimi, Shpejtim Kastrati, Ismet Azemi, Lumnie Sopi, Semira Latifi dhe Shengyl Ismaili.
Për regjisori Kočovcki, kjo është hera e dytë që punon me aktorët e Teatrit Kombëtar të Kosovës, por shfaqjet e tij kanë ardhur edhe më parë në Kosovë, gjë që ka bërë që disa nga aktorët të njoftohen me punën e tij. Ai tha për KultPlus se ndihet i kënaqur me punën e aktorëve të Kosovës dhe se ndihet i vlerësuar për ftesën që të punoj me ta.
“Përkundër që kam punuar në shumë vende të Ballkanit dhe Evropës, me sinqeritet e them se ansambli i këtyre aktorëve është një nga më të mirët, një nga tre ansamblet më të mira në Ballkan, andaj dhe e vlerësojë shumë që kam qenë i ftuar të punoj këtu me ta”, u shpreh regjisori Kočovcki.
Për aktorin Shkëlzen Veselin, kjo është hera e dytë e bashkëpunimit me regjisorin Kočovcki. Ai në këtë shfaqje e sjellë një nga rolet kryesore, atë të Ukit, një ushtar i Ushtrisë Çlirimtare të Kosovës, që kalon nga mitologjia, si linjë e gjakut prej Mujës së mitologjisë e deri tek Uki. Ai tha për KultPlus se kjo shfaqje është një bashkëdyzim i mitologjisë dhe kohës moderne, aty ku ka ndodhur lufta e fundit. Ai krahas të tjerash gjatë shfaqjes ballafaqohet edhe me vëllanë, që për shumë vite e kishte konsideruar si djalë të tezës. Në këtë përballje ata kuptojnë se të dy janë të fiksuar pas të njëjtës femër.
Aktori Veseli tregoj se procesi i provave deri tek finalizimi i shfaqjes ka rrjedhë shumë mirë për kundër problemeve me hapësirën në Teatër, për shkak se kanë filluar edhe disa projekte të tjera, në të njëjtën kohë.
“Është një punë dy mujore e gjysmë, procesi ka qenë mjaft i mirë edhe për faktin se është hera e dytë që po punoj me Martinin . Të punosh me të është një ndjenjë shumë e mirë, pavarësisht lodhjes e ndjen dhe një kënaqësi për shkak se evoluon puna çdo ditë e më shumë”, tregoi aktori Veseli.
Regjisori Agim Selimi tha për KultPlus se kjo shfaqje ishte shumë e qëllueshme, ndërsa veçoi lojën e aktores Gresa Pallaska.
“Mendoj që ishte kapur thelbi i një lloj autobiografie dhe një lloj kalvari në të cilin kemi kaluar ne. Mendoj që edhe regjisori kishte arritur të krijoi një dramë prej dromcave skenike dhe ishte brilante Gresa Pallaska. Mendoj që është një shfaqje në të cilën dominoj, pa lënë anash edhe lojën e aktorëve të tjerë”, tha regjisori Selimi për KultPlus.
Repriza e parë e kësaj shfaqje vjen sonte më 20 mars, duke filluar nga ora 20:00. / KultPlus.com
“Hamleti” është një nga kryeveprat e autorit të njohur William Shakespear. Duke qenë tragjedia më e famshme në gjuhën angleze, ajo është inskenuar edhe në shumë gjuhë e vende të botës. Së fundmi Hamleti vjen në Kosovë përmes një drame origjinale shqipe.
Kësisoj në vitin 2017-të, saktësisht në tetor të këtij viti, çmimi për Dramën Origjinale Shqipe “Katarina Josipi”, iu nda veprës “Hamleti simbas Horacit”, e cila erdhi nga autori kosovar Ag Apolloni. E pikërisht kjo dramë bashkë me personazhet e shkruara nga Apolloni, ka nisë të marrë jetë në skenën e vogël të vogël të Teatrit Kombëtar të Kosovës.
Hamleti vjen i shkruar nga një shqiptar, luhet nga një shqiptar e poashtu nën direktivat e një shqiptari. Ag Apolloni
“Hamleti simbas Horacit”, është shfaqja e dytë për vitin 2018-të që ka nisë të punohet në TKK. Kjo shfaqje vjen me regji të regjisorit Ilirjan Himaj ndërsa ngjitet në skenë nga gjashtë aktorë që do i japin frymë këtyre personazheve.
Hamleti – Shkëlqim Islami, Horaci – Labinot Lajçi, Poloni & Klaudi – Agron Shala, Laerti & Fortinbrasi – Kreshnik Malushaj, Gertruda – Valina Muçolli dhe Ofelia – Beslidhje Bytyqi, janë kasta e aktorëve të “Hamleti simbas Horacit”.
Në një ditë të provave të kësaj shfaqje ishte i pranishëm edhe ekipi i KultPlus. Leximi në tavolinë të jepte një ndjesi interesante krejt asaj loje që do të paraqitet para audiencës shqipfolëse.
KultPlus, bisedoi me regjisorin Ilirjan Himaj, i cili ndihet i kënaqur për besimin që i është dhënë për ta sjellë në skenë këtë vepër. Duke u bazuar edhe në peshën e veprës regjisori Himaj, tha se kjo ka bërë që jo vetëm ai por të gjithë aktorët ta punojnë shfaqjen me përgjegjësinë më të madhe, madje ai ka shtuar se edhe aktorët po kontribuojnë mjaft shumë që të arrijnë një nivel sa më të lart të interpretimit dhe të shfaqjes si tërësi.
Regjisori Ilirjan Himaj tha se kjo vepër origjinale, me një studim origjinal nga Ag Apolloni ka një potencial të jashtëzakonshëm që t’i ofroi diçka të re publikut. Ai tutje tha se është ndier i befasuar nga kjo vepër, veçmas nga fakti që është e krijuar nga një autor vendor.
Ilirjan Himaj
“Realisht unë si regjisor kam qenë duke kërkuar diçka të re dhe jam pak i befasuar kur më vjen diçka krejtësisht ashtu siç e kam pasur nevojën”, tha ai, duke vazhduar të thotë se kjo vepër tregon se autori Ag Apolloni ka bërë një studim të thellë të veprës origjinale e nga kjo nënkupton që ai edhe është njohës i madh i Shekspirit. Poashtu regjisori, pohoi se drama e Apollonit, duket se ka depërtuar thellë edhe në nënvetëdijen e personazheve, duke u shprehur se autori ka sjellë një lexim të veçantë edhe të studimeve të pikëpamjeve të autorëve të tjerë për Hamletit si nga Frojdi dhe autorë të tjetër.
“Ne kemi parë shumë versione që janë krijuar në botë duke u bazuar në Hamletin e Shekspirit dhe në këtë rast edhe Agu ka krijuar një hipotezë të veten mbi Shekspirin ku ka hedhur disa pyetje dhe mendime të tij lidhur me veprën dhe kështu kemi një version origjinal të Hamletit që nuk e kemi parë më herët as diku tjetër dhe jo më tek ne. Nga vepra shihet se Agu ka bërë një studim të thellë dhe është njohës i madh i Shekspirit dhe i Hamletit dhe na ka ofruar diçka shumë origjinale dhe të këndshme me skena shumë komike dhe atraktive por duke ruajtur edhe përmbajtjen, dramaticitetin dhe rimën e Shekspirit”, është shprehur për KultPlus regjisori Himaj.
Nuk ka shumë kohë që ka filluar procesi i provave për ta sjellë këtë dramë tek publiku por gjithçka duket që po rrjedh me hapa të shpejt. Roli i Hamletit në këtë shfaqje jetësohet nga aktori Shkëlqim Islami.
Shkëlqim Islami, aktori shqiptar nga Maqedonia ka marrë përsipër një rol mjaft të madh. Ai ka thënë se e veçanta e këtij Hamleti është se është shkruar nga një dramaturg shqiptar, nën regjinë e një regjisori shqiptari dhe i luajtur nga një aktor shqiptar. Ai tutje tregoi për KultPlus se ky rol sjellë një sekret të madh të Horacit, pak para vdekjes së tij dhe kështu Hamleti paraqitet në bazë të këndvështrimit dhe marrëdhënieve me Horacin.
“Hamleti i Agut fillon kur mbaron ai i Shakespearit. E kam marrë një Hamlet ndryshe nga ai origjinali por tash edhe në lexim e sipër po e shoh që Ag Apolloni nuk i ka ik shumë veprës origjinale, ai në veprën e tij nuk e ka dëmtuar “Hamleti”-n e Shekspirit, ai prapë ia ka lënë komplekset dhe dilemat”, tregoi aktori Islami.
Shkëlqimi, numëron jo dhe pak bashkëpunime me regjisorin Ilirjan Himaj, e ky bashkëpunim i radhës vetëm se po e dëshmon gjuhën e tyre të përbashkët artistike. Islami është pjesë e Teatrit të Kumanovës dhe tashmë përmes roleve të tij është i njohur për publikun e atjeshëm, mirëpo në skenën e Teatrit Kombëtar të Kosovës ai po kthehet pas shtatë vitesh.
“Kthimi përsëri në këtë teatër po më duket një ndryshim edhe po më duket që kam bërë një pauzë shumë të gjatë në profesion edhe pse realisht unë luaj minimumi deri në tri shfaqje në vit në Teatrin e Kumanovës atje ku edhe jam i punësuar, por deri më tani po ndihem shumë i kënaqur me punën rreth shfaqjes, kjo pasi që jemi një ekip që po funksionojmë shumë mirë”, tha ndër të tjera ai.
Një version i paparë më herët do të vijë edhe në personazhin e Ofelies, kështu shprehet Beslidhje Bytyci, aktorja që do ta luaj këtë rol.
“Në shfaqje është një qasje krejt tjetër i “Ofelies”, në një dimension më të gjerë dhe më të hapur sa i përket personazhit në raport me personazhet e tjera”, u shpreh aktorja Bytyci, e cila ndërkohë shtoi se është e kënaqur shumë me qasjen profesionale dhe metodën e regjisorit Himaj, ndërkohë që sipas saj tërë ekipa është tejet pozitive.
“Hamleti simbas Horacit”, ka një ekip profesional prapa syve të publikut. Kompozitor i kësaj shfaqje do të jetë kompozitori i njohur kosovar Memli Kelmendi ndërsa skenografia e kostumografia i është besuar Agnesa Malushajt.
Krejt në fund, kjo shfaqje pritet të vijë premierë në fillim të muajit prill në skenën e vogël të Teatrit Kombëtar të Kosovës. / KultPlus.com
Dhjetëra artistë ishin mbledhur sot në skenën e vogël të Teatrit Kombëtar të Kosovës, prej nga edhe kishin filluar të diskutojnë për aktivitetet e mëtutjeshme për të mbledhur fonde për ta ndihmuar regjisorin Bekim Lumi i cili po përballet me sëmundjen e rëndë të kancerit, shkruan KultPlus.
Duke qenë se regjisori i njohur Bekim Lumi tash e dy vite po përballet me këtë sëmundje, dhe trajtimin i tij i mëtutjeshëm mjekësor po bëhet i papërballueshëm për buxhetin e tij familjar, artistët kanë marrë një vendim, që të mobilizohen dhe të solidarizohen me njeriut me të cilin kanë ndarë shumë nga përvoja e tyre.
Pas këtij takimi, Fatmir Spahiu në një deklaratë për media tha se kjo iniciativë është bërë pa dijeninë e regjisorit Bekim Lumit. Ai tregoi se në këtë mbledhje artistët diskutuan disa iniciativa për mbledhjen e fondeve.
“E para që vlen të ceket është se kjo nuk është një iniciativë institucionale dhe në anën tjetër nuk është dëshirë e pastër e regjisorit Bekim Lumi, pra regjisorit artistit e njeriut të teatrit që ne si miq dhe shokë po duam që t’i ndihmojmë. Ai nuk besoj se do ta lejonte një mbledhje të tillë sepse krenaria e tij është e tillë dhe ne e duam ashtu siç është ai”, u shpreh aktori Fatmir Spahiu.
Ai tutje shtoi se kjo mbledhje është një shembull i jashtëzakonshëm që tregon solidaritetin e artistëve që ta ndihmojnë kolegun e tyre. Spahiu tutje tha se përmes aktivitete të planifikuara beson se do ta arrijnë vlerën që është e domosdoshme për regjisorin Lumi.
Ndërkohë Adriana Matoshi sqaroi për media se përmes aktiviteteve të tyre po mundohen që sado pak ta ndihmojnë Bekim Lumin. Ajo tha që dëshira dhe solidariteti që ta ndihmojnë regjisorin, i ka bërë të gjithë aktorët një.
“Jemi bërë një, më vjen keq që në këtë mënyrë jemi bërë një por më shumë se i duhemi ne Bekim Lumit, na duhet Bekim Lumi neve”, u shpreh aktorja Matoshi.
Ajo tregoi për media se gjatë diskutimeve të tyre kanë iniciuar ide të ndryshme për të dhënë kontributin e tyre artistik, përmes detyrave të ndryshme.
“Brenda jemi mbledhur për të dhënë ide që ta japim kontributin tonë artistik në mënyra të ndryshme. Dikush po merr iniciativa që të komunikojnë me njerëzit jashtë Kosovës, dikush me Ministri të Shëndetësisë, dikush me deputet dhe me ministra, e artistë që veprojnë jashtë vendit”, tregoi aktorja Matoshi ndërsa shtoi se ata vet si aktorë kanë marrë iniciativa që të mbajnë aktivitete në shesh apo në klubet dhe kafiteritë e Prishtinës.
Ndërkohë, thirrja që është bërë për të ndihmuar Bekim Lumin ka këto të dhëna si më poshtë, dhe të gjithë ata që duan të ndihmojnë regjisorin, mund ti transferojnë mjetet e tyre në këto xhirollogari.
Bartësi i kontos: BEKIM LUMI
Adresa: Rr. “Theodor Muzaka”, H. 1, Nr. 10, Prishtinë, 10000, RKS, Kosovë
Numri i kontos: 1110251567000198
Banka: ProCredit Bank Kosovo J.S.C.
Adresa e Bankës: Rr. George Bush, Nr. 16, Prishtinë, Kosovë
Ndërkaq, për banorët jashtë Kosovës, përveç të dhënave të mësipërme, duhet të jenë edhe këto shënime shtesë:
Account No (IBAN): XK051110251567000198
SWIFT (BIC) CODE: MBKOXKPRXXX
Bank Identification Code: PRCBDEFFXXX
Correspondent / Intermediary Bank: PROCREDIT Bank AG, Frankfurt am Main, Germany./KultPlus.com
Premiera e shfaqjes “Njeriu që mungonte” me regji të Isa Qoses e me tekst të Zymber Kelmendit do të shfaqet sonte në skenën e madhe të Teatrit Kombëtar të Kosovës, shkruan KultPlus.
Ngjarja e kësaj shfaqje lidhet me personazhin e Agronit, i cili për disa vite ka qenë i zhdukur i luftës. Kthimi i tij në shtëpi, e shokon familjen e tij. Në mesin e tyre, lind një dilemë: si do t’u tregojnë të tjerëve për kthimin e tij! Shumë projekte janë bërë në emrin e “rënies heroike” të tij. Nëse ai del, do dalin telashe për përfituesit e projekteve. Familja e tij merr një ndihmesë financiare si familje e dëshmorit, dhe ato të ardhura i kanë futur në kredi. Tashmë Agroni ka dy rrugë: të dal hapur në publik, apo të pres përfundimin e projekteve. Koha kalon dhe Agroni vazhdon të qëndroj brenda. Në oborrin e shkollës qe mban emrin e tij, pritet të vendoset shtatorja e tij. Ai krejt në fund del me një vendim.
Ngjarjen e kësaj shfaqje në skenë do ta jetësojnë aktorët: Teuta Krasniqi, Basri Shala, Agron Shala, Doresa Rexha dhe Gani Rrahmani. Skenografe e kësaj shfaqje është Shqipe Kamberi, kostumografe Samka Ferri, skulptor Agron Blakçori dhe kompozitor Korab Shaqiri.
Premiera do të shfaqet sonte duke filluar nga ora 20:00, kurse reprizat e para më 17 dhe 19 shkurt duke filluar nga ora 20:00./ KultPlus.com
Ministria e Kulturës, Rinisë dhe Sportit e Republikës së Kosovës, sivjet ka një buxhet prej 36,523,903.86€.
Ky buxhet sipas zyrtarëve të kësaj ministrie për vitin 2018-të, konsiderohet të ketë një rritje të konsiderueshme të tij në raport me buxhetin e vitit të kaluar. Kësisoj, tashmë është bërë edhe planifikimi i ndarjes së këtyre mjeteve për institucionet vartëse të MKRS-së.
Për KultPlus, shefi i kabinetit të Ministrisë së Kulturës Samir Hoxha, shpalosi buxhetin e këtyre institucioneve, për të cilat tha se, pasi që buxheti i aprovuar për vitin 2018-të ka shënuar rritje të dukshme, sipas tij, sigurisht që mund të ketë edhe rritje për institucionet e kulturës.
“Meqenëse buxheti i aprovuar për vitin 2018 ka shënuar një rritje të dukshme, sigurisht që mund të ketë edhe rritje për institucionet e kulturës, por rritje mund të bëhet vetëm me rishikim të buxhetit në përputhje me nevoja dhe kërkesa për buxhet shtesë nga institucionet vartëse të MKRS-së”, ka thënë Hoxha për KultPlus.
Në përputhje me politikat programore të institucioneve të kulturës të vitit 2018, në vijim sjellim të dhënat në lidhje me buxhetin e institucioneve vartëse të MKRS-së:
Teatri Kombëtar i Kosovës i janë ndarë gjithsej 370,000.00€, Qendra Kinematografike e Kosovës sivjet në buxhetin e saj ka 765,995.00€, Ansambli Shota këtë vit merr 162,500.00€, Filharmonia e Kosovës në buxhet do të ketë 345,000.00€, Galeria Kombëtare e Kosovës do të ketë 163,500.00€, Baleti Kombëtar i Kosovës merr 240,000.00€, Galeria Qafa – 29,000.00€ dhe Kosova Filmi – 10,000.00 €.
Sipas raporteve te zyrës për buxhet dhe financa në MKRS, buxheti është nën-alokuar për periudhën Janar-Mars 2018 nëpër institucionet e kulturës menjëherë pasi që është bërë alokimi i buxhetit në nivel të MKRS-së. Siç dihet alokimi i buxhetit bëhet në baza tremujore, nënalokimi nëpër institucionet e kulturës është bërë duke u bazuar në Politikat Programore të institucioneve të kulturës./ KultPlus.com
Pak kohë pas publikimit të katër projekteve që do të inskenohen në skenën e vogël të vogël të Teatrit Kombëtar të Kosovës, kanë nisë provat për shfaqjen “Bardh”, të autorit kroat Dubravko Mihanovic, e që në skenë do të vijë me regji të regjisorit kosovar Fatos Berisha.
Shfaqja, e cila ka filluar me prova në muajin janar, tashmë është thuajse në përfundim dhe shumë shpejt pritet të dalë para audiencës kosovare. Për të folur më shumë rreth tekstit, inskenimit, kastës së aktorëve e poashtu edhe për datën e premierës, KultPlus, sjellë një rrëfim të shkurtër më regjisorin Fatos Berisha.
“Bëhet fjalë për dramën ‘Bardh’ të autorit bashkëkohor kroat Dubravko Mihanovic. Është një dramë minimaliste, e cila më bëri përshtypje për stilin e shkrimit, dialogët dhe mënyrën e trajtimit të vet strukturës dramatike. Unë kisha lexuar më parë një dramë tjetër të tij, dhe në kontakt e sipër me autorin, më ra në duar edhe kjo dramë e tij e cila më pëlqeu shumë dhe më është dukur e përshtatshme për skenën e vogël të TKK”, tha fillimisht për KultPlus, Berisha, i cili vazhdoi tutje të tregoi për veçantitë që do të sjellë kjo shfaqje sa i përket inskenimit.
“Të them të drejtën, unë tentoj që gjithmonë të sjellë risi në projektet e mia, por kjo gjë nuk është e lehtë natyrisht. Në anën tjetër, në vazhdimësi më preokupojnë temat sociale dhe fatet e njerëzve nga margjina e shoqërisë, dhe ky tekst më ka ofruar pikërisht atë. Është një dramë për ‘peshqit e vegjël’”, tha regjisori.
Kasta e aktorëve të “Bardh” përbehët nga Shpëtim Selmani dhe Tristan Halilaj. Dy emra të aktorëve kosovar të cilët jo rrallë herë i kemi parë në shfaqjet e regjisorit Berisha.
“Me të dy aktorët kam punuar më parë në projekte tjera teatrore dhe i njoh shumë mirë. Vlerësova se personazhet e shkruara në dramë u përshtaten atyre si aktorë. Poashtu edhe ata njohin stilin dhe metodën time të punës, andaj vendimi për të punuar së bashku ishte i lehtë për të gjithë ne”, u shpreh Fatos Berisha, duke thënë tutje se janë një ekip e vogël dhe kjo ua lehtëson pak punën logjistike, megjithëse sipas tij, nga ana artistike kjo nuk përbën ndonjë lehtësi, përkundrazi.
“Si proces i punës deri tani ishte vërtet i këndshëm, në një atmosferë relaksuese që na jep të gjithëve një hapësirë të domosdoshme për punë kreative”, pohoi ai.
“Bardh” është përkthyer nga gjuha kroate nga vetë Fatos Berisha ndërkaq për skenografinë dhe kostumet është përkujdesur Arben Shala.
“Bardh”, është premiera e parë e vitit 2018-të që ngjitet në skenën e Teatrit Kombëtar të Kosovës. Premiera shfaqet më 14 shkurt ndërsa reprizat e para vijnë më 23 dhe 24 shkurt./ KultPlus.com
Teatri Kombëtar i Kosovës ka vendosur që aktori Armend Baloku të gjobitet me 444 euro.
Ky është vendimi që ka marrë drejtori i përgjithshëm i TKK-së, Agim Sopi, pasi Baloku në shenjë proteste nuk ka marrë pjesë në reprizën e shfaqjes “Bordel Ballkan” të martën mbrëma. Pas mungesës së tij, institucioni është detyruar ta anulojë dhënien e shfaqjes.
Vendimi i drejtorit Agim Sopi i është dërguar Ministrisë së Kulturës të mërkurën. Ky veprim i Sopit bazohet në Rregulloren për stimulimin dhe përgjegjësitë e ansamblit rezident të TKK-së. Por gjoba është e papranueshme për aktorin Baloku dhe sipas tij, drejtori i përgjithshëm, Agim Sopi, dhe udhëheqësi artistik Agon Myftari nuk janë njerëz të denjë për ta udhëhequr Teatrin Kombëtar të Kosovës.
Drejtori Agim Sopi ka thënë se në bazë të Rregullores, aktori që nuk vjen në reprizë të shfaqjes pa arsye detyrohet të paguajë gjysmën e biletave, në rastin e dytë, të gjitha biletat dhe në rastin e tretë i ndërpritet kontrata e punës. “Pasi salla e TKK-së ka 296 karrige, Baloku do t’i paguajë gjysmën e biletave, që i bie për 148 karrige nga tri euro, që i bie 444 euro”, ka thënë Sopi, shkruan KohaDitore./ KultPlus.com
Shfaqja “Bordel Ballkan”, njëra prej më të shikuarave në Teatrin Kombëtar të Kosovës, është anuluar të martën, 20 minuta para kohës kur është dashur të niste.
Këtë veprim TKK-ja e ka ndërmarrë pasi aktori Armend ka refuzuar të marrë pjesë në shfaqje në shenjë proteste për pakënaqësitë e tij ndaj institucionit ku punon, TKK-së. Kësisoj TKK-ja nuk ka hapur dyert për ata që kanë rezervuar mbi 100 bileta dhe të tjerët që kanë lënë t’i presin biletat pak para se të niste shfaqja.
“Me përgjegjësi mund të them se rreth 400 veta janë kthyer mbrapa sonte. Kjo është njëra prej shfaqjeve më të shikuara në TKK dhe sonte kanë ardhur shumë njerëz pasi ka kohë që nuk është dhënë ‘Bordel Ballkan’”, ka thënë organizatori i TKK-së, Beqir Beqiri. Në mbrëmjen e së martës drejtori i përgjithshëm dhe udhëheqësi artistik nuk u janë përgjigjur thirrjeve telefonike të gazetës.
Aktori Armend Baloku ka refuzuar të luajë duke përdorur si shkas disa akuza sipërfaqësore për udhëheqësit e TKK-së. Këtë e ka bërë nëpërmjet rrjetit social “Facebook”.
“Në shenjë proteste sonte nuk do të interpretoj në shfaqjen ‘Bordel Ballkan’”, ka shkruar ai në profilin e tij. Aty ka shkruar se ka kohë që ka reaguar përbrenda institucionit, lidhur me nivelin e ulët, qoftë të organizimit nga ana e menaxhmentit, qoftë nga ana artistike e, sipas tij, fatkeqësisht asgjë nuk ka ndryshuar.
Akuza brenda stafit të TKK-së shpërthyen javën e kaluar midis drejtorit të përgjithshëm, Agim Sopi dhe Këshillit Drejtues, që nisën në lidhje me programin e këtij viti, shkruan Koha Ditore./ KultPlus.com
Viti 2016-të, në skenën e Teatrit Kombëtar të Kosovës, solli para publikut prishtinas shfaqjen me tekst të Teki Dervishit e regji të Martin Kochovskit “Eshtrat që vijnë vonë”. Kjo shfaqje ka korrur mjaft suksese, udhëtoi në disa festivale ndërkombëtare dhe fitoi disa çmime. E pas dy vitesh, Martin Kochovski, regjisori maqedonas që bëri goxha shumë bujë me shfaqjen “Eshtrat që vijnë vonë”, kthehet në Teatrin Kombëtar të Kosovës, për të inskenuar tashmë tekstin e Sabri Hamitit “Pasioni”.
Në sallën e leximit të TKK-së, veç është përzgjedhur kasta që do ta jetësoj këtë vepër dhe ka nisë leximi i tekstit të Sabri Hamitit. Për këtë gjë, KultPlus, ishte në një ditë të provave në Teatrin Kombëtar të Kosovës, për të biseduar nga afër me regjisorin Martin Kochovski, për shfaqjen e re që pritet të ngjitet në skenën e madhe të Teatrit Kombëtar të Kosovës, në fillim të muajit mars.
Koncepti i shfaqjes “Pasioni” është të pyeturit e vetes lidhur me kuptimin e luftës dhe sakrificat që bëhen për qëllime e ideale më të mëdha. Shfaqja vë në pikëpyetje se sa ia vlen të bëhen sakrifica të tillë. Do të jetë një shfaqje dinamike, e cila ka një lojë intensive, loja e aktorëve ecën me hapa të shpejt duke mos i lënë vend monotonisë.
Krejt si fillim të këtij rrëfimi regjisori maqedonas Martin Koschovski thotë se ndihet i mahnitur nga përkushtimi dhe profesionalizmi i aktorëve të teatrit në përgjithësi.
“Komunikimi me aktorët është më të vërtetë i shkëlqyer dhe unë shpeshherë e them se janë dy ansamble, unë kam punuar në disa shfaqje në disa vende të Ballkanit, e në disa vende të tjera të Evropës dhe mund t’i shoh vetëm dy ansamble të aktorëve, një në Maqedoni dhe një në Kosovë. Unë jam i kënaqur me punën e të gjithëve këtu dhe secili në këtë teatër është një aktor i mirë”, tregoi fillimisht për KultPlus, regjisori Kochovski i cili vazhdoi tutje të tregoi, se ideja e shfaqjes ka ardhur në mënyrë shumë spontane ndërsa, pasi që, ai kishte lexuar tekstin nuk kishte hezituar të vijë sërish në Kosovës për ta punuar një shfaqje të radhës.
“Kur e lexova tekstin më është dukur e ngjashme me pjesët e mija. Sabri Hamiti është si të thuash Gabriel Garcia Marquezi shqiptar, kjo vepër është shumë bukur e shkruar. Në anën tjetër jam i mahnitur nga ansambli i këtij teatri dhe nga profesionalizmi i këtij teatri dhe kjo është arsyeja që unë menjëherë e pranova rolin e regjisorit në këtë shfaqje”, është shprehur regjisori Kochovski.
“Pasioni”, do të jetësohet nga aktorët: Arta Selimi, Ard Islami, Shkëlzen Veseli, Semira Latifi, Ismet Azemi, Lumnije Sopi- Mucaj, Gresa Pallaska, Shpëtim Kastrati e Shengyl Ismaili.
Sa i përket pritshmërisë së regjisorit për këtë shfaqje, se a do të jetë e suksesshme ashtu siç ishte edhe “Eshtrat që vijnë vonë”, Martin Kochovski, tha për KultPlus, se “Pasioni” do ta tejkalojë atë.
“Kjo shfaqje do të jetë një nivel më të lartë se shfaqja e kaluar, e kam këtë ndjenjë dhe ambiciet e gjithë ekipit janë të tilla”, pohoi Kochovskit.
Ai krejt në fund tregoi se bashkëpunimi me skenografen Juliana Voykova, me kompozitorin Oliver Josifovski dhe aktorët do të sjellin një shfaqje që do ta kënaq publikun.
“Pasioni”, është projekt i trashëguar i vitit 2017-të dhe që inskenohet në TKK në këtë vit. Shfaqja, pritet të dalë me premierë në fillim të muajit mars, ndërsa pas saj, pritet të nisin projektet e miratuara për vitin 2018-të./ KultPlus.com
“Rojat e Taxhit”, me tekst të Rajiv Joseph e me regji të Altin Bashës e cila u dha premierë më 15 dhjetor në Teatrin Eksperimental në Tiranë, sonte shfaqet në kryeqytetin kosovar, shkruan KultPlus.
Kjo shfaqje të jetësohet nën lojën e aktorëve Gazmend Gjoka dhe Lulzim Zeqja e me koreografi nga Gjergj Prevazi, është shfaqje mysafire në Teatrin Kombëtar të Kosovës, dhe vjen sonte më 28 janar me fillim nga ora 20:00 në Prishtinë.
“Rojat e Taxhit”, shfaqet edhe nesër më 29 janar në TKK, në po të njëjtin orar.
Ndërkohë Altin Basha, është regjisori i shfaqjes tejet të suksesshme “I ligu për mend”, shfaqje kjo që përgjatë 1 viti në Prishtinë, mbushi sallën e madhe të Teatrit Kombëtar të Kosovës./ KultPlus.com
